1. Shuj paniguca cazaranapi pensarijushpaca ¿imacunatata tapurina can?

TUCUI Jesusta catijcunataca Jesusmi umashna mandajun. Shinapash Jesusta catij huarmigu cazarashpaca paipa cusa umashna mandachunmi saquina can. Chaimandami shuj huauquiguhuan cazaranata pensajushpaca, familiataca ¿alicha cuidai ushanga? ¿Jehová Diostachu paipa causaipica pundapi churan? ¿Jehová Diosta sirvishpa catingapaj ayudahuangacha? nishpami tapurina can. Shinallata paniguca ñucapash cazarashpaca ¿imapita ayudaita ushani? ¿Imagumandapash ñapashchu culirani? ¿Imagutapash na mitsashpachu pimanbash carani? Jehová Dioshuanga ¿ali amigachu cani? nishpami pensarina can (Ecl. 4:9, 12). Shuj panigu cazarashca jipa cushilla causangapa munashpaca nara cazarashpallatami shuj ali decisionda agllana can.

2. Caipica ¿imatata yachajugripanchi?

² Ashtaca millón panigucunaca paicunapa cusagucuna umashna mandachun saquishpami shuj ali ejemplota ricuchishca. Ñucanchi organizacionbi cashna panigucunahuan sirvinajushcamandami ninanda cushijupanchi. Jehová Diostapash tucuipi cazunajushcamandami felicitapanchi. Caipica quimsa tapuicunatami yachajugripanchi: 1) Cazarashca panigucunaca ¿ima llaquicunatata tal vez charita ushan? 2) ¿Imamandata cazarashca huarmigucunaca paicunapa cusa umashna mandachun saquishca? 3) Jehová Dios cushca autoridadta cazunamandaca ¿imatata Jesusta catij cusahuarmicunaca Jesusmanda, Abigailmanda, María huarmigumandaca yachajuita ushan?

3. Cazarashpaca ¿imamandata na tucuipi cushilla causaita ushapanchi?

³ Cazarashpa causanataca Jehová Diosmi churashca. Shinapash juchayucuna caimandami Bibliapi nishca shinaca cazarashca “causaipica llaquicunata” chari ushanchi (1 Juan 1:8; 1 Cor. 7:28). Shinaca cazarashca causaipi panigucuna ima llaquicunata chari ushashcata ricupashunchi.

4. Huaquimbica ¿imamandata huarmigucunapaca paicunapa cusata cazunaca pinganai cashcata ricui ushan?

 ⁴ Huaquinbica huarmigucunaca paicunata imashina viñachishcamandami paicunapa cusata cazunaca pinganayai cashcata ricui ushan. Estados Unidosmanda Marisol paniguca ninmi: “Ñuca viñashca pushtupica huarmicunaca jaricunahuan igualmi can nishpami viñachishca. Chaimandami huaquimbica ñuca cusaguta cazunaca na siempre fácil can. Shinapash Jehová Diosmi cusacuna huarmigucunata umashna mandachun saquishca”.

5. Huaquin jaricunaca ¿ima panda yuyaitata huarmigucunamandaca charin?

⁵ Cutin huaquin huarmigucunaca huarmigucunata yangapi churaj cusacunahuan cazarashcami causan. Shuj llactamanda Ivonne shuti paniguca ninmi: “Ñuca causajuj llactapica jaricunami importante can. Chaimandami paicunara micunatapash primero micun. Huarmi huahuagucunataca huahuamandami limpiachun, yanuchun yachachin. Cutin jari huahuacunataca mamacuna, panicunami sirvishpa causan”. Asia llactamanda shuj panigupashmi cashna nin: “Huarmicunapaca imatapash ali yachana, imatapash ali ruranaca na minishtirinllu ninmi. Ashtahuangarin huarmiguca huasipi imapash cosascunata rurashpa, cusatapash imatapash na nishpa causanallami ali can” ninmi. Cashna yuyaita catij cusacunaca Jesuspa ejemplotaca na catinajunllu. Huarmigutapash na cushichingachu. Jehová Diospa ñaupapipash nalimi ricuringa (Efes. 5:28, 29; 1 Ped. 3:7).

6. Jehová Dioshuan ali amigo tucungapaca cazarashca panigucunaca ¿imatata rurana can?

⁶ Chaishuj semanaca Jehová Dios, cusacuna paicunapa familiata mantinichun, cuidachun, Jehová Diosmanda yachachichun munashcatami yachajuparcanchi (1 Tim. 5:8). Cazarashca panigucunaca ashtaca cosascunata rurana cashpapash Bibliata liingapaj, liishcapi pensaringapaj, Jehová Diosta tucui shunguhuan mañangapami tiempoguta llujchina can. Shinapash chaita ruranaca na fácil ricurita ushanllu. Tal vez huasipi ashtaca cosascunata ruranata charishcamandami shaijushca, tiempopash illaj sintirita ushan. Tiempoguta llujchina na fácil cajpipash Jehová Dioshuan ali amigo cangapaj tiempota llujchinaca minishtirishcapachami can. Shinallami Jehová Dios munashcashna paihuanga ali amigocunapacha tucuita ushapashun (Hech. 17:27).

7. Cusagucunata cazushpa respetachunga huarmigucunataca ¿imata ayudanga?

⁷ Huaquinbica cusapa autoridadta cazuna, respetanaca shinllimi ricuringa. Shinapash Jehová Diosca huarmigucunataca, cusagucunata cazuchunmi mandashca. Jehová Dios cusagucunata imamanda umashna mandachun saquishcata ali intindishpaca huarmigucunapaca cusagucunata cazunaca facilmi ricurita ushan.

8. Efesios 5:22-24​pi nishca shinaca ¿imamandata Jesusta catij huarmigucunaca paicunapa cusacunataca cazunata decidin?

⁸ Jehová Diosca cazarashca panigucuna paicunapa cusata respetachunmi munan. Chaita ali yachaimandami cazarashca panigucunaca paicunapa cusata cazunata decidishca (Efesios 5:22​manda 24​caman liipangui). Huarmigunaca Jehová Dios paicunata juyaimanda, paicunapa alipallata mandashcata yachaimandami shina ruran (Deut. 6:24; 1 Juan 5:3).

9. Cazarashca huarmigucuna paicunapa cusata respetajpica huasigupica ¿imashinata causaita ushan?

⁹ Cai mundopi Jehová Diosta na rijsij gentecunaca huarmigucuna Jehovapa mandashcacunata pactachichunga na munanllu. Shinallata cusacunata cazushpa respetanaca pinganai cashcatami ricun. Shinapash Jehová Diosca huarmigucunamanga imapash pinganai cosascunata rurachunga na mandajunllu. Cazarashca huarmigucuna Jehovapa mandashcata pactachijpica huasipica tranquilo, cushilla causaigumi  tiaita ushan (Sal. 119:165). Shinami huasigupica paicunapa huahuacunapash, cusagupash tranquilo causaita ushanga.

10. Panigu Carolmandaca ¿imatata yachajui ushapanchi?

¹⁰ Huarmigucuna paicunapa cusacuna juchayu cajpipash respetashpa, cazushpaca Jehová Diosta juyashcata, respetashcatami ricuchin. Jehová Diosllatami cusacunataca umashna mandachun saquishca. Panigu Carolca ninmi: “Ñuca cusagu juchayuj cashcamanda imapipash pandarinataca alimi yachani. Shinapash Jehová Dioshuan ali amigo cangapaj munaimandami, Jehová munashcashna ñuca cusaguta cazungapaj esforzarini”.

11. a) Panigu Aneesetaca, paipa cusaguta perdonachunga ¿imata ayudan? b) Chaimandaca ¿imatata yachajupanchi?

¹¹ Huarmigucunapaca paicunapa cusa paicunamanda na yapata preocuparijta ricushpaca, paicunapaca cusaguta cazunaca na facilchu canga. Shina pasajpi panigu Aneese imata rurajta ricupashun. Paniguca ninmi: “Ñucaca ama ñapash culirangapami esforzarini. Ashtahuangarin tucuicunallata juchayucuna cashcata yarishpami Jehová Dioshnallata perdonangapami esforzarini. Chashna rurashpaca ñucallatami tranquila sintirini” (Sal. 86:5). Cusagucunata perdonaj huarmigucunapaca paicunapa cusagucunata cazuna, respetanaca ashtahuan facilmi ricurin.

12. Bibliapica shujcunata cazushpa respetanamandaca ¿ima ejemplocunatata taripanchi?

¹² Huaquin gentecunaca pitapash cazushpa respetanaca nali cashcatami ricun. Shinapash chaica na ciertochu can. Bibliapica ashtaca jaricuna, huarmicuna shujcunata cazushpa respetashcatami ricuchin. Cunanga Jesusmanda, Abigailmanda, María huarmigumanda yachajupashunchi.

13. Jesusca ¿imamandata Jehovapa mandashcacunataca cazushpa respetan? Intindichipai.

¹³ Jesusca imaguta ali rurai ushashpapash, ali yachaita charishpapash Jehová Diostaca siempremi cazushpa respetarca. Jesusca ali yachaita charimandami shujcunaman yachachijushpaca jahualla, intindirinallata yachachirca (Juan 7:45, 46). Jehová Diosca Jesús imatapash aligutapacha rurai ushashcata yachashpami, cielota cai alpatapash rurashpa ayudachun saquirca (Prov. 8:30; Heb. 1:2-4). Jehová Diosca Jesusta causachishpaca “jahua pachapipash, cai  alpapipash mandachunmi” tucui ushaita curca (Mat. 28:18). Jesusca imaguta ali rurai ushashpapash Jehová Diosta juyaimandami paipa ayudataca siempre mascan (Juan 14:31).

14. a) Cusacunaca Jehová Diosmandaca ¿imatata yachajuita ushan? b) Proverbios 31​manda ¿imatata yachajuita ushan?

¹⁴ Jehová Diosmandaca cusacunaca ¿imatata yachajuita ushan? Jehová Diosca jaricuna huarmigucunata umashna mandachunmi saquishca. Shinapash chaica jaricuna huarmigucunamanda yali cashcataca na nisha ninllu. Jehová Diosca tucuicunatami igual ricun. Chaimandami Diospa Reinopipash Jesushuan mandachunga huarmigucunatapash agllashca (Gál. 3:26-29). Jehová Diosca Jesuspi confiaimandami ashtaca cosascunata rurachunga autoridadta cushca. Shinallatami cusacunapash paicunapa huarmigupi confiashpa paicunata imagupipash ayudachun saquinalla can. Bibliapica ali yachajushca huarmiguca huasita ali cuidashpa, imagutapash randishpa, jatushpa, negociocunata rurai ushashcatami ricuchin (Proverbios 31:15, 16, 18​ta liipangui). Cusacunaca paicunapa huarmigupi confiaimandami na shuj esclavatashna ricushpa, imagupipash ayudachun saquin. Shina rurashpami huarmigucunapa yuyaitapash cusacunaca respetashcata ricuchin (Proverbios 31:11, 26, 27​ta liipangui). Cusacuna huarmigucunapa nishcata uyajpica huarmigucunapaca cusacunata respetanaca ashtahuan facilmi canga.

15. Jesuspa ejemplomandaca huarmigucunaca ¿imatata yachajuita ushan?

¹⁵ Jesusmandaca huarmigucunaca ¿imatata yachajuita ushan? Jesusca ashtaca cosascunata ali rurai ushashpapash Jehová Diosta respetashpa cazunaca na pinganayai cashcatami ricun (1 Cor. 15:28; Filip. 2:5, 6). Shinallatami Jesusta catij huarmiguca paipa cusata respetashpa cazunaca na pinganai cashcata ricun. Paipa cusagutaca juyaimandami imagupipash apoyan. Ashtahuangarin Jehová Diosta juyaimanda, respetaimandami chashna ruran.

16. Abigaíl huarmiguca 1 Samuel 25:3, 23-28 nishcashnaca ¿ima llaquicunatata mishana tucurca? (Callari paginamanda fotota ricupangui).

¹⁶ Abigaíl shuti huarmiguca Nabal shuti runahuanmi cazarashca carca. Cai runaca mitsa mitsa, jariyashca runami carca. Shina cajpipash paipa cusata saquishpa rinataca na pensarcachu. Davidpash, paipa soldadocunapashmi paipa cusa Nabaltaca huañuchigrinajurca. Shinapash Abigaíl huarmiguca paipa cusata huañuchichunga na saquircachu. Ashtahuangarin paipa cusa Nabalta ama huañuchichun, paipa huasipi causajcunatapash ama huañuchichunmi uchalla imatapash ruranata pensarirca. Abigaíl huarmiguca na manllashpami Davidhuan, Davidpa 400 soldadocunahuanbash respetohuan parlangapaj rirca. Abigaíl huarmiguca na culpata charishpapash Davidtaca pairami perdonahuai ningapaj rirca (1 Samuel 25:3, 23​manda 28​caman liipangui). Chaita ricushpami Davidca Jehová Dios Abigaíl huarmiguta, pai ama juchata rurachun cachamushcata cuenta japirca.

17. Cusacunaca Davidpa, Abigailpa ejemplomandaca ¿imatata yachajuita ushan?

¹⁷ Davidmandapash, Abigailmandapash cusacunaca ¿imatata yachajuita ushan? Abigaíl huarmiguca imagutapash ali yuyashpa ruranata yachaj huarmigumi carca. David, Abigailpa consejota uyashpaca alitami rurarca. Chaimandami ashtaca gentecunata yangamanda huañuchinata jarcari usharca. Shinallatami shuj ali cusaca imapash decisionda agllagrijushpaca paipa huarmigu ima nijtapash ali uyana can. Shina rurashpami cusaguca shuj ali decisiondapash agllaita ushan.

18. Huarmigucunaca Abigailmandaca ¿imatata yachajuita ushan?

¹⁸ Huarmigucunaca Abigailmandaca ¿imatata yachajuita ushan? Jehová Diosta cazushpa respetaj huarmiguca paipa familiapica ninandami ayudaita ushan. Paipa cusagu Jehová Diosta na sirvijpipash, Biblia nishca shinami paipa cusaguta cazushpa respetangapaj  esforzarin. Shinami paipa cusagupash Bibliamanda yachajuna munaita charichun ayudaita ushan (1 Ped. 3:1, 2). Huaquinbica huarmigucuna ali ejemplota ricuchingapaj esforzarijpipashmi cusagucunaca Jehová Diosmanda yachajungapaca na munanga. Shinapash Jehová Dios, huarmigucuna paicunapa cusata cazushpa, respetangapaj esforzarijujta ricushpami, ninanda cushijun.

19. Huarmigucunaca ¿imacunapita cusataca na cazunman?

¹⁹ Jesusta catij huarmigucunaca cusacunata cazuna cashpapash. Cusacuna Jehovapa mandashcacunata huashaman saquichun mañajpica, na rurangachu. Huaquinbica Jehová Diosta na sirvij cusaca paipa huarmigutaca, llullachun, shuhuachun, o imapash nali cosascunata rurachunmi mañaita ushan. Shinapash cazarashca huarmigucunaca, tucui Jesusta catijcunashnallatami Jehová Diosta tucuimanda yali cazuna cashcataca ali yachan. Chaimandami paipa cusagu, Jehová Dios na gushtashca cosascunata rurachun mañajpica na ruranga. Shinapash paipa cusa mañashcata imamanda na rurai ushashcatami na manllashpa aliguman intindichina can (Hech. 5:29).

20. María huarmigu Jehová Dioshuan alipacha amiga cashcataca ¿imashinata yachapanchi?

²⁰ María huarmiguca Jehová Dioshuanga ali amigami carca. Bibliamandapash ali yachajushca cashcatami ricupanchi. María huarmigu Bibliamanda ali yachashcataca Bautizaj Juanba mama Elizabethuan parlashca shimicunapimi ricuita ushanchi. María huarmigu, Elizabethuan parlashpaca Bibliamanda Escrituras Hebreaspa textocunata casi 20 viajecunata japishpa parlashcatami ricupanchi (Luc. 1:46-55). Shinallata María huarmigu Josehuan cazarangapaj comprometirishca cajpipash, Jehová Diospa angelca Josemanga na primero ricurircachu. Ashtahuangarin María huarmigumanmi primeroca ricurirca. Shina ricurishpami chai angelca, “Taita Diospa shuj churigutami charigringui” nishpa villarca (Luc. 1:26-33). Jehová Diosca María huarmigu imashina cashcataca alimi yacharca. Jesusta juyashpa ali cuidana cashcatapashmi ali yacharca. María huarmiguca, Jesús huañushpa jahua cieloman rishca jipapashmi paica Jehová Dioshuan ali amiga cashpa catirca (Hech. 1:14).

21. María huarmigumandaca cusacunaca ¿imatata yachajuita ushan?

²¹ María huarmigumandaca, cusacunaca  ¿imatata yachajuita ushan? Imagutapash ali yuyashpa ruraj cusaguca paipa huarmigu Bibliagumanda ali yachajushcata ricushpaca ninandami cushijun. Paipa huarmigu imatapash yalishpami ruranga yashpaca na pensajunllu. Ashtahuangarin Bibliamanda ali yachashpaca paipa familiapi ninanda ayudai ushashcatami ricun. Paipa huarmigu Bibliamanda ashtahuan yachajpipash, cusami Familiahuan Adorana Tutata, villachinapi Jehová Diosta sirvingapaj shuj shuj cosascunata ruranapipash ñaupaman pushana can (Efes. 6:4).

22. Huarmigucunaca María huarmigumandaca ¿imatata yachajuita ushan?

²² Huarmigucunaca María huarmigumandaca ¿imatata yachajuita ushan? Huarmigucuna cusacunata respetashpa cazuna cashpapash, huarmigucunaca Jehová Diospi tucui shunguhuan crishpa catingapami esforzarina can (Gál. 6:5). Chaipaca Bibliamanda ashtahuan yachajungapaj, yachajushcapi pensaringapaj tiempogutaca llujchina can. Chaita ruranami Jehovapa mandashcacunata cazushpa respetashpa catichun ayudanga. Shinallata paipa cusaguhuanbash cushilla causachunmi ayudanga.

23. a) Cusagucunata cazushpa respetaj huarmigucunaca congregacionbipash, familiapipash ¿imashinata ayudan? b) Paicunallatapash ¿imashinata causanga?

²³ Huarmigucunaca Jehová Diosta juyaimandami paicunapa cusacunataca respetashpa cazun. Jehovapa mandashcacunata cazuj huarmigucunaca ashtahuan cushillami causan. Cashna huarmigucunaca congregacionbi joven huauquipanicunapaca shuj alipacha ejemplomi can. Shinallata familiapi, congregacionbipash tucuicuna ali llevarichunmi ayudan (Tito 2:3-5). Cunan punllacunapica Jehová Diosta sirvijcunamandaca ashtahuanbachaca huarmigucunami can (Sal. 68:11). Shinapash congregacionbica tucuicunallatami shuj responsabilidadta charipanchi. Chai responsabilidadta cada uno imashina pactachinataca, chaishuj semanami yachajupashun.