1. Eaa te au uianga ta tetai tuaine ka ui me inangaro aia i te akaipoipo tane?

KO IESU te upoko apakore o te au Kerititiano katoatoa. Inara, me akaipoipo tetai vaine Kerititiano, tei raro ake aia i te taoonga upoko o tetai tangata apa ua. Kare te reira i te mea mama. Me inangaro aia i te akaipoipo tane, ka puapingaia aia me akamanako i teia au uianga: ‘Eaa te akaari maira e ka riro mai teia taeake ei upoko ngutuare meitaki? Ko te tavini anga ia Iehova te mea puapinga rava atu i roto i tona oraanga? Eaa au i manako ei e ka riro mai aia ei upoko meitaki i te pae vaerua me akaipoipo maua?’ Ka puapinga katoaia te tuaine me ui aia kiaia uaorai: ‘Eaa te au tu meitaki taku ka akaari kia puapingaia to maua akaipoipo? E tu akakoromaki e te oronga ua ainei toku? E pirianga ketaketa ainei toku kia Iehova?’ (Kohe. 4:9, 12) Me rave te vaine i te au ikianga meitaki, ka tauturu teia kia mataora e kia puapingaia tona akaipoipo.

2. Eaa ta tatou ka uriuri i roto i teia atikara?

² E mirioni ua atu tuaine Kerititiano tei akanoo i tetai akaraanga meitaki no te kauraro ki ta ratou tane. Kia akameitakiia ratou! Te mataora nei tatou e te au vaine tiratiratu i te tavini ia Iehova! I roto i teia atikara, ka akamanako tatou i te pauanga ki teia au uianga e toru: (1) Eaa te au manamanata te ka tupu ki te au vaine akaipoipo? (2) Eaa te au vaine ka iki ei kia kauraro ki ta ratou au tane? (3) Eaa ta te au tane e te vaine akaipoipo Kerititiano ka apii mai no runga i te tu kauraro mei te akaraanga o Iesu, Abigaila, e Maria, te vaine a Iosepha e te metua vaine o Iesu?

3. Eaa ra ka tupu ei te manamanata i rotopu i te au tokorua akaipoipo?

³ E apinga aroa apa kore te akaipoipo no ko mai i te Atua, inara e tu apa ua to te tangata. (1 Ioa. 1:8) Te tumu teia i akamatakite mai ei te Pipiria i te au tokorua akaipoipo e ka tupu te pekapeka “i te kopapa nei.” (1 Kori. 7:28) Ka akara tatou i tetai au manamanata te ka tupu ki te vaine.

4. Eaa tetai vaine akaipoipo ka manako ei e me kauraro aia ki tana tane, te taakaakaia ra aia?

⁴ No te tu i utuutuia mai ei tetai vaine, penei ka manako aia e ko te kauraro ki tana tane, te taakaakaia ra aia. Karanga a Marisol no Marike e, “Te ngai i utuutuia mai au, kua akakite putuputuia ki te au vaine e kua aite ratou ki te au tane i te au mea katoatoa. Kua kite au i ta Iehova akanoonooanga no te taoonga upoko e kua oronga aia ki te au vaine tetai apainga akaaka e te akangateitei. Inara e ngata i te kauraro ua rai ki te taoonga upoko o taku tane.”

5. Eaa te au manako tarevake ta tetai tane ka manako no runga i te vaine?

⁵ Penei kua akaipoipo tetai vaine i te tane tei manako e kare te vaine e puapinga ana mei te tane rai. Karanga te tuaine ko Ivon, no South America mai, “I to matou ngai, ka na mua te au tane i te kaikai e oti ka aru mai te vaine. Ka anoanoia te tamariki tamaine kia tunu i te kai e te tama, e ka tavini te metua vaine e te au tuaine i te tamariki tamaroa ‘ei au ariki no te ngutuare.’” Karanga te tuaine ko Yingling, no Asia mai: “Karanga tetai tuatua i to matou reo e kare te vaine e anoanoia kia apiiia me kore kia rauka te tu karape. Ko ta ratou tuanga ko te rave i te angaanga no te ngutuare, kare ratou e akatikaia i te akakite i to ratou manako ki ta ratou tane.” Tetai tane aroa kore tei kopae i te Pipiria, ka akangata aia i te oraanga o tana vaine, kare e aru i to Iesu akaraanga, e ka akamareka kore ia Iehova.—Ephe. 5:28, 29; 1 Pete. 3:7.

6. Eaa ta te au vaine akaipoipo ka rave kia matutu to ratou pirianga kia Iehova?

⁶ I roto i te atikara i mua ake nei, inangaro a Iehova i te au tane Kerititiano kia akono i to ratou ngutuare i te pae vaerua, pae manako ngakau e te pae kopapa. (1 Timo. 5:8) Inara, ka anoanoia te au tuaine akaipoipo kia tatau e te akamanako oonu i te Pipiria i te au rā, e kia pure kia Iehova mei to ratou ngakau. Kare teia i te mea mama. Maata te angaanga a te vaine, penei ka manako ratou e kare o ratou taime e te maroiroi no te rave i teia, inara e mea puapinga kia akanoo ratou i tetai taime. Eaa te tumu? No te mea te inangaro maira a Iehova ia tatou tatakitai kia akatupu e kia tamou i tetai pirianga meitaki kiaia.—Anga. 17:27.

7. Akapeea e mama ai te apainga a te vaine akaipoipo?

⁷ E tika, penei ka anoanoia te vaine kia tauta pakari i te kauraro ki tana tane apa ua. Inara, ka mama iaia i te rave i teia me mārama e me āriki aia i te tumu i karanga ai te Pipiria kia kauraro aia ki tana tane.

8. Ia Ephesia 5:22-24, eaa te vaine Kerititiano ka iki ei kia kauraro ki tana tane?

⁸ Ka iki te vaine akaipoipo Kerititiano kia kauraro ki tana tane no te mea ko ta Iehova tera e pati maira. (E tatau ia  Ephesia 5:22-24.) Ka irinaki aia ki tona Metua i te rangi ma te kite e kua akakeuia te Atua e te aroa e ka pati ua rai ki te vaine kia rave i tetai apinga ka puapingaia aia.—Deu. 6:24; 1 Ioa. 5:3.

9. Eaa te ka tupu me kauraro te tuaine Kerititiano ki tana tane?

⁹ Te akanauru nei teianei ao i te au vaine kia kopae i ta Iehova au ture, e ko te tu kauraro e tu taakaaka ïa. Ko te tika, kare teianei ao i kite i to tatou Atua aroa. Kare rava a Iehova e akaue i tana au tamaine akaperepere kia rave i tetai apinga te ka taakaaka ia ratou. Tetai tuaine te tauta pakari ra i te rave i te tuanga ta Iehova i oronga kiaia, ka akatupu aia i te ‘au i roto i tona ngutuare. (Sala. 119:165) Ka puapingaia aia, tana tane, e te tamariki.

10. Eaa ta tatou ka apii mai mei ta Carol i tuatua?

¹⁰ Me kauraro te vaine ki tana tane apa ua, te akaari ra aia i tona aroa e te tu akangateitei no Iehova, tei akatupu i te taoonga upoko. “Kite au e tarevake ana taku tane,” i tuatua ai a Carol no South America mai. “Kite katoa au e ko taku ka rave me tarevake aia, te akaari maira e te akaperepere ra au i toku pirianga kia Iehova. No reira ka tauta au i te kauraro ki taku tane no te mea te inangaro nei au i te akamareka i toku Metua i te rangi.”

11. Eaa tei tauturu ia Aneese kia akakore i te tarevake, eaa ta tatou ka apii mai mei tana i tuatua?

¹¹ Kare i te mea mama no te vaine kia akaari i te tu akangateitei e te kauraro me kare tana tane e akarongo mai ki tona manako e tona manamanata. Akara tatou eaa ta te tuaine ko Aneese i rave te tupuanga teia. Karanga aia: “Ka tauta au kia kore au e riri. Ka akamaara au e e rave ana tatou katoatoa i te tarevake. No reira ka tauta au i te akakore i te tarevake o tetai mei ia Iehova rai. Me pera au, ka maru au.” (Sala. 86:5) Me akakore te vaine i te tarevake, ka mama i reira iaia te kauraro ki tana tane.

12. Eaa ta tatou ka kite mai i roto i te Pipiria?

¹² Manako tetai pae e me kauraro koe ki tetai tangata, e tu paruparu toou. Inara e tarevake teia. I roto i te Pipiria, e maata te  akaraanga o te aronga kauraro tei akaari i te tu ngakau toa. Ka akamanako tatou i te akaraanga o Iesu, Abigaila, e Maria.

13. Eaa a Iesu i kauraro ei kia Iehova? Akamarama mai.

¹³ Kauraro a Iesu kia Iehova, kare no te rava kore i tona mārama e te kite karape. Akapapu mai tana au apiianga taka meitaki e te mama ua e e tangata kite tikai aia. (Ioa. 7:45, 46) Kite a Iehova e e tu karape to Iesu e kua angaanga kapiti raua i te anga i te au mea katoatoa i te rangi e te enua nei. (Mase. 8:30; Ebe. 1:2-4) I muri ake i to Iesu tuakaouanga, kua oronga a Iehova kiaia i ‘te mana katoa o to te rangi e te ao katoa.’ (Mata. 28:18) Noatu e tu karape to Iesu, kua irinaki rai aia kia Iehova no te aratakianga. Te tumu? No tona inangaro i tona Metua.—Ioa. 14:31.

14. Eaa ta te au tane ka apii mai mei (a) ta Iehova akono anga i te vaine? (e) te au manako i roto ia Maseli 31?

¹⁴ Apiianga no te au tane akaipoipo. Kare a Iehova i akaue i te vaine kia kauraro ki ta ratou tane no te mea e tu paruparu to ratou. Kua akapapu mai a Iehova i te reira na te ikianga i te au vaine e te au tane ei tutara ma Iesu. (Gala. 3:26-29) Kua akaari a Iehova i tona irinaki i tana Tamaiti na te oronga anga i te mana akaaere kiaia. Mei te reira rai, ka oronga te tane akaipoipo i tetai mana akaaere ki tana vaine. Akakite te Pipiria e ka rave te vaine akono meitaki i te au angaanga o te ngutuare, ka oko mai e ka akaaere i te enua, e ka akono i te au mea i te pae moni. (E tatau ia Maseli 31:15, 16, 18.) Kare aia i te tavini ma te kore ona tikaanga kia akakite i tona manako. Ka irinaki e ka akarongo tana tane kiaia. (E tatau ia Maseli 31:11, 26, 27.) Me akangateitei te tane i tana vaine, ka mataora i reira tana vaine i te kauraro kiaia.

15. Eaa ta te vaine akaipoipo ka apii mai mei ia Iesu?

¹⁵ Apiianga no te au vaine akaipoipo. Noatu e maata ta Iesu i rave, kare aia i manako ana e kua taakaakaia aia no te kauraro kia Iehova. (1 Kori. 15:28; Phili. 2:5, 6) Mei te reira rai, ko te vaine akono meitaki tei aru i te akaraanga o Iesu, kare aia e manako e kua taakaakaia aia no te kauraro ki tana tane. Ka tauturu aia i tana tane no tona inangaro iaia, e pera tona inangaro e te tu akangateitei ia Iehova.

16. Ia 1 Samuela 25:3, 23-28, eaa te manamanata tei tupu kia Abigaila? (Akara i te tutu i te kapi mua.)

¹⁶ Ko Nabala te ingoa o te tane a Abigaila. E tangata noinoi, akatietie e te kino tikai aia. Noatu tona tu, kare a Abigaila i tatara ana i tana tane. Penei ka rauka iaia i te muteki ua e te tuku ia Davida e tona pupu tangata kia tamate i tana tane. Inara kua rave aia i tana i rauka no te paruru ia Nabala e pera to raua ngutuare. Akamanako ana i te tu ngakau toa ta Abigaila i akaari te aravei anga aia i te 400 au tane, e te uriuri i te manamanata kia Davida ma te akangateitei. Kua tataraara katoa aia no te au angaanga kino ta tana tane i rave. (E tatau ia 1 Samuela 25:3, 23-28.) Kua kite mai a Davida e kua taangaanga a Iehova i teia vaine ngakau toa i te ako iaia kia kore e rave i tetai ara kino tikai.

17. Eaa ta te au tane akaipoipo ka apii mai mei ia Davida e Abigaila?

¹⁷ Apiianga no te au tane akaipoipo. E vaine ngakau meitaki a Abigaila. Kua akarongo a Davida ki tana akoanga. Tei tupu, kua kopae a Davida i te akamaringi anga toto. Mei te reira rai, ka akarongo  meitaki te au tane ki te manako o ta ratou vaine i mua ake ka rave ei i tetai ikianga puapinga. Penei ka tauturu te manako o tana vaine iaia kia kore e rave i te au ikianga kino.

18. Eaa ta te au vaine akaipoipo ka apii mai mei ia Abigaila?

¹⁸ Apiianga no te au vaine akaipoipo. Ko te vaine akaipoipo tei aroa e tei akangateitei ia Iehova, ka puapingaia tona ngutuare noatu kare tana tane e tavini ana ia Iehova e te aru i tana au kaveinga. Kare aia e kimi ravenga no te tatara i tana tane. Mari ra, no tona tu akangateitei e te kauraro, ka tauta aia i te akamaroiroi i tana tane kia apii no runga ia Iehova. (1 Pete. 3:1, 2) Noatu kare te tane e aru i tona akaraanga meitaki, ka mareka a Iehova i te tu tiratiratu ta te vaine kauraro e akaari ra Kiaia.

19. Eaa te taime kare te vaine e akarongo ki tana tane?

¹⁹ Kare te vaine akaipoipo Kerititiano e turu i tana tane me patiia aia kia aati i tetai ture Pipiria me kore kaveinga. Ei akaraanga, penei ka pati te tane i tana vaine kia pikikaa, kia keia, e te rave i tetai apinga kare a Iehova e mareka. Ka na mua te au Kerititiano, kapiti mai te au vaine akaipoipo i te akarongo ki te Atua ko Iehova. Me patiia tetai tuaine kia kopae i te au kaveinga Pipiria, ka patoi aia na te akamārama anga ma te tu maru e te papu i te tumu kare aia e rave i tana e pati ra.—Anga. 5:29.

20. Akapeea tatou e kite ei e pirianga vaitata to Maria kia Iehova?

²⁰ E pirianga vaitata to Maria kia Iehova. Kua kite meitaki aia i te au Tuatua Tapu. Te pukapuka anga raua ko Elisabeta, te metua vaine o Ioane Papetito, kua taiku a Maria i te au irava i roto i te Tuatua Tapu Epera e 20 tuma taime. (Luka 1:46-55) Pera katoa, e akamanako i teia: Noatu kua tapaoia aia kia akaipoipo ia Iosepha, kare te angera a Iehova i mama mai ana kia Iosepha. Kua tuatua te angera kia Maria na mua i te akakite e ka anau aia i te Tamaiti a te Atua. (Luka 1:26-33) Kua kite meitaki a Iehova  ia Maria, e kua papu iaia e ka akaperepere e ka akono a Maria i tana Tamaiti. I muri ake i to Iesu matenga e te aereanga ki te rangi, kua akono tamou a Maria i tona pirianga meitaki kia Iehova.—Anga. 1:14.

21. Eaa ta te au tane ka apii mai mei ia Maria?

²¹ Apiianga no te au tane akaipoipo. Ka mataora te tane akaipoipo me kite meitaki tana vaine i te Pipiria. Kare aia e manata i te tu kite o tana vaine. Kua mārama aia e me kite meitaki tetai tuaine i te Pipiria e te au kaveinga Pipiria, e tauturu maata te reira ki te ngutuare. Inara noatu e kite atu te vaine i tana tane, na te tane rai te apainga kia akono i te akamorianga a te ngutuare e te au angaanga pae vaerua.—Ephe. 6:4.

22. Eaa ta te au vaine akaipoipo ka apii mai mei ia Maria?

²² Apiianga no te au vaine akaipoipo. Ka anoanoia te vaine kia kauraro ki tana tane, e kia akono i tona uaorai turanga pae vaerua. (Gala. 6:5) Kia rave i te reira, ka akanoo aia i te tuatau no tana uaorai apii e te akamanako oonu i te reira. Ka tauturu teia iaia kia akaari ua rai i te aroa e te tu akangateitei no Iehova, e te rekareka i te kauraro ki tana tane.

23. Akapeea te au vaine, tona ngutuare, e te putuputuanga e puapingaia ai mei to ratou tu kauraro?

²³ Ka maata atu te mataora o te vaine tei kauraro ki tana tane no tona inangaro ia Iehova, ki to te vaine tei kopae i ta Iehova akanoonooanga no te taoonga upoko. E akaraanga meitaki ratou no te au tane e te au vaine mapu. Ka akatupu ratou i te pirianga mataora i roto i te ngutuare e te putuputuanga. (Tito 2:3-5) I teia tuatau, ko te au vaine te maataanga o te aronga e tavini tiratiratu ra ia Iehova. (Sala. 68:11) E tuanga puapinga ta tatou katoatoa i roto i te putuputuanga, te au tane e te au vaine. I roto i te atikara ka aru mai, ka uriuri tatou akapeea me akono i teia au tuanga.