1. Ked razmislini ando po budućo rom, so jekh phen valjani te pućel pe?

O ISUS HRIST isi le autoritet upro sa o hrišćanija. Ov tano savršeno poglavari. Ama, ked jekh romni lela pese rome, olako poglavari ovela jekh nesavršeno manuš. Odova šaj te ovel laće izazov. Odolese ked razmislini ando po budućo rom, šukar tano te pućel pe: „So mothovi maje so odova phral ka ovel šukar poglavari? Da li tano olese ko prvo than ko životi te služini e Jehovase? Ako nane, sose mislinava so ov hem palo venčanje ka ovel neko ko ka pomožini amenđe te aćhova paše e Jehovaja?“ Ki aver strana, i phen valjani hem te pućel pe: „Kola osobine me isi man kola ka ćeren odova brako te ovel bahtalo? Da li hijum strpljivo hem velikodušno? Da li hijum paše amal e Jehovaja?“ (Prop. 4:9, 12). Kobor i romni ka ovel bahtali ko brako, but ka zavisini odolestar kola odluke anela angleder so khuvela ko brako.

2. So ka dikha ko akava članko?

² But phenja mothovena šukar primer ađahar soj tane podložna pe romese. On ćaće zaslužinena bari pohvala! Amenđe tani čast te služina e Jehovase zajedno odole verno phenjencar! Ko akava članko ka razmotrina o odgovorija ko trin pućiba. Sar prvo, kola izazovija jekh romni ka ovel la? Sar dujto, sose i romni birini te ovel podložno pe romese? Sar trito, so šaj o phralja hem o phenja kola tane ko brako te sikljon kotar i podložnost ando Isus, andi Avigeja hem andi e Isusesi daj, i Marija?

3. Sose na postojini savršeno brak?

³ O brako tano savršeno dar ando Devel, ama o manuša tane nesavršena (1. Jov. 1:8). Odolese, e Devleso Lafi upozorini e romen hem e romnjen kola tane ko brak so ka ovel len izazovija kola tane opisujime sar „neve problemija ko životi“ (1. Kor. 7:28). Zapazin disave izazovija kola i romni šaj te ovel la.

4. Sose i romni šaj te mislini soj tano diso ponižavajuće te ovel podložno pe romese?

⁴ Disavo puti, sebepi o način sar barilji, i romni šaj te mislini so odova soj tani podložno pe romese tano diso ponižavajuće. I Marisol, koja živini ki Amerika, phenela: „Odothe kuri me bariljum, e romnjen uvek sikavđe so mora te oven jednaka e muršencar ko sa. Ðanava so o Jehova e romen ćhivđa te oven poglavarija hem so e romnjenđe dinđa jekh dostojanstveno uloga. Ama, izazov tano te ovel tut uravnoteženo stav ando poglavarstvo.“

5. Sar disave roma dikhena upro romnja?

⁵ Ki aver strana, i romni šaj te ovel dindi ko rom kova mislini so i romni tani manje važno ando rom. I phen, koja vićini pe Ivon, koja živini ki Južno Amerika, phenela: „Koro amende prvo hana o murša, a palo odova o đuvlja. Ando tikne ćhaja ađićeri pe te spreminen o habe hem te čistinen, ama e tikne ćhaven služini olengi daj hem o phenja hem sikavena len soj tane on ’princija ko ćher.‘“ I phen Jing Ling, koja živini ki Azija, phenela: „Ki mi ćhib isi jekh poslovica premali koja i romni na valjani te ovel gođali ja te ovel sposobno. Oj valjani te ćerel i buti ko ćher, ama nane laće dozvolimo te vaćeri po mišljenje pe romese.“ O rom kova na mothovi mangipe pe romnjaće hem kova na ićeri pe ko odova so i Biblija vaćeri, na olakšini pe romnjaće, na oponašini e Isuse hem na ćerela odova so sviđini pe e Jehovase (Ef. 5:28, 29; 1. Petr. 3:7).

6. So o romnja valjani te ćeren te šaj on kokri te aćhon paše e Jehovaja?

⁶ Sar so dikhljam ko okova članko, o Jehova ađićeri ando roma te brininen pe ando pe porodicake duhovna, emocionalna hem fizička potrebe (1. Tim. 5:8). Ama, o phenja kola tane ko brak mora svako dive te odvojinen vreme te čitinen e Devleso Lafi, hor te razmislinen odolestar hem celone vileja te molinen pe e Jehovase. Odova šaj te ovel pharo. Sebepi so o romnja isi len but buti, on šaj te mislinen so nane len vreme, ni snaga te ćeren odola buća. Ama, but tano važno te odvojinen vreme aso odova. Sose? Odolese so o Jehova mangela svako amendar te ovel hem te aćhol amal oleja (Dela 17:27).

7. So ka pomožini e romnjaće polokho te ispunini pi uloga?

⁷ Haljola pe so i romni valjani but te trudini pe te ovel podložno pe romese kova tano nesavršeno. Ama, olaće ka ovel polokho te ispunini i uloga koja o Jehova dinđa la, ako haljola hem prihvatini e biblijake razlogija sebepi kola valjani te ovel podložno pe romese.

8. Premalo Efešanima 5:22-24, sose jekh phen koja tani ko brak birini te ovel podložno pe romese?

⁸ Jekh phen koja tani ko brak birini te ovel podložno pe romese sebepi so o Jehova rodela latar odova. (Čitin Efešanima 5:22-24.) Oj isi la poverenje upro po nebesko Dad, odolese so đanela so ov mangela la  hem so niked na bi rodela olatar te ćerel diso so nane aso olako šukaripe (Pon. zak. 6:24; 1. Jov. 5:3).

9. Sose tano šukar i romni te poštujini pe romeso autoritet?

⁹ O sveto podstaknini e romnjen te na ićeren pe ko e Jehovase merilija hem upri podložnost te dikhen sar diso ponižavajuće. Naravno, okola kola ađahar razmislinena hem averen ćhivena ađahar te razmislinen, na penđarena amare mangle Devle. O Jehova mangela pe ćhajen hem niked na bi dela len zapovest sebepi koja bi osetinena pe poniženo. Jekh phen koja trudini pe te ispunini i uloga koja o Jehova dinđa la, ćerela te ovel mir ki olaki porodica (Ps. 119:165). Sebepi odova, sarine ki porodica šaj te oven bahtale.

10. So šaj te sikljova ando odova so phenđa i Kerol?

¹⁰ I romni koja tani podložno pe nesavršeno romese mothovi so mangela hem poštujini e Jehova, okole kova e romese dinđa te ovel poglavari. I Kerol, koja živini ki Južno Amerika, phenela: „Ðanava so mo rom ka ćerel greške. Isto ađahar, đanava so o način sar ka reagujinav ko odola greške mothovi kobor ceninava mo amalipe e Jehovaja. Odolese, trudinava man te aćhovav podložno, sose mangava mo nebesko Dad te ovel zadovoljno mancar.“

11. So pomožini e phenjaće koja vićini pe Ines te oprostini hem so šaj amen te sikljova ando odova so oj phenđa?

¹¹ E romnjaće šaj te ovel pharo te poštujini pe rome hem te ovel lese podložno, ako mislini so olake rome na zaniminena olake osećanja hem olake brige. Ama, zapazin so ćerela i phen Ines, koja tani ko brako, ked odova desini pe. Oj phenela: „Trudinava man te na holjanav hem te na bistrav so sare grešinaja. Mo cilj tano, sar o Jehova, hem me spremno te oprostinav. Ked ćerava odova, palem isi man mo mir“ (Ps. 86:5). E romnjaće koja tani spremno te oprostini ka ovel polokho te ovel podložno pe romese.

12. Kola primerija šaj te arakha ki Biblija?

¹² Disave šaj te mislinen so i osoba koja tani podložno, tani slabo. Ama, odova nane  ađahar. Ki Biblija isi but primerija ando manuša kola hine podložna, ama hine hem hrabra. Hajde te dikha so šaj te sikljova ando Isus, andi Avigeja hem andi Marija.

13. Sose tano o Isus podložno e Jehovase? Objasnin.

¹³ O Isus nane podložno e Jehovase sebepi so nane gođalo ja sposobno. Jedino i osoba koja tani but gođali šaj te sikavi ko jednostavno hem ko jasno način sar so o Isus ćerđa (Jov. 7:45, 46). O Jehova đanđa so o Isus tano but sposobno hem dozvolinđa lese zajedno oleja te stvorini sa so isi ko nebo hem ki phuv (Posl. 8:30; Jevr. 1:2-4). Palo odova so o Isus uskrsninđa, o Jehova dinđa le „sa i vlast ko nebo hem ki phuv“ (Mat. 28:18). Iako tano o Isus but sposobno, ov ipak oslonini pe upro Jehova. Sose? Odolese so mangela pe Dade (Jov. 14:31).

14. So šaj o roma te sikljon (a) ando odova sar o Jehova dikhela upro romnja? (b) ando odova so pisini ko Poslovice ko 31. poglavlje?

¹⁴ So o roma šaj te sikljon? O Jehova na ćhivđa e rome te ovel e romnjako poglavari odolese so mislini so o đuvlja tane manje važna ando murša. O Jehova odova mothovđa, ađahar so birinđa hem e muršen hem e đuvlen te vladinen zajedno e Isuseja (Gal. 3:26-29). O Jehova mothovđa so isi le poverenje upro po Ćhavo ađahar so dinđa le autoritet. Isto ađahar, o rom kova tano mudro ka del pe romnjaće disavo autoritet. I Biblija vaćeri kola buća šaj te ćerel jekh sposobno romni. Na primer, oj šaj te brinini pe ando po ćher, te ćinel hem te biknel i phuv hem te ćerel poslovna dogovorija. (Čitin Poslovice 31:15, 16, 18.) Oj nane rob kova nane le pravo te phenel po mišljenje. Umesto odova, olako rom verujini laće hem šunela olako mišljenje. (Čitin Poslovice 31:11, 26, 27.) Ked o rom ko asavko način poštujini pe romnja, olaće na ka ovel pharo te ovel podložno olese.

15. So o romnja šaj te sikljon ando Isus?

¹⁵ So o romnja šaj te sikljon? Iako o Isus ćerđa but bare buća, ov na mislinđa soj tano olese ponižavajuće te ovel podložno e Jehovase (1. Kor. 15:28; Fil. 2:5, 6). Isto ađahar, e sposobno romnjaće koja oponašini e Isuseso primer, na ka ovel ponižavajuće te ovel podložno pe romese. Oj ka podržini pe rome na samo sebepi so mangela ole, nego sebepi so mangela hem poštujini e Jehova.

16. Premali 1. Samuilova 25:3, 23-28, kola izazovija hine la i Avigeja? (Dikh i slika ki naslovno strana.)

¹⁶ E Avigejako rom vićinđa pe Naval. Ov hine sebično, ponosno hem nezahvalno manuš. I Avigeja na hine romni koja sigate ka odustajini kotar po brak. Oj šaj hine te ćutini hem te mukhel e Davide hem olese manušen te mudaren olake rome. Umesto odova, oj ćerđa disave praktična buća te zaštitini e Navale hem po domaćinstvo. Zamislin kobor bari hrabrost valjanđa e Avigejaće đi hine anglo 400 naoružana manuša hem te mothovi poštovanje e Davidese ked vaćerđa oleja. Oj čak hine spremno te preuzmini i odgovornost aso pe romese postupkija. (Čitin 1. Samuilova 25:3, 23-28.) O David spremno priznajinđa so o Jehova prekali akija hrabro romni, dinđa le savet kova valjanđa lese hem ćhinavđa le te ćerel jekh bari greška.

17. So o roma šaj te sikljon ando izveštaj kotar o David hem i Avigeja?

¹⁷ So o roma šaj te sikljon? I Avigeja hine mudro romni. O David hine mudro sose šunđa olako savet. Sebepi odova, o David na mudarđa e manušen kola na hine kriva nisose. Isto ađahar, o rom kova tano  mudro, šukar ka razmislini ando pe romnjako mišljenje angleder te anel važna odluke. Šaj olako mišljenje ka pomožini lese te na anel nemudra odluke.

18. So o romnja šaj te sikljon andi Avigeja?

¹⁸ So o romnja šaj te sikljon? I romni koja mangela hem poštujini e Jehova šaj šukar te utičini upri pi porodica, čak iako olako rom na služini e Jehovase ja na živini premalo olese načelija. Oj na ka rodel sar te ćhinavi po brak ko način kova na temeljini pe ki Biblija. Umesto odova, odoleja so poštujini pe rome hem soj tani olese podložno, oj ka del sa pestar te podstaknini pe rome te sikljol ando Jehova (1. Petr. 3:1, 2). Iako olako šukar primer šaj na ka podstaknini le te služini e Jehovase, o Jehova cenini i vernost koja jekh podložno romni mothovi Olese.

19. Ked i romni na ka šunel pe rome?

¹⁹ Jekh amari phen koja tani ko brak, na ka podržini pe rome ako ov rodela olatar te na ićeri pe ko e biblijake zakonija ja načelija. Na primer, zamislin so jekh phen isi la rom kova nane e Jehovaso svedoko hem kova rodela olatar te hovavi, te ćorel ja te ćerel diso aver so na sviđini pe e Jehovase. Sa o hrišćanija, hem amare phenja kola tane ko brak, najangleder tane dužna te oven odana e Jehovase. Ako andi jekh phen rodela pe te na ićeri pe ko e biblijake načelija, oj valjani te odbini, ađahar so ljubazno ama odlučno ka objasnini sose našti te ćerel odova (Dela 5:29).

20. Sar đanaja so i Marija hine paše amal e Jehovaja?

²⁰ I Marija hine paše amal e Jehovaja. Oj but šukar đanđa e Devleso Lafi. Ði i Marija hem i Jelisaveta, i daj ando Jovan Krstitelj vaćerđe, i Marija pobuter ando 20 putija citirinđa o hebrejska spisija (Luka 1:46-55). Razmislin akalestar: Iako i Marija hine verimi aso Josif, e Jehovaso anđeo na pojavinđa pe olese. Najangleder, o anđeo vaćerđa e Marijaja hem phenđa laće so ka bijani e Devlese Ćhave (Luka 1:26-33). O Jehova but šukar penđarđa e Marija hem hine uverimo so oj ka mangel olese Ćhave hem so šukar ka brinini pe olestar. I Marija sigurno  hem ponodri hine but šukar amal e Jehovaja, čak hem palo odova so o Isus mulo hem hine uskrsnimo ko nebo (Dela 1:14).

21. So o roma šaj te sikljon andi Marija?

²¹ So o roma šaj te sikljon? O rom kova tano mudro tano bahtalo ked olesi romni šukar penđari e Devleso Lafi. Ov na mislini so oj ađahar mangela te lel oleso than hem te ovel poglavari ki porodica. Ov haljola so i phen koja šukar penđari i Biblija hem e biblijake načelija, šaj ćaće te ovel blagoslov pe porodicaće. Naravno, čak iako i romni isi la pobari škola ando po rom, ov tano odgovorno olesi porodica te ovel la porodično proučibe hem te učestvujini ko avera duhovna aktivnostija (Ef. 6:4).

22. So šaj o romnja te sikljon andi Marija?

²² So o romnja šaj te sikljon? I romni mora te ovel podložno pe romese, ama tani hem ponodri odgovorno asi pi duhovnost (Gal. 6:5). Te šaj te ćerel odova, oj mora te arakhi vreme te proučini hem hor te razmislini odolestar. Odova ka pomožini laće hem ponodri te mangel hem te poštujini e Jehova hem te na ovel laće pharo te ovel podložno pe romese.

23. Sose tano šukar e romnjenđe, olenge porodicenđe hem e skupštinaće ked on tane podložna?

²³ O romnja kola aćhona podložna pe romese, sebepi so mangena e Jehova, tane poradosna hem pozadovoljna ando okola kola na poštujinena o poglavarstvo kova o Jehova ćhivđa olenđe. Isto ađahar, on mothovena šukar primer e ternenđe. Sebepi olengo, ki porodica hem ki skupština ka ovel mir hem mangipe (Titu 2:3-5). Avdije, najbaro deo ando e Jehovase verna sluge tane o romnja (Ps. 68:11). Sare amen, bilo te ova murša ja đuvlja, isi amen važno uloga ki skupština. Ko aver članko ka dikha, sar šaj svako amendar te ispunini pi uloga.