1. Σο πρέπει τι πουτσέλ-πες εκ τζουβέλ σο μανγκέλα τι παντρίνελ;

ΣΑΡΕ ι Χριστιανόν κερέλα-λεν κουμάντος ο Ιησούς Χριστός σο ισί τέλειος. Κάνα όμως εκ Χριστιανή τζουβέλ παντρίνελα, λάκο σορό ισί εκ ατελής μουρς. Ανταβά νανέ πάντα εύκολος. Οτθάρ κάνα εκ πφεν μανγκέλα τι παντρίνελ εκχέ πφραλέσαρ, ισί λατσσό τι πουτσέλ-πες: “Σαρ τζανάβα ότι ανταβά πφραλ κα αβέλ λατσσό σορό ι φαμιλιάκο; Τσσουβέλα ι Ιεχωβάσκε πράγματα πρώτα πι ζωγιάτε; Άμα όχι, σο κερέλα-μαν τι πακιάβ ότι κα βοηθίνελ πι φαμιλί τι ατσσόλ πασέ κο Ιεχωβά κάνα κα παντρίνας;” Σίγουρα, εκ πφεν κα αβέλας λατσσό τι πουτσέλ-πες ακαβά-ντα: “Καλά ιδιότητες τθεράβα με τι νταβ ανταλέ μπιαβέστε; Ισινόμ τζενί σο να χολιάνελα εύκολα ντα ντάβα μι βαστένταρ; Ισινόμ λατσσί αμαλίν ι Ιεχωβάσκι;” (Εκκλ. 4:9, 12) Άμα εκ τζουβέλ λέλα λατσσέ αποφάσεις πριν τι παντρίνελ ανταβά μπορίνελα τι βοηθίνελ-λα τι αβέλ ευτυχισμέ πι μπιαβέστε.

2. Σο κα ντικχάς ανταλέ μαθημάστε;

² Μπουτ αμαρέ πφενίνταρ μουκχένα λατσσό παράδειγμας επειδή ντένα καν πουμαρέ ρομές. Αξίνενα αμαρό ισαριπέ! Χαιρίνασα μπουτ σο υπηρετίνασα ι Ιεχωβάς γιεκ ανταλέ αφοσιωμέ τζουβλίντζαρ! Ανταλέ μαθημάστε, κα ντικχάς ο απαντήσεις τρινέ ερωτησιέντε: (1) Καλά ισί μερικές δυσκολίες σο νακχέλα εκ παντριμέ τζουβέλ; (2) Σόσκε τραμπίνελα εκ τζουβέλ τι ντελ καν πι ρομές; (3) Σο σικλιόνα ο αντρόγυνα κατά Ιησούς, κατά Αβιγαία ντα κατά Μαρία, σο ισινέ η ρομνί ι Ιωσηφίσκι ντα η ντάι ι Ιησούσκι;

3. Σόσκε καέκ μπιαβ νανέ τέλειος;

³ Ο μπιαβ ισί εκ τέλειος δώρος κατά Ντεβέλ, αλλά ο τζενέ ισί ατελείς. (1 Ιωάν. 1:8) Άκ’ σόσκε ο Λάφι ι Ντεβλέσκο βακερέλα κο αντρόγυνα ότι κα τθερέν δυσκολίες σο κι Γραφή βακέρντιβενα «στεναχώρια πουμαρέ σωμάστε». (1 Κορ. 7:​28) Ντικχέν μερικές κατά δυσκολίες σο μπορεί τι νακχέλ εκ παντριμέ τζουβέλ.

4. Σόσκε μπορεί τι πακιάλ εκ τζουβέλ ότι άμα κα ντελ καν πι ρομές χασαρέλα πι αξία;

⁴ Εκ τζουβέλ μπορεί τι πακιάλα χουρντιαρέλα μπερί ότι, άμα κα ντελ καν πι ρομές, κα χασαρέλ πι αξία. Η Μαρισόλ, σο μπεσέλα κο Ηνωμένες Πολιτείες, βακερέλα: «Οτθέ σο μπαριλόμ, ο τζουβλιά ασουνένα συνέχεια ότι πρέπει τι αβέν ίσες ι μουρσέντζαρ σαρέ κο πράγματα. Τζανάβα ότι ο Ιεχωβά ντινάς εξουσία κο μουρσά ντα μανγκέλα κατά τζουβλιά τι ντεν-λεν καν. Τζανάβα επίσης ότι ο τζουβλιά αξίνενα σεβασμός. Όμως, μπουτ φαρ δυσκολίντιβαβα τι σεβάναβ ι εξουσία σο τθερέλα μο ρομ».

5. Σο πακιάνα μερικά μουρσά ι τζουβλίνγκε;

⁵ Οκιά μπάνταρ, εκ τζουβέλ μπορεί τι αβέλ παντριμέ εκχέ μουρσέσαρ σο πακιάλα ότι ο τζουβλιά ισί πιο τελέ κατά μουρσά. Εκ πφεν σο βακερένα λάκε Ιβόν ντα μπεσέλα κι Νότια Αμερική, βακερέλα: «Οτθέ σο μπεσάβα με, πρώτα χάνα ο μουρσά ντα σοράν ο τζουβλιά. Η τσσάι πρέπει τι κερέλ χαμπέ ντα τι κερέλ ι κχερέσκε μπουτιά, αλλά ι τσσαβές υπηρετίνενα-λες η ντάι ντα ο πφενιά, ντα σαρέ βακερένα ότι ισί ο “βασιλιάς ι κχερέσκο”». Η Γινγκλίνγκ, εκ πφεν σο τζουβντιόλα κι Ασία, βακερέλα: «Μι τσσιμπάτε ισί εκ λάφι σο μανγκέλα τι βακερέλ ότι ο τζουβλιά να χρειαζίντιβελα τι αβέν έξυπνες ή τι τθερέν ικανότητες. Λένγκι μπουτί ισί τι κερέν ι φαμιλιάκε μπουτιά, αλλά να τθερένα ο δικαίωμας τι βακερέν ποτές οντουβά σο πακιάνα πουμαρέ ρομέσκε». Εκ ρομ σο να σικαβέλα αγάπη ντα να κερέλα οντουλά σο βακερέλα η Γραφή κερέλα δύσκολη ι ζωή πι ρομνιάκι, να μοιάζελα κο Ιησούς ντα πφανγκέλα ι Ιεχωβάσκο γκι.​—Εφεσ. 5:​28, 29· 1 Πέτρ. 3:7.

6. Σο πρέπει τι κερέν ο παντριμέ τζουβλιά για τι αβέν πιο λατσσέ αμαλά ι Ιεχωβάσαρ;

⁶ Σαρ ντικχλάμ κο γιαβέρ μάθημας, ο Ιεχωβά μπεκλεντίνελα κατά μουρσά τι βοηθίνεν πουμαρί φαμιλί τι αβέλ πασέ κο Ιεχωβά, τι σικαβέν ότι πφαμπόνα λάκε ντα τι ανέν λάκε ο αναγκαία. (1 Τιμ. 5:8) Όμως, ο παντριμέ πφενιά πρέπει τι αρακχέν κάθε ντιβές χρόνος για τι διαβάνεν ντα τι σκεφτίνεν λατσσές ι Ντεβλέσκο Λάφι ντα τι κερέν προσευχή αντράλ πουμαρέ γκίσταρ κο Ιεχωβά. Ανταβά μπορεί τι αβέλ δύσκολος. Ο παντριμέ πφενιά τθερένα τι κερέν μπουτ μπουτιά, οτθάρ μπορεί τι πακιάνα ότι να τθερένα ο χρόνος ντα ι ζορ για τι κερέν ανταλά πράγματα. Όμως, ισί μπουτ σημαντικός τι αρακχέν χρόνος ανταλένγκε. Σόσκε; Επειδή ο Ιεχωβά μπεκλεντίνελα σαρέ αμένταρ τι αβάς λατσσέ αμαλά λέσαρ.​—Πράξ. 17:27.

7. Κάνα κα αβέλ πιο εύκολος εκχέ τζουβλιάκε τι ντελ καν πι ρομές;

⁷ Αγαβάσα ότι εκ τζουβέλ πρέπει τι μαρέλ-πες για τι ντελ καν πι ρομές σο ισί ατελής. Όμως, κα αβέλ πιο εύκολος λάκε τι κερέλ ο διορισμός σο ντινάς-λα ο Ιεχωβά άμα κα αγαβέλ ντα κα δεχτίνελ σόσκε η Γραφή βακερέλα τι ντελ καν πι ρομές.

8. Σόσκε τραμπίνελα εκ τζουβέλ τι ντελ καν πι ρομές σαρ σικαβένα ο εδάφια Εφεσίους 5:​22-24;

⁸ Εκ πφεν τραμπίνελα τι ντελ καν πι ρομές επειδή μανγκέλα-λες λάταρ ο Ιεχωβά. (Διαβάνεν Εφεσίους 5:​22-24) Ντέλα μπέσα κο Ιεχωβά σόσκε τζανέλα ότι σο-ντα κερέλα βοβ κερέλα-λες από αγάπη ντα  ποτές να κα μανγκέλας λάταρ τι κερέλ κάτι σο νανέ λάκε λατσσιμάσκε.​—Δευτ. 6:​24· 1 Ιωάν. 5:3.

9. Σο αβέλα-πες κάνα εκ πφεν σεβάνελα ι εξουσία πι ρομέσκι;

⁹ Ο ντουνιάς βακερέλα ι τζουβλίνγκε μα τι ντεν καν κο κανόνες κι Ιεχωβάσκε ντα ότι άμα κα ντεν καν πουμαρέ ρομές χασαρένα πουμαρί αξία. Όμως, οντουλά σο βακερένα ασακέ λάφια να τζανένα καζόμ μπουτ μανγκέλα-αμέν ο Ντεβέλ. Ο Ιεχωβά να κα ντέλας ποτές πι πολύτιμε τσσαΐντε εκ εντολή σο κα κερέλας-λεν τι χασαρέν πουμαρί αξία. Η πφεν σο μαρέλα-πες για τι κερέλ σωστά ι μπουτί σο ντινάς-λα ο Ιεχωβά ανέλα ειρήνη πι φαμιλιάτε. (Ψαλμ. 119:​165) Κερέλα λατσσιπέ πι ρομέσκε, πέσκε ντα πι τσσαβένγκε.

10. Σο σικλιάσα οντουλένταρ σο βακερντάς η Κάρολ;

¹⁰ Η ρομνί σο ντέλα καν πι ρομές σο ισί ατελής σικαβέλα ότι μανγκέλα ντα σεβάνελα ι Ιεχωβάς, οντουλές σο τσσουβέλα γιαβερέν-ντα τι κερέν κουμάντος. «Τζανάβα ότι μο ρομ κα κερέλ λάθη», βακερέλα η Κάρολ, σο μπεσέλα κι Νότια Αμερική. «Τζανάβα επίσης ότι ο τρόπος σο συμπεριφερίντιβαβα κάνα κερέλα λάθη σικαβέλα καζόμ μπουτ εκτιμίναβα μι φιλία ι Ιεχωβάσαρ. Οτθάρ, προσπαθίναβα τι νταβ καν επειδή μανγκάβα τι κεράβ ο γκι μι Νταντέσκο, ι Ιεχωβάσκο».

11. Σο βοηθίνελα ι πφενιά Ανίς τι συγχωρίνελ, ντα σο σικλιάσα λάκε λαφίνταρ;

¹¹ Μπορεί τι αβέλ δύσκολος εκχέ τζουβλιάκε τι σικαβέλ σεβασμός ντα τι ντελ καν άμα νιωθίνελα ότι λάκο ρομ να σκεφτίνελα οντουλά σο νιωθίνελα ντα οντουλά σο κερένα-λα τι ανησυχίνελ. Ντικχέν όμως σο κερέλα εκ παντριμέ πφεν σο βακερένα λάκε Ανίς κάνα αβέλα-πες κάτι ασακό: «Προσπαθίναβα μα τι τσσουβάβ μι γκίστε. Ανάβα μι γκοντιάτε ότι σαρέ κεράσα λάθη. Οντουβά σο μανγκάβα ισί τι συγχωρίναβ αντράλ μι γκίσταρ σαρ ο Ιεχωβά. Ντα κάνα συγχωρίναβα αρακχάβα πάλι ι ειρήνη μι γκοντιάκι». (Ψαλμ. 86:5) Η τζουβέλ σο συγχωρίνελα ισί πιο εύκολος τι ντελ καν.

12. Σο παραδείγματα τθερέλα η Γραφή;

¹² Μερικοί πακιάνα ότι εκ τζενό σο ντέλα καν νανέ ζουρανό. Αλλά ανταβά νανέ μπαγιά. Η Γραφή ισί πφερντί παραδείγματα τζενένγκε σο ντένας καν αλλά ισινέ μπίνταρανε-ντα.  Για τι ντικχάς σο σικλιάσα κατά Ιησούς, κατά Αβιγαία ντα κατά Μαρία.

13. Σόσκε ντέλα καν ο Ιησούς κο Ιεχωβά; Εξηγίνεν.

¹³ Ο Ιησούς ντέλα καν κο Ιεχωβά, αλλά ανταβά να αβέλα-πες επειδή νανέ έξυπνος ή επειδή να τθερέλα ικανότητες. Σάντε εκ μπουτ έξυπνος τζενό κα μπορίνελας τι σικλιαρέλ εκχέ ασακέ απλέ ντα ξεκάθαρε τροπόσαρ σαρ ο Ιησούς. (Ιωάν. 7:​45, 46) Ο Ιεχωβά τζανέλας ότι ο Ιησούς μπορίνελας τι κερέλ μπουτ πράγματα ντα τθερέλας-λες πασέ πέστε κάνα κερέλας ο σύμπαν. (Παρ. 8:​30· Εβρ. 1:​2-4) Σοράν κατά ανάσταση ι Ιησούσκι, ο Ιεχωβά ντινάς-λες “σαρί ι εξουσία κο ουρανός ντα κι πφουβ”. (Ματθ. 28:​18) Παρόλο σο τθερέλα ικανότητες, ο Ιησούς μανγκέλα κατά Ιεχωβά τι βακερέλ λέσκε σο τι κερέλ. Σόσκε; Επειδή μανγκέλα πι Νταντές.​—Ιωάν. 14:31.

14. Σο σικλιόνα ο μουρσά (α) κατά τρόπος σο ντικχέλα ο Ιεχωβά ι τζουβλίν; (β) κατά Παροιμίες κεφάλαιος 31;

¹⁴ Σο σικλιόνα ο μουρσά. Ο Ιεχωβά να μανγκέλα κατά τζουβλιά τι ντεν καν πουμαρέ ρομές επειδή τσσουβέλα ι τζουβλίν πιο τελέ κατά μουρσά. Ο Ιεχωβά σικαντάς-λες ανταβά κάνα τραμπιντάς εμ τζουβλίν εμ μουρσέν τι κυβερνίνεν ι Ιησούσαρ. (Γαλ. 3:​26-29) Ο Ιεχωβά σικαντάς ότι ντέλας μπέσα πι Τσσαβέσκε κάνα ντινάς-λες εξουσία. Αντικάς, εκ γκοντιαβέρ μουρς-ντα κα σικαβέλ ότι ντέλα μπέσα πι ρομνιάκε κάνα κα ντελ-λα χάνικ ευθύνες. Για τι σικαβέλ ο ρόλος σο τθερέλα η άξια τζουβέλ, ο Λάφι ι Ντεβλέσκο βακερέλα ότι μπορίνελα τι κερέλ κουμάντος ι κχερέσκε μπουτιά, τι κινέλ ντα τι μπικινέλ. (Διαβάνεν Παροιμίες 31:​15, 16, 18) Νανέ εκ σκλάβα σο να τθερέλα ο δικαίωμας τι βακερέλ πι γνώμη. Οκιά μπάνταρ, ο ρομ λάκο ντέλα λάκε μπέσα ντα ασουνέλα λάκε ιδέες. (Διαβάνεν Παροιμίες 31:​11, 26, 27) Κάνα εκ μουρς σικαβέλα πι ρομνιάκε ασακό σεβασμός, βόι κα χαιρίνελ τι ντελ-λες καν.

15. Σο σικλιόνα ο τζουβλιά κατά παράδειγμας ι Ιησούσκο;

¹⁵ Σο σικλιόνα ο τζουβλιά. Παρόλο σο ο Ιησούς κερντάς μπαρέ πράγματα, να νιωθίνελα ότι χασαρέλα πι αξία κάνα ντέλα καν κο Ιεχωβά. (1 Κορ. 15:​28· Φιλιπ. 2:5, 6) Αντικάς, εκ άξια τζουβέλ-ντα σο μοιάζελα κο Ιησούς να κα νιωθίνελ ότι χασαρέλα πι αξία κάνα ντέλα καν πι ρομές. Κα υποστηρίνελ πι ρομές, όχι σάντε επειδή μανγκέλα λες, αλλά πιο μπουτ επειδή μανγκέλα ντα σεβάνελα ι Ιεχωβάς.

16. Καλά δυσκολίες νακχλάς η Αβιγαία σαρ βακερένα ο εδάφια 1 Σαμουήλ 25:3, 23-28; (Ντικχέν ι φωτογραφία κι ανγκλαϊνί σελίδα)

¹⁶ Η Αβιγαία ισινέ παντριμέ εκχέ μουρσέσαρ σο βακερένας λέσκε Νάβαλ. Βοβ ντικχέλας σάντε πο νεαυτός, ισινέ μπαρικανό ντα αχάριστος. Άμα η Αβιγαία κα μανγκέλας τι χαλαβέλ πο μπιαβ κα μπορίνελας τι μουκχέλ ι Δαβιδίς ντα λέσκε μουρσέν τι μουνταρέν λάκε ρομές, αλλά βόι να κερντάς-λες ανταβά. Οκιά μπάνταρ, κερντάς σο νακχέλας λάκε βαστέσταρ για τι σώνελ πι ρομές ντα πι μπαρί φαμιλί. Ανέν τουμαρέ γκοντιάτε καζόμ θάρρος χρειαζίντιβελας η Αβιγαία για τι τζαλ τι αρακχέλ ι 400 μουρσέν σο τθερένας όπλα ντα τι κερέλ λάφι με σεβασμός ι Δαβιδίσαρ. Ατζέ-ντα ισινέ έτοιμη τι λελ οπρά-πέστε ο βάρετα οντουλένγκε σο κερντάς λάκο ρομ. (Διαβάνεν 1 Σαμουήλ 25:3, 23-28) Ο Δαβίδ αγαντάς αμέσως ότι ο Ιεχωβά τσσουντάς οντουλέ μπίνταρανε τζουβλιά για τι ντελ-λες ι συμβουλή σο χρειαζίντιβελας για μα τι κερέλ εκ μπαρό λάθος.

17. Σο σικλιόνα ο μουρσά κατά Δαβίδ ντα κατά Αβιγαία;

¹⁷ Σο σικλιόνα ο μουρσά. Η Αβιγαία ισινέ εκ γκοντιαβέρ τζουβέλ. Ο Δαβίδ  ασουντάς-λα ντα αντικάς σικαντάς καζόμ γκοντιαβέρ ισινέ. Ανταλέσαρ σο κερντάς, να λιντάς οπρά-πέστε ο ρατ αθώε τζενένγκο. Αντικάς ο μουρς-ντα σο ισί γκοντιαβέρ, ασουνέλα προσεκτικά ι γνώμη πι ρομνιάκι κάνα χρειαζίντιβελα τι λελ σημαντικές αποφάσεις. Μπορεί λάκι γνώμη τι βοηθίνελ-λες μα τι κερέλ κάτι σο νανέ γκοντιαβέρ.

18. Σο σικλιόνα ο τζουβλιά κατά Αβιγαία;

¹⁸ Σο σικλιόνα ο τζουβλιά. Η τζουβέλ σο μανγκέλα ντα σεβάνελα ι Ιεχωβάς μπορίνελα τι κερέλ μπαρό λατσσιπέ πι φαμιλιάκε, ατζέ-ντα άμα λάκο ρομ να υπηρετίνελα ι Ιεχωβάς ή να τζουβντιόλα αντικάς σαρ βακερένα Λέσκε κανόνες. Βόι να κα ρόντελ τρόπους για τι χαλαβέλ πο μπιαβ. Οκιά μπάνταρ, κα σικαβέλ λέσκε σεβασμός ντα κα ντελ-λες καν για τι βοηθίνελ-λες τι σικλιόλ ι Ιεχωβάσκε. (1 Πέτρ. 3:1, 2) Αλλά ατζέ-ντα άμα λάκο ρομ κα αποφασίνελ μα τι υπηρετίνελ ι Ιεχωβάς, ο Ιεχωβά εκτιμίνελα σο ισί αφοσιωμέ Λέστε ντα ντέλα καν πι ρομές.

19. Κάνα εκ τζουβέλ να κα ντελ καν πι ρομές;

¹⁹ Όμως, εκ πφεν σο ντέλα καν να κα υποστηρίνελ πι ρομές άμα βοβ μανγκέλα λάταρ τι κερέλ κάτι σο τζάλα κόντρα κο νόμοι ή κο αρχές κι Γραφιάκε. Βακερέν για παράδειγμας ότι ο ρομ εκχέ πφενιάκο σο νανέ κι αλήθεια μανγκέλα λάταρ τι βακερέλ ψέματα, τι τσορέλ ή τι κερέλ κάτι γιαβέρ σο τζάλα κόντρα κι Γραφή. Σαρέ ο Χριστιανοί, αντρέ ανταλέντε ο παντριμέ πφενιά-ντα, πρέπει τι ντεν καν πρώτα κο Ιεχωβά Ντεβέλ. Άμα ο ρομ εκχέ πφενιάκο κα μανγκέλ λάταρ τι τζαλ κόντρα κο αρχές κι Γραφιάκε, βόι δεν πρέπει τι ντελ καν ντα πρέπει τι εξηγίνελ με σουκάρ τρόπος αλλά σταθερά σόσκε ναστί κερέλα-λες ανταβά.​—Πράξ. 5:29.

20. Σαρ τζανάσα ότι η Μαρία ισινέ λατσσί αμαλίν ι Ιεχωβάσκι;

²⁰ Η Μαρία ισινέ μπουτ λατσσί αμαλίν ι Ιεχωβάσκι. Ντικχίντιβελα ότι τζανέλας λατσσές ι Γραφή. Σε εκ συζήτηση σο τθερέλας βόι ντα η Ελισάβετ, σο ισινέ η ντάι του Ιωάννη του Βαφτιστή, η Μαρία κερντάς λάφι κατά Εβραϊκές Γραφές πιο μπουτ από 20 φαρ. (Λουκ. 1:​46-55) Σκεφτίνεν ακαβά-ντα: Παρόλο σο η Μαρία ισινέ νισανλίς ι Ιωσηφίσαρ, ο άγγελος ι Ιεχωβάσκο να σικαντάς-πες πρώτα λέστε. Πρώτα κερντάς λάφι κι Μαρία ντα βακερντάς λάκε ότι κα  μπιανέλας ι Ντεβλέσκε Τσσαβές. (Λουκ. 1:​26-33) Ο Ιεχωβά τζανέλας ι Μαριά λατσσές ντα ισινέ σίγουρος ότι κα μανγκέλας ντα κα αρακχαβέλας λέσκε Τσσαβές. Σίγουρα, η Μαρία ισινέ λατσσί αμαλίν ι Ιεχωβάσκι ατζέ-ντα σοράν κατά μεριπέ ι Ιησούσκο ντα κατά ανάσταση λέσκι.​—Πράξ. 1:14.

21. Σο σικλιόνα ο μουρσά οντουλένταρ σο βακερέλα η Γραφή ι Μαριάκε;

²¹ Σο σικλιόνα ο μουρσά. Ο γκοντιαβέρ μουρς χαιρίνελα άμα η ρομνί λέσκι τζανέλα ι Γραφή λατσσές. Να νιωθίνελα πιο τελέ πι ρομνιάταρ ούτε σκεφτίνελα ότι βόι μανγκέλα τι αβέλ ο σορό ι φαμιλιάκο. Αγαβέλα ότι άμα λέσκι ρομνί τζανέλα λατσσές ι Γραφιάκε αρχές, μπορίνελα τι βοηθίνελ πι φαμιλί. Όμως, ατζέ-ντα άμα λέσκι ρομνί ισί πιο μορφωμέ, βοβ τθερέλα ι ευθύνη τι κερέλ ι φαμιλιάκι λατρεία ντα γιαβερά πράγματα για τι ντεν λατρεία ι Ντεβλές.​—Εφεσ. 6:4.

22. Σο σικλιόνα ο τζουβλιά κατά Μαρία;

²² Σο σικλιόνα ο τζουβλιά. Εκ τζουβέλ πρέπει τι ντελ καν πι ρομές, αλλά να τσσιναβέλα τι κερέλ πι πίστη-ντα πιο ζουρανί. (Γαλ. 6:5) Οτθάρ, πρέπει τι ντελ πι σαατίσταρ για τι σικλιαρέλ-πες κατά Γραφή ντα τι σκεφτίνελ οντουλά σο διαβάνελα. Ανταβά κα βοηθίνελ-λα τι ατσσικιαρέλ πι αγάπη ντα πο σεβασμός ι Ιεχωβάσκε ντα τι ντελ χαράσαρ καν πι ρομές.

23. Σαρ βοηθίνενα πουμαρό νεαυτός, πουμαρί φαμιλί ντα ι κχανγκιρί ο τζουβλιά σο ντένα καν;

²³ Ο τζουβλιά σο ντένα καν πουμαρέ ρομές επειδή μανγκένα ι Ιεχωβάς κα τθερέν πιο μπουτ χαρά ντα κα νιωθίνεν πιο πφερντέ οντουλένταρ σο να ντένα καν κο σορέ σο τσσουντάς ο Ιεχωβά. Ισί λατσσό παράδειγμας εμ ι πιο τερνέ μουρσένγκε εμ ι πιο τερνέ τζουβλίνγκε. Ντα βοηθίνενα τι αβέλ αγάπη ντα ειρήνη, όχι σάντε κι φαμιλί, αλλά κι κχανγκιρί-ντα. (Τίτο 2:​3-5) Αντιβές, ο πιο μπουτ υπηρέτες ι Ιεχωβάσκε ισί τζουβλιά. (Ψαλμ. 68:​11) Σαρέ, μουρσά ντα τζουβλιά, τθεράσα εκ σημαντική μπουτί κι κχανγκιρί. Ο γιαβέρ μάθημας κα σικαβέλ σαρ μπορίνελα ο κάθε εκ αμένταρ τι κερέλ ανταγιά μπουτί.