1. Wina wɔ nkaana ɔsande nkano djɛ ntshukana nya wɔnanyɔ ɔmɔtshi, weepó wɛkɔnge woyɛnde ladjɛ ndaawopola?

AKRISTO ankfumɔ walekɔ l’anse k’ɛlɔndjɛlɔ kɛ djɔ kɛ Yeso Kristo. Koko, wina wɔ omoto w’Okristo otshukamande, nde nkomaka l’anse kɛ lowandji lɔ onto wɔ ntshamba djɛ djɔ. Kɛsɔ nkoka ndjala okakasano lende. Djɛkondeke lá ntondo kɛnde ndjawola ntshukama la mpame kɛmɔtshi, nkaana ladjɛ ndaawopola weepó wɛnɛ: ‘Kɛkɔnge kɛnyɛ djɛ wɔnanyɔ wɔnɛ angoyala owandji wɔ nkfumbo wɔ wɔlɔ? Nde ndjilaka akambo wa nyuma l’etena kɛ ntondo lá lowiko lɔnde? Ntsha lako, kɛkɔnge kenshikikɛ djɛ nde angoyala owandji wɔ nkfumbo wɔ wɔlɔ m’ɔkɔngɔ w’iso ntshukana?’ Lonkina, angoyala wɔlɔ nde ndaawopola weepó wɛnɛ ante: ‘Wekeka wɛkɔnge wɛ mɔnghɔtɛnyɛ lá bala djɛmi? Lemi ndekɔ lá balentshitshi edjinge la lokapo? Ndekɔ la djokanelo djɛ wɔlɔ la Yehova?’ (Los. 4:9, 12) Ntsha omoto ndɔsa akano wa wɔlɔ lá ntondo kɛ nde ntshukana, kɛsɔ angokotshɛ djɛ bala djɛwɔ ndjala wɔlɔ edjinge l’osasa.

2. Kɛkɔnge k’ɛnaso lɔ lá djamba djɛnɛ?

² Miliyɔ y’ankaana yɛso y’Akristo nyɛnyɛka ndjɔmbɔmba kɛ wɔlɔ kɛ ndjala lá ntshunamo te wame wawɔ. Iwɔ wɛdje djɛ mba djedjɛ! Tolekɔ l’osasa efula wɔ nkambela Yehova esanga l’amato wa nkɔmano efula wasɔ! Lá djamba djɛnɛ, tongokadjimola lɔ lá weepó esato wɛnɛ: 1) Ekakasano wɛkɔnge ɛmɔtshi wepomana l’ankaana yɛso yembotshukama? 2) Lámo omoto awolakande djɛ ndjala la ntshunamo te womɛnde? 3) Kɛkɔnge kɛ wame la wadji w’Akristo okokawɔ ndjeka má ndjɔmbɔmba kɛ Yeso, Abigayɛlɛ, Mariya kɛ wadjɛ Yosɛfu yɛ nyangho Yeso?

3. Lamo antshukanyi ankfumɔ opomanakawɔ l’ekakasano?

³ Bala alekɔ opapɛyɛ wɔ djɔ w’ime Ndjambe, koko anto walekɔ ase ntshamba djɛ djɔ. (1 Dj. 1:8) Djɛkondeke, Otepela wɔ Ndjambe ewoyɛka antshukanyi djɛ wangopomana ‘l’ekakasano l’alemba wawɔ,’ welekɔ etengo ndjolo. (1 Kɔ. 7:28) Tokolenda ekakasano ɛmɔtshi wekoka mpomana l’omoto wombotshukama.

4. Lamo omoto okokande ndaawoka etengo apalekɔ la ntshina ntsha nde nɛmɛyɛ ikanyi yɛ womɛnde?

⁴ Mbala imɔtshi m’ɔtɛ w’edjena kɛ ndafule, omoto nkoka ndaawoka etengo apalekɔ la ntshina ntsha nde ndjala la ntshunamo te womɛnde. Marisol, nkaana kɛso kintansɛka lá États-Unis ntepelaka ante: “L’etena kɛ mafule wangoshimelake amato ambɔ, iwɔ ladjɛ ndjɛlama l’ampame lá nkambo nkfumɔ. Lemi ndjewaka ente Yehova ilaka nonghanyi kɛ lowandji edjinge apɛyɛka omoto odjito wɛnyɛ okitshakitshɛ la wolekɔ la ntshina. Koko alekɔ wolo efula djɛ nkindjɛ ndjala l’ikanyi yɛ ndaawɛdjɛ lá kɛnɛ kelendana la lowandji.”

5. Tokanyi tɔkɔnge topaye má Bible tolekɔ l’anto amɔtshi lá kɛnɛ kelendana la odjito wɔ amoto?

⁵ Lá wedji onkina, omoto nkoka ntshukama nya mpame kekanelaka ante, amato wapalekɔ la ntshina. Ivon, nkaana kɛmɔtshi kintansɛ l’Amerikɛ wa sidɛ ntepelaka ante: “L’owila wɔso, mpame ndeke l’ɔlɛka ntondo ko omoto l’ɔkɔngɔ. Wana w’amato nkatshɛka, nsolaka alɔnga la ndjɔmbaka amvulu, koko wana w’ampame ndjitansɛka, ko anyɔ yɛwɔ l’ankaana yɛwɔ ndasɛmɛyɛka nkete djɛ ndɛ, edjinge ndashimelaka ambɔ, ‘iwɔ ndeke ankfumi yelá mvulu.’” Yingling, nkaana kenkina k’intansɛ lá Asie ntepelaka ante: “L’otepela wɔmi wɔ lowotshɔ, alekɔ la djongo mɔtshi dj’otepelakawɔ ambɔ, amato wapalekɔ la djonyi djɛ ndjala la balo kana l’akoka. Odjito wɔwɔ ngo wɔ nangha elemo welá mbandja, koko wapalekɔ la lotshungɔ lɔ mpɛyɛ wame wawɔ kaanga ikanyi imɔ.” Wome wotshindama la tonkanyi t’ipa la ngandji tɔsɔ edjinge la nkfumbo djepalekɔ l’Afunelo, ndjilaka lowiko lɔ wadjɛnde nkenya, apakilika ndjɔmbɔmba kɛ Yeso, edjinge apasasangɛ Yehova.​—Ɛfɛ. 5:28, 29; 1 Pɛ. 3:7.

6. Kɛkɔnge kɛ amato wambotshukama oyɛwɔ ladjɛ nangha djɛ nkembɛ djokanelo djɛwɔ la Yehova?

⁶ Etengo isɛnyi lá djamba djemboheta, Yehova ndɔmbaka wame w’Akristo djɛ nkotshɛ ehomba wɛ nyuma, wɛ ngandji, edjinge wɛ ndemba w’ase nkfumbo yɛwɔ. (1 Ti. 5:8) Koko, kaanga oyɛwɔ l’akambo efula wanangha nfu inkfumɔ, ankaana yembotshukama nsombaka wina djɛ mbalaka otepela wɔ Ndjambe la ntɔnɔlaka l’eteyi lofu la lofu edjinge ndɔmbaka Yehova m’anse k’oloko. Nkambo ntshɔ, nkoka ndjala okakasano. Amato wambotshukama walekɔ l’akambo efula wa nangha, djɛkondeke iwɔ nkoka ndaawoka etengo wapalekɔ la wina kana la wolo wɔ nangha akambo wasɔ, koko alekɔ djonyi dj’iwɔ nsombaka wina. Lamo? Mande Yehova nkɔpaka onto l’onto wɔ l’anteyi kɛso ndjala edjinge nama djokanelo djɛ wolo nyande.​—Ele. 17:27.

7. Kɛkɔnge kekoka nkotshɛ wadji djɛ nde nɛmɛyɛ edjinge nsunama te womɛnde?

⁷ Ndjokamaka djɛ, omoto wombotshukama ladjɛ nangha la wolo djɛ ndjala la ntshunamo te womende wɔ ntshamba djɛ djɔ. Koko, angoyala wɔdju lende djɛ nde nkotshɛ odjito wɔpɛyisa Yehova wɔsɔ, ntsha nde ndjoka edjinge ndjawola donga djemá Afunelo djɛnyɛ lamo oyɛnde ladjɛ ndjala la ntshunamo.

8. Etengo Ɛfɛsɛ 5:22-24 ɛnyɛnde, lamo wadji w’Okristo awolakande ndjala la ntshunamo te womɛnde?

⁸ Wadji w’Okristo ndjawolaka djɛ nsunama lá lowandji lɔ womɛnde, ladjikɛnde kɛsɔ ndeke  Yehova ɔlɔmbande djɛ nangha. (Wala Ɛfɛsɛ 5:22-24.) Nde angoyawɛkɛke te Papa kɛnde kel’olongo, mande nde ndjewaka ante kenkfumɔ k’onanghande, nde nanghaka má ngandji edjinge nde ndɔlɔmbaka djɛ nangha nkambo mɔtshi ngo ntsha nkambo djɛkɔ dekɔ la wapɔ te nde.​—Mvu. 6:24; 1 Dj. 5:3.

9. Eposelo wɛkɔnge weyala wina wɔ omoto w’Okristo osunamande lá lowandji lɔ womɛnde?

⁹ Andja wanɛ ntshindaka amato djɛ mpendola ɛlɛmbɛ wɛ Yehova edjinge nyɛna ntshunamo etengo nkambo djɛ nyɔnyɔ. Djɛkondeke, anto wasuka tokanyi tɔ nghɔsɔ wapewe Ndjambe kɛso kɛ ngandji. Yehova apakoke mpɛyɛ wana wande w’amato wɔsande l’odjito ɛlɛmbɛ w’ekoka ndawɔnyɔla. Nkaana kekamba la wolo djɛ nkotshɛ odjito wɔnde wɔpɛyisa Yehova, nkotshɛka djɛ vu ndjala lá nkfumbo kɛnde. (Yee. 119:165) Womɛnde, wana wande edjinge nde nyɔmɛlɛ mbaka wapɔ.

10. Olakanyelo wɔkɔnge w’owaso má kɔmantɛrɛ kɛ Carol?

¹⁰ Wadji wolekɔ la ntshunamo te womɛnde wɔ ntshamba djɛ djɔ, nyɛnyɛka djɛ nde nkɔpaka edjinge nɛmɛyɛka Yehova, kanga l’ilisa nonghanyi kɛ lowandji. Carol, nkaana kɛmɔtshi k’intansɛ l’Amɛrikɛ wa sidɛ ntepelaka ante: “Lemi ndjewaka ente womɛmi nanghaka evunga, lemi ndjewaka lonkina ente wopo w’elolami l’evunga wɛnde wɛsɔ, nyɛnyɛka ntsha lemi ndɔsaka djokanelo djɛmi isa Yehova la ntshina kana lako. Djɛkondeke lemi nanghaka la wolo djɛ nsunama te nde ladjikɛnde lemi nkɔpaka nsasangɛ Papa kɛmi kel’olongo.”

11. Kɛkɔnge kekotshɛka nkaana kɛso Aneese djɛ nyimeyanaka, iya olakanyelo wɔkɔnge w’owaso má kɔmantɛrɛ kɛnde?

¹¹ Nkoka ndjala okakasano te wadji djɛ nɛmɛyɛ edjinge nsunama te womɛnde ntsha nde nyɛnaka ante womɛnde apile yimba lá tokanyi tɔnde edjinge l’ekiyano wɛnde. Koko, kolenda nkaana kɛmɔtshi kembotshukama k’etawɔ Aneese ndonanghaka wina wɔ nkambo djɛ nghɔsɔ okomelawɔ. Nde ntepelaka ante: “Lemi nanghaka la wolo dj’ipa nyomala. Lemi mvungɔka ente isankfumɔ nanghaka evunga. Okoma wɔmi nde, nyimeyɛ l’oloko ɔmɔ etengo Yehova otimeyɛnde. Wina w’imɛyɛmi, lemi ndjalaka la vu lá yimba.” (Yee. 86:5) Ntsha wadji ndjala l’ekfumbo kɛ nyimeyanaka, angoyala wɔdju lende djɛ ndjala la ntshunamo.

12. Ndjɔmbɔmba yɛkɔnge y’otanaso lá Bible?

¹² Anto amɔtshi nfɛnyaka ambɔ, onto wolekɔ la ntshunamo alekɔ kanga wɔdju. Koko ikanyi yɛsɔ ipalekɔ nsɔsɔlɔ. Bible dekɔ la ndjɔmbɔmba efula y’anto wayalaki la ntshunamo, koko wayalaki edjinge l’oloko wolo. Nyotshɔ tokoshishima olakanyelo w’okokaso mba má ndjɔmbɔmba kɛ Yeso, Abigayɛlɛ la kɛ Mariya.

13. Lamo Yeso oyɛnde la ntshunamo te Yehova? Pakisola.

¹³ Yeso alekɔ la ntshunamo te Yehova, koko ape mande nde apalekɔ la balo kana l’akoka. Ngo onto w’olekɔ la balo dj’efula ndeke l’okoka ndakanyɛ lá yopo yɛ wɔdju edjinge yokama papoo etengo Yeso ndananghe. (Dj. 7:45, 46) Yehova ndɔsaka akoka walekɔ la Yeso la ntshina efula, djɛkondeke ndawola Yeso nkamba esanga la Nde wina wɔ ndatongaka nkete nkfumɔ djel’olongo la djelá looko. (Woo. 8:30; Heb. 1:2-4) Edjinge m’ɔkɔngɔ w’ekfundwelo kɛ Yeso, Yehova ɔpɛyɛka lowandji ‘lonkfumɔ l’olongo edjinge lá looko.’ (Mat. 28:18) Kaanga Yeso oyɛnde l’akoka w’efula wasɔ, nde nkindjɛka mpona ɛlɔndjɛlɔ kɛ Yehova. Lamo? Mande nde nkɔpaka Papa kɛnde.​—Dj. 14:31.

14. Olakanyelo wɔkɔnge ampame okokawɔ mba má a) wopo wɔ Yehova ɔsakande amato? b) ikanyi yelekɔ lá Woongo 31?

¹⁴ Olakanyelo w’okoka mba wame. Yehova atanangha djɛ omoto nsunama te womɛnde m’ɔtɛ wɔ nde alekɔ l’anse kɛ mpame. Yehova ɛnyɛka nkambo ntshɔ papoo má wopo wɔ ndasɔnɛ ampame l’amato dj’iwɔ ntɔlɔndjɛ l’olongo esanga la Yeso. (Nga. 3:26-29) Yehova ɛnyɛka djɛ nde ndaawɛkɛka te wɔnande má ndɔpɛyɛ lowandji. Wopo wɔk’ɔmɔ ndeke, wome wɔ balo mpɛyɛka wadjɛnde ndambo kɛ lowandji. Djɛ nyɛnyɛ odjito wɔ omoto wolekɔ l’akoka, Otepela wɔ Ndjambe ntepelaka ante, nde ndɔndjɛka elemo welá mvulu kɛnde, nsombaka la nsombolaka awedji edjinge nanghaka opoto. (Wala Woongo 31:15, 16, 18.) Omoto apalekɔ nfumbe kepalekɔ la lotshungɔ lɔ mpɛyɛ ikanyi. Koko, womɛnde ndaawɛkɛka tende edjinge ndjekameyɛka tokanyi tɔnde. (Wala Woongo 31:11, 26, 27.) Wina wɔ wome onanghelande wadjɛnde akambo la ngandji edjinge la dilɛmɛlɔ nghɔsɔ, wadjɛnde angoyala l’osasa djɛ nsunama tende.

15. Olakanyelo wɔkɔnge wowa amato wambotshukama má ndjɔmbɔmba kɛ Yeso?

¹⁵ Olakanyelo w’okoka mba amato wambotshukama. Kaanga ndananghe akambo wa nkekete, Yeso atɔsa ante alekɔ nkambo djɛ nyɔnyɔ djɛ ndjala l’anse kɛ lowandji lɔ Yehova. (1 Kɔ. 15:28; Flp. 2:5, 6) Wopo wɔk’ɔmɔ ndeke, omoto wolekɔ l’akoka, wokilika ndjɔmbɔmba kɛ Yeso apɔshi ante, ndjala la ntshunamo te womɛnde alekɔ nkambo djɛ nyɔnyɔ. Koko nde angosuka womɛnde apengo ladjikɛnde nde ndɔkɔpaka, koko ntondo ntondo ladjikɛnde nde nkɔpaka la nɛmɛyɛka Yehova.

16. Lá nkilika 1 Samwɛlɛ 25:3, 23-28, ekakasano wɛkɔnge w’epomanisa l’Abigayɛlɛ? (Lenda ntshango djelá loposo.)

¹⁶ Abigayɛlɛ ayalaki la wome w’iyetaka Nabalɛ. Nde ayalaki mpame k’okfutu, k’otako edjinge kepedjɛ anto. Kaanga oyɛwɔ nghɔsɔ, Abigayɛlɛ atɔsa nkambo djɛsɔ etengo elonga kɛ nde ndjaka bala djɛnde. Nde akoka ntshikala vu ko ndjawola djɛ Davidɛ l’anto wande ndjaka womɛnde. Koko, nde atapolaka wina wakokisa mbikɛ Nabalɛ edjinge ase nkfumbo kɛnde. Kokanela oloko wolo woyalisa la Abigayɛlɛ djɛ nsukana té ampame 400 yeyalisa la mpeko djɛ mbandji edjinge ntɔnɔla la dilɛmɛlɔ nkfumɔ nya Davidɛ. Nde awolaka ndɔmba kaanga imeyelo l’ɔtɛ w’evunga wenanghisa womɛnde. (Wala 1 Samwɛlɛ 25:3, 23-28.) Davidɛ asipisoyɛka mbala kɛkɔ kɛmɔ ante Yehova ndeke lokambisa l’omoto w’oloko wolo wɔsɔ, djɛ nde  ndɔpɛyɛ alako woyɛnde la djonyi djɛ ndoshimba dj’ipa nde nangha ovunga w’ekekete.

17. Olakanyelo wɔkɔnge w’okoka mba wame m’ɔkɔndɔ wɔ Davidɛ nya Abigayɛlɛ?

¹⁷ Olakanyelo w’okoka wame mba. Abigayɛlɛ ayalaki omoto wɔ balo. La balo nkfumɔ, Davidɛ okaka dako djɛ nde. Nde ewɔka nangha nkambo djekokisa ndokomɛ djɛ nde ndjala la lowo l’ekila. Wopo wɔk’ɔmɔ ndeke wome wolekɔ la balo ladjɛ ndjekameyɛka la ntɔnɔ nkfumɔ tokanyi tɔ wadjɛnde wina w’ɔkɔpande ndɔsa nkano djɛ djonyi. Mbala imɔtshi, ikanyi yɛ wadjɛnde nkoka ndokotshɛ djɛ nde ndjewɔ ndɔsa nkano djepalekɔ la balo.

18. Olakanyelo wɔkɔnge w’okoka mba amato wambotshukama má ndjɔmbɔmba kɛ Abigayɛlɛ?

¹⁸ Olakanyelo w’okoka mba amato wambotshukama. Wadji w’ɔkɔpa la wɔ lɛmɛyɛ Yehova nkoka nkotshɛ nkfumbo kɛnde l’akambo efula, kaanga womɛnde apakambela Yehova kana apawike lá nkilika ɛlɛmbɛ wɛ Nde. Nde apahone djɛ ndjaka bala lá yopo yepokana l’afunelo. Koko má ndjala la ntshunamo edjinge la dilɛmɛlɔ, nde ntshindaka womɛnde djɛ ndjeka akambo walendana la Yehova. (1 Pɛ. 3:1, 2) Kaanga mpame apɔshi nkano djɛ nkambela Yehova, Yehova nsasangaka nkɔmano dj’ɛnyɛ omoto wɔ ntshunamo te Nde.

19. Lá wina wɔkɔnge omoto wombotshukama ndopakoke nsunama te womɛnde?

¹⁹ Omoto w’Okristo, apasuke womɛnde ntsha nde ambɔlɔmba djɛ nangha nkambo mɔtshi djepokana l’ɛlɛmbɛ kana la tɔkfɔ tɔ má Bible. Ndjɔmbɔmba, kɔsa djɛ nkaana kɛmɔtshi kɛ womɛnde wopakambela Yehova ambɔlɔmba djɛnde ntepela ongolo, ndjɔngɔla kana nangha nkambo mɔtshi djepasasangɛ Yehova. Okristo onkfumɔ, ndjila edjinge ankaana yembotshukama, ladjɛ ntondo ntondo nɛmɛyɛ ngo Yehova Ndjambe. Ntsha wambɔlɔmba nkaana kɛso djɛ nangha nkambo mɔtshi djepokana la tɔkfɔ tɔ Bible, nde ladjɛ mpakisola la ntɔnɔ nkfumɔ lamo ndopakoke nangha kɛnɛ k’ɔlɔmbawɔ djɛ nangha, ipa la ntɔma ɔlɔmɔ.​—Ele. 5:29.

20. Wopo wɔkɔnge ewaso ente, Mariya ayalaki la djokanelo djɛ ma ma nya Yehova?

²⁰ Mariya ayalaki la djokanelo djɛ ma ma nyɔmɛlɛ la Yehova. Ipa l’ehamo nde awewaki Afunelo wɔlɔ wɔlɔ. Wina wɔ ndasawolaka nya Elizabɛtɛ, nyɔ kɛ Djɔanɛ obatisanyi, Mariya awalaka  Afunelo w’ase Hebero ndekana 20. (Luka 1:46-55) Kaanga Mariya ndasɔnama me Yɔsɛfu nkambo djɛ bala, ondjelo wɔ Yehova atɛnama ntondo le Yɔsɛfu. Ondjelo atshɔka ntondo mbala kɛkɔ kɛmɔ te Mariya ntoshimela ante nde angowota Wɔna Ndjambe. (Luka 1:26-33) Yehova ewaki Mariya wɔlɔ wɔlɔ edjinge ayawɛkɛka te nde ante nde angɔkɔpa edjinge angowomba Wɔna Ndjambe wɔlɔ. Ape l’ehamo, Mariya akindjɛka ndjala la djokanelo djɛ wɔlɔ nya Yehova, kaanga m’ɔkɔngɔ wɔ nyɔyi kɛ Yeso edjinge w’ekfundwelo kɛnde t’olongo.​—Ele. 1:14.

21. Olakanyelo wɔkɔnge w’okoka mba wame má kɛnɛ kɛ Bible otepelande lá nkambo djɛ Mariya?

²¹ Olakanyelo w’okoka mba wame. Wome wolekɔ la balo ndjalaka l’osasa ntsha wadjɛnde ndjewaka Afunelo wɔlɔ. Nde apowomadjɛ kana nfɛnyɛ ante wadjɛnde nkɔpaka ndjala owandji. Nde ndjewaka ante ntsha wadjɛnde ndjala la loka lɔ wɔlɔ l’Afunelo edjinge lɔ tɔkfɔ tɔ Bible, nde angokotshɛ nkfumbo kɛnde. Lá nsɔsɔlɔ, kaanga wadji ingelaka nkalasa efula ndeka womɛnde, ngo wome ndeke l’odjito wɔ ndɔndjɛ losanghanyɛ lɔ nkfumbo edjinge wayi ankina wa teokrasi.​—Ɛfɛ. 6:4.

22. Olakanyelo wɔkɔnge w’okoka mba amato wambotshukama me Mariya?

²² Olakanyelo w’okoka mba amato wambotshukama. Omoto wombotshukama ladjɛ ndjala la ntshunamo te womɛnde, koko nde nyɔmɛlɛ ndeke l’odjito wɔ lonyuma lɔnde. (Nga. 6:5) Djɛkondeke, nde ladjɛ nsombaka ndambo kɛ wina djɛ ndjekaka Bible nyɔmɛlɛ edjinge ntɔnɔlaka. Nkambo djɛsɔ djengokotshɛ djɛ nde nkɔpa la nɛmɛyɛ Yehova edjinge ndjala la ntshunamo te womɛnde.

23. Ntsha amato wambotshukama nyɛnyɛ ntshunamo djɛwɔ te wame, wapɔ wɛkɔnge iyongowa iyɔmɛlɛ, ankfumbo yɛwɔ edjinge ntshumano?

²³ Amato wakindjɛ nyɛnyɛ ntshunamo djɛwɔ te wame wawɔ l’ɔtɛ wɔ ngandji k’okawɔ Yehova, wangoyala l’osasa efula ndeka wanɛ wapalɛmɛyɛ nonghanyi kɛ lowandji k’ilisa Yehova. Iwɔ mpɛyɛka dangala dj’ampame la dj’amato ndjɔmbɔmba yɛ wɔlɔ. Edjinge iwɔ nkotshɛka djɛ ngandji la vu ndjala apengo l’ankfumbo yɛwɔ toko koko edjinge l’otshumano. (Tito 2:3-5) Lɔɔko kɛnɛ, efula k’enkambi wɛ Yehova wɛ nkɔmano oyɛwɔ nde amato. (Yee. 68:11) Isankfumɔ ayale ampame kana amato, tolekɔ l’odjito wɔ djonyi efula l’otshumano. Djamba djeyaye ngotepela wopo wɔ ɔmɔmɔ l’anteyi kɛso okokande nkotshɛ odjito wɔsɔ.