MUSORO WE KUFUNDA 6
“Musoro we Mwanakadzi Wese ndi Mwanarume”
“Musoro we mwanakadzi ndi mwanarume.”—1AKO. 11:3.
NGOMA 13 Kristu Muezaniso Wedu
ZVATICAFUNDA *
1. Musikana asati awakwa unodikana kudzibvunzisa mibvunzo dzipi paanonga ecirangarira wekuwakana naye?
AKRISTU ese ari pasi pe utungamiriri wakakwana wa Djesu Kristu. Ngo kudaro, mwanakadzi we ciKristu paanowakwa, unogara pasi pe musoro we mwanarume asikazi kukwana. Izvi azviripi nyore nguwa dzese. Hino, musikana paanonga ecirangarira wekuwakwa naye, ungaita zvakanaka kudzibvunzisa kuti: ‘Cinyi cinopangidza kuti hama ii icagara musoro we mhuri wakanaka? Kuseenzera Djehovha ndikona kunonyanya kukosha mu upenyu wake here? Kana zvisiripi izvona, cinyi cinoita kuti ndirangarire kuti icagara musoro wakanaka kana tikazowakana?’ Honde, hanzvadzi dzingaitawo zvakanaka kudzibvunzisa kuti: ‘Unhu upi wandicaunza mu mucato? Ndino mwoyo unononoka kutsamwa uye ndino rupo here? Ndino ukama wakabamba na Djehovha here?’ (Mup. 4:9, 12) Kana mwanakadzi akaita zvisananguro zvakanaka asati awakwa, zvicabetsera mucato wake kuti ubudirire uye kuti upfare.
2. Ticaongororei mu fundo ino?
2 Mamirionji e hanzvadzi dzedu dze ciKristu dzakapangidza miezaniso yakanaka yekudzikanda pasi pe amuna awo. Idzona dzinodikana kubambiswa! Tinopfara kuseenzera Djehovha tiri pamwepo ne akadzi aya akagondeka! Mu fundo ino, ticaongorora nge zve mhinduro dze mibvunzo mitatu: (1) Ngeapi matambudziko amweni angasongana ne akadzi? (2) Ngei mukadzi ecisanangura kudzikanda pasi pe mwamuna wake? (3) Amuna ne akadzi e ciKristu angafundei pa muezaniso wa Djesu, Abhigairi uye Mariya, mukadzi wa Zuzee mai a Djesu?
ZVINESO ZVIPI ZVAKASONGANA NE AKADZI E CIKRISTU?
3. Ngei kusina mucato wakakwana?
3 Mucato cipo cakakwana cakabva kuna Mwari, asi anhu aazi kukwana. (1Ju. 1:8) Ndiyo ndaa Soko ra Mwari rinongwadza aya akawakana kuti acasongana no zvineso zvinozwi “matambudziko mu nyama.” (1Ako. 7:28) Onai matambudziko manganani angasongana ne akadzi.
4. Ngei mukadzi eciona hingana asikakoshi kana akadzikanda pasi pe mwamuna?
4 Pamweni nge ndaa ye kamunogara, mukadzi angarangarira soko rokuti kudzikanda pasi pe mwamuna wake, zvinoita hingana asikakoshi. Marisol, unogara ku Estados Unidos, unoti: “Kandakakurira, anakadzi airumbwa ecizwa kuti aidikana kugara hingana anarume pa zviro zvese. Ndinoziya kuti Djehovha akaita urongwa we kugadza musoro uye akapasa anakadzi basa rekudzidodosa, asi rinoreremedzwa. Asi azviripi nyore kugara no maonero akanaka nge zve kudzikanda pasi.”
5. Anarume amweni ano marangariro api akashata akaringana ne anakadzi?
5 Nge dii rimweni, mwanakadzi ungawakwa no mwanarume unorangarira kuti anakadzi aakoshi kupinda anarume. “Katinogara,” inodaro hanzvadzi inozwi Ivon, inogara ku América do Sul, “anarume ndiwo anotanga kurhya, anakadzi ozopedzesera. Asikana anobika uye anocenesa pa nyumba, asi arumbwana anoperekerhwa na mai no madziyaya, uye awona anobvunzwa kuti ‘madzimambo e pa nyumba.’” Hanzvadzi imweni inozi Yingling, inogara ku Ásia, yakati: “Mu mureketero wangu kune soko rinoti anakadzi aadikani kuziya maningi kana kuti aadikani kukwanisa kuita zviro zvinoizwa no anarume. Basa rawo ngere kuita ma basa e pa nyumba, asi aatenderhwi kuti arekete maonero awo ku amuna awo.” Mwamuna une marangariro akadaro asina rudo uye asiripi mu Bhaibheri unoita kuti upenyu we mukadzi wake ushuphe, unokonerhwa kuteedzera Djesu uye aapfadzi Djehovha.—Aef. 5:28, 29; 1Pe. 3:7.
6. Ngazvipi zvinodikanwa kuizwa no akadzi kuti abambise ukama wawo na Djehovha?
6 Hingana zvakareketwa mu fundo yakadarika, Djehovha anoda kuti mwamuna we ciKristu aite zvinodiwa ne mhuri yake mu zviro zvekunamata uye zvekunyama. (1Ti. 5:8) Ngo kudaro, hanzvadzi dzakawakwa dzinodikana kupsvaka nguwa mazuwa ese kuti aerenge Soko ra Mwari, kunyasa kurirangarira uye kuita munamato we mwoyo wese kuna Djehovha. Izvi zvingashupha. Akadzi anobatikana, hino angaona hingana kuti aana nguwa kana simba kuti aite zviro izvi, asi zvakanaka kuti apsvake nguwa. Ngei? Ngekuti Djehovha anoda kuti umwe na umwe wedu agare no ukama naye.—Zvi. 17:27.
7. Zvinyi zvicaita kuti zvigare nyore ku mukadzi kuti aite basa rake?
7 Zvinozwisisika kuti mukadzi ungatodikana kuseenza no simba kuti adzikande pasi pe mwamuna wake asikazi kukwana. Ngokudaro, unozoona hingana zviri nyore kuita basa raakapaswa na Djehovha kana ecizwisisa uye kutambira zvikonzero zve mu Bhaibheri zvinoita kuti adzikande pasi.
NGEI MUKADZI ECISANANGURA KUDZIKANDA PASI PE MWAMUNA WAKE?
8. Maererano na Aefeso 5:22-24, ngei mukadzi we ciKristu ecisanangura kudzikanda pasi pe mwamuna wake?
8 Mukadzi we ciKristu unosanangura kudzikanda pasi pe mwamuna wake ngekuti ndizvona zvaanokumbirwa na Djehovha kuti aite. (Erengai Aefeso 5:22-24.) Iyena unogonda Baba ake e kudenga, eciziya kuti anozviita nge rudo uye kuti anozviita ngekuti zvinonga zvakamunakira.—Dhe. 6:24; 1Ju. 5:3.
9. Ngazvipi zvinoitika kana mukadzi we ciKristu angadzikanda pasi pe mwamuna wake?
9 Nyika inokohomedzesa akadzi kuti asatondoedze zvinodiwa na Djehovha uye kuti kudzikanda pasi kunonga kuri kudziteredza maningi. Zviri pamhene kuti aya ano marangariro aya aazii Mwari wedu ane rudo. Djehovha aizopasapi ana ake e kadzi mitemo yaizoita kuti agare hingana anhu asikabetseri. Hanzvadzi inoseenza no simba kuti iite basa rayo raakapaswa na Djehovha unoita kuti mhuri yake igare murunyararo. (Pis. 119:165) Mwamuna wake unobetsereka, iyena unobetsereka uye ana ake anobetserekawo.
10. Zvakareketwa na Carol zvinotifundisei?
10 Mukadzi unodzikanda pasi pe mwamuna wake usikazi kukwana unopangidza kuti unoda uye kuti unoreremedza Djehovha, uya akagadza utungamiriri. “Ndinoziya kuti mwamuna wangu ucashaishawo,” unodaro Carol, unogara ku América do Sul. “Ndinoziyawo kuti madairire andinoita zvishaishizvo anopangidza kukoshesa kandinoita ushamwari wangu na Djehovha. Hino ndinoedza kudzikanda pasi ngekuti ndinoda kupfadza Baba angu e kudenga.”
11. Cinyi cinobetsera hanzvadzi imweni inozwi Aneese kuti irekerere uye tinofundei?
11 Zvingashupha kuti mukadzi areremedze uye kuti adzikande pasi kana iyena angarangarira kuti mwamuna wake aana basa no mazwire ake. Asi onai zvinoizwa ne hanzvadzi inozwi Aneese, zviro izvi pazvinoitika. Iyona inoti: “Ndinoedza kutama kugara no cigumbu. Ndinorangarira kuti tese tinoshaisha. Ndinorekerera ndakasudzunuka, hingana zvinoizwa na Djehovha. Pandinorekerera, ndinogara no runyararo.” (Pis. 86:5) Mukadzi unorekerera kajinji kacona zvinomuitira nyore kuti adzikande pasi.
TINGAFUNDEI NO MIEZANISO IRI MU BHAIBHERI?
12. Miyezaniso ipi iri mu Bhaibheri yatingafunda?
12 Amweni angaona kuti munhu unodzikanda pasi aana simba. Asi azvirokwazvopi. Mu Bhaibheri mune miyezaniso yakawanda ye anhu akadzikanda pasi ano simba rakakura. Onai zvatingafunda kubva kuna Djesu, Abhigairi uye Mariya.
13. Ngei Djesu ecidzikanda pasi pa Djehovha? Panganidzai.
13 Djesu anoreremedza utungamiriri wa Djehovha, haiwa nge kutama ruziyo. Djesu munhu ari nyore uye mafundisire ake anopangidza kuti munhu ane ruziyo. (Ju. 7:45, 46) Djehovha akareremedza uzii wa Djesu zvekuti akatendera kuti Djesu aseenze na Djehovha pa basa rekusika zviro zvese. (Zvie. 8:30; Ahe. 1:2-4) Mu masure mekumutsa Djesu, Djehovha akamupasa ‘simba rese kudenga no pa nyika.’ (Mt. 28:18) Kunyazi Djesu ano uzii, anopsvaka kutungamirirhwa na Djehovha. Ngei? Nge kuti ayena anoda Baba ake.—Ju. 14:31.
14. Amuna angafundei (a) pamaonero anoita Djehovha anakadzi? (b) pamasoko ari pana Zvierengo 31?
14 Amuna angafundei. Djehovha aazi kuita kuti mukadzi adzikande pasi pe mwamuna wake nge kuti Ayena anoona akadzi hingana asikakoshi kupinda anarume. Djehovha pacake akapangidza pamhene nge kusanangura anakadzi ne anarume kuti atonge pamwepo na Djesu. (Aga. 3:26-29) Djehovha akagonda Mwana ake nge kumupasa simba. Zvimwezvoo, mwamuna uno ungwaru, unopa mukadzi wake simba kuti atungamirirewo zviro zvimweni. Recipanganidza basa re mukadzi anokwanisa Soko ra Mwari rinoti anokwanisa kuonerera nyumba, kutenga nekugadzirisa zviro uye kuonerera maseenzeserhwe e mare. (Erengai Zvierengo 31:15, 16, 18.) Mukadzi amuseenzipi asina citenderhwa cekureketa maonero ake. (Erengai Zvierengo 31:11, 26, 27.) Kana mwanarume angabata mukadzi wake norureremedzo rakadai, mukadzi wake acapfara nge kudzikanda pasi pake.
Akadzi angafundei pa muezaniso wa Djesu we kudzikanda pasi pa Djehovha? (Onai ndima 15)
15. Akadzi angafundei ne muezaniso wa Djesu?
15 Akadzi angafundei. Kunyazi ne zviro zvakawanda zvaakaita, Djesu aaoni hingana asikakoshi nge kudzikanda pasi pa Djehovha. (1Ako. 15:28; Afi. 2:5, 6) Zvimwezvoo, mukadzi unokwanisa unoteera muezaniso wa Djesu, aazwi hingana asikakoshi paanodzikanda pasi pe mwamuna wake. Iyena unotsigira mwamuna wake haiwa ngekuti unomuda basi, asi ngekuti unoda uye unoreremedza Djehovha.
Mumasure me kuendesa zvekurhya kuna Dhavhidhi uye no ku anarume ake, Abhigairi wakakhwedera padhuze na Dhavhidhi. Pedzepo, iyena unogodama ohwarara pasi uye unomukohomedzesa kuti asagare no ndaa yo ngazi, nge kuuraya (Onai ndima 16)
16. Maererano na 1 Samueri 25:3, 23-28, Abhigairi wakasongana no zvineso zvipi? (Onai foto ye pa kapa.)
16 Abhigairi wainga ano mwamuna unozwi Nabhari. Iyena wainga mwanarume usikabetseri, waidzikudza uye asikakwanisi kutenda. Kunyazi zvakadaro, Abhigairi aazi kutora gwanza riri nyore kuti arambane naye. Iyena waikwanisa kunyarara uye kutendera kuti Dhavhidhi auraye mwamuna wake. Pane kudaro, iyena wakatora matanhu anoseenza kuti adziirire Nabhari pamwepo no mhuri yake yakakura. Rangarirai ushingi wa Abhigairi wekukhwederera anarume 400 akagadzirira kurhwa uye kureketa na Dhavhidhi ecimureremedza. Iyena wainga akagadzirira kutora ushaishi we zviito zve mwamuna wake. (Erengai 1 Samueri 25:3, 23-28.) Dhavhidhi wakatendera kuti Djehovha ainga aseenzesa mukadzi uu wainga ano simba kuti apase Dhavhidhi mazano aizoita kuti asaite cishaishi cakakura.
17. Amuna angafundei pa muezaniso wa Dhavhidhi na Abhigairi?
17 Amuna anofundei. Abhigairi wainga mukadzi ano ungwaru. No ungwaru, Dhavhidhi wakapurutana zano rake. Mugumisiro yakhona, iyena wakapinga zviro zvaizomusiya ano ndaa ye ngazi. Zvimwezvoo, mwamuna ano ungwaru acapurutana maonero e mukadzi wake paanonga ecida kuita zvisanaguro zvinokosha. Pamweni maonero e mukadzi wake angamubetsera kuti asaite zvisananguro zvisina ungwaru.
18. Akadzi anofundei pa muezaniso wa Abhigairi?
18 Akadzi angafundei. Mukadzi unoda uye unoreremedza Djehovha unobetsera maningi ku mhuri yake, kunyazi mwamuna wake asikaseenzeri Djehovha uye asikararami maererano no zvinodiwa Naye. Iyena aazopsvaki gwanza risikapindirani ne Bhaibheri kuti asiye mhuri yake. Pano kuita kudaro, nge kureremedza uye kudzikanda pasi, iyena ucaedza kuita kuti mwamuna wake afunde nge zva Djehovha. (1Pe. 3:1, 2) Asi kunyazi akasama kucinja nge muezaniso wake, Djehovha anokoshesa kugondeka kunopangidzwa ne mukadzi anodzikanda pasi Pake.
19. Ndepapi pasikadikani kuti anakadzi azwire amuna awo?
19 Mukadzi we ciKristu unodzikanda pasi, aazotsigiri mwamuna wake kana iyena akamukumbira kuti aite zviro zvinopesana no Bhaibheri. Ngatimboti mwamuna usikatendi we hanzvadzi imweni unomukumbira kuti anyepe, abe kana kuita ciro cisikapindirani no Bhaibheri. AKristu ese, kutobatanidza hanzvadzi dzakawakwa, anodikana kugondeka kuna Djehovha Mwari. Kana hanzvadzi ikakumbirhwa kuita zvisikapindirani no Bhaibheri, inodikana kuramba, yecipanganidza no upfawi asi yakashinga kuti ngei isikakwanisi kuita zviya zvairi kukumbirhwa.—Zvi. 5:29.
Onai ndima 20 *
20. Tinoziya kudini kuti Mariya wainga ano ukama wepadhuze na Djehovha?
20 Mariya wainga ano ukama we padhuze na Djehovha. Zviri pamhene kuti iyena wainyasa kuzwisisa Matarhwa. Paaicedza na Erizabheti, mai a Juau Mubhabhatidzi, Mariya wakareketa Matarhwa e ciHebheru kanokwana 20. (Ru. 1:46-55) Uye cimboonai zvinoteera: Kunyazi Mariya wainga akagondeswa kuwakwa na Zuzee, ngirozi ya Djehovha aizi kutanga kurekata na Zuzee. Ngirozi yakatanga kureketa na Mariya uye yakaziisa kuti iyena waizobara Mwana wa Mwari. (Ru. 1:26-33) Djehovha ainyasa kuzia Mariya uye ainga anorugondo rokuti Mariya waizocengeta zvakanaka Mwana wake. Uye Mariya wakarumbwa ano ukama na Djehovha, kunyazi mu masure me kufa ne kumutswa ka Djesu.—Zvi. 1:14.
21. Amuna anofundei pa muezaniso wa Mariya wakatarhwa mu Bhaibheri?
21 Amuna angafundei. Mwamuna uno ungwaru unopfara kana mukadzi wake ecinyasa kuzwisisa Matarhwa. Iyena aazwi kutya kana kutyisidzirhwa ne mukadzi wake. Unozia kuti hanzvadzi inotya Djehovha inobetsera maningi mhuri yake. Zviri pamhene kuti, kunyazi mukadzi ecinyanya kuzia kupinda mwamuna wake, i basa re mwamuna kutungamirira pane zvokunamata zve mhuri uye mu mabasa amweni.—Aef. 6:4.
Akadzi angafundei nge zve kufunda uye kunyasa kurangarira ka Mariya mai a Djesu? (Onai ndima 22) *
22. Akadzi angafundei pa muezaniso wa Mariya?
22 Akadzi angafundei. Mukadzi unodikana kudzikanda pasi pe mwamuna wake, asi mutoro we uthongo pa kunamata nge wake ega. (Aga. 6:5) Kuti zvidaroko, iyena unodikana kupsvaka nguwa kuti aite fundo ye Bhaibheri ye munhu ega uye kunyasa kurirangarira. Izvi zvicamubetsera kuti arumbwe ecida uye ecireremedza Djehovha uye acapfara nge kudzikanda pasi pe mwamuna wake.
23. Akadzi anodzikanda pasi anobetsera kudini mhuri dzawo uye ungano?
23 Akadzi anorumbwa ecidzikanda pasi pe amuna awo nge rudo rawo kuna Djehovha acapfara kupinda aya asikadzikandi pasi pe urongwa wakagadzwa na Djehovha. Awona muezaniso wakanaka ku arumbwana ne asikana. Uye anobetsera mhuri ne ungano kuti igare ino runyararo. (Tit. 2:3-5) Nyamasi uno, anakadzi anoumba dii re aseenzi a Djehovha akagondeka. (Pis. 68:11) Tese hedu, anarume ne anakadzi tino basa rekuita mu ungano. Fundo inoteera, icareketa kuti umwe na umwe wedu ungakwanisa kudini kuita basa iri.
NGOMA 131 “Zvasungwa Pamwepo pa Djoki na Mwari”
^ par. 5 Djehovha akaronga kuti mukadzi akawakwa adzikande pasi pe mwamuna wake. Izvona zvinobatanidzei? Amuna ne akadzi e ciKristu, angakwanisa kufunda zvakawanda pa kudzikanda pasi nge kuona muezaniso wa Djesu uye anakadzi e mu Bhaibheri.
