1. When single sister de think of who e go marry, wetin be some question wey e suppose ask?

ALL of us wey de serve Jehovah dey under Jesus Christ wey be our perfect leader. But when Christian woman marry, na e husband wey no perfect go be e head. This one fit no dey easy. So when woman de think about who e go marry, e good make the woman ask e self say: ‘Wetin I see wey show me say this brother go be better family head? E de put the service of Jehovah first for e life? If no be so, wetin make me think say the brother go help us continue to get better friendship with Jehovah after we don marry?’ And e good make sister wey want marry ask e self say: ‘Which fine-fine character I get wey go help us for the marriage? I dey patient and I get open hand? I hold Jehovah tight?’ (Eccl. 4:​9, 12) If woman make good decision before e marry, this one go help the marriage succeed and the marriage go sweet.

2. Wetin we go talk about for this topic?

² Plenty-plenty sister today for Jehovah’s organization de show better example as them de obey their husband. They really de do well! We really dey happy say we de serve Jehovah together with this faithful women! For this topic, we go talk about this three questions: (1) Wetin be some problems wey wife de face today? (2) Why wife de choose to obey e husband? (3) Wetin husband and wife fit learn about how to obey and de show respect from the example of Jesus, Abigail, and Mary wey be the wife of Joseph and Jesus mama?

3. Why e be say e no get marriage wey problem no dey?

³ Marriage na really correct gift from God, but the people wey dey inside no de always do the correct thing.  (1 John 1:8) This one na why Bible talk say husband and wife “go get problem for their body.” (1 Cor. 7:28) Make we talk about some things wey wife fit face for marriage.

4. Why wife fit de feel say e de bring e self down when e de obey e husband?

⁴ E fit be say because of the place wey the woman grow, the woman fit de feel say e de bring e self down if e de obey e husband. One sister for America wey e name na Marisol talk say: “For the place wey I grow, they be de tell women everytime say they must dey equal to men for everything. I know say Jehovah don arrange make husband be the head and the wife must de obey, but e still want make them de treat their wife well. But, no be easy thing to always obey my husband because people for the world no de see this one as good thing.”

5. Which kind things wey Bible no support wey some people de think about women?

⁵ But woman fit marry man wey think say men dey important pass women. One sister for South America wey e name na Ivon, talk say: “For our area, na men de first chop before women go chop. Na small girls for house de cook and clean, but the small boys de balance as their mama and sisters de do everything for them. Them de tell the boys say, na them ‘be the king of the house.’” One sister for Asia wey e name na Yingling talk say: “For my language, e get one thing wey people de talk wey mean say women no need to know book or get special skill. Their work na to do all the housework. They no de allow the women to tell their husband wetin they think about any matter.” If husband allow this kind thing wey no de show love and wey Bible no support affect-am, e go make life hard for e wife. E no go do like Jesus and e no go make Jehovah happy.​—Eph. 5:​28, 29; 1 Pet. 3:7.

6. Wetin wife need to do so that e go make e friendship with God dey strong?

⁶ As we talk for the article before this one, Jehovah want make husband provide the things wey go help e family dey tight with God, make e care about the way them de feel, and give e family the things wey they go need to survive. (1 Tim. 5:8) But sisters wey don marry suppose take time everyday to read and think deep about wetin they read for Bible, and they go de pray to Jehovah from their heart. This one fit no dey easy. Women wey don marry get plenty things wey them de do. So they fit de feel say they no go get the time and the power to do this things wey go make them dey tight with God. But e really dey important make they bring out the time. Why we talk so? Na because Jehovah want make each of us be e friend and maintain that friendship.​—Acts 17:27.

7. Wetin go make-am dey easy for wife to respect and obey e husband?

⁷ Na true say wife fit need to work hard to obey e husband wey no dey perfect. But if the woman understand and agree with wetin Bible talk about why e suppose obey and respect e husband, this one go make-am dey easy for the woman to do this things wey Jehovah want make e do.

8. As e dey for Ephesians 5:22-24, why Christian wife go choose to accept e husband as the head?

⁸ Christian wife go choose to accept e husband as head because na wetin Jehovah want make e do be that. (Read Ephesians 5:​22-24.) The woman trust Jehovah because e know say Jehovah de always  do things because of love, and Jehovah go only tell-am to do something wey e go benefit from.​—Deut. 6:24; 1 John 5:3.

9. Wetin de happen when wife respect e husband as head?

⁹ The world de tell women make they no follow the law wey Jehovah give, and make they see say to accept their husband as their head na to bring theirself down. The truth be say, people wey de make other people de think like that no really know our God wey get love. Jehovah no go ever give e daughters wey e love command wey go bring them down. Sister wey de work hard to be the kind wife wey Jehovah want make e be, go make e family get peace. (Ps. 119:165) The husband go gain, the woman go gain, and the children go gain too.

10. Wetin be the things wey we fit learn from the thing wey Carol talk?

¹⁰ When wife de obey e husband, even as e husband no dey perfect, the wife de show say e love and respect Jehovah, the person wey arrange make head dey. Carol wey de live for South America talk say: “I know say my husband go make mistake. I still know say the way I treat my husband when e make mistake go show whether I really value my friendship with Jehovah. So I de always try to obey because I want make my Papa for heaven happy.”

11. Wetin help Sister Aneese to always de forgive, and wetin we fit learn from the thing wey e talk?

¹¹ E fit no easy for wife to respect and obey, if the wife feel say e husband no de care about the way e de feel and the things wey de worry-am. But see wetin Sister Aneese wey don marry de do when that kind thing happen. E talk say: “I de try make I no vex. I de remember say all of us de make mistake. The thing wey I de get for mind na to forgive from my heart as Jehovah de do. Anytime wey I forgive, I de get peace of mind again.” (Ps. 86:5) E go dey easy for wife wey de always forgive to always obey.

12. Which examples dey inside Bible?

¹² Some people fit feel say person wey de obey na weak person. But that one na big  lie. Bible get plenty examples of people wey obey but they really dey strong. Make we see wetin we fit learn from Jesus, Abigail, and Mary.

13. Why Jesus accept the authority wey Jehovah get? Explain.

¹³ Jesus de respect the authority wey Jehovah get, but this one no be because e no sabi anything. Na only person wey sabi something go fit teach for simple and clear way like Jesus. (John 7:​45, 46) Jehovah know say Jesus really sabi things sotey E allow Jesus to work with-am when E make heaven and earth. (Prov. 8:30; Heb. 1:​2-4) And after God bring Jesus back to life, e give Jesus “all the power for heaven and for earth.” (Matt. 28:18) Even though say Jesus sabi do plenty things, e still de tell Jehovah to direct-am. Why? Na because e love e Father.​—John 14:31.

14. Wetin husband them fit learn from (a) the way Jehovah de see women? (b) the thing wey Proverbs 31 talk?

¹⁴ Wetin husband fit learn? Jehovah no arrange-am make husband be head of the wife because of say for e eye, men dey important pass women. Jehovah don show say no be so because e choose women and men to rule with Jesus. (Gal. 3:26-29) God don show say e trust e Son when e give-am authority. For the same way, husband wey get sense go give e wife the right to do some things. Bible talk about the kind things wey wife fit do. For example, wife fit arrange the work wey them de do for house, buy and manage property, and de do business. (Read Proverbs 31:15, 16, 18.) Wife no be slave wey no get right to talk wetin e think about matter. Instead, e husband trust-am and e de listen to wetin e get for mind to talk. (Read Proverbs 31:​11, 26, 27.) When man de treat e wife with that kind respect, this one go make the wife dey happy to obey the man.

15. Wetin wife fit learn from the example wey Jesus show?

¹⁵ Wetin wife fit learn? Even with the big things wey Jesus don do, e no feel say e de bring e self down to obey Jehovah as head. (1 Cor. 15:28; Phil. 2:​5, 6) For the same way, better woman wey de do like Jesus no go feel say e de bring e self down when e de respect e husband as head. E no go only support e husband because e love-am, but the main thing go be because e love and respect Jehovah.

16. For 1 Samuel 25:3, 23-28, which things Abigail face? (Check picture for front cover.)

¹⁶ Abigail get one husband wey e name na Nabal. Nabal de think about only e self, e dey proud, and thank you no dey e mouth. Even with this one, Abigail no find shortcut to comot for the marriage. If to say Abigail want make the marriage end, e for don allow David and e men to kill e husband. But Abigail no do like that. Instead, e do everything wey e fit do to protect e husband and everybody for the house. Think about the kind strong heart wey Abigail get as e fit go meet 400 soldiers and as e use respect reason with David. E even ready to take the blame for wetin e husband do. (Read 1 Samuel 25:3, 23-28.) David accept say na Jehovah use this strong woman to give-am advise wey stop-am make e no do serious mistake.

17. Wetin husband fit learn from the example of David and Abigail?

¹⁷ Wetin husband fit learn? Abigail na woman wey get sense. David show say e get sense as e listen to e advice. Because of this one, e no kill innocent people. For the same way, husband wey get sense go take  time think about wetin e wife talk before e make important decision. The thing wey the wife talk fit help the man make e no make foolish decision.

18. Wetin wife fit learn from the example of Abigail?

¹⁸ Wetin wife fit learn? When wife love and respect Jehovah, this one go benefit e family, even if the husband no de serve Jehovah or e no de follow wetin Bible talk. The woman no go find way to end the marriage. Instead, e go show respect and obey so that e go try to make e husband learn about Jehovah. (1 Pet. 3:1, 2) But even if the good example of the woman no make the man change, Jehovah dey happy to see say the woman de obey e husband and e still hold Jehovah tight.

19. Which situation go make wife no obey e husband?

¹⁹ But better wife no go support e husband if the husband tell-am make e do wetin Bible no support. For example, make we talk say sister wey e husband no de serve Jehovah tell-am make e lie, thief, or do something wey Bible no support. Sisters wey don marry and everybody wey de serve Jehovah, go first obey Jehovah for everything. So if they tell sister make e do wetin Bible condemn, make e no gree. And make e sofri explain for clear way why e no go fit do wetin they talk.​—Acts 5:29.

20. How we know say Mary dey tight with Jehovah?

²⁰ Mary get tight friendship with Jehovah. E know Bible well. One time wey Mary de talk with Elizabeth wey be the mama of John the Baptist, Mary quote Hebrew Scriptures pass 20 times. (Luke 1:46-55) And think about this one: Even though say Joseph go soon marry Mary, the angel of Jehovah no first appear to Joseph. The angel first talk to Mary and tell-am say e go born Son of God. (Luke 1:26-33) Jehovah really know Mary well, and e dey sure say Mary go love and take care of e Son. And we dey sure say Mary continue to hold Jehovah tight even after Jesus don die and go heaven.​—Acts 1:14.

21. Wetin husband fit learn from the thing wey Bible talk about Mary?

 ²¹ Wetin husband fit learn? Husband wey get sense dey happy when e wife know Bible well. E no go vex for the wife or begin think say the wife want be head of the family. E know say sister wey really know Bible well, and wey sabi follow wetin Bible talk, fit help the family. Even if e be say na the wife go school pass the husband, na still the work of the husband to help the family dey tight with Jehovah; for example, to arrange for family worship.​—Eph. 6:4.

22. Wetin wife fit learn from Mary?

²² Wetin wife fit learn? Na true say woman must obey e husband, but the woman still get work to make e own faith dey strong. (Gal. 6:5) So, e must bring out time to do e own study and think deep about wetin e de study. This one go make the woman continue to love and respect Jehovah and e go dey happy as e de obey e husband.

23. When wife de obey e husband as head, how this one go benefit e family and congregation?

²³ If wife continue to obey e husband as head because the wife love Jehovah, e go get more joy for the marriage pass people wey no de follow the arrangement of authority wey Jehovah don make. This kind woman de show better example for young men and young women. And them de make love and peace dey, no be only for family, but for congregation too. (Titus 2:3-5) Among people wey de serve Jehovah well today, na women plenty pass. (Ps. 68:11) All of us get important thing wey we de do to help congregation, whether we be man or woman. The next topic go talk about how each of us go fit do that one.