1. Mɛni ji yi mi tomi kake he je nɛ kake peemi ngɛ Yehowa weku ɔ mi?

WA BUA JƆ kaa wa piɛɛ Yehowa weku ɔ he. Mɛni he je nɛ tue mi jɔmi kɛ kake peemi ngɛ wa weku ɔ mi ɔ? Yi mi tomi kake he je ji kaa wɔ tsuo wa bɔɔ mɔde kaa waa kɛ yi yemi he blɔ nya nɛ Yehowa to ɔ ma tsu ní. Ngɛ anɔkuale mi ɔ, ke wa nu yi yemi he blɔ nya tomi ɔ sisi saminya a, lɔ ɔ ma ha nɛ kake peemi nɛ ngɛ wa kpɛti ɔ mi maa wa wawɛɛ.

2. Mɛni sane bimihi a he wa ma susu ngɛ ní kasemi nɛ ɔ mi?

² Ngɛ ní kasemi nɛ ɔ mi ɔ, wa ma susu yi yemi he blɔ nya tomi nɛ ngɛ asafo ɔ mi ɔ he. Jehanɛ hu ɔ, wa maa na sane bimihi nɛ nyɛɛ se nɛ ɔ a heto: Mɛni ji yihi nɛ a ngɛ asafo ɔ mi ɔ a blɔ nya ní tsumi? Anɛ yo fɛɛ yo yi ji nyumuhi tsuo nɛ a ngɛ asafo ɔ mi ɔ lo? Anɛ asafo mi nikɔtɔmahi ngɛ he wami ngɛ nyɛmimɛ a nɔ kaa bɔ nɛ wekuyi ngɛ he wami ngɛ e weku mi bimɛ a nɔ ɔ lo? Kekleekle ɔ, nyɛ ha nɛ wa susu bɔ nɛ e sa nɛ waa na nyɛmimɛ yihi nɛ waa kɛ mɛ ngɛ asafo ɔ mi ha a he.

3. Mɛni ma nyɛ maa ye bua wɔ nɛ wa je hɛ sa kpo ngɛ ní tsumi nɛ wa nyɛmimɛ yi ɔmɛ ngɛ tsue ɔ he wawɛɛ?

³ Wa bua jɔ wa nyɛmimɛ yihi nɛ a tsuɔ ní wawɛɛ kɛ hyɛɛ a weku ɔ nɔ, kɛ tsuɔ fiɛɛmi ní tsumi ɔ, nɛ a yeɔ bua ni kpahi ngɛ asafo ɔ mi ɔ a he wawɛɛ. Ke wa susu bɔ nɛ Yehowa kɛ Yesu naa mɛ ha a he ɔ, lɔ ɔ ma ha nɛ wa bua nɛ jɔ a he wawɛɛ. Jehanɛ  hu ɔ, wa maa kase bɔ nɛ bɔfo Paulo kɛ yihi hi si ha kɛ bɔ nɛ e sa nɛ wɔ hu waa kɛ wa nyɛmimɛ yihi nɛ hi si ha a he ní.

4. Ngɛ mɛni blɔ nɔ nɛ Baiblo ɔ tsɔɔ kaa Yehowa naa yihi kɛ nyumuhi tsuo kaa a he jua wa?

⁴ Baiblo ɔ tsɔɔ kaa Yehowa naa yihi kɛ nyumuhi tsuo kaa a he jua wa. Baiblo ɔ tsɔɔ kaa ngɛ kaseli ɔmɛ a be ɔ mi ɔ, Yehowa ha nyumuhi kɛ yihi tsuo mumi klɔuklɔu ɔ nɛ e ha nɛ a tsu nyakpɛ níhi. Kaa nɔ hyɛmi nɔ́ ɔ, e ha nɛ a tu gbi slɔɔtoslɔɔtohi. (Níts. 2:1-4, 15-18) A ngɔ mumi klɔuklɔu ɔ kɛ pɔ nyumuhi kɛ yihi tsuo nu konɛ a piɛɛ Kristo he kɛ ye matsɛ ngɛ hiɔwe. (Gal. 3:26-29) Nyumuhi kɛ yihi tsuo ma ná neneene wami ngɛ zugba a nɔ hwɔɔ se. (Kpoj. 7:9, 10, 13-15) Nɛ a fã nyumuhi kɛ yihi tsuo kaa a fiɛɛ sane kpakpa a nɛ a tsɔɔ nihi ní. (Mat. 28:19, 20) Kaa nɔ hyɛmi nɔ́ ɔ, Baiblo mi womi nɛ ji Ní Tsumi ɔ tu nyɛmiyo ko nɛ a tsɛɛ lɛ ke Priskila a he munyu. E kɛ e huno Akuila tsɔɔ Apolo nɛ e ya sukuu kɛ ya tsitsaa a Baiblo mi anɔkuale ɔ heii.​—Níts. 18:24-26.

5. Ngɛ mɛni blɔ nɔ nɛ Luka 10:38, 39, 42 ɔ tsɔɔ kaa Yesu je bumi kpo kɛ tsɔɔ yihi?

⁵ Yesu wo yihi a hɛ mi nyami nɛ e je bumi kpo kɛ tsɔɔ mɛ. Farisi bi ɔmɛ hɛɛ susumi kaa yihi a he be se nami, a kɛ yihi tui munyu ngɛ magbɛ nɔ, nɛ a kɛ yihi sɛɛ we Ngmami ɔ mi níhi. Se Yesu lɛɛ e pee we jã, mohu ɔ, e kɛ nyumuhi kɛ yihi tsuo susu Baiblo mi anɔkualehi nɛ a he hia a he. * (Kane Luka 10:38, 39, 42.) E ha nɛ nyumuhi kɛ yihi tsuo piɛɛ e he kɛ ya fiɛɛ. (Luka 8:1-3) Nɛ benɛ a tle Yesu si kɛ je gbeje ɔ, e ha yihi he blɔ kaa a ya de e bɔfo ɔmɛ kaa a tle lɛ si.​—Yoh. 20:16-18.

6. Mɛni bɔfo Paulo pee kɛ tsɔɔ kaa e buɔ yihi?

⁶ Bɔfo Paulo kai Timoteo kaa e wo yihi a hɛ mi nyami. Paulo de lɛ kaa e na “yi nikɔtɔmahi kaa nyɛmɛ” kɛ “yihewi kaa nyɛmiyihi.” (1 Tim. 5:1, 2) E ngɛ mi kaa Paulo pee níhi fuu kɛ ye bua Timoteo konɛ e pee Kristofo no nɛ nane pi si mohu lɛɛ, se e tsɔɔ kaa Timoteo yayo kɛ e na lɛ tsɔɔ lɛ “ngmami klɔuklɔu ɔmɛ” kekle. (2 Tim. 1:5; 3:14, 15) Jehanɛ hu ɔ, ngɛ sɛ womi nɛ Paulo ngma kɛ ya ha Roma bi ɔmɛ mi ɔ, e je blɔ wo yihi a biɛ ta nɛ e kɛ e ngami ha mɛ. E kadi ní nɛ nyɛmimɛ yi nɛ ɔmɛ tsu ɔ nɛ e je hɛ sa kpo ngɛ he.​—Rom. 16:1-4, 6, 12; Filip. 4:3.

7. Mɛni sane bimihi a he wa ma susu amlɔ nɛ ɔ?

⁷ Kaa bɔ nɛ wa na ngɛ kukuhi nɛ a sɛ hlami ɔ mi ɔ, ngmami ko be nɛ wa ma nyɛ maa da nɔ kɛ susu kaa nyumuhi a nɔ kuɔ pe yihi. Nyɛmimɛ yi ɔmɛ yeɔ kɛ bua asafo ɔ wawɛɛ. Asafo mi nikɔtɔma amɛ le kaa nyɛmimɛ yi ɔmɛ a je mi bami kpakpa a haa nɛ kake peemi hiɔ asafo ɔ mi. Se sane bimi komɛ ngɛ nɛ e sa nɛ waa na a heto. Lɔ ɔmɛ nɛ a nyɛɛ se ɔ nɛ: Mɛni he je nɛ Yehowa hyɛɛ blɔ kaa nyɛmiyo nɛ ha e yi nɔ ngɛ si fɔfɔɛ komɛ a mi ɔ? Akɛnɛ nyɛmimɛ nyumuhi pɛ nɛ a hlaa kaa asafo mi nikɔtɔmahi kɛ asafo mi sɔmɔli he je ɔ, anɛ enɛ ɔ tsɔɔ kaa nyumu fɛɛ nyumu ji yi kɛ ha yihi tsuo nɛ a ngɛ asafo ɔ mi ɔ lo?

8. Ngɛ Efeso Bi 5:23 ɔ nya a, anɛ nyumu fɛɛ nyumu ji yi kɛ ha yihi tsuo nɛ a ngɛ asafo ɔ mi ɔ lo? Moo tsɔɔ nya.

⁸ Anɛ nyumu fɛɛ nyumu ji yi kɛ ha yihi tsuo nɛ a ngɛ asafo ɔ mi ɔ lo? Heto ɔ ji dɛbi! Kristo ji asafo ɔ yi. (Kane Efeso Bi 5:23.) Ngɛ weku ɔ mi ɔ, huno ji yi kɛ ha e yo ɔ. A binyumu nɛ a baptisi lɛ ɔ be nyɛe maa pee yi kɛ ha e yayo. (Efe. 6:1, 2) Ngɛ asafo ɔ mi ɔ, ní komɛ a mi pɛ nɛ asafo mi nikɔtɔmahi ngɛ he wami ngɛ nyɛmimɛ nyumuhi kɛ yihi tsuo a nɔ. (1 Tɛs. 5:12; Heb. 13:17) Yihi nɛ a sɛ we  gba si himi mi nɛ a kɛ a fɔli be hu ɔ hu nɛɛ? A yaa nɔ nɛ a jeɔ bumi kpo kɛ tsɔɔ a fɔli kɛ asafo mi nikɔtɔma amɛ, se a be a tsɛmɛ a yi yemi sisi hu. Mɛ hu a yi ji Yesu kaa bɔ nɛ nyumuhi nɛ a ngɛ asafo ɔ mi ɔ hu a yi ji Yesu ɔ.

9. Mɛni he je nɛ e sa nɛ nyɛmimɛ yihi nɛ a ha a yi nɔ be komɛ ɔ?

⁹ Anɔkuale sane ji kaa Yehowa hla nyumuhi kaa a tsɔɔ ní ngɛ asafo ɔ mi nɛ a nyɛɛ hɛ mi ngɛ e jami mi, nɛ e kɛ jamɛ a he blɔ ɔ ha we yihi. (1 Tim. 2:12) Mɛni he je? Kaa bɔ nɛ Yehowa hla Yesu kaa yi kɛ ha nyumuhi ɔ, jã nɔuu kɛ̃ nɛ e hla asafo mi nikɔtɔmahi konɛ a nyɛɛ asafo ɔ hɛ mi nɛ níhi nɛ ya nɔ saminya. Ke si fɔfɔɛ komɛ a he je ɔ, e he ba hia nɛ nyɛmiyo ko nɛ tsu ní tsumi nɛ nyɛmimɛ nyumuhi lɛ tsuɔ ɔ, lɛɛ nɔ́ nɛ Yehowa ngɛ hlae ngɛ e dɛ ji kaa e maa ha e yi nɔ. * (1 Kor. 11:4-7) Yehowa de we nyɛmimɛ yihi kaa a pee enɛ ɔ nɛ e kɛ ba mɛ si, mohu ɔ, e suɔ nɛ a pee jã konɛ a kɛ tsɔɔ kaa a ngɛ bu kɛ ha yi yemi he blɔ nya nɛ e to ɔ. Be mi nɛ ní nɛ ɔmɛ ngɛ wa juɛmi mi ɔ, nyɛ ha nɛ wa ha sane bimi nɛ nyɛɛ se ɔ heto: Mɛni he blɔ nɛ wekuyihi kɛ asafo mi nikɔtɔmahi ngɛ?

10. Mɛni he je nɛ be komɛ ɔ, asafo mi nɔkɔtɔma ko maa suɔ nɛ e wo asafo ɔ mlaahi?

¹⁰ Asafo mi nikɔtɔmahi suɔ Kristo, nɛ a suɔ “jijɔ” ɔmɛ nɛ Yehowa kɛ Yesu ngɔ kɛ wo a dɛ kaa a hyɛ a nɔ ɔ hulɔ. (Yoh. 21:15-17) Akɛnɛ asafo mi nikɔtɔma amɛ hyɛɛ asafo ɔ nɔ he je ɔ, eko ɔ, asafo mi nɔkɔtɔma ko ma susu kaa e ngɛ kaa tsɛ kɛ ha nihi nɛ a ngɛ asafo ɔ mi ɔ. Lɔ ɔ he ɔ, e ma nyɛ ma susu kaa ke wekuyi ngɛ he blɔ kaa e woɔ e weku mi bimɛ mlaahi konɛ e kɛ po a he piɛ ɔ, lɛɛ asafo mi nɔkɔtɔma  ma nyɛ maa wo nihi nɛ a ngɛ asafo ɔ mi ɔ mlaahi kɛ susumi ɔ kaa e kɛ maa po Mawu jijɔ ɔmɛ a he piɛ. Be komɛ hu ɔ, nyɛmimɛ nyumuhi kɛ yihi komɛ biɔ asafo mi nikɔtɔmahi kaa a mwɔ yi mi kpɔ kɛ ha mɛ, nɛ lɔ ɔ ma nyɛ ma ha nɛ asafo mi nikɔtɔmahi nɛ a pee kaa yi kɛ ha mɛ ngɛ Mawu jami blɔ fa mi. Se anɛ asafo mi nikɔtɔmahi kɛ wekuyihi tsuo hɛɛ he blɔ kake lo?

11. Ngɛ mɛni blɔ nɔ nɛ he blɔhi nɛ wekuyihi ngɛ ɔ ngɛ kaa he blɔhi nɛ asafo mi nikɔtɔmahi ngɛ ɔ?

¹¹ Bɔfo Paulo tsɔɔ kaa he blɔhi nɛ wekuyihi ngɛ kɛ he blɔhi nɛ asafo mi nikɔtɔmahi ngɛ ɔ je a he ngɛ blɔ komɛ a nɔ. (1 Tim. 3:4, 5) Kaa nɔ hyɛmi nɔ́ ɔ, Yehowa suɔ nɛ weku mi bimɛ nɛ a bu wekuyi ɔ. (Kol. 3:20) E suɔ nɛ nihi nɛ a ngɛ asafo ɔ mi ɔ hu nɛ a bu asafo mi nikɔtɔmahi. Yehowa hyɛɛ blɔ kaa wekuyihi kɛ asafo mi nikɔtɔmahi nɛ a tsɔɔ nihi nɛ a ngɛ a sisi ɔ ní konɛ a suɔ Yehowa. Jehanɛ hu ɔ, e suɔ nɛ asafo mi nikɔtɔmahi kɛ wekuyihi nɛ a hyɛ kaa nihi nɛ a ngɛ a sisi ɔ nuɔ he kaa a suɔ mɛ lo. Nɛ kaa bɔ nɛ wekuyi kpakpahi peeɔ ɔ, e sa nɛ asafo mi nikɔtɔmahi nɛ a ye bua nihi nɛ a hyɛɛ a nɔ ɔ ke a kɛ nyagbahi ngɛ kpee. (Yak. 2:15-17) Jehanɛ hu ɔ, Yehowa hyɛɛ blɔ kaa asafo mi nikɔtɔmahi kɛ wekuyihi maa ye bua nihi nɛ ngɛ a sisi ɔ nɛ a kɛ Yehowa mlaahi nɛ tsu ní, se a “ko be níhi nɛ a ngma” ngɛ Baiblo ɔ mi ɔ he kɔkɔɔkɔ.​—1 Kor. 4:6.

12-13. Kaa bɔ nɛ Roma Bi 7:2 ɔ tsɔɔ ɔ, ngɛ mɛni blɔhi a nɔ nɛ he blɔhi nɛ wekuyihi ngɛ ɔ ngɛ slɔɔto ngɛ he blɔhi nɛ asafo mi nikɔtɔmahi ngɛ ɔ he?

 ¹² Se kɛ̃ ɔ, slɔɔto komɛ ngɛ he blɔ nɛ asafo mi nɔkɔtɔma ngɛ kɛ he blɔ nɛ wekuyi ngɛ ɔ a kpɛti. Kaa nɔ hyɛmi nɔ́ ɔ, Yehowa hla asafo mi nikɔtɔmahi kaa a sɔmɔ kaa kojoli, nɛ e ha mɛ he blɔ kaa a je yayami peeli nɛ a tsakee we a tsui ɔ ngɛ asafo ɔ mi.​—1 Kor. 5:11-13.

¹³ Se kɛ̃ ɔ, Yehowa ha wekuyihi he blɔ komɛ nɛ e ha we asafo mi nikɔtɔmahi. Kaa nɔ hyɛmi nɔ́ ɔ, e ha wekuyi he blɔ kaa e wo mlaahi ngɛ weku ɔ mi, nɛ e hyɛ kaa e weku ɔ kɛ mlaa amɛ ngɛ ní tsue lo. (Kane Roma Bi 7:2.) Kaa nɔ hyɛmi nɔ́ ɔ, wekuyi ngɛ he blɔ kaa e tsɔɔ e bimɛ be nɛ e sa nɛ a ba su we mi gbɔkuɛ. Nɛ ke e bi ɔmɛ kɛ mlaa nɛ ɔ tsu we ní ɔ, e ngɛ he blɔ nɛ e gblaa a tue. (Efe. 6:1) Ngɛ anɔkuale mi ɔ, wekuyi nɛ e suɔ e yo ɔ, biɔ e yo ɔ juɛmi loko e woɔ e weku mi bimɛ mlaahi, ejakaa mɛ ni enyɔ ɔmɛ a ji “he lo kake.” *​—Mat. 19:6.

14. (a) Ngɛ Maako 10:45 ɔ nya a, mɛni he je nɛ e da blɔ kaa Yehowa hla Yesu kaa asafo ɔ yi ɔ? (b) Mɛni nɛ Blɔ Tsɔɔmi Ajla Toli Ɔmɛ tsuɔ? (Hyɛ daka nɛ ji, “ Nɔ́ Nɛ Blɔ Tsɔɔmi Ajla Toli Ɔmɛ Tsuɔ.”)

¹⁴ Kɛ gu kpɔmi nɔ́ ɔ nɔ ɔ, Yehowa he nihi nɛ a ngɛ asafo ɔ mi ɔ kɛ nihi tsuo nɛ a he Yesu ye ɔ a wami. (Kane Maako 10:45; Níts. 20:28; 1 Kor. 15:21, 22) Enɛ ɔ he ɔ, e da blɔ kaa Yehowa hla Yesu nɛ́ e ngɔ e wami kɛ ha ngɛ wa he ɔ kaa asafo ɔ yi. Akɛnɛ Yesu ji asafo ɔ yi he je ɔ, e ngɛ he blɔ nɛ e woɔ ni kakaakahi, wekuhi, kɛ asafo ɔ tsuo mlaahi ngɛ bɔ nɛ e sa kaa a ba a je mi ha a he, nɛ e ngɛ he blɔ nɛ e hyɛɛ kaa a ngɛ mlaa amɛ a nɔ yee lo.  (Gal. 6:2) Se tsa pi mlaahi pɛ nɛ Yesu woɔ. E hyɛɛ wa nɔ saminya nɛ e suɔ wa kpɛti nɔ fɛɛ nɔ hulɔ.​—Efe. 5:29.

15-16. Mɛni o kase ngɛ nɔ́ nɛ nyɛmiyo ko nɛ a tsɛɛ lɛ ke Marley kɛ nyɛminyumu ko nɛ a tsɛɛ lɛ ke Benjamin ɔ de ɔ mi?

¹⁵ Ke nyɛmimɛ yihi kɛ blɔ tsɔɔmihi nɛ nyumuhi nɛ Kristo hla mɛ kaa a hyɛ a nɔ ɔ kɛ ha mɛ ɔ tsu ní ɔ, lɔ ɔ tsɔɔ kaa a buɔ Kristo. Nyɛmiyo ko nɛ a tsɛɛ lɛ ke Marley nɛ e ngɛ United States ɔ de ke: “I naa he blɔ nɛ i ngɛ ngɛ asafo ɔ mi kaa yogbayo ɔ kaa e he jua wa. E he ba hia nɛ ma bɔ ye he mɔde wawɛɛ konɛ ma je bu kpo kɛ tsɔɔ ye huno ɔ kɛ asafo mi nikɔtɔmahi nɛ Yehowa hla mɛ ɔ. Se ye huno ɔ kɛ nyɛmimɛ nɛ a ngɛ asafo ɔ mi ɔ ha nɛ enɛ ɔ peemi pee gbɔjɔɔ ha mi, ejakaa a buɔ mi nɛ a kɛ a munyu tutui kɛ a ní peepee tsɔɔ kaa a bua jɔ nɔ́ nɛ i peeɔ ɔ he.” Kikɛ ji bɔ nɛ nyɛmimɛ yihi fuu nuɔ he.

¹⁶ Nyɛmimɛ nyumuhi tsɔɔ kaa a nu yi yemi he blɔ nya nɛ Yehowa to ɔ sisi kɛ gu bumi kpo nɛ a jeɔ kɛ tsɔɔ yihi kɛ a hɛ mi nyami nɛ a woɔ nɔ. Nyɛminyumu ko nɛ a tsɛɛ lɛ ke Benjamin nɛ e ngɛ England ɔ de ke: “I kase níhi fuu kɛ je sane hetohi nɛ nyɛmimɛ yihi haa ngɛ asafo mi kpehi a sisi, blɔ nɔ nɛ a tsɔɔ kaa a guu kɛ kaseɔ ní, kɛ blɔ nɔ nɛ a guɔ kɛ haa nɛ a fiɛɛmi ní tsumi nuɔ tso ɔ nɔ. I susu kaa ní nɛ nyɛmimɛ yihi tsuɔ ɔ he hia wawɛɛ.”

17. Mɛni he je nɛ e sa nɛ wa je bumi kpo ngɛ yi yemi he blɔ nya nɛ Yehowa to ɔ he ɔ?

¹⁷ Ke nyumuhi, yihi, wekuyihi kɛ asafo mi nikɔtɔmahi tsuo nu yi yemi he blɔ nya nɛ Yehowa to ɔ sisi nɛ a je bumi kpo ngɛ blɔ nya tomi nɛ ɔ he ɔ, lɔ ɔ haa nɛ tue mi jɔmi hiɔ asafo ɔ mi. Nɛ nɔ́ nɛ he hia pe kulaa a, e woɔ Yehowa nɛ ji wa hiɔwe Tsɛ nɛ e suɔ wɔ ɔ hɛ mi nyami.​—La 150:6.