1. Иегованыҥ билези недеҥ улам амыр-энчӱ ле бирлик јӱрет?

БИСКЕ Иегованыҥ билезинде болорго сӱреен јарап јат. Бу биле нениҥ учун амыр-энчӱ ле бирлик јӱрет? Нениҥ учун дезе, шылтактардыҥ бирӱзи, бу билениҥ кажы ла кижизи баш болотон принципти бӱдӱрерге албаданат. Иегованыҥ билези бу принципти канча ла кире јакшы оҥдоп турза, ончо ло кире бирлик болуп јат.

2. Бу јӧрмӧлдӧҥ кандый сурактардыҥ карууларын билип аларыс?

² Бу јӧрмӧлдӧ баш болотон принцип јуунда канайып тузаланылар учурлу деген тема шӱӱжилер. Анайда ок мындый сурактардыҥ карууларын билип аларыс: эје-сыйындарга кандый молју берилген? кажы ла ака кажы ла эјеге баш болот по? билениҥ бажында ла аксагалдыҥ молјуларында башказы бар ба? Је озо баштап эје-сыйындарга кӧрӱмис кандый болор керек деп кӧрӱп ийектер.

3. Эје-сыйындарды оноҥ тыҥ баалап турарга биске не болужар?

³ Эје-сыйындар билезинде, јарлаар иште, анайда ок јуунда кӧп иштер бӱдӱргилейт. Бис олорды ондый ижи учун тыҥ баалап јадыс. Иегова ла Иисустыҥ ӱй улуска кандый кӧрӱмдӱ болгонын билип алзаас, эје-сыйындарды оноҥ тыҥ баалап турарга кӱӱнзей берерис. Анайда ок биске апостол Павелдиҥ теми болужар.

4. Иегова ӱй улусты эр улусты ла чылап баалап турган деп, Агару Бичиктеҥ канайып кӧрӱнет?

 ⁴ Агару Бичикле болзо, Иегова ӱй де улусты, эр де улусты баалап јат. Баштапкы чакта Иегова ӱй де улуска, эр де улуска агару тынын берип , кайкамчылу иш бӱдӱретен арга берген. Анайып олор башка-башка тилдерге куучындана бергендер (Ап. ижи 2:1—4, 15—18). Анайда ок агару тынла майладып, Иисусла кожо теҥериде башкаратан арга эр де, ӱй де улуста бар (Гал. 3:26—29). Бого коштой эр де, ӱй де улус јерде ӱргӱлјиге јӱрер (Ачыл. 7:9, 10, 13—15). Сӱӱнчилӱ јарды јарлап, ӱренчиктер белетейтен молју эр де, ӱй де улуска берилген (Матф. 28:19, 20). Темдектезе, Апостолдордыҥ ижинде Прискилла деп эје керегинде айдылат. Ол Акила ӧбӧӧниле кожо Агару Бичикти јакшы билген Аполлос деп јарчыга чындыкты чын јартаарга болушкан (Ап. ижи 18:24—26).

5. Лука 10:38, 39, 42-ле болзо, Иисус ӱй улуска кандый кӧрӱмдӱ болгон?

⁵ Иисус ӱй улусты баалаган ла тоогон. Фарисейлер ӱй улусты јабыс кӧрӱп, олорло улус кӧзинче куучындашпас болгон. Олорло анчада ла кӧгӱс сурактарды шӱӱшпейтен. Је Иисустыҥ кӧрӱми чек башка болгон. Темдектезе, Иисус ӱй улуска тереҥ кӧгӱс сурактарды јартап туратан *. (Лука 10:38, 39, 42 кычырыгар.) Анайда ок ол јарлап турарда, оныла кожо бир канча ӱй улус болгон (Лука 8:1—3). Анайда ок Иисус тирилеле, эҥ ле озо ӱй улуска кӧрӱнген. Оноҥ олорды кӧргӧн-укканын апостолдорго јетирзин деп ийип јат (Иоанн 20:16—18).

6. Павел эје-сыйындарды баалап турган деп канайып кӧргӱскен?

⁶ Апостол Павел Тимофейди эје-сыйындарды тооп турзын деп ӱреткен. Павел Тимофейди «јажай берген ӱй улуска энелерге чилеп», «јиит кыстарга сыйындарга чылап» баштанзын деп айткан (1 Тим. 5:1, 2). Тимофейге кӧгӱзи тереҥ христиан болуп каларга Павел болушкан. Је андый да болзо, оны кӧгӱс јанынаҥ озо ло баштап энези ле карган энези ӧскӱрген деп, Павел билетен (2 Тим. 1:5; 3:14, 15). Анайда ок Павел Римдегилерге деп самарада кӧп эје-сыйындардыҥ ады-јолын бичип салган. Бу самарада ол эје-сыйындарды агару ижи учун мактап, олорды баалап турганын кӧргӱзет (Рим. 16:1—4, 6, 12; Флп. 4:3).

7. База кандый сурактар кӧрӱлер?

⁷ Ӧткӧн јӧрмӧлдӧ кӧргӧнисле ӱй кижини уйан кӧрӧтӧн кандый да библиялык тӧзӧлгӧ јок. Карын бистиҥ сӱӱштӱ, кысканбас эје-сыйындар јуунда кӧп иш бӱдӱредилер. Олор аксагалдарга јуунныҥ ичинде бирлик ле амыр болзын деп болужар аргалу. Је мындый сурактар чыгып келет: эје-сыйындар кандый айалгаларда бажын јабар учурлу? јӱк ле акалар аксагал ла болушчы ишчи эдип кӧстӧлип турарда, олор кандый ла эјеге баш болор аргалу ба?

8. Ефестегилерге 5:23-ле болзо, јуунда кажы ла ака кажы ла эјеге баш болот по? Јартап беригер.

⁸ Кажы ла ака кажы ла эјеге баш па? Кыскарта айтса, јок. Јуунда кажы ла ака кажы ла эјеге баш болбой јат. Ака јӱк бойыныҥ ӱйине баш болот. А јуунда ака-эјелердиҥ бажы — Иисус Христос  (Ефестегилерге 5:23 кычырыгар; 1 Фес. 5:12; Евр. 13:17). Керек дезе эјениҥ чӧҥӱрилип калган уулы да ого баш болбой јат (Еф. 6:1, 2). Јуунда кижиге барбаган, је ада-энезиле јатпай турган эје-сыйындар бар. Олор аксагалдарды ла ада-энезин тӱҥей ле тооп јат. Андый эје-сыйындарга, акаларга ла чылап, Христос баш болот.

9. Эје-сыйындар нениҥ учун кезикте бажын јабар учурлу?

⁹ Иегова јуунды башкаратан јаҥды эр улуска берген, је ӱй улуска мындый јаҥ берилбеген (1 Тим. 2:12). Нениҥ учун? Нениҥ учун дезе канайып эр кижи Христоско багынып турза, биледе амыр-энчӱ болот, анайып ла ӱй улус эр улуска багынып турза, јуунда ӱзе неме аайлу-башту болор. Оныҥ учун эје-сыйындарга акалардыҥ эдетен ижин эдерге келишсе, олор бажын јабып алар учурлу (1 Кор. 11:4—7) *. Бу некелте ӱй кижини уйан деп кӧргӱспей јат. Карын мынайып ол баш болотон принципти бӱдӱрип турганын кӧргӱзет. Эмди мындый сурактыҥ каруузын билип алактар: «Билениҥ бажыныҥ ла аксагалдыҥ молјуларыныҥ нези башка, нези тӱҥей?»

10. Аксагалдар јуунда недеҥ улам ээжилер тургузардаҥ айабас?

¹⁰ Аксагалдар Иисусты да, Иегова ла Иисустыҥ «койлорын» да сӱӱп јадылар (Иоанн 21:15—17). Оныҥ учун олор јакшы ла сананып, бастыра јуунныҥ адазы боло берердеҥ айабас. Темдектезе, аксагал мынайып сананар болор: «Канайып  билениҥ бажы кӧгӱс јанынаҥ билени кичеерге ээжилер тургузат, анайып ла меге Иегованыҥ койлорын кичееп турарымда, ээжилер тургузар керек эмес пе?» Анчада ла мындый санаа јуунда ака-эјелер аксагалдаҥ кандый бир сурактыҥ аайы-бажына чыгып берзин деп сураза келердеҥ айабас. Је аксагалдыҥ ла билениҥ бажыныҥ молјулары тӱҥей бе?

11. Аксагалдыҥ ла билениҥ бажыныҥ молјулары незиле тӱҥей?

¹¹ Апостол Павел аксагалдыҥ ла билениҥ бажыныҥ молјузында тӱҥей немези бар деп айткан (1 Тим. 3:4, 5). Канайып билениҥ улузы билениҥ бажына сӧсуккур болор учурлу, анайып ака-эјелер дезе аксагалдарга сӧсуккур болор учурлу (Кол. 3:20). Билениҥ бажы билезин кӧгӱс јанынаҥ кичеер учурлу, а аксагалдар јуунды кӧгӱс јанынаҥ кичеер учурлу. Анайда ок билениҥ бажы билезин эмоциональный јанынаҥ кичеер учурлу, анайып ла аксагал јуунды кичееп јат. Бого коштой аксагалдар уур-кӱчтерге туштаган ака-эјелерге болужып јат (Иак. 2:15—17). Билениҥ бажы ӱйи ле балдары Иегованыҥ нормаларын бӱдӱрип турган ба деп кӧрӱп турар учурлу, а аксагалдар ака-эјелер  бӱдӱрип турган ба деп кӧрӱп јат. Је олордыҥ кемизи де Агару Бичикте бичилген некелтелердеҥ башка некелтелер тургуспай јат (1 Кор. 4:6).

12, 13. Римдегилерге 7:2-ле болзо, аксагалдыҥ ла билениҥ бажыныҥ молјулары незиле башка?

¹² Билениҥ бажыныҥ ла аксагалдыҥ молјуларында башказы база бар. Иегова аксагалдарды јаргычылар эдип тургускан. Оныҥ учун олор кинчегин алынбай турган улусты јууннаҥ чыгарып ийер јаҥду (1 Кор. 5:11—13).

¹³ А билениҥ бажы бойыныҥ билезине ээжилер тургузар аргалу. (Римдегилерге 7:2 кычырыгар.) Је аксагалдарга дезе Иегова андый јаҥ бербеген. Темдектезе, адазы балдарына олор айлына канча саатта јанып келер учурлу деген некелте тургузат. Је балдары сӧс укпай турза, билениҥ бажы балдарын кату каруузына тургузар аргалу (Еф. 6:1). Мындый некелтелерди тургузардаҥ озо билениҥ бажы ӱйиле јӧптӧжӧт, нениҥ учун дезе олор «јаҥыс эт-кан» болот (Матф. 19:6) *.

14. а) Марк 10:45-ле болзо, нениҥ учун Иегова Иисусты јуунныҥ бажы эдип тургускан? б) Иегова башкару јӧпкӧ кандый молју берген? (« Башкару јӧптиҥ молјузы» деген рамканы кӧрӱгер.)

¹⁴ Иегова бистиҥ кажыбысты ла толынты тайылга ажыра бойына јууктадып алган. (Марк 10:45 кычырыгар; Ап. ижи 20:28; 1 Кор. 15:21, 22.) Оныҥ учун јуунды Иисустаҥ артык кем де башкарып болбос. А Иисус јуунныҥ бажы болордо, ол кажы ла кижиге, кажы  ла билеге, анайда ок бастыра јуунга ээжилер тургузар јаҥду. Оноҥ бис бу ээжилерди бӱдӱрип турганыс па, јок по деп кӧрӧт (Гал. 6:2). Је Иисус јӱк ле ээжилер тургузып турган эмес, ол бисти сӱӱп ле кичееп јат (Еф. 5:29).

15, 16. Марли эјениҥ ле Бенджамин аканыҥ айткан сӧстӧринеҥ неге ӱренедис?

¹⁵ Эје-сыйындар ӧбӧӧнине эмезе јуундагы аксагалдарга багынганыла Иисус Христосты тооп турганын кӧргӱзет. Бу керегинде США-да јадып турган Марли деп эје мынайып куучындайт, оныҥ сӧстӧриле кӧп эје-сыйындар јӧп болор болбой: «Мен биледе ле јуунда бойымныҥ јеримди баалап јадым. Баш болотон принципке чын кӧрӱмдӱ болорго кезикте меге кӱч болот. Је ӧбӧӧним ле јуунда аксагалдар ижим учун быйанын айдып турза, олорго багынарга меге јеҥил болот».

¹⁶ Баш болотон принципти јакшы оҥдоп турган акалар эје-сыйындарды тооп јат. Темдектезе, Англияда јадып турган Бенджамин ака мынайып айдат: «Мен јуунда эје-сыйындардыҥ јартамалдарынаҥ кӧп неме билип аладым. Анайда ок олордоҥ канайып јарлайтаны, ӱренчиктер белетеер иш јанынаҥ кӧп немеге ӱренип јадым. Эје-сыйындардыҥ ижи чыннаҥ ла баалу деп сананадым».

17. Баш болотон принципти бис нениҥ учун чын тузаланар учурлу?

¹⁷ Јуунныҥ кажы ла кижизи, билениҥ бажы, аксагалдар, эр де, ӱй де улус баш болотон принципти оҥдоп, оны чын тузаланып турза, јуун бирлик ле амыр болор. Је эҥ учурлузы, мынайып Иегова Кудайыс макталар! (Сар. 150:6).