1. Dhanu pa Yehova gitie i acel, pi thelembe moko ma kani?

WATIE kud anyong’a nibedo i kind dhanu pa Yehova. Pirang’o watie ku kwiocwiny man watie i acel? Thelembene acel utie nia, ng’atuman m’i kindwa ubetimo kero niworo yub mi dito ma Yehova uketho. Ka wabemedara niworo yub mi ditone, e bedo i acel mwa de medere ameda.

2. I thiwiwec maeni, wabidwoko wang’ penji ma kani?

² I thiwiwec maeni, wabiweco pi dito ma juketho i cokiri. Wabidwoko bende wang’ penji mulubo e: Nyimego gitie ku tic ma kani i cokiri? Nyo umegoman utie ku dito iwi nyamegoman acel acel i cokiri? Nyo judong cokiri gitie ku dito ma rom iwi umego ku nyimego tap calu ma jawi ot utie ko iwi dhaku man iwi awiya pare? Pi nicaku, wakewec iwi kite ma wacopo neno ko nyimego i cokiri.

3. Ang’o ma bikonyowa nineno tic ma nyimego mwa gibetimo ni gin ma pire tek lee?

³ Tic ma nyimego mwa gibetimo pi nigwoko juruot migi, pi nirweyo lembanyong’a man ma gikonyo ko ju mange i cokiri, utie gin ma pire tek lee iwa. Pi tic migine bibedo tek  lee, asagane kinde ma wabineno kite ma Yehova giku Yesu gineno ko ju ma mon. Wabinwang’u bende ponji iwi kite ma jakwenda Paulo ubed uneno kogi.

4. Biblia unyutho nenedi nia pi mon ku co ceke tie tek i i Yehova?

⁴ Biblia unyutho nia pi mon ku co ceke tie tek i i Yehova. Ku lapor, i rundi ma kwong’a, Yehova ukonjo tipo pare ma leng’ iwi mon ku co ceke, man eketho gitimo udu ma giweco ko dhok ma tung’ tung’. (Tic. 2:1-4, 15-18) Gin ceke jugam juwirogi ku tipo ma leng’ pi nibedo ku genogen mi bimo karacelo ku Kristu i polo. (Gal. 3:26-29) Mon ku co ceke gibinwang’u mugisa ma gibikwo ko rondo ku rondo iwi ng’om keni. (Nyu. 7:9, 10, 13-15) Bende, jumio tic mi rweyo lembanyong’a man mi ketho dhanu dok julub ni co ku mon ceke. (Mat. 28:19, 20) M’umedo maeno, buku mi Tic mi Jukwenda, ukoro nia nyamego moko ma nyinge Priskila gikud Akula ma won pare, gikonyo Apolo m’usomo lee ninyang’ cuu i lemandha.​—Tic. 18:24-26.

5. Nimakere ku Luka 10:38, 39, 42, Yesu unyutho woro nenedi ni ju ma mon?

⁵ Yesu umio yung man woro ni ju ma mon. Elubo ngo kura mi Jufarisayo, m’ubed ucayu mon, m’ubed uweco ngo i bang’gi i kind dhanu, man kadok Lembe pa Mungu de gibed giweco ngo i wie kugi. Tung’ kugi, Yesu ubed uweco iwi lembe mandha ma pire tek ni ju ma co ku ma mon ceke. * (Som Luka 10:38, 39, 42.) Ebed eweko ju ma mon bende ulub toke i tic mi rweyo lembanyong’a. (Lk. 8:1-3) Kinde m’ecer, eoro ju ma mon re m’ucidh unyuth ni jukwenda pare nia edaru cer ku kind ju m’utho.​—Yoh. 20:16-18.

6. Paulo unyutho woro nenedi ni ju ma mon?

⁶ Jakwenda Paulo ukwayu Timoteo umii yung ni ju ma mon. Eyero ire nia enen “mon ma dongo . . . calu mego; mon ma nyir ke calu nyimego.” (1 Tim. 5:1, 2) Kadok Paulo ukonyo Timoteo lee pi niteng’ini i thenge mi tipo de, re eng’eyo nia min Timoteo ku wang’umire re ma gilar giponje ku “Lembagora ma leng’.” (2 Tim. 1:5; 3:14, 15) I waraga ma Paulo ukiewo ni Jurumi, emotho nyimego, ng’atuman ku nyinge. Eneno ngo anena kende nia tic ma gitimo pire bino tek i wang’e, ento efoyogi bende pi tije.​—Rum. 16:1-4, 6, 12; Flp. 4:3.

7. Kawoni wabiweco iwi penji ma kani?

⁷ Calu ma waneno i udukuwec m’ukadhu, Biblia unyutho ngo nia pir umego tie tek lee nisagu nyimego. Nyimego mwa gibekonyo cokiri lee man judong cokiri de gitie ku yeny migi kara kwiocwiny man bedo i cel ubed i cokiri. Kawoni wakedwok wang’ penji ma e: Pirang’o Yehova kwayu nia saa moko mito nyimego gibed giboy wigi? Calu ma umego re ma gibedo judong cokiri kunoke jukony tic, nyo eno ubenyutho nia umegoman utie ku dito iwi nyamegoman acel acel i cokiri?

8. Nimakere ku Juefeso 5:23, nyo umegoman utie ku dito iwi nyamegoman acel acel i cokiri? Kekor.

⁸ Nyo umegoman utie ku dito iwi nyamegoman acel acel i cokiri? Ungo! (Som Juefeso 5:23.) I ot, won ot re m’utie ku dito iwi dhaku pare. Nyathin ma co m’ulimo batizo utie ngo jawi ot pa min. (Ef. 6:1, 2) I cokiri, judong cokiri gitie ku dito m’utie ku mupaka iwi umego ku nyimego. (1 Tes. 5:12; Ebr. 13:17) Nyamego ma jamusuma m’ubekwo ngo karacelo ku junyodo  pare, ucikere asu nimio woro ni junyodo parene man ni judong cokiri bende. Ento calu umego mange i cokiri, en de jawie tie Yesu.

9. Pirang’o saa moko bekwayere nia nyimego giboy wigi?

⁹ Andha Yehova uketho umego re ma giponj poji man gitel wi timo thier ire i cokiri, ento ni ju ma mon, emio ngo dito maeno. (1 Tim. 2:12) Pirang’o? Utie pi thelembe ma rom ku m’elar eketho ko Yesu ubed ni wic iwi ju ma co kara lembe uwoth ma ber i cokiri. Tek ukwayere nia nyamego utim lembe ma nwang’u i andha umego re m’ucikere nitimo, saa maeno, Yehova ubekwayu nia nyamegone uboy wie. * (1 Kor. 11:4-7) Yehova ukwayu lembe maeno i bang’ nyimego, ungo pi ninyutho nia pigi tie tek ungo i wang’e, ento kara ginyuth woro ni ju m’eketho ubed ku dito moko i wigi. Kawoni dong’ wakedwok wang’ penji ma e: Juwi ot ku judong cokiri gitie ku dito i kadiri ma rukani?

10. Lemang’o ma copo cwalu jadit cokiri niparu nia etie ku twero mi mio cik i cikiri?

¹⁰ Judong cokiri gimaru Kristu man gimaru bende “rombe” ma Yehova giku Yesu gikwayu nia gigwoki. (Yoh. 21:15-17) Calu ma jumio rwom mi gwoko cokiri ni judong cokiri, jadit cokiri moko copo paru nia dong’ etie ve wego ni dhanu ceke m’i cokiri. Calu jawi ot utie ku twero mi mio cik pi gwoko juruot pare, jadit cokiri moko de copo paru nia etie ku twero mi mio cik pi nigwoko rombe pa Mungu. Umego ku nyimego moko de copo cwalu judong cokiri gipodh i lembe maeno, ka gibekwayu nia judong  cokiri re m’umak yub ka kagi. Nyo judong cokiri ku juwi ot, ceke gitie ku dito ma rom?

11. Dito ma juwi ot gitie ko, urombo nenedi ku ku mi judong cokiri?

¹¹ Jakwenda Paulo unyutho nia, dito ma jawi ot utie ko, urombo i ayi moko ku dito ma jadit cokiri utie ko. (1 Tim. 3:4, 5) Ku lapor, Yehova ubemito nia juruot giwor jawi ot. (Kol. 3:20) Ebemito bende dhanu ceke m’i cokiri ginyuth woro ni judong cokiri. Yehova ubekwayu juwi ot ku judong cokiri ceke nia giponj dhanu ma gitie ku dito i wigi nimaru Yehova. Giketh bende dhanu ma gitie ku dito i wigi ginen nia gimarugi. Calu jawi ot, judong cokiri de gikonyo dhanu mi cokiri kinde ma ginwang’iri ku peko. (Yak. 2:15-17) M’umedo maeno, Yehova ubemito juwi ot ku judong cokiri ceke gikony jumange uwor cik pare mir ukungu man ‘kud gikadh ku wi lembe m’ubedo agora’ i Biblia.​—1 Kor. 4:6.

12-13. Calu ma Jurumi 7:2 unyutho, tung’ tung’ ma kani m’utie i kind dito ma juwi ot utie ko ku mi judong cokiri?

¹² Kadok kumeno de, re tung’ tung’ utie lee i kind dito ma jadit cokiri utie ko ku pa jawi ot. Ku lapor, Yehova uketho judong cokiri gibed calu jupoklembe, man  emio igi rwom ma gikoy ko jadubo m’ubeyewo ngo dubo pare cen kud i cokiri. Dito maeno emio ngo ni jawi ot.​—1 Kor. 5:11-13.

¹³ I thenge mange ke, dito moko nuti ma Yehova umio ni juwi ot m’elund emio ngo ni judong cokiri. Ku lapor, emio twero ma jawi ot umii ko cik ni juruot pare man mi ketho giwor cikne. (Som Jurumi 7:2.) Jawi ot utie ku twero mi ketho saa m’umito awiya pare gidwog ko i ie i pacu uthieno. Etie bende ku twero mi mio matira igi tek gibeworo ngo cikne. (Ef. 6:1) Bende, jawi ot ma jamer lar penjo paru pa min ot pare i wang’ niketho cik pi juruot pare man giweco i wie pilembe gin ario ceke gitie “kum acel.” *​—Mat. 19:6.

14. (a) Nimakere ku lembe ma Marko 10:45 uyero, pirang’o etie lembe m’ukwayere nia Yesu re m’ubed wic mi cokiri? (b) Tic mi Guriri m’utelowic utie ang’o? (Nen sanduku “ Tic mi Guriri m’utelowic.”)

¹⁴ Yehova umio jamgony pi ning’iewo kwo pa ng’atuman m’i cokiri man mi ju ceke ma ginyutho yioyic migi i Yesu. (Som Marko 10:45; Tic. 20:28; 1 Kor. 15:21, 22) Pieno, etie lembe m’ukwayere nia eketh Yesu ubed wic mi cokiri, pilembe emio kwo pare iwa ni jamgony. Yesu tie ku dito mi mio cik man mi ketho ng’atuman acel acel, juruot, man cokiri ceke giwor cikne, pilembe etie ku dito i wiwa. (Gal. 6:2) Yesu bemio ngo cik amia kende, ento egwoko ng’atuman m’i kindwa pilembe emaruwa.​—Ef. 5:29.

15-16. Wec ma nyamego Marley man m’umego Benjamin giyero, ubemio iri ponji ma kani?

 ¹⁵ Nyimego ginyutho nia gibeworo Kristu, nwang’u gibeworo telowic mi ju ma co m’eketho nia ugwokgi. Nyamego Marley ma kwo i États-Unis, uyero wec ma nyimego ma pol de beyero, ewacu kumae: “Aneno rwom para m’atie ko dhaku man nyamego i cokiri ni gin ma pire tek. Aii niworo dito ma Yehova umio ni won ot para man ni judong cokiri. Ento won ot para man umego mange mi cokiri giketho woro ditone udoko ira yot, pilembe gibed gimio ira woro man ginyutho foyofoc pi gin m’abetimo.”

¹⁶ Umego ginyutho nia gibeworo yub mi dito ma Yehova uketho, nwang’u gibenyutho woro ni nyimego man gibemio igi yung. Umego Benjamin ma kwo i Angleterre, uwacu kumae: “Dwokowang’ penji ma nyimego gibed gimio i coko, man bodho ma gibed ginyutho i tic mi rweyo lembanyong’a man mi ponjo dhanu, mio ira kony lee. Tic ma gibetimo pire tie tek lee.”

17. Pirang’o wacikara niworo dito ma Yehova uketho?

¹⁷ Kinde ma mon, co, juwi ot man judong cokiri, ceke gibeworo yub mi dito ma Yehova uketho, e cokiri bedo ku kwiocwiny. Man m’usagu zoo, ka dhanu mange ubeneno kura mwa ma ber, lembene mio pak ni Yehova Wegwa m’i polo.​—Zab. 150:6.