1. Inyuki adna i yé ikété ntôñ u Yéhôva?

DI YÉ maséé i ba i ntôñ u Yéhôva. Inyuki bés bagwélél ba Yéhôva di niñ ikété adna ni nsañ? Inyule bésbobasôna di mboñ biliya i diihe i kunde Yéhôva a bi ti ngim bôt i ngii bape. Ñ, adna ipôla yés y’a kônde let ibale di ntibil nok bitelbene bi.

2. Mambe mambadga di ga timbhe munu yigil ini?

² Munu yigil ini, di ga tehe bitelbene Yéhôva a bi yoñ inyu jam li kunde ikété likoda. Di ga timbhe ki mana mambadga: Kii i yé tel i bisita ikété likoda? Baa i yé maliga le lôk kéé i bôlôm yosôna i gwé kunde i ngii bisita? Baa i kunde mañ u gwé i ngii bilôk bikéé bi likoda i yé nlélém ni i kunde isañ mbai a gwé i ngii lihaa jé? Di bôk ndugi di tehe lelaa di nlama yoñ bisita.

3. Kii i nla hôla bés i diihe nson bisita bi ngwel?

³ Di yé maséé ni i bôlô i ngui bisita gwés bi nsal inyu yoñ ndun ni mahaa map, inyu añal ñañ nlam, ni inyu nit likoda. Di nla kônde diihe biliya gwap ibale di nhoñol lelaa Yéhôva bo Yésu ba ntehe bo. Di ga tehe ki lelaa di nlama yoñ bôda i ngéda di nwan ndémbél ñôma Paul a bi yigle bés mu jam li.

4. Lelaa Bibel i ñunda le Yéhôva a mboñ bé maselna ipôla bôda ni bôlôm?

 ⁴ Bibel i ñunda le Yéhôva a mboñ bé maselna ipôla bôda ni bôlôm. I ñunda le i hiai hi bisu, Yéhôva a bi ti bôda ni bôlôm mbuu mpubi u u bé lama ti bo ngui i boñ bihélha bi mam. Kiki bo i pot ngandak dilémb. (Minson mi baôma 2:1-4, 15-18) Bôlôm ni bôda ba bi yila minhook, inyu ke i ane ni Kristô i ngii. (Galatia 3:26-29) Bôlôm kiki bôda b’a niñ i boga ni boga hana ’isi. (Masoola 7:9, 10, 13-15) Mintôñ mi bôt mi nwo ima, mi nlama añal ñañ nlam ni niiga bôt Bibel. (Matéô 28:19, 20) Kiki hihéga, kaat Minson mi baôma i mpôdôl sita yada le Priskila nu bo nlôm Akuila ba bi hôla Apôlô nu a bé yi kaat ngandak i tibil nok Bitilna.​—Minson mi baôma 18:24-26.

5. Inoñnaga ni kaat Lukas 10:38, 39, 42, lelaa Yésu a bé tehe bôda?

⁵ Yésu a bé ti bôda lipém. A nigle bé Farisai i i bé yan bôda, i bé kwel bé ni bo i ti, ndi to i pôdôl Bitilna. Maselna ni hala, a bé kwel mam ma mbuu ni banigil bé, bôda kiki bôlôm. * (Añ Lukas 10:38, 39, 42.) A bé ke ki likalô ni bôda. (Lukas 8:1-3) Yésu a bi boñ le bôda ba ba bôt ba bisu i yi le a ntuge, bon a bi bat ki le ba kee ba añle baôma bé hala.​—Yôhanes 20:16-18.

6. Lelaa ñôma Paul a bé unda le a nti bôda lipém?

⁶ Ñôma Paul a bi hôñlaha Timôtéô le a ti bôda lipém. Paul a kal nye le a yoñ ‘mimañ mi bôda kiki banyañ, bingond bi bôda kiki lôknyañ.’ (1 Timôtéô 5:1, 2) Paul a bi sal ngandak inyu hôla Timôtéô i yila nhôôlak kristen. Ndi a bi kal le nyañ bo mbômbô yé bon ba bi niiga nye “bitilna bipubi.” (2 Timôtéô 1:5; 3:14, 15) I ngéda Paul a bé tilna likoda li Rôma, a bi ômle bisita mayéga a sim-ga môl map. A bé tehe ndik bé i bôlô bisita bi bé sal, ndi a bé ti yak bo mayéga inyu nson wap.​—Rôma 16:1-4, 6, 12; Filipi 4:3.

7. Mambe mambadga di ga timbhe nano?

⁷ Kiki di ntehe maben ma bisu, Bibel i ñunda bé homa nye ki nye le bilôk bikéé bi bôlôm bi nloo bilôk bikéé bi bôda. Bisita gwés bi gwéha ni bi bi nkap, bi yéne bés nseñ ngandak ikété likoda. Mimañ mi nyi le bi nla hôñôs nsañ ni adna ikété likoda ni maboñok map. Ndi di nlama timbhe ngim mambadga. Kiki hihéga: Inyuki Yéhôva a mbat le bisita bi hô miño ngim mangéda? Kiki lôk kéé i bôlôm yon i yé mimañ ni bahôla nson, baa hala a nkobla le hiki mankéé nu munlôm a gwé kunde i ngii hiki sita likoda?

8. Baa hiki mankéé nu munlôm nyen a gwé kunde i ngii hiki sita? Toñol.

⁸ Baa hiki mankéé nu munlôm nyen a gwé kunde i ngii bisita bi likoda? To, ndik Kristô. (Añ Éfésô 5:23.) Ikété ndap lihaa, munlôm a gwé kunde i ngii nwaa wé. Nsôblege i man munlôm u gwé bé kunde i ngii nyañ. (Éfésô 6:1, 2) Yak ikété likoda, i kunde mimañ mi gwé i ngii lôk kéé yap  i bôda ni i bôlôm i gwé minwaa. (1 Tésalônika 5:12; Lôk Héber 13:17) Sita i i yé ngi biiba, i i niñ ha bé ni bagwal bé i nke ni bisu i ti bagwal bé lipém, ndi ba gwé ha bé kunde i ngii yé. I nti yak mimañ lipém kiki ini lôk kéé i bôlôm ipe. Yésu nyen a yé ñane wap bobasô.

9. Inyuki bisita bi nlama hô ño ngim mangéda?

⁹ I yé maliga le Yéhôva a bi pohol bôlôm inyu niiga ni éga likoda. Ni le a bi ti bé bôda i kunde i. (1 Timôtéô 2:12) Inyuki? Inyu nlélém njom i i bi tinde nye i pohol Yésu kiki ñane munlôm. Hala wee inyu boñ le oda i ba ikété lihaa jé. Ibale i mpam le sita i nlama boñ bôlô mankéé nu munlôm a yé a mboñ, Yéhôva a ngwés le a hô ño wé. * (1 Korintô 11:4-7) Yéhôva a mbat bé bisita le bi boñ hala inyu suhus libak jap, ndi inyu boñ le ba unda le ba ndiihe bini bitelbene a bi yoñ le ngim bôt i bana kunde i ngii bape. Ni i mam ma momasôna mahoñol, di nla badba le: Imbe kunde balôm ni mimañ ba gwé?

10. Kii i nla tinde mañ i tééne lôk kéé mambén ikété likoda?

¹⁰ Mimañ mi ngwés Kristô, mi ngwés yak “mintômba” Yéhôva bo Yésu ba bi ti bo i tééda. (Yôhanes 21:15-17) I nla pam le mahoñol malam ma tinde mañ i hoñol le kiki a yé isañ mbai ikété lihaa jé, hala nyen a nlama ba yak isañ mbai ikété likoda. A nla hoñol  le kiki isañ mbai a nlama téé mambén ma ma nsôñ lihaa jé, hala nyen mañ u nla téé mambén ikété likoda inyu sôñ mintômba mi Djob. Ngim lôk kéé i bôda ni i bôlôm i yé i lo i tehe mimañ inyu boñ le mi yôñôl bo makidik. Ndi di hôya bañ le, mimañ mi likoda ni basañ mbai ba bi kôs bé nlélém kunde.

11. Inyuki di nla kal le kunde i basañ mbai ni i mimañ i mpôma?

¹¹ Bipôdôl bi ñôma Paul bi ñunda le kunde i isañ mbai ni i mañ i mpôna i ngim bahoma. (1 Timôtéô 3:4, 5) Kiki hihéga, Yéhôva a ngwés le bôt ba lihaa ba nôgôl isañ mbai. (Kôlôsé 3:20) A ngwés ki le lôk kéé i likoda i nôgôl mimañ. Yéhôva a gwé ki ngôñ le basañ mbai ni mimañ ba niiga i bet ba yé isi yap i gwés nye. Ba nlama ba nkwoog nkaa le i bet ba yé isi kunde yap ba nôgda toi le ba ngwés bo. Kiki loñge isañ mbai, mimañ mi nlama hôla i bet ba yé isi yap i ngéda ba mboma mandutu, tole ngéda bikuu bi nkwél bo. (Yakôbô 2:15-17) Yéhôva a mbat mimañ ni basañ mbai le ba hôla i bet ba yé isi yap i nôgôl  mambén mé. A mbéhe ki bo le ba lel bañ “nwaa u mam ma yé ntilga” ikété Bibel.​—1 Korintô 4:6.

12-13. Inoñnaga ni kaat Rôma 7:2, inyuki di nla kal le ngim maselna i yé ipôla kunde i basañ mbai ni kunde i mimañ?

¹² Ndék mahéñha i yé ipôla i kunde mimañ mi gwé ikété likoda ni i kunde basañ mbai ba gwé i ndap lihaa. Kiki hihéga, Yéhôva a bi ti mimañ kunde i kéés lôk kéé yap i i mboñ béba ikeñi. Ni i héya baboñbéba ba ba ntjél tam béba yap ikété likoda.​—1 Korintô 5:11-13.

¹³ Yéhôva a bi ti basañ mbai ngim kunde a bi ti bé mimañ. Kiki hihéga, a bi ti isañ mbai kunde i tééne bôt bé ba lihaa mambén, ni i boñ le ba noñ mo. (Añ Rôma 7:2.) Kiki hihéga, isañ mbai a gwé kunde i tééne bon bé ngim ngeñ ba nlama huu i ngéda ba mpam. A gwé ki kunde i kodol bon bé ibale ba noñ bé i mbén i. (Éfésô 6:1) Maliga ma yé le isañ nu a ngwés lihaa jé, a mbôk a kwel ni nwaa wé ilole a ntéé mambén, inyule bo iba ba yé “nsôn wada.” *​—Matéô 19:6.

14. (a) Inoñnaga ni kaat Markô 10:45, inyuki Yésu nyen Yéhôva a bi pohol kiki ñane likoda? (b) Umbe nson Juu li bakena ntôñ li ngwel? (Béñge minkéñék mi matila le “ Bôlô i Juu li bakena ntôñ.”)

¹⁴ Yéhôva a bi ti binoñ inyu hiki mut ikété likoda ni inyu bôt bobasôna ba ba nhémle sesema i Man wé ikété nkoñ ’isi. (Añ Markô 10:45; Minson mi baôma 20:28; 1 Korintô 15:21, 22) Inyu hala nyen a bi pohol Yésu nu a bi  ti niñ yé inyu yés kiki ñane likoda. Nano nu a yé ñane wés, Yésu a gwé kunde i tééne bés mambén, ni i boñ le hiki mut, hiki lihaa ni hiki likoda li noñ mo. (Galatia 6:2) Ndi Yésu a ntééne ndik bé bés mambén, a njés bés, a bobok hiki wada wés.​—Éfésô 5:29.

15-16. Bimbe biniigana di ñôt mu jam sita Marley ni mankéé Benyamin ba bi kal?

¹⁵ Bisita bi ñunda le bi nti Kristô lipém i ngéda bi noñ maéba ma bet a bi pohol inyu éga bo. Sita yada le Marley nu a yé Amérika a nkal kiki ngandak bisita le: “Me ndiihe tel yem i nyañ mbai ni i sita ikété likoda. Me mboñ biliya bi ngui inyu noñ bitelbene Yéhôva a bi yoñ le ngim bôt i ba i ngii bana bape. Ndi nlô wem ni lôk kéé i likoda i ntômbôs me mam inyule ba ndiihe me. Ba ñunda ki le ba yé maséé ni nson me ngwel ikété likoda.”

¹⁶ Lôk kéé i bôlôm i ñunda le i ntibil nok bitelbene Yéhôva a bi yoñ, le ngim bôt i bana kunde i ngii bape i ngéda i nti bisita lipém. Mankéé Benyamin nu a yé i loñ i Ngisi a nkal le: “Me ñôt ngandak biniigana mu mandimbhe bisita bi nti makoda, ni i ngéda me ntehe lelaa bi nyi téé likalô ni tégbaha bôt gwigil. Ñ, nson bisita bi ngwel ikété likoda u yé nseñ ngandak.”

17. Inyuki di nlama diihe bini bitelbene Yéhôva a bi yoñ le ngim bôt i bana kunde i ngii bape?

¹⁷ I ngéda bésbobasôna ikété likoda, hala wee bôlôm, bôda, basañ mbai ni mimañ, di ñunda le di nok bitelbene bi, di noñok ki gwo, nsañ u yé ikété likoda. Jam li nlôôha nseñ li yé le i ngéda di mboñ hala, di nti Yéhôva Tata wés Nungingii lipém.​—Tjémbi 150:6.