1. Ano an sarong dahilan kaya nagkakasararo an pamilya ni Jehova?

NAUUGMA kitang marhay na magin parte kan pamilya ni Jehova. Taano ta an satong pamilya matuninong asin nagkakasararong marhay? An sarong dahilan iyo na gabos kita ginigibo an satong pinakamakakaya para igalang an areglo nin pagkapayo na itinao ni Jehova. Sa katunayan, kun mas nasasabutan ta an areglo sa pagkapayo, magigin mas nagkakasararo man kita.

2. Anong mga hapot an sisimbagon ta sa artikulong ini?

² Sa artikulong ini, pag-uulayan ta an manungod sa pagkapayo sa laog kan kongregasyon. Sisimbagon ta man an minasunod na mga hapot: Ano an papel kan mga sister? Talaga daw na an gabos na brother payo kan gabos na sister? An awtoridad daw kan mga elder sa mga tugang kapareho kan awtoridad kan payo nin pamilya sa saiyang agom asin mga aki? Pag-ulayan ta nguna kun ano an dapat na magin pagmansay ta sa mga sister.

3. Paano ta urog na mapapahalagahan an mga ginigibo kan satong mga sister?

³ Pinapahalagahan ta an satong mga sister na maigot na inaataman an saindang pamilya, naghuhulit kan maugmang bareta, asin nagsusuportar sa kongregasyon. Urog ta sindang mapapahalagahan kun iisip-isipon ta an pagmansay sainda ni Jehova asin ni Jesus. Makikinabang man kita kun iisip-isipon ta an pagtratar ni apostol Pablo sa mga babayi.

4. Paano ipinapahiling kan Bibliya na pinapahalagahan ni Jehova an mga babayi pati man an mga lalaki?

⁴ Ipinapahiling kan Bibliya na pinapahalagahan ni Jehova an mga babayi pati man an mga lalaki. Halimbawa, ipinapahiling kaiyan  na kan inot na siglo, tinawan ni Jehova nin banal na espiritu an mga babayi pati man an mga lalaki tanganing makagibo sinda nin mga milagro arog kan pagtaram nin manlain-lain na lengguwahe. (Gibo 2:1-4, 15-18) Pareho sindang linahidan kan banal na espiritu asin may paglaom na mamahala kaiba ni Cristo. (Gal. 3:26-29) Tatawan man kan balos na buhay na daing katapusan an mga babayi pati man an mga lalaki. (Kap. 7:9, 10, 13-15) Asin parehong inasignaran an mga lalaki asin mga babayi na ihulit asin itukdo an maugmang bareta. (Mat. 28:19, 20) Sa katunayan, sinambit kan libro nin Mga Gibo an manungod sa Kristiyanang si Priscila na, kaiba kan saiyang agom na si Aquila, tinawan nin mas tamang eksplikasyon manungod sa katotoohan an edukadong lalaking si Apolos.—Gibo 18:24-26.

5. Ano an itinutukdo sato kan Lucas 10:38, 39, 42 manungod sa pagmansay ni Jesus sa mga babayi?

⁵ Tinawan ni Jesus nin onra an mga babayi. Hababa an paghiling kan mga Fariseo sa mga babayi. Dai sinda nakikipag-ulay sa mga ini pag nasa publiko asin nungka sindang makikipag-ulay sa mga ini manungod sa Kasuratan. Dai inarog ni Jesus an mga Fariseo. Imbes, ibinali niya an mga babayi kan nakikipag-ulay siya sa iba niyang mga disipulo manungod sa harararom na bagay sa Kasuratan. * (Basahon an Lucas 10:38, 39, 42.) Tinugutan niya man an mga babayi na mag-iba saiya sa mga pagbaklay niya para maghulit. (Luc. 8:1-3) Asin tinawan man sinda ni Jesus kan pribilehiyo na ibareta sa mga apostol na ibinangon na siya hali sa mga gadan.—Juan 20:16-18.

6. Paano ipinahiling ni apostol Pablo na iginagalang niya an mga babayi?

⁶ Espesipikong ipinagirumdom ni apostol Pablo ki Timoteo na tawan nin onra an mga babayi. Sinabi ni Pablo saiya na trataron an mga “may edad nang babayi na garo nakikiulay siya sa saiyang ina” asin “sa mga hoben na babayi na garo nakikiulay siya sa mga tugang niyang babayi.” (1 Tim. 5:1, 2) Dakula an naitabang ni Pablo ki Timoteo para magin maygurang na Kristiyano, pero minidbid niya na an ina asin lola ni Timoteo an inot na nagtukdo digdi manungod sa ‘banal na kasuratan.’ (2 Tim. 1:5; 3:14, 15) Espesipikong binati ni Pablo sa pangaran an mga Kristiyana sa saiyang surat sa mga taga Roma. Rinisa ni Pablo an ginibo kan mga Kristiyanang ini asin sinabi niya man na pinapahalagahan niya sinda bilang mga Kristiyanong ministro.—Roma 16:1-4, 6, 12; Fil. 4:3.

7. Anong mga hapot an pag-uulayan ta ngunyan?

⁷ Arog kan ipinapahiling sa nairinot na mga parapo, mayong sinasabi an Bibliya na an mga sister mas hababa kisa sa mga brother. An satong mamumuton asin bukas-palad na mga sister talagang dakulang tabang sa kongregasyon, asin nakakasuportar sindang marhay sa mga elder para mapagdanay an katuninungan asin pagkasararo sa laog kan kongregasyon. Pero may nagkapirang hapot kitang kaipuhan na simbagon. Halimbawa: Taano ta hinahagad ni Jehova sa mga sister na magkulbong sa partikular na mga sitwasyon? Dahil mga brother sana an ninonombrahan na magin mga elder asin ministeryal na lingkod, nangangahulugan daw iyan na gabos na brother payo kan gabos na sister sa laog kan kongregasyon?

8. Arog kan sinasabi sa Efeso 5:23, an gabos daw na brother payo kan gabos na sister? Ipaliwanag.

⁸ Dai nanggad! An sarong brother bako an payo kan gabos na sister sa kongregasyon, kundi si Cristo. (Basahon an Efeso 5:23.) Sa pamilya, may awtoridad an agom na lalaki sa agom niya. An sarong bawtisadong aking lalaki  bakong payo kan saiyang ina. (Efe. 6:1, 2) Sa laog kan kongregasyon, limitado sana an awtoridad kan mga elder sa mga sister asin sa mga brother. (1 Tes. 5:12; Heb. 13:17) An mga sister na daing agom na dai na nag-iistar kaiba kan saindang ama asin ina padagos na iginagalang an saindang mga magurang asin an mga elder. Pero arog kan mga lalaki sa laog kan kongregasyon, igwa sinda nin saro sanang payo, si Jesus.

9. Taano ta kun minsan kaipuhan na magkulbong nin mga sister?

⁹ Pero totoo man na an mga lalaki an ninombrahan ni Jehova na manginot sa pagtutukdo asin pagsamba sa laog kan kongregasyon, asin dai niya tinawan kan kaparehong awtoridad an mga babayi. (1 Tim. 2:12) Taano? Sa kaparehong dahilan kaya ninombrahan niya si Jesus bilang an payo kan lalaki—tanganing mapagdanay an pagigin areglado sa saiyang pamilya. Kun mangyari na kaipuhan talaga nin sarong sister na gibuhon an papel na dapat kuta para sa brother, kahagadan ni Jehova na magkulbong siya. * (1 Cor. 11:4-7) Hinahagad ini ni Jehova sa mga sister bako para menuson sinda, kundi para maipahiling ninda na iginagalang ninda an prinsipyo sa pagkapayo na ginibo Niya. Ngunyan, simbagon ta an hapot na: Sagkod sain an awtoridad kan mga payo nin pamilya asin kan mga elder?

10. Taano ta tibaad mamatian nin sarong elder na kaipuhan niyang magtao nin mga susundon sa kongregasyon?

¹⁰ Namumutan kan mga elder si Cristo, asin namumutan ninda an mga “karnero” na ipinagkatiwala sa sainda ni Jehova asin ni Jesus. (Juan 21:15-17) Dahil sa pagmalasakit nin sarong elder sa kongregasyon, tibaad ibilang niya an saiyang sadiri na garo ama kan mga  nasa kongregasyon. Tibaad isipon niya na kun may deretso an payo nin pamilya na magtao nin mga susundon para protektaran an pamilya niya, puwede man na magtao an sarong elder nin mga susundon na sa hiling niya makakaprotektar sa mga karnero nin Diyos. Asin may mga tugang na tibaad dagkahon an mga elder na gibuhon ini paagi sa pagsabi sa mga elder na gumibo nin mga desisyon para sainda. Pero magkapareho daw nin awtoridad an mga elder sa kongregasyon asin an mga payo nin pamilya?

11. Ano an mga pagkakapareho kan papel kan mga payo nin pamilya asin kan papel kan mga elder?

¹¹ Ipinarisa ni Pablo na may mga pagkakapareho an papel kan payo nin pamilya asin an papel nin sarong elder. (1 Tim. 3:4, 5) Halimbawa, gusto ni Jehova na sunudon kan mga miyembro nin pamilya an payo kan pamilya. (Col. 3:20) Asin gusto niya man na sunudon kan mga nasa kongregasyon an mga elder. Inaasahan ni Jehova sa mga payo nin pamilya asin sa mga elder na sisiguraduhon ninda na makusog sa espirituwal an mga nasa pangangataman ninda. Pareho man nindang sisiguraduhon na namamatian kan mga nasa pangangataman ninda na namumutan an mga ini. Asin arog sa marahay na mga payo nin pamilya, sinisigurado nin mga elder na matatabangan sa panahon nin pangangaipo an mga nasa pangangataman ninda. (Sant. 2:15-17) Dugang pa, inaasahan ni Jehova sa mga elder asin sa mga payo nin pamilya na tatabangan ninda an iba na sunudon an saiyang mga  pamantayan asin “dai maglampas sa mga bagay na nasusurat” sa Bibliya.—1 Cor. 4:6.

12-13. Arog kan ipinaparisa sa Roma 7:2, ano an mga pagkakaiba kan papel kan mga payo nin pamilya asin kan papel kan mga elder?

¹² Pero may dakulang mga pagkakaiba man an papel nin sarong elder asin an papel nin sarong payo nin pamilya. Halimbawa, inasignar ni Jehova an mga elder na magserbing mga hukom, asin tinawan niya man sinda nin responsabilidad na halion sa kongregasyon an dai nagsusulsol na mga parakasala.—1 Cor. 5:11-13.

¹³ Sa ibong na kampi, tinawan ni Jehova an mga payo nin pamilya nin nagkapirang awtoridad na dai niya itinao sa mga elder. An saro diyan iyo na tinawan niya nin awtoridad an payo nin pamilya na gumibo asin magpautob nin mga susundon para sa saiyang pamilya. (Basahon an Roma 7:2.) Halimbawa, may deretso an payo nin pamilya na magdesisyon kun anong oras sa banggi dapat magpuli an saiyang mga aki. May awtoridad man siya na disiplinahon an saiyang mga aki kun dai sinda nagsunod diyan. (Efe. 6:1) Siyempre, kokonsultahon nguna nin sarong mamumuton na payo nin pamilya an saiyang agom bago siya gumibo nin mga susundon sa harong huling sindang duwa “sarong laman.” *—Mat. 19:6.

14. (a) Kauyon kan sinasabi sa Marcos 10:45, taano ta angay sana na ninombrahan ni Jehova si Jesus na magin payo kan kongregasyon? (b) Ano an papel kan Namamahalang Grupo? (Hilingon an kahon na “ An Papel kan Namamahalang Grupo.”)

¹⁴ Paagi sa pantubos, binakal ni Jehova an buhay kan lambang indibidwal sa laog kan kongregasyon asin kan siisay man na nagtutubod ki Jesus.  (Basahon an Marcos 10:45; Gibo 20:28; 1 Cor. 15:21, 22) Kaya angay sana na ninombrahan niya si Jesus—na itinao an saiyang buhay bilang pantubos—bilang payo kan kongregasyon. Bilang an satong payo, igwa si Jesus nin awtoridad na gumibo asin magpautob nin mga susundon manungod sa paggawi kan lambang indibidwal, kan mga pamilya, asin kan bilog na kongregasyon. (Gal. 6:2) Pero bako sana iyan an ginigibo ni Jesus. Pinapakakan niya man asin pinapahilingan nin pagkamuot an lambang saro sato.—Efe. 5:29.

15-16. Ano an manunudan mo sa mga sinabi kan sister na si Marley asin kan brother na si Benjamin?

¹⁵ Ipinapahiling kan mga sister na iginagalang ninda si Cristo paagi sa pagsunod sa paggiya na itinatao kan mga lalaking ninombrahan niya na mangataman sainda. Dakul na sister an mauyon sa sinabi kan sarong sister na si Marley na nakaistar sa Estados Unidos. Sinabi niya: “Pinapahalagahan ko talaga an papel ko bilang agom na babayi saka sarong sister sa kongregasyon. Kaipuhan kong padagos na hinguwahon na magkaigwa nin tamang pagmansay sa areglo ni Jehova sa pagkapayo. Pero nagin mas madali iyan sako dahil ki agom asin sa mga brother sa kongregasyon dahil rinerespeto ninda ako saka pinapahalagahan ninda an mga ginigibo ko.”

¹⁶ Ipinapahiling kan mga brother na nasasabutan ninda an areglo sa pagkapayo paagi sa pagtaong onra sa mga babayi. Sinabi ni Benjamin na sarong brother na nakaistar sa England: “Dakul akong nanunudan sa mga komento kan mga sister saka sa mga tip ninda sa pag-adal pati sa kun paano magigin epektibo sa ministeryo. Para sako, mahalagang marhay an ginigibo ninda.”

17. Taano ta dapat tang igalang an prinsipyo sa pagkapayo?

¹⁷ Pag an gabos sa kongregasyon—mga lalaki, mga babayi, mga payo nin pamilya, asin mga elder—nasasabutan asin iginagalang an prinsipyo sa pagkapayo, nagigin matuninong an kongregasyon. Asin an mas mahalaga, nauumaw ta an satong mamumuton na Ama sa langit, si Jehova.—Sal. 150:6.