1. Jé ja bo na nda bôte jangan ya nsisim é bo nlatan?

BIA nye’e nda bôte jangan ya nsisim. Bia be bobejañ bia bu’ubane mvo’é a bi ne nlatan. Jé ja bo nalé? Jam ete da boban amu bia semé bôte Yéhôva a nga ve abim éjôé éziñ akônda. Nya ajôô a ne na, bii tu’a bo nlatan nge bia kôme wô’ô aval avé Yéhôva a nga ta’a nda bôte jé.

2. Bia zu bi biyalane ya minsili mivé ayé’é di?

² Ayé’é di, bia zu kobô ajô bôte Yéhôva a nga ve mbe’e ya wulu akônda. Bia zu fe yalane minsili mi: Ésaé évé Yéhôva a nga ve besita akônda? Ye e ne été na mojañ ase a ne nlô ya besita bese ya akônda? Ye bemvendé ba yiane wulu bobejañe ya akônda avale ba wulu menda me bôte map? Bi tame taté zu yen avale bia yiane yene besita bangan.

3. Jé jé volô bia na bi tu’a nye’e besita bangan?

³ Bia nye’e besita bangan angôndô amu beta ésaé ba bo. Ba nyoñ ngab a menda me bôte map, be ne mban ésaé nkañete, a ba su’u bobejañe ya akônda. Ve bii tu’a beta nye’e be nge bia fas avale Yéhôva ba Yésus ba yene be. Bii yene fe avale Paul a mbe a yene’e binga.

4. Jé ja liti na Yéhôva a nye’e befam a binga avale da?

 ⁴ Bible a liti na Yéhôva a nye’e befam a binga avale da. Ntete mimbu ôsu, Yéhôva a nga ve befam a binga mbamba nsisim, a ngule ya bo mesimba, ane e kobô minkobô mevale meva. (Mam. 2:1-4, 15-18) Yéhôva a nga tobe bese na be bo miñwo’an, a ve fe be mvome ya ke jôé a Yésus yôp. (Beg. 3:26-29) Befam a binga be bili ndi nleme ya nyiñe nnôm éto si va. (Nli. 7:9, 10, 13-15) Bia bese bi bili fe mbe’e ya kañete mbamba foé. (Mt. 28:19, 20) Kalate Mam minlôman a se’e Priscille amu beta ésaé a nga bo. Ba nnôme wé, Aquilla, be nga tu’a timine Apollos Mejô me Zambe, akusa bo a mbe beta ñyeme mam.​—Mam. 18:24-26.

5. Luc 10:38, 39, 42 a liti na Yésus a mbe a yene’e binga aya?

⁵ Yésus a mbe a semé’é binga. Yésus a nji be ane Bepharisien, mbe bete be mbe be biasé’é binga. Be mbe étyi teke kobô a binga bôt été, a étyi teke kobô ajô Zambe a be. Yésus nye a mbe a kobô’ô ajô Zambe a befam a binga avale da. Binga be mbe fe beyé’é bé. * (Lañe’e Luc 10:38, 39, 42.) Binga be mbe fe be kele’e litane nye nkañete. (Luc 8:1-3) Binga fe mbe Yésus a nga ve mvome ya ke kate beyé’é bé na a wômôya.​—Jean 20:16-18.

6. Jé ja liti na Paul a mbe a semé’é binga?

⁶ Paul a nga jô Timothée na a semé binga. A nga jô nye na a yene ‘benya bingaa ane benyia bé,’ a ‘bengone be binga ane bekale bé.’ (1 Tim. 5:1, 2) Akusa bo a nga volô nye na a bo éwôlô Kristen, Paul a mbe a yeme’e na nyia Timothée a émvame minga jé mbe be nga yale Timothée benya mejôô. (2 Tim. 1:5; 3:14, 15) E kalate a nga tili Bekristene ya Rome, Paul a batane besita béziñ, a tote’e biyôlé biap. A nji kobô ve ajô mbamba ésaé be nga bo, a nga se’e fe be.​—Bero. 16:1-4, 6, 12; Beph. 4:3.

7. Bia zu jeñe biyalane ya minsili mivé éyoñe ji?

⁷ Nde ñhe, teke jôm éziñe Bible ja liti na befam ba dañe binga mise me Yéhôva. Bidiñe besita bangan bia volô akônda nya nya abuii, a bemvendé be too be ndi asu na mvo’é a élate ya akônda bi tu’a bo ngul. Ve minsili mi mi bôô: Amu jé Yéhôva a jô besita na be buti nlô biyoñe biziñ? Mbôle befam étam mbe be ne bo bemvendé a bediakon, ye nalé a tinane ñhe na fam é ne nlô ya besita bese ya akônda?

8. Avale Beéphésien 5:23 a liti, ye fam é ne nlô ya besita bese ya akônda?

⁸ Bia jô tyi’ibi na momo. Krist nnye a ne nlô ya besita bese ya akônda, sa ke fam. (Lañe’e Beéphésien 5:23.) Fam é ne nlô ya be minga wé. To’o monafam a dubaneya, a vo’o bo nlô ya be nyia wé. (Beép. 6:1, 2)  Bemvendé fo’o mbe ba wulu akônda, ve éjôé jap é bili minné. (1 Bet. 5:12; Beh. 13:17) Sita a ne nkoé a yiane ke ôsu a semé bebiaé bé, to’o a nji beta bo éjôé jabe si. A yiane fe semé bemvendé ya akônda. Fo’o ve ane befam bese ya akônda, môte wua nnye a ne nlô ya sita a ne nkoé, Yésus.

9. Amu jé besita ba yiane buti nlô biyoñe biziñ?

⁹ E ne été na Yéhôva a nga tobe befam na mbe be ye’ele akônda, sa ke binga. (1 Tim. 2:12) Amu jé? Asu na mam me wulu mvo’é akônda. Ve nge da kui na sita a bo ésaé ja yiane mojañ, a yiane buti nlô avale Yéhôva a jô. * (1 Bec. 11:4-7) Yéhôva a jô ki besita na be buti nlô amu a biasé be, ve a ne amu a yi na be semé nta’ane mam a nga bo akônda. Éyoñe ji, bi tame yalane nsili wu: Abim éjôé avé minlô ya menda me bôte a bemvendé be bili?

10. Jé é ne bo na mvendé é kômbô nyoñ akônda ane nda bôte jé?

¹⁰ Bemvendé ba nye’e Krist, a “mintômba” Yéhôva ba Mone wé be nga ve be na be ba’ale. (Jean 21:15-17) Mvendé é ne mbamba nlem é ne buni na a ne ésaa bôte bese ya akônda. A ne simesane na mbôle nlô ya nda bôt wo yiane telé metiñ asu na ô ba’ale nda bôte jé, mvendé fe ja yiane telé metiñ asu  na é kamane mintômba mi Yéhôva. Bobejañe fe mbe be ne bo na bemvendé be simesane nalé, éko éziñ amu ba sili be kom ése na be nyoñe mintyi’ane señe jap. Ve ye bemvendé ba yiane wulu akônda avale ba wulu menda me bôte map?

11. Ésaé mvendé a ji nlô ya nda bôt bia funane mimfa’a mivé?

¹¹ Paul a nga liti na ésaé mvendé a ji nlô ya nda bôt bia funane mone jôm. (1 Tim. 3:4, 5) Yéhôva a yi na minga a bongô be bo nlô ya nda bôte mewôk. (Beco. 3:20) A yi fe na bibu’a ya akônda bi bo bemvendé mewôk. Aval a yi na bemvendé be fase été nsisime ya bibu’a ya akônda, nde fe a yi na minlô ya menda me bôt mi fas été nsisime ya binga bap a bone bap. A yi fe na bemvendé a minlô ya menda me bôt be bo na bôte be ne éjôé jabe si be wô’ôtane nye’an. Ane mbamba béesa, bemvendé ba fase fe nge bobejañ ba tôbane minjuk be bili mvolane wo sili be. (Jc. 2:15-17) Yéhôva a yi fe na bemvendé a minlô ya menda me bôt be ye’ele bôte memvinda mé, sa  ke na be “dañ nné ya mam me ne ntilan.”​—1 Bec. 4:6.

12-13. Beromain 7:2 a liti na ésaé nlô ya nda bôte a ji mvendé bia selane mimfa’a mivé?

¹² Ve ésaé nlô ya nda bôt a ji mvendé bia selane fe. Bemvendé étam mbe ba yiane kobô mejô ma boban akônda, a mbe Yéhôva a nga ve mbe’e ya telé mojañ ase a sem teke jôbane feñ.​—1 Bec. 5:11-13.

¹³ Yéhôva a nga ve minlô ya menda me bôt ngule ya bo mam méziñ bemvendé be vo’o bo. A nga ve minlô ya menda me bôte ngule ya telé metiñe menda me bôte map. (Lañe’e Beromain 7:2.) Éve’an é ne na, nlô ya nda bôt ñwô wo tyi’ awolo a yi na bone bé be bulane nda. A ne fe ngule ya foñôsô be nge be teke tôñ atiñ ete. (Beép. 6:1) Ve fam ja nye’e nda bôte jé ja telé ki metiñ teke taté sili minga wé aval a simesan, amu bebaane be ne “nsône wua.” *​—Mt. 19:6.

14. (a) Bela’ane Marc 10:45 na ô kat amu jé Yésus nnye fo’o Yéhôva a nga yiane telé nlô ya akônda. (b) Ésaé évé Tin ékôane ja bo? (Fombô’ô nka’ale ô ne nlô ajô na, “ Ésaé Tin ékôan ja bo.”)

¹⁴ Ntañe Yéhôva a nga ya’an, wo ve ébu’a ése ya akônda a môt ase a buni Yésus fane ya bi ényiñe ya melu mese. (Lañe’e Marc 10:45; Mam. 20:28; 1 Bec. 15:21, 22) Jôm ete nje Yésus a yiane bo nlô ya akônda,  amu a nga kañese ve ényiñe jé asu dangan. Nalé a ve nye ngule ya telé metiñ a lat a avale bibu’a ya nda bôte bia yiane nyiñ, a avale mam ma yiane wulu akônda. A véé fe mise na a yen nge bia tôñe fo’o metiñe mete. (Beg. 6:2) Ve Yésus a nji bo valé ve na a telé metiñ, a nyoñe fe ngab a ntômba Yéhôva ôse.​—Beép. 5:29.

15-16. Jam sita Marley a mojañ Benjamin be nga jô da ye’ele wo jé?

¹⁵ Besita ba liti na ba semé Krist éyoñe ba bo bôt a nga telé ôsu mewôk. Abui besita e ne tyiñ a Marley, sita ya États-Unis. A jô na: “Ma nyan éto Yéhôva a nga ve ma nda bôt, a akônda. Ma yiane ke ôsu a ve ngule asu na me semé nnôme wom a bemvendé ya akônda, avale Yéhôva a yi. Ve mbôle nnôme wom a bobejañe ya akônda ba semé ma, a ba se’e ma amu ésaé ma bo, ma yene ki ayaé ya suu mamien éjôé jabe si.”

¹⁶ Bobejañ ba liti na ba semé nta’ane mam Yéhôva a nga telé akônda éyoñe ba semé besita. Benjamin, mojañe ya Angleterre, a jô na: “Me nga yé’é abui mam be besita ya akônda dam. Biyalane ba ve bisulan, a melebe ba ve a lat a ayé’é étam a ésaé nkañete, bi nga volô ma nya abuii. Ésaé besita ba bo é ne nya mfii akônda.”

17. Amu jé bia yiane semé nta’ane mam Yéhôva a nga bo nda bôte jé?

¹⁷ Éyoñ ébu’a ése ya akônda: befam, binga, minlô ya menda me bôt, a bemvendé, ba semé nta’ane mam Yéhôva a nga telé akônda, bese ba bu’ubane nya mvo’é. A jame da dañ é ne na bia ve Ésaa wongan Yéhôva ava’a nlem.​—Bs. 150:6.