1. Kūöyòh ang ngam mikūönö Yāvē nö aṅhavin tö ngam lanāmö?

ṘĀMÖLŌN ayī-ö pöi hamūlhötvö tö Yāvē el ngam mikūönö ò. Aṅhavin ayī-ö tö ngam lanāmö. Kūöyòh? Kūö hī ṙòkhöre höng hōḵ elkatòh më töhalēnlöng tö Yāvē nö mahyöngken hī.

2. Asuh nup min intöönö tökētu sanapṙô el ngih ātiköl?

² Mikahtökūöre in min el ngih ātiköl, achīö yip tökētu la-en tö Yāvē nö hayöngken hī el në Māṅ. Chöh sanapṙô në intöönö inrē min ayi-ö: Asuh nup la-en kinë-ekūö më kananö hī? Ṙòkhöre hòng më prötör el në Māṅ, nö kui më töng sistör? Hěngren hòng minë la-en më minṙöinylen tö ngam kui ngam mikūönö? Töi urěh mikahtökūöre, hòṅ sitih mufē öi tö më kanānö re el ngam Māṅ.

3. Asuh öp mahayööken hī ṙūöhlö hanāngnlōn re tö minë la-en më kanānö hī?

³ Rëtnyi elmat më kanānö hī nö meukṙen më aṅpatī re, i inhangköm tölöök inhānga, hēk hayööken yip holmaneuk hī inrē el në Māṅ, meuk ngam lumrāḵ cha ayī-ö. Yēḵ hī asīnkö mat nā Yāvē nā Yēsū öi ngëchkö minë la-en cha, ṙūöhlöre min ngam hanāngenlōn hī tö cha. Hayööken hī inrē ang Pôl öi milēḵṙen tö cha.

4. Sitih mikahlōn öi tö ngam Tēv nö öt atöltuṙen tö kikōnyö hēk kikānö inrē?

 ⁴ Vënyu nang in töm Paipöl tö Yāvē nö öt atöltuṙen tö ngam kikōnyö-kikānö inrē. Ngö ṙô angu-ö inrē tö ngam Tēv Yāvē nö hōngtökui yik kikōnyö kikānö ik raneh senchurī tö ngam töhet kumlēḵ re, lökten cha nö keuheūt ëlô re nö ṙò-òvö. (Inl. 2:1-4, 15-18) Yip mahayöng min inre nö hol Kristū, kikōnyö më in cha hēk kikānö inrē. (Kal. 3:26-29) Teūngen min inrē ngòh kikānö tö ngam nômö tö örheūheu aṅ. (Inmeuk. 7:9, 10, 13-15) Pòrô öi kikōnyö hēk kikānö, ṙòkhöre öi kē-ěvkūö tö ngam la-en inhangköm tölöök inhānga. (Mët. 28:19, 20) Kòtökūö in inrē yēḵ hī vë-ekūö ngam līpöre Inlahen tö nuk la-en Prisilā nö holṙen ök pīhöre Akula. Holṙen höö cha-a nö haköpten Apòlös tö minë ṙô ngam Tēv.—Inl. 18:24-26.

5. Sā ṙô ngam Lūkös 10:38, 39, 42 sitih mat ök Yēsū tö yik kikanö?

⁵ Milēḵṙen ang Yēsū tö kikānö. Öt asīnkö inlahen yik Feresī ang Yēsū yik tö mināich elmat tö kikānö, ötrēhěn nö hōḵ nö vë-ekūö cha nö ikuö tömaṙôngö, ötrēhěn nö hōḵ nö kakkö minë ṙô ngam Tēv nö in cha. Minë tökakka tö ò nö in yip haköptö ò kikōnyö kakken u anga-aṅ inrē nö ikūö yik kikanö haköptöre. * (Vë-evkūö Lūkös 10:38, 39, 42.) Holuröön inrē anga-aṅ tö yik kikanö yěn ahangköm tölöök inhānga. (Lūkös 8:1-3) Ik sā ò inrē nö hachohlöngö nö ṙa-ang i tökapah, ngaich tölṙô yik kikanö anga-aṅ nö vë-eny nang yik mahaköp.—Yôh. 20:16-18.

6. Sitih inlahen ang Pôl nö hameuktö minlēḵṙen re tö kikānö?

⁶ Milēḵṙen ang Pôl tö kikānö. Fēlen Timòtī nö milēḵṙen tö yip tököiny ‘sāre tö yöng re kikānö’. Ngaich kahëmre vö lōn tö yip manāngö töre kikānö.” (1 Tim. 5:1, 2) Kô-en ang Pôl nö pōyen tī nö hayööken Timòtī im inngönlö ṙinātö ellōn ò. Kööpölōn pöri anga-aṅ tök kikānö yöng Timòtī tök yōm ò inrē kikanö, pön acha-a chamaphöt ngam kanô-en nö ellōn Timòtī löktökūö nyinī-ö ò. (2 Tim. 1:5; 3:14, 15) Ik sā Pôl hēk nö kūich chitri yik aṅ Rōma, ngaich kūichhöt minë-eny yik kikānö anga-aṅ. Eūḵ nuk la-en cha ang Pôl nö im linökölōn ngam Tēv.—Rōm. 16:1-4, 6, 12; Filip. 4:3.

7. Asuh nup intöönö tö chööhö sanapṙô min tö hī?

⁷ Sā minë haköp hī ngaich, öt ōt chūök e nö kūichi imat ngam Paipöl tö inlahen ngòh kikānö kūöṅnö tö ngam kikōnyö. Töhěng kangen yin nö inkòlô hī vē kanānö hī el në Māṅ. Pò cha nö hayööken më minröinylen nö vī ngam lanāmö nö el në Māṅ. Sön pöri nö ōt minë intöönö tö söklöre nö elkuilōn hī. Tö sā në: Kūöyòh ang Yāvē nö inup kamngö chūök nö hōten ngam kikānö nö kahulkui re? Vīlöngö më prötör nö minröinylen hēk hamòlṙen töla-envö inrē, tö ngö manah hòng angu-ö pökeh töcha nö kui më töng sistör el ngam Māṅ?

8. Sā ṙô ngam Efisös 5:23, ṙòkhöre hòng më kikōnyö nö kui më kikānö? Mikahtöelnang hī.

⁸ Hö-ö. Pön höng hěng tak ang Kristū nö kui në Māṅ. (Vë-evkūö Efisös 5:23.)  Ngam inpīhö kikōnyö an kui ngam pīhöre kikānö. Pòrô ngam kūön cha kikōnyö nö ngaich nö kēḵ ngam vinôkö, sön anga-aṅ nö öt kaheūkö nö kui ngam yöngre kikānö. (Efi. 6:1, 2) Ngatī më minröinylen el ngam Māṅ nö tö tölnguvö minë kinë-ekūö cha la-en nö ikui më holmaneuk re. (1 Tös. 5:12; Hep. 13:17) Yěn hěng tak öre öp sistör tö öl nö pīhövö, achiö öp kui ò anga-aṅ? Höng Yēsū.

9. Ihē ang ngòh kikānö nö hòṅ kahulkui re?

⁹ Höng më kikōnyö yin tö kētu la-en tö Yāvē nö haköphöti hěnghöre hayöngken minë Māṅ, öt kētu angu-ö nö la-en më kikanö. (1 Tim. 2:12) Hēkpī pöri ngam kikānö nö kētöre inup la-en kinë-ekūö ngam prötör. Ngaich yěn ngatī, hōtu anga-aṅ tö Yāvē nö kahulkui re. * (1 Kòr. 11:4-7) Öt kūö Yāvē pöri nö miṙēḵngen ò, hōten ò pöri anga-aṅ nö hameuktö milēḵṙen re tö më töhalēnlöng mahayöngken hī. Asuh nup pökeh la-en kinë-ekūö ngam kui mikūönö tö më minröinylen inrē?

10. Hēkpī nö sitih lōn ngam minröinylen lökten nö kētö chööngö nö in më protör sistör?

¹⁰ Hāngenlōn yin më minröinylen tö Kristū. Hāngenlōn inrē cha-a tö minë ‘kun sīṅp’ ngam Tēv Yāvē minë tö hōtu nö chumkūökaṙen tö cha. (Yôh. 21:15-17) Lohten ngam minröinylen nö hāngenlōn tö më prötör sistör el ngam Māṅ. Kuönrevölōn anga-aṅ tö cha, hēkpī anga-aṅ nö sā mufē öp inyööngö, öp kamëtö  chööngö yip kūön re pön sōten cha nö pala-āiṙen. Rīkre inrē yip yamihtöre nö chuh in ò nö hōten ò nö kēḵ fësla cha. Hěngren hòng pökeh minë la-en ngam kui mikūönö tö nup la-en ngam minröinylen?

11. Sitih inlaha minë la-en kinë-ekūö më minröinylen tö më kui mikūönö nö hěngren?

¹¹ Ōt nun minë töhěngren inlāha la-en kinë-ekūö më kui ngam mikūönö hēk tömë minröinylen inrē. (1 Tim. 3:4, 5) Tö sā në, lōnu ang Yāvē tö minë mikūönö nö elkatòh chööngö ngam kui re kikōnyö. (Kòl. 3:20) Ngatī anga-aṅ nö hōten me aṅ ngam Māṅ nö elkatòh chööngö më minröinylen. Lōnu anga-aṅ tö ngam kui ngam mikūönö nö hangönlöm ṙinātö ellōn më aṅpatī re, ngatī inlahen më minröinylen inrē tö më elkatòh re. Kö chumkūöṙen cha-a tö minë kuilōn më ngahëch köre, hayööken cha inrē yěn kihngen. (Yāk. 2:15-17) Hōten më minröinylen tö më kui ngam mikūönö ang Yāvē nö hayööken më tumṙeūtöre tö cha nö lök el minë talöökö hachōḵtö Yāvē, “ötkô pöri nö havāngngöre röön tö nup tö kūchi” nö imat ngam Paipöl.—1 Kòr. 4:6.

12-13. Sā ṙô ngam Rōma 7:2, sitih inlahen nö kö harīkngöre minë la-en më minröinylen töm kui ngam mikūönö?

 ¹² Ōt pöri minë la-en cha tö harīkngöre tö höö. Yěn hěng tak öp tököölö falen nö ikūö Yāvē, ngaich kētö kumlēḵ më minröinylen anga-aṅ nö kahòkken öp inlaha ngam tarik ngaich mihòiṅ cha-a nö ha-uknyen ngam tarik nö ṙa-ang el ngam Māṅ, öt kē-ěvkūö pöri ngam kui mikūönö tö töngatī la-en.—1 Kòr. 5:11-13.

¹³ Im tahëng lā-a ayī-ö öi meuk minë la-en kinë-ekūö ngam kui mikūönö. Mihòiṅ anga-aṅ nö vī hēk kētö chööngö më aṅ patī re. (Vë-evkūö Rōma 7:2.) Mihôiṅ anga-aṅ nö kētö chööngö inlaha ṙētak më kūönre nö havan nö i patī. Ngaich yěn öt hang ngam chööngö cha-a, mihôiṅ anga-aṅ nö chökṙen cha. (Efi. 6:1) Hatöntöre pöri anga-aṅ nö im pīhöre kikānö urēhěkūö ò nö vī minë chööngö, inmeuktö cha nö “hēngö alaha.” *—Mët. 19:6.

14. (a) Sā ṙô ngam Mākös 10:45, kūöyòh nö löng ngam inlahen Yāvē nö vīlen Yēsū nö kui në Māṅ? (b) Asuh nup kinë-ekūö ngam Yōm La-en? (Ngëchköm pòks “ Asuh Nup La-en Ngam Yōm La-en.”)

¹⁴ Havāha ayī-ö tö Yāvē öi ṙāitö ngam mahām ngam kūön ò. (Vë-evkūö Mākös 10:45; Inl. 20:28; 1 Kòr. 15:21, 22) Lökten nö long ngam inlahen Yāvē nö vīlen Yēsū nö kui ngam Māṅ. Mihôiṅ ang Yēsū, ngam kui hī nö kētö chööngö nö in hī. Lōnu anga-aṅ inrē tö hī hang minë chööngö kahëtö ò. (Kal. 6:2) Rö-ö pöri Yēsū nöng  vamī chööngö. Tön hāngenlōn anga-aṅ hěnghöre chumkūöṙen inrē tö hī.—Efi. 5:29.

15-16. Asuh öp haköplö meh in minë vahënyö nā Marlī nā Penchamin?

¹⁵ Yěn hōḵ më kikānö nö tumṙeūtöre tö më pīhöre, mahameuktö minlēḵṙen re cha-a tö Yēsū. Töi hangihtö ṙô sistör Marlī ngam aṅ Amerika, ngö ṙô anga-aṅ: “Kalahtenre chū-ö öich kēkö minë la-en kinë-ekūö chu öich kikānö i patī re el ngam Māṅ inrē. Hēkpī chū-ö kihngen öich milēḵṙen tö ngam pīhöre hēk tumṙeūtöre inrē tö më minröinylen. Yēḵ chu pöri meuk inlahen ngam pīhöre nö milēḵren tö chu hēk meuk inlaha më minröinylen nö ṙāmölōn tö nup la-en chu, hēḵ e chu-ö öt kihngen tumṙeūtöre tö cha.”

¹⁶ Yēk më Prötör min nö milēḵṙen tö ngam Tēv ngam kamëtö chööngö cha, ötlöktu cha-a nö öt milēḵṙen tö më kikānö el ngam Māṅ. Ngö ṙô ang Penchamin, ngam prötör aṅ Inglën: “Vāyö ṙô më sistör yěn kētö ansöör nö el mīting, heuveū inrē cha-a nö kēḵ istötī. Pōyen haköplö chū-ö öich in cha. Töpōiṙāi nun minë la-en cha pön yöölen tī tö hī öi ṙòkhöre.”

17. Kūöyòh öi hòṅ tumṙeūtöre tö më tövīlöngö nö kui hī?

¹⁷ Yěn ṙòkhöre më kikōnyö, kikānö, hēk kui ngam mikūönö tö më minröinylen inrē nö tumṙeūtöre tö më kui cha. Lanāmö min angu-ö nö el ngam Māṅ. Mötlö pöri nöng inrōilö ngam Yöng hī angu-ö el halīöngö ang Yāvē.—Sal. 150:6.