1. Cosa el un razon si porque unido el familia de Jehova?

ALEGRE kita queda parte del familia de Jehova. Porque unido y tiene paz este familia? El un razon amo cay todo kita ta hace esfuerzo para respeta con aquellos con quien ya dale autoridad si Jehova. Gane, si mas entende kita con este arreglamiento, hay queda kita mas unido.

2. Cosa maga pregunta kita contesta na este articulo?

² Na este articulo, hay considera kita si quien tiene autoridad na congregacion. Hay contesta tambien kita con este maga pregunta: Cosa el papel del maga hermana? Deverasan ba que el cada uno hermano cabeza del cada uno hermana? El autoridad ba que tiene el maga anciano na maga hermano y hermana igual na autoridad que tiene el un cabeza de familia na de suyu mujer y maga anak? Una, considera kita si paquemodo kita debe mira con el maga hermana.

3. Paquemodo kita hace mas hondo con el diaton apresacion para na maga trabajo que ta hace el maga hermana?

³ Ta aprecia kita con el diaton maga hermana quien ta trabaja enbuenamente para cuida con el diila familia, para predica con el buen noticia y para suporta con el congregacion. Puede kita hace mas hondo el diaton apresacion kanila si considera kita si paquemodo kanila ta mira si Jehova y si Jesus. Hay beneficia tambien kita si considera kita si paquemodo si apostol Pablo ya trata con el maga mujer.

4. Paquemodo ta dale mira el Biblia que valoroso con Jehova el maga mujer igual con el maga hombre?

⁴ El Biblia ta indica que valoroso con Jehova el maga mujer igual con el maga hombre. Por ejemplo, ta habla este que del primer siglo, ya dale sagrao espiritu si Jehova con el maga mujer  igual con el maga hombre para puede sila hace maga milagro, igual como converza na diferente lengguaje. (Act. 2:1-4, 15-18) Ya iscuji tambien por medio na sagrao espiritu con el maga mujer y maga hombre y tiene sila el esperanza que rula junto con el Cristo. (Gal. 3:26-29) El maga mujer y el maga hombre hay ricibi tambien vida hasta para cuando aqui na tierra. (Rev. 7:9, 10, 13-15) Y igual sila ya ricibi el mandato que predica y enseña con el buen noticia. (Mat. 28:19, 20) Gane, el libro del Maga Actividad ya menciona con el trabajo que ya hace el un hermana que el nombre Priscila, quien junto con el de suyu marido si Aquila, ya ayuda explica con el verdad na mas justo manera con el un bien educao gente si Apolo.​—Act. 18:24-26.

5. Cosa ta habla el Lucas 10:38, 39, 42 acerca na custumbre de Jesus na maga mujer?

⁵ Si Jesus ya dale mira honor y respeto con el maga mujer. Nuay le sigui con el cosa ta hace el maga Fariseo quien ta hace bajo con el maga mujer. Gendeh sila tan cuento con el maga mujer na publico y gendeh ta discuti con el Escritura kanila. Pero si Jesus ya discuti maga importante verdad con el maga mujer junto con el de suyu otro maga dicipulo. * (Le con el Lucas 10:38, 39, 42.) Ya permiti tambien le con el maga mujer que man junto con ele na predicacion. (Luc. 8:1-3) Ya dale tambien le kanila el privilegio que habla con el otro maga apostoles que ya resucita ya le.​—Juan 20:16-18.

6. Paquemodo ya dale mira si apostol Pablo que ta respeta le con el maga mujer?

⁶ Ya hace acorda si apostol Pablo con Timoteo que dale mira honor con el maga mujer. Ya habla si Pablo con ele que trata ‘con el maga de edad como de suyu nana’ y ‘con el maga mujer joven como de suyu maga hermana.’ (1 Tim. 5:1, 2) Grande el cosa ya hace si Pablo para ayuda con Timoteo queda un mature Cristiano. Pero, ya admiti le que el nana y aguela de Timoteo el una ya enseña con Timoteo acerca con el Escritura. (2 Tim. 1:5; 3:14, 15) Especifico ya menciona si Pablo con el maga nombre del maga hermana na de suyu carta para na maga de Roma. Nuay lang le basta nota con el cosa ya hace el maga hermana sino ya habla tambien le kanila que ya aprecia le con el cosa sila ya hace como maga ministro.​—Roma 16:1-4, 6, 12; Fil. 4:3.

7. Cosa maga pregunta kita hay considera ahora?

⁷ Como cosa ya dale mira el ya pasa parapo, nuay habla el Biblia que mas bajo el maga hermana contra na maga hermano. Bien grande gayot el ayuda del diaton maga amable y bondadoso hermana, y sabe el maga anciano que el diila buen conducta puede ayuda para tiene paz y unidad na congregacion. Pero, necesita kita contesta con el cuanto pregunta. Por ejemplo: Porque ya manda si Jehova con el maga hermana que tapa con el diila cabeza na cuanto ocasion? Ciendo el maga hermano lang el ta sirvi como anciano y siervo ministerial, quierre decir ba de este que el cada uno hermano amo el cabeza del cada uno hermana na congregacion?

8. Asegun na Efeso 5:23, el cada uno hermano ba amo el cabeza del cada uno hermana? Explica.

⁸ El cada uno hermano ba amo el cabeza del cada uno hermana na congregacion? Gendeh, sino el Cristo. (Le con el Efeso 5:23.) Na familia, el marido el tiene autoridad na de suyu mujer. El un bautizao anak hombre gendeh el cabeza del de suyu nana. (Ef. 6:1, 2)  Y na congregacion, limitao el autoridad que tiene el maga anciano na maga hermano y hermana. (1 Tes. 5:12; Heb. 13:17) El maga single hermana quien gendeh mas ta queda junto con el diila tata y nana, ta continua respeta con el diila mayores y con el maga anciano. Pero, igual con el maga hermano na congregacion, uno lang el diila cabeza, si Jesus.

9. Porque el maga hermana necesita tiene vez tapa con el diila cabeza?

⁹ Deveras, ya iscuji si Jehova con el maga hombre para enseña y guia na adoranza na congregacion y nuay se ele dale autoridad na maga mujer. (1 Tim. 2:12) Porque? Igual na razon si porque le ya iscuji con Jesus como el cabeza del maga hombre​—para mentena orden na congregacion. Si por causa na circumstancia el un hermana necesita hace con el un responsibilidad del un hermano, debe le tapa con el de suyu cabeza. * (1 Cor. 11:4-7) Ta pidi este si Jehova con el maga hermana, gendeh para hace de menos kanila sino para dale kanila oportunidad para dale mira el diila respeto na de suyu arreglamiento. Ahora, discuti kita con este pregunta: Cosa autoridad tiene el maga cabeza de familia y maga anciano?

10. Porque el maga anciano posible hace maga ley para na congregacion?

¹⁰ El maga anciano ta ama con el Cristo y ta ama con el maga “carnero” con quien si Jehova y si Jesus ya pone bajo na diila cuidada. (Juan 21:15-17) Con buen intencion, el un anciano posible pensa que igual le na un tata con aquellos na congregacion. Posible le pensa que si el un cabeza de familia tiene derecho para hace maga ley para protege con el  de suyu familia, el un anciano puede tambien hace maga ley para protege con el maga carnero del Dios. Y el cuanto maga hermano y hermana posible pidi con el maga anciano que queda diila espiritual cabeza y pidi que sila hace maga decision para kanila. Pero, igual ba el autoridad que tiene el maga anciano na congregacion y el maga cabeza de familia?

11. Na cosa manera ta semeja el papel del cabeza de familia na maga anciano?

¹¹ Si apostol Pablo ya indica que semejante el papel del un cabeza de familia na papel del un anciano. (1 Tim. 3:4, 5) Por ejemplo, quierre si Jehova que obedece el maga miembro del familia con el cabeza de familia. (Col. 3:20) Y quierre le que aquellos na congregacion hay obedece con el maga anciano. Ta expecta si Jehova que asigura el maga cabeza de familia y maga anciano que fuerte na espiritual aquellos bajo na diila cuidada. Necesita tambien sila dale con el emocional necesidad de aquellos quien bajo na diila autoridad. Y igual na un buen cabeza de familia, el maga anciano ta asigura que aquellos na congregacion hay ricibi ayuda na tiempo de problema. (Sant. 2:15-17) Mas pa, ta expecta si Jehova que el maga anciano y cabeza de familia hay ayuda con otro que sigui con el de suyu maga principio. Y ya habla tambien le kanila  que gendeh “man lampas na cosas que escribido” na Biblia.​—1 Cor. 4:6, NWT.

12-13. Como cosa ya habla na Roma 7:2, na cosa manera diferente el papel del maga cabeza de familia na maga anciano?

¹² Pero bien diferente tambien el papel del un anciano na papel del un cabeza de familia. Por ejemplo, si Jehova ya iscuji con el maga anciano para sirvi como maga juez y ya dale kanila el responsibilidad que quita na congregacion con aquellos ya comete pecado pero nuay arripinti.​—1 Cor. 5:11-13.

¹³ Pero si Jehova ya dale cuanto autoridad con el maga cabeza de familia que nuay le dale con el maga anciano. Por ejemplo, ya dale le autoridad con el maga cabeza de familia para hace maga ley y asigura que ta sigui con ese maga ley. (Le con el Roma 7:2.) Por ejemplo, el un cabeza de familia tiene derecho para decidi si cosa hora debe bolbe el de suyu maga anak na casa. Tiene tambien le autoridad que disciplina con el de suyu maga anak si gendeh sila obedece con ese ley. (Ef. 6:1) Siempre, el un amable cabeza de familia hay consulta con el de suyu mujer antes hace maga ley na casa ciendo sila dos “un cuerpo” ya. *​—Mat. 19:6.

14. (a) Cosa ta habla el Marcos 10:45 que ta dale mira que justo lang que iscuji si Jehova con Jesus para queda el cabeza del congregacion? (b) Cosa el papel del Cuerpo Gobernante? (Mira con el cajon “ El Papel del Cuerpo Gobernante.”)

¹⁴ Por medio del rescate, ya compra si Jehova con el vida del cada uno na congregacion y del todo quien pone fe con Jesus. (Le con el Marcos 10:45; Act. 20:28, NWT; 1 Cor. 15:21, 22) Poreso, justo lang que iscuji  le con Jesus, quien ya dale de suyu vida como un rescate, para queda el cabeza del congregacion. Como el diaton cabeza, tiene autoridad si Jesus para hace maga ley acerca si cosa hace el cada individual, el maga familia y el entero congregacion, y asigura que ta sigui con ese maga ley. (Gal. 6:2) Pero gendeh lang ta hace maga ley si Jesus. Ta cuida y ta ama le con el cada uno kanaton.​—Ef. 5:29.

15-16. Cosa tu ya aprende na cosa ya habla si Marley y si Benjamin?

¹⁵ El maga hermana ta dale mira que ta respeta sila con el Cristo si ta sigui sila con el maga direccion que ya dale el maga hombre con quien le ya iscuji para cuida kanila. Manada hermana el man uyun con Marley, un hermana quien ta queda na United States. Ele ya habla: “Bien precioso conmigo el de mio papel como un mujer y un hermana na congregacion. Necesita yo pirmi hace esfuerzo para respeta con el autoridad que ya dale si Jehova con el de mio marido y con el maga anciano. Pero ya queda este mas facil para conmigo cay ta respeta sila conmigo y ta dale mira que ta aprecia sila con el cosa yo ta hace.”

¹⁶ El maga hermano ta dale mira que ta entende sila con el arreglamiento que ya hace si Jehova si ta respeta y ta honra sila con el maga hermana. Si Benjamin, un hermano quien ta queda na England, ya habla: “Manada yo cosa ya aprende na maga comento del maga hermana na miting y na maga sugestion que ya dale sila si paquemodo estudia y queda efectivo na ministerio. Para conmigo, bien precioso el trabajo que ta hace sila.”

17. Porque kita debe respeta con el arreglamiento de Jehova acerca na autoridad?

¹⁷ Si todo na congregacion​—el maga hombre, mujer, cabeza de familia y maga anciano​—ta entende y ta respeta con el arreglamiento de Jehova acerca na autoridad, hay tiene paz el congregacion. Y el mas importante, hay lleva kita alabanza con el diaton amable Tata na cielo, si Jehova.​—Sal. 150:6.