Nsunzo 7
Kanonelamo Osogorhela wa Mmulogoni
“Kristu musorho wa mutugumano oli mwili waye.”—EF. 5:23.
JIBO 137 Ayana vina Arogora Ororomeleya
DHINASUNZE IYO *
1. Mwaha mmodha onkosiha nlogo na Yehova okala owiwananene buvi?
IYO NINOWAGALALA sabwa ya okosa mpaddi wa anamudhi a Yehova. Sabwaya jani anamudhi a Yehova ba murenddele vina bowiwanana? Mwaha mmodha bwawi iyo notene ninovilibihedha ovirihamo masasanyedho a Yehova. Ebaribari wi vannonelamo iyo deretu masasanyedho a osogorhela, wiwanana wehu onowunuwavi.
2. Mavuzo gani anfunihu wakula mwari mwa nsunzo ntti?
2 Mwari mwa nsunzo ntti iyo ninela osekeserha bani onsogorhela mmulogoni. Ottiya ejuwenevi, ninela wakula mavuzo aba: Mabasa gani anna arogora? Ebaribari wi mbali ddi mbali musogorheli wa murogora ddi murogora? Mukalelo onasogorhela anddimuwa a mulogo abali na arogora bwakakene onasogorhelana mwazambo wa ntakulu anaye na mwadhiye? Vamaromo ninfuna none mukalelo onawodhihu waweddiha arogora.
NINAWEDDIHE DHAVI AROGORA?
3. Ninawodhe dhavi wunuwiha wasiba vina watamalela arogora mwaha wa mabasa ankosani?
3 Iyo ninowasiba vina ninowatamalela arogora ankosa guru ya watanalela amudhawa, olaleya miselu dhapama vina okamihedha mmulogoni. Iyo ninele wunuwiha watamalela awene modhela otanalela mukalelo onaweddiha Yehova vamodha na Yezu. Ninela owodha waweddiha arogora na mukalelo wofwanyelela nigasunza mukalelo waweddiha murumiwi Paulo.
4. Bibilia ononiha dhavi wi Yehova onowariha ayana dhahene ninga alobwana?
4 Bibilia onowoniha wila Yehova onowatanalela ayana dhahene ninga munkoseliye na alobwana. Motagiha, vyaka zana dhoroma Yehova wahavaha muya waye wokoddela ayana dhahene ninga mwakoseliye na alobwana wila akose dhilobo dhotikiniha ninga ologa dhilogelo dhottiyana-ttiyana. (Mer. 2:1-4, 15-18) Vina alobwana na ayana anottikitteliwa na muya wotxena wi alamulele na Yezu Kristu wirimu. (Gal. 3:26-29) Alobwana na ayana ena awinjivaya ahikana njedhelo nokala velaboni ya vati na mukalakala. (Ovuh. 7:9, 10, 13-15) Vina makuru aba omeli aanottomeliwa mabasa a osunziha miselu dhapama. (Mt. 28:19, 20) Txibarene, nivuru na merelo ninomuloga murogora wakuweliwa Prisila na mamunaye Ákila amukamihedhile Apolo mulobwana woleleya ononelamo deretu mukalelo wa osunziha ebaribari.—Mer. 18:24-26.
5. Mowiwanana na Luka 10:38, 39, 42 Yezu wonihile dhavi wi wanariha ayana?
5 Yezu wanarhemeza vina wanariha ayana. Iyene kasanzile Afarizi obuwela wi ayana kana ttima vamentoni va alobwana, vina kafwanyela osunzihiwa Malebo okoddela vattaddo. Ottiya ejo, Yezu wahasunziha ayana ebaribari ya ttima ninga mwasunzihedhiye anamafara ena. * (Kengesa Luka 10:38, 39, 42.) Vina iyene wanattiya ayana wi anfare mmabasani a olaleya. (Lk. 8:1-3) Yezu vina wahavaha gari ayana ya odhowa wawaddela anamafwara aye wi iyene wahimala ovenyihiwa mukwani.—Jo. 20:16-18.
6. Murumiwi Paulo wonihile dhavi wi wanariha ayana?
6 Murumiwi Paulo wahimubutxedha Timóteo wi wanfwanyela warhemeza ayana. Paulo wahimwaddela Timóteo wi awonege “ayana anddimuwa ninga amayo” vina “anamwali, ninga arogorihu.” (1 Tim. 5:1, 2) Paulo wahikosa guru ya omukamihedha Timóteo wi akale Mukristu woliba omuyani, masiki dhawene, iyene wahinonelamo wila mai wa Timóteo vamodha na bibe baromile omusunziha “malebo okoddela.” (2 Tim. 1:5; 3:14, 15) Mudhidhi walebela Paulo karta akadda Roma wahilebamo mazina arogora aperengeziye malejelo. Ottiya watamalelavi bahi sabwa ya mabasa apama akosilani, murumiwi Paulo wahatamalela sabwa ya okala anamafwara a Kristu.—Rom. 16:1-4, 6, 12; Fil. 4:3.
7. Mavuzo gani anfuna iyo wakula ovanene?
7 Ddima dhivirile mundduni nihoona wi Malebo kansunziha wi mulobwana ohikana ttima opitta muyana. Anddimuwa a mmulogoni anovaha ttima mabasa ankosa arogora a okamihedha mmulogoni okalamo murenddele vina wiwanana. Masiki dhawene iyo ninofwanyela wakula mavuzo aba. Midhidhi dhina Yehova onfunelani wi arogora amage musorho? Oromana wale abali anottomiwa ninga anddimuwa a mmulogoni vina adhari okamihedha, koddi eji enfuna etapulele wi mbali ddi mbali musogoreli wa murogora ddi murogora wa mmulogoni?
MBALI DDI MBALI MUSOGORHELI WA MUROGORA DDI MURUGORA?
8. Mowiwanana na Éfeso 5:23, mbali ddi mbali musogorheli wa murogora ddi murogora? Katapulela.
8 Mbali mbalivi kanfwanyela wasogorhela arogora a mmulogoni! Onsogorhela mutugumano Wokristu ddi Yezu. (Kengesa Éfeso 5:23.) Vamuralani, mamuni ohikana ewodhelo ya omusogorhela mwadhiye. Mwana mulobwana obatiziwe kahiye musogorheli wa mamayaye. (Ef. 6:1, 2) Vina anddimuwa a mmulogoni wasogorhela wawa abali na arogora ohikana maddile. (1 Tes. 5:12; Aheb. 13:17) Muyana wa muziye ohinkala na babe vina na maye onofwanyela odhowagavi bagariha amanbalaye vina anddimuwa a mmulogoni. Dhawene ninga abali a mmulogoni, awene ahana musorho mmodha bahi, Yezu.
Murogoara wa muziye ohili vatakulu va amambalaye oli mutxiddo mwa osogorhela wa Yezu (Kang’ana ddima 8)
9. Mudhidhi mwina enfuneyelani wi arogora amage musorho?
9 Yehova ohattomela alobwana mabasa a osunziha mmulogoni, ayana kattomeliwe mabasa akakene. (1 Tim. 2:12) Sabwaya? Sabwaya jakakene emuttomeleli Yehova Yezu Kristu ninga musorho wa mulobwana—wila mulogo okale wawiwanana. Sabwa ya makattamiho enodha opadduwa wila murogorha akose epaddi egafwanyeleli mbali wobatiziwa okosa, venevo Yehova onfuna wi murogoraya amage musorho. * (1 Kor. 11:4-7) Yehova onakumbirhela arogora eji wi atonyihedhe nriho nlamulo nivahiliye, eji kintapulela wi ayana kana ttima. Sabwa ya ejuwene, ndoweni nifwanye yowakula ya nivuzo ntti: Osogorhela gani onna amwazambo a ntakulu vina anddimuwa a mmulogoni?
OSOGORHELA WA AMWAZAMBO ANTAKULU VINA ANDDIMUWA A MMULOGONI
10. Mudhidhi mwina enfuneyelani wi anddimuwa a mmulogoni ete malamulo mmulogoni?
10 Anddimuwa a mmulogoni anomukwela Kristu vina anokwela ‘mabila’ a Yehova abuwene attiyedhiwani na Kristu. (Jo. 21:15-17) Sabwa ya ejuwene, awene ali ninga babi wa abali a mmulogoni. Iyene onofwanyela wubuwela akala jaderetu mwazambo wa ntakulu okosa malamulo wi amudhaye abareleye, iyene vina ninga munddimuwa wa mulogo onofwanyela okaana malamulo anavahe njedhelo vina nibarelo mabila a Yehova. Abali na arogora anowodha walibiha anddimuwa a mmulogoni modhela wakumbirhaga malago ninga asogorheli awa omuyani. Eji entapulela wi mabasa a anddimuwa a mmulogoni ba mamodhene na a amwazambo a ntakulu?
Anddimuwa a mmulogoni anozuzumela mpaddi womuyani vina dhofuneya dha vamulogoni. Yehova ohavaha muttorho wa okoddeliha mulogo (Kang’ana ddima 11-12)
11. Oladdana gani olivo wa osogorhela wa munddimuwa a mmulogoni, na wa mwazambo wa ntakulu?
11 Murumiwi Paulo ohiloga wi vahikala oligana ong’onovi mwaha wa osogorhela wa anddimuwa a mmulogoni na amwazambo a ntakulu. (1 Tim. 3:4, 5) Motagiha, Yehova onfuna wi anamudhi amwiwelela mwazambo wa ntakulu. (Kol. 3:20) Vina onfuna wi abali awiwelelege anddimuwa a mmulogoni. Yehova onjedhela wi amwazambo a ntakulu vina anddimuwa a mmulogoni aziwe wi abale anasogorhelani ahiliba mpaddi womuyani. Vina anofwanyela wazuzumela mpaddi womaningoni. Dhahene ninga mwazambo wa ntakulu, anddimuwa a mmulogoni anofwanyela oziwa wi abale anasogorhelani anokamihedhiwa na dhojombeliwa dhawa. (Tia. 2:15-17) Mowenjedhedha, Yehova onjedhela wi anddimuwa a mmulogoni, asunzihege ena ononelamo mazu aye, akalelaga pasope wamagelela okosa ‘dhilobo dhihilebiwe’ mBibiliani.—1 Kor. 4:6.
Amwazambo a ntakulu anovahiwa muttorho na Yehova wa wasogorhela amudhawa. Mwazambo wokwela ahinagana okosa elobo onomwiwiha mwadhiye (Kang’ana ddima 13)
12-13. Mowiwanana na Roma 7:2, osogorhela wa anddimuwa a mmulogoni onttiyana dhavi na wa amwazambo a ntakulu?
12 Osogorhela wa anddimuwa a mmulogoni na wa mwazambo wa ntakulu vahikala ottiyana vaddiddi. Motagiha Yehova ohattoma anddimuwa a mmulogoni ninga anamattonga vina ohavaha muttorho wa waburutxa mmulogoni attegi ahintxinuwa.—1 Kor. 5:11-13.
13 Mbwenye Yehova ohattomela amwazambo a ntakulu osogorhela ohinligana na wa anddimuwa a mmulogoni. Motagiha, amwazambo a ntakulu ahivahiwa ewodhelo ya wita malamulo wi aweddiyena amudhawa vina oziwa akala amudhayeya anofwara. (Kengesa Roma 7:2.) Vina mwazambo wa ntakulu ohikana ewodhelo ya ovaha nlamulo na anaye wiyelela vatakulu vati vahinariba. Ottiya ejo, iyene vina onofwanyela walaga anaye agavonya ovirihamo malamuloya. (Ef. 6:1) Mwebaribari mwazambo wa ntakulu agakala wokwela, agafunaga wita malamulo wi aweddiyehena amudhaye, onoroma omwiwiha mwadhiye sabwani oheli ali ‘muttu mmodha.’ *—Mt. 19:6.
OMWIWELELE KRISTU VOWI DDI MUSORHO WA MUTUGUMANO
Yezu, asogorheliwaga na Yehova onoweddiha mulogo Wokristu (Kang’ana ddima 14)
14. (a) Mowiwanana na Marko 10:45, ekaleleni yofwanyelela Yehova omuttoma Yezu ninga musogorheli wa mutugumano? (b) Mabasa gani ana Nikuru Nolamulela? (Kang’ana kasha “ Mabasa a Nikuru Nolamulela.”)
14 Sabwa ya yobolo Yehova ohivuna dhigumi dhehu, nona muttu-muttu wa iyo onofwanyela omuroromela Kristu. (Kengesa Marko 10:45; Mer. 20:28; 1 Kor. 15:21, 22) Sabwa ya iyene orumela odha onikwela, jofanyeelela ottomiwa ninga musorho wa mutugumano. Ninga musogorheli wehu, Yezu ohikana ewodhelo ya wita malamulo animusogorhela muttu-muttu wa iyo, anamudhi vina mulogo wotene. (Gal. 6:2) Ottiya ejo, Yezu onokosa elobo yina. Onomuzuzumela muttu-muttu wa iyo mpaddi womuyani.—Ef. 5:29.
15-16. Onsunzavo eni na dhilogile murogora Marley na mbali Benjamin?
15 Arogora anotonyihedha wi anomuriha Kristu, sabwa ya wawiwelelaga amamunawa attomeliwe wasogorhela. Arogora awinjiva anorumela elogile Marley, murogora onkala o Estados Unidos. Iyene ohiloga: “Mwebaribari miyo ddinovaha ttima epaddi yaga ninga muteliwi vina murogora wa mmulogoni. Masiki ekalaga elobo yorutxa miyo ddinokosa guru wila ddimwiwelele mamunaga vina anddimuwa a mmulogoni abuwene attomiwe na Yehova wi addisogorhele. Txibarene mamunaga na abali a mmulogoni anodikamihedha sabwa yoddivaha ttima, vina sabwa ya otamalela mabasa ankosemi.”
16 Abali anotonyihedha wi anononelamo masasanyedho a osogorhela sabwa ya warihaga arogora vina warhemeza. Benjamin, mbali onkala elabo ya Inglatera ohiloga: “Miyo ddinusunzavo venji na dhowakula dha arogora mmatugumanoni vina monelo dhawa sabwa ya olaleya vina osunziha pama. Miyo ddinoziwa wi mabasa ankosani ba ttima vaddiddi.”
17. Ninfwanyeelelani wiwelela nigano na osogorhela?
17 Abali otene a mmulogoni—alobwana, ayana, amwanzabo a ntakulu na anddimuwa a mmulogoni—aganonelagamo vina agarihaga magano osogorhela, mmulogonimwa munokala murenddele. Yamakamakaya jawi iyo ninomwagalaliha Babi wehu wokwela wa wirimu, Yehova.—Masal. 150:6.
JIBO 123 Nimwiwelele Yehova na Nikuru Naye
^ par. 5 Mabasa gani ana arogora mmulogoni? Mbali ddi mbali musogorheli wa murogora? Anddimuwa a mmulogoni osogorhela wawa bwakakene wa amwazambo a ntakulu? Mwari mwa nsunzo ntti ninela wona mukalelo onakula Bibilia mavuzo aba.
^ par. 5 Kang’ana ddima 6 ya Mwang’aneli wa Setemburu wa 2020, onna mutoma “Mwapamgarhaze vina Mwalibihe Ayana ali Akristu.”
^ par. 9 Kang’ana kasha “ Mudhidhi Gani Onfwanyelela Murogora Omaga Musorho?”
^ par. 13 Wila oziwe bani onfwanyela osakula mulogo gani onadhowe anamudhi ottugumana kang’ana ddima 17-19 ya Mwang’aneli wa Agosto wa 2020, onna mutoma: “Kariha Ettomo ya Attu Ena a Mmutugumanoni mwa Yehova.”
^ par. 59 Akala onofuna ononelemo mowakwana makani aba, kadhowa wone nivuru “Kalanivi mu Okwelani Mwa Mulugu,” makuku 209-212.
^ par. 64 Wila okane miselu dhina sabwa ya mabasa a Nikuru Nolamulela kadhowa woone A Sentinela de 15 de Julyu 2013, makuku 20-25
