1. Ońola nje jalatane̱ leno̱ o mbia ma Yehova e?

JE MUŃE̱NGE̱ o be̱ o mbia ma Yehova. Ońola nje musango na jalatane̱ beno̱ o mbia masu e? Njo̱m po̱ ńe nde ná biso̱ be̱se̱ di mapo̱ngo̱ miwe̱n o bola ba bena Yehova a bolino̱ doi edube. Di bati pe̱ te̱ so̱ṅtane̱ ne̱ni Yehova a te̱se̱no̱ mambo, jalatane̱ di me̱nde̱ bata be̱ oteten asu.

2. Njika myuedi di me̱nde̱no̱ jalabe̱ o din jokwa e?

² O din jokwa, di me̱nde̱ kwalea jombwea ba ba be̱n doi o mwemba. Di me̱nde̱ pe̱ jalabe̱ min myuedi: Njik’epolo bonańango ba be̱nno̱ o mwemba e? Mo̱ ye mbale̱ ná munasango te̱ e nde mulopo ma munańango te̱ e? Mo̱ batudu ba be̱n nde mulemlem a doi omo̱ń a bonasango na bonańango ka nje te̱ milopo ma mbia pe̱ mi be̱nno̱ doi omo̱ń a bito babu na bana babu e? Di se̱le̱ kwalea ne̱ni jangame̱nno̱ je̱ne̱ bonańango.

3. Nje e me̱nde̱ jongwane̱ biso̱ o bata to̱ndo̱ ebolo bonańango asu ba mabolano̱ e?

³ Di to̱ndi bonańango asu bena ba mabole̱ ebolo na ngińa o jombwea mbia mabu, o te̱ dikalo la myango ma bwam, na o sue̱le̱ mwemba. Di me̱nde̱ bata to̱ndo̱ babo̱ yete̱na jombwedi ne̱ni Yehova na Yesu ba me̱ne̱no̱ babo̱. Byala bena ńamuloloma Paulo pe̱ a tilino̱ jombwea bito be me̱nde̱ jongwane̱ biso̱.

4. Ne̱ni Bibe̱l e malee̱no̱ ná Yehova a to̱ndi bito kapo̱ ka bome e?

 ⁴ Bibe̱l e malee̱ ná Yehova a to̱ndi bito kapo̱ ka bome. K’eyembilan, Bibe̱l e malee̱ ná o ebwe’a mbu yaboso, Yehova a boli bito na bome mudī musangi mongwane̱ babo̱ o po̱ngo̱ betańsedi, ka to̱po̱ leme̱ lope̱pe̱. (Bebolo 2:1-4, 15-18) Bome na bito bo̱kisabe̱ na mudī musangi o janea na Kristo. (Gal. 3:26-29) Bome name̱ne̱ pe̱ na bito ba me̱nde̱ kusa longe̱ la bwindea o wase. (Bbī. 7:9, 10, 13-15) Ebol’a dikalo la myango ma bwam pe̱ e bakabe̱ nde bome na bito. (Mat. 28:19, 20) K’eyembilan, kalat’a Bebolo e malee̱ ná Priskila a boli ebolo na mom’ao Akwila o jongwane̱ Apolo nu ta moto ńoko jita o bata so̱ṅtane̱ Betiledi.—Bebolo 18:24-26.

5. Bupisane̱ Lukas 10:38, 39, 42, ne̱ni Yesu a tano̱ e̱ne̱ bito e?

⁵ Yesu a boli bito edube. Farisai i ta i ye̱use̱ bito, i si ta i kwala na babo̱ o ntelele, i si ta pe̱ to̱ i be̱ne̱ bekwali be mombweye̱ Betiledi na babo̱; nde Yesu a s’embilane̱ farisai. O diwengisan, a kwali na bito ka nje te̱ a kwalino̱ pe̱ na bome jombwea mambo ma mudī. * (Langa Lukas 10:38, 39, 42.) A boli na bito epolo o die̱le̱ mo̱ ebol’ao ya dikalo. (Lukas 8:1-3) Yesu a boli pe̱ na babo̱ edube ende̱ne̱ o langwea bokwedi bao ná a pumbo.—Yohane 20:16-18.

6. Ne̱ni ńamuloloma Paulo a lee̱le̱no̱ ná a mabola bito edube e?

⁶ Ńamuloloma Paulo ome̱le̱ Timoteo ná a bole bito edube. Paulo a kwalane̱ mo̱ ná a no̱nge ‘batudu ba bito ka bańango’ e̱ne̱ pe̱ ‘beso̱mbe̱ ba bito ka baari bao.’ (1 Tim. 5:1, 2) Paulo ongwane̱ Timoteo jita o be̱ kriste̱n ńou, nde embi ná bato baboso bokwe̱le̱ mo̱ “kalat’a bosangi” ba ta nde ńango na ńango ńa mbambe̱. (2 Tim. 1:5; 3:14, 15) O leta lena Paulo a tiledino̱ mwemba ma Roma, a tubi mina ma bonańango. A kwaledi ońola ebol’abu, nde a timbise̱le̱ pe̱ masoma ońola nje ba bolino̱.—Rom. 16:1-4, 6, 12; Fil. 4:3.

7. Njika myuedi di malano̱ jombwea tatan e?

⁷ Ka nje te̱ jeno̱ wa o je̱ne̱, Betiledi be si malee̱ ná bonasango ba petane̱ bonańango. Bonańango asu bena be ndolo na muyao be nde jongwane̱ dinde̱ne̱, ba mongwane̱ pe̱ batudu o kombe̱ musango na jalatane̱ o mwemba. Nde jombweye min myuedi: Ońola nje Yehova a mabaise̱no̱ munańango ná a kudumane̱ mulopo o bete̱medi bō̱ e? Kana bonasango buka te̱ nde ba mate̱se̱be̱ batudu na baboledi o mwemba, mo̱ nik’e mapula nde kwala ná munasango te̱ e nde mulopo ma munańango te̱ e?

8. Bupisane̱ Efeso 5:23, munasango te̱ e nde mulopo ma munańango te̱ e? Bola beteledi.

⁸ Jalabe̱ le nde ná ke̱m! Munasango a titi mulopo ma bonańango be̱se̱ o mwemba; Kristo nde e mulopo. (Langa Efeso 5:23.) O ndabo a mbia, mome nde e mulopo ma munj’ao. Mun’a mome nu dubisabe̱ a titi mulopo ma ńango ao. (Efe. 6:1, 2) O mwemba pe̱, doi lena batudu ba be̱nno̱ omo̱ń a bonasango na bonańango di be̱n myoyo. (1 Tes. 5:12; Bon. 13:17) Munańango ńe mulamba nu si maje̱ pe̱ na bayedi bao a me̱nde̱ benga bola babo̱ edube ka nje te̱ a mabolano̱ pe̱  batudu edube. Nde Yesu nde e mulopo mao ka nje te̱ eno̱ mulopo ma bome o mwemba.

9. Ońola nje bonańango bangame̱nno̱ kudumane̱ milopo ponda iwo̱ e?

⁹ Ye mbale̱ ná bome nde Yehova a te̱se̱no̱ o die̱le̱ mwemba seto̱ bito. (1 Tim. 2:12) Nde ońola nje e? Ná o̱da e be̱ o mbia mao, ka nje te̱ a te̱se̱no̱ pe̱ Yesu mulopo ma mome. Yete̱na o bete̱medi bō̱ munańango angame̱n londe̱ m’bē̱ mu bakabe̱ munasango, Yehova a mengane̱ mo̱ ná a kudumane̱ mulopo mao. * (1 Kor. 11:4-7) Yehova a si mabaise̱ bonańango ná ba bole nika o ye̱use̱ babo̱, nde a mabola nde babo̱ epolo e lee̱le̱ edube ońola bete̱sedi bao. Jalabe̱ so̱ min myuedi: Njika doi milopo ma mbia na batudu ba be̱nno̱ e?

10. Nje ye ná e bola ponda iwo̱ ná mutudu a wase te̱se̱ye̱ mido̱ngi myeka e?

¹⁰ Batudu ba to̱ndi Kristo, ba to̱ndi pe̱ “mido̱ngi” Yehova na Yesu ba bake̱no̱ babo̱. (Yohane 21:15-17) Nde ńo̱ng’a jombwea mido̱ngi ńe ná e bola ná mutudu o̱nge̱le̱ ná mo̱ nde e sango a mwemba mwe̱se̱. E ná a dutea ná yete̱na mulopo ma mbia mu be̱n bwam o te̱se̱ myeka o bwam ba tata mbia mao, mutudu pe̱ e ná a te̱se̱ myeka a mo̱nge̱le̱no̱ ná mi me̱nde̱ tata mido̱ngi ma Loba. Bonasango na bonańango bō̱ pe̱ be ná ba tute̱le̱ batudu o bola nika ke̱ ba baise̱ babo̱ ná ba no̱nge bedomsedi o epol’abu. Nde batudu o mwemba na milopo ma mbia ba be̱n nde mulemlem a doi e?

11. Njika bowan bwe oteten a m’bē̱ ma milopo ma mbia na ma batudu e?

 ¹¹ Ńamuloloma Paulo a kiki mambo mō̱ me bowan oteten a m’bē̱ ma mulopo ma mbia na m’bē̱ ma mutudu. (1 Tim. 3:4, 5) K’eyembilan, Yehova a mapula ná belongi ba mbia be lee̱le̱ mulopo ma mbia sengane̱. (Kol. 3:20) A mapula pe̱ ná bonasango na bonańango ba lee̱le̱ batudu sengane̱. Yehova a mengane̱ milopo ma mbia name̱ne̱ pe̱ na batudu ná bombweye ba bena a bake̱no̱ babo̱ o mbad’a mudī. Bangame̱n pe̱ bakise̱ ná ba bena ba bake̱no̱ babo̱ ba bi ná ba to̱ndo̱be̱. Kapo̱ ka milopo ma mbia ma bwam, batudu bangame̱n wanea ba bena ba bake̱no̱ babo̱ jongwane̱ o pond’a ndutu. (Yak. 2:15-17) O mbata na nika, Yehova a mengane̱ babo̱ ná bongwane̱ bane̱ o bupe̱ mambenda mao, nde ba s’angame̱n “kata ma ma tilabe̱” o Bibe̱l.—1 Kor. 4:6.

12-13. Ka nje te̱ kalat’a Minia 6:20 e malee̱no̱, njika diwengisan le oteten a m’bē̱ ma milopo ma mbia na ma batudu e?

¹² Nde mawengisan mande̱ne̱ me pe̱ oteten a m’bē̱ ma batudu na ma milopo ma mbia. K’eyembilan, Yehova a te̱se̱  batudu ka bakaisedi o mwemba, a boli pe̱ babo̱ m’bē̱ ma sumwa babole̱ bobe ba s’ate̱le̱ o mwemba.—1 Kor. 5:11-13.

¹³ O mune̱ mudi, Yehova a boli milopo ma mbia m’bē̱ mō̱ a si bolino̱ batudu. K’eyembilan, milopo ma mbia mi be̱n bwam o te̱se̱ye̱ belongi babu ba mbia myeka, na bakise̱ ná ba mabupe̱ mo̱. (Langa Minia 6:20.) Mulopo ma mbia mu be̱n pe̱ bwam o te̱se̱ njika ponda bana bao bangame̱nno̱ so̱lo̱ o mboa bulu. A be̱n pe̱ bwam o ko̱kise̱ bana bao yete̱na ba si bupe̱ mi myeka. (Efe. 6:1) Nde sango a mbia ńe ndolo a me̱nde̱ se̱le̱ kwala na munj’ao obiana a mate̱se̱ myeka ońola mbia, ebanja babo̱ babane̱ be nde “eyobo ewo̱.” *—Mat. 19:6.

14. (a) Bupisane̱ Marko 10:45, ońola nje e te̱nge̱nno̱ ná Yehova a te̱se̱ Yesu ka mulopo ma mwemba e? (b) Njika m’bē̱ Dibe̱le̱ di Madie̱le̱ di be̱nno̱ e? (Ombwa edinge̱le̱ “ M’bē̱ ma Dibe̱le̱ di Madie̱le̱.”)

¹⁴ Yehova a sawo diko̱ti ońola longe̱ la elong’a mwemba te̱, name̱ne̱ pe̱ na ońola be̱se̱ bena ba me̱nde̱ dube̱ Yesu. (Langa Marko 10:45; Bebolo 20:28; 1 Kor. 15:21, 22) E te̱nge̱n so̱ ná a te̱se̱ Yesu ka mulopo ma mwemba, mo̱ ńena nu boli longe̱ lao ka diko̱ti. Ońola nika Yesu a be̱n bwam o te̱se̱ myeka ońola bato, mbia, na mwemba, na bakise̱ ná ba mabupe̱ mo̱. (Gal. 6:2) Nde Yesu a si mate̱se̱ myeka buka te̱. A madese̱ mō̱ ńasu te̱, a to̱ndi pe̱ biso̱.—Efe. 5:29.

15-16. Nje byala ba munańango Marley na munasango Benjamin be mokwe̱le̱no̱ biso̱ e?

 ¹⁵ Bonańango ba malee̱ ná ba mabola Kristo edube ke̱ ba mabupe̱ bediedi ba bome a te̱se̱no̱ o jombwea babo̱. Munańango Marley nu maje̱ o Amerika e jo̱nge̱le̱ diwo̱ na bonańango jita. Mo̱ ná: “Na mabwane̱ epol’am ya muto na ya munańango o mwemba muńe̱nge̱ jita. Nangame̱n benga po̱ngo̱ miwe̱n o bola doi Yehova a bolino̱ mom’am name̱ne̱ pe̱ na batudu edube. Nde babo̱me̱ne̱ pe̱ ba mawamse̱ mba mambo ebanja ba mabola mba edube, ba mabwane̱ pe̱ ebol’am muńe̱nge̱.”

¹⁶ Bonasango ba mabola te̱ bonańango edube, ba malee̱ nde ná ba maso̱ṅtane̱ ne̱ni bolane̱ doi ba be̱nno̱. Munasango Benjamin nu maje̱ o Inglisi mo̱ ná: “Malabe̱ mena bonańango ba mabolano̱ o ndongame̱n mokwe̱le̱ mba mambo jita. Mo̱nge̱le̱ mabu pe̱ jombwea ne̱ni jokwa na bata be̱ jangwa o dikalo pe̱ mongwane̱ mba eyeka. Na mo̱nge̱le̱ ná ebol’abu ye mweńa jita.”

17. Ońola nje jangame̱nno̱ bola bete̱sedi ba Yehova jombwea doi a bolino̱ bō̱ edube e?

¹⁷ Bato be̱se̱, e be̱ bome, bito, milopo ma mbia, na batudu o mwemba ba so̱ṅtane̱ te̱ ońola nje Yehova a bolino̱ bō̱ doi omo̱ń a bane̱, ba bola pe̱ be bete̱sedi edube, musango mu me̱nde̱ be̱ o mwemba. Omo̱ń a me̱se̱, di me̱nde̱ sesa Sango asu ńa ndolo ńe o mo̱ń Yehova.—Mye. 150:6.