1. Kuun minw kama Jehova ka denbayamɔgɔw kaan bɛnnin lo, u la dɔ ye juman ye?

A KA di an ye ka kɛ Jehova ka denbayamɔgɔ dɔw ye. Mun na an be hɛɛrɛ la ani an kaan bɛnnin lo ten? O kuun dɔ ye ko Jehova ye kuntigiya kalifa minw ma, an bɛɛ b’an seko fisaman kɛ k’u bonya. Tiɲɛn na, n’an y’a faamu ka ɲɛ fɛɛn min kama Jehova ye kuntigiya kalifa dɔw ma, an ka kelenya bena sabati.

2. An bena ɲiningali jumanw lo lajɛ barokun nin na?

² Barokun nin na, an bena a lajɛ kuntigiya kalifara minw ma kafo kɔnɔ. An bena ɲiningali nunu fana jaabi: Jehova ye baara juman lo kalifa balimamusow ma? Yala tiɲɛn lo ko balimacɛw bɛɛ ye balimamusow kuntigiw ye wa? Sotigiw be kuntigiya min kɛ u musow n’u deenw kun na, yala diinan mɔgɔkɔrɔw b’o ɲɔgɔn lo kɛ u balimaw kun na wa? An k’a lajɛ fɔlɔ an ka ɲi ka balimamusow jati cogo min na.

3. Mun lo bena an dɛmɛ k’a jati ko balimamusow be baara nafamanba lo kɛra?

³ An balimamusow koo ka di an ye sabu u be baaraba kɛ k’u janto u somɔgɔw la, ka kibaro diiman fɔ ani ka dɛmɛ don kafo kɔnɔ. U koo bena diya an ye kosɔbɛ tugun, n’an y’a ɲini k’a faamu Jehova ni Yezu b’u jati cogo min na. Ciden Pol tun be musow jati cogo min na, n’an y’o lajɛ, o fana bena an nafa.

4. Bibulu b’a yira cogo di ko cɛɛw ni musow koo ka gwɛlɛ Jehova ma?

 ⁴ Bibulu b’a yira ko cɛɛw ni musow koo ka gwɛlɛ Jehova ma. Ɲɛyirali fɛ, Bibulu b’a fɔ ko saan kɛmɛkulu fɔlɔ la, Jehova y’a ka hakili senu di cɛɛw ni musow ma. A ye setigiya di u ma fana u ye kabakow kɛ i n’a fɔ ka kuma kaan wɛrɛw la (Kɛw. 2:1-4, 15-18). A ye cɛɛw ni musow mɔ ni hakili senu ye walisa u ka mara kɛ ni Krista ye (Gal. 3:26-29). Jehova bena a to cɛɛw ni musow ka ɲɛnamaya banbali kɛ dugukolo kan (Yir. 7:9, 10, 13-15). A ye cii di cɛɛw ni musow ma k’u ka kibaro diiman fɔ ani ka mɔgɔw kalan (Mat. 28:19, 20). Ɲɛyirali fɛ, Kɛwaliw ka kitabu be balimamuso dɔ kofɔ min tɔgɔ ko Pirisili. Ale n’a cɛɛ Akilasi ye tiɲɛnkalanw ɲɛfɔ Apolɔsi ye ka ɲɛ, ale min tun kalannin lo koɲuman.—Kɛw. 18:24-26.

5. Yezu be bonya min la musow kan, Luka 10:38, 39, 42 be mun lo yira an na o koo la?

⁵ Yezu be bonya la musow kan. A tun tɛ komi Fariziɲɛw. Olu tun b’a jati ko cɛɛw ka fisa ni musow ye. U tun tɛ sɔn ka kuma ni musow ye jama cɛma ani u tun tɛ baro kɛ n’u ye abada kitabu kɔnɔkow kan. Nka, Yezu tun be baro kɛ tiɲɛnkalan nafamanw koo la ni cɛɛw ni musow ye * (Luka 10:38, 39, 42 kalan). A y’a to musow y’a bila sira fana a ka waajuli baara la (Luka 8:1-3). Ka fara o kan, a ye nɛɛma kɛ u ye a kɛtɔ k’u ci u ka taga a fɔ a ka cidenw ye ko ale suu kununa.—Zan 20:16-18.

6. Ciden Pol y’a yira cogo di ko a be bonya la musow kan?

⁶ Ciden Pol y’a fɔ Timote ye ko a ka bonya la musow kan. Pol ko “muso minw kɔrɔla,” a k’olu jati ‘i n’a fɔ a bamusow’ ani ‘muso minw ma kɔrɔ . . . i n’a fɔ a kɔrɔmusow, walima a dɔgɔmusow.’ (1 Tim. 5:1, 2). Pol ye koo caaman kɛ ka Timote dɛmɛ a kɛra kerecɛn kɔgɔnin ye. Nka, a y’a fɔ ko Timote bamuso n’a mamamuso lo kɛra fɔlɔ ye k’a kalan Ala ka Kuma na (2 Tim. 1:5; 3:14, 15). Pol ye balimamusow weele u tɔgɔ la ani k’u fo a ka lɛtɛrɛ kɔnɔ, a ye min ci Ɔrɔmukaw ma. A yʼo balimamusow ka baara kɔrɔsi ani a y’u waleɲuman lɔn o kosɔn.—Ɔrɔm. 16:1-4, 6, 12; Filip. 4:3.

7. An bena ɲiningali jumanw lo lajɛ sisan?

⁷ I ko dakun tɛmɛninw y’a yira cogo min na, Bibulu t’a fɔ yɔrɔ si ko balimacɛw ka fisa ni balimamusow ye. An balimamuso kanulenw tɛgɛ labilanin lo ani u be dɛmɛ don kosɔbɛ kafo kɔnɔ. Diinan mɔgɔkɔrɔw be tɛmɛ u fɛ walisa ka kafo ka hɛɛrɛ n’a ka kelenya sabati. Nka, an ka ɲi ka ɲiningali dɔw jaabiliw ɲini i n’a fɔ: Mun na Jehova b’a ɲini balimamuso fɛ a k’a kuun datugu tuma dɔw la? Komi balimacɛw dɔrɔn lo be kɛ diinan mɔgɔkɔrɔw ani kɔrɔsigi cidenw ye, yala o kɔrɔ ko balimacɛw bɛɛ ye balimamusow kuntigiw ye kafo kɔnɔ wa?

8. Ka kɛɲɛ ni Efɛzikaw 5:23 ye, yala balimacɛw bɛɛ ye balimamusow kuntigiw ye wa? A ɲɛfɔ.

⁸ Ayi, balimacɛw bɛɛ tɛ balimamusow kuntigiw ye! Krista lo ye u Kuntigi ye (Efɛzikaw 5:23 kalan). Denbaya kɔnɔ, cɛɛ lo y’a muso kuntigi ye. Dencɛ min batizera, ale t’a bamuso kuntigi ye (Efɛz. 6:1, 2). Kafo kɔnɔ, diinan mɔgɔkɔrɔw be ni kuntigiya dɔ ye balimacɛw ni  balimamusow kun na (1 Tes. 5:12; Eburuw 13:17). Balimamuso min ma furu ani a siginin tɛ n’a facɛ n’a bamuso ye, ale bele be to k’a bangebagaw ni diinan mɔgɔkɔrɔw bonya. Nka, i ko kafo balimacɛw, Yezu dɔrɔn lo y’a Kuntigi ye.

9. Mun na balimamusow ka ɲi k’u kuun datugu tuma dɔw la?

⁹ Jehova b’a ɲini cɛɛw lo fɛ u ka kalan ani batoli ɲɛminɛ kafo kɔnɔ. A m’o koo kalifa musow ma (1 Tim. 2:12). Mun na do? Jehova y’o kɛ sabu a b’a fɛ koow ka kɛ cogo bɛnnin na a ka denbaya kɔnɔ. O lo kama fana a ye Yezu kɛ cɛɛ Kuntigi ye. Balimacɛw ka kunkanbaara ye min ye, ni koo dɔw y’a to balimamuso dɔ ka ɲi k’o kɛ, Jehova b’a ɲini a fɛ a k’a kuun datugu * (1 Kor. 11:4-7). Jehova m’o ɲini balimamusow fɛ walisa k’u mafiɲɛya. A ye sababu lo di u ma walisa u k’a yira ko ale ye labɛn min bila sen kan kuntigiya koo la, u b’o labato. K’o to an hakili la, an ka ɲiningali nin lajɛ sisan: Kuntigiya juman lo kalifara sotigiw ani diinan mɔgɔkɔrɔw ma?

10. Mun na tuma dɔw la, diinan mɔgɔkɔrɔ be se k’a ɲini ka sariyaw sigi kafo kɔnɔ?

¹⁰ Diinan mɔgɔkɔrɔw be Krista kanu. Jehova ni Yezu ye ‘saga’ minw kalifa u ma, u b’olu fana kanu (Zan 21:15-17). Diinan mɔgɔkɔrɔ b’a janto kafodenw na minkɛ, a be se k’a yɛrɛ jati u facɛ ye. Joo be sotigi fɛ ka sariyaw sigi walisa k’a ka denbaya latanga. O cogo kelen na, diinan mɔgɔkɔrɔ be se k’a miiri ko ale be se ka sariyaw sigi walisa ka Ala  ka sagakulu latanga. Balima dɔw be se ka diinan mɔgɔkɔrɔw lasun u k’o kɛ, u kɛtɔ k’a ɲini u fɛ u ka desizɔnw ta u ye. Nka, yala sotigiw ni diinan mɔgɔkɔrɔw ka kuntigiya ye kelen ye wa?

11. Cogo juman na diinan mɔgɔkɔrɔw ani sotigiw ka kuntigiya bɔnin be ɲɔgɔn ma?

¹¹ Ciden Pol y’a yira ko faan dɔw fɛ, diinan mɔgɔkɔrɔw ani sotigiw ka kuntigiya bɔnin be ɲɔgɔn ma (1 Tim. 3:4, 5). Ɲɛyirali fɛ, Jehova b’a fɛ denbayamɔgɔw ka kolo denbaya kuntigi ye (Kɔlɔs. 3:20). A b’a fɛ kafodenw fana ka kolo diinan mɔgɔkɔrɔw ye. Jehova b’a fɛ denbaya kuntigiw k’u janto u ka denbayamɔgɔw la Alako ta fan fɛ. A b’a fɛ fana diinan mɔgɔkɔrɔw k’u janto kafodenw na Alako ta fan fɛ. U fila bɛɛ b’u jija walisa minw b’u ka kuntigiya kɔrɔ, olu k’a ye ko u b’u kanu. I ko denbaya kuntigi ɲumanw, diinan mɔgɔkɔrɔw b’u jija walisa ka kafodenw dɛmɛ gwɛlɛyaw wagati la (Zaki 2:15-17). Ka fara o kan, Jehova b’a fɛ diinan mɔgɔkɔrɔw ani denbaya kuntigiw ka tɔɔw dɛmɛ u k’ale ka sariyaw labato. A be u lasɔmi fana ko ‘min sɛbɛra Kitabu kɔnɔ, u kana tɛmɛ o kan.’—1 Kor. 4:6, Biblu Ala ta Kuma.

12-13. Ka kɛɲɛ ni Ɔrɔmukaw 7:2 ye, mun na denbaya kuntigiw ni diinan mɔgɔkɔrɔw ka kuntigiya tɛ kelen ye?

 ¹² Nka, faranfasibaw be yen denbaya kuntigiw ani diinan mɔgɔkɔrɔw ka kuntigiya cɛ. Ɲɛyirali fɛ, Jehova b’a ɲini diinan mɔgɔkɔrɔw fɛ u ka kitikow ɲɛnabɔ. Nka, a t’o ɲini denbaya kuntigiw fɛ. Jurumukɛla minw tɛ nimisa, Jehova b’a ɲini diinan mɔgɔkɔrɔw fɛ fana, u k’olu bɔ kafo kɔnɔ.—1 Kor. 5:11-13.

¹³ Faan wɛrɛ fɛ, Jehova ye kuntigiya dɔw kalifa denbaya kuntigiw ma, a ma minw kalifa diinan mɔgɔkɔrɔw ma. Ɲɛyirali fɛ, a ye sira di denbaya kuntigiw ma u ka sariyaw sigi u ka denbayaw ye ani u k’a kɛ u k’o labato (Ɔrɔmukaw 7:2 kalan). Joo be denbaya kuntigiw fɛ k’a latigɛ lɛri min na u deenw ka ɲi ka don soo sufɛ. Sira dira u ma fana u k’u deenw kolo n’u m’o sariya labato (Efɛz. 6:1). Denbaya kuntigi min b’a ka denbayamɔgɔw kanu, ale b’a ɲini k’a muso ka fɛtaw lɔn fɔlɔ ka sɔrɔ ka sariyaw sigi a ka denbayamɔgɔw ye. A b’o kɛ sabu Ala ye ale n’a muso “jɛn ka kɛ kelen ye.” *—Mat. 19:6.

14. a) Jehova ye Yezu kɛ kafo kuntigi ye. Ka kɛɲɛ ni Mariki 10:45 ye, mun na o bɛnnin lo? b) Koow Ɲɛnabɔla Jɛnkulu ka kunkanbaara ye mun lo ye? (Koorilen nin lajɛ: “ Koow Ɲɛnabɔla Jɛnkulu ka kunkanbaara.”)

¹⁴ Kunmabɔsara barika la, Jehova ye kafodenw bɛɛ niin kunmabɔ. Mɔgɔ o mɔgɔ lara Yezu la, a b’o tigi fana niin kunmabɔ (Mariki 10:45 kalan; Kɛw.  20:28; 1 Kor. 15:21, 22). Jehova ye Yezu kɛ kafo Kuntigi ye. O bɛnnin lo sabu ale lo ye a niin di k’a kɛ kunmabɔsara ye an kosɔn. O kama, joo be Yezu fɛ ka sariyaw sigi walisa k’a yira mɔgɔ kelen kelen bɛɛ, denbayamɔgɔw ani kafodenw bɛɛ ka ɲi ka min kɛ. Joo be Yezu fɛ fana k’a kɛ an k’o sariyaw labato (Gal. 6:2). Nka Yezu tɛ sariyaw dɔrɔn lo sigi. A b’a janto an kelen kelen bɛɛ la ani a b’an kanu.—Efɛz. 5:29.

15-16. Balimamuso Marley ani balimacɛ Benjamin ye min fɔ, o b’i dɛmɛ ka mun lo faamu?

¹⁵ Balimamusow b’a yira k’u be bonya la Krista kan, u kɛtɔ ka mɛnni kɛ cɛɛw fɛ, a y’a ɲini minw fɛ u k’u janto u la. Balimamuso Marley be Etazini ani a ko: “Jehova ye kunkanbaara min kalifa furumusow ani balimamusow ma kafo kɔnɔ, o ka di ne ye kosɔbɛ. N’ bele ka ɲi ka to ka n’ jija kosɔbɛ walisa ka n’ cɛɛ ani diinan mɔgɔkɔrɔw bonya sabu Jehova ye kuntigiya kalifa u ma. Nka, n’ cɛɛ ani kafo balimacɛw be koow nɔgɔya n’ ma sabu u be n’ bonya ani u be n’ waleɲuman lɔn n’ ka baara kosɔn.” Balimamuso Marley ye min fɔ, balimamuso caaman b’o lo miiri fana.

¹⁶ Jehova ye labɛn min kɛ kuntigiya koo la, balimacɛw b’a yira ko u b’o faamu, u kɛtɔ ka bonya la balimamusow kan. Balimacɛ Benjamin be Angletɛri ani a ko: “Balimamusow be lakalita minw kɛ lajɛnw na ani u be ladili minw di bibulukalan ani waajuli kɛcogo ɲuman koo la, o ye n’ dɛmɛ ka koo caaman faamu. Ne fɛ, u be baara nafamanba lo kɛra.”

17. Jehova ye labɛn min kɛ kuntigiya koo la, mun na an ka ɲi ka sɔn o ma?

¹⁷ Jehova ye labɛn min kɛ kuntigiya koo la, ni cɛɛw, musow, denbaya kuntigiw ni diinan mɔgɔkɔrɔw b’o faamu ani u be sɔn o ma, o b’a to hɛɛrɛ be kɛ kafo kɔnɔ. Min yɛrɛ kɔrɔtanin lo kosɔbɛ, o ye ko an be nɔɔrɔ la Jehova kan, ale min ye an sankolola Faa kanutigi ye.—Zab. 150:6.