1. Adze kor a ntsi koryɛ wɔ Jehovah n’ebusua mu no nye dɛn?

ƆYƐ hɛn enyigye dɛ yɛka Jehovah n’ebusua no ho. Ebɛnadze ntsi na koryɛ nye asomdwee wɔ ebusua yi mu dɛm? Siantsir kor nye dɛ hɛn nyina yɛ dza yebotum biara dɛ yɛbɛkyerɛ obu ama tsiryɛ ho nhyehyɛɛ a Jehovah ayɛ no. Nokwasɛm nye dɛ, sɛ yɛtse tsiryɛ ho nhyehyɛɛ no ase yie a, koryɛ a ɔwɔ hɛn ntamu no mu bɛyɛ dzen papaapa.

2. Ebɛn nsɛmbisa na yebenya ho mbuae wɔ adzesua yi mu?

² Adzesua yi mu no, yebosusu tsiryɛ ho nhyehyɛɛ a ɔwɔ asafo no mu no ho. Afei so, yebenya nsɛmbisa a odzidzi do yi ho mbuae: Ebɛn dwuma na nkyerɛbaa dzi wɔ asafo no mu? Aso ɔyɛ nokwar dɛ akyerɛbaa biara ne tsir nye onuabanyin biara anaa? Ana tum a mbusua tsir wɔ wɔ hɔn yernom nye hɔn mba do no, dɛm tum no ara bi na asafo mu mpanyimfo wɔ wɔ enuanom do anaa? Hom mma yendzi kan nsusu mbrɛ ɔsɛ dɛ yebu nkyerɛbaa no ho.

3. Yebesi dɛn akyerɛ edwuma a hɛn nkyerɛbaa no yɛ no ho enyisɔ kɛse?

³ Hɛn nkyerɛbaa a wɔyɛ edwumadzen hwɛ hɔn mbusua, wɔkã asɛmpa no, na wɔboa afofor wɔ asafo no mu no, hɛn enyi sɔ hɔn papaapa. Sɛ yesusu mbrɛ Jehovah nye Jesus bu hɛn nkyerɛbaa no ho a, enyisɔ a yɛwɔ ma hɔn no botum ayɛ kɛse. Afei so, yɛbɔhwɛ mbrɛ ɔsomafo Paul nye mbaa dzii, nye dza yebotum esũa efi mu.

4. Ebɛn adanse ahorow na ɔwɔ Bible no mu a ɔma yehu dɛ mbaa na mbanyin nyinara som bo ma Jehovah?

 ⁴ Bible no ma yehu dɛ mbaa na mbanyin nyina som bo ma Jehovah. Dɛ nhwɛdo no, Bible no ma yehu dɛ, wɔ mfeha a odzi kan no mu no, Jehovah dze sunsum krɔnkrɔn maa mbaa na mbanyin nyinara na ɔmaa wonyaa tum dze yɛɛ anwanwadze. Bi nye kasa horow a wɔkãe no. (Andw. 2:1-4, 15-18) Afei so, mbaa na mbanyin a wɔwɔ enyidado dɛ wɔnye Christ bɔbɔ mu edzi adze nyinara wɔdze sunsum krɔnkrɔn asera hɔn. (Gal. 3:26-29) Bio so, mbaa na mbanyin nyinara benya onnyiewiei nkwa wɔ asaase yi do. (Nyi. 7:9, 10, 13-15) Nkyii so, ɔyɛ mbaa na mbanyin nyina hɔn edwuma dɛ wɔkã asɛmpa no na wɔkyerɛkyerɛ. (Matt. 28:19, 20) Dɛ nhwɛdo no, Ndwuma nwoma no kã akyerɛbaa bi a wɔfrɛ no Priscilla ho asɛm. Ɔnye no kun Aquila kyerɛkyerɛɛ nokwar no mu yie kyerɛɛ ɔbarimba bi a wɔfrɛ no Apollos a nna onyim nwoma yie no.​—Andw. 18:24-26.

5. Ebɛn asɛm na ɔwɔ Luke 10:38, 39, 42 a ɔma yehu mbrɛ Jesus nye mbaa dzii?

⁵ Nna Jesus bu mbaa na ɔdze enyidzi ma hɔn. Nna Phariseefo no bu mbaa enyimtsia, na wɔnye hɔn nnkasa wɔ bagua mu mpo, na akantam wɔnye hɔn esusu Kyerɛwnsɛm no ho. Jesus ennsũasua hɔn amambra no, mbom nna ɔnye mbaa so susu nokwasɛm a no mu dɔ a nna ɔnye n’esuafo mbanyin susu ho no ho. * (Kenkan Luke 10:38, 39, 42.) Ɔnye mbaa bɔɔ mu tutuu akwan kɛyɛɛ asɛmpaka edwuma no. (Luke 8:1-3) Afei so, Jesus dze ho kwan no maa mbaa dɛ wɔnkɛkã nkyerɛ n’asomafo no dɛ woenyan no efi owu mu.​—John 20:16-18.

6. Ebɛn kwan do na ɔsomafo Paul daa no edzi dɛ obu mbaa?

⁶ Ɔsomafo Paul hyɛɛ da ara kãa kyerɛɛ Timothy dɛ ondzi mbaa nyi. Paul kãa kyerɛɛ no dɛ ɔmfa “mberwa no dɛ nanom” na ombu “mbabaawa no dɛ nkyerɛbaa.” (1 Tim. 5:1, 2) Paul yɛɛ pii dze boaa Timothy ma ɔbɛyɛɛ Christiannyi a noho akokwaa, naaso ɔgyee too mu dɛ ɔyɛ Timothy ne maame nye ne nana na wodzii kan boaa Timothy ma osũaa “kyerɛw krɔnkrɔn no.” (2 Tim. 1:5; 3:14, 15) Aber a Paul kyerɛɛw ne krataa kɛmaa Romefo no, ɔhyɛɛ da ara bobɔɔ nkyerɛbaa bi hɔn edzin kyiaa hɔn. Ohun edwumadzen a nkyerɛbaa asɛmpakafo no yɛe no, na ɔkyerɛɛ dza wɔyɛe no ho enyisɔ.​—Rom. 16:1-4, 6, 12; Phil. 4:3.

7. Ebɛn nsɛmbisa na yerubosusu ho?

⁷ Dze besi ha yi, dza yeesusu ho no ama yeehu dɛ biribiara nnyi Kyerɛwnsɛm no mu a yebotum egyina do akã dɛ enuanom mbarimba ho hia kyɛn enuanom mbaa. Hɛn nkyerɛbaa a wɔda ɔdɔ na ayamuyie edzi no boa asafo no papaapa, na wɔboa edwuma a asafo mu mpanyimfo yɛ dɛ wɔbɛma asomdwee na koryɛ atsena asafo no mu no. Naaso, nsɛmbisa bi wɔ hɔ a ɔsɛ dɛ yenya ho mbuae. Dɛ nhwɛdo no: Ebɛnadze ntsi na Jehovah hwehwɛ dɛ odu mber bi a akyerɛbaa bi kata ne tsir do? Osiandɛ enuanom mbanyin nkotsee na wɔpaw hɔn dɛ asafo mu mpanyimfo nye asomfo ntsi, ana iyi kyerɛ dɛ akyerɛbaa biara ne tsir nye onuabanyin biara wɔ asafo no mu anaa?

8. Dɛ mbrɛ Ephesusfo 5:23 kyerɛ no, ana akyerɛbaa biara ne tsir nye onuabanyin biara anaa? Kyerɛkyerɛ mu.

⁸ Mbuae no yɛ oho! Christ nye nkyerɛbaa a wɔwɔ asafo no mu no hɔn tsir, na nnyɛ onuabanyin bi. (Kenkan Ephesusfo 5:23.) Wɔ ebusua no mu no, okun yɛ ne yer ne tsir. Ɔbabanyin a ɔabɔ esu no nnyɛ ne maame ne tsir. (Eph. 6:1, 2) Afei wɔ asafo no mu no, tum kakraabi na asafo mu mpanyimfo wɔ wɔ  enuanom mbarimba na mbaa no do. (1 Thess. 5:12; Heb. 13:17) Nkyerɛbaa a wɔnnwaree a woefi hɔn awofo nkyɛn no nnhyɛ hɔn egyanom tsiryɛ ase, naaso wɔkɔ do ara dze obu ma hɔn awofo nye asafo mu mpanyimfo. Dɛ mbrɛ enuanom mbarimba a wɔwɔ asafo no mu no hɔn tsir nye Jesus no, dɛmara na nkyerɛbaa a wɔnnwaree no so, hɔn tsir nye Jesus.

9. Ebɛnadze ntsi na ɔtɔfabi a ɔsɛ dɛ nkyerɛbaa kata hɔn tsir do?

⁹ Ɔyɛ nokwar dɛ Jehovah apaw mbarimba dɛ wondzi enyim wɔ no som mu na wɔnkyerɛkyerɛ wɔ asafo no mu dze, naaso ɔmmfaa tum a ɔtse dɛm mmaa mbaa. (1 Tim. 2:12) Ebɛnadze ntsi a? Siantsir a Jehovah paaw Jesus dɛ ɔbarimba ne tsir no, dɛmara na ɔapaw mbarimba dɛ wondzi ndzɛmba enyim wɔ asafo no mu ama biribiara aakɔ do pɛpɛɛpɛ. Tsebea bi ntsi, sɛ ɔsɛ dɛ akyerɛbaa bi yɛ dwumadzi bi a onuabanyin na ɔsɛ dɛ ɔyɛ a, Jehovah hwehwɛ dɛ ɔkata ne tsir do. * (1 Cor. 11:4-7) Dɛm a Jehovah akã dɛ nkyerɛbaa nyɛ no nnkyerɛ dɛ obu hɔn enyimtsia, mbom ɔyɛ ho kwan a ɔdze ama hɔn dɛ wɔnkyerɛ obu mma tsiryɛ ho nhyehyɛɛ a ɔayɛ no. Aber a dɛm nokwasɛm ahorow yi wɔ hɛn adwen mu no, afei hom mma yembua dɛm asɛmbisa yi: Tum a mbusua tsir nye asafo mu mpanyimfo wɔ no kodu hen?

10. Bi a ebɛnadze ntsi na ɔtɔfabi a asafo mu panyin bi bɛpɛ dɛ ɔhyehyɛ mbra ma asafo no?

¹⁰ Asafo mu mpanyimfo dɔ Christ, na wɔdɔ “nguan” a Jehovah na Jesus dze ahyɛ hɔn nsa no. (John 21:15-17) Bi a adwen pa a asafo mu panyin bi wɔ ntsi, ɔbɛyɛ n’adze tse dɛ mbrɛ hɔn a wɔwɔ asafo no mu no yɛ ne mba. Bi a obenya adwen dɛ sɛ ebusua tsir wɔ ho kwan dɛ  ɔhyehyɛ mbra ma n’ebusua mbrɛ ɔbɛyɛ a ɔbɔbɔ hɔnho ban a, nna ɔnodze, asafo mu panyin so botum ahyehyɛ mbra a osusu dɛ ɔbɔbɔ Nyankopɔn no nguan no ho ban. Bi a enuanom binom bɛkã akyerɛ asafo mu mpanyimfo dɛ wonsisi gyinae mma hɔn tse dɛ mbrɛ wɔyɛ hɔn egyanom wɔ asafo no mu. Naaso tum a mbusua tsir wɔ no, dɛm tum no ara bi na asafo mu mpanyimfo so wɔ anaa?

11. Ebɛn kwan do na dwuma a asafo mu mpanyimfo nye mbusua tsir dzi no dzi nsɛ?

¹¹ Ɔsomafo Paul kyerɛɛ dɛ dwuma a ebusua tsir nye asafo mu panyin dzi no dzi nsɛ wɔ akwan bi do. (1 Tim. 3:4, 5) Dɛ nhwɛdo no, Jehovah pɛ dɛ ebusua no mufo yɛ setsie ma ebusua tsir no. (Col. 3:20) Dɛmara na ɔpɛ dɛ hɔn a wɔwɔ asafo no mu so yɛ setsie ma asafo mu mpanyimfo no. Jehovah hwehwɛ dɛ mbusua tsir nye asafo mu mpanyimfo nyina hwɛ hu dɛ hɔn a wɔhyɛ hɔn ase no nye no wɔ ebusuabɔ a no mu dzen. Bio so, mbusua tsir nye asafo mu mpanyimfo dze hɔn a wɔhyɛ hɔn ase no hɔn nkãtse afamu ehiadze ma hɔn. Na dɛ mbrɛ mbusua tsir a wɔdwen hɔn mbusua ho yɛ no, asafo mu mpanyimfo hwɛ hu dɛ wɔdze mboa bɛma hɔn a wɔhyɛ hɔn ase no ber a worihyia nsɛm tsebea a no mu yɛ dzen no. (Jas. 2:15-17) Ɔno da nkyɛn a, Jehovah hwehwɛ dɛ asafo mu mpanyimfo nye mbusua tsir boa hɔn a wɔhyɛ hɔn ase no ma wɔdze ne  gyinapɛn ahorow no yɛ edwuma, na ɔnnsɛ dɛ wɔyɛ hɔn adze ma ‘ɔtra dza wɔakyerɛw’ wɔ Bible mu no.​—1 Cor. 4:6.

12-13. Dɛ mbrɛ Romefo 7:2 kyerɛ no, ebɛn nsonsonee na ɔwɔ dwuma a mbusua tsir nye asafo mu mpanyimfo dzi no mu?

¹² Naaso, nsonsonee kɛse da dwuma a asafo mu panyin nye ebusua tsir dzi no mu. Dɛ nhwɛdo no, Jehovah dze ahyɛ asafo mu mpanyimfo nsa dɛ wondzi asɛm wɔ asafo no mu. Afei so ɔama hɔn asodzi dɛ wonyi ndzebɔnyɛfo a wonnu hɔnho no mfi asafo no mu.​—1 Cor. 5:11-13.

¹³ Naaso Jehovah ama mbusua tsir tum bi a ɔammfa amma asafo mu mpanyimfo. Dɛ nhwɛdo no, ɔama ebusua tsir tum dɛ ɔnhyehyɛ mbra mma n’ebusua, na ɔnhwɛ nhu dɛ wobedzi mbra a ɔtse dɛm no do. (Kenkan Romefo 7:2.) Bi nye dɛ, ebusua tsir wɔ ho kwan dɛ ɔkyerɛ ber a ɔsɛ dɛ ne mba ba fie ewimbir. Afei so, ɔwɔ tum dɛ ɔtsẽa ne mba ber a woebu mbra a ɔtse dɛm do no. (Eph. 6:1) Asɛm no nye dɛ, ebusua tsir a ɔwɔ ɔdɔ no bebisa ne yer n’adwenkyerɛ ansaana ɔahyehyɛ mbra ama ne fiefo, osiandɛ hɔn beenu no yɛ “honankor.” *​—Matt. 19:6.

14. (a) Sɛ yɛhwɛ asɛm a ɔwɔ Mark 10:45 no a, ebɛnadze ntsi na ɔfata paara dɛ Jehovah apaw Jesus dɛ asafo no ne tsir? (b) Ebɛn dwuma na Akwankyerɛ Kuw no dzi? (Hwɛ adakaba a wɔato dzin “ Dwuma A Akwankyerɛ Kuw No Dzi.”)

¹⁴ Jehovah nam werdam no do atɔ obiara a ɔwɔ asafo no mu nye obiara a ɔbɛkyerɛ Jesus no mu gyedzi no no nkwa. (Kenkan Mark 10:45; Andw. 20:28; 1 Cor. 15:21, 22) Ntsi ɔfata paara dɛ ɔapaw Jesus a ɔdze no nkwa maa  dɛ werdam no dɛ asafo no ne tsir. Dɛ asafo no ne tsir no, Jesus wɔ tum dɛ ɔhyɛ mbra fa mbrɛ ɔsɛ dɛ ankorankor, mbusua, nye obiara a ɔwɔ asafo no mu no yɛ n’adze ho, na ɔwɔ ho kwan so dɛ ɔhwɛ hu dɛ yebedzi mbra a ɔtse dɛm do. (Gal. 6:2) Nnyɛ mbra nko na Jesus hyehyɛ ma hɛn, mbom ɔdɔ hɛn na ɔhwɛ hɛn yie so.​—Eph. 5:29.

15-16. Ebɛnadze na esũa efi asɛm a akyerɛbaa a wɔfrɛ no Marley nye onua a wɔfrɛ no Benjamin kãe no mu?

¹⁵ Hɛn nkyerɛbaa no dzi akwankyerɛ a mbarimba a Christ apaw hɔn dɛ wɔnhwɛ hɔn do no dze ma hɔn no do; wɔyɛ dɛm dze kyerɛ dɛ wobu Christ. Akyerɛbaa bi a wɔfrɛ no Marley a ɔwɔ United States kãa mbrɛ hɛn nkyerɛbaa piinara tse nka wɔ ho kwan a wɔwɔ no ho. Ɔkãa dɛ: “M’enyi sɔ dwuma a midzi dɛ ɔyer nye akyerɛbaa wɔ asafo no mu no papaapa. Ɔnnda famu dɛ aber nyina mibenya tsiryɛ ho nhyehyɛɛ a Jehovah ayɛ wɔ ebusua no mu nye asafo no mu no ho adwen pa. Naaso mo kun nye enuanom mbarimba a wɔwɔ asafo no mu no ma iyi ne yɛ yɛ mberɛw ma me, osiandɛ wobu me na wɔkyerɛ dwuma a midzi no ho enyisɔ.”

¹⁶ Enuanom mbarimba no bu nkyerɛbaa no na wodzi hɔn nyi; wɔyɛ dɛm dze kyerɛ dɛ wɔtse tsiryɛ ho nhyehyɛɛ no ase. Onua bi a wɔfrɛ no Benjamin a ɔwɔ England kãa dɛ: “Mesũa pii efi mbuae a nkyerɛbaa no ma wɔ asafo nhyiamu ase, adwenkyerɛ a wɔdze ma wɔ mbrɛ wosi sũa adze nye mbrɛ yebesi etu mpon wɔ asɛnka edwuma mu no mu. Muhu dɛ edwuma a wɔyɛ no som bo papaapa.”

17. Ebɛnadze ntsi na ɔsɛ dɛ yɛkyerɛ obu ma tsiryɛ ho nhyehyɛɛ no?

¹⁷ Sɛ obiara a ɔwɔ asafo no mu​—mbarimba, mbaa, mbusua tsir, nye asafo mu mpanyimfo​—tse tsiryɛ ho nhyehyɛɛ no ase, na yɛkyerɛ obu ma dɛm nhyehyɛɛ no a, asomdwee bɔkɔ do atsena asafo no mu. Dza ɔkyɛn ne nyinara no, yɛdze ayɛyi bɛbrɛ hɛn sor Egya Jehovah a ɔwɔ ɔdɔ no.​—Ndw. 150:6.