1. Nama siti kebuah ruang bilik Jehovah beserakup?

KITAI gaga ati ulih nyadi sebagi ari ruang bilik Jehovah. Nama kebuah ruang bilik kitai bisi pemaik sereta beserakup? Siti ari kebuah iya laban kitai bebendar deka bebasaka sida ke nerima tanggung pengawa ari Jehovah. Majak kitai meretika atur tu, majak agi kitai ulih beserakup.

2. Nama tanya ke deka dikerandau kitai ba artikel tu?

² Ba artikel tu, kitai deka berandauka sapa ke bisi tanggung pengawa ba eklisia. Kitai mega deka nyaut tanya tu: Nama pengawa menyadi indu? Kati semua menyadi lelaki kepala semua menyadi indu? Kati tuai gempuru bisi tanggung pengawa ti sama ngagai bala menyadi lelaki enggau menyadi indu baka tuai bilik ngagai bini enggau bala anak iya? Keterubah, kitai deka berandauka nama runding kitai ti ngena ngagai menyadi indu.

3. Baka ni kitai ulih nunjukka terima kasih ngagai pengawa ke digaga menyadi indu?

³ Menyadi indu amat berega laban sida bebendar gawa nyaga diri sebilik, enggau ba pengawa nginjil sereta nyukung eklisia. Kitai ulih beterima kasih ngagai sida enti kitai belematika runding Jehovah enggau Jesus ngagai sida. Kitai mega deka bisi penguntung enti kitai belematika baka ni chara Paul begulai enggau orang indu.

4. Baka ni Bup Kudus nunjukka orang indu enggau lelaki sama berega ba Jehovah?

⁴ Bup Kudus madahka Jehovah ngumbai orang indu enggau lelaki sama berega. Ambika chunto, ba abad keterubah,  Jehovah meri roh kudus ngagai orang indu enggau lelaki ngambika ulih ngereja pengawa ajih, baka bejaku ngena mayuh bansa jaku. (SKR. 2:1-4, 15-18) Sida mega sama bela dipilih roh kudus merintah enggau Kristus. (Gal. 3:26-29) Orang indu enggau lelaki sama nerima pengadang idup belama iya ba dunya. (Pem. 7:9, 10, 13-15) Lalu sida mega bisi pengawa nginjil enggau ngajar berita manah. (Mat. 28:19, 20) Ambika chunto, ba bup Surat Kereja Rasul bisi nyebut pasal seiku menyadi indu ke benama Prisila. Iya enggau laki iya Akuila nulung nerangka ngagai Apollos, orang ti bepelajar, pasal penemu ti betul agi.—SKR. 18:24-26.

5. Baka ni Luke 10:38, 39, 42 madahka Jesus bebasaka orang indu?

⁵ Jesus bebasaka orang indu. Iya enda baka orang Parisi, ke ngumbai orang indu baruh ari lelaki. Orang Parisi enda bejaku enggau orang indu ba mua orang mayuh, indah enggai sekali-kali bejaku pasal Bup Kudus enggau orang indu. Tang Jesus enda baka sida. Iya berandauka pemendar ti dalam pasal Bup Kudus enggau orang indu sereta bala murid iya. * (Bacha Luke 10:38, 39, 42.) Iya mega ngemendarka orang indu sama enggau iya ba pengawa nginjil. (Luk. 8:1-3) Lalu Jesus meri orang indu peluang madahka ngagai bala rasul, iya udah diangkatka idup baru.—Jhn. 20:16-18.

6. Baka ni Paul nunjukka iya bebasaka orang indu?

⁶ Rasul Paul ngingatka Timoti bebasaka orang indu. Paul ngasuh Timoti ngumbai “sida indu ti tuai baka ti enggau indai diri, lalu sida indu ti biak baka ti enggau menyadi indu diri.” (1 Tim. 5:1, 2, Bup Kudus Berita Manah Ka Rebak Diatu) Taja pan Paul mayuh nulung Timoti bisi pengarap ti tegap, tang iya nemu indai enggau ini Timoti ke dulu agi ngajar Timoti pasal Bup Kudus. (2 Tim. 1:5; 3:14, 15) Paul bisi nyebut nama bala menyadi indu ba surat iya ngagai orang Kristian ba Rome. Paul ukai semina nemu utai ke udah digaga sida, tang mega beterima kasihka pengawa ke udah digaga sida.—Rom. 16:1-4, 6, 12; Plp. 4:3.

7. Nama tanya ke deka dikerandauka kitai diatu?

⁷ Baka ke udah dikerandauka ba genteran sebedau tu, Bup Kudus nadai madah menyadi indu baruh agi ari menyadi lelaki. Menyadi indu kitai ke bepengerindu sereta gerah jari amat berega, lalu tuai gempuru nemu ulah sida ti manah ulih meransang pemaik sereta penyerakup ba eklisia. Tang kitai agi patut nyaut sekeda tanya tu. Ambika chunto, nama kebuah Jehovah ngasuh menyadi indu nudung pala sida ba sekeda maya? Ketegal Jehovah milih menyadi lelaki nyadi tuai gempuru sereta penulung gempuru, kati reti tu genap iku menyadi lelaki kepala semua menyadi indu ba eklisia?

8. Nitihka Epesus 5:23, kati semua menyadi lelaki kepala semua menyadi indu? Terangka.

⁸ Saut iya enda! Menyadi lelaki ukai kepala semua menyadi indu ba eklisia. Tang kepala menyadi indu nya Kristus. (Bacha Epesus 5:23.) Ba ruang bilik, laki kepala bini. Anak lelaki ke udah dibaptisa ukai kepala indai iya. (Eps. 6:1, 2) Ba eklisia, kuasa tuai gempuru bisi tatak ba bala menyadi indu enggau menyadi lelaki. (1 Tes. 5:12; Heb. 13:17) Tang baka ni enggau menyadi indu ke bedau kawin ke enda diau enggau apai indai  iya agi? Iya deka terus bebasaka apai indai iya, tang apai iya ukai agi nyadi kepala iya. Iya mega bebasaka bala tuai gempuru, tang baka menyadi lelaki ba eklisia, iya semina bisi seiku kepala, iya nya Jesus.

9. Nama kebuah kekadang menyadi indu patut nudung pala sida?

⁹ Endang amat, Jehovah milih menyadi lelaki ngambika ngiring ba pengawa ngajar sereta sembah ba eklisia, lalu enda meri pengawa ti sama ngagai menyadi indu. (1 Tim. 2:12) Nama kebuah? Sama tegal Iya milih Jesus nyadi kepala lelaki, ngambika eklisia diatur enggau manah. Ketegal gaya ti enda ulih diseliahka, menyadi indu engka ngereja pengawa ke suah digaga menyadi lelaki. Ba maya nya, Jehovah minta menyadi indu ngena tudung pala. * (1 Kor. 11:4-7) Jehovah ngasuh sida ngaga nya ukai deka ngemaruhka sida, tang meri sida peluang bebasaka menyadi lelaki ke diberi Jehovah kuasa. Diatu kitai deka nyaut tanya tu: Ni pemesai kuasa ke dikembuan tuai bilik sereta tuai gempuru?

10. Nama kebuah kekadang bisi tuai gempuru deka ngaga atur ke eklisia?

¹⁰ Tuai gempuru rinduka Kristus, lalu sida rinduka “bedus” ti diasuh Jehovah enggau Jesus ibun sida. (Jhn. 21:15-17) Ketegal tuai gempuru ibuhka eklisia, iya engka ngumbai diri baka apai ngagai bala menyadi. Iya engka berunding, enti tuai bilik bisi hak ngaga atur kena nyaga diri sebilik, tuai gempuru mega ulih ngaga atur kena nyaga bedus Petara. Lalu sekeda bala menyadi engka meransang tuai gempuru nyadi kepala sida  ngambika ulih ngaga pemutus ke sida. Tang kati tuai gempuru sereta tuai bilik bisi tanggung pengawa ti sebaka?

11. Nama utai ti sebaka ba tanggung pengawa tuai bilik enggau tuai gempuru?

¹¹ Rasul Paul madahka bisi sekeda utai ti sama entara tanggung pengawa tuai bilik enggau tuai gempuru. (1 Tim. 3:4, 5) Ambika chunto, Jehovah deka diri sebilik ngasika tuai bilik. (Kol. 3:20) Lalu Iya mega deka menyadi ba eklisia ngasika tuai gempuru. Jehovah ngarapka tuai bilik sereta tuai gempuru ngajar orang ke dibaruh jaga sida rinduka Iya sereta berasai dikesayau. Baka tuai bilik ti manah, tuai gempuru deka nulung bala menyadi lebuh sida napi penanggul. (Jas. 2:15-17) Pia mega, Jehovah ngarapka tuai bilik sereta tuai gempuru nulung orang ngasika standard Iya. Tang Iya nangkan sida “anang ngelui utai ti udah ditulis” ba Bup Kudus.—1 Kor. 4:6.

12-13. Nitihka Rome 7:2, baka ni kuasa ke dikembuan tuai bilik sereta tuai gempuru bebida?

¹² Taja pia, kuasa ke dikembuan tuai gempuru bisi bebida ari kuasa ke dikembuan tuai bilik. Ambika chunto, Jehovah ngasuh  tuai gempuru nyadi hakim lalu sida bisi tanggung pengawa muai orang ke bedosa ti enda nesal ati ari eklisia.—1 Kor. 5:11-13.

¹³ Tang, Jehovah udah meri tuai bilik sekeda kuasa ke enda diberi Iya ngagai tuai gempuru. Ambika chunto, Iya ngasuh tuai bilik ngaga atur sereta nentuka diri sebilik nitihka atur nya. (Bacha Rome 7:2.) Tuai bilik bisi hak nentuka jam berapa anak iya patut pulai ke rumah. Iya mega bisi hak disiplin anak iya enti sida enda ngasika atur nya. (Eps. 6:1) Taja pia, sebedau tuai bilik ngaga atur ke diri sebilik iya, iya patut berandauka nya enggau bini iya laban seduai iya udah nyadi “siku.” *—Mat. 19:6.

14. (a) Nitihka Mark 10:45, nama kebuah Jehovah endang patut milih Jesus nyadi kepala eklisia? (b) Nama tanggung pengawa Raban ti Ngiring? (Peda kutak “ Tanggung Pengawa Raban ti Ngiring.”)

¹⁴ Nengah genselan Anak Iya, Jehovah udah nebus nyawa tiap iku orang ba eklisia sereta orang ke bisi pengarap ngagai Jesus. (Bacha Mark 10:45; SKR. 20:28; 1 Kor. 15:21, 22) Nya alai, endang patut Iya milih Jesus nyadi kepala eklisia. Laban Jesus kepala kitai, nya alai iya bisi kuasa ngaga atur bekaul enggau ulah tiap iku orang, diri sebilik enggau eklisia. Lalu iya bisi kuasa kena nentuka kitai nitihka atur nya. (Gal. 6:2) Jesus ukai semina ngaga atur, tang iya ngintu sereta rinduka kitai.—Eps. 5:29.

15-16. Nama dipelajarka nuan ari komen Menyadi Marley enggau Menyadi Benjamin?

¹⁵ Menyadi indu nunjukka basa ngagai Kristus enti sida nitihka iring bala menyadi  lelaki ke dipilih nyaga sida. Seiku menyadi indu ke benama Marley, ari Amerika Serikat madahka: “Tanggung pengawa aku ke nyadi bini sereta menyadi indu ba eklisia amat berega ba aku. Aku enggau naka ulih bebasaka kuasa ke diberi Jehovah ngagai laki aku sereta bala tuai gempuru. Tang laki aku enggau bala menyadi lelaki ba eklisia ngenyenangka aku ngereja nya laban sida bebasaka aku sereta beterima kasihka pengawa ke digaga aku.” Mayuh menyadi indu setuju enggau utai ke disebut Marley.

¹⁶ Bala menyadi lelaki nunjukka sida meretika atur kepala enti sida bebasaka menyadi indu. Benjamin, ke diau ba England madah: “Aku mayuh belajar ari komen menyadi indu ba gempuru. Aku mega belajar baka ni sida belajarka Bup Kudus sereta baka ni ulih nginjil sereta ngajar enggau chara ti manah. Pengawa ke digaga sida nya amat berega.”

17. Nama kebuah kitai bebasaka atur ke udah ditetapka Jehovah?

¹⁷ Lebuh semua orang ba eklisia baka lelaki, indu, tuai bilik sereta tuai gempuru mereti sereta bebasaka atur ke udah ditetapka Jehovah, eklisia deka bisi pemaik. Lalu ke beguna agi, kitai ulih mai puji ngagai Apai kitai, Jehovah.—Mas. 150:6.