IKPƐYI ƐLĀ Ō KLƆCƐ ƆMƐ 7

Íkwu Nɛ Anyakwɔcɛ Ku Ujɔ Lɛ Ipu Ujɔ A

GBƆƆ

“Ohɔ́nyɛtá ā wɛ ɔ̄cɛ nōo nya ācɛ icɔ́ɔci kú nu tá á, icɔ́ɔci ā kē lɛbɛ̄ɛka ɔkpíye kú nū ā.”—ĀFI. 5:23.

IJÉ ƆMƐ 137 Faithful Women, Christian Sisters

ƆDĀ NƐ ALƆ GÁĀ NWU A *

1. Ɔdi wɛ ɔdā éyi nōo ya nɛ ācɛ nōo gē gba Ujehofa ɛ̄gbā piyatɔha lɔɔlɔhi a?

ALƆ gweeye ō wɛ ipu ācɛ nōo gē gba Ujehofa ɛ̄gbā a. Ɔdiya ɛɛ nɛ alɔ ba ɛbɔ klla piyatɔha lɛ a? Ɔdā éyi nōo ya wɛ ka ɛjɛɛji alɔ gē ya ɛji ɔfu ku alɔ, ō lɛ ojilima ce ācɛ nɛ Ujehofa je íkwu ōhī lɛ uwa a. Ku ɛlā ɔkwɛyi a ba, ɛgɛ nɛ ōmiya ku otrɛyi ta alɔ eyī peee lɛ a, ɛgɔɔma nɛ alɔ gáā piyatɔha lɔɔlɔhi fiyɛ lɛ a.

2. Aɔka nyá nɛ alɔ gáā cila ipu ikpɛyi ɛlā nyā a?

²Ipu ikpɛyi ɛlā nyā, alɔ géē kɛla lɛyikwu ācɛ nōo lɛ íkwu ipu ujɔ a. Alɔ klla géē cila ohi ku aɔka nōo ba nyā: Uklɔ nyá nɛ ayinɛ alɔ nɔnya lɛ a? Ó wɛ ɔkwɛyi ku ɛjɛɛji ayinɛ alɔ nɔnyilɔ wɛ otrɛyi ku ɛjɛɛji ayinɛ alɔ nɔnya a? Íkwu nɛ anyakwɔcɛ ku ujɔ lɛ ikpɛyi ku ayinɛ alɔ a, wɛ ekponu mla ɛ̄nɛ̄ adā lɛ ikpɛyi ku ɔnyā nu mla ayipɛ ɔlɛ nu a? Aflɛyi, alɔ kɛla lɛyikwu ɔwɛ nɛ alɔ cika ō leyi má ayinɛ alɔ nɔnya a.

ƐGƐNYÁ NƐ ALƆ CIKA Ō LEYI MÁ AYINƐ ALƆ NƆNYA A?

3. Ɔdi gáā ta alɔ abɔ ku uklɔ nɛ ayinɛ alɔ nɔnya gē ya a, kóō jɛ alɔ eyī fiyɛ a?

³Ayinɛ alɔ nɔnya nōo gē yuklɔ lɔfu lɔfu kéē teyi kwu apɔlɛ ku uwa, kéē tɔɔna ku ɔkoolɔhi, mla ō je otabɔ lɛ ācɛ ɔhá ipu ujɔ a jɛ alɔ eyī nɛhi. É géē jɛ alɔ eyī fiyɛ, ɔdaŋ ka alɔ gbɛla lɛyikwu ɛgɛ nɛ Ujehofa mla Ujisɔsi leyi má uwa lɛ a. Alɔ klla géē nwu ɛlā lɛyikwu ɛgɛ nɛ alɔ cika ō ya uce mla acɛnya, ŋma lɛ ō leyi má ɛgɛ nɛ Upɔlu nōo wɛ ɔcocɛhɔ a ya uce mla uwa lɛ a.

4. Ɛgɛnyá nɛ Ubáyíbu mafu ka acɛnya jɛ Ujehofa eyī ɛgɛ nɛ acɛnyilɔ jɛ ɔ eyī lɛ a?

⁴Ubáyíbu mafu ka acɛnya jɛ Ujehofa eyī ɛgɛ nɛ acɛnyilɔ jɛ ɔ eyī lɛ a. Ocabɔ mafu, Ubáyíbu mafu ku ɛpleeko ku acocɛhɔ a, Ujehofa je Alelekwu Ihɔ ku nu lɛ acɛnya mla acɛnyilɔ, o ya ɛɛ ku ɛjɛɛji uwa kéē yuklɔ idaago, bɛɛka ō kɛla ipu uce ɛyɛɛyɛyi a. (Ācot. 2:1-4, 15-18) Oŋma otabɔ ku Alelekwu Ihɔ, é lɛ anɔ tu acɛnya mɛmla acɛnyilɔ ɛyi, o ya ɛɛ kéē lé ɔcɛ́ mla Ukraist. (Ugal. 3:26-29) Acɛnya mɛmla acɛnyilɔ géē miyɛ ɔhá ō lā oyeeyi opiyoo ipu ɛcɛ nyā. (Mafú 7:9, 10, 13-15) É kē je uklɔ kóō tɔɔna mla ō nwu ɛlā lɛyikwu ɔkoolɔhi a lɛ acɛnyilɔ mɛmla acɛnya duu. (Umát. 28:19, 20) Ocabɔ mafu, ɔkpá ku Úklɔ́ Kú Ācotɛ̄hɔ̄ kɛla lɛyikwu ɔyinɛ nɔnya éyi nɛ iye nu le ku Uprisila a. Anu mɛmla ɔba nu Akwila lɛ ɛlā ɔkwɛyi a ta Apolosi nōo wɛ ɔcɛ ō jé ɔkpá nɛɛnɛhi a eyī peee ɔwɛ okpaakpa.—Ācot. 18:24-26.

5. Ɛgɛnyá nɛ ɔkpá ku Ulúku 10:38, 39, 42, mafu ku Ujisɔsi lɛ ojilima ce acɛnya a?

⁵Ujisɔsi lɛ ojilima ce acɛnya. Ó gbla ācɛ Ufarisi nōo gbɛla ku acɛnya i cɛgbá bɛɛka acɛnyilɔ ŋ ma ya ŋ. Ācɛ Ufarisi a i gē kɛla lɛ acɛnya ɛga nɛ ācɛ ba lɛwa amāŋ kɛla lɛyikwu Ɔkpiihɔ mla uwa ŋ. Amáŋ Ujisɔsi a kɛla lɛyikwu ɔkwɛyi nōo cɛgbá mla acɛnya mɛmla acɛnyilɔ. * (Jé Ulúku 10:38, 39, 42.) Ipu iyawu nɛ ó yɛ kóō gáā tɔɔna a, ó jɛga lɛ acɛnya kéē yɛce ɔ. (Ulúk. 8:1-3) Ujisɔsi klla jɛga lɛ acɛnya kéē lɛ ojilima ō da ayikpo a ka é lɛ anuɔ heyi ŋma ɔlekwu ɛ.—Ujɔ́n. 20:16-18.

6. Ɛgɛnyá nɛ Upɔlu mafu ka ó lɛ ojilima ce acɛnya a?

⁶Upɔlu mafu ka ó lɛ ojilima ce acɛnya. Ocabɔ mafu, ó da Utimoti kahinii: “Yá mla ācɛnyā nēe dēē hīla ā bɛ̄ɛka ɛ́nɛ́ uwɔ aā, bī ɔtū oyēŋēē yá mla ayípɛ̄nɔ̄nyā bɛ̄ɛka ayínɛ́ uwɔ nɔ̄nyā āa.” (1 Utím. 5:1, 2) Naana nɛ Upɔlu ya ɔdā alɛwa kóō je otabɔ lɛ Utimoti kóō lɛ ɔtu okpoce olɔfu a, ó jé ku ɛ́nɛ́ Utimoti mla ɛ́nɛ́ nu nyakwɔcɛ wɛ ācɛ nōo nwu Utimoti ‘ɛlā Ɔwɔico otiihɔ’ a aflɛyi a. (2 Utím. 1:5; 3:14, 15) Upɔlu hɛ okonu tu ayinɛ nɔnya mla iye ku uwa ipu uleta nɛ ó ta gē lɛ ācɛ Urom a. Upɔlu má ɔdā nɛ ayinɛ nɔnya nyā ya a, klla ka ku uklɔ néē ya a jɛ ɔ eyī nɛhi.—Uróm 16:1-4, 6, 12; Ufíl. 4:3.

7. Aɔka nyá nɛ alɔ gáā kɛla lɛyikwu ɔ babanya a?

⁷Aogwotu nɛ alɔ humayi jé a, mafu ku Ubáyíbu i ka ku ayinɛ alɔ nɔnyilɔ tiile fiyɛ ayinɛ alɔ nɔnya ŋ. Ayinɛ alɔ nɔnya néē lɛ ihɔtu klla gē nwula abɔ a gē je otabɔ lɛ ujɔ nɛhi, anyakwɔcɛ ku ujɔ kē i gbolo ce otabɔ ku uwa, o ya ɛɛ ku ɛbɔ mla opiyatɔha kóō yɔ ipu ujɔ. Amáŋ alɔ klla cɛgbá ō cila ohi ku aɔka nōo ba nyā: Ɔdiya ɛɛ nɛ Ujehofa dɔka ku acɛnya kéē lɛ ɛyi ku uwa gbo ekoohi a? Abɔ ó kwu piya ayinɛ alɔ nɔnyilɔ foofunu néē gē fu kéē wɛ anyakwɔcɛ ku ujɔ, amāŋ ācɛ ō ta anyakwɔcɛ ku ujɔ abɔ a, ɔɔma wɛ ka ɛjɛɛji ayinɛ alɔ nɔnyilɔ wɛ otrɛyi ku ɛjɛɛji ayinɛ alɔ nɔnya ipu ujɔ a nɛɛ?

ƐJƐƐJI AYINƐ ALƆ NƆNYILƆ WƐ OTRƐYI KU ƐJƐƐJI AYINƐ ALƆ NƆNYA A NƐƐ?

8. Oŋma ɛlā nōo yɔ ipu ɔkpá ku Ācɛ Ɛ́fēsɔsi 5:23 a, ɛjɛɛji ayinɛ alɔ nɔnyilɔ wɛ otrɛyi ku ɛjɛɛji ayinɛ alɔ nɔnya a nɛɛ? Lɛ ɔ teyi peee.

⁸Ɛjɛɛji ayinɛ alɔ nɔnyilɔ wɛ otrɛyi ku ɛjɛɛji ayinɛ alɔ nɔnya a nɛɛ? Ohi a wɛ ehee! (Jé Ācɛ Ɛ́fēsɔsi 5:23.) Ipu apɔlɛ, ɔba lɛ íkwu ikpɛyi ku ɔnyā nu a. Ɔyinɔnyilɔ nōo lɛ ubatism ya ɛ, i wɛ otrɛyi ku ɛ́nɛ́ nu ŋ. (Āfi. 6:1, 2) Ipu ujɔ, anyakwɔcɛ ku ujɔ lɛ íkwu ōhī ikpɛyi ku ayinɛ alɔ nɔnya mla ayinɛ alɔ nɔnyilɔ. (1 Utes. 5:12; Uhíb. 13:17) Ɔyinɛ alɔ nɔnya nōó lɛ ɔba ɛ ŋ, nōó kē lā mla ɛ́nɛ́ amāŋ adā nu gɛ ŋ ma bɛ? Ó géē gɔbu yɔ i lɛ ojilima ce ɛ́nɛ́ mla adā nu, amáŋ ó yɔ ɛhaajɛ íkwu ku adā nu gɛ ŋ. Ó klla géē gɔbu yɔ i lɛ ojilima ce anyakwɔcɛ ku ujɔ, amáŋ, bɛɛka ayinɛ alɔ nɔnyilɔ a, ó lɛ otrɛyi ekponu foofunu, anu kē wɛ Ujisɔsi a.

Ācɛ nōó lɛ ɔba amáŋ ɔnyā ɛ ŋ nōó lā mla ɛ́nɛ́ amāŋ adā uwa gɛ ŋ ma yɔ ɛhaajɛ íkwu ku Ujisɔsi (Má ogwotu ɔmɛ 8)

9. Ɔdiya nɛ ayinɛ alɔ nɔnya cika ō gbo ɛyi ku uwa ekoohi a?

⁹Ó wɛ ɔkwɛyi ku Ujehofa lɛ acɛnyilɔ fu kéē gbɔbu ipu ɛlā ō nwu mla ɛ̄gbā ō gba ipu ujɔ, ó kē je ɛdɔ íkwu ekponu ɔɔma lɛ acɛnya ŋ. (1 Utím. 2:12) Ɔdiya a? Ohigbu ɔdā ekponu nōo ya ɛɛ nɛ ó fu Ujisɔsi kóō wɛ otrɛyi ku acɛnyilɔ a nɛ, ɔɔma kē wɛ o ya ɛɛ ku igbaji kóō hii yɔ ipu ujɔ ŋ. Ɔdaŋ ka ó ohigbu āhɔ̄ ōhī, ɔyinɛ alɔ nɔnya géē cɛgbá ō ya ɔdā nɛ ɔyinɛ alɔ nɔnyilɔ gē ya a, Ujehofa dɔka kóō lɛ ɛyi ku nu gbo. * (1 Ukɔ́r. 11:4-7) Ujehofa dɔka ku ayinɛ alɔ nɔnya kéē ya ɔɔma, o ya ɛɛ kē lɔfu mafu ojilima ku uwa lɛ ācɛ nɛ Ujehofa je íkwu ōhī lɛ uwa a, ó wɛ o ya kéē leyi má uwa taajɛ ŋ. Babanya alɔ géē cila ɔka nyā: Ɛdɔ íkwu nyá nɛ aotrɛyi ku apɔlɛ mla anyakwɔcɛ ku ujɔ lɛ a?

Eko Nyá Nɛ Ayinɛ Alɔ Nɔnya Cika Ō Gbo Ɛyi Ku Uwa A?

O ya ɛɛ kóō jé ɔdaŋ ka ó cika ō gbo ɛyi ku nu, ɔyinɛ alɔ nɔnya géē cɛgbá ō cila ohi ku aɔka nōo ba nyā:

1. Ɔyinɛ alɔ nɔnya a géē gbɔɔkɔ ɛga nɛ ācɛ ba amāŋ nwu ɛlā ŋma ipu Ubáyíbu, ɔdaŋ ku ɔyinɛ alɔ nɔnyilɔ nōo lɛ ubatisim ya ɛ ma yɔ abɔɔ mla ɔ, amāŋ yɔ i má ɔ klla yɔ i jahɔ lɛ ɔ?—1 Ukɔ́r. 11:4, 5.
2. Ɔdaŋ ku ɔyinɛ alɔ nɔnyilɔ nōo lɛ ubatisim ya ɛ ma i kóō ya abɔɔ ŋ, ɔyinɛ alɔ nɔnyilɔ nōo lɛ ubatisim ya ɛ ma cika ō yuklɔ ɔɔma a?—1 Utím. 2:11, 12; Uhíb. 13:17.
3. Ɔdaŋ ku ɔyinɛ alɔ nɔnya a lɛ ɔba lɛ ɛ, ɔba nu ya ɛga nɛ ó yɔ i gbɔɔkɔ tɛɛcɛ lɛ ācɛ ɔhá, amāŋ yɔ i nwu ɛlā ŋma ipu Ubáyíbu a?—1 Ukɔ́r. 11:3.

Ɔdaŋ ku ohi ku oduuma ku aɔka nyā wɛ ii, ɔyinɛ alɔ nɔnya a géē cɛgbá ō gbo ɛyi ku nu. Ɔdaŋ ku ohi ku aɔka nyā wɛ ehee, ó gáā cɛgbá ō gbo ɛyi ku nu ŋ. *

ÍKWU NƐ AOTRƐYI KU APƆLƐ MLA ANYAKWƆCƐ KU UJƆ LƐ A

10. Ɔdiya nɛ ɔnyakwɔcɛ ku ujɔ géē dɔka ō lɛ íne kwaajɛ ipu ujɔ ekoohi a?

¹⁰Anyakwɔcɛ ku ujɔ yihɔtu ku Ukraist, é kē yihɔtu ku “aálá” nɛ Ujehofa mla Ujisɔsi da uwa kéē leyi kwu uwa a. (Ujɔ́n. 21:15-17) Ohigbu ku ɔnyakwɔcɛ ku ujɔ gē leyi kwu ujɔ a, ó lɔfu gbɛla ka ó lɛbɛɛka adā ku ācɛ nōo yɔ ipu ujɔ a. Ohigbu ɛnyā, ó lɔfu gbɛla ka ɔdaŋ ku otrɛyi ku apɔlɛ lɛ íkwu ō lɛ íne kwaajɛ kóō gbo apɔlɛ ku nu, ɔnyakwɔcɛ ku ujɔ lɔfu lɛ íne kwaajɛ nɛ ó gbɛla ka ó géē gbo aala ku Ɔwɔico duu. Ayinɛ alɔ ōhī kē lɔfu ta anyakwɔcɛ ku ujɔ ɔtu kwu ɔtu kéē ya ɛnyā, ŋma lɛ ō da uwa ɔka kéē ya ōmiya lɛ uwa. Amáŋ anyakwɔcɛ ku ujɔ mla aotrɛyi ku apɔlɛ lɛ íkwu ekponu nɛɛ?

Anyakwɔcɛ ku ujɔ gē je otabɔ lɛ ācɛ nōo yɔ ipu ujɔ a kéē yɔ kwu Ujehofa ajaajɛ, klla mafu ka é yihɔtu ku uwa. Ujehofa je íkwu lɛ uwa kéē lɛ ācɛ ō biya íne nōo ta ō piyabɔ a taajɛ ŋma ipu ujɔ (Má ogwotu ɔmɛ 11-12)

11. Ɛgɛnyá nɛ íkwu nɛ aotrɛyi ku apɔlɛ lɛ a gbla ɛ̄nɛ̄ anyakwɔcɛ ku ujɔ lɛ a?

¹¹Upɔlu mafu ku íkwu nɛ otrɛyi ku apɔlɛ lɛ a, gbla ɛ̄nɛ̄ anyakwɔcɛ ku ujɔ lɛ a duu. (1 Utím. 3:4, 5) Ocabɔ mafu, Ujehofa dɔka ku apɔlɛ kéē lɛyitaajɛ lɛ ɔcɛ nōo wɛ otrɛyi ku apɔlɛ a. (Ukól. 3:20) Ó kē dɔka ku ācɛ nōo yɔ ipu ujɔ a kéē lɛyitaajɛ lɛ anyakwɔcɛ ku ujɔ duu. Ujehofa kē leyice ku aotrɛyi ku apɔlɛ mla anyakwɔcɛ ku ujɔ géē nwu ācɛ nōo yɔ ɛhaajɛ íkwu ku uwa, kéē yihɔtu ku nu. Otrɛyi ku apɔlɛ mla anyakwɔcɛ ku ujɔ klla cika ō mafu ihɔtu lɛ ācɛ nōo yɔ ɛhaajɛ íkwu ku uwa a. Bɛɛka otrɛyi ku apɔlɛ olɔhi a, anyakwɔcɛ ku ujɔ gē je otabɔ lɛ ācɛ nōo lɛ unwalu. (Ujɛ́m. 2:15-17) Ō ka tu ɔ, Ujehofa leyice ku aotrɛyi ku apɔlɛ mla anyakwɔcɛ ku ujɔ géē ta ācɛ ɔhá abɔ kéē lɛyitaajɛ lɛ íne ku nu. Ó klla pi uwa ahɔ kéē “lɛ íne okpaakpa ā tū.” Ɔɔma kē wɛ kē gáā ya gla ɛji íne nōo yɔ ipu Ubáyíbu a ŋ.—1 Ukɔ́r. 4:6.

Aotrɛyi ku apɔlɛ lɛ íkwu ŋma ɛgiyi Ujehofa kéē gbɔbu ipu apɔlɛ ku uwa. Gbɔbu ɛɛ kóō ya ōmiya duuma, otrɛyi ku apɔlɛ nōo lɛ ihɔtu géē kɛla lɛyikwu ɔ mla ɔnyā nu (Má ogwotu ɔmɛ 13)

12-13. Ɛgɛ nɛ ɔkpá ku Ācɛ Uróm 7:2 mafu a, ɛgɛnyá nɛ íkwu nɛ otrɛyi ku apɔlɛ lɛ a wɛ ɛyɛɛyi gwu ɛ̄nɛ̄ anyakwɔcɛ ku ujɔ lɛ a ta a?

¹²Amáŋ, ó lɛ ɔwɛ ōhī nɛ íkwu nɛ ɔnyakwɔcɛ ku ujɔ lɛ a wɛ ɛyɛɛyi gwu ɛ̄nɛ̄ otrɛyi ku apɔlɛ lɛ a ta. Ocabɔ mafu, Ujehofa da anyakwɔcɛ ku ujɔ kéē yuklɔ ku acohɛpɔ, ó wɛ aotrɛyi ku apɔlɛ ŋ. Ó klla lɛ uklɔ je lɛ anyakwɔcɛ ku ujɔ kéē je ācɛ ō biya íne nōo ta ō piyabɔ a taajɛ ŋma ipu ujɔ.—1 Ukɔ́r. 5:11-13.

¹³Amáŋ ó lɛ íkwu ōhī nɛ Ujehofa je lɛ aotrɛyi ku apɔlɛ, nɛ ó je lɛ anyakwɔcɛ ku ujɔ ŋ. Ocabɔ mafu, ó je íkwu lɛ aotrɛyi ku apɔlɛ kéē lɛ aíne kwaajɛ lɛ apɔlɛ ku uwa klla ya kéē yɛce aíne a. (Jé Ācɛ Uróm 7:2.) Ocabɔ mafu, otrɛyi ku apɔlɛ lɛ íkwu ō je eko nɛ ayipɛ ɔlɛ nu cika ō wa ɔlɛ ɔtu a. Ó klla lɛ íkwu ō ya ayipɛ ɔlɛ nu itala ɔdaŋ kē ta ō lɛyitaajɛ lɛ íne ɔɔma. (Āfi. 6:1) Ku ɛlā ɔkwɛyi a ba, gbɔbu ɛɛ ku otrɛyi ku apɔlɛ nōo lɛ ihɔtu kóō lɛ íne kwaajɛ lɛ apɔlɛ ku nu, ó cika ō kɛla lɛyikwu ɔ mla ɔnyā nu, ohigbu ku uwa ɛplɛɛpa wɛ “ɔkpíyē ékpó.” *—Umát. 19:6.

LƐ OJILIMA CE UKRAIST OHIGBU KA ANU WƐ OTRƐYI KU UJƆ A

Ujisɔsi, nɛ Ujehofa wɛ otrɛyi ku nu a, yɔ i ma ɔwɛ nɛ ujɔ cika ō yɛ a fu (Má ogwotu ɔmɛ 14)

14. (a) Ɔdi nɛ ɔkpá ku Umáki 10:45 ka, nōo mafu ka ó wɛ ɔdā okpaakpa abɔɔ Ujehofa lɛ Ujisɔsi piya otrɛyi ku ujɔ a? (b) Ɔdi wɛ uklɔ ku Ígwu Nōo Gē Leyi Kwu Ɔwa Ku Alɔ a? (Má ikpati nōo kahinii: “ Uklɔ Ku Ígwu Nōo Gē Leyi Kwu Ɔwa Ku Alɔ A.”)

¹⁴Oŋma lɛ ikwū nɛ Ukraist kwu a, Ujehofa lɛ oyeeyi ku eyeeye ku alɔ nōo yɔ ipu ujɔ mla ɔcɛ duuma nōo kpɔtuce Ujisɔsi a la. (Je Umáki 10:45; Ācot. 20:28; 1 Ukɔ́r. 15:21, 22) Ohigbu ɛnyā, ó wɛ ɔdā okaakpa kóō lɛ Ujisɔsi nōo je oyeeyi ku nu gwɛɛya lɛ alɔ a piya otrɛyi ku ujɔ a. Ɔɔma ya ɛɛ nɛ Ujisɔsi lɛ íkwu ō lɛ íne kwaajɛ lɛyikwu ɔdā nɛ ācɛ, apɔlɛ, mla ɛjɛɛji ujɔ cika ō ya a. Ó kē lɛ íkwu ō ya ku alɔ lɛyitaajɛ lɛ íne a duu. (Ugal. 6:2) Amáŋ, ó wɛ íne foofunu nɛ Ujisɔsi gē le kwaajɛ a ŋ. Ó gē leyi kwu alɔ lɔɔlɔhi klla yihɔtu eyeeye ku alɔ.—Āfi. 5:29.

Uklɔ Ku Ígwu Nōo Gē Leyi Kwu Ɔwa Ku Alɔ A

Ācɛ nōo wɛ ipu Ígwu Nōo Gē Leyi Kwu Ɔwa Ku Alɔ a, i wɛ ɔkpani ku ɔtu okpoce ku ayinɛ uwa ŋ. (2 Ukɔ́r. 1:24) É jé ku Ujisɔsi wɛ otrɛyi ku ujɔ ku Ācɛ O Yɛce Ukraist a, é klla cɛ ŋma ɔtu ku uwa mla ɛlā nɛ Ujisɔsi ka lɛ ayikpo ku nu nōo kahinii: “Odúúdú aá kē wɛ ayínɛ́ nɔ̄nyā mɛ́mla ayínɛ́ nɔ̄nyīlɔ.” (Umát. 23:8) É yihɔtu ayinɛ uwa nɛɛnɛhi, klla gē ya ɛji ɔfu ku uwa kéē ya ɛgbá ku uwa lɛ uwa. Ɛhaajɛ otrɛyi ku Ujisɔsi Ukraist a, ācɛ nōo wɛ ipu Ígwu Nōo Gē Leyi Kwu Ɔwa Ku Alɔ a, gē mafu ɔwɛ lɛ ācɛ ō gba Ujehofa ɛ̄gbā ipu oduudu ɛcɛ, o ya ɛɛ kē piyatɔha. É gē fu Ācɛ nōo gē Leyi Kwu Abɔ Ku Ɛga Ō Yuklɔ Ku Alɔ mla ācɛ ō leyi kwu usɛkut. (Āfi. 4:7-13) Cɛɛ ācɛ ō leyi kwu usɛkut kéē i fu anyakwɔcɛ ku ujɔ. (Ācot. 14:23; Utáy. 1:5) Ígwu Nōo Gē Leyi Kwu Ɔwa Ku Alɔ a klla gē ya ɔdā néē ya gla kéē yuklɔ ku uwa, nōo wɛ ō je aɛlā nɛ ayinɛ uwa cɛgbá o ya ɛɛ kéē yɔ kwu Ujehofa ajaajɛ, mla ō ta ukɔ́ ŋma ipu ɛlā ku Ɔwɔico. Ígwu Nōo Gē Leyi Kwu Ɔwa Ku Alɔ a gē ya ɛnyā ō bu ipu uleta, aɔkpá ku alɔ, ōmiya ku JW Broadcasting^®mla ō bu ipu ainɔkpa, aōjila ku ujɔ, ojileyi nɛhi mla ojila nɛŋcɛ. (Ācot. 15:22-35) Ācɛ nōo wɛ ipu Ígwu Nōo Gē Leyi Kwu Ɔwa Ku Alɔ a yihɔtu ayinɛ uwa nɛɛnɛhi. Ohigbu ɛnyā, ɔdaŋ ku amiya duu le ya bɛɛka ajɛ ō hɛ wulu amāŋ āhɔ̄ nōo kwiiye nɛhi le ya ɔwɛ ɛga éyi, é géē yɛ fu abɔ ku ɛga ō yuklɔ ku alɔ nōo gē leyi kwu ɛga ɔɔma a boobu, o ya kē má ku ayinɛ nōo ya abɔɔ a miyɛ otabɔ néē cɛgbá a. *

15-16. Ɔdi nɛ a nwu ŋma ɛlā nɛ ɔyinɛ alɔ nɔnya Marley mla ɔyinɛ alɔ nɔnyilɔ Benjamin ka a?

¹⁵Ayinɛ alɔ nɔnya gē mafu kē lɛ ojilima ce Ujisɔsi, ŋma lɛ ō yɛce ɔwɛ nɛ ācɛ nɛ ó fu kéē leyi kwu uwa a mafu lɛ uwa a. Ayinɛ alɔ nɔnya alɛwa cɛ mla ɛlā nɛ Marley ɔyinɛ alɔ nɔnya nōo lā ipu United State ka a. Ó kahinii: “Ɛga nɛ um lɛ ō wɛ ɔnyā mla ɔyinɛ nɔnya ipu ujɔ a wɛ ɔdā nōo jɛ um eyī nɛhi. N yɔ i ceyitikwu eko doodu ku um lɛ ojilima ce íkwu nɛ Ujehofa je lɛ ɔba um mla anyakwɔcɛ ku ujɔ a. Amáŋ ɔba um mla ayinɛ nōo yɔ ipu ujɔ a lɛ ɔ ya tɔɔtɛ gā um, ohigbu ka é gē lɛ ojilima ce um, klla gē mafu ku uklɔ nɛ um gē ya a jɛ uwa eyī nɛhi.”

¹⁶Ayinɛ alɔ nɔnyilɔ gē mafu ka ōmiya ku otrɛyi ta uwa eyī peee, ŋma lɛ ō lɛ ojilima ce ayinɛ alɔ nɔnya. Ɔyinɛ alɔ nɔnyilɔ Benjamin nōo lā ipu England a kahinii: “Ó lɛ ɔdā alɛwa nɛ um nwu ŋma ipu ohi nɛ ayinɛ alɔ nɔnya gē ta ipu ōjila ku ujɔ a ɛ, mla ɔdā néē gbɛla lɛyikwu ɛgɛ nɛ ɔcɛ lɔfu ya oklɔcɛ klla je piya ɔcɛ nōo jé ō tɔɔna mla ō nwu ɛlā lɔɔlɔhi a. Uklɔ néē gē ya a wɛ ɔdā nōo cɛgbá nɛhi.”

17. Ɔdiya nɛ alɔ cika ō lɛ ojilima ce ɔdā nōo ya nɛ Ujehofa je íkwu ōhī lɛ ācɛ ɔhá a?

¹⁷Ɔdaŋ ku ɛjɛɛji acɛnyilɔ, acɛnya, aotrɛyi ku apɔlɛ mla anyakwɔcɛ ku ujɔ lɛ ojilima ce ɔdā nōo ya nɛ Ujehofa je íkwu ōhī lɛ ācɛ ɔhá a, ɛbɔ géē yɔ ipu ujɔ. Ɔdā nōo kē cɛgbá fiyɛ duu a, wɛ ku alɔ géē bi owoofu gē lɛ Adā alɔ Ujehofa nōo yɔ ɔkpanco a.—Aíjē 150:6.

IJÉ ƆMƐ 123 Loyally Submitting to Theocratic Order

^ par. 5 Uklɔ nyá nɛ Ujehofa je lɛ ayinɛ alɔ nɔnya ipu ujɔ a? Ɛjɛɛji ayinɛ alɔ nɔnyilɔ wɛ otrɛyi ku ɛjɛɛji ayinɛ alɔ nɔnya a nɛɛ? Íkwu ku anyakwɔcɛ ku ujɔ wɛ ekponu mla íkwu ku aotrɛyi ku apɔlɛ? Ipu ikpɛyi ɛlā nyā, alɔ géē má ɛgɛ nɛ Ubáyíbu tabɔ cila ohi ku aɔka nyā a.

^ par. 5 Má ogwotu ɔmɛhili ku ikpɛyi ɛlā nōo kahinii: “Tu Ayinɛ Nɔnya Nōo Yɔ Ipu Ujɔ A Abɔ,” nōo bɛɛcɛ ipu Ɔda Ō Gbaajɛ ku Ɔya Ɔmahaanɛ ku 2020 a.

^ par. 9 Má ikpati nōo kahinii: “ Eko Nyá Nɛ Ayinɛ Alɔ Nɔnya Cika Ō Gbo Ɛyi Ku Uwa A?”

^ par. 13 O ya ɛɛ ku a jé ɔcɛ nōo cika ō miya ujɔ nɛ apɔlɛ cika ō yɔ a, má ogwotu ɔmɛ 17-19 ku ikpɛyi ɛlā nōo kahinii: “Lɛ Ojilima Ce Eyeeye Ku Ācɛ Nōo Yɔ Ipu Ujɔ Ku Ujehofa A,” nōo bɛɛcɛ ipu Ɔda Ō Gbaajɛ ku Ɔya Ɔmahata ku 2020 a.

^ par. 59 O ya ɛɛ ku a jé odee lɛyikwu ikpɛyi ɛlā nyā fiyɛ, má ɔkpá nōo kahinii: “Keep Yourselves in God’s Love,” upeji ɔmɛ 209-212 a.

^ par. 64 O ya ku a jé odee fiyɛ lɛyikwu uklɔ nɛ Ígwu Nōo Gē Leyi Kwu Ɔwa Ku Alɔ gē ya a, má Ɔda Ō Gbaajɛ aku oyibo ku Ɔya Ɔmahaapa 15, ku 2013, upeji 20-25.

THE WATCHTOWER (STUDY EDITION)