STUDU 7
Autoridadi ki ansions ten na kongregason
‘Kristu é kabésa di kongregason i salvador di kel korpu li.’ — EFÉSIOS 5:23.
KÁNTIKU 137 Mudjeris di fé
KUZÊ KI NU STA BEN STUDA *
1. Kal ki é un di kes motivu ki ta djuda família di Jeová ser unidu?
NU STA kontenti di faze párti di família di Jeová. Má pamodi ki el ten txeu pas i union? Un di kes motivu é pamodi nos tudu nu ta sforsa pa ruspeta kes ki Jeová da algun autoridadi na kongregason. Na verdadi, kantu más nu ntende pamodi ki Jeová da algun autoridadi na kongregason, más unidu nu ta fika.
2. Ki perguntas nu sta ben responde na kel studu li?
2 Na kel studu li, nu sta ben odja ken ki ten autoridadi na kongregason. Tanbê, nu sta ben odja respósta pa kes pergunta li: Kal ki é trabadju di irmans? Kalker irmon é kabésa di tudu irman na kongregason? Autoridadi ki un ansion ten na kongregason é igual ku autoridadi ki un ómi ten na família? Primeru, nu sta ben odja modi ki nu debe trata nos irmans.
MODI KI NU DEBE TRATA IRMANS?
3. Kuzê ki ta pô-nu ta da más valor pa tudu trabadju ki nos irmans ta faze?
3 Nu ta da txeu valor pa nos irmans ki ta faze ses midjór pa kuida di família, prega notísias sábi i pa djuda kongregason. Na kel studu li, nu sta ben lenbra di kuzê ki Jeová i Jizus ta pensa sobri mudjeris i tanbê nu sta ben odja modi ki apóstlu Polu ta trataba mudjeris. Kel-li ta ben pô-nu ta da más valor pa nos irmans ki nu krê txeu.
4. Ki izénplus na Bíblia ta mostra ma ómis ku mudjeris ten txeu valor pa Jeová?
4 Bíblia ta mostra ma ómis ku mudjeris ten txeu valor pa Jeová. Pensa na kuzê ki kontise na ténpu di apóstlus. Mudjeris ku ómis resebe spritu santu di Jeová pa faze milagris, sima pâpia na línguas diferenti. (Atos 2:1-4, 15-18) Ómis ku mudjeris skodjedu ku spritu santu pa ba governa ku Kristu na Séu. (Gál. 3:26-29) Tanbê mudjeris ku ómi ta ben resebe rekonpénsa di vive pa tudu ténpu li na Téra. (Apo. 7:9, 10, 13-15) I es tudu dôs dadu diziginason di prega i inxina kes notísia sábi. (Mat. 28:19, 20) Pur izénplu, livru di Atos ta pâpia di un bon trabadju ki un irman ki txomaba Prisila faze djuntu ku se maridu ki txomaba Ákila. Es djuda Apolu, ki éra un ómi ki tinha txeu konhisimentu, ntende verdadi más dretu. — Atos 18:24-26.
5. Sima sta na Lucas 10:38, 39, 42, kuzê ki Jizus ta pensaba sobri mudjeris?
5 Jizus ta trataba mudjeris ku ruspetu. Jizus éra mutu diferenti di kes farizeu di se ténpu. Kes ómi li, ta atxaba ma es éra más inportanti ki mudjeris. Es ka ta krê papiaba ku es nen mésmu na públiku, inda más sobri Skrituras. Má Jizus, ka ta papiaba di kes verdadi inportanti sô ku ómis má tanbê ku mudjeris. * (Lé Lucas 10:38, 39, 42.) El ta dexaba mudjeris kunpanhaba el óras ki el ta ba pregaba na otus lugar. (Luc. 8:1-3) I Jizus ti mésmu da alguns mudjer priviléjiu di konta se apóstlus ma dja el resusitadu. — João 20:16-18.
6. Modi ki apóstlu Polu mostra ma el ta ruspetaba mudjeris?
6 Apóstlu Polu lenbra Timótiu ma el devia ruspetaba mudjeris. El fla Timótiu ma el devia trataba ‘kes mudjer ki dja sta grandi sima mai’ i ‘kes jóven sima irmans’. (1 Tim. 5:1, 2) Polu faze txeu pa djuda Timótiu bira un kriston maduru, má el rekonhese ma éra mai di Timótiu ku se avó ki inxinaba el primeru sobri kes ‘skritura sagradu’. (2 Tim. 1:5; 3:14, 15) Na se karta pa romanus, Polu kunprimenta txeu irman pa nómi. El ka presta atenson sô na kuza ki dja es fazeba, má tanbê el fla ma el ta daba txeu valor pa tudu kel ki dja es fazeba. — Rom. 16:1-4, 6, 12; Fil. 4:3.
7. Nu sta ben odja respósta di ki perguntas?
7 Kes parágrafu antis, dexa klaru ma Bíblia ka ta apoia ideia ma irmons é más inportanti di ki irmans. Nos irmans ta mostra amor i es gosta di da. Es é un benson di verdadi pa kongregason. Ansions ta kunfia na ses ajuda pa mante pas i union na kongregason. Má inda nu meste sabe respósta di alguns pergunta. Pur izénplu, pamodi ki Jeová ta pidi irmans pa kubri kabésa na alguns situason? Dja ki é sô ómis ki ta diziginadu ansions i ajudantis di kongregason, kel-li krê fla ma kalker irmon na kongregason é kabésa di irmans?
KALKER IRMON É KABÉSA DI TUDU IRMAN NA KONGREGASON?
8. Sima sta na Efésios 5:23, kalker irmon é kabésa di tudu irman na kongregason? Splika.
8 Respósta dirétu é nau. É sô Kristu ki é kabésa di tudu irmans na kongregason. (Lé Efésios 5:23.) Na família, maridu ten autoridadi sobri se mudjer. Un fidju batizadu é ka kabésa di se mai. (Efé. 6:1, 2) I na kongregason, kel autoridadi ki ansions ten sobri irmons ku irmans ten limiti. (1 Tes. 5:12; Heb. 13:17) Un irman soltera ki ka sta vive más djuntu ku se mai ku se pai, debe kontinua ta ruspeta-s i ta ruspeta ansions. Má sima otus irmon na kongregason, se úniku kabésa é Jizus.
Solterus ki ka sta vive más djuntu ku ses mai ku ses pai, sta dibaxu di autoridadi di Jizus. (Odja parágrafu 8.)
9. Pamodi ki alvês irmans meste kubri kabésa?
9 Má simé, Jeová skodje alguns ómi pa toma kónta di kongregason. El ka da mudjer kel mésmu autoridadi li. (1 Tim. 2:12) Pamodi? Pamodi kel mésmu motivu ki el poi Jizus kabésa di ómi, pa ten órdi na kongregason. Pode ser ki pamodi un situason, un irman meste faze un kuza ki é un irmon ki ta kustuma faze. Na kes kazu li, Jeová ta iziji pa el kubri kabésa. * (1 Cor. 11:4-7) Jeová ka ta faze kel-li pamodi el ta atxa ma ómis é más inportanti ki mudjeris, má pa el da mudjeris oportunidadi di mostra ruspetu pa kes ki el da algun autoridadi. Ku kel-li na menti, gósi nu sta ben responde kel pergunta li: Ki autoridadis ki xéfis di família i ansions ten?
AUTORIDADI DI XÉFIS DI FAMÍLIA I DI ANSIONS
10. Kuzê ki ta poi un ansion ta krê kria régras pa kongregason?
10 Ansions ta ama Kristu i es ta ama kes ‘ovelha’ ki Jeová i Jizus da-s pa es kuida di el. (João 21:15-17) Má pamodi el ta preokupa ku irmons, un ansion pode atxa ma el é sima un pai na kongregason. Talvês el ta atxa ma dja ki un pai pode kria régras pa proteje se família, un ansion pode faze mésmu kuza pa proteje kongregason. Tanbê alguns irmon sen es krê, es ta insentiva ansions pa aji di kel manera li. Óras ki es ta meste toma un disizon, es ta pidi un ansion pa faze kel-li pa es. Má kel autoridadi ki un ansion ten na kongregason, é sima kel ki un ómi ten na se família?
Ansions ta kuida di irmons na kongregason. Jeová da-s responsabilidadi di mante kongregason puru. (Odja parágrafus 11 i 12.)
11. Kal ki é alguns kuza igual entri autoridadi di un xéfi di família i di un ansion?
11 Apóstlu Polu mostra ma ten alguns kuza igual entri kel autoridadi di un xéfi di família i kel autoridadi di un ansion. (1 Tim. 3:4, 5) Pur izénplu, Jeová krê pa fidjus obi ku xéfi di família. (Col. 3:20) I el krê pa irmons na kongregason obi ku ansions. Jeová ta spéra ma xéfis di família i ansions, ta djuda kes ki sta dibaxu di ses autoridadi ten un amizadi fórti ku el i pa es preokupa ku ses sentimentu. I sima kes bon xéfi di família ta faze, ansions tanbê ta da kes irmon ki sta pasa pa algun difikuldadi tudu ajuda ki es ta meste. (Tia. 2:15-17) Alén di kel-li, Jeová ta spéra ma ansions ku xéfis di família ta djuda otus obi ku se leis. Má tanbê, el ta aviza-s pa es ka ‘pasa di kuzas ki sta skrebedu’ na Bíblia. — 1 Cor. 4:6.
Xéfis di família resebe autoridadi di Jeová pa kria régras na ses família. Antis di toma un disizon, un xéfi di família ki ta ama se mudjer ta pâpia ku el. (Odja parágrafu 13.)
12-13. Sima sta na Romanos 7:2, kal ki é alguns diferénsa entri kel autoridadi di un xéfi di família i autoridadi di un ansion?
12 Má ten grandi diferénsa entri kel autoridadi di un ansion i kel autoridadi di un xéfi di família. Pur izénplu, Jeová da ansions autoridadi di aji sima juís i es pode tra fóra di kongregason kes pekador ki ka rapende. — 1 Cor. 5:11-13.
13 Má, Jeová da xéfi di família autoridadi ki el ka da ansions. Pur izénplu, el da pai autoridadi di kria régras pa se família i di iziji pa obidesedu kes régra. (Lé Romanos 7:2.) Pur izénplu, un xéfi di família ten direitu di disidi ki óra ki se fidjus debe txiga kaza di noti. I si se fidjus ka obidese kel régra, el ten autoridadi pa disiplina-s. (Efé. 6:1) Má é klaru ki antis di kria un régra, un xéfi di família ki ta ama se mudjer ta pâpia ku el, afinal es é ‘un karni sô.’ * — Mat. 19:6.
RUSPETA KRISTU PAMODI EL É KABÉSA DI KONGREGASON
Jizus, sta dibaxu di autoridadi di Jeová, i el ta orienta kongregason. (Odja parágrafu 14.)
14. (a) Sima sta na Marcos 10:45, pamodi ki ta faze sentidu Jeová skodje Jizus pa ser kabésa di kongregason? (b) Kal ki é responsabilidadi di Grupu Enkaregadu di Óbra? (Odja kuadru “ Responsabilidadi di Grupu Enkaregadu di Óbra”.)
14 Através di resgati, Jeová kunpra vida di kada algen na kongregason i di tudu kel ki krê bira disiplu di Kristu. (Lé Marcos 10:45; Atos 20:28; 1 Cor. 15:21, 22) Dja ki Jizus da se vida sima resgati, ta faze tudu sentidu pamodi ki Jeová skodje-l pa el ser kabésa di kongregason. El é nos kabésa, pur isu el ten autoridadi pa kria régras ki ta fla kuzê ki kada algen, família ô kongregason debe faze. I el ten direitu di iziji pa obidesedu kes régra. (Gál. 6:2) Má Jizus ta faze más di ki sô kria régras. El ta da-nu kumida spritual i el ta kuida di kada un di nos ku amor. — Efé. 5:29.
15-16. Kuzê ki bu prende ku komentárius di irman Marley i di irmon Benjamin?
15 É Kristu ki dizigina ómis pa kuida di irmans. Pur isu, óras ki irmans ta sigi orientasons ki kes ómi li ta da-s, es ta mostra ma es ta ruspeta Kristu. Txeu irman ta konkorda ku Marley, un irman ki ta vive na Mérka, ki fla: “N ta da txeu valor pa kel responsabilidadi ki N ten di mudjer kazadu i di irman na kongregason. N ten ki kontinua ta sforsa pa N ruspeta kel autoridadi ki Jeová da nha maridu i ansions. Má nha maridu i irmons na kongregason, sénpri ta trata-m ku ruspetu i es ta agradese tudu kel ki N ta faze. Asi ta fika mutu más fásil pa N ruspeta ses autoridadi.”
16 Óras ki irmons ta trata irmans ku ruspetu, es ta mostra ma es ta ntende pamodi ki Jeová da-s algun autoridadi. Un irmon na Inglatéra ki txoma Benjamin fla: “N ta prende txeu ku kes komentáriu ki irmans ta da na runion. I sénpri es ta ten bons ideia di modi ki nu debe studa i modi ki nu pode ser un publikador midjór. Tudu kuza ki es ta faze na kongregason ten txeu valor.”
17. Pamodi ki nos tudu nu debe ruspeta autoridadi ki Jeová da alguns algen?
17 Óras ki tudu algen na kongregason, ómis, mudjeris, xéfis di família i ansions ta ntende i ta ruspeta kel autoridadi ki Jeová da alguns algen, ta ten pas na kongregason. I más inportanti inda, nu ta traze glória pa nómi di nos Pai na Séu ki ta ama-nu, Jeová. — Sal. 150:6.
KÁNTIKU 123 Ser lial i obi ku organizason di Jeová
^ par. 5 Kal ki é trabadju di irmans na kongregason? Kalker irmon é kabésa di tudu irman na kongregason? Autoridadi di ansions é igual ku autoridadi di un xéfi di família? Na kel studu li, nu sta ben odja modi ki Bíblia ta djuda-nu responde kes pergunta li.
^ par. 5 Odja parágrafu 6 di artigu “Djuda irmans di bu kongregason”, na Sentinéla di setenbru di 2020.
^ par. 9 Odja kuadru “ Ki óras ki un irman debe kubri kabésa?”
^ par. 13 Pa más informason sobri ken ki ten autoridadi di disidi na ki kongregason un família debe fika, odja parágrafus 17 ti 19 na artigu “Ruspeta lugar di otus na kongregason di Jeová”, na Sentinéla di agostu di 2020.
^ par. 59 Pa sabe más informason sobri kel asuntu li, odja livru “Mantenha-se no amor de Deus”, pájinas 209 ti 212, na purtugês.
^ par. 64 Pa más informason sobri responsabilidadi di Grupu Enkaregadu di Óbra, odja Sentinéla di 15 di julhu di 2013, pájinas 20 ti 25, na purtugês.
