NAʼLEBʼ RE TZOLOK 7
Li jolomink saʼ li chʼuut
«Li Kriist aʼan xjolomil li Iklees, ut tzʼaqal aj kolol re li xtzʼejwal» (EFES. 5:23).
BʼICH 137 Fieles, valiosas, amadas
RUʼUJIL LI TZOLOM *
1. Bʼar wank jun rehebʼ li xyaalal naq li xjunkabʼal li Jehobʼa wank saʼ junajil?
PEʼYAAL naq kʼajoʼ nasahoʼk saʼ qachʼool tzʼaqonk saʼ li xjunkabʼal li Jehobʼa? Jun rehebʼ li xyaalal kʼaʼut naq wank li tuqtuukilal ut li junajil saʼ qayanq aʼan naq chiqajunilo naqayal qaqʼe chi xkʼulubʼankil li jolomink xaqabʼanbʼil xbʼaan li Jehobʼa. Relik chi yaal, qʼaxal nokoowank saʼ junajil naq naqataw ru chiʼus li naraj xyeebʼal li naʼlebʼ aʼin.
2. Kʼaru ebʼ li patzʼom tqasume saʼ li tzolom aweʼ?
2 Saʼ li tzolom aweʼ tooʼaatinaq chirix li jolomink li naʼuxmank saʼ li chʼuut. Joʼkan ajwiʼ, tqasume ebʼ li patzʼom aʼin: Kʼaru li kʼanjel kʼebʼil saʼ ruqʼebʼ li hermaan ixq? Ma yaal naq chixjunilebʼ li hermaan winq nekeʼxjolomi ebʼ li hermaan ixq? Ma juntaqʼeet li wankilal kʼebʼil saʼ ruqʼebʼ li cheekel winq saʼ xbʼeenebʼ li hermaan rikʼin li kʼebʼil saʼ ruqʼ li bʼeelomej saʼ xbʼeen li rixaqil ut ebʼ li ralal xkʼajol? Xbʼeenwa aatinaqo chirix li kʼanjel kʼebʼil saʼ ruqʼebʼ li hermaan ixq ut chanru tento tqilebʼ.
CHANRU TENTO TQILEBʼ LI HERMAAN IXQ?
3. Kʼaru ttenqʼanq qe re naq qʼaxal oxloqʼaqebʼ chiqu ebʼ li hermaan ixq?
3 Xkʼulubʼebʼ li hermaan ixq naq tqakʼe saʼ qu chixjunil li nekeʼxbʼaanu re rilbʼal li xjunkabʼal, re xpuktesinkil li chaabʼil esilal ut re xtenqʼankilebʼ li hermaan saʼ li chʼuut. Abʼan, qʼaxal oxloqʼaqebʼ chiqu ebʼ li hermaan ixq wi naqakʼoxla chanru nekeʼileʼk xbʼaan li Jehobʼa ut li Jesús, joʼwiʼ chanru kirilebʼ li ixq li apóstol Pablo.
4. Chanru naxkʼut li Santil Hu naq li Jehobʼa juntaqʼeet naril ebʼ li winq ut ebʼ li ixq?
4 Li Santil Hu naxkʼut naq li Jehobʼa juntaqʼeet naril ebʼ li winq ut ebʼ li ixq. Jun eetalil, naxchʼolobʼ naq saʼ xkutankilebʼ li apóstol li Jehobʼa kixkʼe li xsantil musiqʼej saʼ xbʼeenebʼ li ixq ut ebʼ li winq re naq teʼruuq xbʼaanunkil li sachbʼachʼoolej, joʼ aatinak saʼ jalan chik aatinobʼaal (Hech. 2:1-4, 15-18). Saʼ xyanqebʼ li yulbʼilebʼ ru li teʼawabʼejinq rochbʼen li Kriist wankebʼ winq ut ixq (Gál. 3:26-29). Joʼkan ajwiʼ, li Jehobʼa tixqʼajkamuhebʼ rikʼin li junelik yuʼam arin saʼ Ruuchichʼochʼ ebʼ li winq ut ebʼ li ixq (Apoc. 7:9, 10, 13-15). Ut li Jesús kixtaqlahebʼ winq ut ixq chi xpuktesinkil ut chi xkʼutbʼal li chaabʼil esilal (Mat. 28:19, 20). Jun eetalil, li hu Hechos naʼaatinak chirix li xPriscila jun aj paabʼanel. Rochbʼen laj Áquila li xbʼeelom, «qʼaxal chi chaabʼil chik keʼxchʼolobʼ» li yaal chiru laj Apolos jun li winq li naxpaabʼ chaq li Yos (Hech. 18:24-26).
5. Joʼ naxkʼut saʼ Lucas 10:38, 39, 42, chanru narilebʼ chaq li ixq li Jesús?
5 Li Jesús naroxloqʼihebʼ chaq li ixq. Inkʼaʼ kixkʼam re rikʼinebʼ laj pariseey, xbʼaan naq ebʼ aʼan nekeʼxtzʼeqtaana chaq ebʼ li ixq, inkʼaʼ nekeʼaatinak rikʼinebʼ wi wankebʼ jalan chik kristiʼaan chi moko nekeʼxkʼut chiruhebʼ li naxye li Santil Hu. Abʼan li Jesús kiʼaatinak rikʼinebʼ winq ut ixq chirix li chamal naʼlebʼ (taayaabʼasi Lucas 10:38, 39, 42). * Joʼkan ajwiʼ, kixkʼulubʼa naq ebʼ li ixq teʼochbʼeninq re, naq yook chaq chi puktesink (Luc. 8:1-3). Ut kiroksihebʼ ajwiʼ wiibʼ oxibʼ li ixq re xyeebʼal rehebʼ li apóstol naq ak xwakliik chi yoʼyo (Juan 20:16-18).
6. Chanru kixkʼutbʼesi li apóstol Pablo naq naroxloqʼihebʼ chaq li ixq?
6 Li apóstol Pablo kixye re laj Timoteo naq chiroxloqʼiiq ebʼ li ixq. Kixye re, naq chirilaq li cheekebʼ «joʼ naʼbʼej» ut li saajebʼ «joʼ anabʼej» (1 Tim. 5:1, 2). Usta laj Pablo kixkʼe xchʼool chi xtenqʼankil laj Timoteo re naq kawaq li xpaabʼal, abʼan chʼolchʼo chaq chiru naq aʼ li xnaʼ ut li xnaʼchin laj Timoteo keʼkʼutuk chiru li naxye «li Santil Hu» (2 Tim. 1:5; 3:14, 15). Ut, saʼ li esilhu li kixtzʼiibʼa choʼq rehebʼ laj Roma, laj Pablo kixtaqla xsahilebʼ xchʼool naabʼalebʼ li hermaan ixq ut kixtzʼiibʼa li xkʼabʼaʼebʼ. Kixkʼe reetal chixjunil li nekeʼxbʼaanu chaq ebʼ li ixq aʼan, ut kixye naq jwal oxloqʼ chiru li xkʼanjelebʼ (Rom. 16:1-4, 6, 12; Filip. 4:3).
7. Bʼar wank ebʼ li patzʼom tqasume?
7 Joʼ naqakʼe reetal, li Santil Hu inkʼaʼ naxkʼut naq ebʼ li ixq maakʼaʼebʼ xwankil chiruhebʼ li winq. Li rahok ut li chaabʼilal li nekeʼxkʼutbʼesi ebʼ li hermaan ixq kʼajoʼ naq natenqʼank saʼ li chʼuut, ut ebʼ li cheekel winq nekeʼroybʼeni naq ebʼ aʼan teʼtzʼaqonq re naq wanq li tuqtuukilal ut li junajil saʼ li chʼuut. Abʼan, qasumeq ebʼ li patzʼom aweʼ: Kʼaʼut naq li Jehobʼa naxye rehebʼ li ixq naq wank sut tento teʼxlan li xjolom? Ut xbʼaan naq kaʼajwiʼ ebʼ li winq nekeʼxaqabʼaak joʼ cheekel winq ut joʼ aj tenqʼanel saʼ li chʼuut, ma naraj xyeebʼal aʼin naq chixjunilebʼ li hermaan winq nekeʼxjolomi ebʼ li hermaan ixq?
MA CHIXJUNILEBʼ LI HERMAAN WINQ NEKEʼXJOLOMI EBʼ LI HERMAAN IXQ?
8. Joʼ naxkʼut saʼ Efesios 5:23, kʼaʼut naq moko chixjunilebʼ ta li hermaan winq nekeʼjolomink rehebʼ li hermaan ixq?
8 Inkʼaʼ, moko joʼkan ta. Kaʼajwiʼ li Kriist najolomink rehebʼ chixjunilebʼ li hermaan ixq (taayaabʼasi Efesios 5:23). Saʼ li junkabʼal, li bʼeelomej wank xwankil saʼ xbʼeen li rixaqil, abʼan junaq li alalbʼej li kubʼenaq xhaʼ moko naru ta naxjolomi li xnaʼ (Efes. 6:1, 2). Ut saʼ li chʼuut, moko nim ta li wankilal kʼebʼil saʼ ruqʼebʼ li cheekel winq saʼ xbʼeenebʼ li hermaan winq ut ixq (1 Tes. 5:12; Heb. 13:17). Ut, kʼaru nakʼulmank rikʼin jun li hermaan ixq li wank xjunes abʼan moko wank ta chik saʼ rochoch li xnaʼ xyuwaʼ? Aʼan naroxloqʼi li xnaʼ xyuwaʼ, abʼan moko wank ta chik rubʼel xwankil li xyuwaʼ. Ut naroxloqʼihebʼ ajwiʼ li cheekel winq, abʼan joʼ nakʼulmank rikʼinebʼ chixjunilebʼ li hermaan winq, jun ajwiʼ najolomink re: aʼ li Kriist.
Ebʼ li hermaan li wankebʼ xjunes li moko wankebʼ ta chik saʼ rochoch li xnaʼ xyuwaʼ wankebʼ rubʼel xwankil li Kriist. (Chaawil li raqal 8).
9. Kʼaʼut naq ebʼ li hermaan ixq wank sut tento teʼxlan li xjolom?
9 Abʼanan, yaal naq li Jehobʼa kixxaqabʼ naq ebʼ li hermaan winq teʼjolominq re li chʼuut ut inkʼaʼ ebʼ li ixq (1 Tim. 2:12). Kʼaʼut? Saʼ xkʼabʼaʼ naq li Jehobʼa kixxaqabʼ li Jesús choʼq aj jolominel re li winq: re naq kʼubʼkʼuuq ru chiʼus li chʼuut. Wi junaq li hermaan ixq tento tixbʼaanu junaq li kʼanjel li naxbʼaanu junaq li winq, li Jehobʼa naxye re, naq chixlanaq li xjolom (1 Cor. 11:4-7). * Aʼin moko naraj ta xyeebʼal naq maakʼaʼ naʼok wiʼ, re bʼan naq tixkʼutbʼesi naq naxkʼulubʼa li jolomink xaqabʼanbʼil xbʼaan li Yos. Anaqwan qasumeq li patzʼom aweʼ: Toj bʼar nawulak li wankilal kʼebʼil saʼ ruqʼebʼ li nekeʼjolomink re li junkabʼal ut ebʼ li cheekel winq?
LI WANKILAL KʼEBʼIL SAʼ RUQʼEBʼ LI BʼEELOMEJ UT EBʼ LI CHEEKEL WINQ
10. Kʼaʼut naq junaq li cheekel winq traj raj xxaqabʼankil ebʼ li chaqʼrabʼ saʼ xbʼeenebʼ li hermaan?
10 Ebʼ li cheekel winq nekeʼxra li Kriist ut nekeʼxra ajwiʼ ebʼ li karneer li kikʼeheʼk saʼ ruqʼebʼ xbʼaan li Jehobʼa ut li Jesús re naq teʼril (Juan 21:15-17). Junaq li cheekel winq chi maakʼaʼ maaʼusilal saʼ xchʼool naru naʼok rekʼankil ribʼ joʼ xyuwaʼebʼ li hermaan. Ut naru naʼok xkʼoxlankil: «Wi li najolomink re li junkabʼal naru xxaqabʼankil ebʼ li chaqʼrabʼ re xkolbʼalebʼ li wankebʼ rubʼel xwankil chiru li maaʼusilal, junaq li cheekel winq naru ajwiʼ naxxaqabʼ ebʼ li chaqʼrabʼ li tixkolebʼ li xkarneer li Yos chiru li maaʼusilal». Ut maare wiibʼ oxibʼ li hermaan winq ut ixq joʼkaʼan ajwiʼ nekeʼkʼoxlak, ut teʼxye rehebʼ li cheekel winq naq ebʼ aʼan teʼyehoq re kʼaru tento teʼxbʼaanu saʼ xyuʼamebʼ. Abʼan, ma juntaqʼeet li wankilal kʼebʼil saʼ ruqʼebʼ li cheekel winq rikʼin li kʼebʼil saʼ ruqʼebʼ li nekeʼjolomink re li junkabʼal?
Ebʼ li cheekel winq nekeʼxtenqʼa ebʼ li hermaan re naq kawaqebʼ li xpaabʼal ut re naq sa teʼrekʼa ribʼ. Li Jehobʼa kixkʼe saʼ ruqʼebʼ li cheekel winq risinkil saʼ li chʼuut junaq li hermaan li kitʼaneʼk saʼ li maak ut inkʼaʼ naxyotʼ xchʼool ut naxjal xkʼaʼuxl. (Chaawil li raqal 11 ut 12).
11. Kʼaʼut naq juntaqʼeet bʼayaq li wankilal kʼebʼil saʼ ruqʼebʼ li nekeʼjolomink re li junkabʼal rikʼin li kʼebʼil saʼ ruqʼebʼ li cheekel winq?
11 Li apóstol Pablo kixye naq juntaqʼeet bʼayaq li wankilal kʼebʼil saʼ ruqʼebʼ li nekeʼjolomink re li junkabʼal rikʼin li kʼebʼil saʼ ruqʼebʼ li cheekel winq (1 Tim. 3:4, 5). Jun eetalil, li Jehobʼa naraj naq ebʼ li alal kʼajolbʼej ut li ixaqilbʼej teʼxpaabʼ li najolomink re li junkabʼal, ut joʼkan ajwiʼ naraj naq teʼxbʼaanu ebʼ li hermaan rikʼinebʼ li cheekel winq (Col. 3:20). Naraj ajwiʼ naq ebʼ li nekeʼjolomink re li junkabʼal ut ebʼ li cheekel winq teʼxkʼe rehebʼ li wankebʼ rubʼel xwankil li naʼajmank chiruhebʼ re naq kawaqebʼ li xpaabʼal ut re naq sa teʼrekʼa ribʼ. Ut joʼ nekeʼxbʼaanu ebʼ li nekeʼjolomink re li junkabʼal, ebʼ li cheekel winq ajwiʼ nekeʼxtenqʼa ebʼ li hermaan naq naʼajmank chiruhebʼ (Sant. 2:15-17). Joʼkan ajwiʼ, li Jehobʼa naraj naq ebʼ li cheekel winq ut ebʼ li nekeʼjolomink re li junkabʼal teʼxkut chiruhebʼ li wankebʼ rubʼel xwankil chanru xpaabʼankil li xchaqʼrabʼ li Yos ut naq meʼxqʼax ru «li ak tzʼiibʼanbʼil» saʼ li Santil Hu (1 Cor. 4:6).
Li Jehobʼa kixkʼe saʼ ruqʼebʼ li nekeʼjolomink re li junkabʼal xbʼeresinkil li wankebʼ rubʼel xwankil. Junaq li bʼeelomej li naroxloqʼi li rixaqil tento tixpatzʼ re kʼaru naxkʼoxla chirix li naʼlebʼ li yook xkʼubʼankil choʼq re li xjunkabʼal. (Chaawil li raqal 13).
12, 13. Joʼ naxchʼolobʼ saʼ Romanos 7:2, bʼar wank li xjalanil li wankilal kʼebʼil saʼ ruqʼebʼ li nekeʼjolomink re li junkabʼal rikʼin li kʼebʼil saʼ ruqʼebʼ li cheekel winq?
12 Abʼanan, wank ajwiʼ xjalanil li wankilal kʼebʼil saʼ ruqʼebʼ li cheekel winq rikʼin li kʼebʼil saʼ ruqʼebʼ li nekeʼjolomink re li junkabʼal. Jun rehebʼ li xjalanil aʼan naq li Jehobʼa kixkʼe saʼ ruqʼebʼ li cheekel winq raqok aatin ut risinkil saʼ li chʼuut junaq li hermaan li kitʼaneʼk saʼ li maak ut inkʼaʼ naxyotʼ xchʼool ut naxjal xkʼaʼuxl (1 Cor. 5:11-13).
13 Abʼanan, li Jehobʼa kixkanabʼ saʼ ruqʼebʼ li nekeʼjolomink re li junkabʼal xbʼaanunkil wiibʼ oxibʼ li naʼlebʼ li inkʼaʼ naru nekeʼxbʼaanu ebʼ li cheekel winq, joʼ xxaqabʼankil ebʼ li chaqʼrabʼ saʼ xbʼeen li xjunkabʼal ut roybʼeninkil naq tbʼaanumanq li naxye (taayaabʼasi Romanos 7:2). Jun eetalil, li najolomink re li junkabʼal xkʼulubʼ xyeebʼal rehebʼ li ralal xkʼajol jarubʼ hoor tento teʼqʼajq chaq saʼ rochochebʼ, ut wank ajwiʼ xwankil re xqʼusbʼalebʼ wi nekeʼxqʼet ribʼ chiru (Efes. 6:1). Yaal, junaq li bʼeelomej li naroxloqʼi li rixaqil tento tixpatzʼ re kʼaru naxkʼoxla chirix li naʼlebʼ li yook xkʼubʼankil choʼq re li xjunkabʼal xbʼaan naq xkabʼichalebʼ «junajebʼ aj [...] chik chi tzʼejwalej» (Mat. 19:6). *
QOXLOQʼIQ LI KRIIST, XJOLOMIL LI CHʼUUT
Rubʼel xwankil li Jehobʼa, li Jesús naxbʼeresi li chʼuut. (Chaawil li raqal 14).
14. a) Joʼ naxkʼut saʼ Marcos 10:45, kʼaʼut wank xyaalal naq li Jehobʼa kixxaqabʼ li Jesús joʼ aj jolominel re li chʼuut? b) Kʼaru xkʼanjelebʼ li Nekeʼjolomink re Xmolam li Jehobʼa? (Chaawil li kaaxukuut « Li xkʼanjelebʼ li Nekeʼjolomink re Xmolam li Jehobʼa»).
14 Saʼ xkʼabʼaʼ li xkamik li Kriist, li Jehobʼa kixloqʼebʼ chixjunilebʼ li qechpaabʼanel ut ebʼ li kristiʼaan li teʼwanq xpaabʼal chirix li Kriist (taayaabʼasi Marcos 10:45; Hech. 20:28; 1 Cor. 15:21, 22). Saʼ xkʼabʼaʼ naq li Kriist kikamk saʼ qakʼabʼaʼ, wank xyaalal kʼaʼut li Jehobʼa kixxaqabʼ joʼ aj jolominel re li chʼuut, joʼkan naq li Jesús wank xwankil re xyeebʼal chanru teʼxbʼeresi li xyuʼam ebʼ li kristiʼaan, ebʼ li junkabʼal ut li chʼuut, ut roybʼeninkil naq tbʼaanumanq li naxye (Gál. 6:2). Abʼan, moko kaʼaj tawiʼ naxxaqabʼ ebʼ li chaqʼrabʼ, nokooxchʼolani ajwiʼ ut nokooril chiqajunqal (Efes. 5:29).
15, 16. Kʼaru nakaatzol laaʼat rikʼin li naxye li xMarley ut laj Benjamin?
15 Ebʼ li hermaan ixq nekeʼxkʼutbʼesi naq nekeʼxkʼulubʼa li wankilal kʼebʼil saʼ ruqʼ li Kriist naq nekeʼxpaabʼ li nekeʼxye ebʼ li winq, aʼ li kixxaqabʼebʼ chi rilbʼal li chʼuut. Li xMarley jun li hermaan li wank Estados Unidos, naxye: «Jwal oxloqʼ chiwu li kʼanjel kʼebʼil saʼ wuqʼ joʼ ixaqilbʼej ut joʼ hermaan. Tento ninyal inqʼe chi naʼlebʼak chiʼus chirix li jolomink li kixxaqabʼ li Jehobʼa. Abʼan linbʼeelom ut ebʼ li hermaan winq nikineʼxtenqʼa re naq inkʼaʼ tchʼaʼajkoʼq chiwu xbʼaanunkil li kʼanjel kʼebʼil saʼ wuqʼ xbʼaan naq nikineʼroxloqʼi ut nekeʼxkʼutbʼesi naq oxloqʼ chiruhebʼ li ninbʼaanu». Chʼolchʼo naq joʼkaʼin nekeʼkʼoxlak naabʼalebʼ li hermaan ixq.
16 Ebʼ li hermaan winq nekeʼxkʼutbʼesi naq nekeʼxtaw ru kʼaru naraj xyeebʼal li jolomink xaqabʼanbʼil xbʼaan li Yos naq nekeʼroxloqʼi ut naq nekeʼxbʼaanu naq sa teʼrekʼa ribʼ ebʼ li hermaan ixq. Laj Benjamin jun li hermaan li wank Inglaterra, naxye: «Ak naabʼal xintzol rikʼin li sumenk li nekeʼxkʼe ebʼ li hermaan ixq saʼebʼ li chʼutam ut naq nekeʼxye chan raj ru tzolok, puktesink ut kʼutuk chiʼus. Ninkʼoxla naq jwal chaabʼil li kʼanjel nekeʼxbʼaanu».
17. Kʼaʼut naq tento tqakʼulubʼa li jolomink xaqabʼanbʼil xbʼaan li Yos?
17 Naq chiqajunilo, maakʼaʼ naxye ma winqo, ixqo, li najolomink re li junkabʼal malaj cheekel winq, naqataw ru ut naqakʼulubʼa li jolomink xaqabʼanbʼil xbʼaan li Yos, li chʼuut nawank saʼ tuqtuukilal. Ut li qʼaxal wank xwankil aʼan naq naqakʼe xloqʼal li Jehobʼa li qachoxahil Yuwaʼ (Sal. 150:6).
BʼICH 123 Seamos leales y sumisos al orden teocrático
^ párr. 5 Bʼar wank li kʼanjel kʼebʼil saʼ ruqʼebʼ li hermaan ixq saʼ li chʼuut? Ma yaal naq chixjunilebʼ li hermaan winq nekeʼxjolomi ebʼ li hermaan ixq? Ma juntaqʼeet li wankilal kʼebʼil saʼ ruqʼebʼ li cheekel winq rikʼin li kʼebʼil saʼ ruqʼebʼ li nekeʼjolomink re li junkabʼal? Saʼ li tzolom aweʼ tqatzʼil rix wiibʼ oxibʼ li eetalil li natawmank saʼ li Santil Hu re xsumenkil ebʼ li patzʼom aʼin.
^ párr. 5 Chaawil li raqal 6 saʼ li tzolom «Qatenqʼaq ebʼ li qechpaabʼanel ixq» saʼ li hu Laj Kʼaakʼalehom re septiembre 2020.
^ párr. 9 Chaawil li kaaxukuut « Joqʼe raj tento tixlan li xjolom jun li hermaan ixq?».
^ párr. 13 Saʼ li raqal 17 toj 19 re li tzolom «Qoxloqʼiq li xkʼulubʼ li junjunq saʼ li chʼuut» re li hu Laj Kʼaakʼalehom re agosto 2020 naxchʼolobʼ ani yaal re saʼ kʼaru li chʼuut ttzʼaqonq li xjunkabʼal.
^ párr. 58 Arin naʼokenk naq li bʼeelomej malaj junaq winq li ak kubʼenaq xhaʼ li maare yook xbʼaanunkil jalan chik li kʼanjel, abʼan narabʼi ut naril li yook chi kʼulmank.
^ párr. 59 Saʼ li perel 209 toj 212 re li hu Chexwanq Junelik saʼ «Xrahom li Yos», natzʼilmank rix chiʼus li naʼlebʼ aweʼ.
^ párr. 65 Saʼ li hu Laj Kʼaakʼalehom 15 re julio 2013, perel 20 toj 25, naxchʼolobʼ chiʼus li xkʼanjelebʼ li Nekeʼjolomink re Xmolam li Jehobʼa. Maakʼaʼ saʼ qʼeqchiʼ.
