1. Jehovap ilaqutariis­sor­taasa ataasioqatigiin­neran­nut pis­sutaasut ilaat suua?

JEHOVAP ilaqutariis­sor­taanut ilaaner­put nuan­naarutigeqaar­put. Eq­qis­seqatigiin­nitsin­nut ataasioqatigiin­nitsin­nul­lu suna pis­sutaava? Siulersuinermik najoq­qutas­siamik ataq­qin­nin­ner­put tamatumun­nga pis­sutaasut ilagaat. Jehovap taamatut aaq­qis­suus­sineranik paasisaqar­nerujar­tor­til­luta ataasioqatigiin­nerulis­saagut.

2. Al­laaserisami matumani apeq­qutit suut akis­sutis­sarsis­savagut?

² Al­laaserisami matumani ilagiin­ni siulersuinermut najoq­qutas­siaq sam­mis­savar­put. Aam­ma apeq­qutit uku akis­sutis­sarsis­savagut: Qatan­ngutit ar­nat qanoq isigineqas­sap­pat? Qatan­ngutit angutit tamarmik ilumut taak­kunun­nga niaquup­pat? Utoq­qaaner­tat qatan­ngutimin­nut oqar­tus­saas­susiat ilaqutariin­nilu niaquusut ilaqut­tamin­nut oqar­tus­saas­susiat as­sigiip­pat? Siul­lermil­li sam­meriar­tigu qatan­ngutit ar­nat qanoq isigineqas­sanersut.

3. Qatan­ngutigut ar­nat qanoq pingaar­tin­nerulersin­naavagut?

³ Ilagiin­niit­tut ar­nat ilaqut­tamin­nik isumas­suiniarlutik, oqaluus­siniarlutik up­peqatimin­nil­lu ikiuiniarlutik ilungersor­tut pingaar­tingaar­pagut. Jehovap Jiisusil­lu qanoq isigineraat paasigutsigu suli pingaar­tin­nerulis­savagut. Aam­ma qanoq pineqar­tar­nis­saan­nut tun­ngatil­lugu apustili Paulusi ilin­niarfigisin­naavar­put.

4. Biibilimi qanoq ersersin­neqar­pa Jehovap ar­nat angutitul­li pingaar­titsigigai?

 ⁴ Biibilimi ersersin­neqarpoq Jehovap arnat angutitulli pingaar­titsigigai. As­sersuutigalugu kristumiut siul­liit nalaan­ni Jehovap angutit ar­nal­lu anersaamik il­ler­nar­tumik tunivai tupin­nar­tuliorsin­naalersil­lugit, soorlu oqaatsinik as­sigiin­ngitsunik oqalus­sin­naalersil­lugit. (ApS 2:1-4, 15-18) Ar­nat angutil­lu Kristusimik naalak­kersueqataasus­san­ngorlugit anersaamik il­ler­nar­tumik tanin­neqarsimap­put. (Gal 3:26-29) Ar­nat angutil­lu nunarsuarmi naas­saan­ngitsumik inuunis­samik neriuuteqar­put. (Saqq 7:9, 10, 13-15) Aam­ma ar­nat angutil­lu nutaarsias­samik nuan­nersumik oqaluus­sinis­samut sulias­sin­neqarsimap­put. (Matt 28:19, 20) Apustilit Suliaan­ni ar­naq Priskil­lamik atilik al­laatigineqar­poq. Uini Akvila ilagalugu sal­lusuis­sut angum­mut ilin­niagaqarluarsimasumut Apol­losimik atilim­mut sukumiisumik nas­suiar­paat. – ApS 18:24-26.

5. Jiisusip ar­nanik ataq­qin­nit­tuunera Lukasi 10:38, 39, 42-milu qanoq erser­pa?

⁵ Jiisusip arnat ataqqin­nit­tumik pisarpai. Farisiiarit ar­nanik nikagin­nit­tuup­put, taamaat­tumil­lu inuit al­lat tak­kuan­ni oqaloqatigerusun­neq ajor­paat Al­lak­kanil­lu eq­qar­tueqatigerusut­tar­nagit. Jiisusi taamaat­tuun­ngilaq. Taas­suma ajoqersuk­kani ar­nat angutil­lu anersaak­kut it­tunik itisuumik eq­qar­tueqatigisar­pai. * (Lukasi 10:38, 39, 42 atuakkit). Aam­ma ar­nat angalaqatigalugit oqaluus­siar­toqatigisar­pai. (Luk 8:1-3) Kiisalu Jiisusip makititaasimanerminik ar­nat apustilinut nalunaariar­tor­tip­pai. – Joh 20:16-18.

6. Apustilip Paulusip ar­nanik ataq­qin­nit­tuunini qanoq ersersip­paa?

⁶ Apustili Paulusi arnanik ataq­qin­nit­tuuvoq. As­sersuutigalugu Timotheusi ar­nanik ataq­qin­nit­tuunis­saanik eq­qaasip­paa. Al­laf­figaa “ar­nat utoq­qaat anaanagisutut ar­nal­lu inuusut­tut qatan­ngutigisutut” pisas­sagai. (1 Tim 5:1, 2) Paulusip Timotheusi anersaak­kut siuariar­tor­nis­saanut ikiungaarsimagaluarlugu puiun­ngilaa Timotheusip anaanaata aanaavatalu siul­liul­lutik ‘Al­lak­kanik Il­ler­nar­tunik’ ilin­niar­tis­simagaat. (2 Tim 1:5; 3:14, 15) Paulusip Romamiunut al­lak­kamini qatan­ngutit ar­nat atiisigut taal­lugit im­mik­kut inuul­luaq­quai. Ar­nat taak­ku suliaat maluginiaan­nar­nagit qujamasun­nini ersersip­paa. – Rom 16:1-4, 6, 12; Fil 4:3.

7. Apeq­qutit suut maan­na sam­mis­savagut?

⁷ Sam­meriik­katsitut Biibilimi ilin­niar­titsis­sutigineqan­ngil­luin­nar­poq ar­nat angutinit nikanar­nerusut. Utoq­qaaner­tat nalun­ngilaat qatan­ngutigut ar­nat tuk­kor­tuul­lutil­lu asan­nit­tut ilagiit eq­qis­seqatigiin­neran­nut ataasioqatigiin­neran­nul­lu pingaaruteqangaar­tut. Apeq­qutil­li uku akineqar­tariaqar­put: Sooq Jehovap qatan­ngutigut ar­nat ilaan­nik­kut nasar­taateqaq­qusar­pai? Qatan­ngutit angutit kisimik utoq­qaaner­tan­ngor­tin­neqar­tarmata ilagiin­nilu kif­far­tor­tun­ngor­tin­neqar­tarmata imaap­pa ilagiin­ni angutit tamarmik ar­nanut tamanut niaquusut?

8. Efesosimiut 5:23 naaper­torlugu ilagiin­ni angutit tamarmik ar­nanut tamanut niaquup­pat? Nas­suiaruk.

⁸ Ilagiin­ni qatan­ngut angut kinaluun­niit ar­nanut tamanut niaquun­ngilaq. Sooq? Kristusi niaquum­mat. (Efesosimiut 5:23 atuaruk). Ilaqutariin­ni uiusoq nuliaminut niaquuvoq. Angut kuisimasoq anaanaminut niaquun­ngilaq. (Ef 6:1, 2) Aam­ma utoq­qaaner­tat qatan­ngutimin­nut oqar­tus­saas­suseqar­nerat kil­leqar­poq. (1 Th 5:12; Hebr 13:17)  Ar­nat kisimiit­tut angajoq­qaamin­nilu najugaqarun­naarsimasut angajoq­qaamin­nik utoq­qaaner­tanil­lu suli ataq­qin­nit­tus­saap­put. Ilagiin­nili angutit as­sigalugit ataasiin­naq niaqoraat; Jiisusi.

9. Sooq qatan­ngutit ar­nat ilaan­nik­kut nasar­taateqar­tar­tus­saap­pat?

⁹ Ilumoor­poq Jehovap angutit ilagiin­ni siulersuisus­satut toq­qarsimagai ar­nal­lu taamatut oqar­tus­saas­susilersiman­ngik­kai. (1 Tim 2:12) Sooq taamaap­pa? Ilagiit aaq­qis­suus­saal­luar­tumik ingerlanis­saat kis­saatigigamiuk. Aam­ma taman­na pil­lugu Jiisusi angum­mut niaqun­ngor­tip­paa. Qatan­ngut ar­naq nalingin­naasumik angutip sulias­saanik suliaqar­tariaqaleraangat nasar­taateqar­tar­nis­saa Jehovap piumasaraa. * (1 Kor 11:4-7) Jehovap ar­nat nikanarsar­niarlugit taamatut piumasaqarfigivai? Naamik, siulersuinermul­li najoq­qutas­siamik ataq­qin­nin­nermik ersersitsinis­saan­nut periarfis­sip­pai. Apeq­qul­li una maan­na akis­sutis­sarseriar­tigu: Ilaqutariin­ni niaquusut utoq­qaaner­tal­lu qanoq oqar­tus­saas­suseqar­pat?

10. Sooq utoq­qaaner­taq ilagiin­nut malit­tarisas­siorusuler­toorsin­naava?

¹⁰ Utoq­qaaner­tat Jiisusi asavaat, aam­ma ‘savat’ Jehovap Jiisusil­lu im­min­nut isumagisas­san­ngor­tis­simasaat asavaat. (Joh 21:15-17) Taamaat­tumik utoq­qaaner­taq ajun­ngitsumik isumaqarluni eq­qarsalersin­naavoq ilagiin­niit­tunut tamanut ataataasutut il­luni. Eq­qarsalersin­naavoq ilaqutariin­ni niaquusoq ilaqut­tani il­lersor­niarlugit malit­tarisas­siorsin­naap­pat aam­ma nam­mineq Guutip  savaatai il­lersor­niarlugit taamaaliorsin­naal­luni. Utoq­qaaner­tat taamatut misigiler­toorsin­naaneran­nut pis­sutaaqataasut ilagivaat qatan­ngutit ilaasa nam­mineq aalajangigas­saraluamin­nik utoq­qaaner­tanut aalajangeeq­qusisar­nerat. Utoq­qaaner­tal­li ilaqutariin­nilu niaquusut as­sigiim­mik oqar­tus­saas­suseqar­pat?

11. Ilaqutariin­ni niaquusut utoq­qaaner­tal­lu oqar­tus­saas­susii qanoq as­sigiis­suteqar­pat?

¹¹ Apustili Paulusi oqamisaar­poq ilaqutariin­ni niaquusut utoq­qaaner­tal­lu oqar­tus­saas­susii as­sigiis­suteqar­tut. (1 Tim 3:4, 5) As­sersuutigalugu ilaqutariin­ni niaquusup ilaqut­taminit naalan­neqar­nis­saa Jehovap piumasaraa. (Kol 3:20) Taamatut­taaq ilagiin­niit­tut utoq­qaaner­tanut naalat­tar­nis­saat kis­saatigaa. Aam­ma ilaqutariin­ni niaquusut utoq­qaaner­tal­lu isumas­suk­kamik anersaak­kut misigis­sutsitigul­lu pisariaqar­titaan­nik matus­susiisar­nis­saat ikior­tariaqaraangatalu ikior­tar­nis­saat naatsorsuutigaa. (Jaak 2:15-17) Tamatuma saniatigut utoq­qaaner­tat ilaqutariin­nilu niaquusut Jehovap najoq­qutas­siaanik maleruaanis­samut kajumis­saarisar­tus­saap­put. Jehoval­li peq­quai Biibilimi al­las­simasunik ilaar­tuisas­san­ngitsut. – 1 Kor 4:6, NW.

12-13. Romamiut 7:2 naaper­torlugu ilaqutariin­ni niaquusut utoq­qaaner­tal­lu oqar­tus­saas­susii qanoq as­sigiin­ngis­suteqar­pat?

 ¹² Taamaak­kaluar­toq utoq­qaaner­tat ilaqutariin­nilu niaquusut oqar­tus­saas­susii pingaarutilim­mik as­sigiin­ngis­suteqar­put. As­sersuutigalugu Jehovap utoq­qaaner­tat eq­qar­tuus­sisin­naatip­pai, soorlu ingasat­tumik ajor­tulior­tunik al­lamik isumataaruman­ngitsunik ilagiin­nit ilaajun­naarsitsinis­saan­nik akisus­saaf­filerlugit. – 1 Kor 5:11-13.

¹³ Akerlianil­li utoq­qaaner­tat oqar­tus­saas­suserin­ngisaan­nik Jehovap ilaqutariin­ni niaquusut oqar­tus­saas­susilersimavai. As­sersuutigalugu ilaqutariin­ni niaquusoq ilaqut­taminut malit­tarisas­siorsin­naatip­paa ilaqut­tanilu maleruaan­ngik­kaangata oqaaq­qis­saarisin­naatil­lugu. (Romamiut 7:2 atuaruk). Tas­sa aalajangersin­naavaa meeq­qani kingusin­ner­paamik un­nuk­kut qas­sinut angerlar­tas­sasut. Aam­ma meeq­qani naalan­ngik­kaangata perorsaatis­siisin­naatitaavoq. (Ef 6:1) Soorunami uiusup asan­nit­tup ilaqut­tani malit­tarisas­siuutsin­nagit nuliani isumasioq­qaar­tar­paa, marluul­lutim­mi ‘uiniulersimap­put ataaseq’. * – Matt 19:6.

14. (a) Markusi 10:45-mi al­las­simasunit qanoq erser­pa Jehovap Jiisusimik ilagiin­nut niaqun­ngor­titsisimanera pis­susis­samisoor­tuusoq? (b) Siulersuisoqatigiit qanoq akisus­saaf­feqar­pat? (Ungalusaq “ Siulersuisoqatigiit qanoq akisus­saaf­feqar­pat?” takuuk)

¹⁴ Jehovap er­nini akigalugu ilagiin­niit­tut Jiisusimil­lu up­perfigin­nit­tut tamaasa uter­tip­pai. (Markusi 10:45 atuaruk; ApS 20:28; 1 Kor 15:21, 22) Jiisusip inuunini uagut  pil­luta pil­liutigaa, taamaat­tumik ilagiin­nut niaqun­ngor­tin­neqarsimanera pis­susis­samisoor­poq. Taman­na pis­sutigalugu inun­nut ataasiak­kaanut, ilaqutariin­nut ilagiin­nul­lu malit­tarisas­siorsin­naatitaavoq maleruaan­ngitsunul­lu oqaaq­qis­saarisin­naatitaal­luni. (Gal 6:2) Jiisusili malit­tarisas­siuus­siin­nar­tan­ngilaq. Aam­ma asangaarlutalu isumagisar­paatigut. – Ef 5:29.

15-16. Marleyip Benjaminil­lu oqaasiinit suut paasivigit?

¹⁵ Qatan­ngutit ar­nat Kristusimik ataq­qin­nit­tut uimik utoq­qaaner­tal­lu siulersuineran­nik maleruaasar­put. Marleyip, qatan­ngutip ar­nap USA-mi najugal­lip, oqaasii ar­nar­pas­suit isumaqatigaat. Taan­na ima oqar­poq: “Ilaqutariin­ni ilagiin­nilu akisus­saaf­fik­ka as­sut pingaar­tip­pak­ka. Jehovap siulersuinermik najoq­qutas­siaanut eq­qor­tumik isigin­nit­taaseqar­nis­sara sulis­sutigiuar­tariaqar­para. Uimali ilagiin­niit­tul­lu angutit ataq­qin­nin­nermik qujamasun­nermil­lu ersersitsivigisarman­nga taamaalior­nis­sara ajor­nan­ngin­nerutip­para.”

¹⁶ Qatan­ngutit angutit Jehovap siulersuinermut najoq­qutas­siaanik paasin­nil­luarsimasut ar­nanut ataq­qin­nit­tuup­put. Benjamin Englandimi najugalik ima oqar­poq: “Qatan­ngutit ar­nat ataatsimiin­ner­ni akis­sutaat atuaq­qis­saar­nis­samul­lu siun­nersuutaat as­sut ilin­niarfigisimavak­ka. Aam­ma oqaluus­sinermi sun­niuteqarluar­tumik ilin­niar­titsinis­samut maligas­siuil­luar­put. Suliaat as­sut pingaar­tip­pak­ka.”

17. Sooq siulersuinermik najoq­qutas­siaq maleruar­tariaqar­par­put?

¹⁷ Ilagiin­niit­tut tamarmik – soorlu angutit, ar­nat, ilaqutariin­ni niaquusut utoq­qaaner­tal­lu – Jehovap siulersuinermik najoq­qutas­siaanik maleruaap­pata ilagiit eq­qis­seqatigiis­sap­put. Pingaar­ner­tul­li, Ataatar­put asan­nit­toq qilam­miusoq, Jehova, ataq­qinarsisis­savar­put. – Tuss 150:6.