MUTWE WA KUFUNDA 7
Kuyuka Biji Bumutwe mu Kipwilo
‘Kilishitu ye mutwe wa kipwilo, ye mupulushi wa uno mubiji.’—EFI. 5:23.
LWIMBO 137 Banyenga Bena Kilishitu Bakishinka
BIJI MU UNO MUTWE *
1. Ñanyi kishinka kimo kyalengela kisemi kya Yehoba kukwatankana?
TUJI bingi na lusekelo pa kwikala mu kisemi kya Yehoba. Mambo ka kino kisemi kyetu o kyakwatankena ne kwikala mu mutende? Kishinka kimo ke kya kuba’mba atweba bonse twibikako kunemeka lunengezho lwa Yehoba lwa bumutwe. Onkao mambo, inge twayuka bulongo biji lunengezho lwa bumutwe, tukakosesha lukwatankano lwetu.
2. Ñanyi mepuzho o tusakukumbula mu uno mutwe?
2 Mu uno mutwe, tusakwisamba pa lunengezho lwa bumutwe mu kipwilo. Kabiji tusakukumbula ano mepuzho: Ñanyi mwingilo uji na banyenga mu kipwilo? Nanchi mulongo yense mu kipwilo mutwe wa banyenga bonse nyi? Nanchi bakulumpe mu kipwilo baji luusa lumotu na luji na mutwe wa kisemi pa mukazhanji ne baana banji nyi? Patanshi, twayai twisambe pa byo twafwainwa kumonanga banyenga mu kipwilo.
TWAFWAINWA KUMONANGA BYEPI BANYENGA MU KIPWILO?
3. Ñanyi kintu kyakonsha kwitukwasha kusanchila banyenga ne kwibanemeka pa mingilo yo bengila?
3 Tusanchila bingi banyenga yetu bengila na ngovu kulama bisemi byabo, kusapwila mambo awama, ne kukwasha bakwabo mu kipwilo. Twakonsha kwibanemeka bingi inge twalanguluka pa byo bebamona kwi Yehoba ne Yesu. Kabiji tusakufunda byo twafwainwa kumonanga banyenga kupichila mu kwisamba pe Paulo byo amonanga banabakazhi.
4. Baibolo umwesha byepi kuba’mba Yehoba wanemeka bonse, banabakazhi ne banabalume?
4 Baibolo umwesha’mba Yehoba wanemeka bonse banabakazhi ne banabalume. Mu kimye kya bena Kilishitu batanshi, Yehoba wapaine mupashi wazhila ku banabakazhi ne banabalume ne kwibapa bulume bwa kuba bya kukumya, nabiji kwamba milaka yapusana-pusana. (Byu. 2:1-4, 15-18) Banabalume ne banabakazhi bebashingile mupashi wazhila ne kwibapa luketekelo lwa kuya na kulama pamo ne Kilishitu. (Nga. 3:26-29) Banabakazhi ne banabalume bakatambula mfweto ya bumi bwa myaka pano pa ntanda. (Lum. 7:9, 10, 13-15) Kabiji bonse, banabalume ne banabakazhi bebapa mwingilo wa kusapwila ne kufunjisha mambo awama. (Mat. 28:19, 20) Buku wa mu Baibolo wa Byubilo waambapo pa mingilo yaingijile nyenga wa jizhina ja Pilisila. Uno nyenga pamo ne mwatawanji aye Akwila bakwashishe mwanamulume wafunjile bingi aye Apolosa kuyuka bukine.—Byu. 18:24-26.
5. Kinembelo kya Luka 10:38, 39, 42 kimwesha byepi kuba’mba Yesu wanemekele banabakazhi?
5 Yesu wanemekele banabakazhi ne kwibapa mushingi. Kechi walondejile bisho bya Bafaliseo ne. Bafaliseo balengululanga bingi banabakazhi, kabiji kechi besambanga na banabakazhi pa mvula bantu, nangwatu kwisamba nabo Binembelo ne. Pakuba Yesu aye wavwangangamo banabakazhi mu misambo yazhika ya mu Binembelo yo aikalanga nayo na baana banji ba bwanga. * (Tangai Luka 10:38, 39, 42.) Kabiji waswishishe banabakazhi kwendela pamo ne aye pa kuya na kusapwila. (Luka 8:1-3) Kabiji kimye kyo bamusangwile, Yesu wapele banabakazhi mwingilo wa kuya na kubuula batumwa banji kuba’mba wasangulwa.—Yoa. 20:16-18.
6. Mutumwa Paulo wamwesheshe byepi amba wanemekele banabakazhi?
6 Mutumwa Paulo watundaikile Timoti kunemeka banabakazhi. Wamubuujile’mba wafwainwe kumonanga “banabakazhi bakulumpe nobe [bainanji], ne “bansongwakazhi nobe banyenga [yanji].” (1 Timo. 5:1, 2) Paulo wakwashishe Timoti kwikala na lwitabilo lwakosa, bino wayukile kuba’mba bainanji Timoti ne bankambo yanji bo bamufunjishe “binembelo byazhila.” (2 Timo. 1:5; 3:14, 15) Paulo watongwele ne banyenga pa mazhina kimye kyo ebatumijile mitende mu nkalata yo anembejile bena Loma. Wayukile mingilo yaingijile bano banyenga kabiji wibasanchijile.—Loma 16:1-4, 6, 12; Fili. 4:3.
7. Ñanyi mepuzho o tusakukumbula?
7 Byonka byaamba mafuka afumako, Binembelo kechi byaambapo’mba balongo banema kukila banyenga ne. Banyenga yetu bakwasha bingi kipwilo, kabiji bakulumpe mu kipwilo baketekela mwi abo kutundaika mutende ne lukwatankano mu kipwilo. Bino kuji mepuzho o twafwainwa kukumbula. Nabiji ano: Mambo ka Yehoba akambizha’mba nyenga wafwainwa kuvwala kitambala ku mutwe pa bimye bimo? Kabiji byo kiji kuba’mba balongo bo bo batongolatu kwikala bakulumpe ne bankwasho mu kipwilo, nanchi kino kilumbulula’mba mulongo yense wafwainwa kwikala mutwe wa nyenga yense mu kipwilo nyi?
NANCHI MULONGO YENSE MU KIPWILO MUTWE WA BANYENGA BONSE NYI?
8. Kwesakana na byaamba Efisesa 5:23, nanchi mulongo yense mutwe wa banyenga bonse mu kipwilo nyi? Lumbululai.
8 Mukumbu mwipitu ke wa kuba’mba, ine. Mulongo kechi mutwe wa banyenga bonse mu kipwilo ne; Kilishitu ye mutwe wa kipwilo. (Tangai Efisesa 5:23.) Mu kisemi, mwanamulume uji na luusa pa mukazhanji. Mwana wamulume wabatizhiwa kechi mutwe wa bainanji ne. (Efi. 6:1, 2) Kabiji mu kipwilo, bakulumpe mu kipwilo bebapako luusa lumo pa banyenga ne balongo. (1 Tesa. 5:12; Hebe. 13:17) Banabakazhi bazhike bafuma pa bansemi ne kwiikela batwajijila kunemeka bansemi babo ne bakulumpe mu kipwilo. Nangwa byonkabyo, byonka bijitu banabalume bonse mu kipwilo, bajitu na mutwe wabo umo, Yesu.
Banyenga bazhike bafuma pa bansemi ne kuya na kwiikela bakookela bumutwe bwa kwa Yesu (Monai jifuka 8)
9. Mambo ka bimye bimo banyenga o bafwainwa kuvwajila kitambala ku mutwe?
9 Nangwa byonkabyo, Yehoba watongola banabalume kutangijila mwingilo wa kufunjisha ne kupopwela Lesa mu kipwilo, kabiji luno luusa kechi wilupanapo ku banabakazhi ne. (1 Timo. 2:12) Mambo ka? Na mambo a kishinka kimotu kyonka kyamulengela kutongola Yesu kwikala mutwe wa banabalume, kya kuba’mba mu kipwilo bintu byubiwenga na mushingi ne mu ndonda. Bino na mambo a bintu bimo bimweka inge kyakebewa’mba nyenga engile mwingilo wingila mulongo, Yehoba wakambizha kuba’mba wafwainwa kuvwala kitambala. * (1 Ko. 11:4-7) Yehoba kechi wakambizha banyenga kuba kino na mambo a kuba’mba wibalengulula ne, bino ke jishinda ja kumwesheshamo mushingi ku lunengezho lwa bumutwe. Abino bishinka pano bituleta ku bwipuzho bukwabo bwa kuba’mba: Mitwe ya bisemi ne bakulumpe mu kipwilo baji luusa lwabaya byepi?
LUUSA LUJI NA MITWE YA BISEMI NE BAKULUMPE MU KIPWILO
10. Ki ka kyakonsha kulengela mukulumpe mu kipwilo kukeba kulengela kipwilo mizhilo?
10 Bakulumpe mu kipwilo batemwa Kilishitu, kabiji batemwa ne “mikooko” Yehoba ne Yesu yo bebapa kulama. (Yoa. 21:15-17) Na mambo a kuba’mba mukulumpe mu kipwilo ulama bulongo kipwilo, wakonsha kulanguluka’mba uji nobe nsemi wa bonse mu kipwilo. Wakonsha kulanguluka’mba inge mutwe wa kisemi uji na luusa lwa kulenga mizhilo ya kuzhikijila kisemi kyanji, ne mukulumpe mu kipwilo wakonsha kulenga mizhilo yo amona’mba yakonsha kuzhikijila mikooko ya Lesa. Kabiji balongo ne banyenga bamo bakonsha kutundaika mukulumpe mu kipwilo kwikala na ino milanguluko. Bakonsha kuba bino kupichila mu kumwipuzha kuba’mba ebafuukwilengako bya kuba. Nanchi bakulumpe mu kipwilo ne mitwe ya bisemi bajitu na luusa lumo nyi?
Bakulumpe mu kipwilo bakwasha ba mu kipwilo kwikala na bulunda bwakosa ne Yehoba ne kwikala na lusekelo. Yehoba wibapa mwingilo wa kupanga mu kipwilo bandengamambo babula kulapila (Monai mafuka 11-12)
11. Mingilo ya mitwe ya bisemi ipasha byepi na ya bakulumpe mu kipwilo?
11 Mutumwa Paulo wamwesheshe kuba’mba mingilo iji na mutwe wa kisemi ipasha na iji na mukulumpe mu kipwilo. (1 Timo. 3:4, 5) Twayai twambeko pa mashinda amo ino mingilo mo ipashisha. Yehoba ukeba ba mu kisemi kukookela mutwe wa kisemi. (Kolo. 3:20) Kabiji ukeba bonse mu kipwilo kukookela bakulumpe. Yehoba ukeba kuba’mba mitwe ya bisemi ne bakulumpe mu kipwilo bakwashenga bantu bo batangijila kutemwa Yehoba. Mitwe ya bisemi ne bakulumpe mu kipwilo bamona kuba’mba bonse bo batangijila babena kwikala na lusekelo. Kabiji byonkatu byuba mitwe ya bisemi, bakulumpe mu kipwilo bakwasha boba baji mu makatazho. (Yako. 2:15-17) Kikwabo, Yehoba ukeba kuba’mba bakulumpe mu kipwilo ne mitwe ya bisemi bakwashenga bakwabo kukookela mizhilo yanji. Kabiji wibajimunako kuba’mba kechi bafwainwa ‘kupitaila pa bintu byanembwa’ mu Baibolo ne.—1 Ko. 4:6.
Mitwe ya bisemi beipa luusa kwi Yehoba lwa kutangijila bisemi byabo. Mutwe wa kisemi wawama saka akyangye kufuukula bya kuba, wipuzha milanguluko ya mukazhanji (Monai jifuka 13)
12-13. Kwesakana na byaamba Loma 7:2, mingilo ya mutwe wa kisemi yapusana byepi na ya bakulumpe mu kipwilo?
12 Nangwa byonkabyo, mingilo ya mukulumpe mu kipwilo ne ya mutwe wa kisemi muji mo yapusena bingi. Yehoba wapa bakulumpe mu kipwilo mwingilo wa kuchiba mambo, kabiji wibapa luusa lwa kupanga mu kipwilo bandengamambo babula kulapila.—1 Ko. 5:11-13.
13 Nangwa byonkabyo, kuji luusa lumo Yehoba lo apa mitwe ya bisemi lo abula kupapo bakulumpe mu kipwilo. Lesa wapa mutwe wa kisemi luusa lwa kulenga mizhilo ya kisemi kyanji, ne kumona kuba’mba ayo mizhilo ba mu kisemi kyanji babena kwiilondela. (Tangai Loma 7:2.) Mutwe wa kisemi uji na luusa lwa kutongola kimye baana banji kyo bafwainwa kubwela pa nzubo mabanga. Kabiji uji na luusa lwa kukambula baana banji inge bakankalwa kukookela uno muzhilo. (Efi. 6:1) Pano bino, mutwe wa kisemi wa butemwe wipuzha mukazhanji saka akyangye kulenga mizhilo ya pa nzubo, mambo aye ne mukazhanji “mubiji umo.” *—Mat. 19:6.
NEMEKAINGA KILISHITU MAMBO YE MUTWE WA KIPWILO
Yesu ukookela bumutwe bwa Yehoba pa kutangijila kipwilo kya bwina Kilishitu (Monai jifuka 14)
14. (a) Kwesakana na byaamba Mako 10:45, mambo ka o kyayilamo kuba’mba Yehoba watongola Yesu kwikala mutwe wa kipwilo? (b) Ñanyi mwingilo uji na Jibumba Jitangijila? (Monai kakitenguluzha ka kuba’mba “ Mwingilo wa Jibumba Jitangijila.”)
14 Kupichila mu bukuzhi, Yehoba wapotele bumi bwa bonse baji mu kipwilo, ne bantu bonse baji na lwitabilo mwi Yesu. (Tangai Mako 10:45; Byu. 20:28; 1 Ko. 15:21, 22) Onkao mambo, kyayilamo kuba’mba watongwele Yesu kwikala mutwe wa kipwilo, mambo ye wapaine bumi bwanji kwikala bukuzhi. Byo aji mutwe wa kipwilo, Yesu uji na luusa lwa kulenga mizhilo yafwainwa kulondelanga bisemi ne kipwilo kyonse. Kabiji uji na luusa lwa kumona kuba’mba bantu babena kukookela ino mizhilo. (Nga. 6:2) Bino Yesu uba bintu byavula kechi kulengatu mizhilo ne. Witujiisha ne kwitulama bulongo atweba bonse pa muntu pa muntu.—Efi. 5:29.
15-16. Mwafunjilako ka ku byambo byaambile nyenga wa jizhina ja Marley ne byaambile mulongo wa jizhina ja Benjamin?
15 Banyenga bamwesha’mba banemeka Kilishitu kupichila mu kukookela lutangijilo lwa banabalume bo atongola kwibatangijila. Banyenga bavula baswa byambo byaambile nyenga wa jizhina ja Marley, wikala ku United States. Waambile’mba: “Nanemeka bingi mingilo yami byo nji mwanamukazhi wasongolwa kabiji nyenga mu kipwilo. Ñingila na ngovu pa kuba’mba ntwajijile kunemeka luusa Yehoba lo apa bamwatawami ne bakulumpe mu kipwilo. Bino bamwatawami ne balongo mu kipwilo bandengela kuba’mba kimpeelele kuba bino, mambo bannemeka ne kusanchila pa mingilo yo ñingila.”
16 Balongo bamwesha’mba bayuka lunengezho lwa bumutwe kupichila mu kunemeka banyenga ne kwibapa mushingi. Mulongo wikala ku England wa jizhina ja Benjamin waambile’mba: “Nafunjilako byavula bingi ku mikumbu yamba banyenga pa kupwila ne mashinda o bengijisha pa kufunda ne kwingila bulongo mwingilo wa kusapwila. Mingilo yo bengila yanema bingi.”
17. Mambo ka o twafwainwa kunemekela lunengezho lwa bumutwe?
17 Inge bonse mu kipwilo, ko kuba’mba banabalume, banabakazhi, mitwe ya bisemi, ne bakulumpe mu kipwilo bayuka ne kunemeka lunengezho lwa bumutwe, kipwilo kikekala mu mutende. Kabiji kyakilamo kunema, tukaletanga lutotelo kwi Shetu wa butemwe aye Yehoba.—Sala. 150:6.
LWIMBO 123 Tukookelenga Lesa mu Bukishinka
^ jifu. 5 Ñanyi mwingilo Yehoba ye apa banyenga mu kipwilo? Nanchi mulongo yense mu kipwilo mutwe wa banyenga bonse nyi? Nanchi bakulumpe mu kipwilo ne mitwe ya bisemi bebapa luusa lumotu nyi? Mu uno mutwe, tusakumona Baibolo byo asakwitukwasha kukumbula ano mepuzho.
^ jifu. 5 Monai jifuka 6 mu mutwe wa kuba’mba “Tundaikainga Banabakazhi Bena Kilishitu,” mu Kyamba kya Usopa kya September 2020.
^ jifu. 9 Monai kakitenguluzha ka kuba’mba “ Ñanyi Kimye Nyenga kyo Afwainwa Kuvwala Kitambala?”
^ jifu. 13 Pa kuba’mba muyuke uji na luusa lwa kusala kipwilo kyafwainwa kupwilangamo kisemi, monai mafuka 17-19 mu mutwe wa kuba’mba “Nemekainga Kifulo kya Bakwenu mu Kipwilo kya Yehoba,” mu Kyamba kya Usopa kya August 2020.
^ jifu. 56 Kino kibena kulumbulula’mba nyenga wafwainwa kuvwala kitambala inge mulongo wabatizhiwa nangwa mwatawanji uji pepi nangwa ubena kwibamona ne kumvwa byo babena kwamba.
^ jifu. 59 Pa kuba’mba muyukilepo byavula pa uno mutwe, monai buku wa kuba’mba “Ikalai mu Butemwe bwa Lesa,” ma. 209-212.
^ jifu. 65 Pa kuba’mba muyukilepo byavula pa mwingilo wa Jibumba Jitangijila, monai Kyamba kya Usopa kya July 15, 2013, ma. 20-25.
