1. Konda musinke zimwe zeyi epata lyaJehova lya karera mouumwe?

TUNA HAFA sili kweyi twa hamena kepata lyaJehova. Morwasinke epata lyetu lya karera mombili nomouumwe? Morwa natuvenye kurugana paapa twa hulira yipo tu fumadeke ava ga pa Jehova upangeli. Nsene tu kwata egano ewapaiko eli lyoupangeli, ngatu kara mouumwe.

2. Mapuro musinke natu ka konakona mosirongwa esi?

² Mosirongwa esi tatu ka konakona ogu wa tumbukira upangeli mombungakriste. Ntani tatu ka limburura mapuro aga gana kukwama ko: Yirugana musinke ava rugana vanavazinyetu wovakadi? Ayo usili asi nkenye munazinyetugara mupangeli gwankenye munazinyetukadi ndi? Upangeli wovakuronambunga wa lifana nou wovanturagumbo ndi? Pomuhowo, tu zogereni kuhamena omu natu tekura vanavazinyetu wovakadi.

3. Yisinke nayi tu vatera tu dimburure mulyo goyirugana eyi ava rugana vanavazinyetu wovakadi?

³ Ose kupandura sili vanavazinyetu wovakadi kweyi ava rugana unene momapata gawo nokuzuvhisa mbudi zongwa ntani nokuvatera wopeke mombungakriste. Nsene tu va tara ngwendi moomu Jehova naJesus ava va tara, ose ngatu va mona asi awo mulyo unene. Mosirongwa esi tatu ka lironga hena omu natu tekura vanavazinyetu wovakadi ngwendi moomu mupositoli Paurusa ga tekwire vakadi.

4. Ngapi omu Bibeli azi likida asi Jehova kutara vakadi novagara asi navenye mulyo?

 ⁴ Bibeli kulikida asi Jehova kutara vakadi novagara asi navenye mulyo. Azo kutanta asi Jehova kwa geve mpepo zokupongoka kovakadi novagara yipo va rugane yitetu, ngwendi pokuuyunga maraka gokulisiga-siga. (Yirug. 2:1-4, 15-18) Navenye kwa va gwaveka nompepo zokupongoka yipo ngava ka pangere naKristusa. (Gar. 3:26-29) Vakadi novagara ngava ka gwana mwenyo gwanarunye pevhu. (Ehor. 7:9, 10, 13-15) Ntani yi kare asi vakadi ndi vagara, navenye kwa va pa sirugana sokuzuvhisa nokuronga mbudi zongwa. (Mat. 28:19, 20) Mobuke zoYirugana kwa tumbura mo mukadi gedina Pilisikira. Nage namugara gwendi Akura kwa zuvhisilire Aporo mugara ogu ga lirongere unene.—Yirug. 18:24-26.

5. Ngapi omu etjangwa lyaRukasa 10:38, 39, 42 ali likida asi Jesus kwa fumadekere vakadi?

⁵ Jesus kwa fumadekere vakadi. Age kapi nga honene Vafalisayi ava ngava tara vakadi asi kwato mulyo. Awo kapi ngava uyunga novakadi mokatji kovantu ntani kapi ngava uyunga nawo yomoMatjangwa. Nye Jesus nga zogere yininke yomoMatjangwa novantu navenye kukwatera mo vakadi. * (Resa Rukasa 10:38, 39, 42.) Jesus ngazi hena novakadi mokuzuvhisa. (Ruk. 8:1-3) Ntani Jesus kwa tanterere vakadi mbudi yipo va ka divise vapositoli vendi asi ana vhumbuka.—Joh. 20:16-18.

6. Ngapi omu mupositoli Paurusa ga yi likidire asi ga fumadekere vakadi?

⁶ Mupositoli Paurusa kwa diworokesere Timoteusa a fumadeke vakadi. Age kwa mu tanterere a tekure ‘vakadi wokukurupa ngwendi ozina,’ ano ‘ava wovasesu mo ngwendi vampanza vendi.’ (1 Tim. 5:1, 2) Nampili ngomu Paurusa ga vaterere unene Timoteusa a kare nepuro lyokupama, nye Paurusa ga yi divire hena asi ozina vaTimoteusa nozinakuru yiwo va mu rongere “matjangwa gokupongoka” kutundilira unona wendi. (2 Tim. 1:5; 3:14, 15) Paurusa kwa tumbwire vanavazinyetu wovakadi mombilive ezi ga tjangerere Varoma. Age ga dimbwilire yirugana eyi ngava rugana vanavazinyetu wovakadi ntani ga va pandwire.—Rom. 16:1-4, 6, 12; Fil. 4:3.

7. Mapuro musinke natu ka zogera ngesi?

⁷ Ngomu tuna yi zogere monoparagarafu dina ka pita, Matjangwa kapi aga likida asi vanavazinyetu wovakadi mulyo gwawo musesu mokuvahetakanesa novagara. Vanavazinyetu wovakadi kuvatera unene mbungakriste ntani vakuronambunga va yi diva asi yirugana yawo kuvatera mbungakriste zi kare mombili nomouumwe. Nye twa hepa simpe kugwana malimbururo komapuro aga gana kukwama ko. Morwasinke Jehova ga harera vanavazinyetu wovakadi va ture ko yuma komutwe poyiruwo yimwe? Mokumona asi vanavazinyetu wovagara yiwo velike ava tura va kare vakuronambunga novakwafimbunga, eyi ngesi kutanta nye asi vanavazinyetugara navenye kuna kara vapangeli wovanavazinyetukadi navenye ava va kara mombungakriste ndi?

8. Kuliza noVaefeso 5:23, nkenye munazinyetugara mupangeli gwankenye munazinyetukadi ndi? Faturura.

⁸ Nkenye munazinyetugara mupangeli gwankenye munazinyetukadi ndi? Hawe. (Resa Vaefeso 5:23.) Mepata, nturagumbo yige a kara mupangeli gwamukadendi. Munona gomumati ogu va kuhwa kapisi yige mupangeli gozina. (Efe. 6:1, 2) Mombungakriste,  vakuronambunga kwa kara tupu nononkondo dononsesu kovanavazinyetu. (1 Tes. 5:12; Heb. 13:17) Ngapi kuhamena munazinyetukadi gomudike ogu ga dira kutunga novakondi vendi? Age kapi ga kara mepangero lyoguhwe nye ga hepa kufumadeka vakondi vendi. Ntani age kufumadeka vakuronambunga, nye Jesus yige gelike mupangeli gwendi.

9. Morwasinke vanavazinyetu wovakadi va hepera kutura ko yuma komutwe poyiruwo yimwe?

⁹ Jehova kwa gava situmbukira sokupitisira nokuronga mombungakriste kovagara ava ga horowora, nye situmbukira esi kapi ga si pa vakadi. (1 Tim. 2:12) Morwasinke? Eyi kwa yi ruganena yipo mombungakriste mu dire kukara epiyagano ngwendi moomu tupu ga yi rugana Jehova pokuhorowora Jesus a kare mupangeli gomugara. Nsene asi ukaro una litjindji, munazinyetukadi kuvhura a rugane sirugana esi sa tumbukira munazinyetugara, nye Jehova kwa harera munazinyetukadi va ture ko yuma komutwe. * (1 Kol. 11:4-7) Jehova kwa harera vanavazinyetukadi va yi rugane ngoso mokufumadeka upangeli wendi, nye kapi ayi tanta asi awo kwato mulyo. Ngesi tatu ka limburura epuro eli asi situmbukira musinke va kara naso vanturagumbo novakuronambunga?

10. Yisinke ayi ninkisa vakuronambunga poyiruwo yimwe va hare kutura po noveta mombungakriste?

¹⁰ Vakuronambunga va hara Kristusa ntani va hara ‘nonzwi’ edi ga va pa Jehova naJesus yipo va di takamese. (Joh. 21:15-17) Mokumona asi mukuronambunga kupakera mbili mbungakriste, age kuvhura a gazare asi age kwa fana ngwendi guhya kwava  va kara mombungakriste. Age kuvhura a gazare asi nsene asi nturagumbo ga kara nononkondo dokutura po noveta mepata lyendi, mukuronambunga nage kuvhura a ture po noveta edi ana kugazara asi kuvhura di popere nonzwi daKarunga. Ano vanavazinyetu vamwe kuvhura kupura vakuronambunga va kare ngwendi mupangeli gwawo pokuvatulira po matokoro. Nye upangeli wovakuronambunga wa li fana nou wovanturagumbo ndi?

11. Ngapi omu situmbukira esi va kara naso vanturagumbo sa lifana nesi sovakuronambunga?

¹¹ Mupositoli Paurusa kwa yi likidire asi pwa kara yininke yimwe eyi ya lifana pokatji koupangeli wovanturagumbo ntani wovakuronambunga. (1 Tim. 3:4, 5) Pasihonena, Jehova ana hara vemepata va limburukwe nturagumbo. (Koros. 3:20) Ntani ana hara ava va kara mombungakriste va limburukwe vakuronambunga. Jehova kuna kundindira ko kovanturagumbo va vatere vemepata lyawo pampepo ano vakuronambunga nawo va vatere womombungakriste pampepo. Ntani va hepa kuvavatera monkedi ezi nava lizuvha asi va va hara. Vakuronambunga kuvatera womombungakriste ava ava ligwanekere nomaudigu ngwendi moomu tupu vanturagumbo wovawa ava vatere vemepata lyawo. (Jak. 2:15-17) Jehova kundindira ko kovakuronambunga novanturagumbo va vatere wopeke va sikise mo  nompango dendi. Nye age kuvarondora hena asi: “Walye omu pitakanesa pweyi va tjanga” moBibeli.—1 Kol. 4:6.

12-13. Ngomu va yi likida moVaroma 7:2, elisigo musinke lya kara po pokatji kositumbukira sovanturagumbo nesi sovakuronambunga?

¹² Nye pwa kara malisigo pokatji kositumbukira sovakuronambunga nesi sovanturagumbo. Pasihonena, Jehova kwa pa vakuronambunga situmbukira sokupangura nokugusa mombunga vananzo wokudira kulitezurura.—1 Kol. 5:11-13.

¹³ Nye nampili ngoso, Jehova kwa gava nonkondo kovanturagumbo edi ga dira kupa vakuronambunga. Pasihonena, age kwa pa vanturagumbo nonkondo dokutura po noveta mepata nokudivilisa asi kuna kudisikisa mo. (Resa Varoma 7:2.) Pasihonena, nturagumbo ga kara nononkondo dokutura po vili ezi na va ya sika vana vendi membo masiku. Age hena ga kara nononkondo dokupisura vana vendi nsene kapi vana kulimburukwa. (Efe. 6:1) Nye nampili ngoso, nturagumbo gomuwa kuzogera namukadendi komeho a ture po matokoro mepata morwa awo “rutu rumwe tupu.” *—Mat. 19:6.

14. (a) Kuliza naMarukusa 10:45, yisinke yina kulikida asi Jesus ya mu fira kweyi ga kara mutwe gombungakriste? (b) Situmbukira musinke va kara naso womoMbungagendesi? (Tara kakende “ Situmbukira soMbungagendesi.”)

¹⁴ Kupitira mosizoweseso, Jehova kwa zowora eparu lyanavenye womombungakriste ntani novantu navenye ava ava tura epuro mwaJesus. (Resa Marukusa 10:45; Yirug. 20:28; 1 Kol. 15:21, 22) Yipo nye, Jesus ya mu  fira mokukara mutwe gombungakriste morwa kwa tu fililire. Mokumona asi Jesus mupangeli gwetu, age ga kara nononkondo dokututulira po noveta natuvenye yi kare asi mepata ndi mombungakriste. Ntani ga kara nononkondo mokudivilisa nsene asi noveta odo kuna kudisikisa mo. (Gar. 6:2) Nye yinzi a rugana Jesus kupitakana tupu kututulira po noveta. Age kutupakera mbili ntani ga tu hara.—Efe. 5:29.

15-16. Yisinke ono lirongere ko kononkango damunazinyetu Marley naBenjamin?

¹⁵ Vanavazinyetu wovakadi kuyilikida asi va fumadeka Kristusa apa ava kwama mavyukiso gokutunda kovagara ava ga pa Jehova upangeli. Vanavazinyetu wovakadi wovanzi kukwatesa ko nonkango edi ga uyunga munazinyetu gomukadi Marley ogu ga tunga moAmerika. Age kwa tanta asi: “Ame kuhafera situmbukira esi na kara naso ngomugolikadi ntani kweyi na hamena kombungakriste. Ame kurugana unene ni fumadeke upangeli ou ga gava Jehova kwamugara gwange novakuronambunga. Mugara gwange novanavazinyetu wovagara kuvatera nge yipo yi karere nge ureru kuyirugana morwa awo kufumadeka nge ntani kuhafera yirugana yange.”

¹⁶ Vanavazinyetu wovagara kuyilikida asi va kwata egano upangeli apa ava fumadeke vanavazinyetukadi. Munazinyetu gomugara Benjamin ogu ga tunga moIngiranda kwa tanta asi: “Ame na lirongera ko yoyinzi komalimbururo aga ava gava vanavazinyetu wovakadi mepongo ntani komagano gawo gokuhamena omu natu lironga nomu natu zuvhisa monkedi zongwa. Yirugana eyi ava rugana mulyo unene.”

17. Morwasinke natu fumadekera upangeli ou ga tura po Jehova?

¹⁷ Nsene vantu navenye womombungakriste va fumadeka nokukwata egano upangeli, mbungakriste ngazi kara mouumwe. Nye unene po ose ngatu twikira kuhamberera Guhyetu gemeguru, Jehova.—Epis. 150:6.