ບົດຄວາມສຶກສາທີ 7

ການເຂົ້າໃຈເລື່ອງສິດອຳນາດໃນປະຊາຄົມ

ເປີດ

“ພະຄລິດເປັນຜູ້ນຳຂອງປະຊາຄົມ ປະຊາຄົມເປັນຮ່າງກາຍຂອງພະຄລິດທີ່ເພິ່ນຊ່ວຍໃຫ້ລອດ.”—ອຟຊ. 5:23.

ເພງ 137 ພີ່ນ້ອງຍິງທີ່ສັດຊື່

ໃຈຄວາມສຳຄັນ *

1. ເປັນຫຍັງປະຊາຊົນຂອງພະເຢໂຫວາເປັນນ້ຳໜຶ່ງໃຈດຽວກັນ?

ເຮົາມີຄວາມສຸກທີ່ໄດ້ເປັນປະຊາຊົນຂອງພະເຢໂຫວາ. ເປັນຫຍັງປະຊາຊົນຂອງພະເຢໂຫວາຈຶ່ງມີສັນຕິສຸກແລະເປັນນ້ຳໜຶ່ງໃຈດຽວກັນ? ເຫດຜົນໜຶ່ງກໍຄື ເຮົາທຸກຄົນພະຍາຍາມເຮັດຕາມຫຼັກການຂອງພະເຢໂຫວາເລື່ອງສິດອຳນາດ. ດັ່ງນັ້ນ ຖ້າເຮົາເຂົ້າໃຈແຈ້ງຂຶ້ນກ່ຽວກັບຫຼັກການເລື່ອງສິດອຳນາດ ເຮົາກໍແຮ່ງຈະເປັນນ້ຳໜຶ່ງໃຈດຽວກັນຫຼາຍຂຶ້ນ.

2. ໃນບົດຄວາມນີ້ເຮົາຈະຕອບຄຳຖາມຫຍັງແດ່?

²ໃນບົດຄວາມນີ້ເຮົາຈະມາຮຽນຮູ້ວ່າ ການນັບຖືສິດອຳນາດໃນປະຊາຄົມໝາຍຄວາມວ່າແນວໃດ. ແລະເຮົາຈະມາຕອບຄຳຖາມຕໍ່ໄປນີ້: ພີ່ນ້ອງຍິງມີໜ້າທີ່ຮັບຜິດຊອບຫຍັງ? ແມ່ນແທ້ບໍທີ່ພີ່ນ້ອງຊາຍທຸກຄົນເປັນຜູ້ນຳຂອງພີ່ນ້ອງຍິງ? ຜູ້ດູແລໃນປະຊາຄົມມີສິດອຳນາດເໜືອພີ່ນ້ອງຍິງແລະພີ່ນ້ອງຊາຍຄືກັນກັບຫົວໜ້າຄອບຄົວມີສິດອຳນາດເໜືອເມຍແລະລູກບໍ? ທຳອິດໃຫ້ເຮົາມາເບິ່ງກ່ອນວ່າ ເຮົາຄວນເບິ່ງພີ່ນ້ອງຍິງໃນປະຊາຄົມແບບໃດ.

ເຮົາຄວນເບິ່ງພີ່ນ້ອງຍິງແບບໃດ?

3. ເຮົາຈະຮູ້ຄຸນຄ່າວຽກຂອງພີ່ນ້ອງຍິງຫຼາຍຂຶ້ນໄດ້ແນວໃດ?

³ເຮົາເຫັນຄຸນຄ່າພີ່ນ້ອງຍິງທີ່ເຮັດວຽກຫຼາຍຢ່າງໃນການເບິ່ງແຍງຄອບຄົວ ເຮັດວຽກປະກາດ ແລະເຮັດວຽກອື່ນທີ່ຊ່ອຍປະຊາຄົມ. ເຮົາຈະເຫັນຄ່າພີ່ນ້ອງຍິງຫຼາຍຂຶ້ນເມື່ອເຮົາເບິ່ງເຂົາເຈົ້າໃນແບບທີ່ພະເຢໂຫວາແລະພະເຢຊູເບິ່ງ. ແລະເຮົາຍັງຈະໄດ້ຮັບປະໂຫຍດຈາກວິທີທີ່ໂປໂລປະຕິບັດກັບຜູ້ຍິງ.

4. ຄຳພີໄບເບິນສະແດງໃຫ້ເຫັນແນວໃດວ່າ ພະເຢໂຫວາຖືວ່າຜູ້ຍິງກັບຜູ້ຊາຍມີຄ່າເທົ່າກັນ?

⁴ຄຳພີໄບເບິນສະແດງໃຫ້ເຫັນວ່າພະເຢໂຫວາເຫັນຄ່າຜູ້ຍິງເທົ່າກັນກັບຜູ້ຊາຍ. ໃນສະຕະວັດທຳອິດພະເຢໂຫວາໄດ້ໃຫ້ພະລັງບໍລິສຸດກັບຜູ້ຍິງແລະຜູ້ຊາຍ ແລະຊ່ອຍເຂົາເຈົ້າໃຫ້ເຮັດການອັດສະຈັນເຊັ່ນ ເວົ້າພາສາຕ່າງໆໄດ້. (ກຈກ. 2:1-4, 15-18) ທັງຜູ້ຍິງກັບຜູ້ຊາຍກໍຖືກເຈີມດ້ວຍພະລັງບໍລິສຸດເພື່ອຈະຮ່ວມປົກຄອງກັບພະຄລິດ. (ຄລຕ. 3:26-29) ແລະທັງຜູ້ຍິງກັບຜູ້ຊາຍກໍຈະໄດ້ຊີວິດຕະຫຼອດໄປຢູ່ໃນໂລກຄືກັນ. (ພນມ. 7:9, 10, 13-15) ແລະທັງຜູ້ຍິງກັບຜູ້ຊາຍກໍເຮັດວຽກປະກາດແລະສອນຄົນໃຫ້ເຂົ້າມາເປັນລູກສິດຄືກັນ. (ມທ. 28:19, 20) ທີ່ຈິງໃນປຶ້ມກິດຈະການກໍໄດ້ບອກວ່າ ພີ່ນ້ອງຍິງທີ່ຊື່ປີຊະກີລາໄດ້ເຮັດວຽກຮ່ວມກັບອາກີລາໃນການສອນອາໂປໂລຜູ້ທີ່ມີການສຶກສາສູງໃຫ້ເຂົ້າໃຈຄວາມຈິງໃນຄຳພີໄບເບິນຫຼາຍຂຶ້ນ.—ກຈກ. 18:24-26

5. ໃນລູກາ 10:38, 39, 42 ສະແດງໃຫ້ເຫັນແນວໃດວ່າພະເຢຊູໃຫ້ກຽດຜູ້ຍິງ?

⁵ພະເຢຊູໃຫ້ກຽດຜູ້ຍິງ. ເພິ່ນບໍ່ໄດ້ເຮັດຄືກັບພວກຟາຣິຊາຍທີ່ເບິ່ງວ່າຜູ້ຍິງຕ່ຳຕ້ອຍ ແລະເຖິງຂັ້ນວ່າບໍ່ລົມກັບຜູ້ຍິງໃນບ່ອນສາທາລະນະ ແລະບໍ່ລົມເລື່ອງຄຳພີໄບເບິນກັບເຂົາເຈົ້າ. ແທນທີ່ຈະເຮັດແບບນັ້ນພະເຢຊູກໍໄດ້ສອນຄວາມຈິງທີ່ເລິກເຊິ່ງໃຫ້ທັງຜູ້ຍິງແລະຜູ້ຊາຍ. * (ອ່ານລູກາ 10:38, 39, 42) ແລະເພິ່ນຍັງໃຫ້ຜູ້ຍິງຮ່ວມເດີນທາງໃນວຽກປະກາດນຳ. (ລກ. 8:1-3) ນອກຈາກນັ້ນ ພະເຢຊູຍັງໃຫ້ກຽດຜູ້ຍິງທີ່ຈະໄປບອກອັກຄະສາວົກຄົນອື່ນໆວ່າເພິ່ນຄືນມາຈາກຕາຍແລ້ວ.—ຢຮ. 20:16-18

6. ໂປໂລສະແດງໃຫ້ເຫັນແນວໃດວ່າລາວໃຫ້ກຽດຜູ້ຍິງ?

⁶ອັກຄະສາວົກໂປໂລໄດ້ເຕືອນຕີໂມທຽວວ່າຕ້ອງໃຫ້ກຽດຜູ້ຍິງ. ລາວບອກຕີໂມທຽວໃຫ້ປະຕິບັດກັບ “ຜູ້ຍິງສູງອາຍຸຄືກັບແມ່ ແລະປະຕິບັດກັບຍິງສາວຄືກັບເອື້ອຍແລະນ້ອງສາວ.” (1 ຕມ. 5:1, 2) ໂປໂລໄດ້ພະຍາຍາມຊ່ອຍຕີໂມທຽວໃຫ້ມີຄວາມເຊື່ອທີ່ເຂັ້ມແຂງ ແຕ່ລາວກໍຮູ້ວ່າແມ່ແລະແມ່ຕູ້ຂອງຕີໂມທຽວໄດ້ຊ່ອຍສອນຕີໂມທຽວໃຫ້ມີຄວາມເຊື່ອກ່ອນໜ້ານັ້ນແລ້ວ. (2 ຕມ. 1:5; 3:14, 15) ຕອນທີ່ໂປໂລຂຽນຈົດໝາຍຫາພີ່ນ້ອງໃນເມືອງໂຣມ ລາວໄດ້ເວົ້າເຖິງຊື່ຂອງພີ່ນ້ອງຍິງຫຼາຍຄົນແລະທັກທາຍເຂົາເຈົ້າ. ລາວບໍ່ພຽງແຕ່ເວົ້າເຖິງວຽກທີ່ພີ່ນ້ອງເຮັດ ແຕ່ລາວຍັງໄດ້ບອກວ່າລາວເຫັນຄ່າວຽກທີ່ເຂົາເຈົ້າເຮັດນຳ.—ຣມ. 16:1-4, 6, 12; ຟລປ. 4:3

7. ຕອນນີ້ເຮົາຈະມາຕອບຄຳຖາມຫຍັງ?

⁷ຂໍ້ຕ່າງໆທີ່ເຮົາໄດ້ຮຽນກ່ອນໜ້ານີ້ສະແດງໃຫ້ເຫັນວ່າ ຄຳພີໄບເບິນບໍ່ໄດ້ບອກວ່າຜູ້ຍິງຕ່ຳຕ້ອຍກວ່າຜູ້ຊາຍ. ພີ່ນ້ອງຍິງຊ່ອຍປະຊາຄົມໄດ້ຫຼາຍແທ້ໆ ແລະຜູ້ດູແລກໍຢາກໃຫ້ເຂົາເຈົ້າຊ່ອຍປະຊາຄົມໃຫ້ມີສັນຕິສຸກແລະເປັນນ້ຳໜຶ່ງໃຈດຽວກັນ. ແຕ່ເຮົາອາດຢາກຮູ້ວ່າ ເປັນຫຍັງພະເຢໂຫວາຈຶ່ງຢາກໃຫ້ພີ່ນ້ອງຍິງປົກຫົວໃນບາງເທື່ອ. ແລະເນື່ອງຈາກວ່າມີແຕ່ພີ່ນ້ອງຊາຍເທົ່ານັ້ນທີ່ຖືກແຕ່ງຕັ້ງໃຫ້ເປັນຜູ້ດູແລແລະຜູ້ຊ່ວຍວຽກຮັບໃຊ້ ນັ້ນໝາຍຄວາມວ່າພີ່ນ້ອງຊາຍທຸກຄົນເປັນຜູ້ນຳຂອງຜູ້ຍິງໃນປະຊາຄົມບໍ?

ພີ່ນ້ອງຊາຍທຸກຄົນເປັນຜູ້ນຳຂອງພີ່ນ້ອງຍິງບໍ?

8. ຕາມເອເຟໂຊ 5:23 ພີ່ນ້ອງຊາຍທຸກຄົນເປັນຜູ້ນຳຂອງພີ່ນ້ອງຜູ້ຍິງບໍ? ຂໍໃຫ້ອະທິບາຍ.

⁸ພີ່ນ້ອງຊາຍທຸກຄົນເປັນຜູ້ນຳຂອງພີ່ນ້ອງຍິງບໍ? ບໍ່. ເພາະຜູ້ນຳຂອງຜູ້ຍິງທຸກຄົນໃນປະຊາຄົມຄືພະເຢຊູ. (ອ່ານເອເຟໂຊ 5:23) ໃນຄອບຄົວ ຜົວເປັນຜູ້ນຳຂອງເມຍ ແຕ່ລູກຊາຍທີ່ຮັບບັບເຕມາແລ້ວບໍ່ໄດ້ເປັນຜູ້ນຳຂອງແມ່. (ອຟຊ. 6:1, 2) ແລະໃນປະຊາຄົມ ຜູ້ດູແລກໍມີສິດອຳນາດເໜືອພີ່ນ້ອງຍິງແລະພີ່ນ້ອງຊາຍໃນລະດັບໜຶ່ງເທົ່ານັ້ນ. (1 ທຊ. 5:12; ຮຣ. 13:17) ພີ່ນ້ອງຍິງທີ່ເປັນໂສດເຊິ່ງບໍ່ໄດ້ຢູ່ນຳພໍ່ແມ່ກໍຍັງເຄົາລົບນັບຖືພໍ່ແມ່ແລະຜູ້ດູແລ ແຕ່ຄ້າຍຄືກັບຜູ້ຊາຍເຂົາເຈົ້າກໍມີຜູ້ນຳພຽງຜູ້ດຽວເຊິ່ງກໍຄືພະເຢຊູ.

ພະເຢຊູເປັນຜູ້ນຳຂອງຄົນໂສດທີ່ບໍ່ໄດ້ຢູ່ນຳພໍ່ແມ່. (ເບິ່ງຂໍ້ 8)

9. ເປັນຫຍັງບາງເທື່ອພີ່ນ້ອງຍິງຈຶ່ງຕ້ອງປົກຫົວ?

⁹ທີ່ຈິງພະເຢໂຫວາໄດ້ແຕ່ງຕັ້ງໃຫ້ພີ່ນ້ອງຊາຍນຳໜ້າໃນການສອນແລະການນະມັດສະການເພິ່ນ ແຕ່ບໍ່ໄດ້ໃຫ້ສິດຜູ້ຍິງທີ່ຈະເຮັດແບບນັ້ນ. (1 ຕມ. 2:12) ຍ້ອນຫຍັງ? ກໍຍ້ອນວ່າພະເຢໂຫວາເປັນຜູ້ເລືອກເພື່ອຈະໃຫ້ມີຄວາມເປັນລະບຽບຮຽບຮ້ອຍໃນປະຊາຄົມ ຄືກັບທີ່ໄດ້ເລືອກພະເຢຊູໃຫ້ເປັນຜູ້ນຳຂອງຜູ້ຊາຍ. ແຕ່ຖ້າກໍລະນີທີ່ພີ່ນ້ອງຍິງຕ້ອງເຮັດວຽກມອບໝາຍແທນພີ່ນ້ອງຊາຍ ພະເຢໂຫວາຕ້ອງການໃຫ້ລາວປົກຫົວ. * (1 ກຣ. 11:4-7) ພະເຢໂຫວາໃຫ້ພີ່ນ້ອງຍິງເຮັດແບບນັ້ນກໍເພື່ອສະແດງວ່າ ເຂົາເຈົ້ານັບຖືສິດອຳນາດຂອງຜູ້ທີ່ພະເຢໂຫວາແຕ່ງຕັ້ງ ບໍ່ແມ່ນຢາກເຮັດໃຫ້ເຂົາເຈົ້າຮູ້ສຶກວ່າຕົວເອງຕ່ຳຕ້ອຍ. ຄັນຊັ້ນຕອນນີ້ໃຫ້ເຮົາມາເບິ່ງວ່າ ຜູ້ດູແລມີສິດອຳນາດຄືກັບຫົວໜ້າຄອບຄົວບໍ?

ພີ່ນ້ອງຍິງຄວນປົກຫົວຕອນໃດ?

ເພື່ອຈະຮູ້ວ່າພີ່ນ້ອງຍິງຄວນປົກຫົວຫຼືບໍ່ ໃຫ້ມາຕອບສາມຄຳຖາມຕໍ່ໄປນີ້:

1. ຕອນທີ່ພີ່ນ້ອງຍິງອະທິດຖານຕາງໜ້າຄົນອື່ນຫຼືນຳການສຶກສາຄຳພີໄບເບິນ ມີພີ່ນ້ອງຊາຍທີ່ຮັບບັບເຕມາຢູ່ນຳບໍ?—1 ກຣ. 11:4, 5
2. ພີ່ນ້ອງຍິງຖືກຂໍໃຫ້ເຮັດວຽກມອບໝາຍຂອງພີ່ນ້ອງຊາຍຕອນທີ່ພີ່ນ້ອງຊາຍບໍ່ຢູ່ບໍ?—1 ຕມ. 2:11, 12; ຮຣ. 13:17
3. ພີ່ນ້ອງຍິງອະທິດຖານຫຼືນຳການສຶກສາຄຳພີໄບເບິນຕອນທີ່ຜົວຂອງລາວຢູ່ບໍ?—1 ກຣ. 11:3

ຖ້າພີ່ນ້ອງຍິງຕອບຄຳຖາມເຫຼົ່ານີ້ວ່າແມ່ນ ລາວກໍຄວນປົກຫົວ. ແຕ່ຖ້າຕອບຄຳຖາມເຫຼົ່ານີ້ວ່າບໍ່ ລາວກໍບໍ່ຈຳເປັນຕ້ອງປົກຫົວ. *

ສິດອຳນາດຂອງຜູ້ດູແລແລະຫົວໜ້າຄອບຄົວ

10. ເປັນຫຍັງບາງເທື່ອຜູ້ດູແລຈຶ່ງຢາກຕັ້ງກົດໃຫ້ພີ່ນ້ອງໃນປະຊາຄົມ?

¹⁰ຜູ້ດູແລຮັກພະເຢຊູແລະຮັກ “ແກະ” ທີ່ພະເຢໂຫວາແລະພະເຢຊູບອກໃຫ້ເບິ່ງແຍງ. (ຢຮ. 21:15-17) ຍ້ອນຜູ້ດູແລເປັນຜູ້ເບິ່ງແຍງພີ່ນ້ອງໃນປະຊາຄົມ ດັ່ງນັ້ນລາວອາດຈະຄິດວ່າຕົວເອງເປັນຄືກັບພໍ່ທີ່ຕ້ອງເບິ່ງແຍງລູກ. ຜູ້ດູແລອາດຈະຄິດວ່າ ຖ້າຫົວໜ້າຄອບຄົວມີສິດຕັ້ງກົດເພື່ອຈະປົກປ້ອງຄອບຄົວ ລາວກໍສາມາດຕັ້ງກົດເພື່ອຈະປົກປ້ອງຝູງແກະຂອງພະເຈົ້າ. ແລະພີ່ນ້ອງບາງຄົນກໍອາດມີສ່ວນເຮັດໃຫ້ຜູ້ດູແລຄິດແບບນີ້ໂດຍຂໍໃຫ້ຜູ້ດູແລຕັດສິນໃຈແທນເຂົາເຈົ້າ. ແຕ່ຜູ້ດູແລໃນປະຊາຄົມມີສິດອຳນາດຄືກັບຫົວໜ້າຄອບຄົວບໍ?

ຜູ້ດູແລຊ່ອຍພີ່ນ້ອງໃນປະຊາຄົມໃຫ້ມີຄວາມເຊື່ອທີ່ເຂັ້ມແຂງ ແລະສະແດງໃຫ້ເຫັນວ່າຮັກພີ່ນ້ອງ. ພະເຢໂຫວາໃຫ້ເຂົາເຈົ້າມີສິດທີ່ຈະໄລ່ຄົນທີ່ເຮັດຜິດຮ້າຍແຮງແລ້ວບໍ່ກັບໃຈອອກຈາກປະຊາຄົມ. (ເບິ່ງຂໍ້ 11-12)

11. ຜູ້ດູແລແລະຫົວໜ້າຄອບຄົວມີສິດອຳນາດທີ່ຄ້າຍຄືກັນແນວໃດ?

¹¹ສິ່ງທີ່ໂປໂລເວົ້າສະແດງໃຫ້ເຫັນວ່າ ສິດອຳນາດຂອງຜູ້ດູແລມີບາງຢ່າງທີ່ຄ້າຍຄື ກັບສິດອຳນາດຂອງຫົວໜ້າຄອບຄົວ. (1 ຕມ. 3:4, 5) ຕົວຢ່າງເຊັ່ນ: ພະເຢໂຫວາຢາກໃຫ້ສະມາຊິກໃນຄອບຄົວເຊື່ອຟັງຫົວໜ້າຄອບຄົວ. (ກລຊ. 3:20) ແລະພະເຢໂຫວາກໍຢາກໃຫ້ພີ່ນ້ອງໃນປະຊາຄົມເຊື່ອຟັງຜູ້ດູແລ. ພະເຢໂຫວາຕ້ອງການໃຫ້ຫົວໜ້າຄອບຄົວເບິ່ງແຍງຄົນໃນຄອບຄົວທາງດ້ານອາລົມຄວາມຮູ້ສຶກ ແລະຊ່ອຍເຂົາເຈົ້າໃຫ້ມີຄວາມເຊື່ອທີ່ເຂັ້ມແຂງ ແລະພະເຢໂຫວາກໍຢາກໃຫ້ຜູ້ດູແລຊ່ອຍພີ່ນ້ອງໃນປະຊາຄົມໃຫ້ມີຄວາມເຊື່ອທີ່ເຂັ້ມແຂງ ແລະສະແດງໃຫ້ເຫັນວ່າຮັກພີ່ນ້ອງຄືກັນ. ຄືກັບຫົວໜ້າຄອບຄົວ ຜູ້ດູແລກໍຕ້ອງຊ່ວຍເຫຼືອພີ່ນ້ອງໃນຍາມທີ່ເຂົາເຈົ້າລຳບາກ. (ຢກບ. 2:15-17) ນອກຈາກນັ້ນ ພະເຢໂຫວາຍັງຢາກໃຫ້ທັງຜູ້ດູແລແລະຫົວໜ້າຄອບຄົວຊ່ອຍຜູ້ທີ່ເຂົາເຈົ້າເບິ່ງແຍງໃຫ້ເຮັດຕາມຄຳສອນຂອງເພິ່ນ ແລະບໍ່ເຮັດ “ກາຍຂອບເຂດທີ່ຂຽນໄວ້” ໃນຄຳພີໄບເບິນ.—1 ກຣ. 4:6

ພະເຢໂຫວາໄດ້ມອບອຳນາດໃຫ້ຫົວໜ້າຄອບຄົວເປັນຜູ້ນຳ. ກ່ອນຕັດສິນໃຈ ຫົວໜ້າຄອບຄົວຕ້ອງປຶກສາກັບເມຍ. (ເບິ່ງຂໍ້ 13)

12-13. ຕາມໂຣມ 7:2 ຜູ້ດູແລແລະຫົວໜ້າຄອບຄົວມີສິດອຳນາດທີ່ຕ່າງກັນແນວໃດ?

¹²ແຕ່ສິດອຳນາດຂອງຜູ້ດູແລກໍຕ່າງກັນ ຫຼາຍກັບສິດອຳນາດຂອງຫົວໜ້າຄອບຄົວ. ຕົວຢ່າງເຊັ່ນ: ພະເຢໂຫວາໃຫ້ຜູ້ດູແລມີສິດທີ່ຈະຕັດສິນບັນຫາຕ່າງໆແລະຂັບໄລ່ຜູ້ທີ່ເຮັດຜິດຮ້າຍແຮງແລ້ວບໍ່ກັບໃຈອອກຈາກປະຊາຄົມ.—1 ກຣ. 5:11-13

¹³ແຕ່ພະເຢໂຫວາໄດ້ໃຫ້ຫົວໜ້າຄອບຄົວມີສິດອຳນາດທີ່ຕ່າງຈາກຜູ້ດູແລເຊັ່ນ: ລາວມີສິດຕັ້ງກົດແລະບອກໃຫ້ຄອບຄົວເຮັດຕາມກົດນັ້ນ. (ອ່ານໂຣມ 7:2) ຕົວຢ່າງ: ຫົວໜ້າຄອບຄົວມີສິດຕັ້ງກົດວ່າ ລູກຄວນກັບມາຮອດເຮືອນຕອນຈັກໂມງ. ແລະຖ້າວ່າລູກບໍ່ໄດ້ເຮັດຕາມກົດນັ້ນ ລາວກໍມີສິດທີ່ຈະລົງໂທດ. (ອຟຊ. 6:1) ແຕ່ຫົວໜ້າຄອບຄົວທີ່ດີຈະປຶກສາເມຍກ່ອນທີ່ຈະຕັ້ງກົດໃນເຮືອນເພາະເຂົາເຈົ້າເປັນ “ກາຍອັນດຽວກັນ.” *—ມທ. 19:6

ນັບຖືພະຄລິດທີ່ເປັນຜູ້ນຳຂອງປະຊາຄົມ

ພະເຢຊູຜູ້ທີ່ມີອຳນາດຮອງຈາກພະເຢໂຫວາຊີ້ນຳປະຊາຄົມຄລິດສະຕຽນ. (ເບິ່ງຂໍ້ 14)

14. (ກ) ຕາມມາຣະໂກ 10:45 ເປັນຫຍັງຈຶ່ງເໝາະສົມທີ່ພະເຢໂຫວາແຕ່ງຕັ້ງພະເຢຊູໃຫ້ເປັນຜູ້ນຳຂອງປະຊາຄົມ? (ຂ) ຄະນະກຳມະການປົກຄອງມີໜ້າທີ່ຮັບຜິດຊອບຫຍັງ? (ເບິ່ງຂອບ “ ໜ້າທີ່ຮັບຜິດຊອບຂອງຄະນະກຳມະການປົກຄອງ”)

¹⁴ພະເຢໂຫວາໄດ້ຊື້ເຮົາແຕ່ລະຄົນໃນປະຊາຄົມໂດຍຄ່າໄຖ່ຂອງພະເຢຊູ ລວມທັງຄົນອື່ນໆທີ່ສະແດງຄວາມເຊື່ອໃນພະເຢຊູນຳ. (ອ່ານມາຣະໂກ 10:45; ກຈກ. 20:28; 1 ກຣ. 15:21, 22) ດັ່ງນັ້ນຈຶ່ງເໝາະສົມທີ່ພະເຢໂຫວາແຕ່ງຕັ້ງພະເຢຊູໃຫ້ເປັນຜູ້ນຳຂອງປະຊາຄົມ ເພາະພະເຢຊູໄດ້ຕາຍແທນເຮົາ. ຍ້ອນພະເຢຊູເປັນຜູ້ນຳ ເພິ່ນຈຶ່ງມີສິດຕັ້ງກົດສຳລັບບຸກຄົນ ຄອບຄົວ ແລະປະຊາຄົມທັງໝົດວ່າຄວນເຮັດແນວໃດ. (ຄລຕ. 6:2) ແຕ່ພະເຢຊູບໍ່ພຽງແຕ່ຕັ້ງກົດເຫຼົ່ານັ້ນ ເພິ່ນຍັງໄດ້ເບິ່ງແຍງເຮົາແລະຮັກເຮົານຳ.—ອຟຊ. 5:29

ໜ້າທີ່ຮັບຜິດຊອບຂອງຄະນະກຳມະການປົກຄອງ

ສະມາຊິກຄະນະກຳມະການປົກຄອງບໍ່ແມ່ນນາຍທີ່ຈະຄວບຄຸມຄວາມເຊື່ອຂອງພີ່ນ້ອງ. (2 ກຣ. 1:24) ເຂົາເຈົ້າຮູ້ວ່າພະເຢຊູເປັນຜູ້ນຳຂອງປະຊາຄົມຄລິດສະຕຽນ ແລະເຂົາເຈົ້າກໍເຮັດຕາມຄຳເວົ້າຂອງພະເຢຊູທີ່ວ່າ: “ພວກເຈົ້າທຸກຄົນເປັນພີ່ນ້ອງກັນ.” (ມທ. 23:8) ໃນຂະນະດຽວກັນເຂົາເຈົ້າຮັກພີ່ນ້ອງຫຼາຍ ແລະພະຍາຍາມເຮັດທຸກສິ່ງເພື່ອຈະຊ່ວຍເຫຼືອພີ່ນ້ອງ. ພະເຢຊູໄດ້ຊີ້ນຳໃຫ້ຄະນະກຳມະການປົກຄອງໃຫ້ຄຳແນະນຳທີ່ເປັນປະໂຫຍດຕໍ່ປະຊາຊົນຂອງພະເຢໂຫວາທີ່ຢູ່ທົ່ວໂລກ. ເພື່ອຄວາມເປັນລະບຽບຮຽບຮ້ອຍ ຄະນະກຳມະການປົກຄອງເປັນຜູ້ແຕ່ງຕັ້ງຄະນະກຳມະການສາຂາ ແລະຜູ້ດູແລໝວດ. (ອຟຊ. 4:7-13) ຈາກນັ້ນ ຜູ້ດູແລໝວດກໍເປັນຜູ້ແຕ່ງຕັ້ງຜູ້ດູແລໃນປະຊາຄົມ. (ກຈກ. 14:23; ຕຕ. 1:5) ຄະນະກຳມະການປົກຄອງຍັງໄດ້ເຮັດສຸດຄວາມສາມາດໃນວຽກມອບໝາຍຂອງເຂົາເຈົ້າເພື່ອໃຫ້ພີ່ນ້ອງມີຄວາມຮູ້ທີ່ເສີມຄວາມເຊື່ອແລະມີຄຳສອນຈາກຄຳພີໄບເບິນ. ຄະນະກຳມະການປົກຄອງເຮັດແບບນີ້ຜ່ານທາງຈົດໝາຍ ຄຳແນະນຳ ປຶ້ມຕ່າງໆ ແລະລາຍການໂທລະທັດ JW ແລະຍັງມີໂຮງຮຽນຕ່າງໆ ການປະຊຸມປະຈຳປະຊາຄົມ ການປະຊຸມໝວດ ແລະການປະຊຸມພາກ. (ກຈກ. 15:22-35) ແລະເມື່ອເກີດໄພພິບັດທາງທຳມະຊາດຫຼືເຫດການອື່ນໆ ຄະນະກຳມະການປົກຄອງກໍຈະຕິດຕໍ່ຫາສາຂາທີ່ຢູ່ໃນເຂດນັ້ນທັນທີເພື່ອເຮັດໃຫ້ແນ່ໃຈວ່າພີ່ນ້ອງຈະໄດ້ຮັບການຊ່ວຍເຫຼືອຕາມຄວາມຈຳເປັນ. ນີ້ສະແດງໃຫ້ເຫັນວ່າຄະນະກຳມະການປົກຄອງຮັກພີ່ນ້ອງຫຼາຍແທ້ໆ! *

15-16. ເຮົາໄດ້ບົດຮຽນຫຍັງຈາກຄຳເວົ້າຂອງພີ່ນ້ອງມາຣີແລະພີ່ນ້ອງເບນຢາມິນ?

¹⁵ພີ່ນ້ອງຍິງສະແດງໃຫ້ເຫັນວ່ານັບຖືພະຄລິດໂດຍເຊື່ອຟັງຄຳແນະນຳຂອງພີ່ນ້ອງຊາຍທີ່ຖືກແຕ່ງຕັ້ງໃຫ້ເບິ່ງແຍງເຂົາເຈົ້າ. ພີ່ນ້ອງຍິງສ່ວນຫຼາຍເຫັນດີກັບຄຳເວົ້າຂອງມາລີທີ່ຢູ່ສະຫະລັດອາເມຣິກາທີ່ວ່າ: “ໃນຖານະທີ່ຂ້ອຍເປັນເມຍແລະເປັນພີ່ນ້ອງຍິງຄົນໜຶ່ງໃນປະຊາຄົມ ຂ້ອຍຖືວ່າໜ້າທີ່ຮັບຜິດຊອບທີ່ຂ້ອຍມີເປັນສິ່ງທີ່ສຳຄັນຫຼາຍ. ຂ້ອຍຕ້ອງພະຍາຍາມຫຼາຍແທ້ໆເພື່ອຈະນັບຖືສິດອຳນາດທີ່ພະເຢໂຫວາໃຫ້ຜົວແລະຜູ້ດູແລໃນປະຊາຄົມ. ແຕ່ວ່າຜົວແລະຜູ້ດູແລໃນປະຊາຄົມໄດ້ໃຫ້ກຽດຂ້ອຍແລະເຫັນຄ່າວຽກທີ່ຂ້ອຍເຮັດ. ດັ່ງນັ້ນ ມັນຈຶ່ງງ່າຍຂຶ້ນທີ່ຂ້ອຍຈະນັບຖືສິດອຳນາດຂອງເຂົາເຈົ້າ.”

¹⁶ພີ່ນ້ອງຊາຍສະແດງໃຫ້ເຫັນວ່າເຂົາເຈົ້າເຂົ້າໃຈເລື່ອງການນັບຖືສິດອຳນາດໂດຍໃຫ້ກຽດພີ່ນ້ອງຍິງ. ພີ່ນ້ອງຊາຍທີ່ຊື່ເບນຢາມິນຢູ່ປະເທດອັງກິດບອກວ່າ: “ຂ້ອຍໄດ້ບົດຮຽນຫຼາຍຢ່າງຈາກຄຳຄິດເຫັນຂອງພີ່ນ້ອງຍິງຢູ່ການປະຊຸມ ແລະສິ່ງທີ່ເຂົາເຈົ້າເວົ້າກ່ຽວກັບວິທີປັບປຸງການປະກາດແລະການສອນໃຫ້ດີຂຶ້ນ. ຂ້ອຍຖືວ່າວຽກທີ່ພີ່ນ້ອງຍິງເຮັດມີຄ່າຫຼາຍແທ້ໆ.”

17. ເປັນຫຍັງເຮົາຄວນນັບຖືຄຳສອນເລື່ອງການເປັນຜູ້ນຳ?

¹⁷ເມື່ອເຮົາທຸກຄົນໃນປະຊາຄົມບໍ່ວ່າຈະເປັນຜູ້ຍິງ ຜູ້ຊາຍ ຫົວໜ້າຄອບຄົວ ຫຼືຜູ້ດູແລເຂົ້າໃຈແລະນັບຖືຄຳສອນເລື່ອງການເປັນຜູ້ນຳ ປະຊາຄົມກໍຈະມີສັນຕິສຸກແທ້ໆ. ແລະທີ່ສຳຄັນທີ່ສຸດ ເຮົາຈະຍົກຍ້ອງພະເຢໂຫວາພໍ່ທີ່ຢູ່ໃນສະຫວັນ.—ເພງ. 150:6

ເພງ 123 ເຊື່ອຟັງກົດລະບຽບຂອງອົງການພະເຈົ້າຢ່າງພັກດີ

^ ຂໍ້ 5 ພີ່ນ້ອງຍິງມີໜ້າທີ່ຮັບຜິດຊອບຫຍັງໃນປະຊາຄົມ? ພີ່ນ້ອງຊາຍທຸກຄົນເປັນຜູ້ນຳຂອງພີ່ນ້ອງຍິງໃນປະຊາຄົມບໍ? ຜູ້ດູແລໃນປະຊາຄົມມີສິດອຳນາດຄືກັບຫົວໜ້າຄອບຄົວບໍ? ໃນບົດຄວາມນີ້ເຮົາຈະມາຮຽນເລື່ອງຂອງຄົນໃນຄຳພີໄບເບິນເພື່ອຈະຮູ້ຄຳຕອບເຫຼົ່ານີ້.

^ ຂໍ້ 5 ເບິ່ງຂໍ້ 6 ຂອງບົດຄວາມສຶກສາທີ່ຊື່ວ່າ “ໃຫ້ເອົາໃຈໃສ່ພີ່ນ້ອງຍິງ” ໃນຫໍສັງເກດການ ເດືອນກັນຍາ 2020.

^ ຂໍ້ 9 ເບິ່ງຂອບ “ ພີ່ນ້ອງຍິງຄວນປົກຫົວຕອນໃດ?”

^ ຂໍ້ 13 ສຳລັບຂໍ້ມູນເພີ່ມເຕີມເລື່ອງໃຜໃນຄອບຄົວຄວນຕັດສິນໃຈວ່າຄອບຄົວຈະຢູ່ປະຊາຄົມໃດ ໃຫ້ເບິ່ງຂໍ້ 17-19 ຂອງບົດຄວາມສຶກສາທີ່ຊື່ວ່າ “ນັບຖືຄົນອື່ນໃນປະຊາຄົມຂອງພະເຢໂຫວາ” ໃນຫໍສັງເກດການ ເດືອນສິງຫາ 2020.

^ ຂໍ້ 59 ສຳລັບຂໍ້ມູນເພີ່ມເຕີມກ່ຽວກັບເລື່ອງນີ້ໃຫ້ເບິ່ງປຶ້ມ “ຈົ່ງຮັກສາຕົວໄວ້ໃນຄວາມຮັກຂອງພະເຈົ້າ” ໜ້າ 209-211.

^ ຂໍ້ 64 ສຳລັບຂໍ້ມູນເພີ່ມເຕີມກ່ຽວກັບໜ້າທີ່ຮັບຜິດຊອບຂອງຄະນະກຳມະການປົກຄອງ ໃຫ້ເບິ່ງຫໍສັງເກດການ 15 ກໍລະກົດ 2013 ໜ້າ 20-25 (ພາສາໄທ)

ຫໍສັງເກດການສະບັບສຶກສາ