1. Achiel kuom gik momiyo jotich Jehova nigi winjruok kod kuwe e kindgi en ang’o?

WAMOR bedo e kind jotich Jehova. Ang’o momiyo wan-ga gi kuwe kod winjruok maber e kindwa? Achiel kuom gik momiyo en ni watemo luwo chenro mar wich ma Jehova oseketonwa. To kaka wamedo winjo tiend chenro mar wich kendo luwo chenrono, e kaka wamedo bedo gi kuwe kod winjruok e kindwa.

2. Gin penjo mage ma wadwaro nono dwokogi e sulani?

² E sulani, wabiro nono kaka chenro mar wich tiyo e kanyakla. Bende, wabiro nono dwoko mag penjo ma luwogi: Nyimine nigi migawo mane e kanyakla? Be owete duto gin wi nyimine duto e kanyakla? Be teko ma jodong-kanyakla nigo e tayo owete kod nyimine chalre gi teko momi dichwo e wi chiege gi nyithinde? Mokwongo, we wanon kaka onego wane nyimine.

3. Ang’o ma nyalo konyowa medo geno tije ma nyiminewa timo?

³ Wamor ahinya gi kinda ma nyiminewa timo e rito utegi, lando wach maber, kendo riwo kanyakla lwedo. Wanyalo medo nyiso ni wageno nyiminewa ahinya ka wanono yo ma Jehova kod Yesu nenogigo. Bende, wabiro yudo puonj ka wanono kaka Paulo ne neno mon.

4. Ere kaka Muma nyiso ni Jehova ogeno mon mana kaka ogeno chwo?

⁴ Muma nyisowa ni Jehova ogeno mon mana kaka ogeno chwo bende. Kuom ranyisi, Muma nyisowa ni e kinde Jokristo mokwongo, Jehova nomiyo mon kod chwo rohone maler ma nokonyogi timo honni kaka wuoyo e  dhok mopogore opogore. (Tich 2:1-4, 15-18) Mon gi chwo bende osewal gi roho maler mondo obi oloch gi Kristo. (Gal. 3:26-29) Joma biro yudo ngima e piny ka bende gin mon kod chwo. (Fwe. 7:9, 10, 13-15) Bende, osemi chwo gi mon migawo mar lando wach maber kendo loko ji obed jopuonjre Yesu. (Mat. 28:19, 20) Kuom ranyisi, bug Tich Joote wuoyo e wi nyaminwa moro miluongo ni Priskila kaachiel gi jaode miluongo ni Akula, ma nokonyo Apolo, jal ma nosomo ahinya winjo tiend Ndiko maler.​—Tich 18:24-26.

5. Bug Luka 10:38, 39, 42 fwenyonwa wach mane kuom paro ma Yesu ne nigo e wi mon?

⁵ Yesu nomiyo mon luor. Yesu ne ok oluwo kit Jo-Farisai ma ne ochayo mon. Jo-Farisai ne ok nyal wuoyo gi mon e lela, to moloyo e wi Ndiko. Yesu to nowuoyo gi mon e wi weche matut ma ni e Ndiko mana kaka notimo gi jopuonjrene mamoko. * (Som Luka 10:38, 39, 42.) Bende, nodhiga gi mon e tije mar yalo. (Luka 8:1-3) Kendo Yesu nomiyogi migawo makende mondo gidhi ginyis jootene ni osechiere.​—Joh. 20:16-18.

6. Ere kaka jaote Paulo nonyiso ni nomiyo mon luor?

⁶ Jaote Paulo nonyiso Timotheo achiel kachiel ni mondo omi mon luor. Paulo nonyise ni one ‘mon madongo kaka minene, to mon matindo kaka nyiminene.’ (1 Tim. 5:1, 2) Paulo notimo mathoth e konyo Timotheo mondo obed Jakristo motegno, kata kamano, pod nowacho ni da Timotheo gi min-gi e ma nokwongo konyo Timotheo mondo ong’e “ndiko maler.” (2 Tim. 1:5; 3:14, 15) Paulo noluongo nyimine gi nyingegi achiel kachiel e barua ma nondiko ne Jo-Rumi. Ne omor gi tich ma nyiminego notiyo, kendo nogoyonegi erokamano kuom kinda ma ne gin-go e tij Nyasaye.​—Rumi 16:1-4, 6, 12; Fil. 4:3.

7. Gin penjo mage ma koro wadwaro nono?

⁷ Mana kaka waseneno e paragraf mokalogo, onge kamoro amora ma Ndiko nyisoe ni owete nigi duong’ moloyo nyimine. Nyiminewa ma johera kendo ma jochiwo, omako kama duong’ e kanyakla, kendo jodongo mor gi kinda ma gitimo mondo gimi winjruok gi kuwe obed e kanyakla. Kata kamano, nitie penjo moko ma dwarore ni wayud dwoko maggi. Kuom ranyisi: Ang’o momiyo Jehova dwaro ni nyimine oum wigi sama gitimo migepe moko? Nikech owete e ma iketoga mondo obed jodong-kanyakla kod jokony-tich, be mano nyiso ni koro owete gin wi nyimine duto e kanyakla?

8. Ka luwore gi Jo-Efeso 5:23, be owete duto gin wi nyimine duto e kanyakla? Ler ane.

⁸ Dwoko ma achiel kachiel en, ooyo! Owadwa moro ok nyal bedo wi nyimine duto e kanyakla. Kristo e wi kanyakla. (Som Jo-Efeso 5:23.) E ot, dichwo e wi dhako. Nyathi ma wuoyi mosebatisi ok en wi min mare. (Efe. 6:1, 2) Kendo e kanyakla, teko ma jodongo nigo e wi nyimine gi owete nigi tong’. (1 The. 5:12; Hib. 13:17) Nyimine ma pok okendi ma ok odak gi jonyuolgi pod dhiga nyime miyo jonyuolgi kaachiel gi jodong-kanyakla luor. Kata kamano, Yesu e wi nyiminego mana kaka en e wi owete.

9. Ang’o momiyo seche moko dwarore ni nyaminwa oum wiye?

 ⁹ En adier ni Jehova osemiyo chwo ma ni e kanyakla migawo mar tayo weche mag lamo kod puonjo to migawono ok omiyo mon. (1 Tim. 2:12) Mano en nikech ang’o? En nikech wach achiel-achiel ma nomiyo oketo Yesu e wi dichwo, tiende ni, mondo gik moko otimre maber kiluwo chenro ma ni e kanyakla. Ka po ni chal moro ochuno nyaminwa moro mondo otim migawo monego obed ni itimo gi owadwa, Jehova dwaro ni nyaminwano oum wiye sama otimo migawono. * (1 Kor. 11:4-7) Timo kamano ok nyis ni Jehova ochayo mon, kar mano, en yo ma mon nyisogo ni gimiyo chenro mar wich luor. Ka koro wan gi wechego e paro, we wadwok ane penjoni: Jehova omiyo wiye udi gi jodong-kanyakla teko ma romo nade?

10. En ang’o ma nyalo miyo seche moko jaduong’ moro oket chike ma tayo kanyakla?

¹⁰ Jodong-kanyakla ohero Kristo, kendo gihero rombe ma Jehova gi Yesu oseketo e lwetgi mondo giriti. (Joh. 21:15-17) Jaduong’-kanyakla nyalo dewo joma ni e kanyakla ahinya, mopar ni koro ochalo wuon nyimine gi owete ma ni e kanyakla. Onyalo wacho kata ni, ‘Ka wi ot nigi ratiro mar keto chike mondo orit joode, donge jaduong’-kanyakla bende nyalo keto chike mondo orit rombe mag Nyasaye!’ Owete gi nyimine ma ni e kanyakla nyalo miyo jodongo opar kamano sama gikwayogi mondo gitimnegi  yiero. Kata kamano, be Jehova omiyo jodong-kanyakla kod wiye udi teko marom sama gitayo joma ni e bwogi?

11. Migawo ma wiye udi nigo kod ma jodong-kanyakla nigo chalre e yore mage?

¹¹ Jaote Paulo nonyiso ni nitie yo ma migawo ma wi ot nigo kod ma jaduong’-kanyakla nigo chalree. (1 Tim. 3:4, 5) Kuom ranyisi, Jehova dwaro ni joma ni e ot oluw kaka wi ot chikogi. (Kol. 3:20) Kendo odwaro ni joma ni e kanyakla oluw kaka jodongo chikogi. Jehova dwaro ni wiye udi kaachiel gi jodong-kanyakla one ni joma ni e bwogi oyudo chiemb chuny. Bende, jodong-kanyakla kod wiye udi temoga mondo joma nie bwogi one ni ohergi. Kendo mana kaka wi ot maber, jodong-kanyakla temoga matek mondo gine ni joma ni e bwogi oyudo kony e kinde ma gin gi chandruok. (Jak. 2:15-17) E wi mago, Jehova dwaro ni jodong-kanyakla kod wiye udi opuonj joma ni e bwogi chikege kendo ‘kik gikadh weche mondiki’ e Muma.​—1 Kor. 4:6.

12-13. Ka luwore gi Jo-Rumi 7:2, ere kaka migawo ma wiye udi kod ma jodong-kanyakla nigo opogore?

¹² Nitie bende pogruok moko madongo e wi ting’ ma jodong-kanyakla nigo kod  ma wiye udi nigo. Kuom ranyisi, Jehova oseketo jodong-kanyakla mondo obed jong’ad bura, kendo osemiyogi ting’ mar golo joricho motamore loko chunygi e kanyakla.​—1 Kor. 5:11-13.

¹³ Mopogore gi mano, Jehova osemiyo wiye udi teko ma ok omiyo jodongo. Kuom ranyisi, wi ot nigi ting’ mar keto chike ne joode kendo neno ni joode oluwo chikego. (Som Jo-Rumi 7:2.) Wi ot nyalo keto ne nyithinde chik e wi seche monego giduog ot. Bende, en gi ting’ mar miyo nyithinde kum ka po ni ok giluwo chikego. (Efe. 6:1) Dichwo ma jahera biro winjo pach chiege ka pok oketo chike ma tayo ode. Timo kamano en gima ber nikech dichwo gi dhako gin “ringruok achiel.” *​—Mat. 19:6.

14. (a) Ka luwore gi Mariko 10:45, ang’o momiyo en gima owinjore ni Jehova noketo Yesu e ma mondo obed wi kanyakla? (b) En ting’ mane ma Bura Matayo nigo? (Ne sanduk ma wiye wacho ni “ Ting’ ma Bura Matayo Nigo.”)

¹⁴ Kokalo kuom misango mar rawar, Jehova nong’iewo ji duto ma ni e kanyakla kod ng’ato ang’ata ma ne dhi keto yie kuom misangono. (Som Mariko 10:45; Tich 20:28; 1 Kor. 15:21, 22) Omiyo, en gima owinjore ni Jehova noyiero Yesu, jal ma nochiwo ngimane kaka rawar, mondo e ma obed wi kanyakla. Mano e momiyo Yesu e ma nigi ting’ mar keto chike ma tayo ng’ato ka ng’ato, ma tayo joot, kendo ma tayo kanyakla  duto. (Gal. 6:2) Kata kamano, Yesu ok ketga mana chike ma tayowa kende, to opidhowaga kendo ohero ng’ato ka ng’ato kuomwa.​—Efe. 5:29.

15-16. Ang’o mipuonjori kuom weche ma nyaminwa Marley kod owadwa Benjamin nowacho?

¹⁵ Nyimine nyiso ni gimiyo Kristo luor kuom luwo kaka chwo ma Kristo oketo tayogi. Nyaminwa miluongo ni Marley modak Amerka, wacho paro ma nyimine mang’eny nigo. Owacho kama: “Amor ahinya gi migawo ma an-go kaka dhako kendo bedo achiel kuom nyimine e kanyakla. Atemoga matek mondo abed gi paro mowinjore e wi chenro ma Jehova oseketo mar wich. Kendo kuom adier, jaoda kod owete ma ni e kanyakla osekonya timo kamano nikech gimiya luor kendo gimor gi gik ma atimo e kanyakla.”

¹⁶ Owete nyisoga ni ging’eyo gimomiyo Jehova noketo chenro mar wich sama gimiyo nyimine luor. Owadwa Benjamin modak England wacho kama: “Asepuonjora mathoth kuom nyimine kokalo kuom paro ma gichiwo e chokruok. Kendo paro mabeyo ma gichiwo e yo ma ng’ato nyalo timogo tij lendo kod tayo jopuonjre osekonya ahinya. Aparo ni tich ma gitiyo en tich maduong’ ahinya.”

17. Ang’o momiyo onego wami chenro mar wich luor?

¹⁷ Ka ji duto e kanyakla, bed ni gin chwo, mon, wiye udi, kata jodong-kanyakla, ong’eyo gimomiyo Jehova noketo chenro mar wich, kendo gimiyo chenrono luor, kanyakla biro bedo gi kuwe. To maduong’ie moloyo, wabiro chiwo pak ne Wuonwa ma jahera ma ni e polo Jehova.​—Zab. 150:6.