ZIR TUR THUZIAK 7
Kohhrana Lû Nihna Hre Thiam Rawh
“Krista chu amah ngei taksa chhandamtu nia, kohhranho lû a ni ang bawk hian.”—EPH. 5:23.
HLA 137 Hmeichhe Rinawm Kristian Unaunute
THLIR LAWKNA *
1. Jehova chhûngkua a inpumkhat chhan pakhat chu eng nge ni?
JEHOVA chhûngkuaa kan tel theih avângin kan lâwm hle a. Engvângin nge inrem tak leh inpumkhat taka kan awm theih? A chhan pakhat chu kan za hian lû nihna chungchânga Jehova ruahmanna chu theih tâwp chhuaha kan zah vâng a ni. Dik tak chuan, lû nihna ruahmanna kan hriatthiam poh leh kan inpumkhat lehzual ang.
2. He thuziakah hian eng zawhnate nge chhân a nih ang?
2 He thuziakah hian kohhran nêna inkûngkaih lû nihna chungchâng kan sawiho vang a. Thil dangte bâkah hêng zawhnate hi chhân a ni ang: Unaunute chanvo chu eng nge ni? Unaupa tawh phawt chu unaunute lû an ni em? Unaute chunga kohhran upate thuneihna chu chhûngkaw lûin a nupui fanaute chunga a neih thuneihna nên a inang em? Tûnah chuan, unaunute kan thlîr dân tûr chu i lo enho hmasa ang u.
ENGTIN NGE UNAUNUTE CHU KAN THLIR ANG?
3. Engtin nge unaunute hnathawh kan ngaihhlutna chu kan tihzual theih?
3 Chhûngte ngaihsakna te, chanchin ṭha hrilhna te, leh kohhran thlâwpnate kawnga theih tâwp chhuahtu unaunute chu kan ngaihlu hle a. Jehova leh Isua’n chûng unaunute an thlîr dân ngaihtuahna hmangin anmahni kan ngaihhlutna kan tizual thei a ni. Tirhkoh Paula’n unaunute a cheibâwl dân kan chhûtngunna aṭangin hlâwkna kan nei thei bawk.
4. Jehova chuan mipate chauh ni lovin hmeichhiate pawh a ngaihlu tih engtin nge Bible-in a târ lan?
4Bible chuan Jehova’n mipate ang bawkin hmeichhiate pawh a ngaihlu tih a sawi. Entîr nân, kum zabi khatnaah khân, Jehova chuan ṭawng danga thu hrilh theihna ang chi thiltihtheihna chu a thlarau thianghlim hmangin mipate leh hmeichhiate hnênah a pe ve ve a. (Tirh. 2:1-4, 15-18) Anni chu Krista ruala rorêl tûra thlarau thianghlima hriak thih an ni. (Gal. 3:26-29) Mipate bâkah hmeichhiate pawhin leia chatuan nunna lâwmman an dawng ang. (Thup. 7:9, 10, 13-15) Chu bâkah, mipate chauh ni lovin hmeichhiate pawhin chanchin ṭha hril tûrin chanvo an nei a. (Mt. 28:19, 20) Dik tak chuan, Tirhkohte bu-ah unaunu Priskilli chuan a pasal Aquila rualin mi fing tak Apollova chu thutak hre chiang lehzual tûrin a ṭanpui tih târ lan a ni.—Tirh. 18:24-26.
5. Luka 10:38, 39, 42-na chuan engtin nge hmeichhiate chunga Isua rilru put hmang chu a târ lan?
5Isua chuan hmeichhiate chu a chawimawiin a zah. Ani chuan hmeichhiate an ngaihnêp avânga vântlâng hmaa be duh lotu leh Pathian Thu zirtîr duh lotu Pharisaite tih dân chu a zui lo. Chu aiin, hmeichhiate chu a zirtîr dangte nêna thlarau lam thu rilte an sawihonaah a teltîr a ni. * (Luka 10:38, 39, 42 chhiar rawh.) Thu hrila a zin kualnaah pawh hmeichhiate’n an zui a remti bawk. (Lk. 8:1-3) Chu bâkah, Isua chuan thihna ata a tho leh tawh tih tirhkohte hnêna hrilh tûrin hmeichhiate hnênah chanvo hlu tak a pe a ni.—Joh. 20:16-18.
6. Tirhkoh Paula’n unaunute chungah zahna a lantîr tih engtin nge a târ lan?
6Tirhkoh Paula chuan Timothea chu hmeichhiate chawimawi tûrin a hriatnawntîr. Ani chuan ‘pitar deuhte chu nu angin leh nula deuhte chu farnu anga’ cheibâwl tûrin a hrilh a. (1 Tim. 5:1, 2) Paula chuan Timothea chu Kristian puitling tak ni tûrin ṭanpui nasa hle mah se, “Lehkha Thianghlimte” zirtîrtu hmasa ber chu a pi leh a nu an ni tih a hria a ni. (2 Tim. 1:5; 3:14, 15) Rom khuaa mite hnêna a lehkhathawnah a bîk takin unaunute chu an hming lamin chibai a bûk a. Unaunute thiltih chu a hre mai ni lovin, Kristian rawngbâwltute an nih avânga an chunga a lâwmzia pawh a sawi lang bawk a ni.—Rom 16:1-4, 6, 12; Phil. 4:3.
7. Eng zawhnate nge kan ngaihtuah ang?
7 Paragraph hmasa lamtea târ lan angin, unaunute chu unaupate aia hnuaihnung zâwk anga ngaih theihna tûr Bible ṭanchhan a awm lo. Hmangaihna nei tak leh thilphal tak kan unaunute chu an hlu tak zet a, kohhran upate chuan kohhranah remna leh inpumkhatna a awm theih nân an ṭanpuina an mamawh a ni. Mahse, zawhna ṭhenkhat chhân ngai a awm a. Entîr nân: Engvângin nge Jehova’n unaunute chu dinhmun ṭhenkhata lû khuh tûra a phût? Unaupate chauh chu kohhran upate leh kohhranho rawngbâwltu atâna ruat an nih avângin, chu chu kohhrana unaupa tawh phawt chu unaunute lû an ni tihna a ni em?
UNAUPA TAWH PHAWT CHU UNAUNUTE LU AN NI EM?
8. Ephesi 5:23-a sawi angin, unaupa tawh phawt chu unaunute lû an ni em? Hrilhfiah rawh.
8 A tawi zâwnga sawi chuan an ni lo! Unaupate ni lovin, Krista chu kohhrana unaunu zawng zawngte lû a ni. (Ephesi 5:23 chhiar rawh.) Chhûngkuaah chuan pasalin a nupui chungah thu a nei a. Baptisma chang tawh a fapa chuan a nu chungah thu a nei lo. (Eph. 6:1, 2) Kohhranah chuan, upate chuan unaute chungah thuneihna engemaw chen chauh an nei a ni. (1 Thes. 5:12; Heb. 13:17) A chhûngte bula awm tawh lo kawppui nei lo unaunu chuan a nu leh pate leh kohhran upate chu a la zah chhun zawm zêl a. Mahse, kohhrana unaupate ang bawkin a lû awmchhun chu Isua chauh a ni.
Kawppui nei lo chhûngte bula chêng tawh lote chu Isua lû nihna hnuaiah an awm (Paragraph 8-na en rawh)
9. Engvângin nge unaunute’n dinhmun ṭhenkhata an lû an khuh a ngaih?
9 Jehova chuan mipate chu kohhrana zirtîrnaah leh Pathian biaknaah hma hruai tûrin a ruat a; mahse, unaunute chu chutianga thuneihna a pe lo. (1 Tim. 2:12) Engvângin nge? Mipa lû atâna Isua a ruat chhan nên a thuhmun reng a—kohhrana ruahmanna fel tak a awm theih nân a ni. Unaupate chelh ṭhin chanvo chu unaunuin a chelh a ngai dâwn a nih chuan Pathian Jehova chuan a lû khuh tûrin a phût a. * (1 Kor. 11:4-7) Chutianga unaunute a phût chhan chu anmahni a ngaihnêp vâng ni lovin, amah ngeiin a din lû nihna thu bul zah tûra a duh vâng zâwk a ni. Chu chu rilrua dahin: Chhûngkaw lûte leh kohhran upate chuan thuneihna eng chen chiah nge an neih? tih zawhna hi i lo sawiho vang u.
CHHUNGKAW LUTE LEH KOHHRAN UPATE CHANVO
10. Engvângin nge kohhran upa chuan kohhran tâna dânte siam a duh mai theih?
10 Kohhran upate chuan Krista an hmangaih a, Jehova leh Isua’n an enkawl atâna an pêk “berâmte” pawh an hmangaih a ni. (Joh. 21:15-17) Chhan ṭha tak avângin kohhran upa chuan kohhranah lû angin a inngai mai thei a. Chhûngkaw lûin a chhûngte humhim nâna dânte siam tûra dikna a nei ang bawkin, ani chu Pathian berâmte vênhim nâna dânte siam thei tûrah a inngai mai thei a. Chu bâkah, unau ṭhenkhatin upate chu an tâna thu tlûkna siamtîrin thlarau lama an lû anga thil ti tûrin an fuih mai thei bawk. A nih leh, kohhran upate leh chhûngkaw lûte thuneihna chu a inang em?
Kohhran upate chuan kohhrana unaute thlarau lam leh rilru lam mamawhte chu an ngaihsak a. Jehova chuan kohhran chu nungchang lama thianghlim taka dah reng tûrin anni chu mawhphurhna a pe (Paragraph 11-12-na en rawh)
11. Chhûngkaw lûte leh kohhran upate chanvo inannate chu eng nge ni?
11 Tirhkoh Paula chuan chhûngkaw lûte leh kohhran upate chanvo inanna ṭhenkhat a târ lang a. (1 Tim. 3:4, 5) Entîr nân, Jehova chuan chhûngkuaa mite chu chhûngkaw lû thu âwih tûrin a duh a. (Kol. 3:20) Kohhrana unau zawng zawngte pawh kohhran upate thu zâwm tûrin a duh a ni. Jehova chuan chhûngkaw lûte leh kohhran upate chu an enkawlna hnuaia awmte thlarau lam mamawh ngaihsak tûrin a beisei a. Anni chuan an thuneihna hnuaia awmte rilru lam mamawh chu an ngaihsak bawk a ni. Chhûngkaw lû ṭha takte angin, kohhran upate chuan hun harsaah pawh an enkawlna hnuaia awmte’n ṭanpuina an dawng tih an chian tûr a ni a. (Jak. 2:15-17) Chu bâkah, Jehova chuan kohhran upate leh chhûngkaw lûte chu a tehnate zâwm tlat tûr leh Bible-a ‘thu ziakte khûm’ lo tûrin a beisei a ni.—1 Kor. 4:6.
Chhûngkaw lûte chu Jehova’n an chhûngkua kaihruai tûrin thuneihna a pe a. Hmangaihna nei tak chhûngkaw lû chuan thu tlûknate a siam hmain a nupui a râwn ang (Paragraph 13-na en rawh)
12-13. Rom 7:2-a sawi angin, chhûngkaw lûte leh kohhran upate chanvo inan lohna chu eng nge ni?
12 Mahse, kohhran upate leh chhûngkaw lûte chanvo inan lohna laite pawh a awm a. Entîr nân, Jehova chuan kohhran upate chu rorêltu anga thilti tûrin a ruat a, kohhrana inchhîrna nei lova thil sual titute chu hnawt chhuak tûrin mawhphurhna a pe bawk a ni.—1 Kor. 5:11-13.
13 Kawng leh lamah chuan, Jehova’n chhûngkaw lûte hnênah kohhran upate hnêna a pêk loh thuneihna ṭhenkhat a pe a. Entîr nân, chhûngkaw lû chu a chhûngkaw tâna dânte siam a, kengkawh tûrin thuneihna a pe a ni. (Rom 7:2 chhiar rawh.) Chhûngkaw lû chuan zâna a fate lo haw hun tûr chungchângah thu tlûkna siam tûrin dikna a nei a. A fate’n chûng dânte an zâwm lo a nih chuan zilh tûrin thuneihna a nei bawk. (Eph. 6:1) Ni e, hmangaihna nei tak chhûngkaw lû chuan a chhûngkaw tâna dânte a siam hmain a nupui chu a râwn ngei ang, “tisa pum khat” an ni si a. *—Mt. 19:6.
KOHHRAN LU A NIH ANGIN KRISTA CHU ZAH RAWH
Isua chuan Jehova lû nihna hnuaiah Kristian kohhran a kaihruai (Paragraph 14-na en rawh)
14. (a) Marka 10:45-a târ lan angin, engvângin nge Jehova’n kohhran lû atâna Isua a ruat chu inâwm tak a nih? (b) Governing Body chanvo chu eng nge ni? (“ Governing Body Chanvo,” tih bâwm chu en rawh.)
14 Jehova chuan kohhrana mi zawng zawngte nunna chu tlanna hmangin a lei a. (Marka 10:45 chhiar rawh; Tirh. 20:28; 1 Kor. 15:21, 22) Chuvângin, tlanna atâna a nun petu Isua chu kohhran lû atâna a ruat chu inâwm tak a ni. Kan lû a nih angin, Isua chuan mi mal tân, chhûngkaw tân, leh kohhran pumpui tâna dânte siam a, kengkawh tûrin thuneihna a nei a. (Gal. 6:2) Mahse, ani chuan dânte siam mai aia tam a ti a. Mi tinte chu min ngaihsakin, min hmangaih a ni.—Eph. 5:29.
15-16. Unaunu Marley-i leh unaupa Benjamin-a thusawi aṭangin eng nge i hriat?
15 Unaunute chuan anmahni ngaihsak tûra Krista ruat upate kaihhruaina chu zâwmin amah an zahzia an lantîr a. United States-a awm unaunu Marley-i chuan, unaunu tam takte thlîr dân chu heti hian a khaikhâwm a ni. Ani chuan: “Nupui ka nih ang leh unaunu ka nih anga kohhrana ka hmun neih chu ka ngaihlu hle a. Ka pasal leh kohhran upate hnêna Jehova pêk thuneihna zah tûrin theih tâwp ka chhuah reng a ni. Mahse, anni chuan ka chungah zahna lantîr a, ka thiltihte min ngaihhlutsak avângin an thuneihna zah chu a âwlsam lehzual a ni,” tiin.
16 Unaupate chuan unaunute chu zah a, chawimawiin lû nihna ruahmanna an hriatthiamzia an lantîr a. England rama awm unaupa Benjamin-a chuan: “Inkhâwma unaunute chhânna aṭang leh mahnia inzîrna neih dân leh rawngbâwlnaa hlawhtlin theih dân chungchânga an thurâwn pêkte aṭangin thil tam tak ka zir a ni. Unaunute hnathawh chu ṭangkai tak ni hian ka hria,” tiin a sawi.
17. Engvângin nge lû nihna thu bul chu kan zah ang?
17 Kohhrana mi zawng zawng—mipa te, hmeichhia te, chhûngkaw lû te, leh kohhran upate’n lû nihna thu bul an hriatthiam a, zahna an lantîr hian kohhranah remna a awm a. Chu aia pawimawh zâwk, hmangaihna nei tak kan Pa vâna mi Jehova chawimawina a thlen a ni.—Sâm 150:6.
HLA 123 Rinawm Taka Pathian Kaihhruaina Zâwmin
^ par. 5 Kohhrana unaunute chanvo chu eng nge ni? Unaupa tawh phawt chu unaunute lû an ni em? Kohhran upate leh chhûngkaw lûte chuan thuneihna inang an nei em? He thuziakah hian Bible-a kan hmuh entîrnate hmangin chûng zawhnate chu sawiho a ni ang.
^ par. 5 Vênnainsâng, September 2020 chhuak “Kristian Unaunute Chu Ṭanpui Rawh,” tih thuziaka paragraph 6-na chu en rawh.
^ par. 9 “ Eng Hunah Nge Unaunuin A Lû A Khuh Ang?” tih bâwm chu en rawh.
^ par. 13 Chhûngkuate chu eng kohhranah nge an awm dâwn tih chungchânga thu tlûkna siamtu tûr hriat nân Vênnainsâng, August 2020 chhuak “Jehova Kohhrana Mi Dangte Hmun Neih Chu Zah Rawh,” tih thuziaka paragraph 17-19-na chu en rawh.
^ par. 59 Hemi chungchâng hriat belh nân, “Pathian Hmangaihnaah Chuan Invawng Ṭha Rawh,” tih lehkhabu p. 209-212-na chu en rawh.
^ par. 64 Governing Body chanvo kimchang taka hriat nân, July 1, 2013 chhuak Vênnainsâng, p. 26-31-na chu en rawh.
