7ǁÎ ǁKHĀǁKHĀǃÂS
ǀHaohâb ǃûi-aogu di danasisa ǁnâuǃās
“Xristub a ǁkhāti ǀhaohâb di dana khami; tsîb ge a soros âb di ǃGâiǃōdī-ao.”—EFE. 5:23.
137ǁÎ ǁNAETSANAS ǂGomǂgomsa taradi, Xristeǁî ǃgâsadi
ǃKHŌǀHAOS *
1. Tae-i ǃaroma i Jehovab di khoena a ǀguiǂâixa?
ǃGÂIBAHE da ge a Jehovab di omaris ǃâ da a sa. Tae-i ǃaromas sida di omarisa a ǂkhî tsî a ǀguiǂâixa? ǀGui ǃaromas ge, sida ge danasib Jehovab mâi hâba ra ǃgôa. Danasiba da ga ǃgâise ga ra ǁnâuǃā o da ge ǃnāsase ra ǀguiǂâixa.
2. Mâ dîde da nē ǁkhāǁkhāǃâs ǃnâ nî ǃeream?
2 Nē ǁkhāǁkhāǃâs ǃnâ da ge nî ǃhoaǃgao ham-i a ǀhaohâb di dana ǃkhaisa. Tsî da ge ǁnapaxu saora dîde nî ǃeream: Mâ ǃâba di ǃgâsade ra ǀhuru? Ama-e ǃgâsagu hoa ǃgâsadi dana ǃkhaisa? ǀHaohâb ǃûi-aogu tsî oms danagu di ǃereamde a ǀgui? Xawe hā re î da ǂgurose, ǃgâsade da mati nî mûsa ǃhoaǃgao.
MATI DA ǃGÂSADE NÎ MÛ?
3. Tae-e nî huida î da sida ǃgâsadi ra dī xūna ǃgôaǃgâ?
3 Sida ǃgâsadi ge ǃgarise ra sîsen. ǁÎdi ge ǃgâiǂhôasa aoǁnâ, omarisa kōǃgâ tsî ǀhaohâb ǃnâ ǃgarise ra sîsen. Tsî da ge ǁîdi ra dī xūna kaise ra ǃgôaǃgâ. Jehovab tsî Jesub ǁîdi xa ra ǂâi ǀgauba da ge nî ǂâiǃgâ. O da ge ǁîde noxoba ǃnāsase nî ǃgôaǃgâ. Apostel Paulub di aiǁgausa xu da ge nî ǁkhāǁkhāsen mati da tarekhoede nî hâ-ū ǀgausa.
4. Elobmîsa mati ra ǁgau Jehovab aorekhoekab ǃgôa hâ khami tarekhoede ǃgôa hâsa?
4 Elobmîs ge ra mî Jehovab tarekhoede ǃgôa hâsa, aorekhoekab ǃgôa hâ khami. Aiǁgause i ge ra mî Jehovab ge ǃanu gagaba tarekhoedi tsî aorekhoegu tsîna māsa. În buruxa dīna dī. Tsîn ge ǁnās ǀkha ǃkharagaǃnâgu gowagu ǃnâ ge ǃhoa ǁkhā i. (ǃNǃkh. 2:1-4, 15-18) Hoa ǀgaman ge ǃanu gagab ǀkha ǂkhauhe. Tsî Xristub ǀkha ǀhommi ǃnâ sī a ǂgaeǂgui ǁkhā. (Gal. 3:26-29) Hoan ge ǀamo ûiba ǃhūbaib ai a hō ǁkhā. (J.ǂHa. 7:9, 10, 13-15) Tsîn ge hoana ǃgâiǂhôasa aoǁnâ tsî nî ǁkhāǁkhā. (Mat. 28:19, 20) Aiǁgauses ge ǃNaeǃkhaidi ǂkhanisa Prisila di ǀon hâ ǃgâsas xa ra ǃhoa. ǁÎs tsî Akwilab tsîn ge amaba Apoloba gere ǁguiǃāba. ǀGapi ǁkhāǁkhāsensab ge ūhâ-i xawe.—ǃNǃkh. 18:24-26.
5. Matis Lukab 10:38, 39, 42 tsîna ra ǁgau Jesub ge tarekhoede ǃgôasiba ūba hâ i sa?
5 Jesub ge tarekhoede ge ǃgôa hâ i. ǁÎb ge Farisegu khami ge ī tama hâ i. Hîna ge tarekhoede kaise ǃgôaǁnâ hâ i ga. Tsî tarekhoedi ǀkha ǃauga ǃhoa tama i. Tsî Elobmîs xas tsîna ǃhoa tama i ga. Xaweb ge Jesuba ǂhâǂhâsa amaba tarekhoedi tsî aorekhoegu ǀkhas tsîna gere ǀgoragu. * (Khomai re Lukab 10:38, 39, 42.) ǁÎb ge tarekhoedi tsîna gere mā-am î di ǁîb ǀkha ǀguiba aoǁnâ. (Luk. 8:1-3) Tsîb ge tarekhoede ǃēsa ge mā, î di ǁîb apostelga mîba ǁîb ge khâisa hōsa.—Jhn. 20:16-18.
6. Matib ge Apostel Pauluba ǁgau ǃgâsadeb ra ǃgôa ǃkhaisa?
6 Apostel Paulub ge Timoteuba gere ǂâiǂâiǃnâ îb tarekhoede ǃgôasiba ūhâba. Paulub ge ǁîba ge mîba îb “kaira tarade ǁgûse” mû tsî “ǂkhamde ǃgâsase” mû. (1Tim. 5:1, 2) Paulub ge ǂgui ǀgaugu ǃnâ Timoteuba gagasise ge hui. Xaweb ge ge ǂanǃgâ, ǁîb mas tsî aumas tsîn ge ǂgurose ǁîba gagasise a omkhâisa. (2Tim. 1:5; 3:14, 15) Romeǁîna ǃoab ge xoa sîǂkhanis ǃnâb ge Pauluba ǃgâsade ǀondi ai gere tawede. Paulub ge ǃgâsadi sîsen-i ǀgui-e ge mû tama hâ i. Xawe ǁîdi tsîna gere koa.—Rom. 16:1-4, 6, 12; Fil. 4:3.
7. Mâ dîde da nî ǃhoaǃgao?
7 ǃKharu goro xoaǀgoradi ge ra ǁgau Elobmîs mî tamasa, ǃgâsade da nî ǃgôaǁnâsa. Sida di ǀnamǀnamsa ǃgâsadi ge ǀhaohâga kaise ra hui. Tsî di ge ǀhaohâb ǃûi-aoga ra hui. Îb ǂkhîb tsî ǀguiǃnâxasib tsîna ǀhaohâb ǃnâ hâ ǁkhā. Xawe ǀnî dîdi ge ǃereamsa ǂhâba hâ. Aiǁgause: Tae-i ǃaromab Jehovaba ǂhâba hâ î di ǃgâsade ǀnî ǁaegu ai danade ǃgū-ai? Tamas ka io ǃkhai. ǃGâsagu ǀguigu ge ǀhaohâb ǃûi-aogu tsî ǀhaohâb hui-aose ra ǁgaumâihe. Nēsa ra ǂâibasen hoa ǃgâsagu a ǃgâsadi danasa?
MÂ ǃGÂSAB HOABA A ǃGÂSADI DANA?
8. Efeseǁîn 5:23 ǃoagub mâ ǃgâsab hoaba a ǃgâsadi dana? ǁGuiǃā re.
8 ǃEreams ge a hî-î. Mâ ǃgâsab hoab ge ǃgâsadi dana tama hâ. Xristub ge a dana. (Khomai re Efeseǁîn 5:23 sa.) Oms ǃnâb ge ǃgamme aoba a ǁîb taras di dana. Tsî ǁāǁnâsa ǀgôab ge mamasas di dana tama hâ. (Efe. 6:1, 2) ǀHaohâb ǃûi-aogu ge ǃgâsana ǀnî xūn ai ǀgui a daoǁgau ǁkhā. (1Tes. 5:12; Heb. 13:17) ǃGamme tama ǃgâsadi ge ǁîdi ǁgûn tsî ǀhaohâb di ǃûi-aogu tsîna ra ǃgôa. Xawe aore ǃgâsagu khami di ge ǁîdi tsîna ǀgui danab ǀguiba ūhâ, Xristuba.
ǃGamme tama khoen hîna ǁîn ǁgûn ǀkha hâ taman ge Jesuba danab ase ūhâ (8ǁÎ xoaǀgorasa khomai re)
9. ǃGâsade tae-i ǃaroma ǀnî ǁaegu ai danade nî ǃkhai?
9 Ama as ge, Jehovab ge aorekhoegu ǀguiga ǀhaohâb ǃnâ ǁkhāǁkhās tsî ǂgaeǂguis tsîna a māsa. (1Tim. 2:12) Tae-i ǃaroma? Jesubab ge khoeb danab ase a mâi. Khamib ge aorekhoegu tsîna ǀhaohâb danase ge mâi. Îgu ǁîb di omarisa kōǃgâ. ǃGâsab xa nî dīhe xū-es ga ǃgâsasa dī o. Ob ge Jehovaba ra ǂhâba is danasa ǃkhai. * (1Kor. 11:4-7) Jehovab ge tarekhoedeb ra ǃgôaǁnâ amaga ti mî tama hâ. Xaweb ge ǁîde ǃēsa ra mā, î di danaga ǃgôasiba ǁgau. ǁNāsa ǂâis ǃnâ ūhâse. A da saora dîsa ǃeream re: Oms danagu tsî ǀhaohâb ǃûi-aoga mâ ǃereamsa tani hâ?
ǀHAOHÂB ǃÛI-AOGU TSÎ OMS DI DANAGU DI ǃEREAMDI
10. Tae-i ǃaromab ǀhaohâb ǃûi-aoba ǀnî ǁaegu ai ǁgaraga ǀhaohâba ra dība?
10 ǀHaohâb ǃûi-aogu ge Xristuba ǀnam. Tsî gūn hîna kha ge Jehovab tsî Jesub tsîna mā gu na. (Jhn. 21:15-17) ǀHaohâb ǃûi-aogu ǃgâsana ra kōǃgâ amagab ge dadasa i ase a mûsen ǁkhā. Oms di danab ra ǁgaraga ǁgui, ib ǁîb di omarisa ǁkhauba. Khamib ge ǀhaohâb ǃûi-aob tsîna ǁgaraga a ǁgui ǁkhā. Îb Jehovab di gūna ǁkhauba ǁkhā. Tsî ǀnî ǃgâsan tsîn ge ǀhaohâb ǃûi-aoga ra mîba, în gagasi mîǁguiga dībahe. Xawe ǀhaohâb ǃûi-aogu tsî oms di danagu tsîna ǀgui ǃereamsa tani hâ?
ǀHaohâb ǃûi-aogu ge ǃgâsana ra hui în Jehovab ǀgūse hâ tsî ǀnam-e hâse tsâ. Jehovab ge ǁnā ǃereamsa ge mā gu, î gu dī-unusen ǂgao tama hâ ǃgâsana ǀhaohâba xu ǂnûiǂui (11ǁÎ tsî 12ǁî xoaǀgorara khomai re)
11. ǀHaohâb ǃûi-aogu tsî oms danagu di ǃereamde mâ ǀgaub ǃnâ a ǀgui?
11 Apostel Paulub ge ge mî ǀhaohâb ǃûi-aogu di ǃereamdi tsî oms danagu di ǃereamdi ǀnî ǀgaugu ai a ǀguisa. (1Tim. 3:4, 5) Aiǁgause Jehovab ge ra ǂhâba în omaris khoena oms di danaba ǃgôasiba ūhâba. (Kol. 3:20) Tsîb ge ra ǂhâba în ǁnān hîna ǀhaohâb ǃnâ hâna ǀhaohâb ǃûi-aoga ǃgôasiba ūhâba. Tsîb ge ra ǂhâba î gu ǀhaohâb di ǃûi-aogu tsî oms di danagu tsîna ǃgâsana gagasise kōǃgâ. Tsî gu ge nî dītsâ în ǁnān hîna ǁîgu ǃnāka hâna ǀnam-e hâse tsâ. Tsî ǃgâi oms danagu khami gu ge ǀhaohâb ǃûi-aogu tsîna. ǃGâsan ga ǃgomsina hōǃâ o ra hui. (Jak. 2:15-17) ǁNās ǀkhab ge Jehovaba ra ǂgaoǀkha ǀhaohâb ǃûi-aogu tsî oms danagu Elobmîs ǃnâ i “xoahe hâs ǂamai” tanisen tidesa. Xaweb ge ǁîb daoǁgaude gu nî sîsenūsa ǂhâba hâ.—1Kor. 4:6.
Omaris di danagu ge ǁîgu omarisa kōǃgâs di ǃereamsa Jehovab xa ge māhe. Mîǁguigab nî dīs aiǃgâb ge ǀnamxaǃnâ oms di danaba ǁîb kaikhoes ǀkha ra ǃhoa (13ǁÎ xoaǀgorasa khomai re)
12-13. Romeǁîn 7:2 ǃnâ i ra mîhe khami i mati ǀhaohâb ǃûi-aogu di ǃereamdi tsî oms danagu di ǃereamdi tsîna ra ǃkharagagu?
12 ǀHaohâb ǃûi-aob ūhâ ǃereamdi tsî oms di danab ūhâ ǃereamdi ge kaise ǂgui ǀgaugu ǃnâ a ǃkharagagu. Aiǁgauseb ge Jehovaba ǀhaohâb ǃûi-aoga ǀgoraǃgâ-aogu ase ge mâi. Tsî gu ge ǁore-aon hîna dī-ūnusen ǂgao tamana ǀhaohâba xu a ǂnûiǂui ǁkhā.—1Kor. 5:11-13.
13 Jehovab ge oms di danaga ǀhaohâb ǃûi-aogu ūhâ tama ǃereamde ge mā. Aiǁgauseb ge oms di danaba omaris ǃaroma ǁgaraga a ǁgui ǁkhā. Tsî nî kōǃgâ i gu ǁnā ǁgaraga sao-e. (Khomai re Romeǁîn 7:2 sa.) Aiǁgauseb ge oms di danaba a mîǁgui ǁkhā. Mâ ǁaen ǀgôana oms ai nî oa ǀkhīsa. Tsîb ge ǁîb di ǀgôana a ǁkhara ǁkhā. ǁNā ǁgaragan ga ǁnâuǀnam tama io. (Efe. 6:1) Oms di danab nî ǁgaraga mîǁguis aiǃgâb ge ǁîb di kaikhoes ǀkha ra ǃhoa. ǁÎra a ǀgui “ǁgan amaga.” *—Mat. 19:6.
XRISTUBA ǃGÔA RE ǁÎB A ǀHAOHÂB DI DANA AMAGA
Jesub ge Jehovab dauǁgaus ǃnāka ǀhaohâga ra kōǃgâ (14ǁÎ xoaǀgorasa khomai re)
14. (a) Markub 10:45 ǃoagu i tae-i ǃaroma a ǃgâi, Jesuba ǀhaohâgu di danase ǁgaumâihesa? (b) ǂGaeǂguira sorosa tae-e ra dī? (“ ǂGaeǂguira sorosa tae-e ra dī?” di hâ boksisa khomai re.)
14 Xoremarib ǃnâ-ūb ge Jehovaba ǀhaohâb ǃnâ hâ khoen di ûiga ge ǁama. Tsî naun hîna Jesub ǃnâ ra ǂgoman di ûigu tsîna. (Khomai re Markub 10:45; ǃNǃkh. 20:28; 1Kor. 15:21, 22) ǁNā-amaga i ge ge ǃgâi i. Jesuba ǀhaohâb danase ǁgaumâihesa. ǁÎb ûibab ge mā amaga. Sida di danab aseb ge Jesuba ǁgaraga a mā da ǁkhā. Hoa khoen ge nē ǁgaraga nî ǁnâuǀnam. Tsîb ge ǁîba nî kōǃgâ nē ǁgaragu nî ǁnâuǀnamhesa. (Gal. 6:2) Xawe Jesub ge ǁgaragu ǀguiga dī tama hâ. ǁÎb ge hoada ra tsâba tsî a ǀnam da.—Efe. 5:29.
15-16. Marleys tsî Benjamini ge mî xū-e xu du tae-e ra ǁkhāǁkhāsen?
15 ǃGâsadi ge Xristuba ra ǁnâuǀnam, ǁîb ǁgaumâi hâ ǃgâsagu di ǁgaraga di ga sao o. ǂGui ǃgâsadi ge Marley di ǀon hâ ǃgâsas hîna Amerikab ǃnâ ra hâs ǀkha a ǀguiǂâixa. ǁÎs ge ra mî: “Tita ge kaise ra ǃgôaǃgâ ǃgamme tara ta a ǃkhaisa. Tsî ǀhaohâb ǃnâ ǃgâsase mûhesa. Hoaǁaegu ai ta ge ra ǂâiǂâiǃnâsen, Jehovab di ǂhanuga danagu ǃoagu. Ti kaikhoeb tsî ǀhaohâb ǃnâ hâ ǃgâsagu ge nēsa ra supu kai. ǁÎgu ge dī ta ra sîsen-e kaise ra ǃgôaǃgâ.”
16 ǃGâsagu ge danasisa ra ǃgôaǃgâ, ǁîgu ga ǃgâsade ǃgôa o. Englandi ǃnâ ra hâ ǃgâsab Benjamini ge nēti ra mî: “Kaise ta ge ǂgui xūna ge ǁkhāǁkhāsen. ǃGâsadi ǀhaohâb tawa ra mā ǃereamde xu. Tsî ǁîdi ǀapemāde xu. ǃGâise ǁkhāǁkhās tsî aoǁnâs dide. ǁÎdi ge kaise ǃgâi sîsen-e ra dī.”
17. Tae-i ǃaroma da danasis di ǂnûiǂgāsa nî ǃgôaǃgâ?
17 Hoan ga ǀhaohâb ǃnâ ǁnâuǃā tsî ǃgôaǃgâ o danasisa. Ob ge ǀhaohâba ǂkhîba ra ūhâ. ǁNās ǂam-ai i ge koasa sida di ǀhomsi ǁGûba ra mā.—Psa. 150:6.
123ǁÎ ǁNAETSANAS ǂGomǂgomsase Elob daoǁgaude ǁnâuǀnam re
^ par. 5 Jehovaba ǀhaohâb ǃnâ ǃgâsade tae sîsen-e mā hâ? ǃGâsaga hoa ǃgâsadi di dana? ǀHaohâb ǃûi-aogu tsî oms danagu tsîna ǀgui ǃereamsa tani hâ? Nē ǁkhāǁkhāǃâs ǃnâ da ge nî mû matis Elobmîsa nē dîde ra ǃereamsa.
^ par. 5 “Xristeǁî tarade ǂkhâǃnâ re” di hâ ǁkhāǁkhāǃâs, Septemberi 2020ǁî kurib ǃKhē xu ǂgō-ommi di 6ǁî xoaǀgorasa khomai re.
^ par. 9 “ Mâ ǁaegu ais ǃgâsasa danasa nî ǃkhai?” di hâ boksisa khomai re.
^ par. 13 Mâ ǀhaohâb ǃnâs omarisa nî hâsa i ham-e nî mîǁguis ǃaroma. 17 Sa xu 19ǁî xoaǀgorade. “Jehovab ǀhaohâb ǃnân nau khoena ra ǀhuru ǃâba ǃgôa re” di hâ ǁkhāǁkhāǃâsa khomai re. Augustub 2020ǁî kurib di ǃKhē xu ǂgō-ommi ǃnâ.
^ par. 59 ǃNāsase du ga ǂan ǂgao o, ǀawaǃaogowab ǃnâ hâ ǂkhanis “Keep Yourselves in God’s Love” ti hâsa, 209 sa xu 212ǁî ǂhawega khomai re.
^ par. 64 Taen hoanas ǂgaeǂguira sorosa noxoba ra dīsa du ga ǂan ǂgao o. Julib 15, 2013ǁî kurib di The Watchtower ǂkhanib ǃnâ, 20-25ǁî ǂhawega khomai re.
