1. ¿Toni kichiua maj itech ixolal Jiova tinochin kuali timouikakan?

¿MELAUJ ke semi techyolpaktia timoajsiskej itech ixolal Jiova? Se taman tein kichiua maj tinochin tikpiakan yolseuilis uan maj kuali timouikakan yejua ke timochikauaj tikinpoujkaitaskej akin Jiova kinixtalij maj taixyekanakan. Tein melauj, keman okachi timochikauaj tikchiuaskej nejin, okachi kuali timouikaj.

2. ¿Katiyejua netajtanilmej tiknankiliskej itech nejin tamachtilis?

² Itech nejin tamachtilis ika titajtoskej akoni taixyekana itech nechikol. No tiknankiliskej nejin netajtanilmej: ¿toni tekit kinmakak Jiova tokniuan siuamej?, ¿nochin tokniuan takamej kinixyekanaj nochin tokniuan siuamej? uan ¿tanauatil tein kipiaj takamej iniuan ininnamik uan ininkoneuan no yejua tanauatil tein kipiaj tayekananij iniuan tokniuan takamej uan siuamej? Yekinika maj ika titajtokan keniuj moneki tikinitaskej tokniuan siuamej.

3. ¿Toni techpaleuis maj okachi tikinpatiuitakan tokniuan siuamej?

³ Moneki semi tikinpatiuitaskej tokniuan siuamej porin yejuan mochikauaj kinyekpiaskej ininchankauan, kiteixmatiltiskej iTajtol Dios uan kinpaleuiskej tokniuan itech nechikol. Sayoj ke okachi tikinpatiuitaskej komo itech titanemiliaj keniuj kinitaj Jiova uan Jesús. No timomachtiskej keniuj kinitaya siuamej tatitanil Pablo, tein techpaleuis maj tikmatikan keniuj moneki tikinitaskej.

4. ¿Keniuj kinextia Biblia ke Jiova kinpatiuita takamej uan siuamej?

 ⁴ Biblia kinextia ke Jiova kinpatiuita takamej uan siuamej. Kemej neskayot, kijtoua ke itech yekinika siglo kinmakak takamej uan siuamej iyektikatsin espíritu tein kinpaleuij maj kichiuanij uejueyi tachiualismej, kemej tajtoskej itech tataman tajtolmej (Hech. 2:1-4, 15-18). No kinixpejpenak tokniuan takamej uan siuamej maj tekiuajtikan iuan Cristo (Gál. 3:26-29). Uan no, takamej uan siuamej uelis nemiskej nochipaya nikan taltikpak (Apoc. 7:9, 10, 13-15). Uan Jesús kinnauatij takamej uan siuamej maj kiteixmatiltikan iTekiuajyo Dios uan maj tamachtikan (Mat. 28:19, 20). Kemej neskayot, amatajkuilol Hechos ika tajtoua se tokniuj siuat akin monotsaya Priscila. Yejua uan inamik, Áquila, “kachi ok kiyekajsikamatiltijke” tein Biblia tamachtia se takat akin monotsaya Apolos, akin kimatia miak taman (Hech. 18:24-26).

5. Kemej kinextia Lucas 10:38, 39, 42, ¿keniuj kinitaya Jesús siuamej?

⁵ Jesús kinpoujkaitaya oso kinmouiskaitaya siuamej. Amo katka kemej fariseos, akin amo kinpoujkaitayaj siuamej. Yejuan amo tajtouayaj iniuan kampa miakej moajsiaj nion ika tajtouayaj iTajtol Dios iniuan. Jesús amo kichiuaya kemej fariseos, ta ika tajtouaya tein tamachtia iTajtol Dios iniuan takamej uan siuamej (xikonixtajtolti Lucas 10:38, 39, 42). * No kikauak maj miakej siuamej iuan yanij keman tanojnotstinemia (Luc. 8:1-3). Uan kinmakak tatiochiualis seki siuamej maj kinmatiltianij tatitanilmej ke oksepa nemia (Juan 20:16-18).

6. ¿Keniuj kinextij tatitanil Pablo ke kinpoujkaitaya siuamej?

⁶ Tatitanil Pablo kinextij ke kinpoujkaitaya siuamej. Kemej neskayot, kinauatij Timoteo maj kinpoujkaitani siuamej. Kiluij maj kinitani siuamej akin xiuejkejya kemej yeskiaj imomauan uan ichpochmej kemej yeskiaj iikniuan (1 Tim. 5:1, 2). Maski Pablo semi kipaleuij Timoteo maj kichikauani itakuaujtamatilis, kijtoj ke imomaj uan iueyinan Timoteo yekinika kimachtijkej “Tajkuilolamatsin de Dios” (2 Tim. 1:5; 3:14, 15). Uan no, itech amat tein Pablo kinijkuilouilij tokniuan akin nemiaj Roma, kintajpaloj miakej tokniuan siuamej uan kintokaytij. Kiitaya nochi tein kichiuayaj nejon tokniuan siuamej uan kijtoj ke semi kipatiuitaya tekit tein kichiuayaj (Rom. 16:1-4, 6, 12; Filip. 4:3).

7. ¿Katiyejua netajtanilmej tiknankilitij?

⁷ Kemej tikitakej, Biblia amo kiteajsikamatiltia ke tokniuan takamej okachi ueyichiuanimej ke tokniuan siuamej. Tokniuan siuamej semi tapaleuiaj itech nechikol porin semi tetasojtaj uan kualtakamej, uan tokniuan tayekananij kipatiuitaj maj tapaleuikan maj onka yolseuilis uan maj nochin kuali mouikakan. Sayoj ke monekiok tiknankiliskej nejin netajtanilmej: ¿keyej Jiova kinnauatia tokniuan siuamej maj mokuapikikan keman kichiuaj seki tekimej? Uan kemej sayoj tokniuan takamej kinixtaliaj kemej tayekananij uan tapaleuianij, ¿kijtosneki nejon ke nochin tokniuan takamej kinixyekanaj nochin tokniuan siuamej?

8. Kemej kijtoua Efesios 5:23, ¿keyej amo nochin tokniuan takamej kinixyekanaj nochin tokniuan siuamej?

⁸ Amo nochin tokniuan takamej kinixyekanaj nochin tokniuan siuamej. Sayoj Cristo kinixyekana nochin tokniuan siuamej (xikonixtajtolti Efesios 5:23). Tokniuan takamej kiixyekanaj ininnamik, sayoj ke se ininokichpil  akin moauijya amo kiixyekana imomaj (Efes. 6:1, 2). Uan itech nechikol, tokniuan tayekananij amo kipiaj senkis tanauatil keman kinixyekanaj tokniuan siuamej uan takamej (1 Tes. 5:12; Heb. 13:17). Uan se tokniuj siuat akin amo kipia inamik uan amo nemiok iniuan itatuan, kisentoka kinpoujkaita, sayoj ke ipopaj amo kiixyekanaok. Uan kinpoujkaita tokniuan tayekananij, sayoj ke kipia sayoj se itaixyekankauj ijkon kemej nochin tokniuan takamej, uan yejua Jesús.

9. ¿Keyej kemansa tokniuan siuamej moneki mokuapikiskej?

⁹ Jiova kineki maj itech nechikol kuali ixyeto keniuj motekitis. Yejua ika kiixtalij Jesús maj kiixyekana takat. Uan kinixtalij tokniuan takamej maj taixyekanakan itech nechikol. Yejuatsin amo kiixtalij maj tokniuan siuamej no kipiakan nejon tanauatil (1 Tim. 2:12). Yejua ika, komo kemansa se tokniuj siuat moneki kichiuas se tekit tein kichiuaskia se tokniuj takat, moneki mokuapikis (1 Cor. 11:4-7). * Jiova kinauatia maj kichiua nejon, amo porin kinemilia ke amo teyi chiujkej, ta porin ijkon uelis kinextis ke kinpoujkaita akin yejuatsin kinmakatok tanauatil. Axkan maj tiknankilikan nejin netajtanil: ¿toni tanauatil kipiaj tokniuan takamej iniuan ininchankauan uan tayekananij iniuan tokniuan?

10. ¿Keyej ueliskia kinemilis se tokniuj tayekankej ke uelis kiniluis tokniuan toni moneki kichiuaskej?

¹⁰ Tokniuan tayekananij kitasojtaj Cristo uan no kintasojtaj tokniuan akin Jiova uan Jesús kinnauatiaj maj kinyekpiakan (Juan 21:15-17). Se tayekankej akin kitemoua kinpaleuis tokniuan ueliskia kinemilis ke kemej yeskia  ininpopaj. Xa kinemilis ke komo se tepopaj ueli kiniluia ichankauan toni moneki kichiuaskej porin kitemoua kinyekpias, se tayekankej no uelis kiniluis tokniuan toni moneki kichiuaskej. Uan no, seki tokniuan uelis kichiuaskej maj tayekananij ijkon tanemilikan komo kiniluiaj maj yejuan kiixtalikan toni moneki kichiuaskej itech seki taman. Sayoj ke ¿tanauatil tein kipiaj takamej iniuan ininchankauan no yejua tein kipiaj tayekananij iniuan tokniuan?

11. ¿Toni taman amo mopata itech tanauatil tein kipiaj tetatmej uan tayekananij?

¹¹ Tatitanil Pablo kinextij ke tanauatil tein kipiaj takamej iniuan ininchankauan itech seki taman amo mopata ika tanauatil tein kipiaj tayekananij iniuan tokniuan (1 Tim. 3:4, 5). Kemej neskayot, Jiova kineki maj kalyetouanij kitakamatikan tepopaj porin yejua kinixyekana, uan kineki maj tokniuan kintakamatikan tayekananij (Col. 3:20). No kineki maj tetatmej kinpaleuikan ininchankauan maj kipiakan chikauak inintakuaujtamatilis uan maj kinnextilikan ke kintasojtaj uan ke kinpatiuitaj, uan no kineki maj tayekananij kichiuakan nejon iniuan tokniuan. Uan ijkon kemej kichiuaj tokniuan takamej akin kuali kinixyekanaj ininchankauan, tayekananij kinpaleuiaj tokniuan akin kipanouaj ouijkayomej (Sant. 2:15-17). Uan no, Jiova kineki maj  tayekananij uan tetatmej kinpaleuikan oksekin maj kitakamatikan itanauatiluan. Yejuatsin no kinnejmachtia: “Amo xikpanauikan [...] in tanauatilme de Dios ten namechijkuilouilij” (1 Cor. 4:6).

12, 13. Kemej kinextia Romanos 7:2, ¿toni mopata ika tanauatil tein kipiaj tetatmej uan tanauatil tein kipiaj tayekananij?

¹² Sayoj ke onkak seki taman tein kemaj mopata ika tanauatil tein kipiaj tayekananij uan tetatmej. Se taman yejua ke Jiova kinixtalij tayekananij kemej tamelauanij. Yejuatsin kiixtalij maj kinkalankixtikan itech nechikol tokniuan akin tajtakolchiuaj uan amo moyolnonotsaj (1 Cor. 5:11-13).

¹³ Sayoj ke Jiova kinnauatiani tetatmej maj kichiuakan seki taman tein tayekananij amo ueli kichiuaj. Se taman yejua ke tepopaj ueli kiixtalia toni moneki kichiuaskej ichankauan uan ueli kichiua maj kitakamatikan (xikonixtajtolti Romanos 7:2, TNM). Kemej neskayot, ueli kiniluia ikoneuan toni hora moneki ajsiskej ininkalijtik youak, uan ueli kintakakiltia komo amo kitakamatij (Efes. 6:1). Sayoj ke se tepopaj tetasojtakej achto kiixejekoltia inamik keniuj kiita teisa tein kineki kiixtalis, porin yejua uan inamik “sayo se” (Mat. 19:6). *

14. 1) Kemej kijtoua Marcos 10:45, ¿keyej Jiova kiixtalij Jesús kemej taixyekankej itech nechikol? 2) ¿Toni tekit kichiuaj tokniuan Oloch Taojtokaltianij? (Xikonita recuadro “ Tekit tein kichiuaj tokniuan Oloch Taojtokaltianij”).

¹⁴ Ika inemilis Jesús tein kitemakak, Jiova kiixtauak ininnemilis nochin akin moajsij itech nechikol uan nochin akin takuaujtamatiskej iuan Jesús (xikonixtajtolti Marcos 10:45; Hech. 20:28; 1 Cor. 15:21, 22). Kemej  Cristo toka momikilij, Jiova kiixtalij kemej taixyekankej itech nechikol. Yejua ika, Jesús ueli kiixtalia keniuj moneki nemiskej nochin taltikpakneminij, kalyetouanij uan nochin itekitikauan Dios, uan kinamiki kiitas maj kitakamatikan (Gál. 6:2). Sayoj ke amo sayoj kiixtalia toni moneki tikchiuaskej, ta no techyekpia uan techtasojta tisejsemej (Efes. 5:29).

15, 16. ¿Toni mitsonmachtia tein kijtojkej Marley uan Benjamin?

¹⁵ Tokniuan siuamej kinextiaj ke kipoujkaitaj Cristo keman kintakamatij takamej akin kinixtalij maj kinyekpiakan. Se tokniuj siuat akin monotsa Marley, akin nemi Estados Unidos, kijtoua: “Semi nikpatiuita tekit tein peuak nikpia keman nimonamiktij uan tekit tein nikpia itech nechikol. Moneki niksentokas nimochikauas nikpoujkaitas tanauatil tein Jiova kimakak nonamik uan tein kinmakak tayekananij. Sayoj ke nonamik uan tokniuan itech nechikol nechpaleuiaj maj amo ouij nechkisa porin nechpoujkaitaj uan kinextiaj ke kipatiuitaj nochi tein nikchiua”. Miakej tokniuan siuamej xa no ijkon kijtoskiaj.

¹⁶ Tokniuan takamej kinextiaj ke kiajsikamatij ke moneki kuali kikuiskej tanauatil tein kipiaj keman kinpoujkaitaj tokniuan siuamej. Benjamin, se tokniuj takat akin nemi Inglaterra, kijtoua: “Nechmachtiani miak taman tanankililmej tein tokniuan siuamej kitemakaj itech nechikolmej uan keman tayolmajxitiaj keniuj se momachtis, keniuj se tanojnotsas uan keniuj okachi kuali se tamachtis. Niknemilia ke kichiuaj se kuali tekit”.

17. ¿Keyej moneki tikpoujkaitaskej tein Jiova kiixtalij keman kinmakak tanauatil sekin?

¹⁷ Keman tinochin, takamej, siuamej, tetatmej uan tayekananij, tikajsikamatij ke Jiova kinmakak tanauatil sekin uan tikpoujkaitaj nejon tein kiixtalij, onkak yolseuilis itech nechikol. Uan tein okachi moneki, keman oksekin kiitaskej tein kuali tein tikchiuaj kiueyitaliskej toTajtsin Jiova (Sal. 150:6).