MUSORO WO KUJIJA WO 7
Mutoro uno Vakuru mu Ungano
“Kristu [ndiyena] musoro wo gungano no muponesi wo muviri.”—VAEFESO 5:23.
NDUMBO 137 Vanakaji Vakagondeka, Hambzaji jo CiKristu
ZVATICAJIJA *
1. Ngorapi thangwe rimwe rinoitisa kuti vandhu va Jehovha varambe vakabatana?
ITUSU tinodakara maningi ngo kuva divi ro vashandiri va Jehovha. Waro, ngenyi itusu tino runyararo no rubatano wakadari? Thangwe rimwe rinoitisa zvondhozvo, ngo rokuti itusu tese tinoita zvese zvatinokwanisa kuti tireremeje vaya vakagajwa ndi Jehovha kuti vatungamirire. Zvokadi kamare, patinonasa kuzwisisa nasiriro ya Jehovha yo kugaja vandhu kuti vatungamirire, kubatana kwedu kunoengejekavo.
2. Tinozodavira muvhunjo japi pa musoro uwu?
2 Pa musoro uwu, tinozovona kuti ndiyani ano basa ro kutungamirira mu ungano. Cimwenizve, tinozodavira muvhunjo iji: Ngorapi basa rino hambzaji mu ungano? Ndizvonadi kuti hama jese i musoro wo hambzaji jese? Kunanga kuti kutungamirira kunoita vakuru ku hama no hambzaji mu ungano, kwakaezana no kutungamirira kunoita baba ku mukaji no vana vavo? Pokutanga, ngatiambe kuvona kuti tinodikana kuvona kudini hambzaji mu ungano.
TINODIKANA KUVONA KUDINI HAMBZAJI MU UNGANO?
3. Zvicinyi zvingatibesera kuti tiengejere kubongesera kwedu basa rinoithwa ngo hambzaji?
3 Itusu tinoreremeja maningi hambzaji jedu jinoshanda ngo simba kuti jisapote mbhuri yajo, jinocumaera masoko akanaka no kubesera ungano. Tingatoengejera kubongesera kwatinako ngo kuvona manera Jehovha na Jesu vanotaja hambzaji. Tinozobeserekazve ngo kuvona matajire aiita mupostori Pauro vanakaji.
4. Bhaibheri rinokhombijisa kudini kuti Jehovha anoreremeja vanakaji no vanarume?
4 Bhaibheri rinokhombija kuti Jehovha anoreremeja maningi vanakaji inga zvaanoita no vanarume. Inga muezaniso, irona rinokhombija kuti mu zana rokutanga, Jehovha wakapa mujimu mucena wake kuno vanakaji no vanarume i wakaita kuti ivona vakwanise kuita mushamaiso, wakadari inga kubhuya ngo ndumi jakasiyana-siyana. (Maitiro o Vapostori 2:1-4, 15-18) Vese vainga vazojwa ngo mujimu mucena, vova no vetero yo kuzotonga na Kristu. (VaGalàsia 3:26-29) Vanarume no vanakaji, vanavo vetero yo kuzopona kwenda no kwenda pasi pano. (Apokalipsi 7:9, 10, 13-15) Cimwenizve, vese, vanarume no vanakaji vakagajwa kuti vacumaere no kujijisa masoko akanaka. (Mateu 28:19, 20) Inga muezaniso, bhuku ro Maitiro o Vapostori rinobhuya ngo pamusoro po hambzaji inodanwa Prisira. Iyona no mwamuna wayo Akira vakabesera mwanarume umweni wainga wakajija maningi, waidanwa Aporo kuti azwisise cokwadi.—Maitiro o Vapostori 18:24-26.
5. Luka 10:38, 39, 42, inokhombijisa kudini kuti Jesu waireremeja vanakaji?
5 Jesu waireremeja vanakaji. Iyena aacaitevejera Vafarisi, avo vaijijisa kuti vanakaji avacaisisira. Ivona avacaibhuya no vanakaji pakawanda vandhu nee avacaibhuya navo ngo pamusoro po Matahwa. Kusiyapo zvondhozvo, Jesu waitobhuya shwiro jinosisira maningi no vanakaji inga zvaaitavo no vanarume. * (Verenganyi Luka 10:38, 39, 42.) Cimwenizve, iyena wakatendera kuti vanakaji vaende naye mu basa ro kucumaera. (Luka 8:1-3) Iyena wakatopa vanakaji cidakajiso co kuvhunja vapostori kuti iyena wainga wamuswa ko vakafa.—Johani 20:16-18.
6. Mupostori Pauro wakakhombijisa kudini kuti waireremeja vanakaji?
6 Mupostori Pauro wakavhunja Timoti kuti areremeje vanakaji. Pauro wakamuvhunja kuti ataje “majimbia inga majimai” no kuvona “vasikane inga hambzaji.” (1 Timoti 5:1, 2) Pauro wakaita zvizinji kuti abesere Timoti kuti ave Mukristu wakaivha, asi iyena waiziva kuti mai wa Timoti na mbiya wake, ndivona vakatanga kumujijisa “matahwa” akacena. (2 Timoti 1:5; 3:14, 15) Mu karata yake ku Varoma, Pauro wakacungamija hambzaji ngo mazina ajo kamare. Iyena waivona zvaiitwa ngo hambzaji iji, wotoguma pa kubonga ngo basa rovaiita.—VaRoma 16:14, 6, 12; VaFilipi 4:3.
7. Wari tiri kuda kudavira muvhunjo japi?
7 Ndima jinotevera jinovonesa kuti Bhaibheri arinangi kuti vanarume ndivona vanosisira maningi kupinda vanakaji. Hambzaji jinobesera maningi ungano i vakuru vanothemba kuti ivona vanobesa kumusijira runyararo no rubatano mu ungano. Asi pano muvhunjo munganani jinoda kudavihwa. Inga muezaniso: Ngenyi Jehovha nguva jimweni anoda kuti hambzaji jisunge resu? Zvecivoneka kuti hama ndijona jinogajwa inga vakuru no vabeseri vo ungano, waro izvi zvinoda kureva kuti hama jese ndi musoro wo hambzaji jese mu ungano?
KUREVA KUTI HAMA JESE NDI MUSORO WO HAMBZAJI JESE MU UNGANO?
8. Mukuzwirana no VaEfeso 5:23, kureva kuti hama jese ndi musoro wo hambzaji jese mu ungano? Sananguranyi.
8 Mupinguro wakafupika ngo wokuti haiwa! Hama asipi musoro wo hambzaji jese jiri mu ungano. Asi Kristu ndi musoro wo vese. (Verenganyi VaEfeso 5:23.) Pa mbhuri, mwamuna ndiyena musoro wo mukaji wake. Asi mwana wakabhabhatijwa asipi musoro wa mai wake. (VaEfeso 6:1, 2) Mu ungano, vakuru avatungamiriri zvese zvinoitwa ngo hama no hambzaji. (1 VaTesalònika 5:12; Vaheberi 13:17) Waro tingati kudini no hambzaji icizivi kurovohwa icikaripi kugara no vabari vayo? Iyona inoenderera mberi yecireremeja vabari vayo, pikija icikaripizve kutungamirihwa ndivona. Inoreremejavo vakuru, inga hama jo mu ungano, yeciziva kuti musoro wo vese ndi Jesu.
Vanakaji vacikazivi kurovohwa vacikaripizve kugara no vabari vavo, vanonga vecitungamirihwa ndi Jesu (Vonanyi ndima 8)
9. Ngenyi nguva jimweni hambzaji jinodikana kusunga resu?
9 Ngo zvokadi kuti Jehovha wakapa vanarume basa ro kutungamirira pa kujijisa no kunamata mu ungano. Asi iyena aazivi kupa vanakaji basa rondhoro. (1 Timoti 2:12) Ngenyi? Rimwe ro thangwe rakona ngo rokuti iyena wakagaja Jesu kuti ave musoro wo mwanarume kuti ungano irambe yakarongeka. Ngo ndava jo mugariro jimweni, hambzaji ingadikana kuita basa rinoitwa ngo hama. Pondhopo Jehovha ndipona paanokumbira kuti mwanakaji asunge resu. * (1 VaKorinto 11:4-7) Jehovha aakumbiri kuti hambzaji jiite zvondhozvo kuitira kujirerusa, asi kuti ijona jikhombije kuti jinoreremeja vaya vanotungamirira. Wari tiri kuda kudavira muvhunjo unoti: Ibasa rapi rino musoro jo mbhuri no vakuru?
MABASA ANO MUSORO WO MBHURI NO VAKURU
10. Ngenyi mukuru nguva jimweni angada kudira mutemo mu ungano?
10 Vakuru vanoda Jesu i vanodazve ‘mabvuta’ avakapuwa ndi Jehovha na Jesu kuti vamakorondhe. (Johani 21:15-17) Zvecivoneka kuti vakuru vanokorondha, ivona vangajivona inga baba kuno vese vavanokorondha. Ngo kudaro mukuru angarangarira kuti kudari musoro wo mbhuri anotendehwa kudira mutemo kuitira kungwarira mbhuri yake, mukuru angatendehwavo kudira zvimutemo zvaanovona kuti zvaizongwarira mavhuta a Mwari. Hama no hambzaji jimweni jinovangisa vakuru kuti vaite inga baba wavo ku zviro zvoumwari ngo kuvakumbira kuti vavatemere zvivaringo. Kureva kuti vakuru vo ungano no musoro jo mbhuri vano mabasa akaezana?
Vakuru vanobesera vese vari mu ungano kuti varambe vari phedo na Jehovha no kujizwa kuti vanodiwa. Jehovha wakavapa mutoro wo kuvhisa mu ungano vashaishi vacikakhaui (Vonanyi ndima 11-12)
11. Basa ro vakuru no musoro wo mbhuri rakaezana papi?
11 Mupostori Pauro wakavonesa kuti mabasa anoitwa ngo musoro wo mbhuri akadoezana padoko no mabasa anoitwa ngo mukuru. (1 Timoti 3:4, 5) Inga muezaniso, Jehovha anoda kuti mukaji no vana vazwire musoro wo mbhuri. (VaKolosi 3:20) Jehovha anoda kuti vese vari mu ungano vazwire vakuru. Iyena anoda kuti vakuru no musoro wo mbhuri vajijise vese vavanotungamirira kuti vade Jehovha. Vanodikana kuva no cokwadi cokuti vaya vavari kutungamirira, vari kujizwa kuti vanodiwa. Kudari inga musoro wo mbhuri waushoni, vakuru vanodikana kuva no cokwadi cokuti vaya vavari kutungamirira vari kuashira besero ravanoda pavanonga vecisongana no zvineso. (Jakobo 2:15-17) Mukuengejera, Jehovha anoda kuti vakuru no musoro wo mbhuri vateverere ndhungamiriro jake. Iyena anovangwajazve kuti ‘mucapindirija bzakatahwa’ mu Bhaibheri.—1 VaKorinto 4:6.
Jehovha wakapa musoro wo mbhuri mutoro wo kutungamirira mbhuri yake. Acito atema civaringo ciri cese, musoro wo mbhuri ano rudo anodikana kubhuisana no mukaji wake. (Vonanyi ndima 13)
12-13. Inga zvinokhombijwa pana VaRoma 7:2, basa ro musoro wo mbhuri rakasiyana papi no basa ro vakuru?
12 Asi basa rino musoro wo mbhuri rakasiyana maningi no basa ro mukuru wo ungano. Inga muezaniso, Jehovha wakagaja vakuru kuti vashande inga vatongi. Cimwenizve wakavapa mutoro wo kuvhisa mushaishi anonga acikakhaui mu ungano.—1 VaKorinto 5:11-13.
13 Ngo divi rimweni, Jehovha wakapa musoro wo mbhuri mabasa amweni aacikazivi kupa vakuru vo ungano. Inga muezaniso, Jehovha wakapekeja musoro wo mbhuri mutoro wo kudira mutemo kuitira mbhuri yake no kuva no cokwadi cokuti mutemo jondhojo jiri kutevejwa. (Verenganyi VaRoma 7:2.) Inga muezaniso, musoro wo mbhuri anodikana kutema nguva inodikana kuviya vana pamuzi. Iyena ano mutoro wo kupangira vana vake kudari vakatama kuzwira mutemo jaakadira. (VaEfeso 6:1) Ngo kudaro, musoro wo mbhuri ano rudo anotanga abhuisana no mukaji wake acito adira mutemo jo pamuzi, ngokuti vo vaviri ‘vaamuviri umwe.’ *—Mateu 19:6.
REREMEJANYI KRISTU MUSORO WO UNGANO
Jesu, ecitungamirihwa ndi Jehovha, ari kupa ndhungamiriro ku ungano yo Cikristu (Vonanyi ndima 14)
14. (a) Tecivona zvinonangwa pana Marco 10:45, ngenyi zvakava zvaushoni Jehovha kugaja Jesu inga musoro wo ungano? (b) Ngorapi basa ro Mukhumbi Unotonga? (Vonanyi bhokiso rinoti: “ Basa ro Mukhumbi Unotonga.”)
14 Ecishandisa muripo, Jehovha wakatenga upenyu hwo umwe nga umwe mu ungano no hwo vese vanotenda Jesu. (Verenganyi Marco 10:45; Maitiro o Vapostori 20:28; 1 VaKorinto 15:21, 22) Ngo kudaro, zvakava zvaushoni kamare kuti Jehovha agaje Jesu, uwo wakapa upenyu hwake kwatiri, kuti ave musoro wo ungano. Inga musoro wedu, Jesu ano mutoro wo kudira mutemo no kuita kuti mutemo jondhojo jitevejwe ngo mundhu umwe nga umwe pa mbhuri no mu ungano. (VaGalàsia 6:2) Asi Jesu anoita zvizinji kusiyapo kudira mutemo basi. Iyena anotida no kutikorondha ushoni.—VaEfeso 5:29.
15-16. Majijenyi ngo zvakanangwa ngo hambzaji inodanwa Marirei pomwe na hama Bhejamini?
15 Hambzaji jinokhombija kuti jinoreremeja Kristu ngo kuteveja ndhungamiriro jovanopuwa ngo hama jakagajwa ndiyena kuti jivakorondhe. Hambzaji jakawanda jinozwirana kamare no zvakananga hambzaji Marirei, inogara Estadhus Unidhus. Iyona yakati: “Zvokadi kamare, ndinoreremeja maningi ndau yangu inga mukaji no hambzaji mu ungano. Ndiri kuita zvese zvandinokwanisa kuti ndireremeje basa rakapuwa mwamunangu pomwe no vakuru ndi Jehovha. Asi mwamunangu no hama jimweni mu ungano jinobesera kuti kuita zviro izvo kureruke, ngo kundireremeja no kukhombija kubongesera ngo basa randinoita.”
16 Hama jinokhombija kuti ijona jinozwisisa nasiriro yo kutungamirira ngo kureremeja hambzaji. Hama Bhejamini vanogara Ingratera, vakati: “Ndakajija zvakawanda maningi ngo mupinguro jo hambzaji pa musongano no mazano ovakapa ngo pamusoro po kujija no kubudirira kwavanoita pavanonga vecicumaera. Ndinovona kuti basa ravanoita rinosisira maningi.”
17. Ngenyi tinodikana kureremeja ndhungamiriro jakadira Jehovha ngo pamusoro po kutungamirira?
17 Vanarume, vanakaji, musoro jo mbhuri no vakuru, vese pavanozwisisa ndhungamiriro jakadira Jehovha ngo pamusoro po kutungamirira, ungano yese inozoenderera mberi ino runyararo. Cinosisira maningi pa zvese, tinokuja Baba wedu vano rudo vo mugore, Jehovha.—Nduyo 150:6.
NDUMBO 123 Kubesera Urongwa hwo Umwari Takagondeka
^ ndim. 5 Ngorapi basa rino hambzaji mu ungano? Kunanga kuti hama jese jingaita musoro wo hambzaji jese mu ungano? Kunanga kuti mutoro uno vakuru wakaezana no uno musoro wo mbhuri here? Pa musoro uwu, tinozodavira muvhunjo iji takacijikira pa muezaniso jinowanika mu Soko ra Mwari.
^ ndim. 5 Vonanyi ndima 6 yo musoro unoti: “Beseranyi Hambzaji Jiri mu Ungano Yenyu,” wakabudiswa mu Murindiri wa Setembro wo 2020.
^ ndim. 9 Vonanyi bhokiso rinoti: “ Ngo Papi po Kuti Hambzaji Inodikana Kusunga resu?”
^ ndim. 13 Kuitira kukwanisa kuvona ano mutoro wo kukheta ungano inozoenda mbhuri yake, vonanyi ndima 17-19 jo musoro unoti: “Reremejanyi Ndau yo Vamweni mu Ungano ya Jehovha,” wakabudiswa mu Murindiri wa Agosto wo 2020.
^ ndim. 59 Kudari mukada kuziva zvizinji ngo pamusoro po shwiro iyi, vonanyi bhuku rinoti: Rambanyi Muri mu “Rudo hwa Mwari,” pa masoko o kuengejera ari pa mapheji 209-212.
^ ndim. 64 Kuti mukwanise kuvona basa rese rinoitwa ngo hama jo Mukhumbi Unotonga, vonanyi Murindiri wa 15 ya Julho wo 2013, mapheji 20-25, mu Cishona.
