1. Omolwashike aapiya yaJehova ye na ombili nuukumwe mokati kawo?

OTWA nyanyukwa sho tu li oshitopolwa shuukwanegumbo waJehova. Omolwashike aapiya yaJehova ye na ombili nuukumwe mokati kawo? Oshoka ohatu ningi ngaashi tatu vulu tu simaneke elongekidho lyuukwamutse ndyoka Jehova a tula po. Ngele otu uvu ko nawa kutya omolwashike Jehova a pa yamwe oonkondopangelo dhontumba, otatu ka kala twa hangana shi vulithe nale.

2. Omapulo geni tatu ka yamukula moshitopolwa shika?

² Moshitopolwa shika otatu ka kundathana kombinga yaamboka ya pewa oonkondopangelo megongalo. Otatu ka yamukula wo omapulo ngaashi: Aamwameme oye na oshinakugwanithwa shashike megongalo? Mbela omumwatate kehe oku li omutse gwomumwameme kehe? Mbela aakuluntugongalo naamboka ye li omitse dhomagumbo, oye na oonkondopangelo dha faathana? Tango, natu kundathaneni kutya otu na okutala ko ngiini aamwameme.

3. Oshike tashi vulu oku tu kwathela tu kale twa lenga iilonga yuudhiginini mbyoka hayi longwa kaamwameme?

³ Otwa lenga aamwameme oshoka ohaya longo nuudhiginini ya sile oshimpwiyu aanegumbo lyawo, yu uvithe onkundana ombwanawa noya kwathele yalwe megongalo. Opo tu kale twe ya lenga, otwa pumbwa oku ya tala ko ngaashi Jehova naJesus haye ya tala ko. Otatu ki ilonga wo oshindji komukalo moka omuyapostoli Paulus a li hu ungaunga naakiintu.

4. Ombiimbeli otayi ulike ngiini kutya Jehova okwa lenga aakiintu naalumentu?

 ⁴ Ombiimbeli otayi ulike kutya Jehova okwa lenga aakiintu naalumentu. Omimvo 2 000 nasha dha ka pita, Ombiimbeli oya popya kutya Jehova okwa li a pe aakiintu nosho wo aalumentu ombepo ondjapuki. Okwe shi ningi, opo yi ya pe oonkondo ya longe iikumithalonga, ngaashi okupopya omalaka gi ili nogi ili. (Iil. 2:1-4, 15-18) Ayehe mboka ya gwayekwa nombepo ondjapuki otaya ka pangela pamwe naKristus megulu. (Gal. 3:26-29) Shimwe ishewe, Jehova ota ka pa aakiintu naalumentu ondjambi yomwenyo gwaaluhe kombanda yevi. (Eh. 7:9, 10, 13-15) Ayehe oya pewa wo oshinakugwanithwa shokuuvitha nokulonga aantu onkundana ombwanawa. (Mat. 28:19, 20) Ombiimbeli mIilonga oya popya shi na ko nasha nomumwameme Priskila. Ye nomusamane gwe, Akula, oya li ya yelithile Apollos oshili momukalo gwa yela nawa, nonando Apollos okwa li enyakwa mokupopya noku shi nawa Omanyolo. — Iil. 18:24-26.

5. Ngaashi sha popiwa muLukas 10:38, 39, 42, Jesus okwa a li a tala ko ngiini aakiintu?

⁵ Jesus okwa simaneka nokwa tumbaleka aakiintu. Ina fa Aafarisayi mboka ya li ya dhina aakiintu nokaya li haya popi nayo mokati kaantu. Aafarisayi kaya li haya longo nando aakiintu kombinga yOmanyolo. Mepingathano nayo, Jesus okwa li ha longo wo naakiintu uuna ta kundathana iinima yomuule kombinga yOmanyolo pamwe naalongwa ye. * (Lesha Lukas 10:38, 39, 42.) Okwa li a pitike aakiintu ya ye pamwe naye uuna te ku uvitha kiitopolwa yi ili noyi ili. (Luk. 8:1-3) Sho sha mana oompata, Jesus okwa li a pe aakiintu uuthembahenda woku ka lombwela aayapostoli ye kutya okwa yumuka. — Joh. 20:16-18.

6. Omuyapostoli Paulus okwa li u ulike ngiini kutya okwa simaneka aakiintu?

⁶ Omuyapostoli Paulus okwa li a dhimbulukitha Timoteus a kale ha simaneke aakiintu. Okwe mu lombwele kutya nu ungaunge ‘naakulukadhi ongooyinakulu naakiintu aagundjuka ongaamwayina.’ (1 Tim. 5:1, 2) Nonando Paulus okwa li a kwathele lela Timoteus a kale neitaalo lya kola, okwa li wo a popi kutya yina nayinakulu oyo ye mu longo tango “Omanyolo omayapuki.” (2 Tim. 1:5; 3:14, 15) Paulus okwa li wo a tumbula omadhina gaamwameme mboka a popitha montumwafo ndjoka a nyolele Aaroma. Ka li owala a ndhindhilike iilonga yawo, ihe okwa popi wo kutya okwe ya pandula omolwiilonga yawo. — Rom. 16:1-4, 6, 12; Fil. 4:3.

7. Omapulo geni tatu ka tala kugo ngashingeyi?

⁷ Ngaashi twe shi mono metetekelo, Ombiimbeli kayi na nando mpoka ya popya kutya aamwatate oya simana ye vule aamwameme. Aamwameme oya simana lela nohaya kwathele megongalo. Aakuluntugongalo oya pumbwa ekwatho lyawo, opo megongalo mu kale mu na ombili nuukumwe. Ihe otu na okuyamukula omapulo taga landula, ngaashi: Omolwashike Jehova a tegelela aamwameme ya zale sha komutse omathimbo gamwe? Sho aamwatate oyo owala haya langekwa po ye li aakuluntugongalo naayakuligongalo, mbela shoka osha hala okutya omumwatate kehe oku li omutse gwomumwameme kehe megongalo?

8. Shi ikolelela kAaefeso 5:23, mbela omumwatate kehe oku li omutse gwomumwameme kehe megongalo? Shi yelitha.

⁸ Mbela omumwatate kehe oku li omutse gwomumwameme kehe megongalo? Aawe. Omutse gwawo oKristus. (Lesha Aaefeso 5:23.) Ngele tashi ya megumbo, omusamane oye omutse gwomukadhi. Omwanamati ke shi omutse gwayina, nonando okwa ninginithwa.  (Ef. 6:1, 2) Ngele tashi ya megongalo, aakuluntugongalo oye na oonkondopangelo dha ngambekwa. (1 Tes. 5:12; Heb. 13:17) Ongiini kombinga yomumwameme inaa hokanwa ngoka ihaa zi we megumbo limwe naavali ye? Oku na okukala natango he ya simaneke, nonando he ke li we omutse gwe. Oku na wo okusimaneka aakuluntugongalo, ihe Kristus oye omutse gwe, ngaashi owala e li omutse gwomulumentu kehe megongalo.

9. Omolwashike omumwameme a pumbwa okuzala sha komutse omathimbo gamwe?

⁹ Odhoshili kutya Jehova okwa langeka po aalumentu oyo ya kwatele komeho megongalo, shoka sha kwatela mo okulonga egongalo noku li kwathela li longele Jehova. Oshinakugwanithwa shoka ine shi pa nando aamwameme. (1 Tim. 2:12) Omolwashike mbela? Oshoka Jehova okwa hala megongalo mu kale elandulathano. Omolwetompelo ndyoka, okwa langeke po Jesus a ninge omutse gwomulumentu kehe. Ngele omumwameme okwi iyadha monkalo moka ta longo po oshilonga shoka shi na okuningwa komumwatate, nena Jehova okwa tegelela a zale sha komutse. * (1 Kor. 11:4-7) Shono itashi ti nando kutya aamwameme oye na ondondo yopevi, ihe Jehova okwa hala oku ya kwathela yu ulike kutya oya simaneka elongekidho lyuukwamutse ndyoka a tula po. Omanga tu na oshinima shoka momadhiladhilo, natu yamukule epulo ndika kutya: Omitse dhomagumbo naakuluntugongalo oye na oonkondopangelo dhi thike peni?

10. Oshike tashi vulu okuningitha omukuluntugongalo a kale a hala okutulila po egongalo oompango?

¹⁰ Aakuluntugongalo oye hole Kristus noye hole wo “oonzi” ndhoka Jehova naJesus ye ya  pa ye dhi tonatele. (Joh. 21:15-17) Omolwomatompelo omawanawa, omukuluntugongalo otashi vulika a kale u uvite kutya okwa fa he yaamboka ye li megongalo. Otashi vulika a dhiladhile kutya molwaashoka omutse gwegumbo ogwo gwu na uuthemba wokutulila po yaandjawo oompango opo ya kale megameno, ota vulu wo okutulila po oonzi dhaJehova oompango, opo e dhi gamene. Otashi vulika nokuli aamwatate naamwameme yamwe megongalo ya pule aakuluntugongalo ya kale haye ya ningile omatokolo, oshoka oyu uvite kutya oyo taye ya wilike. Mbela aakuluntugongalo oye na ngaa oonkondopangelo dha faathana naandhoka dhomitse dhomagumbo?

11. Oonkondopangelo dhomutse gwegumbo odha faathana ngiini naandhoka dhaakuluntugongalo?

¹¹ Omuyapostoli Paulus okwe shi ulike kutya opu na efaathano lyontumba pokati koonkondopangelo dhomutse gwegumbo naandhoka dhomukuluntugongalo. (1 Tim. 3:4, 5) Pashiholelwa, Jehova okwa hala aanegumbo ya kale haya vulika komutse gwegumbo. (Kol. 3:20) Okwa hala wo egongalo li kale hali vulika kaakuluntugongalo. Jehova okwa tegelela omitse dhomagumbo naakuluntugongalo ya longe nokusila oshimpwiyu pambepo mboka ye li kohi yewiliko lyawo. Oya pumbwa wo oku ya ningitha ya kale yu uvite kutya oye holike kuyo. Ngaashi omutse gwegumbo  kehe hagwu kwathele yaandjawo, aakuluntugongalo oya pumbwa wo okwaambidhidha iilyo yegongalo mbyoka ya pumbwa ekwatho. (Jak. 2:15-17) Jehova okwa tegelela ishewe aakuluntugongalo nomitse dhomagumbo, ya kwathele yalwe ya kale haya vulika komithikampango dhe. Okwe ya lombwela kutya inaya “konda shoka shu uthwa” nenge sha nyolwa mOmbiimbeli. — 1 Kor. 4:6.

12-13. Ngaashi sha popiwa mAaroma 7:2, oonkondopangelo dhomitse dhomagumbo odha yooloka ko ngiini kwaandhoka dhaakuluntugongalo?

¹² Opu na wo eyooloko enene pokati koonkondopangelo ndhoka aakuluntugongalo ye na naandhoka dhi niwe komitse dhomagumbo. Pashiholelwa, Jehova okwa langeka po aakuluntugongalo ya kale ongaapanguli megongalo, ihe oshinakugwanithwa shoka ine shi pa omitse dhomagumbo. Okwa pa wo aakuluntugongalo oshinakugwanithwa shokukonda mo megongalo omuyoni kehe ngoka inaa hala okwiiyela ombedhi. — 1 Kor. 5:11-13.

¹³ Jehova okwa pa wo omitse dhomagumbo oonkondopangelo dhontumba ndhoka aakuluntugongalo kaaye na. Pashiholelwa, okwa pa omutse gwegumbo uuthemba wokutulila po aanegumbo lye oompango nokushilipaleka kutya ota ye dhi landula. (Lesha Aaroma 7:2.) Pashiholelwa, omutse gwegumbo ogwu na uuthemba wokutulila po oyana ethimbo ndyoka ye na okugalukila megumbo ngele ye na mpoka ya li ya ya. Ogwu na wo uuthemba woku ya geela ngele oya kala inaaya vulika kompango ndjoka gwa tula po. (Ef. 6:1) Ihe omutse gwegumbo ngoka gwu hole yaandjawo, ihagwu ya tulile po oompango manga inaagwu popya nomukadhi, oshoka oye li “omuntu gumwe.” * — Mat. 19:6.

14. (a) Ngaashi sha popiwa muMarkus 10:45, omolwashike sho opala sho Jehova a langeka po Jesus e li omutse gwegongalo? (b) Oshilonga shOlutuwiliki oshashike? (Tala oshimpungu “ Iilonga yOlutuwiliki.”)

¹⁴ Okupitila mekuliloyambo, Jehova okwi ilikolela omwenyo gwakehe gumwe megongalo nosho wo tuu kehe ngoka ti itaale Jesus. (Lesha Markus 10:45; Iil. 20:28; 1 Kor. 15:21, 22) Onkee ano, osho opala sho Jehova a langeka po Jesus e li omutse gwegongalo, oshoka okwa yamba po omwenyo gwe molwetu. Jesus oye e na uuthemba wokutula po oompango ndhoka aantu ayehe ye na okulandula kutya nduno omegumbo nenge megongalo. Oku na wo uuthemba wokushilipaleka kutya ohatu vulika koompango ndhoka. (Gal. 6:2) Jesus ine tu tulila po owala oompango, ihe ohe tu sile wo oshimpwiyu noku tu hole pauhandimwe. — Ef. 5:29.

15-16. Owi ilongo shike moohapu dhomumwameme Marley nodhomumwatate Benjamin?

¹⁵ Aamwameme ohaya ulike kutya oya simaneka Kristus, mokulandula omalombwelo ngoka ha gandja okupitila maalumentu mboka a langeka po ye ya sile oshimpwiyu. Aamwameme oyendji otaya tsu kumwe naashoka sha popiwa komumwameme Marley, gwokoAmerika, sho a ti: “Onda lenga oshinakugwanithwa shoka ndi na megumbo ndi li omukulukadhi, naashoka ndi na megongalo. Ohandi ningi ngaashi tandi vulu ndi simaneke omusamane gwandje naakuluntugongalo, oshoka Jehova oyo a pa oonkondopangelo. Ohandi shi ningi nuupu nuupenda, oshoka omusamane gwandje naakuluntugongalo oya simaneka ndje nohaya pandula iilonga yandje.”

¹⁶ Aamwatate ohayu ulike kutya oya lenga elongekidho lyuukwamutse, mokukala ya simaneka aamwameme. Omumwatate Benjamin gwokoIngilanda, okwa ti: “Ondi ilonga mo oshindji momayamukulo ngoka aamwameme haya gandja pokugongala nomomaetopo ngoka haya pe ndje nkene ndi na okukonakona Ombiimbeli nosho wo nkene tandi vulu okupondola miilonga yokuuvitha noyokulonga aantu. Ondu uvite kutya iilonga mbyoka haya longo oya simana lela.”

17. Omolwashike tu na okusimaneka elongekidho lyuukwamutse?

¹⁷ Uuna ayehe megongalo kutya nduno aalumentu, aakiintu, omitse dhomagumbo naakuluntugongalo taya simaneke elongekidho lyuukwamutse ndyoka Jehova a tula po, ohashi humitha komeho ombili megongalo. Shoka sha dhenga mbanda osho kutya ohashi simanekitha wo Tate yetu gwomegulu, Jehova. — Eps. 150:6.