1. Ko e heigoa e taha kakano kua kaufakalataha e magafaoa ha Iehova?

FIAFIA lahi a tautolu he eke mo magafaoa ha Iehova. Ko e ha e magafaoa ha tautolu kua mafola mo e kaufakalataha? Taha kakano kua eketaha a tautolu oti ke fakalilifu e tuaga he ulu ne fakatū e Iehova. Ka maama mitaki e tautolu e tuaga he ulu to lahi e kaufakalataha ha tautolu.

2. Ko e heigoa e tau hūhū ka tali e tautolu he vala tala nei?

² He vala tala nei, to fakatutala a tautolu ke he matakupu he tuaga he ulu he ekalesia, po ke fakapotopotoaga. To tali foki e tautolu e tau hūhū nei: Ko e heigoa e matagahua he tau matakainaga fifine? Mooli kia ko e tau matakainaga taane oti ko e ulu he tau matakainaga fifine oti? Tatai kia e pule he tau motua ke he tau matakainaga tuga e pule he ulu he magafaoa ke he hoana mo e fanau haana? Fakamua, to fakatutala a tautolu ke he onoonoaga ha tautolu ke he tau matakainaga fifine.

3. Fakahokulo fēfē e tautolu e loto fakaaue ke he gahua ne taute he tau matakainaga fifine?

³ Uho lahi ki a tautolu e tau matakainaga fifine ne gahua malolō ke leveki e tau magafaoa ha lautolu, fakamatala e tala mitaki, mo e lalago e fakapotopotoaga. Kua fakahokulo foki e loto fakaaue ha tautolu ki a lautolu he manamanatu ke he puhala kua onoono a Iehova mo Iesu ki a lautolu. Aoga foki ki a tautolu he fakaako e puhala kua fehagai e aposetolo ko Paulo ke he tau fifine.

4. Fakakite fēfē he Tohi Tapu kua uho e tau fifine ti pihia mo e tau tagata taane ki a Iehova?

⁴ Fakakite he Tohi Tapu kua uho e tau fifine ti pihia mo e tau tagata taane ki a Iehova. Tuga anei, kua fakakite he magahala he tau aposetolo na foaki e Iehova e agaaga tapu ke he tau fifine  ti pihia mo e tau tagata taane ke maeke a lautolu oti ke taute e tau mena ofoofogia, tuga e fakaaoga he tau vagahau kehekehe. (Gahua 2:1-4, 15-18) Ko lautolu oti ia kua fakauku he agaaga tapu mo e amaamanaki ke pule mo e Keriso. (Kala. 3:26-29) Ko e tau fifine mo e tau tagata taane to moua e palepale he moui tukulagi ke he lalolagi. (Fakakite. 7:9, 10, 13-15) Kotofa oti e tau tagata taane mo e tau fifine ke fakamatala mo e fakaako e tala mitaki. (Mata. 28:19, 20) Ko e tohi ha Gahua kua mailoga e mena ne taute he matakainaga fifine ko Pisila fakalataha mo e taane haana ko Akula he lagomatai ke fakamaama fakahako e kupu mooli ke he tagata taane iloilo ko Apolo.​—Gahua 18:24-26.

5. Fakakite fēfē ia Luka 10:38, 39, 42 kua fakalilifu e Iesu e tau fifine?

⁵ Fakalilifu e Iesu e tau fifine. Nakai fifitaki a ia ke he aga he tau Farasaio ne onoono hifo ke he tau fifine mo e nakai tutala ki a lautolu he toloaga, mo e nakai tala Tohi Tapu mo lautolu. Ka e tutala a Iesu ke he tau kupu mooli uho lahi mo e tau fifine mo e tau tagata taane. * (Totou Luka 10:38, 39, 42.) Fakaatā foki e ia e tau fifine ke ō mo ia he tau fenoga fakamatala haana. (Luka 8:1-3) Ti foaki age e Iesu e lilifu ke he tau fifine ke tala age ke he tau aposetolo kua fakaliu tu mai a ia he mate.​—Ioane 20:16-18.

6. Fakakite fēfē he aposetolo ko Paulo kua fakalilifu a ia ke he tau fifine?

⁶ Fakamanatu pauaki he aposetolo ko Paulo ki a Timoteo ke fakalilifu e tau fifine. Tala age a Paulo ki a ia ke taute e “patu fifine, tuga ne matua fifine” mo e “tamāfine foki, tuga ne mahakitaga.” (1 Timo. 5:1, 2) Lahi e mena ha Paulo ne taute ke lagomatai a Timoteo ke eke mo Kerisiano motua fakaagaaga, ka e talahau e Paulo ko e matua fifine mo e tupuna fifine ha Timoteo ne fakaako fakamua a Timoteo ke he “tau Tohi Tapu.” (2 Timo. 1:5; 3:14, 15) Fakaalofa lahi a Paulo ke he tau matakainaga fifine he totoku e tau higoa ha lautolu he tohi haana ke he tau Roma. Mailoga e Paulo e tau gahua ne taute he tau matakainaga fifine nei ti talahau foki e ia e loto fakaaue haana ke he gahua ne taute e lautolu.​—Roma 16:1-4, 6, 12; Filipi 4:3.

7. Ko e heigoa e tau hūhū ka fakatutala a tautolu ki ai mogonei?

⁷ Fakakite he tau paratafa fakamua, kua nakai fai mena ne talahau he Tohi Tapu kua tokolalo hifo e tau matakainaga fifine he tau matakainaga taane. Kua uho lahi e tau matakainaga fifine fakahele mo e fakamokoi ki a tautolu, ti falanaki e tau motua ki a lautolu ke lagomatai ke fakatumau e mafola mo e kaufakalataha he fakapotopotoaga. Ka e fai hūhū ne lata ke tali. Tuga anei: Ko e ha kua manako a Iehova ke he matakainaga fifine ke uufi e ulu haana he falu magaaho pauaki? Ha ko e tau matakainaga taane ni hokoia kua fifili ke eke mo tau motua mo e tau fekafekau lagomatai, ti kakano kia e mena nei ko e tau matakainaga taane oti ko e ulu he tau matakainaga fifine oti he fakapotopotoaga?

8. Ia Efeso 5:23, ko e tau matakainaga taane oti kia ko e ulu he tau matakainaga fifine oti? Fakamaama.

⁸ Ko e tali kū ko e nakai! Ne nakai ko e ulu e matakainaga taane he tau matakainaga fifine oti i loto he fakapotopotoaga; ka ko Keriso hokoia ni. (Totou Efeso 5:23.) He magafaoa, ko e taane e pule he hoana haana. Nakai ko e tama taane kua papatiso e ulu he matua fifine haana. (Efeso 6:1, 2) He fakapotopotoaga, kua fakakaupā e pule he tau motua ke he tau matakainaga fifine mo e tau  matakainaga taane. (1 Tesa. 5:12; Hepe. 13:17) Ko e tau matakainaga fifine nofo takitokotaha kua nakai nonofo mo e tau matua taane mo e tau matua fifine ha lautolu ka matutaki ke fakalilifu e tau mamatua mo e tau motua. Ke tuga e tau tagata taane he fakapotopotoaga, taha ni e ulu ha lautolu ko Iesu.

9. Ko e ha e tau matakainaga fifine he falu magaaho kua lata ke uufi e ulu?

⁹ Mooli, kua fifili e Iehova e tau matakainaga taane ke takitaki e fakaako mo e tapuaki i loto he fakapotopotoaga, ka e nakai foaki e ia e takitakiaga pihia ke he tau fifine. (1 Timo. 2:12) Ko e ha? Ma e kakano taha ia kua fifili e ia a Iesu ke eke mo ulu he tagata taane ke fakatokatoka fakamitaki tumau e magafaoa haana. Kaeke ko e matakainaga fifine he tau tuaga kua lata ke taute e tau matagahua ne fa taute he matakainaga taane, kua manako a Iehova ke he matakainaga fifine ke uufi e ulu haana. * (1 Kori. 11:4-7) Ole a Iehova ke he tau matakainaga fifine ke taute e mena nei he nakai fakateaga e ia a lautolu ka e foaki ki a lautolu e puhala ke fakakite e fakalilifu ma e tuaga he ulu ne kua fakatoka e Ia. He tokaloto e tau manatu ia, to tali e tautolu e hūhū mogonei: Lahi fēfē e pule kua moua he tau ulu he magafaoa mo e tau motua?

10. Liga ko e ha ne manako e motua ke taute e tau matafakatufono ma e fakapotopotoaga?

¹⁰ Fakaalofa e tau motua ki a Keriso, ti fakaalofa a lautolu ke he “tau mamoe” ne tuku e Iehova mo Iesu ki lalo he levekiaga ha lautolu. (Ioane 21:15-17) Ha kua leveki he motua e fakapotopotoaga, liga manatu a ia kua tuga e matua taane a ia ki a lautolu he  fakapotopotoaga. Ti liga manatu a ia kaeke ko e ulu he magafaoa kua tonuhia ke taute e tau matafakatufono ke puipui e magafaoa haana, maeke e motua ke taute e tau matafakatufono kua manatu a ia ke puipui e tau mamoe he Atua. Ti liga fakamafana he falu matakainaga e tau motua ke eke mo tau ulu fakaagaaga ha lautolu he ole ke taute e tau fifiliaga ma lautolu. Ka e tatai kia e pule he tau motua he fakapotopotoaga mo e tau ulu he magafaoa?

11. Puhala fe kua tatai e tau matagahua he tau ulu he magafaoa mo e tau motua?

¹¹ Fakakite he aposetolo ko Paulo ko e pule he tau ulu he magafaoa kua tatai ke he falu puhala he pule he tau motua. (1 Timo. 3:4, 5) Ma e fakatai, manako a Iehova ke he tau tagata he magafaoa ke omaoma ke he ulu he magafaoa. (Kolo. 3:20) Ti manako a ia ki a lautolu he fakapotopotoaga ke omaoma ke he tau motua. Amanaki a Iehova ke he tau ulu he magafaoa mo e tau motua ke leveki fakaagaaga e tau magafaoa mo e tau matakainaga he fakapotopotoaga. Mo e leveki foki e tau manako he logonaaga ha lautolu. Tuga ni e tau ulu mitaki he magafaoa, lata e tau motua ke lagomatai a lautolu foki he tau magaaho matematekelea. (Iako. 2:15-17) Lafi ki ai, amanaki a Iehova ke he tau motua mo e tau ulu he magafaoa ke omaoma  a lautolu ke he tau tutūaga haana ka e ‘nakai mua ha lautolu a manatu ke he mena kua tohi’ he Tohi Tapu.​—1 Kori. 4:6.

12-13. He fakakite ia Roma 7:2, kehekehe fēfē e tau matagahua he tau ulu he magafaoa mo e tau motua?

¹² Ka e kehekehe lahi mahaki e matagahua he motua mo e matagahua he ulu he magafaoa. Tuga anei, kotofa e Iehova e tau motua ke eke mo tau fakafili, ti foaki e ia ki a lautolu e matagahua ke tuku ki tua a lautolu ne agahala ne nakai fakatokihala mai he fakapotopotoaga.​—1 Kori. 5:11-13.

¹³ Ka e fai pule ne tuku age e Iehova ke he tau ulu he magafaoa ne nakai tuku age e ia ke he tau motua. Tuga anei, tuku age e Ia ke he ulu he magafaoa ke fakatoka mo e mailoga kua muitua he magafaoa e tau matafakatufono haana. (Totou Roma 7:2.) Ma e fakatai, ko e tonuhia he ulu he magafaoa ke fifili e magaaho he tau fanau haana kua lata ke liliu mai ki kaina he pō. Ha ha ia ia foki e pule ke akonaki e tau fanau haana ka kaumahala ke omaoma ki ai. (Efeso 6:1) Mooli, fakatutala e ulu fakaalofa he magafaoa mo e hoana haana ato taute e tau matafakatufono he kaina; ha ko laua kua “tino taha.” *​—Mata. 19:6.

14. (a) He fakakite ia Mareko 10:45, ko e ha kua latatonu a Iehova ke kotofa a Iesu ke eke mo ulu he fakapotopotoaga? (e) Ko e heigoa e matagahua he Kau Fakatufono? (Kikite e puha “ Ko e Matagahua he Kau Fakatufono.”)

¹⁴ Puhala he lukutoto, fakatau e Iehova e tau momoui he tau tagata takitokotaha he fakapotopotoaga mo e tau tagata oti kua tua ke he lukutoto. (Totou Mareko 10:45; Gahua 20:28; 1 Kori. 15:21, 22) Kua latatonu  ha kua kotofa e ia a Iesu ke poa e moui haana ti eke mo ulu he fakapotopotoaga. Ha ko Iesu e ulu ha tautolu, ha ha ia ia e pule ke fakatoka mo e mailoga kua muitua e tau matafakatufono ke lata mo e tau mahani he tau tagata takitokotaha, tau magafaoa, mo e fakapotopotoaga katoa. (Kala. 6:2) Ka e nakai ni taute e Iesu e tau matafakatufono. Fagai mo e ofania e ia a tautolu takitokotaha.​—Efeso 5:29.

15-16. Ko e heigoa kua fakaako e koe mai he tau mena ne talahau he matakainaga fifine ko Marley mo e matakainaga taane ko Benjamin?

¹⁵ Fakakite he tau matakainaga fifine kua fakalilifu e lautolu e Keriso he omaoma ke he takitakiaga ne tuku age he tau tagata taane kua kotofa ke leveki a lautolu. Ko e matakainaga fifine ko Marley ne nofo i United States kua talahau e manatu he tau matakainaga fifine tokologa. Pehē a ia: “Ko e tau matagahua haaku ko e hoana mo e matakainaga fifine he fakapotopotoaga kua uho lahi ki a au. Fakatumau au ke feaki e aga hako ke he tuaga he ulu ne fakatū e Iehova. Ka ko e taane haaku mo e tau matakainaga taane he fakapotopotoaga kua fakamukamuka ki a au ha kua fakalilifu mo e talahau e lautolu e loto fakaaue ke he gahua ne taute e au.”

¹⁶ Fakakite he tau matakainaga taane kua maama e lautolu e fakatokaaga he ulu he fakalilifu e tau matakainaga fifine. Ko Benjamin ko e matakainaga taane ne nofo i Igilani, ne pehē: “Lahi e mena haaku ne fakaako mai he tau tali he tau matakainaga fifine he tau feleveiaaga, mo e mai he tau puhala kumikumi mo e tau puhala fakamatala mo e fakaako atu kua mitaki. Manatu au ko e gahua ne taute e lautolu kua aoga lahi.”

17. Ko e ha kua lata a tautolu ke fakalilifu e tuaga he ulu?

¹⁷ Ko e tau tagata taane oti, tau fifine, tau ulu he magafaoa, mo e tau motua he fakapotopotoaga kua maama mo e fakalilifu e tuaga he ulu to mafola e fakapotopotoaga. Mua atu ai, to fakaheke e tautolu ha tautolu a Matua fakaalofa he lagi ko Iehova.​—Sala. 150:6.