1. Busanaki abandu b’oMungu bali omo bughuma?

TUTSEMIRE kundi tuli baghuma b’oko bandu b’oMungu. Busanaki tuli kihanda ekiri omo bughuma n’omo buholo? Ekighuma ky’oko bikaleka, ni busana tukawatikaya abandu abo Yehova abiriha ehamuli nyilebe. Oko kwenene, omughulu tukalola embere erisikya endegheka ya Yehova ey’eriha abandu balebe b’ehamuli oko bandi, ko tukanalola embere eribya n’obughuma tutya.

2. Omo mwatsi ono tukendisubirya oko mabulyo wahi?

² Omo mwatsi ono, tukendikania oko abawite ehamuli omo ndeko. Kandi tukendisubirya oko mabulyo ano: Abali betu bawite omubírí wahi omo ndeko? Oko kwenene, obuli mughala wetu nina mutwe w’obuli mwali wetu? Ehamuli eyo abasyakulu bali nayo oko baghala n’abali betu, yinalingilirene n’ehamuli eyo tata awite oko mukali wiwe n’abana biwe? Eky’erimbere tulangire amalengekania awo tutolere eribya nagho oko bali betu.

3. Ni kyahi ekyangatuwatikya eritsemera omubírí owo abali betu bakakola?

³ Tukatsemera kundu abali betu abakakola kutsibu eriwatikya ebihanda byabo, abakatula engulu mbuya n’eriwatikya endeko. Nibya, tukabatsemera kutsibu twamabilengekania ngoko Yehova na Yesu bakabalangira. Kandi tukendilangira ngoko twangakolera abakali tukigha ngoko omukwenda Paulo abya akabakolera.

4. EBiblia ikakanganaya yiti ngoko Yehova akatsemera abalume n’abakali kutya?

 ⁴ EBiblia ikakanganaya ngoko Yehova akatsemera abakali n’abalume kutya. Eky’erileberyako, eBiblia yikakanganaya ngoko oko karne k’erimbere Yehova mwahira ekirimu kiwe kibuyirire oko balume n’abakali kutya, kandi mwabaha obutoki obwerikola ebitiko-tiko. (Emib. 2:1-4, 15-18) Abosi mubahirwa kw’ekirimu kibuyirire kandi bakasyatabala na Kristo. (Gal. 3:26-29) Abalume n’abakali kutya bakendisyahembwa engebe y’erikota oko kihugho. (Erib. 7:9, 10, 13-15) Abalume n’abakali bawite omubírí owerikangirirya n’eritula engulu mbuya. (Mat. 28:19, 20) Eky’erileberyako, ekitabu ky’Emíbírí kikakanaya oko mwali wetu oyukahulawamo Pirisila. Iye n’omulume wiwe, Akwila, mubakangirirya Apolo y’ekwenene ndeke, oyo abya mundu oyo asi emyatsi yo ndeke.​—Emib. 18:24-26.

5. Erisako rye Luka 10:38, 39, 42 likakanganaya liti ngoko Yesu abya asikirye abakali?

⁵ Yesu mwasikya abakali. Yesu mwatakwama emibere y’Abafarisayo ababya bakakangirirya bati abakali si bandu b’omughaso ng’abalume. Babya isibangakania n’abakali ahali abandu bangyi, kutse isibangakania nabo oko myatsi eyilebirye Amasako. Aliwe, Yesu mwakania oko kwenene y’omughaso haghuma n’abalume n’abakali kutya, kandi mwalighira abakali erimukwama omo mubírí w’eritulira. * (Soma Luka 10:38, 39, 42.) Kandi Yesu mwaha abakali b’olusunzo lw’eriyabwira abakwenda ngoko abirilubuka. (Luka 8:1-3).​—Yoa. 20:16-18.

6. Paulo mwakangania ati ngoko asikirye abakali?

⁶ Omukwenda Paulo mwabwira Timoteo ati asikaye abakali. Paulo mwamubwira ati inyakolera “abakekulu ng’abo koyo” akolere “n’abakali balere ng’abali” babo. (1 Tim. 5:1, 2) Paulo mwawatikya kutsibu Timoteo eribya Mukristo oyukulire, aliwe abya inyanasi ngoko mama wa Timoteo na mukaka wiwe bo babya b’erimbere erikangirirya Timoteo Amasako abuyirire. (2 Tim. 1:5; 3:14, 15) Paulo mwakerya abali betu obuli mundu omo rina riwe omo baruha yiwe oko Abanya Roma. Paulo mwatalangira lisa omubírí owo bali betu babya bakakola, aliwe kandi, mwabugha ngoko mwasima omubírí owo bakola.​—Rom. 16:1-4, 6, 12; Flp. 4:3.

7. Tukendisubirya oko mabulyo wahi?

⁷ Omo syonungu esitangirire, mutukalangira ngoko eBiblia siyiribugha yiti abalume balengire abakali. Abali betu aboswire n’olwanzo kandi abakahitaya bakawatikaya endeko, n’abasyakulu b’endeko bakayiketera abali betu abo kundi bakaleka endeko iyabya m’obuholo n’obughuma. Aliwe, hane amabulyo awatolere eribana ebisubiryo. Ng’eky’erileberyako, busanaki Yehova akasaba omukali eriswika omutwe wiwe mughulu mulebe? Kundi abaghala betu basa bo bakabya baghombe bawatikya kutse basyakulu omo ndeko, ekyo kinabughire kiti obuli mughala wetu ni mutwe w’obuli mwali wetu omo ndeko?

8. Ngoko kiri omo Abanya Efeso 5:23, obuli mughala wetu nina mutwe w’obuli mwali wetu? Kanaya.

⁸ Omo kikuhi, ekisubiryo ni iyehe! Omulume si mutwe w’obuli mwali wetu omo ndeko y’eKikristo. (Soma Abanya Efeso 5:23.) Omo kihanda, omulume awite ehamuli oko mukali wiwe. Omulwana oyubatisibwe si mutwe wa mama wiwe. (Efe. 6:1, 2) Nibya n’omo ndeko ehamuli eyo abasyakulu bawite oko baghala na bali betu yiwite emipaka. (1 Tes. 5:12;  Ebr. 13:17) Abambesa basimbi abatikere n’ababuti babo, bakalola embere erisikya ababuti babo n’abasyakulu omo ndeko. Aliwe ng’abalume b’omo ndeko, abali betu n’abo bawite omutwe mughuma, ni bughambu Yesu.

9. Busanaki abakali bakaswika emitwe yabo mighulu milebe?

⁹ Kwenene Yehova abirisombola abalume erimanira amakangirirya n’eriramya omo ndeko; mwataha abakali b’ehamuli eyo. (1 Tim. 2:12) Busanaki? Busana n’ekyaleka inyasombola Yesu eribya mutwe w’omulume, ni bughambu, emyatsi yibye iyinatondekire ndeke. Kyamasaba omukali erikola omwatsi owatolere erikolwa n’omulume, aho Yehova akasaba omukali eriswika omutwe wiwe. * (1 Kor. 11:4-7) Yehova akasaba abali betu erikola batya, si busana n’eribalangiramo bandu b’ahisi, aliwe busana n’eribaha omwanya w’erisikya ehamuli eyo abirihiraho. Okw’ekyo, leka tusubiraye oko ribulyo lino: Emitwe y’ebihanda n’abasyakulu b’omo ndeko bawite ehamuli yahi?

10. Busanaki omusyakulu omo ndeko anganalengekania ati anganahiraho ebyalayiro omo ndeko?

¹⁰ Abasyakulu banzire Kristo, kandi banzire eriteya “esyombuli” esyo Yehova na Yesu babiribaha. (Yoa. 21:15-17) Kundi omusyakulu akawatikaya endeko, ekyo kyanganaleka inyalengekania ati ali nga tata oko abali betu omo ndeko. Anganalengekania ati kundi tata w’ekihanda ali n’ehamuli y’erihiraho ebyalayiro ebyangateya ekihanda, omusyakulu omo ndeko anganahiraho ebyalayiro ebyo akalengekanaya ati byanganateya esyombuli sy’oMungu. Kandi abaghala n’abali betu balebe banganakuna abasyakulu balebe erikola batya bakasababo  bati bayisoghe omo mwanya wabo. Aliwe, abasyakulu b’omo ndeko n’emitwe y’ebihanda banawite ehamuli ngumerera?

11. Ehamuli eyo emitwe y’ebihanda yiwite yisosene yiti n’ehamuli eyo abasyakulu b’endeko bawite?

¹¹ Omukwenda Paulo mwakangania ngoko ehamuli eyo omutwe w’ekihanda awite oko kihanda kiwe, yisosene hake n’ehamuli eyo abasyakulu bawite omo ndeko. (1 Tim. 3:4, 5) Ng’eky’erileberyako, Yehova anzire abandu b’omo kihanda ibasikya omutwe w’ekihanda. (Kol. 3:20) Kandi anzire abaghala n’abali betu ibasikya abasyakulu omo ndeko. Yehova anzire emitwe y’ebihanda ibawatikya ebihanda byabo byo bunya-kirimu, n’abasyakulu b’endeko ibawatikya abali omo ndeko bo bunya-kirimu. Ng’emitwe y’ebihanda eyuwene, abasyakulu bakawatikaya abali omo ndeko abalaghire oko buwatikya omo mughulu owakalire. (Yak. 2:15-17) Kandi Yehova akasaba abasyakulu n’emitwe y’ebihanda eriwatikya abandi erisikya ebyalayiro biwe, kandi akabahana ati ‘isibaya hali oko ebihandikire’ omo Biblia.​—1 Kor. 4:6.

12-13. Ngoko kiri omo Abanya Roma 7:2, ehamuli eyo emitwe y’ebihanda yiwite yisighene yiti n’ehamuli y’abasyakulu omo ndeko?

¹² Aliwe kandi, ehamuli eyo omusyakulu awite omo ndeko yisighene n’ehamuli  y’omutwe w’ekihanda. Ng’eky’erileberyako, Yehova abiriha abasyakulu b’ehamuli ey’eribya batsweri, kandi abiribaha omubírí ow’erihigha omo ndeko abakoli b’amalolo abatebindula emitima yabo.​—1 Kor. 5:11-13.

¹³ Oko lundi luhande, Yehova abiriha emitwe y’ebihanda ehamuli nyilebe eyo abasyakulu b’endeko sibawite. Ng’eky’erileberyako, abiriha emitwe y’ebihanda ehamuli y’erihiraho ebyalayiro ebilebirye ekihanda, n’erilangira nga binemusikibwa ndeke. (Soma Abanya Roma 7:2.) Eky’erileberyako, omutwe w’ekihanda ali n’ehamuli y’erihiriraho abana biwe b’ekyalayiro ekilebirye endambi ey’erihikirako omo nyumba, ali n’ehamuli y’erisuyira abana biwe bamatendisikya ekyalayiro ekyo. (Efe. 6:1) Kundi omulume n’omukali wiwe ni “mubiri mughuma,” kitolere omutwe w’ekihanda inyakania n’omukali wiwe embere sy’erihiraho ebyalayiro omo nyumba. *​—Mat. 19:6.

14. (a) Ngoko kiri omo Mariko 10:45, busanaki mukyatolera Yehova erisombola Yesu mo mutwe w’endeko? (b) Akatunga Akakasondola kawite mubírí wahi? (Lebaya akasanduku “ Omubírí w’Akatunga Akakasondola.”)

¹⁴ Erilabira embanulo, Yehova mwaghula engebe y’obuli mundu omo ndeko, n’obuli mundu oyukikiriraya Yesu. (Soma Mariko 10:45; Emib. 20:28; 1 Kor. 15:21, 22) Neryo kwenene mukyatolera Yehova erisombola Yesu mo mutwe w’endeko kundi mwayiherera mo mbanulo busana n’abandu. Busana n’ekyo, Yesu awite ehamuli y’erihiraho ebyalayiro ebyo abandu, ebihanda n’endeko yosi batolere erikwama. Kandi awite ehamuli y’erilebya  nga binemusikibwa. (Gal. 6:2) Aliwe, Yesu akakola myatsi mingyi kulenga kw’erihiraho ebyalayiro lisa. Akakanganaya ngoko atsomene obuli mughuma w’okwitwe.​—Efe. 5:29.

15-16. Wamigha mwatsi wahi erilabira ebinywa bya mwali wetu Marley na mughala wetu Benjamin?

¹⁵ Abali betu bakakanganaya ngoko bakasikaya Kristo bakakwama obusondoli bw’abandu abo Yesu abirihiraho. Bali betu bangyi bakalengekanaya nga mwali wetu Marley, oyo w’ikere e Amerika oyukabugha ati: “Ingye ngatsemera olusunzo lwaghe olweribya mukali Mukristo omo ndeko. Ngayikasa erisikya ehamuli eyo Yehova abiriha omulume waghe, n’abasyakulu omo ndeko. Aliwe, omulume waghe n’abaghala betu omo ndeko babirileka ikyaniolobera eribasikya kundi bakakanganaya ngoko banisikirye kandi bakanibwira ngoko bakatsemera emyatsi eyo ngakola.”

¹⁶ Abaghala betu bakakanganaya ngoko basi ndeke endegheka ya Yehova ey’erisikya ehamuli omwisikya n’erikenga abali betu. Mughala wetu oyukahulawamo Benjamin, owe Angletere akabugha ati: “Nabirigha emyatsi mingyi oko bisubiryo ebyo abali betu bakaleta omo mihindano; babiriniwatikya ngoko nangayighisya n’eryuwania enzira yaghe y’eritulira. Ninasi ngoko omubírí owo bakakola ni w’omughaso munene.”

17. Busanaki litolere itwasikya endegheka ya Yehova ey’eriha abandu balebe b’ehamuli oko bandi?

¹⁷ Abosi omo ndeko, abalume n’abakali, emitwe y’ebihanda, n’abasyakulu omo ndeko bamabiminya ndeke n’erisikya endegheka eyo Yehova abirihiraho, nibughambu, eriha abandu balebe b’ehamuli oko bandi, endeko ikabyamo obuholo. Kandi eky’omughaso munene tukaletera Yehova, Tata wetu w’elubula y’olukengerwa.​—Esy. 150:6.