1. Ke lebaka lefe le lengwe leo le dirago gore ka phuthegong go be le botee?

RE THABELA go ba ka lapeng la Jehofa. Ke ka baka la’ng lapa le la Jehofa le na le khutšo le botee? Lebaka le lengwe ke gore ka moka ga rena ka phuthegong re šoma ka thata gore re kwe bao Jehofa a ba neilego boikarabelo bja go re etelela pele. Ge e ba re kwešiša gore re swanetše go dira eng go bontšha gore re hlompha bao ba re etelelago pele, re tlo ba le botee.

2. Re tlo araba dipotšišo dife sehlogong se?

² Sehlogong se re tlo kwa gore banna ba na le boikarabelo bofe ka phuthegong. Le gona re tlo araba dipotšišo tše: Jehofa o neile dikgaetšedi mošomo ofe ka phuthegong? Na monna yo mongwe le yo mongwe ka phuthegong ke hlogo ya mosadi yo mongwe le yo mongwe ka phuthegong? Na bagolo ba na le boikarabelo bjo bo swanago le bja dihlogo tša malapa? Sa mathomo, a re kweng gore re swanetše go lebelela dikgaetšedi bjang.

3. Re ka bontšha bjang gore re leboga mošomo woo dikgaetšedi di o dirago ka phuthegong?

³ Re leboga dikgaetšedi tša rena tšeo di šomago ka thata go hlokomela malapa a tšona, go bolela ditaba tše dibotse le go thuša ba bangwe ka phuthegong. Ge re ka naganišiša ka tsela yeo Jehofa le Jesu ba lebelelago dikgaetšedi ka yona, le rena re tlo thoma go di leboga kudu. Re tlo kwa le gore moapostola Paulo o be a swara dikgaetšedi bjang.

4. Beibele e bontšha bjang gore Jehofa o tšea banna le basadi ba le bohlokwa?

⁴ Beibele e bontšha gore Jehofa o tšea banna le basadi ba le bohlokwa.  Ka mohlala, mehleng ya baapostola, Jehofa o ile a nea banna le basadi moya wa gagwe o mokgethwa go ba thuša gore ba dire dilo tše di kgahlišago go swana le go bolela ka maleme a fapafapanego. (Dit. 2:1-4, 15-18) Jehofa o ile a tlotša banna le basadi ka moya o mokgethwa e le gore ba tle ba buše le Kriste. (Bagal. 3:26-29) Le gona, banna le basadi ba tlo hwetša moputso wa go phela ka mo go sa felego Paradeiseng. (Kut. 7:9, 10, 13-15) Taba e nngwe ke gore banna le basadi ka moka ba filwe boikarabelo bja gore ba bolele ditaba tše dibotse tša Mmušo wa Modimo. (Mat. 28:19, 20) Ka mohlala, puku ya Ditiro e bolela ka kgaetšedi yo a bitšwago Perisila. Yena le monna wa gagwe Akhwila ba ile ba thuša Apollo go kwešiša Mangwalo gabotse le ge a be a rutegile kudu.—Dit. 18:24-26.

5. Luka 10:38, 39 le 42 e bontšha bjang gore Jesu o be a hlompha basadi?

⁵ Jesu o be a hlompha basadi. O be a sa swane le Bafarisei bao ba bego ba nyatša basadi. Bafarisei ba be ba sa bolele le mosadi pele ga batho e bile ba be ba ka se tsoge ba boletše le mosadi ka mangwalo a makgethwa. Eupša Jesu o ile a ruta banna le basadi. * (Bala Luka 10:38, 39, 42.) Le gona o ile a dumelela basadi ba bangwe gore ba sepele le yena ge a be a eya go ruta batho ka Modimo. (Luka 8:1-3) Jesu o ile a ba a fa basadi ba bangwe tokelo ya gore ba ye ba botše baapostola ba gagwe gore o tsošitšwe bahung.—Joh. 20:16-18.

6. Moapostola Paulo o bontšhitše bjang gore o be a hlompha basadi?

⁶ Moapostola Paulo o ile a gopotša Timotheo ka go lebanya gore a hlomphe basadi. Paulo o ile a mmotša gore a sware “basadi ba bagolo bjalo ka bomma” le gore a lebelele “basadi ba bafsa bjalo ka dikgaetšedi.” (1 Tim. 5:1, 2) Paulo o dirile mošomo o mogolo go thuša Timotheo gore e be Mokriste yo a nago le maikarabelo. Eupša o be a sa lebale gore mmago Timotheo le makgolo wa gagwe ke bona ba mo rutilego “mangwalo a makgethwa” pele. (2 Tim. 1:5; 3:14, 15) Ge Paulo a be a ngwalela Baroma lengwalo, o ile a dumediša dikgaetšedi tše dingwe ka maina. Paulo o be a lemoga seo dikgaetšedi tšeo di se dirilego e bile o ile a leboga mošomo o mobotse woo di o dirilego.—Baroma 16:1-4, 6, 12; Bafil. 4:3.

7. Gona bjale re tlo araba dipotšišo dife?

⁷ Dirapa tše di fetilego di šetše di hlalositše gore Beibele ga e bontšhe gore basadi ba a nyatšega ka phuthegong. Dikgaetšedi di thuša kudu ka phuthegong, e bile bagolo ba ithekgile kudu ka dikgaetšedi gore ka phuthegong go be le khutšo le botee. Eupša go sa na le dipotšišo tše dingwe tšeo re swanetšego go hwetša dikarabo tša tšona. Ka mohlala, ke ka baka la’ng Jehofa a nyaka gore ka dinako tše dingwe kgaetšedi a rwale se sengwe hlogong? Ka ge e le banna feela ba kgethwago go ba bahlanka ba bodiredi le bagolo, na se se ra gore monna yo mongwe le yo mongwe ka phuthegong ke hlogo ya mosadi yo mongwe le yo mongwe ka phuthegong?

8. Go ya ka Baefeso 5:23, na ngwanabo rena yo mongwe le yo mongwe ke hlogo ya kgaetšedi yo mongwe le yo mongwe ka phuthegong? Hlalosa.

⁸ Karabo ke aowa! Ga se gore ngwanabo rena yo mongwe le yo mongwe ke hlogo ya kgaetšedi yo mongwe le yo mongwe ka phuthegong. Eupša Jesu Kriste ke yena hlogo ya phuthego. (Bala Baefeso 5:23.) Ka lapeng, monna ke hlogo ya mosadi wa gagwe. Eupša ngwana wa mošemane yo a kolobeditšwego ga se hlogo ya mmagwe. (Baef. 6:1, 2) Le gona ka phuthegong, Jehofa o neile bagolo boikarabelo bjo itšego bja go hlokomela bana babo rena le  dikgaetšedi. Eupša boikarabelo bjoo go na le mo bo felelago gona. (1 Bathes. 5:12; Baheb. 13:17) Re ka reng ka kgaetšedi yo a sego a nyalwa e bile a se sa dula le batswadi ba gagwe? Le yena o tšwela pele a hlompha batswadi ba gagwe gotee le bagolo. Eupša go no swana le bana babo rena ba bangwe ba ka phuthegong, le yena o na le hlogo e tee, e lego Jesu Kriste.

9. Ke ka baka la’ng ka dinako tše dingwe go nyakega gore dikgaetšedi di rwale se sengwe hlogong?

⁹ Jehofa ga se a nea dikgaetšedi boikarabelo bja go ruta phuthego, eupša o bo file banna feela. (1 Tim. 2:12) Ke ka baka la’ng a dirile bjalo? Ke ka gobane a nyaka gore ka phuthegong go be le thulaganyo. Ge e ba go ka nyakega gore kgaetšedi a dire mošomo woo ka tlwaelo o dirwago ke bana babo rena, gona Jehofa o nyaka gore a rwale se sengwe hlogong. * (1 Bakor. 11:4-7) Jehofa o nyaka gore dikgaetšedi di rwale se sengwe hlogong e le gore di bontšhe gore di hlompha boikarabelo bjo Jehofa a bo filego bana babo rena feela, e sego go bontšha gore dikgaetšedi ga di bohlokwa ka phuthegong. Ga bjale a re arabeng potšišo ye: Dihlogo tša malapa le bagolo ba na le boikarabelo bjo bokaaka’ng?

10. Ke’ng seo se ka dirago gore mogolo a fele a nyaka go beela phuthego melao?

¹⁰ Bagolo ba rata Jesu Kriste, e bile ba rata le “dinku” tšeo Jehofa le Jesu ba ba filego gore ba di hlokomele. (Joh. 21:15-17) Ka ge mogolo a hlokomela phuthego, a ka fela a ikwa eka ke tatago bao ba lego ka phuthegong. Ka gona a ka ipotša gore ka ge tate a na le boikarabelo bja go beela lapa la gagwe melao e le gore a le šireletše, gona go ra gore mogolo le yena o swanetše go beela dinku tša Modimo melao e le gore a di šireletše. Le gona ge bana babo rena le dikgaetšedi  ba kgopela bagolo gore ba ba direle diphetho tše itšego, ba ka dira gore bagolo bao ba ikwe eka ke dihlogo tša bona. Eupša na boikarabelo bjo bagolo ba nago le bjona bo swana le bja dihlogo tša malapa?

11. Boikarabelo bjoo dihlogo tša malapa di nago le bjona bo swana bjang le bja bagolo?

¹¹ Moapostola Paulo o ile a bontšha gore go na le moo boikarabelo bja dihlogo tša malapa bo swanago le bja bagolo. (1 Tim. 3:4, 5) Ka mohlala, Jehofa o nyaka gore mosadi le bana ka lapeng ba hlomphe hlogo ya lapa. (Bakol. 3:20) Le gona o nyaka gore bao ba lego ka phuthegong ba hlomphe bagolo. Jehofa o nyaka gore dihlogo tša malapa le bagolo ba thuše bao ba ba hlokomelago gore ba rate Jehofa. Dihlogo tša malapa le bagolo ba swanetše go kgonthišetša batho bao ba ba hlokometšego gore ba bohlokwa. Le gona go swana le dihlogo tša malapa, bagolo le bona ba kgonthišetša gore bao ba hlokago thušo ka phuthegong ba hwetša thušo yeo. (Jak. 2:15-17) Taba e nngwe ke gore Jehofa o nyaka gore bagolo le dihlogo tša malapa ba thuše batho ba bangwe go mo kwa. Le gona o ba eletša gore ba “se ke [ba] fetela ka kua ga dilo tše di ngwadilwego” ka Beibeleng.—1 Bakor. 4:6.

12-13. Go ya ka Baroma 7:2, boikarabelo bja dihlogo tša malapa bo fapana bjang le bja bagolo?

¹² Go na le moo boikarabelo bja dihlogo tša  malapa bo fapanago le bja bagolo. Ka mohlala, Jehofa ga se a fa dihlogo tša malapa matla a go šoma bjalo ka baahlodi, eupša matla ao o a file bagolo. Le gona o ba file le matla a go tloša badiradibe bao ba sa itsholego ka phuthegong.—1 Bakor. 5:11-13.

¹³ Go thwe’ng ka dihlogo tša malapa? Jehofa o file dihlogo tša malapa boikarabelo bjoo a sego a bo fa bagolo. Ka mohlala, o neile dihlogo tša malapa boikarabelo bja go direla malapa a tšona melao le go kgonthišetša gore ba lapa ba latela melao yeo. (Bala Baroma 7:2.) Ka mohlala, hlogo ya lapa e na le matla a go beela bana melao ya gore ba boe nako mang ka gae. Le gona e na le matla a go ba otla ge ba sa kwe melao yeo. (Baef. 6:1) Monna yo e lego hlogo ya lapa e botse o boledišana le mosadi wa gagwe pele a ka dira diphetho tše itšego ka lapeng. Se se bohlokwa ka gobane bobedi bja bona ke “nama e tee.” *—Mat. 19:6.

14. (a) Go ya ka Mareka 10:45, ke ka baka la’ng taba ya gore Jehofa o kgethile Jesu gore e be hlogo ya phuthego e sa belaetše le gatee? (b) Boikarabelo bja Sehlopha se Bušago ke Bofe? (Bona lepokisi leo le rego “ Boikarabelo bja Sehlopha se Bušago.”)

¹⁴ Jehofa o dirišitše sehlabelo sa Jesu sa topollo go rekolla motho yo mongwe le yo mongwe yo a lego ka phuthegong go akaretša le batho ba bangwe bao ba dumelago go Jesu. (Bala Mareka 10:45; Dit. 20:28; 1 Bakor. 15:21, 22) Ka baka leo ga re belaele ge a kgethile Jesu gore e be hlogo ya phuthego ka gobane Jesu o ile a ikgafa gore a neele sehlabelo sa topollo. Ka ge Jesu e le hlogo ya rena, o na le matla a go bea melao ya kamoo re swanetšego go phela ka gona, kamoo malapa a swanetšego go  phela ka gona le kamoo phuthego e swanetšego go phela ka gona. Le gona o na le matla a go kgonthišetša gore re latela melao yeo. (Bagal. 6:2) Eupša Jesu ga a no re beela melao feela, o a re hlokomela e bile o re rata ka moka ga rena.—Baef. 5:29.

15-16. O ithuta’ng go seo kgaetšedi Marley a se boletšego le seo ngwanabo rena Benjamin a se boletšego?

¹⁵ Dikgaetšedi di bontšha gore di hlompha Kriste ka go kwa ditaelo tšeo banna bao ba kgethilwego go re hlokomela ba re neago tšona. Dikgaetšedi tše dintši di ka dumelelana le seo kgaetšedi Marley, yo a dulago United States, a se boletšego. O itše: “Ke tšeela godimo boikarabelo bjoo Jehofa a mphilego bjona bja go ba mosadi ka lapeng le go ba kgaetšedi ka phuthegong. Ke leka ka thata go hlompha boikarabelo bjo Jehofa a bo filego monna wa ka ka lapeng le bjo a bo filego bagolo ka phuthegong. Eupša monna wa ka le bagolo ka phuthegong ba dira gore ke se thatafalelwe ke go hlompha boikarabelo bjoo Jehofa a ba filego bjona, ka gobane le bona ba a ntlhompha e bile ba leboga mošomo wo ke o dirago.”

¹⁶ Bana babo rena ba bontšha gore ba hlompha thulaganyo ya Jehofa ka go hlompha dikgaetšedi le go di tšeela godimo. Ngwanabo rena Benjamin yo a dulago England, o re: “Ke ithutile dilo tše dintši go dikarabo tša dikgaetšedi le dilong tšeo di di dirago go ithuta Beibele le dikgatišo tša mokgatlo. E bile ke ithutile le go kaonefatša bokgoni bja ka bja go nea bohlatse le go ruta batho tšhemong. Dikgaetšedi di na le karolo e bohlokwa ka phuthegong.”

17. Ke ka baka la’ng re swanetše go hlompha taba ya gore Jehofa o file ba bangwe boikarabelo bja go etelela pele ba bangwe?

¹⁷ Ge bohle ka phuthegong, banna, basadi, dihlogo tša malapa le bagolo, ba kwešiša le go hlompha taba ya gore Jehofa o file ba bangwe boikarabelo bja go etelela pele ba bangwe, ka phuthegong go ba le khutšo. Sa bohlokwa le go feta ke gore ge re dira bjalo re tumiša Tatago rena yo a re ratago, Jehofa.—Ps. 150:6.