1. Emwe aha nshonga ezirikureetera eka ya Yehova kugira obumwe n’eha?

NITUSHEMERERWA kuba bamwe aha b’eka ya Yehova. Ahabw’enki turi eka emwe erimu obusingye bwingi n’obumwe? Enshonga emwe n’okugira ngu nituteeraho kworobera abu Yehova ataireho kuba emitwe yaitu. Nangwa, oku turikwongyera kwetegyereza ebirikukwata aha batoorainwe kuba emitwe, nikwo turikwongyera kugira obumwe.

2. Ni bibuuzo ki ebi turikuza kugarukamu omu kicweka eki?

² Omu kicweka eki, nituza kugamba aha nshonga y’obushoboorozi omu kibiina. Nituza n’okugarukamu ebibuuzo ebi: Banyaanyazi-itwe baine bujunaanizibwa ki? Mbwenu shi buri w’eishe-emwe n’omutwe gwa buri munyaanyazi-itwe? Abareeberezi b’ekibiina shi baine obushoboorozi aha b’eishe-emwe omu kibiina nk’obu emitwe y’amaka baine aha bakazi baabo n’abaana baabo? Okubanza, ka tureebe oku twine kutwara banyaanyazi-itwe.

3. Nitubaasa kwongyera tuta kusiima banyaanyazi-itwe ahabw’emirimo ei barikukora?

³ Nitusiima munonga banyaanyazi-itwe abarikukora n’amaani kureeberera amaka gaabo, kubuurira amakuru marungi, n’okushagika ekibiina. Nitubaasa kwongyera kubasiima twateekateeka aha ku Yehova na Yesu barikubatwara. Kandi nituza kugasirwa turikushwijuma oku entumwa Paulo yaabaire naatwariza abakazi.

4. Baibuli neeyoreka eta ngu Yehova naatwara abakazi nk’ab’omuhendo kwingana n’abashaija?

 ⁴ Baibuli neeyoreka ngu Yehova naatwara abakazi nk’ab’omuhendo kwingana n’abashaija. Nk’eky’okureeberaho, neeyoreka ngu omu kyasha ky’okubanza, Yehova akaha abashaija n’abakazi omwoyo gurikwera baagira n’amaani g’okukora eby’okutangaaza, nk’okugamba endimi z’omutaano. (Byak. 2:1-4, 15-18) Abashaija n’abakazi aba bakashukwaho omwoyo gurikwera baagira amatsiko g’okutegyeka na Kristo. (Gal. 3:26-29) Abashaija n’abakazi boona nibaija kutunga ekiconco ky’amagara agatahwaho omu nsi. (Kush. 7:9, 10, 13-15) Kandi boona abashaija n’abakazi bahairwe obujunaanizibwa bw’okubuurira n’okwegyesa abandi amakuru marungi. (Mat. 28:19, 20) Nangwa, ekitabo ky’Ebyakozirwe nikigamba aha murimo gw’omukazi Omukristaayo orikwetwa Priskila na iba Akula abaahweraire Apolo owaabaire ayegire gye kushoboorokyerwa amazima.​—Byak. 18:24-26.

5. Ebiri omuri Luka 10:38, 39, 42 nibyoreka bita oku Yesu yaabaire naatwariza abakazi?

⁵ Yesu akaba naaha abakazi ekitiinisa. Akaba atarikukuratira emigyenzo y’Abafarisaayo, abaabaire nibagaya abakazi nangwa batarikwenda n’okubagambaho omu rweteeraine, n’okugaaniira nabo aha Byahandiikirwe. Kureka, omu kigaaniiro kye n’abeegi be aha Byahandiikirwe hakaba harimu n’abakazi. * (Shoma Luka 10:38, 39, 42.) Akaikiriza n’abakazi kugyenda nawe omu ngyendo ze ez’okubuurira. (Luk. 8:1-3) Kandi Yesu akaha abakazi omugisha gw’okuranga okuzooka kwe barikugambira entumwa ze.​—Yoh. 20:16-18.

6. Entumwa Paulo akooreka ata ngu naaha abakazi ekitiinisa?

⁶ Entumwa Paulo akaijutsya Timoseo kuha abakazi ekitiinisa. Paulo akamugambira kutwara “abakazi bakuru nka” baanyina ‘n’abakazi bato n’abaishiki nka’ banyaanya. (1 Tim. 5:1, 2) Paulo akakora kihango kuhwera Timoseo kuba Omukristaayo okuzire omu by’omwoyo, kwonka akamanya ngu nyinenkuru Timoseo na nyina nibo baabandize kumwegyesa “ebyahandiikirwe ebirikwera.” (2 Tim. 1:5; 3:14, 15) Paulo akaramutsya banyaanya butunu arikukoresa amaziina gaabo omu baruha ei yaahandiikiire Abarooma. Tarabasiimire ahabw’emirimo yaabo yonka, beitu akabasiimira n’obuheereza bwabo obw’Ekikristaayo.​—Rom. 16:1-4, 6, 12; Fil. 4:3.

7. Nituza kugarukamu bibuuzo ki hati?

⁷ Nk’oku obucweka obu twaheza burikworeka, Baibuli terikugira ngu banyaanyazi-itwe n’ab’ahansi waabagyeragyeranisa n’ab’eishe-emwe. Banyaanyazi-itwe abakundwa kandi efura, n’ab’omuhendo omu kibiina, kandi abareeberezi nibabeesiga omu kureetaho obusingye n’obumwe omu kibiina. Kwonka hakiriho ebibuuzo ebiine kugarukwamu. Nk’eky’okureeberaho: Ahabw’enki Yehova naayenda ngu munyaanyazi-itwe ayetwekyerere obumwe? Obu ab’eishe-emwe bonka nibo barikutooranwa kuba abareeberezi n’abaheereza, nikimanyisa ngu buri w’eishe-emwe n’omutwe gwa buri munyaanyazi-itwe omu kibiina?

8. Kurugiirira aha Abaefeso 5:23, mbwenu shi buri w’eishe-emwe n’omutwe gwa buri munyaanyazi-itwe? Shoboorora.

⁸ Eky’okugarukamu kigufu ni ngaaha! Ow’eishe-emwe tarikubaasa kuba omutwe gwa banyaanyazi-itwe boona omu kibiina, omutwe gwabo ni Kristo. (Shoma Abaefeso 5:23.) Omu ka, omushaija niwe arikuba aine obushoboorozi aha mukazi we. Mutabani  wa munyaanyazi-itwe obatiziibwe tarikubaasa kuba omutwe gwa nyina. (Efe. 6:1, 2) Kandi omu kibiina, obushoboorozi obu abareeberezi baine ahari banyaanyazi-itwe n’ab’eishe-emwe bwine obugarukiro. (1 Tes. 5:12; Heb. 13:17) Banyaanyazi-itwe abatakagiire omu bushwere abarikutuura bonka nibagumizamu kuha abazaire baabo n’abareeberezi ekitiinisa. Kwonka, kushushana n’Abakristaayo abashaija omu kibiina, Yesu niwe mutwe gwabo omwe wenka.

9. Ahabw’enki banyaanyazi-itwe obumwe baine kwetwekyerera aha mutwe?

⁹ Kwonka n’amazima, Yehova atooraine abashaija kwebembera omu kwegyesa n’omu kuramya omu kibiina, kandi abakazi tabahaire obushoboorozi obwo. (1 Tim. 2:12) Ahabw’enki? Kiri nk’oku Yehova yaatooraine Yesu kuba omutwe gw’omushaija, kugira ngu eka ya Yehova, nikyo kibiina kigume kirimu obuteeka. Kwonka haabaho embeera kikeetengyesa ngu munyaanyazi-itwe ahikiirize obujunaanizibwa oburikukira kuhikiirizibwa ow’eishe-emwe, Yehova naayenda ngu munyaanyazi-itwe ogwo ayetwekyerere aha mutwe. * (1 Kor. 11:4-7) Yehova naayenda ngu banyaanyazi-itwe bakore eki, ahabw’okwenda ngu boorobere entebeekanisa y’obushoboorozi, beitu kutari kubagaya. Turikwijuka enshonga ezi, hati ka tugarukyemu ekibuuzo eki: Emitwe y’amaka n’abareeberezi baine obushoboorozi burikwingana ki?

10. Niki ekirikubaasa kureetera omureeberezi kwenda kutaho eby’okukuratira omu kibiina?

¹⁰ Abareeberezi nibakunda Kristo, kandi nibakunda ‘n’entaama’ ezi Yehova na Kristo  baabakwatsize kureeberera. (Yoh. 21:15-17) Omureeberezi ahabw’ebigyendererwa birungi, naabaasa kweteekateekaho nk’omutwe gw’abari omu kibiina kandi ishebo. Naabaasa kuteekateeka ngu omutwe gw’eka ku araabe aine obushoboorozi bw’okutaho eby’okukuratira kurinda eka ye, n’omureeberezi naabaasa kutaho eby’okukuratira kurinda entaama za Ruhanga. Kandi ab’eishe-emwe na banyaanyazi-itwe abamwe nibabaasa kuhiga abareeberezi kuba nk’emitwe yaabo omu by’omwoyo barikubashaba kubacweramu. Kwonka shi buzima abareeberezi omu kibiina n’emitwe y’amaka baine obushoboorozi burikushushana?

11. Obujunaanizibwa bw’emitwe y’amaka n’abareeberezi nibushushana buta?

¹¹ Entumwa Paulo akooreka ngu obujunaanizibwa bw’omutwe gw’eka n’omureeberezi bwine ebi burikushushanisa. (1 Tim. 3:4, 5) Nk’eky’okureeberaho, Yehova naayenda ngu ab’omu ka boorobere omutwe gwabo. (Kol. 3:20) Kandi naayenda ngu ab’omu kibiina boorobere abareeberezi. Yehova naayenda ngu emitwe y’amaka n’abareeberezi bahamye ngu abari ahansi y’obushoboorozi bwabo bari gye omu by’omwoyo. Kandi nibafayo aha nyehurira z’abari ahansi y’obushoboorozi bwabo. Kandi abareeberezi kushushana n’emitwe y’amaka, nibahamya ngu baahwera ab’omu  kibiina haabaho obukyene. (Yak. 2:15-17) N’ekindi, Yehova naayenda ngu abareeberezi n’emitwe y’amaka bahigye abandi kugyendera aha mitindo ye batarikurenga aha bihandiikirwe omu Baibuli.​—1 Kor. 4:6.

12-13. Nk’oku kiri omu Abarooma 7:2, obujunaanizibwa bw’emitwe y’amaka nibutaana buta aha bw’abareeberezi?

¹² Kwonka, obujunaanizibwa bw’omureeberezi n’omutwe gw’eka bwine entaaniso mpango. Nk’eky’okureeberaho, Yehova ahaire abareeberezi obushoboorozi bw’okukora nk’abaramuzi, kandi yaabaha n’obujunaanizibwa bw’okwiha omu kibiina omusiisi orikwanga kweteisa.​—1 Kor. 5:11-13.

¹³ Kwonka bo emitwe y’amaka, Yehova abahaire obushoboorozi obu atahaire abareeberezi. Nk’eky’okureeberaho, emitwe y’amaka abahaire obushoboorozi bw’okutaho eby’okukuratira omu ka n’okuhamya ngu byagyenderwaho. (Shoma Abarooma 7:2.) Kimwe aharibyo, omutwe gw’eka aine obushoboorozi bw’okutaho eshaaha ezi abaana be baine kuhikiraho omuka omu mwabazyo. Kandi aine n’obushoboorozi bw’okufubira abaana be baaremwa kworobera engyenderwaho egyo. (Efe. 6:1) Kwonka, omutwe gw’eka naabanza yaakigaaniiraho n’omukazi we atakataireho eby’okukuratira omuka, ahakuba bombi n’omubiri gumwe. *​—Mat. 19:6.

14. (a) Kuhikaana n’ebiri omuri Mako 10:45, ahabw’enki kihikire Yehova kutoorana Yesu kuba omutwe gw’ekibiina? (b) Obujunaanizibwa bw’akakiiko akareeberezi ni buuha? (Reeba akabokusi, “ Obujunaanizibwa bw’Akakiiko Akareeberezi.”)

¹⁴ Yehova arikwihirira aha kitambo, akagura amagara ga buri omwe omu kibiina n’abantu  boona okutwarira hamwe. (Shoma Mako 10:45; Byak. 20:28; 1 Kor. 15:21, 22) N’ahabw’ekyo kihikire okureeba ngu akatoorana Yesu owaahaireyo amagara ge nk’ekitambo kuba omutwe gw’ekibiina. Yesu omutwe gwaitu aine obushoboorozi bw’okutaho ebiragiro n’okuhamya ngu byakuratirwa abantu, amaka, n’ekibiina kyona. (Gal. 6:2) Kwonka Yesu naakora ekirikukira aha kutaho ebiragiro. Naariisa buri omwe ahariitwe kandi atureeberera.​—Efe. 5:29.

15-16. Nooyegyera ki aha bigambo bya munyaanyazi-itwe Marley n’ow’eishe-emwe Benjamin?

¹⁵ Banyaanyazi-iwe nibaha Kristo ekitiinisa barikukuratira obuhabuzi obu barikuheebwa abashaija abu atooraine kubareeberera. Banyaanyazi-itwe baingi nibaikirizana n’emiteekateekyere ya Marley, orikutuura omuri United States. Naagira ati: “Omwanya gwangye nka muka omushaija kandi omukazi Omukristaayo omu kibiina, ningutwara nka mukuru. Butoosha ninkora n’amaani kugira emiteekateekyere ehikire aha ntebeekanisa ya Yehova ey’emitwe y’amaka n’ekibiina. Kwonka ibanyi n’ab’eishe-emwe omu kibiina boorobize enshonga egi ahakuba nibampa ekitiinisa kandi nibasiima ebi ndikukora.”

¹⁶ Ab’eishe-emwe nibooreka ngu nibeetegyereza entebeekanisa egyo barikuha banyaanyabo omu kibiina ekitiinisa. Benjamin, ow’eishe-emwe orikutuura omuri England, naagira ati: “Nyegiire bingi aha by’okugarukamu bya banyaanyazi-itwe omu nteerane n’obuhabuzi aha bikwatiraine n’okweyegyesa n’okukora gye omu buheereza. Ninteekateeka ngu nibakora omurimo gw’omuhendo.”

17. Ahabw’enki twine kuha ekitiinisa entebeekanisa y’emitwe omu kibiina n’omu maka?

¹⁷ Boona omu kibiina, abashaija, abakazi, emitwe y’amaka, n’abareeberezi, baayetegyereza entebeekanisa y’emitwe, kandi bakagyorobera, ekibiina nikibamu obusingye. Kandi ekikuru munonga, nituhimbisisa Tataitwe ow’omu iguru Yehova owa rukundo.​—Zab. 150:6.