1. Antoy sakey a rason no akin ya walay pankakasakey ed pamilya nen Jehova?

MALIKET tayo ta parte tayo na pamilya nen Jehova. Akin et mareen tan walay pankakasakey tayo? Say sakey a rason et lapud uunoren tayoy uksoyan na inkaulo ya ginawa nen Jehova. Diad tua, no mas natatalosan tayoy uksoyan na inkaulo, mas onelet so pankakasakey tayo.

2. Anto ran tepet so ebatan tayo ed sayan artikulo?

² Diad sayan artikulo, aralen tayo so inkaulo diad loob na kongregasyon. Ebatan tayo met irayan tepet: Antoy betang ya inter nen Jehova ed saray sister? Duga kasin isipen ya kada brother et ulo na amin ya sister? Kasin say autoridad na saray elder ed kongregasyon et parehas ed autoridad na saray ulo na pamilya? Aralen tayo nin unona no akin ya importante iray sister ed kongregasyon.

3. Antoy gawaen tayo pian mas napabli tayo ray agagin bibii?

³ Proud tayo ed saray sister ya maas-asikaso ed pamilya ra, makulikulin manpulong, tan matulong ed saray kakongregasyon da. Mas napabli tayo ra no aralen tayo no antoy pakanengneng nen Jehova tan Jesus ed sikara. Maabig no aralen tayo met so impantrato nen apostol Pablo ed saray agagin bibii.

4. Anto ray nabasa ed Biblia ya prueba ya parehas so panamabli nen Jehova ed saray lalaki tan bibii?

⁴ Ipapanengneng na Biblia ya parehas so panamabli nen Jehova  ed saray lalaki tan bibii. Singa bilang, nen panaon na saray apostol, inkalbo nen Jehova so masanton espiritu to ed saray lalaki tan ontan met ed saray bibii pian makapansalita ira na nanduruman lenguahe. (Gawa 2:1-4, 15-18) Tan aliwan lalaki labat so pinili nen Jehova ya magmaliw ya kaiba nen Jesus ya manuley ed tawen​—wala met iray bibii. (Gal. 3:26-29) Lalaki tan bibii so makaawat na bilay ya andi-anggaan diad dalin. (Apo. 7:9, 10, 13-15) Say kimey ya panagpulong tan panagbangat na maong a balita et aglabat inter ed saray lalaki, noagta pati diad saray bibii. (Mat. 28:19, 20) Diad tua, nabasa ed libro na Gawa so agawaan na agin bii ya si Priscila. Sikato tan say asawa ton si Aquila so tinmulong ed edukadon laki ya si Apolos pian mas natalosan toy katuaan.​—Gawa 18:24-26.

5. Base ed Lucas 10:38, 39, 42, akin et nibaga tayon nirespeto nen Jesus iray bibii?

⁵ Nirespeto nen Jesus iray bibii. Agto inalig iray Fariseo ya abebbeba so pakanengneng dad saray bibii. Agda ra kakatongtongen ed publikon lugar tan agda ra ibabangat tungkol ed Kasulatan. Duma balet si Jesus ta anggan saray bibii et ibabangat to. * (Basaen so Lucas 10:38, 39, 42.) Wala ra ingey bibii ya ipipila to no manpupulong. (Luc. 8:1-3) Tan bibii so inikdan nen Jesus na pribilehyo ya mangipaamta ed saray apostol ya sikatoy binilay la na Dios.​—Juan 20:16-18.

6. Akin et nibaga tayon nirespeto nen apostol Pablo iray agagin bibii?

⁶ Nanengneng ed saray sulat nen apostol Pablo ya nirespeto to ray bibii. Binilin nen Pablo si Timoteo ya ituring to ray akukulaw ya singa ra nanay to, tan ituring to ray mas ugaw ya bibii ya singa ra agagi to. (1 Tim. 5:1, 2) Anggano baleg so agawaan nen Pablo pian nipasal si Timoteo tan onaligwas ed espiritual, binidbir toy impansagpot na nanay tan bai nen Timoteo pian nibangat dad sikato iray “masanton sulat.” (2 Tim. 1:5; 3:14, 15) Diad samay sulat nen Pablo ed saray taga Roma, sinansakey ton kinumusta iray agagin bibii, ya binibitla toy ngaran da. Imbaga to met iray agawaan dad kongregasyon tan pisalsalamatan to ra.​—Roma 16:1-4, 6, 12; Fil. 4:3.

7. Anto ran tepet so ebatan tayo?

⁷ Singa naaralan ed akauna iran parapo, anggapoy nabasa ed Biblia ya mas abeba iray sister nen saray brother. Saray maaro tan masakripisyon sister et importante ed kongregasyon, tan amta na saray elder ya baleg so nitutulong na saray sister pian mareen so kongregasyon tan walay pankakasakey. Balet ebatan tayo met irayan tepet: Akin et ibabaga na Biblia ya wala ray panaon ya kaukolan ya manpandong iray sister? Duga kasin isipen ya kada brother et ulo na amin ya sister ed kongregasyon ta saray brother met labat so natuturon elder tan ministeryal a lingkor?

8. Base ed Efeso 5:23, kasin kada brother et ulo na amin ya sister? Ipaliwawa.

⁸ Say simplin ebat et andi. Si Kristo so ulo na amin ed kongregasyon. (Basaen so Efeso 5:23.) Diad loob na pamilya, say asawan laki so ulo na asawa to. Anggano say anak a laki et bautismado la, aliwan sikato so ulo na nanay to. (Efe. 6:1, 2) Tan diad loob na kongregasyon, limitado labat so autoridad na saray elder diad saray agagi. (1 Tes. 5:12; Heb. 13:17) Panon to no say sakey ya single ya sister et anggapo lad pudir na atateng to? Respetoen  to ni ran siansia, balet agla sakop na inkaulo nen tatay to. Diad loob na kongregasyon, rerespetoen to iray elder, balet si Jesus so bibidbiren ton ulo to, singa met saray brother ya say ulo da et si Jesus.

9. Akin ya no maminsan et kaukolan ya manpandong iray sister?

⁹ Saray lalaki so inikdan nen Jehova na responsabilidad ya mangidaulo tan manbangat ed kongregasyon, tan agto inikdan iray bibii na ontan ya autoridad. (1 Tim. 2:12) Akin ey? On, ta labay nen Jehova ya mauksoy tan organisado so kongregasyon. Atan so rason no akin ya wala met so ulo na saray lalaki, si Jesus. Kanian no bilang ta diad agnaiwasan ya situasyon et gawaen na sakey a sister so responsabilidad na saray brother, kaukolan toy manpandong. * (1 Cor. 11:4-7) Ontan so ganggan nen Jehova ed saray sister aliwan lapud iyaabeba to ra, noagta labay to ya ipanengneng day respeto ed uksoyan na inkaulo. Niay tepet ya isublay tayon ebatan: Antoy pandumaan na autoridad na saray ulo na pamilya tan saray elder?

10. Akin ya no maminsan et isipen na sakey ya elder ya sarag toy manggawa na saray ganggan ed kongregasyon?

¹⁰ Inaro na saray elder si Kristo, tan inaro da met iray “karnero” ya inmatalek nen Jehova tan Jesus ed sikara. (Juan 21:15-17) Lapud imamalasakit na sakey ya elder iray agagi, ompan isipen to ya sikato so pinagka-tatay ed kongregasyon. Kanian ompan say amta to et sarag toy manggawa na saray ganggan ya nepeg ya unoren na saray agagi pian naprotektaan ira, ya singa gagawaen tod loob na pamilya  to. No maminsan, ontan so nalilikna na arum ya elder ta wala ray agagi ya akadependin maong ed sikara. Tan no walay kaukolan dan desisyonan, tepetan da ray elder no antoy nepeg dan gawaen. Balet parehas kasi so autoridad na saray elder ed kongregasyon tan saray ulo na pamilya?

11. Anto ray pamparehoan na autoridad na saray ulo na pamilya tan saray elder?

¹¹ Nanengneng ed saray sulat nen apostol Pablo ya wala met iray pamparehoan na autoridad na saray ulo na pamilya tan saray elder. (1 Tim. 3:4, 5) Singa bilang, labay nen Jehova ya unoren na saray ananak so ama ra. (Col. 3:20) Tan labay to met ya unoren na saray agagi iray elder ed kongregasyon. No panon ya igaganggan nen Jehova iray ama ya asikasoen so espiritualidad na pamilya ra, ontan met so nepeg ya gawaen na saray elder ed kongregasyon. Diad loob na pamilya, seseguroen na ama ya nipapalikna toy panangaro ed pamilya to. Ontan met ed kongregasyon, ipapalikna na saray elder ya inar-aro da ray agagi. Tan no panon ya lelegpeten na ama so pamilya to, tutulongan met na saray elder iray agagin mankaukolan. (Sant. 2:15-17) Ontan met, diad loob na pamilya tan ed kongregasyon, parehon iilaloan nen Jehova  ya ibangat na saray ama tan saray elder iray ganggan to tan seguroen dan natutumbok iratan. Imbaga to met ya ag-ira “onlalampas ed saray bengatlan nisulat” ed Biblia.​—1 Cor. 4:6.

12-13. Singa ipapanengneng na Roma 7:2, akin et nibagan duma so autoridad na saray ulo na pamilya tan saray elder?

¹² Balet wala met iray pandumaan na autoridad na saray elder tan saray ulo na pamilya. Singa bilang, saray elder labat so tinuro nen Jehova ya magmaliw ya ukom, tan responsabilidad da ya ekalen ed kongregasyon so nankasalanan ya agmagbabawi.​—1 Cor. 5:11-13.

¹³ Balet wala met so inter nen Jehova ya responsabilidad na saray ulo na pamilya ya agto inter ed saray elder. Singa bilang, inikdan toy autoridad iray ama ya manggawa na saray ganggan ed loob na pamilya tan seguroen dan natutumbok iratan. (Basaen so Roma 7:2.) Alimbawa, walay karapatan na ulo na pamilya ya mangibaga no anton oras so nepeg ya isempet na ananak to tan walay autoridad ton disiplinaen ira no agda itan unoren. (Efe. 6:1) Siempre, say maaron ulo na pamilya et alaen to ni opinyon na asawa to antis ya manggawa na ontan iran ganggan, ta ibabaga na Biblia ya say sanasawa et “sakey a laman.” *​—Mat. 19:6.

14. (a) Base ed Marcos 10:45, akin et duga labat ya si Jesus so pinili nen Jehova ya ulo na kongregasyon? (b) Anto so responsabilidad na Mananguley ya Ulop? (Nengnengen so kahon ya “ Say Responsabilidad na Mananguley ya Ulop.”)

¹⁴ Panamegley na dondon, sinaliw nen Jehova so bilay na kada sakey ed kongregasyon, ontan met ed bilay na arum nin totoo  ya mangipanengneng na pananisia ed si Jesus. (Basaen so Marcos 10:45; Gawa 20:28; 1 Cor. 15:21, 22) Kanian duga labat ya say pinili nen Jehova ya ulo na kongregasyon et si Jesus ta inter toy bilay to parad sikatayo. Lapud si Jesus so ulo tayo, walay autoridad ton mangggawa na saray ganggan ya nepeg ya unoren na kada indibidual, kada pamilya, tan kada kongregasyon. Seseguroen to met ya uunoren tayo iratan. (Gal. 6:2) Balet aliwan satan labat so gagawaen nen Jesus. Seseguroen ton napapakan so kada sakey ed sikatayo ta inar-aro to tayo.​—Efe. 5:29.

15-16. Antoy naaralan mo ed imbaga nen Sister Marley tan si Brother Benjamin?

¹⁵ Nipanengneng na saray sister ya rerespetoen day Kristo no uunoren da ray lalaki ya tinuro ton mangasikaso ed sikara. Seguradon nalilikna met na arum ya sister iyan imbaga nen Sister Marley ya taga United States. Kuan to: “Amtak ya importante so betang ko bilang asawan bii tan bilang sakey ya sister ed kongregasyon. Lanang kon papanonotan so sarilik ya kaukolan kon respetoen so uksoyan na inkaulo ya ginawa nen Jehova. Pero diad tua, agak naiirapan ya respetoen si asawak tan saray brother ed kongregasyon mi, ta rerespetoen da ak met tan misalsalamat irad saray nagagawaan ko.”

¹⁶ Nipanengneng met na saray brother ya uunoren da so uksoyan na inkaulo no rerespetoen da ray sister. Onia so imbaga nen Benjamin ya taga England: “Dakel so nanaaralan ko ed saray komento na saray sister. Makakaaral ak met ed paraan na panangiyaral tan panagpulong da ta marundunong ira. Amtak ya baleg so nagagawaan da.”

17. Akin et importantin unoren tayo so uksoyan na inkaulo?

¹⁷ No amin ya lalaki, bibii, ulo na pamilya, tan elder ed kongregasyon et natatalosan da so uksoyan na inkaulo tan uunoren da itan, mareen so kongregasyon. Tan say sankaimportantian, nidadayew tayoy maaron Ama tayo ed tawen, si Jehova.​—Sal. 150:6.