1. Ngera ta er a uchul me a telungalek er a Jehovah a ngar er a kltarreng?

NGKMAL soad el chedal a telungalek er a Jehovah. Ngera uchul me a telungalek er kid a kmal budech e ngar er a kltarreng? A ta er a uchul me nguaisei e le kid lolecholt a omengull el kirel a blechebechel a derreder el bla leketmeklii a Jehovah. Sel bo dungil medengelii a blechebechel a derreder e kede mo ungil melisiich er a kltarreng er a delongeled.

2. Ngera el ker a bo donger er tia el suobel?

² Ngar tia el suobel, e kede mo mesaod er a rolel a derreder er a chelsel ongdibel. Ke dirrek el mo mesaod a nger er aika el ker: Ngera ngerechelir a rudos er a chelsel a ongdibel? A rokui el odam te mera el bderrir a rokui el odos? A klisiich el lolab a remechuodel el kirir a rudam me a rudos ngdi osisiu ngii me a klisiich el lolab a rebderrir a telungalek el kirir a rebecherir me a rengelekir? Me a kot e me bo dosaod el kmo ngkirel uangera osenged el kirir a rudos.

3. Kede mekera kilungii omereng el saul er kid el kirel a ureor loruul a rudos?

³ Kede oba omereng el saul el kirir a rudos er kid el blak a rengrir el lomekerreu er a telungalek er tir, omerk er a ungil chais, e olengeseu er a ongdibel. Ngsebeched el kilungii a omereng el saul er kid el kirir sel dolatk er a osengel a Jehovah me a Jesus el kirir. Ngdirrek el mo klungioled a dolatk el kirel a omerellel a apostol Paulus el mora redil.

4. Ngmekera Biblia e ochotii el kmo a Jehovah a mengreos er a redil me a resechal?

 ⁴ A Biblia ochotii el kmo a Jehovah a mengreos er a redil me a resechal. El ua tiang, sera taem er a rekot el Kristiano e a Jehovah milsterir a redil me a resechal a chedaol reng er ngii me ngmlo sebechir el meruul a mengasireng el tekoi, el ua melekoi a kakerous el bedengel a omelekoi. (Rel. 2:1-4, 15-18) E a chedaol reng a melilt er a resechal me a redil el mo mengedereder lobengkel a Kristus. (Gal. 3:26-29) Me a redil me a resechal a di dul mo nguu omeksaul el mo kiei el mo cherechar er tia el chutem. (Och. 7:9, 10, 13-15) Te dirrek el di dul mla nguu a ngerachel el mo omerk e olisechakl er a ungil chais. (Mt. 28:19, 20) A babier er a Rellir a ouchais el kirel a urerel a odos el Prisila me a bechil er a Akuila el tir a ngilsuir a Apolos el mle ungil medengei osisechakl er a Biblia el mo nguu a melemalt el klemedengei.​—Rel. 18:24-26.

5. Ngera ngouchais er kid a Lukas 10:38, 39, 42 el kirel a blekerdelel a Jesus el mora redil?

⁵ A Jesus a ullecholt a omengull el mora redil. Ngdimlak loltirakl a siukang er a Refarisi el mle ultengel osengir er a redil e kmal dimlak longedecheduch er tir er a seked me a ka losaod a Bades el lobengterir. Ngbai milsaod a meklou a ultutelel el klemerang er a Biblia el obengterir a redil me a redisaiplo er ngii. * (Monguiu er a Lukas 10:38, 39, 42.) A redil a dirrek el ulebengkel el merael lomerk er a klumech. (Lk. 8:1-3) Ngdirrek el milsterir a redil a ileakl el techall el mo ouchais er a rechapostol er ngii el kmo ngmla mekiis er a kodall.​—Jn. 20:16-18.

6. Ngmilekera apostol Paulus e ochotii el kmo ngullecholt a omengull el mora redil?

⁶ A apostol Paulus a ulemeklatk er a Timothy el mo olecholt a omengull el mora redil. Ngdilu er ngii el kmo a “omerellem el mor a re meklou el redil le ua omerellem el mor a delam, ma omerellem el mor a re mekekerei el redil le ua omerellem el mor a ruchedam.” (1 Ti. 5:1, 2) Me alta Paulus a mle klou lolengeseu er a Timothy el mukeroul er a klemerang, engdi ngdilu el kmo a delal me a delal mechas tirke el mle kot losisecheklii er a “Chedaol Llechukl.” (2 Ti. 1:5; 3:14, 15) A Paulus a dirrek el ulemasech a ngklir a rudos el ngar er a babilengel el mora rechad er a Rom. Ngdimlak di lomtab a urerir a rudos ngdirrek el ullecholt omereng el saul el kirel a urerir.​—Rom 16:1-4, 6, 12; Fil. 4:3.

7. Ngera el ker a bo dosaod er chelechang?

⁷ Me aika el mlo merek el parakurab a ochotii el kmo, ngdiak a olechotel er a Bades el kmo a rudos a ngariou er a rudam. Tirka el rudos er kid el kmal lolecholt a bltikerreng e bekururau a kmal klou a lengesuir er a ongdibel me a remechuodel a ultuil er tir el mo olengeseu el melisiich er a budech me a kltarreng er a ongdibel. Engdi ngduubech a bebil ker. El ua tiang: Ngera uchul me a bebil er a taem e a Jehovah mengerechir er a rudos el mo melekedek a bderrir? Me a lsekum e te di rudam a metutk el mo mechuodel me a remesiou er a ongdibel, e ngbelkul a kmo a rokui el odam a bderrir a rokui el odos er a ongdibel?

8. A doltirakl e a Efesus 5:23, e a rokui el odam te bderrir a rokui el odos? Mosaod.

⁸ Ngkmal diak! A Kristus a bderrir a rokui el odos er a ongdibel el diak el odam. (Monguiu er a Efesus 5:23.) Ngar er a chelsel a telungalek e a bechiil el sechal a bdelul a bechil. A telecholb el ngalek el sechal a diak le bdelul a delal. (Efe. 6:1, 2) E ngar e a chelsel a  ongdibel, e a remechuodel a telkael a klisichir er a rudos me a rudam. (1 Th. 5:12; Heb. 13:17) A remesobil redil el mla mo diak el kiei lobengterir a redemerir me a rederrir a melemolem lolecholt a omengull el mora rechad er a blirir me a remechuodel. Me nguaisei, engdi te ua rudam er a ongdibel el di chimong a bderrir, el Jesus.

9. Ngera uchul me a lebebil er a taem e a rudos a mo melekedek a bderrir?

⁹ Nguaisei el Jehovah a mla tutketerir a resechal el mo oungerachel a osisechakl me a omengull er a ongdibel, el tekoi el diak el sebechir a redil el meruul. (1 Ti. 2:12) E ngera uchul? Ngdi osisiu el uchul me ngmla tutkii a Jesus el mo bdelul a sechal. Me bo el sebechel a tekoi el loruul a telungalek er ngii el chelderoder. A lsekum e ngduubech a blekeradel el redil a mocha kirel meruul er a tekoi el di odam a sebechel meruul er ngii, e a Jehovah mengerechir er ngii el mo dokedekii a bdelul. * (1 Ko. 11:4-7) A Jehovah el lolengit er a redil el mo meruul er tiang a diak el belkul a kmo ngmengkekerei er a klungel a ultutelir. Ngbai mesterir a rolel e te ochotii a omengull el kirel a blechebechel a dereder el bla leketmeklii. Me chelecha el bla lobeketakl tia el tekoi, e me bo donger er tia el ker: Ngera el klisiich a lolab a remechuodel me a rebdelul a telungalek?

10. Ngera uchul me a mechuodel a locha mo soal meruul a llach el kirel a ongdibel?

¹⁰ A remechuodel a betik a rengrir er a Kristus e betik a rengrir er a “sib” el mla moterekokl er tir er a Jehovah me a Jesus. (Jn. 21:15-17) A odam el mesiou el ta er a remechuodel a locha kmal mo omekerreu er a ongdibel  me ngmo omes er ngii el ua ledemerir a rengar a ongdibel. Nglocha mo omdasu el kmo a lsekum a bdelul a telungalek a ngar ngii a llemeltel el meruul a llach el kirel a telungalek er ngii el mo omekerreu er tir, e a remechuodel me ngsebechir el meruul a llach el mo omekerreu er a sib er a Dios. A rebebil el odam me a odos a rulleterir a remechuodel el mo omdasu el uaisei sel lolengit er tir me lolilt el kirir. Engdi a remechuodel me a rebderrir a telungalek te olab a osisiu el klisiich?

11. Ngera klaisisiu er a ngerechelel a bdelul a telungalek me a remechuodel?

¹¹ A tekingel a Paulus ochotii el kmo ngngar ngii a klaisisiu er a ngerechelel a bdelul a telungalek me a remechuodel. (1 Ti. 3:4, 5) El ua tiang, a Jehovah a soal a rechedal a telungalek a lolengesenges er a bdelul a telungalek. (Kol. 3:20) E soal tirke el ngar ongdibel a lolengesenges er a remechuodel. E a Jehovah a mengerechir er a rebdelul a telungalek me a remechuodel el mo omekerreu er a tekoi er a klereng er tirke el mla moterekokl er tir. Te dirrek lomekerreu aike el lousbech er a tekoi er a uldesuir me a rengrir. Me a remechuodel a dirrek el ua rungil bdelul a telungalek el lolterekokl el kmo, tirke el ngar cheungel a ulekerreuir a ngmai aike el ngeso lousbech sel lebo er ngii a mondai er tir. (Jak. 2:15-17) Me a lmuut kung, a Jehovah a  mengerechir er a remechuodel me a rebdelul a telungalek el mo melisiich a llechul e diak lebo le ‘engelakl er a llechukl el rolel a tekoi’ el ngar er a Biblia.​—1 Ko. 4:6.

12-13. A doltirakl er a Rom 7:2, e ngera klekakerous er a ngerechelel a bdelul a telungalek me a remechuodel?

¹² Me nguaisei engdi ngngar ngii a klekakerous er a ngerechelel a bdelul a telungalek me a remechuodel. El ua tiang, a Jehovah a mla omekngerachel er a remechuodel el mo oukerekeriil, e mla mesterir a ngerachel el mo oltobed er a ongdibel tirke el diak lekengei lobult.​—1 Ko. 5:11-13.

¹³ Me nguaisei a Jehovah a mla mesterir a rebdelul a telungalek a bebil klisiich el dimlak lebesterir a remechuodel. Ngmla msa bdelul a telungalek a klisichel el mo meruul e oltaut a llach el kirel a telungalek er ngii. (Monguiu er a Rom 7:2.) El ua tiang, a bdelul a telungalek a ngar ngii a llemeltel el oterekeklii a taem el ngelekel a kirel me remei. Ngdirrek el ngar ngii a klisichel mellach er ngii a lsekum ngoietii tia el llach. (Efe. 6:1) Nguaisei, a betik a rengul el bdelul a telungalek a mengedecheduch er a bechil er a uchei er a lolib a llach el kirel a delengcheklir. Tirka “tal chelechad.” *​—Mt. 19:6.

14. (a) A doltirakl er a Markus 10:45, e ngera uchul me ngmelemalt el Jehovah a tiltkii a Jesus el mo bdelul a ongdibel? (b) Ngera ngerechelel a Chelechad er a Ruungerachel? (Momes er a baks el “ A Ngerechelel a Chelechad er a Ruungerachel.”)

¹⁴ A Jehovah oeak olubet e ngmla mechar a klengar er a rederta el chad er a ongdibel me a klengar er a ngii di el chad el mo oumerang er a Jesus. (Monguiu er a Markus 10:45;  Rel. 20:28; 1 Ko. 15:21, 22) Me ngmelemalt a letetkii a Jesus el ngii a tilengetengii a klengar er ngii el olubet, el bdelul a ongdibel. Me a Jesus el bdelud a ngar ngii a klisichel el meruul e oltaut a llach el ngii omekrael a rokui el tekoi el loruul a ongdibel, telungalek, me a rederta el chad. (Gal. 6:2) Me nguaisei, engdi Jesus a diak di loruul a llach. Ngdirrek el omekang e omekerreu er a rederta er kid.​—Efe. 5:29.

15-16. Ngera ke suub er a tekingel a odos el Marley me a odam el Benjamin?

¹⁵ A rudos ochotii el kmo te mengull er a Kristus sel loltirakl a ulekrael er a remechuodel el tir a mla metutk el mo omekerreu er tir. A odos el Marley el kiei er a Merikel a ouchais er a uldesuir a rebetok el odos. Ngmelekoi el kmo: “Ak kmal mengreos a ngerechelek el bechiil el redil e odos er a chelsel a ongdibel. Ngkirek el meringel loureor lomeklemalt er a uldesuek el kirel a blechebechel a dereder el bla leketmeklii a Jehovah. Me nguaisei engdi a bechik me a rudam er a ongdibel a mla rullii tiang el mo beot er ngak e le te ochotii el kmo te mengull er ngak e oba omereng el saul el kirel a ureor el kuruul.”

¹⁶ A rudam a ochotii el kmo te medengelii a blechebechel a dereder sel lolecholt a omengull el mora rudos. A odam el Benjamin el kiei er a England a kmo: “Ngkmal betok a bla ksuub er a nger er a rudos er a miting me a ulengesuir el kirel a rolel a dosuub me a rolel a bo dungil el omerk e dolisechakl er a klumech. A ureor loruul a kmal meklou a ultutelel.”

17. Ngera uchul me ngkired loba omengull el kirel a belkul a blechebechel a dereder?

¹⁷ A rokui el ngar ongdibel el resechal, redil, rebdelul a telungalek, me a remechuodel sel bo lodengelii e bo loba omengull el kirel a belkul a blechebechel a dereder, e ngmo er ngii a budech er a ongdibel. E a ngaruchei er ngii, e kede mengebkall er a betik a rengul Demad el ngar er a eanged el Jehovah.​—Psa. 150:6.