1. ¿Imajtintaj Diospa llajtanpi ujchasqa kanchej?

JEHOVÁ DIOSPA llajtanpi kasqanchejmanta, mayta kusikunchej. Payqa llajtanpi kajkuna ujchasqa, allintataj kausakunankupaj, wakinman kamachinapaj atiyta qon. Paykunata respetaspaqa, Diospa llajtan ujchasqa kananpaj yanapakunchej. Chayrayku chayta ruwanapaj kallpachakunallapuni tiyan.

2. ¿Ima tapuykunamantaj kay yachaqanapi kutichisun?

² Kay yachaqanapi yachakusun, pikunatachus Jehová llajtanpi umata jina churasqanta. Chantapis kay tapuykunaman kutichisun: ¿Ima ruwanastataj Jehová hermanasman qon? ¿Tukuy hermanoschu hermanaspa umanku kanku? Ancianoswan familiamanta umaswan, ¿kikin imasta ruwanankupajchu atiyta japʼinku? Ñaupajtaqa imaynatachus hermanasninchejta qhawananchej kasqanta yachakusun.

3. ¿Imataj yanapawasun hermanasninchejta aswan sumajpaj qhawanapaj?

³ Hermanasninchejqa familiankuta sumajta qhawanankupaj kallpachakunku. Chantapis tukuy atisqankuta predicanku, congregacionpipis sumajta yanapakunku. Chayrayku paykunata may sumajpaj qhawanchej. Jehovawan Jesuswanrí, ¿imaynatá paykunata qhawanku? Chayta yachakoyqa, hermanasninchejta aswan sumajpaj qhawanapaj yanapawasun. Chantapis imaynatachus apóstol Pablo hermanasta qhawasqanta yachakoyqa, mayta yanapallawasuntaj.

4. ¿Imaynapí yachanchej Jehová qharistapis warmistapis uj rejllata qhawasqanta?

⁴ Jehovaqa qharistapis warmistapis uj rejllata qhawan. ¿Imaynapí chayta yachanchej? Apostolespa tiemponkupeqa, Jehovaqa qharismantaj warmismantaj atiyninta qorqa. Chayrayku waj parlaykunapi parlayta aterqanku, waj tʼukuna imastapis  ruwarqanku (Hech. 2:1-4, 15-18). Chantapis Jehovaqa qharistawan warmistawan ajllarqa, cielopi Jesuswan khuska kamachimunankupaj (Gál. 3:26-29). Kay jallpʼapipis qharistaj warmistaj wiñay kausayta japʼenqanku (Apo. 7:9, 10, 13-15). Qharispis warmispis sumaj willaykunata willamunanchej tiyan, yachachimunanchejtaj tiyan (Mat. 28:19, 20). Hechos libroqa, imatachus Priscila sutiyoj hermana ruwasqanmanta parlan. Payqa qosanwan khuska, Apolos sutiyoj cristianota Diospa ñanninta astawan sutʼita entiendecherqanku. Chay cristianoqa manchay yachayniyoj karqa (Hech. 18:24-26).

5. Lucas 10:38, 39, 42 nisqanman jina, ¿imaynatá Jesús warmista qhawaj?

⁵ Jesusqa warmista allinpaj qhawarqa, respetarqataj. Payqa mana fariseos jinachu karqa. Fariseosqa warmista pisipaj qhawaj kanku, nitaj paykunawan runas chaupipi parlajchu kanku. Chantapis mana Diospa Palabranta paykunaman yachachejchu kanku. Jesustajrí qharismanpis warmismanpis Diosmanta yachacherqa (Lucas 10:38, 39, 42 leey). * Chantapis Diospa Gobiernonmanta willaj rispa, warmistawan pusarqa (Luc. 8:1-3). Aswan qhepamanpis, Jesusqa kausarimuytawan warmisman rikhurerqa. Paykunamantaj nerqa apostolesninman willamunankuta (Juan 20:16-18).

6. ¿Imaynatá yachanchej apóstol Pablo warmista sumajpaj qhawasqanta?

⁶ Apóstol Pabloqa Timoteoman nerqa warmista allinpaj qhawananta. Payman nerqa: “Kuraj warmistaqa mamaykita jina parlapayay. Sullkʼa kajkunatataj hermanasniykita jina parlapayay”, nispa (1 Tim. 5:1, 2). Pabloqa Timoteota sumaj cristiano kananpaj mayta yanaparqa. Jinapis sutʼita nerqa, Timoteota mamanwan awelitanwan Diospa Palabranta yachachisqankuta (2 Tim. 1:5; 3:14, 15). Chantapis Pabloqa romanosman cartanta qhelqashaspa, ashkha hermanasta sutisninkumanta saludarqa. Payqa mana Diospaj llankʼasqallankutachu yacharqa, manaqa chay ruwasqankuta sumajpaj qhawasqanta nerqa (Rom. 16:1-4, 6, 12; Fili. 4:3).

7. ¿Imatataj qhepan parrafospi yachakusun?

⁷ Rikunchej jina, Jehová Diosqa warmistapis qharistapis uj rejllata qhawan. Hermanasninchejqa munakuyniyoj, kʼachastaj kasqankurayku, congregacionpi sumaj bendición kanku. Ancianostaj yachanku, hermanasqa congregación ujchasqa kananpaj yanapakuyta atisqankuta. Jina kajtin, ¿imaraykutaj hermanasninchej wakin imasta ruwanankupaj umankuta qhatakunanku tiyan? Chanta, ¿tukuy hermanoschu hermanaspa umanku kanku? Ichapis chayta yuyanchej, hermanoslla ancianos chayri siervos ministeriales kayta atisqankurayku. ¿Ajinapunichu kanman? Chayta qhepan parrafospi yachakusun.

8. Efesios 5:23 nisqanman jina, ¿tukuy hermanoschu hermanaspa umanku kanku?

⁸ ¿Tukuy hermanoschu congregacionpi hermanaspa umanku kanku? Mana. Congregacionpeqa hermanospa, hermanaspa umankoqa Cristolla (Efesios 5:23 leey). Familia ukhupitaj, qosa señoranpa uman. Qhari wawaqa bautizasqa kaspapis, mana mamanpa uman kayta atinchu (Efe. 6:1, 2). Congregacionpitajrí ancianos ñaupajman pusajkuna kanku. Jinapis mana hermanospa patronninkuchu kanku (1 Tes. 5:12; Heb. 13:17). Soltera hermanastaj, niña tatankuwan mamankuwan  tiyakuspapis, paykunata respetallankupuni. Congregacionpitaj tukuy hermanos jinallataj ancianosta respetanku. Jinapis Jesusllata umankuta jina qhawanku.

9. ¿Imaraykutaj hermanas wakin kutis umankuta qhatakunanku tiyan?

⁹ Jehová Diosqa hermanosllaman kamachin, congregacionpi yachachinankuta, payta yupaychaypi waj imasta ruwanankuta ima. Hermanasmanqa mana chayta kamachinchu (1 Tim. 2:12). ¿Imaraykutaj Jehová hermanosllaman wakin ruwanasta qon? Chayta ruwan, llajtanpi tukuy ima allinta ruwakunanpaj. Chayraykullataj Jesustapis qharej uman kananpaj churarqa. Jinapis wakin kutisqa, necesitakusqanrayku, hermanas hermanospa ruwanankuta ruwananku tiyan. Chay kutispi, Jehovaqa hermanasman kamachin umankuta qhatakunankuta (1 Cor. 11:4-7). * ¿Hermanasta pisipaj qhawasqanraykuchu chayta kamachin? Mana. Chaytaqa ruwan, congregacionta ñaupajman apajkunata jatunpaj qhawanankupaj. Qhepan parrafospi yachakusun, ancianoswan qosaswan kikin ruwanasniyojchus manachus kasqankuta.

10. ¿Imaraykutaj wakin ancianos hermanospaj kamachiykunata churayta munankuman?

¹⁰ Jehovawan Jesuswanqa, ovejitasninkuta ancianospa makinkuman churanku, paykunata qhawapunankupaj. Ancianostaj Cristota munakusqankurayku, chay ovejitasta mayta munakunku (Juan 21:15-17). Chayrayku wakin ancianosqa, yuyanku congregacionpaj tatas jina kasqankuta. Ajinata yuyaj ancianosqa, hermanospa allinninkuta maskʼaspa, imatachus ruwanankuta kamachiyta munankuman.  Wakin hermanostaj chaytapuni ruwachiyta munanku. ¿Imaynamanta? Paykunaqa imata ruwananku kajtinpis, ancianosman ninku: “¿Imatá ruwayman hermano? Kayta ruwanay, ¿allillanchu kanman?”, nispa. Jinapis ancianos, ¿familiapi umas jinallatajchu wajkunaman imatachus ruwanankuta niyta atinkuman? Qhepan parrafospi chaymanta parlarisun.

11. ¿Imaspitaj ancianos familiamanta umasman rijchʼakunku?

¹¹ Apóstol Pabloqa, familiapi umaswan ancianoswan wakin imaspi rijchʼakusqankuta nerqa (1 Tim. 3:4, 5). ¿Imaspitaj rijchʼakunku? Jehovaqa tatasman kamachin, familiankuta sinchʼi creeyniyoj kanankupaj yanapanankuta. Ancianosmanpis kamachin, hermanosta sinchʼi creeyniyoj kanankupaj yanapanankuta. Chantá tataspis ancianospis, kamachiyninkupi kajkunata kusisqa kanankupaj yanapananku tiyan. Chantapis ancianosqa, familiamanta umas jinallataj, hermanosta llakiypi kajtinku yanaparinanku tiyan (Sant. 2:15-17). Paykunaqa hermanosta yanapanallankutaj tiyan, Jehovaj kamachiykunasninta kasukunankupaj. Jinapis Bibliapi ‘qhelqasqa kasqanman jinalla’ ruwananku tiyan. Jehovaqa chayllatataj tatas familiankuwan ruwanankuta munan (1 Cor. 4:6). Chantapis  Jehovaqa, familiamanta kajkuna umankuta kasukunankuta munan (Col. 3:20). Payqa munallantaj, congregacionmanta kajkuna ancianosta kasukunankuta.

12, 13. 1) ¿Imatataj ancianoslla ruwayta atinku? 2) Romanos 7:2 nisqanman jina, ¿imatataj familiamanta umaslla ruwayta atinku?

¹² Ancianoswan familiamanta umaswan, wakin ruwanasninkupi rijchʼakojtinkupis, wakin imastaqa ancianoslla ruwayta atinku. Jehovaqa ancianosllaman atiyta qon, congregacionpi kajkunata juzganankupaj. Paykunaqa congregacionta llimphuta japʼinankupaj, juchanmanta mana pesachikojta congregacionmanta qharqoyta atinku (1 Cor. 5:11-13).

¹³ Jehovaqa familiamanta umasman mana chay atiyta qonchu. Jinapis familiankupi waj imasta ruwanankupaj atiyta qon. Paykunaqa familiankupaj kamachiykunata churayta atinku, chayta juntʼachiytapis (Romanos 7:2 leey). Tataqa wawasninman kamachiyta atin, ima horaskamachus tuta chayamunankuta. Mana kasukojtinkutaj, paykunata kʼamiyta, castigayta atin (Efe. 6:1). Jinapis munakuyniyoj tataqa, ima kamachiyta churananpajpis señoranwan ñaupajta parlarin. Imaraykuchus paykunaqa ‘ujlla kanku’ (Mat. 19:6). *

14. 1) Marcos 10:45 nisqanman jina, ¿imaraykutaj Jehová Jesusta congregacionpi uma kananpaj churan? 2) ¿Imatataj Diospa Llajtanta Kamachejkuna ruwanku? (“ ¿Imatataj Diospa Llajtanta Kamachejkuna ruwanku?” nisqa recuadrota leeriy).

¹⁴ Jehová Diosqa llajtanmanta sapa ujta Wawanpa yawarninwan ranterqa (Marcos 10:45 leey; Hech. 20:28; 1 Cor. 15:21, 22). Chayrayku Wawan Jesusta, llajtanpa uman kananpaj  churan. Jesustaj chayrayku congregacionpaj kamachiykunata churayta atin, chay kamachiykunata juntʼachiytapis (Gál. 6:2). Jinapis Jesusqa, mana kamachiykunallatachu churan. Payqa congregacionmanta kajkunata munakuywan qhawan, imatachus necesitasqankutapis qon (Efe. 5:29).

15, 16. ¿Imatá yachakunchej hermana Marley, hermano Benjaminwan imatachus nisqankumanta?

¹⁵ Hermanasqa congregacionta ñaupajman apaj hermanosta kasukuspa, Cristota respetashanku. Estados Unidosmanta hermananchej Marley nin: “Jehová qowasqan ruwanata, sumajpaj qhawani. Kallpachakuni qosayta, ancianostapis kasukunaypaj, respetanaypaj ima. Paykunaqa respetawanku, imata ruwasqaytapis allinpaj qhawasqankuta niwanku. Chaytaj mayta yanapawan paykunata kasukunaypaj”.

¹⁶ Hermanospis Jehovamanta japʼisqanku ruwanata entiendenankupaj, mayta kallpachakunku. Chayta ruwaj hermanosqa, hermanasta respetanku, sumajpajtaj qhawanku. Inglaterramanta hermano Benjamin jinata nin: “Reunionpi hermanas comentasqankumanta mayta yachakuni. Chantapis mayta yachakullanitaj, imaynatachus wakin hermanas Bibliata estudiasqankumanta, predicasqankumanta, runasman yachachisqankumanta ima. Hermanaspa ruwasqankutaqa, manchay sumajpaj qhawani”.

17. ¿Imaraykutaj imatachus Jehová kamachiwasqanchejta kasukunanchej tiyan?

¹⁷ Yachakunchej jina, Jehová Diosqa familianmanta sapa ujman imatachus ruwanankuta kamachin, nisunman qharisman, warmisman, familiamanta umasman, ancianosmanpis. Tukuyninchej chayta kasukusun chayqa, congregacionpi allin kausay kananpaj yanapakusun. Jinapis astawanqa, munakuyniyoj Tatanchej Jehovata jatunchasun (Sal. 150:6).