1. ¿Imata rurartaj juc yarpayla y juc shongula cawacunchi?

CUSHICURCUNCHIMI Jehovapa familian rurincho cawacurga. Y waran waranpis jaucala cawacunchi autoridäta chasquejcunata ali ricarmi. Quiquin Jehovami pitapis ima cargunta gon. Caytaga ama gongashwanchu, chaynopa juc shongula y juc yarpayla caycäshun.

2. ¿Ima tapucuycunapitataj yachacurishun?

² Canan yachacurishun congregación rurincho autoridäta chasquejcunapita. Cay tapucuycunata ricaycäshun: ¿ima ruraynincunataj caycan warmi cajcunapaj?, ¿olgu cajcunaga lapan hermanacunapa uman yupaychu caycan? y ¿ancianucunapis lapan hermanucunapa uman yupaychu caycan, familianta juc tayta pushashganno? Warmi cajcunapita nawpata parlarcushun.

3. ¿Imata rurartaj masraj hermananchicunata cuyashun?

³ Imayca alicunatami parlarishwan hermananchicunapitaga; paycunaga mayna castancunata yanapacuycan, mayna Diospita yachachicurcaycan, congregaciunchopis mayna pichapacurcaycan. Jehová y Jesús rurashganno ali nawilanchiwan paycunata ricäshun y Pablo rurashganman yarpachacurpis masraj hermananchicunata cuyashun.

4. ¿Ima nintaj Biblia olgutapis warmitapis Jehová imano ricashganta?

⁴ Jehovaga ali nawilanwanmi runa cajtapis warmi cajtapis rican. Bibliaga wilacun milagrucunata rurananpaj  imano unay tiempucho Diosninchi santo espiritunta olgutapis warmitapis goshganta (Hech. 2:1-4, 15-18). Jesuswanpis manami olgu cajcunalachu gobernamäshun, warmipis cangami nin Biblia (Gál. 3:26-29). Cay Pachatapis Jehová goycunga lapancunatami (Apoc. 7:9, 10, 13-15). Y Jesuspis mandacamushga lapancunata, warmita olguta Diospita may chaycho yachachicunapaj (Mat. 28:19, 20). Hechos libro wilacamun Priscila jutiyoj cristianapita. Runanshi cargan Áquila, y ishcanshi Apolos jutiyoj runata shumaj tantiarcachergan Diospita (Hech. 18:24-26).

5. ¿Imatataj Jesuspita wilacamun Lucas 10:38, 39, 42 textucuna?

⁵ Jesusga ali shongulanwanmi warmicunata ricaj. Fariseucuna ichanga warmicunata chiquej, pengacur imarchi parlaylatapis parlapajchu; Diospitapis ni ichicla parlapäcojchu warmicunawan. Chaytaga imaypis rurarganchu Jesús, payga lapanpa nawpanchomi cushi cushila Diospita shumaj yachachicamoj (leiriy Lucas 10:38, 39, 42). * Warmicunawan yanagänacurmi Diospita yachachicoj aywaj (Luc. 8:1-3). Y waquincunapitapis más puntata, warmicunata gorgan ali wilacuyta (Juan 20:16-18).

6. ¿Imanotaj apóstol Pablo warmicunata ricaj?

⁶ Timoteuta apóstol Pablo mandargan warmicunata respetananpaj. Nirgan: “Chacwancunatapis mamayquitano [...]. Jipashcunatapis pañiquitano rispëtuwan ricay” (1 Tim. 5:1, 2). Pabluga manami nirganchu japalanla Timoteuta yanapashganta, payga parlargan mamäninpaj y awilanpaj, y imano unaypitana Timoteuta yachachipäcushganta (2 Tim. 1:5; 3:14, 15). Cartacamushganchopis jutinpawan jutinpawan parlarmi hermanacunata saludamun. Pabluga musyajmi imano cay warmicuna Diosta sirvir calpachacärishganta, chaychi mana gongajchu cay cristianacunata (Rom. 16:1-4, 6, 12; Filip. 4:3).

7. ¿Ima tapucuycunataj yachacunapaj caycan?

⁷ Shumaj caycan. Bibliaga manami maygan laduchopis ninchu runacunala más alicunata rurashganta. Ali aroj car y yanapacoj carmi warmicunaga imaycata ruran congregaciuncho, chayno juc shongula caycanchi; chayta ricar ancianucunaga cushicarcärinmi. Caycanraj cay tapucuycuna: ¿öraga imanirtaj warmicuna umanta chapacurcun? y olgu cajcunala anciano y siervo ministerial captinga, ¿nishwanchuraj lapan hermanacunapa uman yupay capäcushganta?

8. Imata wilacamun Efesios 5:23 texto, ¿olgu cajcunaga lapan hermanacunapa uman yupaychu?

⁸ Pipis chayta tapucuptinga, ‘mana’ nishwanmi. Congregaciuncho lapan hermanacunapa umanga Jesuslami caycan (leiriy Efesios 5:23). Familiachoga tayta cajmi autoridäyoj caycan y bautizash churin cashpanga payga manami charanchu papäninpa autoridäninta (Efes. 6:1, 2). Y congregaciuncho lapan hermanucunapa parlarga, ancianucunapa autoridäninga  waquin waquinlachomi canman, manami lapanchochu (1 Tes. 5:12; Heb. 13:17). Y taytancunawan manana tiyaj hermanapita ¿ima nishwantaj? Taytancunataga respetayta respetaycanmi, pero mananami caycanchu autoridänincho o maquincho. Ancianucunatapis respetanmi, pero lapanchicunanopapis, Jesuslami uma yupay caycan.

9. ¿Öraga imanirtaj hermanacuna umanta chapacurcunman?

⁹ Jehovapis munan cayta yarpänanchita: olgu cajcunalami congregaciunta pushananman, chayga juc mandato caycan (1 Tim. 2:12). ¿Imanirtaj chayno canman? Olgu cajcunapa uman Jesús cashganraycurmi. Öraga olgu cajpa rurayninta juc hermana ruraptinga umanta chapacurcunapämi Jehová mandan paycunata (1 Cor. 11:4-7). * Cayga manami pengachinmanchu, cayga yarpächiycan Jehová pïcunata autoridad goshganta respetananpämi. Cay tapucuyna caycan canan: ¿maycamataj aywanman autoridänincunaraycur ancianucuna y tayta cajcunapis?

10. ¿Imanirtaj juc anciano congregaciuncho mandacojno ticrarinman?

¹⁰ Ancianucunaga Jesustami cuyan, y uyshero japuy cristiano masincunata cuidananpämi paycunata Jehová mandan (Juan 21:15-17). Juc anciano “alitachi ruraycä” nir congregaciuncho lapancunapa taytanno cayta munanman, cayno yarpar galaycunman: “Wasïcho  ima ayca nishgäcunata lapanpis casumanmi, congregaciunchopis cayta wacta hermanucunata nishaj, ali cajta rurachiptëga alichä canga lapanpäpis”. Y mana chaylachu, quiquin hermanucunapis papänintano ricar imaycapäpis mañacuycanman imano imatapis rurananpaj. ¿Alicu chayga canman?, ¿imanotaj canman ancianucunapa autoridänin, y imanotaj canman familiacho tayta cajpa?

11. ¿Imacunachotaj yanapacun taytacuna y ancianucuna?

¹¹ Apóstol Pablumi nirgan ancianucunapis y familiacho tayta cajcunapis calpachacärinmi ricaynincho caycajcunata cuidananpaj (1 Tim. 3:4, 5). Y Jehovaga munan tayta cajcunata familian casucunanpaj y congregaciuncho hermanucunapis ancianucunata wiyacunanpaj (Col. 3:20). Ancianucunapis tayta cajcunapis musyanmi Jehová paycunata cuentata mañananpaj, chaymi imaycata ruran maquincho caycajcunata shumaj cuidananpaj. Y yarparaycanmi alapa mana charaj cristiano masinchicunapaj; yanapacoj runacuna capäcun (Sant. 2:15-17). Nircurpis Tayta  Jehovaga munan ancianucuna y taytacuna waquincunata yanapänanpaj, Biblia ima nishganta casucärinanpaj, imaypis Biblia nishgannola cawapäcunanpaj (1 Cor. 4:6).

12, 13. Romanos 7:2 texto wilacushganno, ¿ima autoridätataj charan taytacuna y ancianucuna?

¹² Öraga ancianucunapa y taytacunapa ruraynincuna jucmi jucmi canman. Caymi juc caycan: ancianucunalatami Jehová mandan congregaciuncho juezno cananpaj, juchata rurarcur mana arrepenticojcunata gargunanpaj (1 Cor. 5:11-13).

¹³ Caypis juc: tayta cajcunalami autoridäta charan familianta imano goyächinanpaj, imano pushananpaj, cayga manami ancianucunapa rurayninchu (leiriy Romanos 7:2). Taytacunami wamrancunata ninga pasiapacoj aywashganpita imay hora cutimunanpaj; mana casucushganpita astananpaj o mana astananpäpis (Efes. 6:1). Y aliga caycan, imatapis manaraj rurar, warminwan parlapacäriptinmi; Bibliaga nin “ishcanpis jucnayllanöna” carcaycan (Mat. 19:6). *

14. 1) Marcos 10:45 nishganman yarparga, ¿imanirtaj Jehová Jesusta churash congregaciunpa uman o pushacojnin cananpaj? 2) ¿Ima ruraynincunataj caycan Jehovapa testiguncunata Pushajcunapa? (“ Jehovapa testiguncunata Pushajcuna rurapäcushgan” recuadruta ricay).

¹⁴ Churinwanmi Taytalanchi Jehová lapanchita salvamashcanchi. Jesús  wanushganman pipis yaracushpanga imayca bendiciunta chasquinga (leiriy Marcos 10:45; Hech. 20:28; 1 Cor. 15:21, 22). Jehovaga Jesusta churash congregaciunpa uman cananpaj, chauras pushacojninchiga Jesuslami caycan. Paymi autoridäta charan imano cawanapaj o imano runa canapaj nimänanchipaj. Casucushpanchiga mayraj payga cushicun (Gál. 6:2). Pero ‘cayta ruray wacta ruray’ nirlachu manami caycanchu, Jesusga waylupämashpanchimi uyshantano cuidaycämanchi (Efes. 5:29).

15, 16. ¿Imatataj yachacunqui Marley y Benjamin wilacamushganpita?

¹⁵ Hermananchicunaga Jesuspa autoridäninta respetarcaycanmi, chayga ricacan congregaciuncho pushacoj hermanucunata respetarmi. Estados Uniduscho cawaj, Marley jutiyoj cristiana cayno nin: “Congregaciuncho ruraycashgäwanga cushicömi. Calpachacuycämi Jehovapita carguta chasquejcunata respetanäpaj. Y chayga manami sasachu, masraj runä y waquin carguyoj hermanucuna cuyapaylawan pushamaptin”. Cay yarpaylachi waquin hermananchicunapa shongunchopis caycan.

¹⁶ Alapa alimi hermanucuna warmi cajcunata respetuwan ricaptin, chayta rurarga Dios munashgannomi autoridäninta apaycanga. Inglaterracho tiyaj, Benjamin jutiyoj hermano cayno nin: “Alimi yachacö congregaciuncho hermanacuna comentapäcamuptin, öraga mayarcö imano estudianapaj o imano predicanapaj. Shumajmi. Imaycata rurarmi yanapacamun paycunaga”.

17. ¿Imanirtaj respetashwan ima autoridäyoj cananpaj Jehová goshganta?

¹⁷ Congregaciunchoga jauca jaucala cawacuytami munanchi, chaypäga olgu carpis warmi carpis respetananchimi mayganpis autoridäyoj cajta, quiquin Jehovami pitapis cargunta gon. Cayno rurarga, alabaycanchi Taytalanchi Jehovatami (Sal. 150:6).