YACHAI 7
¿Congregacionta pushajcunaca ima autoridadtataj charincuna?
‘Tandanacushca crijcunapajca Cristoca umami, paimi paicunapaj quishpichij’ (EFESIOS 5:23).
CANTO 137 Diosta cazuj, cꞌuyaj huarmicuna
CAITAMI YACHASHUN *
1. ¿Diospaj puebloca imamantataj tandalla causancuna?
Jehová Diospaj pueblopi cashcamantami tucuicuna cushilla sintirinchij. Congregacionpi, familiapi Yayitu Dios churashca autoridadta tucuicuna respetashpaca cushilla, tandallami causanchij. Caicunata pajtachinata alli intindishpacarin sumajtami causashun.
2. ¿Cai yachaipica ima tapuicunatataj ricushun?
2 Cai yachaipimi Jehová Dios congregacionpi ima shina autoridadta churashcata yachashun. Shinallataj huaquin tapuicunatami yachashun: ¿panicunaca congregacionpica ima shinataj ayudancuna?, ¿tucui huauquicunachu panicunapaj umacuna can?, ¿congregacionta pushajcunaca, familiata pushaj cusacuna shinachu huauqui panicunapica autoridadta charincuna? Cunanca panicuna congregacionpi ima shina ayudanamanta parlashpa callarishun.
PANICUNATA VALORASHUNCHIJ
3. ¿Panicunata ashtahuan valorangapajca picunamantataj yachana canchij?
3 Panicuna paicunapaj familiacunata cuidashcamanta, huillangapaj sinchita esforzarishcamanta, congregacionpi huauqui panicunata ayudangapaj esforzarishcamantami paicunataca valorana canchij. Jehová Diospish Jesuspish huarmicunataca achcatami valoran. Apóstol Pablopish huarmicunataca allimi tratarca. Paicunamanta ashtahuan yachashpaca panicunatami valorashun.
4. ¿Jehová Diosca cꞌaricunata huarmicunata valorashcataca ima shinataj ricuchishca?
4 Jehová Diospajca cꞌaricunapish huarmicunapish valishcami can. Por ejemplo, apostolcuna causashca punllacunapimi Jehová Diosca cꞌaricunamanpish huarmicunamanpish paipaj espíritu santota curca. Chaimantami paicunaca valishca ruraicunata pajtachircacuna. Shinallataj chꞌican chꞌican shimipipish parlarcacuna (Hechos 2:1-4, 15-18). Jehová Diosca Jesushuan mandachunca cꞌaricunata huarmicunatami agllashca (Gálatas 3:26-29). Jehová Diosca cꞌaricunaman huarmicunamanmi cai allpapi huiñai causaita charichunpish cunga (Apocalipsis 7:9, 10, 13-15). Shinallataj Jesusca cꞌaricunatapish huarmicunatapish tucuicunaman Dios cushca alli huillaicunata yachachichunmi mandarca (Mateo 28:19, 20). Por ejemplo, Hechos libropica Diosta sirvij Priscilamantami parlan. Shuj cutinca paipish paipaj cusapish achcata yachaj Apolos runamanca “Diospaj Shimimantaca allimi yachachircacuna” (Hechos 18:24-26).
5. Lucas 10:38, 39, 42-pi nishca shinaca ¿Jesusca huarmicunataca ima shinataj tratarca?
5 Jesusca huarmicunatami valorarca. Fariseocunaca huarmicunataca mana allimi tratajcuna carca. Shinallataj shujtajcunapaj ñaupajpipish mana paicunahuanca parlajcunachu carca. Diospaj Quillcachishcacunatacarin huarmicunamanca mana parlajcunachu carca. Cutin Jesusca cꞌaricunamanpish huarmicunamanpish Diospaj Shimimantami valishca yuyaicunata parlaj carca (Lucas 10:38, 39, 42-ta liyipai). * Jesusca predicacushpaca huarmicuna paita acompañachunmi saquirca (Lucas 8:1-3). Huaquin huarmicunamanpish pai causarishcata apostolcunaman huillachunmi mingarca (Juan 20:16-18).
6. ¿Apóstol Pabloca huarmicunata valorashcataca ima shinataj ricuchirca?
6 Apóstol Pabloca Timoteotaca huarmicunata valorachun, respetachunmi yachachirca. Mayorlla panicunataca mamacunata shina, jovenlla panicunataca panicunata shina tratachunmi mandarca (1 Timoteo 5:1, 2). Pabloca Timoteotami sinchi feta charichun ayudarca. Shinapish Timoteota paipaj abuela, paipaj mama Bibliamanta alli yachachishcataca Pabloca allimi yacharca (2 Timoteo 1:5; 3:14, 15). Ashtahuancarin Romapi saquirij congregacionman cartata quillcashpaca panicunataca paicunapaj shuticunata nombrashpami saludarca. Pabloca panicuna Diosta sirvingapaj esforzarishcataca achcatami valorarca (Romanos 16:1-4, 6, 12; Filipenses 4:3).
7. ¿Ima tapuicunatataj yachashun?
7 Ña ricushca shinaca Bibliapica cꞌaricuna huarmicunata yalli cashcataca mana yachachinchu. Panicunaca cꞌuyaj cashpa, mana mitsa cashpami congregacionpica tandalla cushilla causachun ayudancuna. Chaimantami congregacionta pushajcunaca panicunapi confiancuna. Cunanca cai catij tapuicunata yachashun: ¿panicunataca Jehová Diosca imamantataj maipica umata chꞌungurichun mandan? Jehová Diosca huauquicunallatami congregacionta pushajcuna cachun, siervo ministerialcuna cachun saquishca. ¿Pero chaica nisha ninchu tucui huauquicuna tucui panicunapaj uma cashcata?
¿TUCUI HUAUQUICUNACHU PANICUNAPAJ UMACUNA CAN?
8. Efesios 5:23-pi nishca shinaca ¿imamantataj tucui huauquicunaca mana panicunapaj uma can?
8 ¿Tucui huauquicunaca panicunapaj umacunachu can? Mana, tucui panicunapaj umaca Jesusllami can (Efesios 5:23-ta liyipai). Familiapica cusami huarmipaj uma can. Pero shuj churi bautizarishca cashpapish mana mamapaj umachu can (Efesios 6:1, 2). Congregacionta pushajcunapish huauquicunata panicunataca mana tucuipi mandai tucuncunachu (1 Tesalonicenses 5:12; Hebreos 13:17). Shuj solteraca yaya mamahuan mana causashpapish paipaj yayataca respetashpami catin. Pero paica ña mana yayapaj autoridad ucupichu can. Shinallataj shuj soltera pani congregacionta pushajcunata respetajpipish paipaj umaca Jesusllami can.
Yayacunahuan mana causaj solterocunaca Jesuspaj autoridad ucupimi can. (Párrafo 8-ta ricui).
9. ¿Panicunaca maipica imamantataj umata chꞌungurina can?
9 Jehová Diosca congregacionpi alli organizashca cachunmi Jesustaca cꞌaricunapaj uma cachun saquishca. Congregacionpipish huauquicunatami pushachun saquishca (1 Timoteo 2:12). Chaimantami shuj pani huauquicunapaj mingashcata pajtachina cajpica Yayitu Diosca paipaj umata chꞌungurichun mandan (1 Corintios 11:4-7). * Jehová Diosca chashna mandashpaca huarmicuna menos cashcataca mana ricuchisha ninchu. Ashtahuanpish congregacionpi churashca autoridadta respetashcata ricuchichunmi chashna mandashca. Pero ¿Jehová Diosca familiata pushajcunaman, congregacionta pushajcunamanca mashna autoridadtataj cushca?
¿JEHOVÁ DIOSCA CUSACUNAMAN, CONGREGACIONTA PUSHAJCUNAMANCA MASHNA AUTORIDADTATAJ CUSHCA?
10. ¿Congregacionta pushajcunaca maipica imamantataj huauqui panicunapaj leycunata churasha nincuna?
10 Congregacionta pushajcunaca Jesustami cꞌuyancuna. Shinallataj huauqui panicunatapishmi paicunaca cꞌuyashpa cuidancuna (Juan 21:15-17). Shinapish maipica congregacionta shuj pushaj huauquica huauqui panicunapaj yaya cashcatachari yuyan. Chaimantachari paica: “Familiata pushajcunaca familia ucupica huaquin leycunatami churai tucun. Congregacionta pushajcunapish huauqui panicunata cuidangapajca huaquin leycunatami churana can” nishpa yuyan. Shinallataj huaquin huauqui panicunaca congregacionta pushajcunataca paicunamanta imatapish decidichunchari mañangacuna. Pero ¿congregacionta pushajcunapaj autoridadhuan cusacunapaj autoridadhuanca igualchu can?
Congregacionta pushajcunaca huauqui panicuna sinchi feta charichunmi ayudancuna, valorancuna. Jehová Diosca juchacunamanta mana arrepintirijcunata congregacionmanta llujchichunmi congregacionta pushajcunamanca autoridadta cushca. (Párrafos 11 y 12-ta ricui).
11. ¿Familiata pushajpaj autoridadhuan congregacionta pushajpaj autoridadhuanca imapitaj igual can?
11 Apóstol Pabloca familiata pushajpaj autoridadhuan, congregacionta pushajpaj autoridadhuan maipica igual cashcatami yachachirca (1 Timoteo 3:4, 5). Por ejemplo, Jehová Diosca familiata pushajcunata familiacuna cazuchun, congregacionpipish congregacionta pushajcunata huauqui panicuna cazuchunmi munan (Colosenses 3:20). Jehová Diosca familiata pushajcunataca paicunapaj familiapaj feta sinchiyachichun, cꞌuyaita ricuchichun, valorachunmi mandan. Shinallataj Jehová Diosca congregacionta pushajcunatapish huauqui panicunata chashnallataj ayudachunmi mandan (Santiago 2:15-17). Congregacionta pushajcunapish familiata pushajcunapish shujtajcunataca Yaya Diosta cazuchunmi ayudana can. Diospaj Shimillamanta yachachishpami ayudana can (1 Corintios 4:6, NWT ).
Jehová Diosca familiata pushajmanca familia ucupimi autoridadta cushca. Familiata alli pushajca imata manaraj decidishpami paipaj huarmihuanraj parlan. (Párrafo 13-ta ricui).
12, 13. Romanos 7:2-pi nishca shinaca ¿congregacionta pushajcunapaj autoridadhuan familiata pushajcunapaj autoridadhuanca imapitaj mana igual can?
12 Congregacionta pushajcunapaj autoridadhuan familiata pushajcunapaj autoridadhuanca maipica mana igualchu can. Por ejemplo, Jehová Diosca congregacionta pushajcunamanca juchata rurajcunata juzgachun, juchamanta mana arrepintirijcunata congregacionmanta llujshichichunmi autoridadta cushca (1 Corintios 5:11-13).
13 Cutin Jehová Diosca familiata pushajcunamanca shujtaj autoridadtami cushca. Por ejemplo, familiata pushajcunaca paicunapaj familia ucupimi huaquin leycunata churai tucun. Chaicunata pajtachichunpishmi ricuna can (Romanos 7:2-ta liyipai). Familiata pushajcunaca paicunapaj huahuacuna mai horascama huasiman chayanatami decidi tucun. Shinallataj paicunapaj huahuacuna mana cazujpipish paicunata corregina derechotami charincuna (Efesios 6:1). Pero familiata pushajca paipaj familiata cꞌuyashcamanta, paipaj huarmihuan ‘shuj aichalla’ cashcata yuyaipi charishcamantami imata decidingapajpish paipaj huarmihuanraj parlan (Mateo 19:6). *
CONGREGACIONTA PUSHAJ JESUCRISTOTA RESPETASHUNCHIJ
Jesusca Jehová Dios cushca autoridadta chasquishcamantami congregacioncunata ñaupajman pushacun. (Párrafo 14-ta ricui).
14. a) Marcos 10:45-pi nishca shinaca ¿Jehová Diosca Jesustaca imamantataj congregacioncunapaj uma cachun agllarca? b) ¿Cuerpo Gobernante huauquicunaca imatataj rurancuna? (“ ¿Cuerpo Gobernante huauquicunaca imallatataj rurancuna?” nishca recuadrota ricui).
14 Jehová Diosca paipaj Churita cushpami Jesuspi feta churajcunataca paipaj cachun randirca (Marcos 10:45-ta liyipai; Hechos 20:28; 1 Corintios 15:21, 22). Jesús ñucanchijmanta huañushcamantami Jehová Diosca paitaca congregacionpaj uma cachun agllarca. Jesusca congregacionpaj uma cashcamantami gentecunapajpish familiacunapajpish congregacionpi huauqui panicunapajpish leycunata churan. Shinallataj pajtachichunpish ricun (Gálatas 6:2). Ashtahuancarin paica tucuicunatami cꞌuyan, cuidan (Efesios 5:29).
15, 16. ¿Marleypaj, Benjaminpaj nishcacunamantaca imatataj yachanchij?
15 Panicunaca congregacionta pushajcunata cazushpami Jesusta respetashcata ricuchincuna. Estados Unidosmanta pani Marleyca: “Ñucaca familiapipish congregacionpipish ayudanataca achcatami valorani. Ñuca cusatapish congregacionta pushajcunatapish respetashpa catingapajmi esforzarini. Congregacionta pushajcunapish ñuca cusapish ñucata respetajpi valorajpica paicunata cazunaca jahuallami ricurin” ninmi. Cai pani shinallatajmi achca panicunapish sintirincuna.
16 Huauquicunaca panicunata respetashpa paicunata valorashpaca Yaya Dios cushca autoridadta valichishcatami ricuchincuna. Inglaterrapi causaj huauqui Benjaminca: “Panicuna congregacionpi alaja comentariocunata cujpica paicunamantaca achcatami yachani. Shinallataj alli estudiangapaj, alli predicangapaj, alli yachachij cangapaj, alaja yuyaicunata cujpimi paicunamantaca valishca yuyaicunata yachai tucuni. Panicunaca tucuicunatami achcata ayudancuna” ninmi.
17. ¿Jehová Dios churashca autoridadtaca imamantataj respetana canchij?
17 Congregacionpi cusacunapish, huarmicunapish, familiata pushajcunapish, congregacionta pushajcunapish tucuicuna Dios churashca autoridadta respetashpaca tandalla cushillami causashun. Ashtahuancarin Jehová Diostami jatunyachishun (Salmo 150:6).
CANTO 123 Diospaj organizacionta tucuipi cazushunchij
^ par. 5 ¿Panicunaca congregacionpica ima shinataj ayudancuna? ¿Huauquicunaca tucui panicunapajchu uma can? ¿Congregacionta pushajcunapaj autoridadhuan, familiata pushajcunapaj autoridadhuanca imapitaj chꞌican can? Cai tapuicunata cutichingapajmi Bibliapi tiyaj huaquin ejemplocunamanta yachashun.
^ par. 5 Huillaj revistapi septiembre de 2020-manta “Ñucanchij panicunata animashunchij” nishca yachaipi párrafo 6-ta ricui.
^ par. 9 “ ¿Panicunaca imata rurashpataj umata chꞌungurina can?” nishca recuadrota ricui.
^ par. 13 Agosto de 2020-manta Huillaj revistapi “Tucuicunata congregacionpi respetashunchij” nishca yachaipi párrafos 17 al 19-ta ricui. Chai yachaipica maijan congregacionman ringapaj familiata pushaj agllana cashcatami ricuchin.
^ par. 56 Panipaj cusa o shuj bautizarishca huauquica chai cꞌuchullapichari can. Paicuna ricucujpi, uyacujpimi panica umata chꞌungurina can.
^ par. 59 Caimanta ashtahuan yachangapajca “Manténganse en el amor de Dios” nishca libropi páginas 209 a 212-ta españolpi ricui.
^ par. 65 Cuerpo Gobernante huauquicunamanta ashtahuan yachangapajca 15 de julio de 2013-manta La Atalaya revistapi páginas 20 al 25-ta españolpi ricui.
