1. Jehovapa organizacionbica ¿imamandata huauquipanicunahuanga shujllashna tandanajushca capanchi?

JEHOVAPA organizacionbi cashcamandaca tucuicunallatami cushijushca capanchi. Jehová Dios churashca autoridadta respetangapaj esforzarimandami paipa organizacionbica tucuicunahuanllata ali llevaripanchi. Shinaca Jehová Diospa churashca autoridadta ashtahuan intindishpaca tucuicunallatami ashtahuan ali llevarishun.

2. Cai yachajuipica ¿ima tapuicunatata yachajupashun?

² Cunanga anciano huauquicuna congregacionbi imacunatallata pactachina cashcatami yachajugripanchi. Ashtahuanbash panigucuna congregacionbi ¿ima responsabilidadta charijta? ¿si tucuilla huauquicunachu panigucunataca umashna mandaita ushan? Congregacionbi ancianocunaman cushca autoridad, familia ucupi umashna mandana autoridadhuan igual o na igual cajtami yachajupashun. Callaripica panigucuna congregacionbi ima responsabilidadta charijta, shinallata paicunata imashina tratanatapashmi yachajupashun.

3. Huarmigucunata ashtahuan valichishpa tratangapaca ¿imata ayudanga?

³ Panigucunaca familiata cuidangapaj, Jehovamanda villachingapaj, congregacionbi huauquipanicunata ayudangapaca ninandami esforzarin. Chaimandami paicunataca ninanda agradicipanchi. Huarmigucunataca Jehová Dioshna, Jesushna, apóstol Pabloshnami ñucanchicunapash ricuna capanchi. Shinallami huarmigucunataca valichishpa ali tratashun.

4. Jehová Diosca, jaricunapash, huarmicunapash igual cashcataca ¿imashinata ricuchishca?

 ⁴ Bibliapica Jehová Diospa ñaupapi tanto jaricuna, huarmicunapash igual cashcatami ricuchin. Callari Jesusta catijcuna shuj shuj shimicunapi parlai ushachunga, Jehová Diosca paipa espíritu santotaca, tanto jaricunaman huarmicunamanbashmi curca (Hech. 2:1-4, 15-18). Jahua cielopi Jesushuan mandachunbashmi tanto jaricunata huarmigucunata agllashca (Gál. 3:26-29). Cai Alpapi na huañushpa causana bendiciondapash tanto jaricunaman, huarmicunamanmi cunga (Apoc. 7:9, 10, 13-15). Jesuspash ali villaigucunata villachichunga tanto jaricunata huarmigucunatami cacharca (Mat. 28:19, 20). Shinallata, Hechos libropica Priscila huarmigumandami parlan. Priscila huarmigumi, paipa cusandi Apolos jarigumanga Jesusmanda cabalguta yachachishcata villan (Hech. 18:24-26).

5. Lucas 10:38, 39, 42​pi nishcashnaca Jesusca ¿imashinata huarmigucunataca ricun carca?

⁵ Jesusca huarmicunataca respetohuanmi tratan carca. Na fariseocunashnachu carca. Fariseocunaca huarmigucunataca imapapash na valijtashna ricushpami, paicunahuanga gentecunapa ñaupapica parlaitapash na parlan carca. Bibliamandacarin paicunamanga villaitapash na villanllu carca. Cutin Jesusca Bibliamandaca huarmigucunamanbashmi yachachirca * (Lucas 10:38, 39, 42​ta liipangui). Shinallata Jesús villachishpa rijushpapashmi huarmigucuna paita cumbachun saquirca (Luc. 8:1-3). Pai causarishcata apostolcunaman villachunbashmi huarmigucunata cacharca (Juan 20:16-18).

6. Panigucunata respetohuan tratashcataca ¿imashinata apóstol Pabloca ricuchirca?

⁶ Apóstol Pabloca Timoteotaca huarmigucunata respetohuan tratachunmi mandarca. Mayorlla huarmigucunataca “mamatashna”, cutin jovenlla huarmigucunataca “panitashna” tratachunmi mandarca (1 Tim. 5:1, 2). Apóstol Pabloca, Timoteo shinlli feta charichunga ninandami ayudarca. Shina ayudashpapash Apóstol Pabloca Timoteopa mama, paipa abuela Timoteoman Bibliamanda yachachishcataca alimi yacharca (2 Tim. 1:5; 3:14, 15). Ashtahuangarin apóstol Pablo Roma llactapi causaj huauquipanicunaman shuj cartata escribishpaca panigucunamanga saludotapash shutipimi cacharca. Panigucunapa ruraicunatapash ninanda valichishcatami ricuchirca (Rom. 16:1-4, 6, 12; Filip. 4:3).

7. ¿Ima tapuicunatata cai estudiopi yachajugripanchi?

⁷ Imashinami Bibliapica ricupashcanchi, panigucunaca huauquicunamandaca na menos canllu. Ashtahuangarin panigucunami congregacionbica ninanda ayudan. Paicunaca congregacionbi tucui huauquipanicunahuan ali llevarichunmi, anciano huauquicunataca ninanda ayudan. Shinapash, Jehová Diosca ¿imamandata huaquinbica panigucuna umata taparichun mañan? Jaricunalla siervo ministerialcuna, ancianocuna caita ushajpipash ¿tucui jaricunachu huarmigucunataca umashna mandana can?

8. Efesios 5:23​pi nishca shinaca ¿pita huauquicunata, panicunatapash umashna mandajun? Intindichipai.

⁸ Na. Porque solo Jesusllami tucui congregacionmanda panigucunataca umashna mandajun (Efesios 5:23​ta liipangui). Familiapica cusami huarmigutaca umashna mandajun. Shinapash shuj churi bautizarishca cashpapash, paipa mamataca na umashna mandaita ushanllu (Efes. 6:1, 2). Congregacionbipash ancianocunaca na tucuipichu huauquipanicunataca umashna mandaita ushan (1 Tes. 5:12; Heb. 13:17). Shinallata shuj soltera panigu paipa taitacunahuan ñana causajpica, paipa taitaca paitaca ñana umashna mandaita ushanllu. Shinapash cai paniguca  paipa taitacunata, anciano huauquicunatapash respetashpami catin. Pero paitapashmi Jesusca umashna mandajun.

9. Huaquinbica panigucunaca ¿imamandata umataca taparina can?

⁹ Jehová Diosca congregacionda ñaupaman pushachunga jaricunatami churashca (1 Tim. 2:12). ¿Imamandata shina rurashca? Jehová Diosca callaripica Jesustami jaricunata umashna mandachun saquishca. Chaimandami jaricunataca congregacionda ñaupaman pushachunga churashca. Shina rurashpami congregacionbica shuj ordenda churashca. Shinapash huaquinbica shuj panigumi shuj huauquipa responsabilidadta pactachina tucujpimi, Jehová Diosca huarmigucunataca umata taparichun mañan (1 Cor. 11:4-7). * Caita rurashpaca panigucuna huauquigucunamanda menos cashcataca na ningapaj munanllu. Ashtahuangarin huauquicunapa autoridadta respetashcata ricuchingapami can. Cunanga: Familiapi cusacuna ¿imacunatallata pactachina cashcata? Shinallata congregacionbi ancianocunapash imacunatallata pactachina cashcatami yachajupashun.

10. ¿Imamandata shuj anciano huauquiguca congregacionmanda huauquipanicunataca imatapash nishpa mandana derechotami charini yanman?

¹⁰ Anciano huauquicunaca Jesusta, Jehová Dios mingashca huauquipanicunatapash ninandami juyan (Juan 21:15-17). Chaimandami huaquimbica shuj anciano huauquiguca, congregacionmanda huauquipanicunapa shuj taitashna sintirishpa, paicunataca cuidanata pensarinman. Shuj taitaca paipa familiata cuidangapaca imatapash nishpa mandana derechotami charin. Chaipi pensarishpami shuj anciano huauquiguca congregacionbi  huauquipanicunata cuidangapapash imatapash nishpa mandana derechotami charini yanman. Shuj huauquipanicunapashmi cashnallata pensaimanda, anciano huauquicunataca paicunamanda imapash decisionda agllachun mañaita ushanman. Shinapash taitacunapa responsabilidadca, ancianocunapa responsabilidadhuanga na igualchu can.

11. Taitacunapa responsabilidadhuan, ancianocunapa responsabilidadhuanga ¿imapita igual can?

¹¹ Apóstol Pabloca taitacunapa responsabilidadhuan, ancianocunapa responsabilidadhuan huaquin cosascunapi igual cashpapash, na tucuipi igual cashcatami ricuchirca (1 Tim. 3:4, 5). Jehová Diosca familia ucupica cusacunata cazuchunmi munan. Shinallatami congregacionbipash huauquipanicuna anciano huauquicunata cazuchun munan (Col. 3:20). Jehová Diosca cusacunataca paicunapa familiata espiritualmente cuidachunmi churashca. Cutin ancianocunatapash, huauquipanicunata espiritualmente cuidachunmi congregacionbica churashca. Imashinami taitacunaca familiata cuidashpa aliguta ricurian. Shinallatami ancianocunapash huauquipanicuna imagutapash minishtijujpipash ayudan (Sant. 2:15-17). Cusacunaca, Bibliapa mandashcacunata paipa familia pactachichunmi ayudana can. Chaitami Jehová Diosca munan. Ancianocunapash congregacionmanda huauquipanicunataca Jehovapa  mandashcacunata pactachichunmi ayudana can. Shinapash cai responsabilidadcunata pactachijushpaca, Bibliapi nishcashna pactachichunmi Jehová Diosca munan (1 Cor. 4:6).

12, 13. Romanos 7:2​pi nishcashnaca taitacunapa responsabilidadhuan, ancianocunapa responsabilidadhuanga ¿imapita diferente can?

¹² Ancianocunapa responsabilidadhuan, taitacunapa responsabilidadhuan huaquin cosascunapi igual cajpipash, Jehová Diosca cada unomanmi diferente responsabilidadta cushca. Por ejemplo ancianocunamanga shuj huauqui o shuj pani juchata rurashpa na arripintirijpica chai huauquita o panita expulsana responsabilidadtami cushca (1 Cor. 5:11-13).

¹³ Shinapash shuj anciano huauquiguca shuj familiapica na shuj taitashna imatapash nishpa mandaita ushanllu. Chaimandami taitacunamanga, paipa familiata cuidana responsabilidadta cushca (Romanos 7:2​ta liipangui). Familiapica taitacunami paicunapa huahuacuna huasimanda llujshijpi ima horas cutin tigramunata, imagutapash na cazujpi consejashpa astinata responsabilidadta charin (Efes. 6:1). Shinapash taitacunaca familiata cuidangapaj imapash desicionda nara japishpallatami, Bibliapi nishcashnaca huarmiguhuan ‘shujllashna’ cashcamanda huarmiguhuanra parlana can (Mat. 19:6). *

14. a) Marcos 10: 45​pi nishcashnaca Jehová Diosca ¿imamandata Jesús congregacionda umashna mandachun saquishca? b) Cuerpo Gobernantemanda huauquicunaca ¿ima responsabilidadtata charin? (“ Cuerpo Gobernantemanda huauquicunaca ¿ima responsabilidadtata charin?” nishca recuadrota ricupangui).

¹⁴ Jesús huañushcamandami Jehová Diosca huauquipanicunata, ashtaca gentecunatapash Jesuspi feta churajpica huañuimanda, juchamandapash  quishpichishca (Marcos 10:45​ta liipangui; Hech. 20:28; 1 Cor. 15:21, 22). Jesús ñucanchimanda huañushca cajpimi, Jehová Diosca Jesustaca congregacionda umashna mandachun saquishca. Chaimandami Jesusca tucuicuna Jehovapa mandashcacunata pactachichun, pai ñucanchicunaman consejocunata cuna derechota charin (Gál. 6:2). Shinapash consejocunallaca na cujunllu. Jesusca tucuicunatami aliguta cuidashpa ricuriajun (Efes. 5:29).

15, 16. Panigu Marley nishcamandaca ¿imatata yachajui ushapanchi? Huauquigu Benjaminmandapash ¿imatata yachajui ushapanchi?

¹⁵ Panigucunaca ancianocunapa nishcata uyashpami, Jesuspa autoridadta respetashcataca ricuchin. Estados Unidos llactamanda Marley shuti paniguca cashnami nin: “Familiapipash, congregacionbipash charishca responsabilidadtaca cushijushpami pactachini. Jehová munashcashnami ñucapa cusaguta, congregacionmanda anciano turigucunatapash respetangapaj esforzarini. Ñucapa cusagupash, anciano turigucunapash ñucapa rurashcacunata valichijpimi paicunata respetashpa catinaca ñucapaca ashtahuan fácil cashca” nin. Seguromi ashtaca panigucunapash cai panigushnallata sintiripanguichi.

¹⁶ Huauquicunaca panigucunata respetohuan ali tratashpami Jesuspa autoridadta respetashcataca ricuchin. Inglaterra llactamanda huauqui Benjaminga cashnami nin: “Tandanajuicunapica panigucunapa comentariocunamandaca ashtacatami yachajupashcani. Shinallata panigucunamandaca Bibliata imashina ali yachajunata, imashina ashtahuan ali villachinata, Bibliamanda shujcunaman ashtahuan ali yachachinatapashmi yachajushcani. Panigucunaca shuj alipacha ejemplotami cun”.

17. Jehová churashca autoridadtaca ¿imamandata respetana capanchi?

¹⁷ Jehová cushca responsabilidadta tucuicunallata pactachishpaca, congregacionbica tucuicunami ali llevarishun. Ashtahuanbash Jehová Diostami alabashun (Sal. 150:6).