1. Која тани јекх причина соске е Јеховаскири фамилија тани ко јекхипе?

АМЕН мангаја те ова дело тари е Јеховаскири фамилија. Соске е Девлескере народо иси ле мир хем јекхипе? Јекх причина тани адалеске со сарине амен трудинаја амен те поштујна адален каске о Јехова денѓа несаво авторитети. Уствари, кобор пошукар хаљоваја о поглаварство, добором повише сием ко јекхипе.

2. Башо кола пучиба ка добина одговор ки акаја статија?

² Ки акаја статија ка кера лафи кас иси авторитети ко собрание. Освен адава, ка одговорина ко акала пучиба: Која тани и улога е пхењенгири? Дали тано точно кај секова пхрал тано поглавари секоле пхењаке? Дали е старешинен иси лен исто авторитети упро пхраља хем о пхења сар со иси јекхе фамилијарно поглаваре упри пли ромни хем о чхаве? Прво, те кера лафи башо адава сар ваљани те дикха ко пхења.

3. Со ка поможинел аменге панда повише те ценина адава со керена амаре пхења?

³ Амен ценинаја амаре пхењен кола со трудинена пе те грижинен пе пумаре фамилиенге, те проповединен о шукар хабери хем те поможинен ко собрание. Ка ценина лен панда повише ако дикхаја ки ленде сар со дикхела о Јехова хем о Исус. Исто аѓаар, ка сикљова сар  те понашина амен е џувленцар адалеа со ка дикха сар о апостол Павле понашинѓа пе ленцар.

4. Сар и Библија сикавела кај о Јехова ценинела е џувлен исто сар со ценинела е муршен?

⁴ И Библија сикавела кај о Јехова ценинела е џувлен исто сар со ценинела е муршен. На пример, ој вакерела кај ко прво веко о Јехова денѓа свети дух е џувленге исто сар со денѓа е муршенге те шај те керен чудија, сар сој те керен лафи ко различна чхибја (Дела 2:1-4, 15-18). Хем џувља хем мурша тане помазиме таро свети дух те владинен заедно е Христосеа (Гал. 3:26-29). Исто аѓаар, хем о мурша хем о џувља ка добинен вечно живото ки Пхув (Отк. 7:9, 10, 13-15). Освен адава, хем о мурша хем о џувља иси лен задача те проповединен о шукар хабери хем те сикавен е манушен (Мат. 28:19, 20). На пример, ко лил Дела керела пе лафи баши јекх пхен, која со викинела пе сине Прискила, ој хем лакоро ром о Акила објаснинѓе о чачипе пошукар е Аполоске — јекх мануш кова со сине шукар школујмо (Дела 18:24-26).

5. Сар о стихија таро Лука 10:38, 39, 42 сикавена кај о Исус поштујнела сине е џувлен?

⁵ О Исус поштујнела сине е џувлен. Ов на сине сар о фарисеија, кола со мислинена сине кај о џувља нане добором важна сар о мурша. Ола на керена сине е џувленцар лафи ко тхана коте со сине бут мануша хем никогаш на би керена сине ленцар лафи башо Списија. Спротивно лендар о Исус керела сине лафи башо важна чачипа хем џувленцар хем муршенцар. * (Читин Лука 10:38, 39, 42.) Исто аѓаар, ов дозволинѓа е џувленге те патујнен леа џикоте проповединела сине (Лука 8:1-3). Хем, о Исус денѓа чест е џувленге те вакерен е апостоленге кај ов воскреснинѓа (Јован 20:16-18).

6. Сар о апостол Павле сикавѓа кај поштујнела е џувлен?

⁶ О апостол Павле посебно нагласинѓа е Тимотееске те поштујнел е џувлен. О Павле вакерѓа леске те понашинел пе е „попхуре џувленцар сар даја“ хем те дикхел е „потерне џувлен сар пхења“ (1. Тим. 5:1, 2). О Павле бут поможинѓа е Тимотееске те овел зрело христијани, ама ов признајнѓа кај е Тимотеескири дај хем и баба сине о прва со сикавѓе е Тимотее башо „света списија“ (2. Тим. 1:5; 3:14, 15). Кеда пишинѓа о писмо џи ко Римјања, о Павле поздравинѓа несаве пхењен аѓаар со спомнинѓа ленгоро анав. О Павле на само со сине свесно башо адава со керена сине акала пхења, ов исто аѓаар вакерела сине кобор ценинела адава со керена ки служба (Рим. 16:1-4, 6, 12; Фил. 4:3).

7. Башо кола пучиба ка кера лафи?

⁷ О претходна пасусија сикавена кај и Библија на вакерела кај о пхења врединена похари таро пхраља. Амаре мангле хем дарежлива пхења бут поможинена ко собрание хем о старешине ценинена адава со ола трудинена пе ко собрание те овел мир хем јекхипе. Ама, ваљани аменге одговор ко несаве пучиба. На пример: Соске о Јехова родела е пхењендар те учхарен пумаро шеро ко несаве прилике? Дали адава со само о пхраља тане именујме сар старешине хем слуга-помошникија, значинела кај секова пхрал тано поглавари секоле пхењаке ко собрание?

8. Спрема Ефешаните 5:23, дали секова пхрал тано поглавари секоле пхењаке? Објаснин.

⁸ О одговор тано на! Јекх пхрал нане поглавари са е пхењенге ко собрание;  поглавари тано о Христос. (Читин Ефешаните 5:23.) Ки фамилија о ром тано поглавари пле ромњаке. О крстимо чхаво нане поглавари пле дајаке (Еф. 6:1, 2). А ко собрание е старешинен иси лен ограничимо авторитети упро пхраља хем о пхења (1. Сол. 5:12; Евр. 13:17). Јекх џувли со нане ко брако хем на живинела пле родителенцар ој понадари да ка поштујнел пле родителен хем е старешинен. Сепак, сар о мурша ко собрание ла да иси ла само јекх поглавари — о Исус.

9. Соске о пхења понекогаш ваљани те учхарен пумаро шеро?

⁹ О Јехова мангела о собрание те овел организиримо, адалеске ов чхивѓа е Исусе те овел поглавари е муршеске. Хем о Јехова чхивѓа е муршен те предводинен ко собрание, ов на денѓа е џувленге о исто авторитети (1. Тим. 2:12). Ако ко несаве околностија јекх пхен мора те керел адава со нормално јекх пхрал керела ле, тегани о Јехова родела латар те учхарел пло шеро * (1. Кор. 11:4-7). Адалеа о Јехова на мангела те понижинел е пхењен, него родела лендар те сикавен кај поштујнена о поглаварство со поставинѓа ле ов. Акана те одговорина ко пучибе: Саво авторитети иси е фамилијарно поглаварен хем е старешинен?

10. Соске шај јекх старешина те мангел те чхивел правилија ко собрание?

¹⁰ О старешине мангена е Христосе хем ола мангена е „бакхрен“ со о Јехова хем о Исус денѓе лен те грижинен пе ленге (Јован 21:15-17). Адалеске со јекх старешина грижинела пе башо собрание ов шај те мислинел кај тано сар дад адаленге ко собрание.  Ов шај мислинела кај, ако јекх фамилијарно поглавари шај те чхивел правилија пле фамилијаке те шај те заштитинел ла, тегани јекх старешина да шај те чхивел правилија те шај те заштитинел е Девлескере бакхрен. Хем несаве објавителија шај, бизо те овен свесна, те поттикнинен е старешинен ко адава, аѓаар со родена лендар те анен одлуке наместо ленде. Ама, дали о старешине ко собрание хем о фамилијарна поглаварија иси лен исто авторитети?

11. Саве сличностија иси машкар и улога е фамилијарна поглаваренгири хем е старешиненгири?

¹¹ О апостол Павле вакерѓа кај о авторитети со иси е фамилијарно поглаварен, ки несави смисла тано слично сар о авторитети со иси е старешинен ко собрание (1. Тим. 3:4, 5). На пример, о Јехова мангела и ромни хем о чхаве те овен послушна е фамилијарно поглавареске (Кол. 3:20). Исто аѓаар, мангела адала сој ко собрание те овен послушна е старешиненге. О Јехова аџикерела таро поглаварија ки фамилија хем таро старешине те сикавен околен каске со грижинена пе те манген е Јехова. Исто аѓаар, ваљани те грижинен пе башо ленгере емоционална потребе хем исто сар о поглаварија ки фамилија, о старешине поможинена околенге ко собрание касте со иси проблемија (Јак.  2:15-17). Освен адава, о Јехова очекујнела таро старешине хем таро фамилијарна поглаварија те поможинен е јаверенге те икерен пе ко лескере мерилија хем предупрединела лен ма те „џан преку адава сој тано пишимо“ ки Библија (1. Кор. 4:6).

12-13. Спрема Римјаните 7:2, саве разлике иси машкар о фамилијарна поглаварија хем о старешине?

¹² Ама, исто аѓаар иси баре разлике машкар и улога јекхе старешинаскири хем јекхе фамилијарно поглаварескири. На пример, о Јехова чхивѓа е старешинен те овен сар судие ко собрание хем денѓа лен и одговорност те циден таро собрание околен со на каинена пе (1. Кор. 5:11-13).

¹³ Тари јавер страна, о Јехова денѓа несаво авторитети е фамилијарна поглаваренге со на денѓа е старешиненге. На пример, ов денѓа авторитети е поглаваренге те чхивен правилија пле фамилијаке хем те грижинен пе те икерен адала правилија. (Читин Римјаните 7:2.) Јекхе поглаваре иси ле право те одлучинел ко кова време лескере чхаве ваљани те иранен пе кхере. Исто аѓаар, иси ле авторитети те казнинел пле чхавен ако на икерена пе ко адава правило (Еф. 6:1). Џанѓола пе, јекх љубезно поглавари прво ка керел лафи пле ромњаја англедер те анел правилија ки фамилија, адалеске со ола о дуј тане „јекх тело“ * (Мат. 19:6).

14. а) Спрема Марко 10:45, соске тано соодветно адава со о Јехова чхивѓа е Исусе сар поглавари ко собрание? б) Сави одговорност иси е Водечко тело? (Дикх и рамка „ Сави одговорност иси е Водечко тело“.)

¹⁴ Преку и откупнина о Јехова платинѓа  башо живото секоле јекхескоро ко собрание. (Читин Марко 10:45; Дела 20:28; 1. Кор. 15:21, 22.) Адалеске тано соодветно со чхивѓа е Исусе, кова со денѓа пло живото аменге, те овел поглавари ко собрание. Сар амаро поглавари, е Исусе иси ле авторитети те чхивел правилија со ваљани те керел секова поединцо, секоја фамилија хем цело собрание. Хем ле иси ле право те испрајнел околен со на икерена пе ко адала правилија (Гал. 6:2). Ама, о Исус на дела само правилија. Ов грижинела пе секоле јекхеске хем мангела ле (Еф. 5:29).

15-16. Со сикљовеа таро адава со вакерѓа и пхен Марли хем о пхрал Бенџамин?

¹⁵ О пхења сикавена кај поштујнена е Христосе аѓаар со џана пало водство со дена ле о мурша кола сој поставиме те грижинен пе баши ленде. Бут пхења сложинена пе е пхењаја Марли, која со живинела ко САД. Ој вакерела: „Бут ценинава мло тхан сар ромни хем пхен ко собрание. Мора понадари да бут те трудинав ман те поштујнав о авторитети со денѓа о Јехова ме ромеске хем е старешиненге. Ама, мо ром хем о пхраља таро собрание керѓе те овел манге полокхо, соске сикавѓе кај поштујнена ман хем ценинена адава со керава“.

¹⁶ О пхраља сикавена кај хаљовена о поглаварство адалеа со поштујнена е пхењен. О пхрал Бенџамин со живинела ки Англија вакерела: „Сиклиљум бут таро е пхењенгере коментарија ко состанок хем таро ленгере предлогија сар те проучинав хем сар пошукар те проповединав хем те сикавав. Бут врединела адава со керена ола“.

17. Соске ваљани те поштујна о начело башо поглаварство?

¹⁷ Ако сарине ко собрание — мурша, џувља, фамилијарна поглаварија хем старешине хаљовена хем поштујнена о начело башо поглаварство, тегани ко собрание ка овел мир. А сој најважно, ка фалина амаре небесно даде, е Јехова (Пс. 150:6).