1. Savo si iech andal motivea sostar i familia le Iehovaschi si unime?

AME sam zurales bucurime te cheras partea anda i familia le Iehovaschi! Tha sostar si pacea hai unitatea ande amari familia? Iech motivo si că sea anda amende das amari zor te respectisaras o principio anda i autoritatea cai mechlea-les o Iehova. Mai but, cana hachiaras mai mișto cado principio, cadaia cherel-ame te avas mai unime.

2. Save pușimatande va avela te arachas o răspunso ande cado articolo?

² Ande cado articolo, va dichaia sar aplichil-pe o principio anda i autoritatea andi congregația. Va avela te arachas o răspunso le pușimatande cai aven: Savo si o rolo le pheiango? Si ciaces că fiesavo phral silo o șăro fiesavea pheiaco? Si ieche phures de congregație sea codoi felo autoritatea sar ieche șăres la familiaco opral peschi rromni hai le șiave? Mai anglal va avela te das duma anda sar trebulas te dichas le pheian.

3. Sar daștin te aven vi mai cuci amare pheia anda amende?

³ Le pheia sile cuci anda amende, anda codoia că von cheren phari buchi caște len seama pe lenghe familii, te predichin pherde zelo i vestea lași hai te ajutin codolen anda i congregația. Von va avena vi mai cuci anda amende cana hachiaras sar dichen-le o Iehova hai o Isus. Sa cadea, va avela te sichioas but buchia vi anda o modo sar o Pavel phiradea-pe le jiuvleanța.

4. Sar sicavel i Biblia că anda o Iehova le jiuvlea sile sa cadea de cuci sar le murșa?

 ⁴ I Biblia sicavel că anda o Iehova le jiuvlea si sa cadea de cuci sar le murșa. Sar exemplo, ando secolo I, o Iehova șiordea pesco spirito sfânto vi opral le murșa tha vi opral le jiuvlea hai dea len o zuralimos te cheren miracolea, sar sas te den duma andel șiba. (Fap. 2:1-4, 15-18) Vi mașcar codola machle spiritoia sfânto cai va avena te rain ande iech than le Cristosoia si vi murșa hai vi jiuvlea. (Gal. 3:26-29) Sa cadea, vi murșa, tha vi jiuvlea va primina viața veșnico pi phuv. (Rev. 7:9, 10, 13-15) Mai but, i predicarea hai o sicaimos sas-le dine te aven cărde vi le murșendar, vi le jiuvleandar. (Mat. 28:19, 20) Sar exemplo, ando lil Faptele del-pe duma anda sar lea partea iech phei po anav Priscila ca i lucrarea de predicare. Voi hai laco rrom, o Aquila, explichisarde mai mișto o ciacimos le Apolosche, iech murș mișto sicado. (Fap. 18:24-26)

5. Cadea sar phenel-pe ando Luca 10:38, 39, 42, sar sicadea o Isus respecto le jiuvleanghe?

⁵ O Isus sicadea pachiv hai respecto le jiuvleanghe. Vo ci lea-pe pala o obiceio le fariseiengo cai dichle mai tele le jiuvlean. Von ci dine duma le jiuvleanța ando publico, hai chichi mai but te den duma lența andal Scripturi. Tha, o Isus dea duma ciacimata spiritualo importanto le jiuvleanța cadea sar le murșența. * (Citisar Luca 10:38, 39, 42.) Mai but, vo mechlea le jiuvlean te jian leia andel thana cai vo predichilas. (Luca 8:1-3) O Isus sicadea pachiv le jiuvleanghe vi cana dea-le o privilegio te phenen le apostolenghe că vo sas-lo uștiado andal mule. (Ioan 20:16-18)

6. Sar sicadea o apostolo Pavel că respectisardea le jiuvlean?

⁶ O apostolo Pavel andea amintea le Timoteiosche că trebul te del pachiv le jiuvleanghe. Vo phendea lesche te phiravel-pe „le phure jiuvleanța sar niște deianța hai te dichel le tărne jiuvlean sar niște pheian”. (1 Tim. 5:1, 2) Chiar cana o Pavel ajutisardea but le Timoteios te arăsăl iech creștino maturo, vo hachiardea că leschi dei hai leschi phuri sas codola cai sicade-les mai anglal „le scrieri sfânto”. (2 Tim. 1:5; 3:14, 15) Ando lil Romani, o Pavel scriisardea o anav chichiva pheianghe casche bișaldea salutări. O Pavel dichlea lenghi phari buchi hai sicadea peschi recunoștința anda so cărde. (Rom. 16:1-4, 6, 12; Filip. 4:3)

7. Ce pușimata va dichaia mai dur?

⁷ Cadea sar dichleam andel paragrafea cai nachle, i Biblia ci sicavel că le pheia sile mai tele sar le phrala. Amare pheia iubitorii hai generoso sile zurales cuci hai le phure jianen că von daștin te ajutin te încărel-pe i pacea hai i unitatea andi congregația. Tha vazden-pe le pușimata cai aven: Sostar manghel o Iehova le pheiandar ca, ande chichiva situații, te pachiaren pengo șăro? Hai, anda codoia că numai le murșa sile numime sar phure hai slujitori auxiliari, însemnol cadaia că ieche phrales siles i autoritatea sar șăro opral fiesavi phei anda i congregația?

8. Cadea sar phenel-pe ando Efeseni 5:23, si fiesavo phral o șăro fiesavea pheiaco? Explichin.

⁸ O răspunso scurto si, na. Iech phral ci silo o șăro le saste pheiango anda i  congregația, o Cristos si. (Citisar Efeseni 5:23.) Andi familia, le rromes siles i autoritatea opral peschi rromni, tha iech șiavo boldo ci silo o șăro pesca deiaco. (Ef. 6:1, 2) Andi congregația, le phuren silen numai iech anumime autoritatea opral le pheia hai phrala. (1 Tes. 5:12; Evr. 13:17) Le pheia corcore adulto cai ci mai beșen penghe dadența ci sile tela i autoritatea penghe dadenghi. Cu sea cadala, von respectin mai dur penghe daden. Sa cadea, von respectin le phuren, tha, cadea sar le murșen anda i congregația, len silen iech corcoro șăro, o Cristos.

9. Sostar trebul po iechdata le pheia te pachiaren pengo șăro?

⁹ Si ciaces că o Iehova dea le phralenghe, na le pheianghe i autoritatea andi congregația ande soste priveal o sicaimos hai i închinarea. (1 Tim. 2:12) Sostar? Anda sa codo motivo anda savo șiutea le Isusos o șăro le murșesco, adică caște încărel i ordinea ande Leschi familia. Cana iech phei arachel-pe andi situația te cherel iech buchi cai ande iech modo normalo cheralas-la iech phral, o Iehova manghel latar te pachiarel pesco șăro. * (1 Cor. 11:4-7) O Iehova manghel cadaia le pheiandar na anda codoia că dichel-le mai tele, tha caște del-le i ocazia te sicaven pengo respecto caring o principio anda i autoritatea cai vo mechlea-les. Acana că dichleam cadal buchia, te das o răspunso ca o pușimos: Chichi de but autoritatea sile le șăren la familiache hai le phuren?

10. Sostar iech phuro de congregație daștilas te camel te cherel reguli po iechdata andi congregația?

¹⁰ Le phure iubin le Cristosos hai von iubin vi le „bacrean” save o Iehova hai o Isus dea-le ande lenghi grija. (Ioan 21:15-17) Iech phuro pherdo iubirea daștil te dichel-pe sar iech dad anda i congregația. Vo daștil te gândil-pe că, cadea sar ieche dades siles o drepto te cherel reguli caște feril pesca familia, sa cadea iech phuro daștil te cherel reguli, cai vo pachial că va ferila le bacrean le Devlesche. Chichiva phrala hai pheia chiar daștin te încurajin le phuren te phiraven-pe lența sar niște dada spiritualo hai manghen lendar vi te len decizii ande lengo than. Tha sile le phuren de congregație hai le șăren la familiache sa codoi autoritatea?

11. Ce asemănări si mașcar o rolo ieche șăresco la familiache hai ieche phuresco?

¹¹ O Pavel sicadea că si chichiva asemănări mașcar o rolo cai si ieche șăres la familiaco hai cai si ieche phures. (1 Tim. 3:4, 5) Sar exemplo, o Iehova camel ca le jene anda iech familia te ascultin le șărestar la familiaco. (Col. 3:20) Sa cadea, vo camel ca le phrala hai le pheia anda i  congregația te ascultin le phurendar. O Iehova ajucărel catar le șăre la familiache hai le phurendar te aven siguri că codola cai sile tela lenghi grija sile sasteveste spiritualo hai afectivo. Sa cadea, le phure len seama codolendar anda i congregația cai nachen prin pharimata. (Iac. 2:15-17) Mai but, o Iehova manghel le phurendar hai le șărendar la familiache te ajutin averen te ascultin lesche legi hai ‘te na nachen părdal so si scriime andi’ Biblia. (1 Cor. 4:6)

12, 13. Cadea sar phenel-pe ando Romani 7:2, save si le diferențea mașcar le roluri ieche șăresche la familiache hai ieche phuresche?

¹² Tha mașcar o rolo ieche phuresco hai ieche șăresco la familiache si vi diferențea bare. Sar exemplo, o Iehova numisardea le phuren, na le șăren la familiache te aven judecători, hai dea lenghe i responsabilitatea te duriaren anda i congregația codolen cai cheren păcatea hai ci căin-pe. (1 Cor. 5:11-13)

¹³ Cu sea cadala, o Iehova dea le șărenghe la familiache iech autoritatea cai ci dea-la le phurenghe. Sar exemplo, dea le șăres la familiache i autoritatea te cherel reguli anda peschi familia hai te lel seama că sile respectime. (Citisar Romani 7:2.) Iech șăro la familiaco daștil te phenel pesche șiavenghe ji ca ce ora trebun te aven chăre andi riat. Sa cadea, les siles i autoritatea te disciplinil pesche șiaven cana ci respectin codoi regula. (Ef. 6:1) Ciaces, angla te cherel reguli anda peschi familia, iech șăro la familiaco pherdo iubirea del duma pesca rromniaia, anda codoia că sile „iech corcoro mas”. * (Mat. 19:6)

14. a) Cadea sar phenel-pe ando Marcu 10:45, sostar alosardea o Iehova le Isusos te avel o șăro la congregațiaco? b) Savo si o rolo le Corposco de Guvernare? (Dich o chenarii „ O rolo le Corposco de Guvernare”.)

¹⁴ Prin i răscumpărarea, o Iehova chindea parpale i viața fiesave creștinoschi anda i congregația hai orisave manușeschi cai sicavel pachiamos ando Cristos. (Citisar Marcu 10:45; Fap. 20:28; 1 Cor. 15:21, 22) Anda codoia, o Iehova alosardea le Isusos, codo cai mulea anda amende, te avel o șăro la congregațiaco. Sar șăro, le Isusos siles i autoritatea te cherel reguli anda le manușa corcore, andal familii hai andal congregații, tha, vi te lel seama te aven respectime. (Gal. 6:2) Tha, o Isus cherel mai but sar te del reguli, vo lel seama pe amende hai iubil-ame. (Ef. 5:29)

15, 16. So sichioas anda so phendea i Marley hai o Benjamin?

¹⁵ Le pheia sicaven respecto caring o Cristos cana acceptin i îndrumarea le phurenghi, cas vo alosardea, te len seama lendar. But pheia simțon-pe sar i Marley, iech phei anda Statele Unite, cai phendea: „Anda mande si zurales cuci mânro than sar rromni hai phei andi congregația. Cherav sea o timpo eforturi caște avel-ma iech atitudinea lași caring o principio anda i autoritatea cai mechlea-les o Iehova. Tha, cadai buchi na-i phari anda mande, anda codoia că mânro rrom hai le phrala anda i congregația respectin-ma hai sicaven aprecierea anda so cherav”.

¹⁶ Le phrala sicaven că hachiaren o principio anda i autoritatea cana respectin hai den pachiv le pheianghe. O Benjamin, iech phral anda Anglia phenel: „Sichilem but buchi anda le răspunsuri cai le pheia den-le ca-l întruniri. Von ajutisarde-man te avav mai lașio andi predicarea hai sicade manghe but buchia sar te cherav mânro studio personalo mai profundo. Pachiav că lenghi buchi si zurales cuci anda i congregația”.

17. Sostar trebul te respectisaras o principio anda i autoritatea?

¹⁷ Andi congregația va avela pacea cana sea anda amende – murșa, jiuvlea, șăre la familiache hai phure de congregație – hachiaras hai respectisaras o principio anda i autoritatea. Hai, i mai importanto buchi si, că așaras amare Dades iubitorii, Iehova. (Ps. 150:6)