1. Mbeni raison wa la ndali ni sewa ti Jéhovah ayeke beoko?

A NZERE na e mingi ti duti na yâ ti sewa ti Jéhovah. Ngbanga ti nyen la e yeke na siriri nga e yeke beoko na yâ ti sewa so? Mbeni raison ni ayeke so e kue e yeke sara ngangu ti ne azo so Jéhovah amû na ala komandema. Ti tâ tënë ni, tongana e comprendre nzoni tënë ti komandema so Jéhovah azia na sese, e yeke duti beoko ahon ti kozo.

2. Ahunda wa la e yeke kiri tënë na ni na yâ ti article so?

² Na yâ ti article so, e yeke gbu li na ndö ti tënë ti komandema na yâ ti congrégation. E yeke kiri nga tënë na ahunda so: Kua wa la aita-wali ayeke na ni na yâ ti congrégation? Ti vrai ni, eskê aita-koli kue ayeke mokonzi ti aita-wali kue? Eskê komandema so a-ancien ayeke na ni na ndö ti aita ti congrégation ayeke oko na ti so mbeni mokonzi ti sewa ayeke na ni na ndö ti wali ti lo nga na amolenge ti lo? Kozoni, zia e bâ bango ndo wa la a yeke nzoni e duti na ni na ndö ti aita-wali.

3. Tongana nyen la e lingbi ti bâ na nene ni mingi kua so aita-wali ayeke sara?

³ E bâ na nene ni mingi aita ti e ti wali so ayeke sara ngangu ti bâ lege ti sewa ti ala, ti fa nzoni tënë nga ti mû maboko na congrégation. E yeke bâ ala na nene ni mingi tongana e gbu li na ndö ti bango ndo ti Jéhovah na Jésus na ndö ti ala. Tongana e gbu nga li na ndö ti fason so bazengele Paul ayeke  sara ye lani na mbage ti awali, a yeke mû maboko na e mingi.

4. Tongana nyen la Bible afa so Jéhovah abâ awali nga na akoli kue na nene ni?

⁴ Bible afa so Jéhovah abâ awali nga na akoli na nene ni. Na tapande, Bible afa so, na ngoi ti akozo Chrétien, Jéhovah amû yingo vulu na awali nga na akoli, nga lo mû na ala ngangu ti sara amiracle tongana sarango tënë na ayanga ti kodro nde nde (Kus. 2:1-4, 15-18). Jéhovah asoro awali nga na akoli na lege ti yingo vulu ti komande legeoko na Christ (aGal. 3:26-29). Awali nga na akoli ayeke wara ande futa so ayeke fini ti lakue lakue na ndö ti sese (Apoc. 7:9, 10, 13-15). Nga, a mû na akoli nga na awali kua ti fango nzoni tënë nga na ti fango ye (Mat. 28:19, 20). Na tapande, mbeti ti Kusala asara tënë ti Priscille, mbeni ita-wali so lo na koli ti lo Aquila amû maboko na Apollos, so ahinga ye mingi, ti mä yâ ti tâ tënë nzoni mingi.—Kus. 18:24-26.

5. Tongana nyen la Luc 10:38, 39, 42 afa so Jésus ane lani awali?

⁵ Jésus ane lani awali. Lo sara ye tongana aFarizien ape so abâ lani awali tongana ambumbuse zo. Ala yeke sara tënë na awali na lê ti azo ape, nga ala yeke sara lisoro na awali lâ oko ape na ndö ti Mbeti ti Nzapa. Me Jésus ayeke sara lani lisoro na adisciple ti lo, akoli nga na awali, na ndö ti atënë ti Nzapa so nda ni alï mingi. * (Diko Luc 10:38, 39, 42.) Lo zia nga si awali amû peko ti lo na angoi so lo yeke tambela ti fa tënë (Luc 8:1-3). Na ndö ni, Jésus amû lani na awali pasa ti gue ti fa na abazengele so a zingo lo na kuâ awe.—Jean 20:16-18.

6. Tongana nyen la bazengele Paul afa so lo ne lani awali?

⁶ Bazengele Paul atene lani na Timothée ti ne awali. Lo tene na lo ti sara ye na “ambakoro-wali tongana amama ti [lo]” nga ti bâ “amaseka-wali tongana aita ti [lo] ti wali”. (1 Tim. 5:1, 2). Paul asara lani aye mingi ti mû maboko na Timothée ti ga mbeni Chrétien so ayeke biazo, me lo hinga so mama ti Timothée nga na âta ti lo ti wali la afa na lo kozo “atënë ti Nzapa so a sû na mbeti”. (2 Tim. 1:5; 3:14, 15). Na yâ ti lettre ti Paul na aRomain, lo bara aita-wali na iri ti ala. Paul asara tënë ti akua so aita-wali asara nga lo kiri singila na ala ndali ni.—aRom. 16:1-4, 6, 12; aPhil. 4:3.

7. Ahunda wa la e yeke kiri tënë na ni fadeso?

⁷ Tongana ti so aparagraphe so ahon afa, Bible afa ape so akoli ayeke kota ahon awali. Aita ti e ti wali so aye azo nga so amû ye mingi na azo amû maboko mingi na congrégation, nga a-ancien ahinga so anzoni sarango ye ti ala asara si siriri nga na beoko ayeke na yâ ti congrégation. Me a lingbi e kiri tënë na ambeni hunda. Na tapande: Ngbanga ti nyen la na ambeni ngoi Jéhovah ahunda ti tene mbeni ita-wali akanga ye na li ti lo? So gï aita-koli la apeut ti ga a-ancien nga na awakua ti mungo maboko, a ye ti fa so aita-koli kue ayeke mokonzi ti aita-wali kue na yâ ti congrégation?

8. Ti gue oko na aÉphésien 5:23, eskê aita-koli kue ayeke mokonzi ti aita-wali kue? Fa ndani so mo tene tongaso.

⁸ Na nduru tënë, ên-ën. Mbeni ita-koli ayeke mokonzi ti aita-wali kue na yâ ti congrégation ape; Christ la ayeke mokonzi ti ala. (Diko aÉphésien 5:23.) Na yâ ti sewa, koli la  ayeke na komandema na ndö ti wali ti lo. Mbeni molenge ti koli so awara batême awe ayeke mokonzi ti mama ti lo ape (aÉph. 6:1, 2). Na yâ ti congrégation nga, a-ancien ayeke na mbeni komandema na ndö ti aita-wali nga na aita-koli (1 aThes. 5:12; aHéb. 13:17). Ka ti mbeni ita-wali so ayeke kumbamba so alango na gbe ti babâ na mama ti lo encore ape? Lo yeke ngbâ ti ne babâ na mama ti lo, me lo yeke na gbe ti komandema ti babâ ti lo encore ape. Nga, lo ne a-ancien, me tongana ti aita-koli so ayeke na yâ ti congrégation, mokonzi ti lo oko ayeke Jésus.

9. Ngbanga ti nyen la na ambeni ngoi a lingbi aita-wali akanga ye na li ti ala?

⁹ Jéhovah aye si aye angbâ ti tambela na lege ni na yâ ti congrégation. Ndani la lo zia Jésus mokonzi ti akoli. Nga, Nzapa azia akoli ti mû li ni na yâ ti fango ye nga na vorongo lo na yâ ti congrégation, me awali ape (1 Tim. 2:12). Tongaso, tongana na ambeni ngoi, a hunda na mbeni ita-wali ti sara mbeni kua so mbeni ita-koli la adoit fade ti sara ni, Jéhovah ahunda ti tene lo kanga ye na li ti lo (1 aCor. 11:4-7). * Jéhovah ahunda na aita-wali ti sara tongaso ti fa so ala ne azo so a mû na ala mbeni komandema, me pëpe ti kiri na nengo ti ala na gbe ni. So e hinga ni tongaso, zia e kiri tënë fadeso na hunda so: Komandema wa la amokonzi ti sewa nga na a-ancien ayeke na ni?

10. Ngbanga ti nyen la mbeni ancien apeut ti pensé ti lu andia ndali ti aita ti congrégation?

¹⁰ A-ancien aye Christ, nga ala ye ‘ataba’ so Jéhovah na Jésus azia ala ti bâ lege ti ala  (Jean 21:15-17). Na nzoni bibe, mbeni ancien alingbi ti bâ terê ti lo tongana babâ ti aita ti congrégation. Lo peut ti pensé lo tene tongana mbeni babâ ti sewa ayeke na droit ti lu andia ti bata azo ti sewa ti lo, mbeni ancien alingbi ti lu andia so lo pensé so ayeke bata ataba ti Nzapa. Ambeni ita ayeke hunda a-ancien ti sara ye tongana ababâ ti ala na lege so ala hunda na ala ti mû adesizion na place ti ala. Me eskê a-ancien nga na amokonzi ti sewa ayeke na même komandema?

11. Tongana nyen la akua ti mbeni mokonzi ti sewa ague oko na ti mbeni ancien?

¹¹ Bazengele Paul afa so ambeni kua ti mbeni mokonzi ti sewa ague oko na ti mbeni ancien (1 Tim. 3:4, 5). Na tapande, Jéhovah aye ti tene azo ti sewa amä yanga ti mokonzi ti sewa ni (aCol. 3:20). Lo ye nga ti tene aita ti congrégation amä yanga ti a-ancien. Jéhovah aku ti tene amokonzi ti sewa nga na a-ancien afa na azo so ayeke na gbe ti ala ti ye lo. Amokonzi ti sewa nga na a-ancien ayeke sara kue ti tene azo so ala yeke bâ lege ti ala ahinga so ala ye ala. Nga legeoko tongana ti so anzoni babâ ti sewa ayeke sara, a-ancien ayeke sara kue ti mû maboko na aita ti congrégation so ayeke na akpale (Jacq. 2:15-17). Na ndö ni, Jéhovah aku ti tene a-ancien nga na  amokonzi ti sewa amû maboko na aita nga na azo ti sewa ti ala ti sara ye alingbi na andia ti lo. Lo gboto nga mê ti ala ti “sara ye ahon ti so a sû” na yâ ti Bible pëpe.—1 aCor. 4:6.

12-13. Tongana ti so aRomain 7:2 afa, kangbi wa la ayeke na popo ti kua ti amokonzi ti sewa nga na ti a-ancien?

¹² Ye oko, akota kangbi ayeke na popo ti akua ti mbeni ancien nga na ti mbeni mokonzi ti sewa. Na tapande, Jéhovah azia a-ancien ajuge, nga lo mû na ala kua ti tene ala zi na yâ ti congrégation azo so asara siokpari na so achangé bê ti ala ape.—1 aCor. 5:11-13.

¹³ Na mbage, Jéhovah amû na amokonzi ti sewa mbeni komandema so lo mû na a-ancien ape. Lo mû lege na mbeni mokonzi ti sewa ti lu andia ndali ti azo ti sewa ti lo nga ti bâ si ala sara ye alingbi na ni. (Diko aRomain 7:2.) Na tapande, mbeni mokonzi ti sewa ayeke na droit ti fa na amolenge ti lo l’heure so ala doit ti kiri na yanga-da na bï. Lo yeke nga na droit ti punir amolenge ti lo tongana ala sara ye alingbi na ndia so ape (aÉph. 6:1). Me mbeni mokonzi ti sewa so asara ye na ndoye ayeke sara lisoro na wali ti lo kozo si lo lu andia ndali ti azo ti sewa ti lo, ndali ti so lo na wali ti lo ayeke “terê oko.” *—Mat. 19:6.

14. (a) Ti gue oko na Marc 10:45, ngbanga ti nyen la a yeke na lege ni so Jéhovah azia Jésus mokonzi ti congrégation? (b) Kua ti Bebungbi ayeke nyen? (Bâ encadré “ Kua ti Bebungbi.”)

¹⁴ Jéhovah avo fini ti azo kue so ayeke na yâ ti congrégation na lege ti ye so a futa ti zi azo. (Diko Marc 10:45; Kus. 20:28; 1 aCor. 15:21, 22.) Tongaso, a yeke na lege ni  so Jéhovah azia Jésus, so amû fini ti lo tongana ye so a futa ti zi azo, ti duti mokonzi ti congrégation. Ndani la Jésus ayeke na droit ti lu andia na ndö ti aye so azo, asewa nga na congrégation ni kue adoit ti sara; nga lo yeke na droit ti bâ si e sara ye alingbi na ni (aGal. 6:2). Jésus alu gï andia ape, me lo bâ lege ti e oko oko kue nzoni nga lo ye e.—aÉph. 5:29.

15-16. Atënë so Ita-wali Marley nga na Ita-koli Benjamin atene afa na mo nyen?

¹⁵ Aita-wali ane Christ na lege so ala sara ye alingbi na afango lege ti aita-koli so a zia ala ti bâ lege ti ala. Marley, mbeni ita-wali na États-Unis, afa na nduru tënë bango ndo ti aita-wali mingi. Lo tene: “Mbi bâ biani na nene ni place ti mbi ti wali ti koli nga ti ita-wali na yâ ti congrégation. Mbi doit lakue ti gi ti ne koli ti mbi nga na a-ancien, so Jéhovah amû na ala komandema. Koli ti mbi nga na aita-koli ti congrégation asara si a yeke ngangu na mbi ape ti ne ala, ndali ti so ala ne mbi nga ala bâ na nene ni akua so mbi sara.”

¹⁶ Aita-koli afa so ala comprendre tënë ti dutingo mokonzi na lege so ala ne aita-wali. Benjamin, mbeni ita-koli na Angleterre, atene: “Mbi manda ye mingi na lege ti acommentaire ti aita-wali na ngoi ti abungbi nga na awango so ala mû na ndö ti nzoni kode ti mandango ye, ti fango tënë nga na ti fango ye. Mbi pensé so kua so ala yeke sara ayeke kota kua mingi.”

17. Ngbanga ti nyen la a yeke nzoni e ne azo so Jéhovah amû na ala komandema?

¹⁷ Tongana azo kue na yâ ti congrégation, akoli, awali, amokonzi ti sewa nga na a-ancien, ane azo so Jéhovah amû na ala komandema, siriri ayeke duti na yâ ti congrégation. Na ye so ayeke kota mingi ayeke so e yeke mû gonda na Babâ ti e ti yayu, Jéhovah, so aye e mingi.—Ps. 150:6.