1. Kantu kahi karhuma omulala gwa Yehova gwaja mw’ecinyabuguma?

RHWESHI rhunashagalukire okuba baguma bw’omu mulala gwa Yehova. Bulya gurhi ogo mulala gwirhu gubam’omurhula n’ecinyabuguma? Akantu karhurhabala kuli kubona oku ngasi muguma wirhu anacihangane okukenga omupango Yehova ahizireho guyerekire obukulu. Ecinyabuguma cirhu cinagendekere casera, erhi rhuhikira aha rhwahugûkwa bwinja ogo mupango Yehova ahizîreho.

2. Madoso gahi rhwashuzako mw’eci cigabi?

² Mw’eci cigabi, rhwaganirira bandi obukulu buyerekire omu cigamba. Na kandi rhwayish’ishuza kw’aga madoso: Omukolo gwa bali birhu guba guhi? Ka ngasi mwene wirhu aba nnawabo wa ngasi mwali wirhu? K’obukulu abagula bajira kuli bene wirhu na bali birhu, ka ko buba nk’obukulu nnawabo w’omulala ajira kuli mukage n’omwana wage? Burhangiriza, rhulole oku rhushinganine rhukabona bali birhu.

3. Bici byakarhurhabala rhushagalukire omukolo bali birhu bahikiriza?

³ Rhunashagalukire bali birhu bakola bwenene lyo bashibirira omulala gwabo, lyo bahubiri omwanzi mwinja na lyo barhabala ecigamba. Okuhugûkwa oku Yehova na Yezu babona bali birhu, kwanarhurhabala rhubashagalukire bwenene. Na kandi rhwayunguka n’oku Paolo akagijirira abakazi.

4. Gurhi Ebibliya eyerekinemo oku Yehova anakabona abalume n’abakazi oku boshi bali ba bulagirire?

 ⁴ Ebibliya eyerekine oku Yehova anakabona abalume n’abakazi oku boshi bali ba bulagirire. Kwa lwiganyo, eyerekine oku omu myaka igana mirhanzi, Yehova aha abalume n’abakazi iroho lyage litagatifu anabaha obuhashe bw’okujira ebisomerine, kwa lwiganyo nk’okushambala ezindi ndimi. (Ebj. 2:1-4, 15-18) Abo balume n’abo bakazi boshi bashigwa amavurha kugerera iroho litagatifu, na ntyo bahâbwa obulangalire bw’okuyishirhambula haguma na Kristu. (Gl. 3:26-29) Abalume n’abakazi bayish’ihâbwa obuzine bw’ensiku n’amango hanw’igulu. (Maf. 7:9, 10, 13-15) Na kandi abalume n’abakazi boshi babà bahîrwe omukolo gw’okuyaliza omwanzi mwinja. (Mt. 28:19, 20) Ko n’oko, ecitabu c’Ebijiro by’Entumwa ciganirire gurhi mwali wirhu Prisila n’iba, Akila, bahugûliraga mwanafunzi muguma wakag’ihamagalwa Apolo okuli kw’akanwa ka Nnamahanga.​—Ebj. 18:24-26.

5. Gurhi olwandiko lwa Luka 10:38, 39, 42, luyerekinemwo entanya Yezu agwerhe okubiyerekire abakazi?

⁵ Yezu akagikenga abakazi. Arhayigaga enkomêdu Abafarizeyo bagwerhe y’okugayaguza abakazi n’okurhalonza ciru okubaderheza aha abantu bali, erhi kurhakabaganiza omwanzi guyerekire Amandiko. Lubero n’oko, Yezu akagihamagala abakazi nabo bayishe bayumve enshambalo z’ekiroho akagijira haguma n’abandi banafunzi bage. * (Osome Luka 10:38, 39, 42.) Akagibwira abakazi nabo oku bamuluse omu mukolo gw’amahubiri. (Lk. 8:1-3) Na kandi abaha olukengwa lw’okugendibwira entumwa zage oku anafûsire.​—Yn. 20:16-18.

6. Gurhi Paolo ayerekinemwo oku akenzire abakazi?

⁶ Paolo akengeza Timoteyo oku akakenga abakazi. Amubwira oku akabona ‘abagikulu nka bazire bage, n’abahya nka bali babo.’ (1 Tm. 5:1, 2) Ciru akaba Paolo ajijire okwage koshi ly’arhabala Timoteyo ahikire aha aba Mukristu okuzire kiroho, cikone arhayibagiraga oku nnina wa Timoteyo na nakulu bo bali barhanzi okumuyigiriza “Amandiko Matagatifu.” (2 Tm. 1:5; 3:14, 15) Omu maruba Paolo ayandikiraga Abaroma ahiramw’amazino ga bali birhu anaderha oku babalamuse. Arhabonaga omukolo gwabo bali birhu gone, cikone abavuga n’omunkwa nka Bakristu bakagikola boshi.​—Rm. 16:1-4, 6, 12; Fl. 4:3.

7. Madoso gahi rhwashuzako?

⁷ Nk’oku ebifungo biri embere biyerekine, nta lwandiko loshi-loshi lw’Ebibliya luyerekine oku omulume yeba wa bulagirire kulusha omukazi. Abo bali birhu bazigirwa na bahânyi babà ba bulagirire bwenene, n’abagula bayishi oku abo bali birhu banarhabale okugendekeza omurhula n’ecinyabuguma omu cigamba. Cikoki byanahûna rhushuze kw’aga madoso maguma maguma: Bulya gurhi Yehova alonza oku bali birhu bayambale ecitambara mango maguma na maguma? Bulya bene wirhu bwone bahirwaho nka bagula erhi barhabazi b’abagula, k’oko kuyerekine oku ngasi mwene wirhu yeshi aba nnawabo wa ngasi mwali wirhu w’omu cigamba?

8. Nk’oku biyerekinwe omu lwandiko lwa Abefezi 5:23, ka ngasi mwene wirhu yeshi aba nnawabo wa ngasi mwali wirhu? Ohugûle.

⁸ Kwa bofofi, ishuzo ali nanga! Nta mwene wirhu oba nnawabo wa bali birhu bw’omu cigamba, Kristu yeba nnawabo w’ecigamba c’Ecikristu. (Osome Abefezi 5:23.) Omu mulala, omulume yeba nnawabo wa mukage. Omurhabana mubatize arhaba nnawabo wa nnina.  (Ef. 6:1, 2) N’omu cigamba, obukulu abagula bajira kuli bene wabo na bali babo, buba bwa lugero. (1 Ts. 5:12; Hb. 13:17) Mwali wirhu mulamba orhacilama haguma n’ishe erhi nnina, anagendekere akenga ababusi bage n’abagula. Cikone, aka bene wirhu b’omu cigamba, bali birhu balamba nabo bajira nnawabo muguma yene, kw’okuderha Yezu.

9. Bulya gurhi byakahikira mwali wirhu ayambale ecitambara kanga kaguma kuguma?

⁹ Okuderha okuli, Yehova ahizireho abalume oku bakayigiriza n’okuyimangira ecigamba, cikone arhahâga abakazi ogo mukolo. (1 Tm. 2:12) Bulya gurhi? Nka kulya Yehova anacishogaga Yezu oku abe nnawabo w’omulume, ko kwanarhumaga acishoga abalume mpu ly’omumulala gwage murhagija akavulindi. Erhi byakahikira akanga kahûnyire mpu omukazi ajire omukolo gwalishingane gujirwe n’omulume, mw’ako kanga Yehova adesire oku omukazi ashinganine ayambale ecitambara. * (1 Kr. 11:4-7) Yehova arhabwiziri abakazi mpu bajire ntyo bulya amanyire oku bali ba busha, cikone ababwizire ntyo lyo bayerekana oku bakenzire akanuni kayerekire okuba nnawabo ahiragaho. Obu rhwamahugûkwa ntyo, rhushuzagye kw’er’idoso: Bukulu buhi ba nnawabo b’emilala n’abagula bajira?

10. Bulya gurhi omugula akahikira aha arhondera ahirira bene wirhu bw’omu cigamba amarhegeko?

¹⁰ Abagula babà bazigire Kristu, banaba bazigire “ebibuzi” Yehova na Yezu babahire oku babishibirire. (Yn. 21:15-17) N’entanya nyinja, hali amango omugula akahikira aha arhanya oku ali nk’ishe w’ecigamba. Anarhanya oku erhi akaba nnawabo w’omulala agwerhe  oluhûma lw’okuhirira omulala gwage amarhegeko ly’agulanga, kw’okuderha oku omugula naye agwerhe oluhûma lw’okuhirira ebibuzi bya Nnamahanga ali alanga amarhegeko. Na bene wirhu na bali birhu baguma baguma banashumya abagula bacijire ba nnawabo erhi bakakabahûna oku babarhôlere mihigo milebe. Cikone, abagula b’ecigamba na ba nnawabo b’omulala ka bagwerhe bukulu buguma?

11. Lushangi luhi luli ekarhi k’emikolo y’abagula n’eya ba nnawabo b’omulala?

¹¹ Paolo ayerekine oku haba olushangi ekarhi ka’omukolo gwa nnawabo w’omulala n’og’omugula. (1 Tim. 3:4, 5) Kwa lwiganyo, Yehova aba alonzize abantu b’omu mulala bakakenga ba nnawabo b’omulala. (Kl. 3:20) Anaba alonzize abantu bw’omu cigamba nabo bakakenga abagula. Yehova alonzize ba nnawabo b’omulala n’abagula b’ecigamba bakamanyirira ehali y’ekiroho y’abali idako z’obulongozi bwabo. Banashinganine bakashibirira amalagirire g’ekandalala ga balya bali idako ly’obulongozi bwabo. Nka kula ba nnawabo binja b’omulala bajira, abagula bashinganine bakacihangana okurhabala balya bali idako ly’obulongozi bwabo omu kasanzi k’amazibu. (Yk. 2:15-17) Na kandi, Yehova ahûnyire ba nnawabo b’omulala n’abagula oku bakarhabala abandi bakenge amarhegeko gage, cikone bayake okuhâna  irhegeko lilushire “ebyayandisirwe” omu Bibliya.​—1 Kr. 4:6.

12-13. Nk’oku biyerekinwe omu lwandiko lwa Abaroma 7:2, omu njira nci emikolo ya ba nnawabo b’omulala eba lubero n’ey’abagula?

¹² Cikone haligi n’olubero luhaba ekarhi kw’omukolo gwa nnawabo w’omulala n’og’omugula. Kwa lwiganyo, Yehova ahîre abagula omukolo gw’okukakola nka batwi b’olubanja, anabahîre omukolo gw’okurhenza omu cigamba balya boshi bajira ebyaha barhanalonzizi okuciyunjuza.​—1 Kr. 5:11-13.

¹³ Lubero n’oko, Yehova ahîre ba nnawabo b’omulala bukulu bulebe arhahâga abagula. Kwa lwiganyo, ayemerire nnawabo w’omulala oku anahiraho omulala gwage amarhegeko n’okulabiriza erhi bali bagarhumikira. (Osome Abaroma 7:2.) Nnawabo w’omulala agwerhe oluhûma lw’okuhiga nsinga abana bage bashinganine bakagaluka aha ka. Na kandi agwerhe oluhusa lw’okuhana abo bana nka barharhumikiri er’irhegeko. (Ef. 6:1) Cikone, nnawabo mwinja w’omulala anarhangiganira na mukage embere arhôle muhigo mulebe; bulya bombi bali “mubiri muguma.” *​—Mt. 19:6.

14. (a) Nk’oku biyerekinwe omu lwandiko lwa Marko 10:45, bici byarhumaga Yehova acishoga Yezu oku abe nnawabo w’ecigamba? (b) Omukolo gw’Embaraza Eri Yalongoza guba guhi? (Olole ecisanduku cidesire “ Omukolo gw’Embaraza Eri Yalongoza.”)

¹⁴ Kugerera engombôlo ya Yezu, Yehova agula akalamo ka ngasi muntu oli omu cigamba c’Ecikristu, n’aka ngasi muntu yeshi wakanahira obuyemere bwage muli eyo ngombôlo. (Osome Marko 10:45; Ebj. 20:28;  1 Kr. 15:21, 22) Oko ko kwarhumaga acishoga Yezu wahânaga obuzine bwage ngombôlo oku abe nnawabo w’ecigamba. Bulya Yezu ye nnawirhu, agwerhe oluhûma lw’okuhirira amarhegeko abantu boshi, emilala n’ecigamba coshi. (Gl. 6:2) Yezu arhali marhegeko gone arhuha, cikone analise n’okushibirira ngasi muguma wirhu.​—Ef. 5:29.

15-16. Bici enderho za mwali wirhu Marley na mwene wirhu Benjamin zikuyigirizize?

¹⁵ Bali birhu banayerekane oku bakenzire Kristu omu kurhumikira obulongozi bahâbwa gugerera abalume Kristu ahizireho oku babashibirire. Mwali wirhu Marley, olama e États-Unis, adesire entanya hofi bali birhu banji bajira. Adesire ntya: “Nnanshagalukire enafasi yani y’omukazi na mwali wirhu cigamba. Nnancihangane okuba n’entanya nyinja okubiyerekire omupango Yehova ahizireho guyerekire obukulu. Cikone omulume wani n’abandi bene wirhu b’omu cigamba banantabale lyo ngendekera naba n’ezo ntanya bulya banankenge n’okumvuga omunkwa.”

¹⁶ Bene wirhu nabo banayerekane oku bahugûsirwe bwinja omupango gwa Nnamahanga guyerekire obukulu omu kukenga bali birhu. Mwene wirhu Benjamin, olama e Angleterre, adesire ntya: “Naciyigirizize binji kugerera amashuzo bali birhu bahâna omu ntimanano, n’amahano gabo okubiyerekire okuyiga n’oku omuntu akajira omukolo gw’amahubiri bwinja. Ntanyize oku omukolo bajira guba gwa bulagirire bwenene.”

17. Bulya gurhi kuli kwa bulagirire okukenga akanuni kayerekire obukulu?

¹⁷ Erhi abantu boshi b’omu cigamba, kw’okuderha abalume, abakazi, ba nnawabo b’omulala n’abagula bakahugûkwa n’okukenga akanuni kayerekire obukulu, ecigamba canaja mw’omurhula. N’akantu kw’obulagirire bwenene, rhwanalerhera Larha wirhu w’omu mpingu, Yehova irenge.​—Enna. 150:6.