1. San na wán reide di e meki taki wánfasi de na mindri a pipel fu Yehovah?

WI BREITI taki wi de na ini a famiri fu Yehovah. Fa a du kon taki freide nanga wánfasi de na wi mindri? Wán reide na taki wi alamala e du muiti fu lespeki den wan di Yehovah poti leki edeman. O moro wi e frustan a seti disi, o moro disi e meki taki wánfasi de na wi mindri.

2. Sortu aksi wi o piki na ini na artikel disi?

² Na ini na artikel disi wi o luku suma Yehovah poti leki ede fu a gemeente. Wi o luku tu san na a piki tapu den aksi disi: Sortu wroko Yehovah gi den sisa? A tru taki ibri brada na a ede fu ibri sisa? A frantwortu di owruman abi na ini a gemeente na a srefi leki a frantwortu di masra abi na ini den osofamiri? Kon meki wi go luku fosi fa wi musu si den sisa fu wi.

3. Fa wi kan kisi moro warderi gi a wroko di den sisa fu wi e du?

³ Wi e warderi den sisa di e wroko tranga fu sorgu gi den osofamiri, fu preiki a bun nyunsu, èn fu horibaka gi a gemeente. Te wi e luku a fasi fa Yehovah nanga Yesus e si den, dan wi e kisi moro warderi gi den. Wi o luku tu san wi kan leri fu a fasi fa na apostel Paulus ben e si umasma.

4. Fa Bijbel e sori taki Yehovah e warderi mansma nanga umasma?

⁴ Bijbel e sori taki Yehovah e warderi mansma nanga umasma. Bijbel e sori taki na a ten fu den apostel, Yehovah  ben gi mansma nanga umasma en santa yeye, so taki den alamala ben man du wondru. Wan fu den sani di den ben man du, na taki den ben man taki difrenti tongo (Tori 2:1-4, 15-18). Gado salfu mansma nanga umasma nanga santa yeye, so taki den man tiri makandra nanga Krestes (Gal. 3:26-29). Mansma nanga umasma o man libi fu têgo na grontapu (Openb. 7:9, 10, 13-15). Èn mansma nanga umasma kisi a wroko fu preiki a bun nyunsu èn fu gi sma leri (Mat. 28:19, 20). Fu taki en leti, a buku Tori fu den Apostel e taki fu wan sisa di nen Preskela. En nanga en masra Akwila ben yepi Apolos di ben kisi heiskoro-leri fu kon frustan a waarheid moro bun.​—Tori 18:24-26.

5. Fa Lukas 10:38, 39, 42 e sori taki Yesus ben e lespeki umasma?

⁵ Yesus ben e lespeki umasma èn a ben e gi den grani. A no ben de leki den Fariseiman di ben e wisiwasi umasma èn di no ben wani taki nanga den na publiki. Noiti den ben o taki fu Bijbel nanga wan umasma. Ma Yesus ben e taki fu dipi tori fu Bijbel nanga mansma èn nanga umasma. * (Leisi Lukas 10:38, 39, 42.) A ben e meki umasma go nanga en tu te a ben e go preiki (Luk. 8:1-3). Èn Yesus gi umasma a grani fu go fruteri den apostel fu en taki a ben kisi wan opobaka.​—Yoh. 20:16-18.

6. Fa Paulus ben e sori lespeki gi umasma?

⁶ Na apostel Paulus ben e sori lespeki gi umasma. Paulus taigi Timoteyus taki a ben musu sori lespeki gi umasma tu. A taigi en taki a ben musu si den ’owru uma leki en eigi mama’ èn den ’yongu uma leki en eigi sisa’ (1 Tim. 5:1, 2). Aladi Paulus du furu fu yepi Timoteyus fu tron wan lepi Kresten, toku a ben sabi taki Timoteyus mama nanga en granmama ben de den fosiwan di yepi en fu kon frustan den „Santa Buku” fu Gado (2 Tim. 1:5; 3:14, 15). Na ini a brifi di Paulus ben skrifi gi den Romesma, a seni spesrutu odi gi wan tu sisa di a kari na den nen. Paulus ben sabi san den sisa disi ben du èn a e taki tu dati a ben e warderi a tranga wroko fu den.​—Rom. 16:1-4, 6, 12; Fil. 4:3.

7. Sortu aksi wi o go luku now?

⁷ Soleki fa den paragraaf na fesi e sori, dan Bijbel no e taki dati sisa lagi moro brada. Den sisa fu wi di e sori furu lobi èn di lobi fu gi sma sani, na wan bigi yepi na ini a gemeente. Owruman breiti te den sisa disi e yepi fu sorgu taki freide nanga wánfasi de na ini a gemeente. Ma toku wi musu piki den aksi disi: Fu san ede Yehovah e taki dati sisa musu weri wan sani fu tapu den ede son leisi? Efu na brada wawan e kisi a grani fu tron owruman noso dinari ini a diniwroko, dan disi wani taki dati ibri brada na a ede fu ibri sisa na ini a gemeente?

8. A de so taki ibri brada na a ede fu ibri sisa soleki fa Efeisesma 5:23 e sori? Fruklari dati.

⁸ A de so taki ibri brada na a ede fu ibri sisa na ini a gemeente? Nôno, dati no de so. Krestes na a ede fu den. (Leisi Efeisesma 5:23.) Na ini na osofamiri, a masra na a ede fu en wefi. Wan manpikin di dopu, no de na ede fu en mama (Ef. 6:1, 2). Owruman abi a frantwortu fu teki fesi na ini a gemeente, ma den no kan  teki bosroiti gi den brada nanga sisa na ini ala sani (1 Tes. 5:12; Hebr. 13:17). Sisa di no trow èn di no e libi moro nanga den papa nanga mama e tan sori lespeki gi den èn gi den owruman. Ma neleki den brada na ini a gemeente, den abi Yesus wawan leki den edeman.

9. Fu san ede a de fanowdu son leisi taki sisa e weri wan sani fu tapu den ede?

⁹ Yehovah wani taki sani waka na wan orga fasi na ini a gemeente. Dati meki a poti Yesus leki ede fu a man. Èn Gado poti mansma fu gi leri na ini a gemeente èn fu teki fesi na ini na anbegi. A no gi umasma a frantwortu dati (1 Tim. 2:12). Efu a de fanowdu son leisi taki wan sisa musu du wan wroko di wan brada musu du, dan Yehovah wani taki a weri wan sani fu tapu en ede (1 Kor. 11:4-7). * Yehovah no e aksi disi fu den sisa fu gi den syen, ma a e du dati so taki den kan sori lespeki gi den wan di Yehovah poti leki ede. Now wi o piki na aksi disi: Sortu frantwortu osofamiri-edeman nanga owruman abi?

10. Fu san ede wan owruman ben o wani meki wet gi a gemeente son leisi?

¹⁰ Owruman lobi Krestes èn den lobi den skapu di Yehovah nanga Yesus gi den fu luku (Yoh. 21:15-17). Fu di wan owruman e broko en ede nanga a gemeente, meki a kan denki taki a de leki wan papa gi den brada nanga sisa. A ben kan denki taki efu wan osofamiri-edeman abi a reti fu meki wet gi en osofamiri fu kibri den, dan wan owruman  kan meki wet tu fu kibri den skapu fu Gado. Èn son brada nanga sisa kan gi owruman deki-ati fu teki bosroiti gi den, fu di den e si den leki den papa. Ma a frantwortu fu owruman nanga osofamiri-edeman na a srefi?

11. Fa a frantwortu fu osofamiri-edeman nanga owruman na a srefi?

¹¹ Paulus e sori taki son sani di osofamiri-edeman nanga owruman musu du na a srefi (1 Tim. 3:4, 5). Fu eksempre, Yehovah wani taki den sma na ini na osofamiri e gi yesi na a ede fu na osofamiri (Kol. 3:20). A wani tu taki den sma na ini a gemeente e gi yesi na den owruman. Yehovah wani taki den osofamiri-edeman nanga owruman e leri den wan di den musu luku fu lobi Yehovah. Osofamiri-edeman nanga owruman e sorgu taki den wan di den musu luku e firi taki den lobi den. Èn neleki fa a de nanga osofamiri-edeman, owruman e yepi den wan na ini a gemeente di abi problema (Yak. 2:15-17). Boiti dati, Yehovah e fruwakti taki owruman nanga osofamiri-edeman e yepi trawan fu gi yesi na den wet fu en. A e warskow den tu fu „no du sani di no skrifi” na ini Bijbel.​—1 Kor. 4:6.

12-13. Soleki fa Romesma 7:2 e sori, dan fa a frantwortu fu osofamiri-edeman e difrenti fu a di fu owruman?

 ¹² Ma bigi difrenti de tu na mindri a frantwortu fu wan owruman nanga a di fu wan osofamiri-edeman. Fu eksempre, Yehovah poti owruman leki krutuman. A gi den a frantwortu fu puru wan sma fu a gemeente te a no abi berow fu wan seryusu sondu di a du.​—1 Kor. 5:11-13.

¹³ Ma Yehovah gi osofamiri-edeman frantwortu di a no gi owruman. Na so a gi osofamiri-edeman a frantwortu fu poti wet gi den osofamiri èn fu sorgu taki den e hori densrefi na den wet dati. (Leisi Romesma 7:2.) Fu eksempre, wan osofamiri-edeman abi a reti fu taki o lati en pikin musu kon na oso te neti. A abi a reti tu fu strafu en pikin efu den no e hori densrefi na a wet dati (Ef. 6:1). A no de fu taki dati wan osofamiri-edeman di lobi en osofamiri, e taki nanga en wefi fosi a poti wan wet. A e du dati fu di en nanga en wefi na „wán skin”. *​—Mat. 19:6.

14. (a) Fa Markus 10:45 e sori taki a fiti taki Yehovah poti Yesus leki ede fu a gemeente? (b) San na a frantwortu fu a Tiri Skin? (Luku a faki „ A frantwortu fu a Tiri Skin”.)

¹⁴ Nanga yepi fu a lusu-paiman, Yehovah bai a libi fu ibri sma na ini a gemeente èn fu ibri sma di e poti bribi na ini Yesus (Leisi Markus 10:45; Tori 20:28; 1 Kor. 15:21, 22). Dati meki a fiti taki a poti Yesus di gi en libi leki lusu-paiman,  leki ede fu a gemeente. Fu dati ede Yesus abi a reti fu meki wet di e sori san sma, osofamiri, nanga a heri gemeente musu du. A abi a reti tu fu fruwakti fu den taki den e gi yesi na den wet disi (Gal. 6:2). Ma boiti taki Yesus e meki wet, a e sorgu bun tu gi ibriwan fu wi èn a lobi ibriwan fu wi.​—Ef. 5:29.

15-16. San yu leri fu den sani di Sisa Marley nanga Brada Benjamin taki?

¹⁵ Sisa e sori taki den e lespeki Krestes te den e gi yesi na den brada di a poti fu luku a gemeente. Furu sisa e denki a srefi leki Marley, wan sisa di e libi na Amerkankondre. Marley e taki: „Mi e warderi a frantwortu di mi abi leki wefi nanga sisa na ini a gemeente. Mi musu tan meki muiti fu saka misrefi na ondro mi masra nanga den owruman di Yehovah poti leki edeman. Ma mi masra nanga den brada na ini a gemeente e meki en makriki gi mi fu du dati, fu di den e lespeki mi èn fu di den e taigi mi taki den e warderi a wroko di mi e du.”

¹⁶ Te brada e lespeki sisa èn te den e gi den grani, dan den e sori taki den e frustan san Yehovah e fruwakti fu den leki edeman. Benjamin, wan brada di e libi na Ingrisikondre e taki: „Mi leri so furu fu den piki di den sisa e gi na den konmakandra èn fu den sani di den taki fu sori fa fu studeri èn fa fu preiki moro bun. Mi feni taki a wroko di den e du prenspari srefisrefi.”

17. Fu san ede wi musu lespeki a fasi fa Yehovah seti sani?

¹⁷ Soleki fa wi si, dan Yehovah seti sani so taki a poti son sma leki ede. Te ala man, uma, osofamiri-edeman, nanga owruman e lespeki a seti disi, dan freide o de na ini a gemeente. Èn san moro prenspari, na taki wi hemel Tata Yehovah e kisi prèise te wi e du dati.​—Ps. 150:6.