NGEREN U TIMEN SHA MI 7
Tahav mbu I Ne Mbatamen ken Tiônnongo La
“[Ka] Kristu a lu ityough ki tiônnongo, iyol na i a lu or u yiman i la [ye].”—EF. 5:23.
ICAM 137 Kasev mba Nan Jighjigh
KWAGH U I TIM SHA MI KEN NGEREN NE YÔ *
1. Ka ityôkyaa i môm i nyi i ne ve tsombor u Yehova u lu ken mzough yumu?
SAAN se iyol kpishi er se kpa se lu ken tsombor u Yehova nahan. Er nan ve tsombor wase ne u lu bem bem shi u lu ken mzougho? Ityôkyaa i môm yô, se cii ka se nôngo sha afatyô wase ser, se na mba Yehova a tsough ve ér ve hemen la icivir. Aluer se kav wang ser ka Yehova a ver mba ve lu hemen se la yô, kwagh la una na se hemba lun ken mzough cii.
2. Ka mbampin mba nyi se lu zuan a mlumun sha mi ken ngeren nee?
2 Se lu timen sha kwagh u mba i ne ve tahav mbu hemen ken tiônnongo la, ken ngeren ne. Shi se zua a mlumun sha mbampin mban: Ka nyi tom Yehova a ne anmgbianev mba kasev ken tiônnongo? Mimi je, hanma anmgbian u nomso cii nan ngu ityough ki hanma anmgbian u kwase? Mbatamen mba a tahav sha anmgbianev mba nomso man mba kasev vough er mbayaav ve lu a tahav sha kasev vev kua mbayev vev nahana? De se hii henen er i doo u se nengen anmgbianev mba kasev yô.
DOO U SE NENGEN ANMGBIANEV MBA KASEV NENA?
3. Se er nan ve se seer lun a iwuese sha tom u anmgbianev asev mba kasev ve eren laa?
3 Se wuese anmgbianev asev mba kasev kpishi sha tom u ve eren kpoghuloo sha u nengen sha icombor ve shi pasen loho u dedoo shi wasen mbagenev ken tiônnongo la. Aluer se hen sha gbenda u Yehova man Yesu ve nengen ve la yô, se hemba wuese ve sha ityom i ve eren la cii. Shi aluer se hen sha gbenda u apostoli Paulu eren kwagh a ve la yô, ikyav na la ia wase se, se hemba fan gbenda u se eren kwagh a ve la.
4. Bibilo tese ér kasev man nomso cii gba Yehova kwagh nena?
4 Bibilo tese ér kasev man nomso cii gba Yehova kwagh. Ikyav i tesen yô, Bibilo kaa ér sha ayange a mbaapostoli la, Yehova na kasev man nomso cii icighan jijingi na sha er ve cii vea lu a tahav mbu eren uivande yô, er u lamen ken ijô igen nahan. (Aer. 2:1-4, 15-18) Shi i tsegha nomso man kasev mbagenev sha icighan jijingi, mba a ishimaverenkeghen i za hemen sha vea Kristu. (Gal. 3:26-29) Nomso man kasev cii vea va zua a injar i lun uma gbem sha won shin tar. (Mpa. 7:9, 10, 13-15) Shi nomso man kasev cii i wa ve tom u pasen loho u dedoo shi tesen ior la. (Mat. 28:19, 20) Ikyav i tesen yô, takeda u Aerenakaa ôr kwagh u anmgbian u kwase ugen u i yilan un ér Prisila yô. Un vea nom na Akwila yange ve za pase Apolo seer fan gbenda u Aôndo tsembelee, man or ne lu or u fa takeda kpishi yô.—Aer. 18:24-26.
5. Luka 10:38, 39, 42 tese ér Yesu yange naan kasev icivir nena?
5 Yesu yange naan kasev icivir. Yesu yange dondon ieren i Mbafarishi nengen ér nomso hemba kasev la ga. Yange Mbafarishi lamen a kasev ken igbar ga shi ve lamen sha akaa a ken Ruamabera vea ve ga. Yesu yô yange a lam sha akaa a ken Ruamabera a zan shimi la vea mbahenen nav, nomso man kasev cii. * (Ôr Luka 10:38, 39, 42.) Shi yange una due a pasen kwagh yô, kasev kpa ve lu a na imôngo. (Luka 8:1-3) Yesu shi yange na kasev ian i icivirigh i za pasen mbaapostoli ér, i nder un shin ku.—Yoh. 20:16-18.
6. Apostoli Paulu yange tese ér un ne kasev icivir nena?
6 Apostoli Paulu yange umbur Timoteu ér a naan kasev icivir. Yange kaa a na ér, a eren a ‘kasev mbaganden er ka ungôôv nav nahan shi a eren aa agumaukase er ka anmgbianev nav mba kasev nahan.’ (1 Tim. 5:1, 2) Er Paulu yange er tom kpoghuloo wase Timoteu hingir Orkristu u vian ken jijingi nahan kpa, a umbur er lu ngô u Timoteu kua ngô na u tamen yange ve hii tesen Timoteu akaa a ken “icighanruamabera” yô. (2 Tim. 1:5; 3:14, 15) Ken washika u Paulu nger hen Mbaroma la, a sugh anmgbianev mba kasev ker sha ati ati. Paulu yange nenge a tom u anmgbianev mba kasev mbara er yô, shi wuese ve sha tom u ve er la kpaa.—Rom. 16:1-4, 6, 12; Fil. 4:3.
7. Ka mbampin mba nyi se lu timen sha mi hegene?
7 Er akumahiange a sha ijime ne a tese nahan, kwagh môm ngu ken Bibilo u a tese ér anmgbianev mba nomso hemba anmgbianev mba kasev ga. Anmgbianev asev mba kasev mba doon ishima mba ve tangen iyol ga la, ka ve wase tiônnongo kpen kpen shi mbatamen kpa ka ve wuese ve er ve lu nôngon kwagh kpoghuloo ér tiônnongo cii a lu ken mzough shi bem a lu yô. Nahan cii kpa, gba u se na mlumun sha mbampin mba ve dondo ne: Er nan Yehova a kaa ér anmgbianev mba kasev ve kangen ityough ashighe agene? Shi er i lu anmgbianev mba nomso tseegh i veren ve mbatamen man mbashiren tiônnongo yô, kwagh la tese ér hanma anmgbian u nomso cii nan ngu ityough ki hanma anmgbian u kwase ken tiônnongo?
HANMA ANMGBIAN U NOMSO CII NAN NGU ITYOUGH KI HANMA ANMGBIAN U KWASE?
8. Er i pase ken Mbaefese 5:23 nahan, hanma anmgbian u nomso yô nan ngu ityough ki hanma anmgbian u kwase? Ta iwanger.
8 U ngeen kwagh ga yô, mlumun ka ei! Anmgbian u nomso môm nan ngu ityough ki anmgbianev mba kasev cii ken tiônnongo ga, ka Kristu a lu ityough ki tiônnongo ye. (Ôr Mbaefese 5:23.) Hen tsombor yô, ka nom a lu a tahav sha kwase ye. Wan u nomso u nan er batisema nan ngu ityough ki ngô u nan ga. (Ef. 6:1, 2) Ken tiônnongo kpa, tahav mbu mbatamen ve lu a mi sha anmgbianev mba nomso man mba kasev la mbu a ikighir. (1 Tes. 5:12; Heb. 13:17) Kpa hide anmgbianev mba kasev mba lun kwav, mba ve kera lu hen ya vea mbamaren vev ga la di ye? Ka ve za hemen u nan mbamaren vev icivir, nahan kpa, ter ve nan kera ngu ityough vev ga. Shi ka ve za hemen u nan mbatamen mba ken tiônnongo kpa icivir, vough er anmgbianev mba nomso mba ken tiônnongo kpa ve eren nahan. Ka Yesu tseegh a lu ityough vev ye.
Agumaior a lun kwav aa a kera lu vea mbamaren vev ga la ka Yesu a lu ityough vegh ye (Nenge ikyumhiange i sha 8)
9. Er nan ve ka i gba u anmgbianev mba kasev vea kange ityough ashighe agene?
9 Yehova tsua nomso ver ér ve hemen sha u tesen kua sha hanma kwagh u i eren ken mcivir na ken tiônnongo cii, kpa a na kasev imba utaha la ga. (1 Tim. 2:12) Sha ci u nyi? Ka sha u i eren hanma kwagh sha inja sha inja ken tiônnongo na yô. Ka sha ityôkyaa la Yesu kpa yange tsua un sha u a lu ityough ki nomsoor ye. Sha nahan yô, zum u i gbe hange hange u anmgbian u kwase nana er tom u ma i lu anmgbian u nomso ma nan er yô, Yehova kaa ér, gba u nana kange ityough. * (1 Kor. 11:4-7) Yehova kaa ér anmgbianev mba kasev ve er kwagh nahan ka sha u heen ve ga, kpa ka u nan mba un tsough ve un ne ve tahav la icivir. Nahan hegen se na ase mlumun sha mpin ne: Mbayaav man mbatamen mba ken tiônnongo mba a tahav kuma nan je?
TAHAV MBU I NE MBATAMEN MAN MBAYAAV LA
10. Ka nyi ia na ve alaghga ashighe agen a lu ortamen ape wan mba ken tiônnongo atindi?
10 Kristu doo mbatamen ishima, shi “iyôngo” i Yehova man Yesu ve we ve sha ikyev la kpa doo ve ishima. (Yoh. 21:15-17) Er ortamen ka nan nengen sha mba ken tiônnongo yô, alaghga nana hen ér nan ngu er ter ve nahan. Sha nahan yô, alaghga nana hen ér, aluer orya ngu a ian i wan atindi sha u kuran tsombor u nan yô, ortamen kpa nana fatyô u wan atindi sha u kuran iyôngo i Aôndo. Shi alaghga anmgbianev mba nomso man mba kasev mbagen vea kaa a mbatamen ér ve tsua akaa sha ci ve. Nahan kpa, mbatamen mba ken tiônnongo mba a tahav vough er orya ka nan lu a tahav sha kwase u nan man mbayev mba nan nahana?
Mbatamen ka ve wase mba ken tiônnongo u lun kôôsôô a Yehova shi ve tese ve ér i wa ve ikyo. Yehova na ve tom u dughun mbaasorabo mba ve vende u geman ishima la ken tiônnongo kera, sha er tiônnongo una lu wang yô (Nenge ikyumhiange i sha 11-12)
11. Tahav mbu mbayaav ve lu a mi la mbu kwagh môm a tahav mbu i ne mbatamen la sha igbenda igen nena?
11 Apostoli Paulu yange tese ér tahav mbu orya nan lu a mi la mbu kwagh môm aa tahav mbu ortamen u ken tiônnongo nan lu a mi la sha igbenda igen. (1 Tim. 3:4, 5) Ikyav i tesen yô, Yehova soo ér mba hen tsombor ve ungwan imo i orya. (Kol. 3:20) Shi a soo ér mba ken tiônnongo ve ungwan imo i mbatamen. Yehova shi soo ér mbayaav kua mbatamen mba ken tiônnongo cii ve tesen mba ve lu sha ikyev ve la sha er una doo ve ishima yô. Gba u mbayaav man mbatamen cii vea tese mba ve lu ve sha ikyev la ér ve wa ve ikyo. Shi mbatamen ka ve nôngo kpoghuloo sha er vea na mba ve lu ve sha ikyev mbara iwasen shighe u ve tagher a mbamzeyol yô, vough er mbayaav mba injaa kpa ka ve er nahan. (Yak. 2:15-17) Heela tseegh ga, Yehova shi soo ér mbatamen man mbayaav cii ve wase mba ve lu sha ikyev ve la u kuran atindi a na, shi a soo ér ve “de eren . . . kwagh i karen akaa a i nger” ken Bibilo la “ken inya ga.”—1 Kor. 4:6.
Yehova na mbayaav tahav mbu hemen hen icombor ve. Cii man orya u injaa nana tsua kwagh yô, ka nan vande zan idyu vea kwase u nan (Nenge ikyumhiange i sha 13)
12-13. Mbaroma 7:2 tese ér ka sha igbenda i nyi nahan tahav mbu mbayaav ve lu a mi la mbu kaha aa tahav mbu i ne mbatamen laa?
12 Nahan cii kpa, tahav mbu ortamen nan lu a mi la mbu kposo aa tahav mbu orya nan lu a mi yô. Ikyav i tesen yô, Yehova na mbatamen tom u ôron ajir kpaa, shi a na ve ian i dughun mbaasorabo mba ve vende u geman ishima la ken tiônnongo kera.—1 Kor. 5:11-13.
13 Nahan kpa, Yehova shi na mbayaav tahav mbugen, mbu a ne mbatamen ga yô. U tesen ikyav yô, Yehova na orya ian i wan atindi hen tsombor u nan shi nengen ér mba hen tsombor u nan kura atindi shon. (Ôr Mbaroma 7:2.) Ikyav i tesen yô, orya nan ngu a ian i tsuan shighe u mbayev mba nan vea hiden hen ya tugh yô. Shi aluer mbayev mba nan kura tindi la ga yô, nan ngu a ian i tsahan ve. (Ef. 6:1) Nahan kpa orya u fan kwagh yô, ka nan za idyu vea kwase u nan cii ve nan mase wan atindi a hen ya ye, sha ci u ve cii mba “iyol i môm.” *—Mat. 19:6.
NA KRISTU ICIVIR SHA CI U NGU ITYOUGH KI TIÔNNONGO
Yesu u Yehova a lu ityough nagh la ngu tesen gbenda u i gbe u a eren akaa ken tiônnongo u Kristu yô (Nenge ikyumhiange i sha 14)
14. (a) Ka nyi i ôr ken Marku 10:45 i tesen ér, Yehova tsua Yesu ér a lu ityough ki tiônnongo ka sha injaa? (b) Ka nyi tom Mbahemenev mba Shin Itine ve erene? (Nenge ngeren u kiriki u a lu a itinekwagh ér, “ Tom u Mbahemenev mba Shin Itine Ve Eren Yô” la.)
14 Yehova yam hanma or ken tiônnongo cii sha nagh ku ipaan kura man hanma orgen u nan ne nagh ku ipaan kura jighjigh cii. (Ôr Marku 10:45; Aer. 20:28; 1 Kor. 15:21, 22) Sha nahan yô, doo kpishi er a tsough Yesu u yange na uma na hingir ipaan la ér, a lu ityough ki tiônnongo la nahan. Er Yesu a lu ityough yasegh yô, ngu a tahav mbu wan atindi a i gbe u hanma or kua hanma tsombor man tiônnongo cii vea kuran yô, shi nengen ér i kura atindi shon kpaa. (Gal. 6:2) Nahan kpa, Yesu we di atindi tseegh tsô ga, ka a er kwagh i hemba nahan. We se ikyo shi hanma wase yô nan doo un ishima.—Ef. 5:29.
15-16. Ka nyi u hen ken mkaanem ma anmgbian u kwase u i yer un ér Marley la, man ma anmgbian Benjamin laa?
15 Anmgbianev mba kasev ka ve tese ér mba nan Kristu icivir sha u dondon hemen u nomso mba i tsough ve ér ve nengen sha ve la. Anmgbian u kwase u i yer iti na ér Marley, a lu ken tar u Amerika yô, ôr kwagh u a zough sha mnenge u anmgbianev mba kasev kpishi yô. A kaa ér: “M nenge mer u lun kwaseya shi lun anmgbian u kwase ken tiônnongo la kam kwagh u icivirigh kpen kpen. Hanma shighe yô, ka m nôngon kpoghuloo mer, me dondon hemen u Yehova a ver la sha u nan nomom kua mbatamen mba ken tiônnongo icivir. Nahan kpa, nomom man anmgbianev mba ken tiônnongo ka ve na i hemba lun mo ican ga u eren kwagh ne, sha ci u mba nem icivir shi mba wuese mo sha tom u m eren la.”
16 Anmgbianev mba nomso ka ve tese ér mba dondon hemen u Yehova a ver la sha u nan anmgbianev mba kasev icivir. Anmgbian ugen u a lu ken tar u Ingila i yer un ér Benjamin yô, kaa ér: “M hen akaa kpishi ken mbamlumun mba anmgbianev mba kasev ka ve na ken mkombo la, kua mbamhen mba ka ve due a mi sha igbenda i pasen kwagh shi tesen ior la. Tom u ve eren la ka u injaa kpen kpen.”
17. Er nan i gbe u se umbur ser Yehova tsua mbagenev na ve ian i hemen nahan doo u se naan hemen la iciviri?
17 Zum u hanma or ken tiônnongo, nomso man kasev man mbayaav kua mbatamen cii ve kav er i lu Yehova a tsough mbagenev ér ve hemen shi ve lu nan hemen la icivir yô, tiônnongo cii ka a lu bem bem. Kpa u hemban cii je yô, ka se na Yehova Ter wase u sha, u se doo un ishima la a zua a icivir.—Ps. 150:6.
ICAM 123 Lumun u Suen Hemen u Aôndo
^ Ikyum. 5 Ka nyi tom Yehova a ne anmgbianev mba kasev ken tiônnongo? Hanma anmgbian u nomso cii nan ngu ityough ki hanma anmgbian u kwase? Tahav mbu i ne mbatamen ken tiônnongo la, mbu kwagh môm a tahav mbu i ne mbayaav hen icombor laa? Se lu nengen er Bibilo i ne mlumun sha mbampin mban ne la ken ngeren ne.
^ Ikyum. 5 Nenge ngeren u a lu a tinekwagh ér, “Suen Anmgbianev mba Kasev mba ken Tiônnongo” u yange i gber ken Iyoukura i Setemba 2020 la, ikyumhiange i sha 6.
^ Ikyum. 9 Nenge ngeren u kiriki u a lu a itinekwagh ér, “ Ka Hanma Shighe I Gbe u Anmgbian u Kwase Nana Kange Ityougho?” la.
^ Ikyum. 13 Wea soo u seer ôron kwagh u or u i gbe u nana tsua tiônnongo u tsombor ua lu ker yô, nenge ngeren u a lu a itinekwagh ér, “Naan Hanma Or ken Tiônnongo Icivir” la, ikyumhiange i sha 17-19, u yange i gber ken Iyoukura i Agusutu 2020 la.
^ Ikyum. 56 Kwagh u i kaa ér “nan lu her” la, inja na kpaa ér adooga nom u nan shin anmgbian u nan er batisema yô, nan ngu ikyua her, alaghga nan ngu eren kwagh ugen kpa nan ngu nengen a ve shi ungwan hanma kwagh u a lu zan hemen la cii.
^ Ikyum. 59 Wea soo u seer zuan a iwanger sha itinekwagh ne yô, nenge takeda u Lu Nen ken Dooshima U Aôndo la, peeji 209-212.
^ Ikyum. 65 Wea soo u seer zuan a iwanger sha kwagh u tom u Mbahemenev mba Shin Itine ve eren la yô, nenge Iyoukura i Julai 15, 2013 la, peeji 20-25.
