CIBALO CAKWIIYA 7
Kumvwisya Busilutwe Mumbungano
‘Kristo mutwe wambungano, mbwaanga ngomufwutuli wamubili ooyu.’—EF. 5:23.
LWIIMBO 137 Bamakaintu Banakristo Basyomeka
IZILI MUCIBALO *
1. Nkaambo nzi kamwi ikapa kuti mukwasyi wa Jehova kaukamantene?
TULIKKOMENE kuba cibeela camukwasyi wa Jehova. Nkaambo nzi mukwasyi wesu ncouli waluumuno alimwi alukamantano? Kaambo kamwi nkakuti toonse tulasolekesya kulemeka bubambe bwabusilutwe mbwaakabikka Jehova. Alimwi buya, kuti twabumvwisya bubambe oobu, tuyookamantana kapati.
2. Mibuzyo nzi njotutiilange-lange mucibalo eeci?
2 Mucibalo eeci, tulabandika makani aabusilutwe mbwaabeleka mumbungano. Alimwi tulaingula mibuzyo eeyi yakuti: Mulimo nzi ngobajisi bacizyi? Sena masimpe kuti mukwesu uuli woonse ngusilutwe wamucizyi uuli woonse? Sena nguzu zyakweendelezya nzyobajisi baalu kubakwesu abacizyi zilikozyenye azeezyo nzyajisi silutwe wamukwasyi kumukaintu wakwe abana? Cakusaanguna, atubandike kujatikizya mbotweelede kubabona bacizyi.
INO TWEELEDE KUBABONA BUTI BACIZYI?
3. Ncinzi cikonzya kutugwasya kubalumba kapati bacizyi kumilimo njobacita?
3 Tulabalumba bacizyi ibabeleka canguzu kulanganya mikwasyi yabo, kukambauka makani mabotu, akugwasyilizya mbungano. Alimwi tulakonzya kubalumba kapati, ikuti twayeeya kujatikizya Jehova a Jesu mbobababona bacizyi. Kuyungizya waawo, tulaiya mbotweelede kubeendelezya bamakaintu kwiinda mukubona mwaapostolo Paulo mbwaakali kubeendelezya.
4. Mbuti Bbaibbele mbolitondezya kuti Jehova ulabayanda bamakaintu alimwi abaalumi?
4 Bbaibbele lyaamba kuti Jehova ulabayanda bamakaintu abaalumi. Mucikozyanyo, lilatondezya kuti mumwaanda wamyaka wakusaanguna, Jehova wakabapa muuya wakwe uusalala bamakaintu abaalumi alimwi akupa kuti bacite maleele, mbuli kwaambaula mumyaambo yiindene-indene. (Mil. 2:1-4, 15-18) Bamakaintu abaalumi boonse bakananikwa amuuya uusalala alimwi bayoolela a Kristo. (Gal. 3:26-29) Boonse bayootambula bulumbu bwakupona kukabe kutamani anyika. (Ciy. 7:9, 10, 13-15) Alimwi boonse balipedwe mulimo wakukambauka akuyiisya makani mabotu. (Mt. 28:19, 20) Mucikozyanyo, bbuku lya Milimo lyaamba kujatikizya mucizyi Purisila. Walo amulumaakwe Akula, bakamupandulwida bwini mbokabede kasimpe Apolo, imwaalumi iwakayiide kapati.—Mil. 18:24-26.
5. Mbuti lugwalo lwa Luka 10:38, 39, 42 mbolutondezya kuti Jesu wakali kubalemeka bamakaintu?
5 Jesu wakali kubalemeka bamakaintu. Kunyina naakaiya ba Farisi, balo ibakali kuyeeya kuti bamakaintu tabakwe mulimo. Tiibakali kwaambaula abamakaintu mubuleya alimwi tiibakali kubandika ambabo zyamu Magwalo. Muciindi caboobo, Jesu wakali kubabikkilizya bamakaintu mumibandi yakumuuya njaakali kuba aanjiyo abasikwiiya bakwe bamwi. * (Amubale Luka 10:38, 39, 42.) Wakabazumizya kuunka anguwe munyendo zyakwe zyakukambauka. (Lk. 8:1-3) Alimwi Jesu wakabapa coolwe cakwaambila baapostolo kuti wabusyigwa kuzwa kubafwu.—Joh. 20:16-18.
6. Mbuti mwaapostolo Paulo mbwaakatondezya kuti wakali kubalemeka bamakaintu?
6 Mwaapostolo Paulo wakatondezya kuti wakali kubalemeka bamakaintu. Mucikozyanyo, wakamwaambila Timoteyo kuti keendelezya ‘bamakaintu bapati mbuli banyina’ mpoonya ‘basimbi mbuli bacizyi bakwe.’ (1Tim. 5:1, 2) Nokuba kuti Paulo wakabeleka canguzu kugwasya Timoteyo kuba alusyomo luyumu, Paulo wakalizyi kuti banyina Timoteyo alimwi abakaapanyina mbabakasaanguna kumuyiisya “malembe aasalala.” (2Tim. 1:5; 3:14, 15) Cacigaminina Paulo wakabaanzya bacizyi kwiinda mukubaamba mazina mulugwalo ndwaakalembela bana Roma. Paulo wakali kubona nzyobakali kucita bacizyi aaba alimwi wakaamba kuti wakali kulumba kapati kumilimo njobakali kucita.—Rom. 16:1-4, 6, 12; Flp. 4:3.
7. Mibuzyo nzi njotutiilange-lange lino?
7 Mincali yainda yatondezya kuti Bbaibbele kunyina mpolyaamba kuti baalumi balayandika kapati kwiinda bamakaintu. Bacizyi besu bayandwa balaigwasyilizya kapati mbungano, alimwi baalu balalumba kapati kulugwasyo lwabo ilupa kuti kakuli luumuno alimwi alukamantano mumbungano. Pele kucili mibuzyo iiyandika bwiinguzi, mbuli yakuti: Nkaambo nzi Jehova ncayanda kuti zimwi ziindi bacizyi kabasama citambala? Mbwaanga bakwesu balikke mbobasalwa kuba baalu alimwi abakutausi, sena eeci caamba kuti mukwesu uuli woonse ngusilutwe wamucizyi uuli woonse mumbungano?
SENA MUKWESU UULI WOONSE NGUSILUTWE WAMUCIZYI UULI WOONSE?
8. Kweelana alugwalo lwa Baefeso 5:23, sena mukwesu uuli woonse ngusilutwe wamucizyi uuli woonse? Amupandulule.
8 Bwiinguzi mbwakuti peepe! Mukwesu tali silutwe wabacizyi boonse mumbungano, pele Kristo ngomutwe wabo? (Amubale Baefeso 5:23.) Mumukwasyi, mulumi ulijisi nguzu zyakweendelezya mukaintu wakwe. Mwana musankwa uubbapatizyidwe tali silutwe wabanyina. (Ef. 6:1, 2) Mumbungano, nguzu zyakweendelezya nzyobajisi baalu kubakwesu abacizyi kuli mpozigolela. (1Tes. 5:12; Heb. 13:17) Mbuti kujatikizya mucizyi uutakwetwe uutacikkali abazyali bakwe? Ulazumanana kubalemeka bazyali bakwe, pele tacili ansi aabusilutwe bwabausyi. Alimwi ulabalemeka baalu, pele mbubwenya mbuli bakwesu mumbungano, ujisi buyo silutwe omwe, Jesu.
Aabo batakwete naa kukwatwa ibatacikkali abazyali babo tabali ansi aabweendelezi bwabazyali babo, pele Jesu ngomutwe wabo (Amubone muncali 8)
9. Nkaambo nzi bacizyi zimwi ziindi ncobeelede kusama citambala?
9 Masimpe kuti Jehova wakasala baalumi kusololela mumbungano, pele bamakaintu kunyina naakabapa nguzu eezyi. (1Tim. 2:12) Nkaambo nzi? Nkaambo nkeena kakapa kuti Jehova asale Jesu kuba mutwe wamwaalumi, nkokuti, kutegwa zintu kazyeenda kabotu mumbungano. Pele kuti akaambo kabukkale mucizyi uyandika kucita mulimo iweelede kucitwa amukwesu, Jehova uyanda kuti mucizyi asame citambala. * (1Kor. 11:4-7) Jehova uyanda kuti bacizyi kabacita oobu kutegwa batondezye bulemu kuli baabo Jehova mbaakapa nguzu zyakweendelezya, ikutali kuti kabalimvwa kuti mbaansi kapati kwiinda baalumi. Katutuyeeyede twaambo ootu, lino atwiingule mubuzyo ooyu: Ninguzu nzi zyakweendelezya nzyobajisi basilutwe bamikwasyi alimwi abaalu?
NGUZU ZYAKWEENDELEZYA NZYOBAJISI BASILUTWE BAMIKWASYI ABAALU
10. Nkaambo nzi mwaalu ncakonzya kulimvwa kuti inga waibikkila milawo mbungano?
10 Baalu balamuyanda Kristo, alimwi balaziyanda “mbelele” eezyo Jehova nzyaakabapa kuti kabalanganya. (Joh. 21:15-17) Akaambo kakuti ulaibikkila maano mbungano, mwaalu ulakonzya kuyeeya kuti uli mbuli silutwe wamukwasyi kuli baabo ibali mumbungano. Aboobo mwaalu ooyo ulakonzya kuyeeya kuti, naa silutwe wamukwasyi ulijisi nguzu zyakubikka milawo kutegwa akwabilile mukwasyi wakwe, nkokuti awalo inga wabikka milawo njayeeya kuti inga yakwabilila mbelele zya Leza. Alimwi bakwesu abacizyi bamwi balakonzya kupa baalu kuba mbuli basilutwe babo bakumuuya kwiinda mukubalomba kubasalila mumakani aamwi. Pele sena baalu mumbungano alimwi abasilutwe bamikwasyi bajisi nguzu zyakweendelezya zikozyenye?
Baalu balabagwasya aabo ibali mumbungano kuzumanana kuba acilongwe a Jehova alimwi akulimvwa kuti balayandwa. Jehova wakabapa mukuli wakugwisya basizibi ibateempwi mumbungano (Amubone muncali 11-12)
11. Mbuti nguzu zyakweendelezya nzyajisi silutwe wamukwasyi alimwi anzyajisi mwaalu mbozikozyenye?
11 Mwaapostolo Paulo wakaamba kuti kuli kukozyanya kuliko akati kanguzu zyakweendelezya nzyajisi silutwe wamukwasyi alimwi amwaalu. (1Tim. 3:4, 5) Mucikozyanyo, Jehova uyanda kuti banamukwasyi kabamumvwida silutwe wamukwasyi. (Kol. 3:20) Alimwi uyanda kuti basimbungano kabamvwida baalu. Jehova uyanda kuti basilutwe bamikwasyi boonse alimwi abaalu kababa masimpe kuti aabo mbobalanganya mbayumu kumuuya. Kuyungizya waawo, boonse beelede kubona kuti aabo mbobalanganya balimvwa kuti balikwabilidwe. Alimwi mbubwenya mbuli silutwe wamukwasyi, baalu beelede kubona kuti boonse mumbungano balatambula lugwasyo ndobayandika muziindi zyamapenzi. (Jak. 2:15-17) Kuyungizya waawo, Jehova uyanda kuti baalu alimwi abasilutwe bamikwasyi kabagwasyilizya bamwi kumvwida milawo yakwe. Pele ubacenjezya ‘kutaindilila zintu zilembedwe” mu Bbaibbele.—1Kor. 4:6.
Basilutwe bamikwasyi bakapegwa nguzu zyakweendelezya mikwasyi yabo. Katanasala cakucita, silutwe wamukwasyi siluyando ulabandika amukaintu wakwe (Amubone muncali 13)
12-13. Kweelana alugwalo lwa Baroma 7:2, nkwiindana nzi kuliko akati kanguzu zyakweendelezya nzyobajisi baalu alimwi abasilutwe bamikwasyi?
12 Nokuba boobo, kuli kwiindana kupati akati kanguzu zyakweendelezya nzyajisi mwaalu alimwi anzyajisi silutwe wamukwasyi. Mucikozyanyo, Jehova wakapa baalu mukuli wakubeleka mbuli babetesi, alimwi amukuli wakugwisya basizibi ibateempwi mumbungano.—1Kor. 5:11-13.
13 Kulubazu lumbi, Jehova wakapa basilutwe bamikwasyi nguzu baalu nzyobatajisi. Mucikozyanyo, silutwe wamukwasyi wakamupa nguzu zyakubikka milawo mumukwasyi alimwi akubona kuti milawo eeyo ilatobelwa. (Amubale Baroma 7:2.) Alimwi, silutwe wamukwasyi ulijisi nguzu zyakubikka ciindi bana bakwe nobeelede kusika aŋanda mangolezya. Mane buya ulijisi nguzu zyakululamika bana bakwe ikuti baalilwa kuutobela mulawo ooyu. (Ef. 6:1) Nokuba boobo, silutwe wamukwasyi siluyando katanabikka milawo yamuŋanda, ulabandika amukaintu wakwe nkaambo aaba bobilo “mubili omwe.” *—Mt. 19:6.
AMUMULEMEKE KRISTO NKAAMBO NGOMUTWE WAMBUNGANO
Jesu, ansi aabusilutwe bwa Jehova, ulapa busolozi kumbungano zya Bunakristo (Amubone muncali 14)
14. (a) Kweelana alugwalo lwa Marko 10:45, nkaambo nzi ncoceelela kuti Jehova wakasala Jesu kuba mutwe wambungano? (b) Mukuli nzi ngobajisi bamu Kabunga Keendelezya? (Amubone kabbokesi kakuti, “ Mukuli Ngobajisi Bamu Kabunga Keendelezya.”)
14 Kwiinda mucinunuzyo, Jehova wakamuula muntu uuli woonse mumbungano alimwi amuntu uuli woonse uumusyoma Jesu. (Amubale Marko 10:45; Mil. 20:28; 1Kor. 15:21, 22) Aboobo cileelela kuti wakasala Jesu, iwakaaba buumi bwakwe kacili cinunuzyo, kali mutwe wambungano. Nkakaambo kaako Jesu ulijisi nguzu zyakubikkila bantu, mikwasyi alimwi ambungano yoonse milawo njotweelede kutobela. Alimwi ulijisi nguzu zyakubona masimpe kuti tulaitobela milawo eeyo. (Gal. 6:2) Pele nzinji Jesu nzyatucitila kunze buyo lyakutubikkila milawo. Ulatuyanda alimwi akutulanganya.—Ef. 5:29.
15-16. Ncinzi ncotwiiya kuli nzyaakaamba mucizyi Marley amukwesu Benjamin?
15 Bacizyi balatondezya kuti balamulemeka Kristo kwiinda mukutobela busolozi bupegwa aabaalumi mbaakasala kuti kababalanganya. Bacizyi banji balaazuminizya majwi aamucizyi Marley uukkala ku United States aakuti: “Ndilabukkomanina busena mbondijisi mumbungano kandili mukaintu alimwi amucizyi. Ndeelede kubeleka canguzu kutegwa ndizumanane kubulanga munzila yeelede bubambe bwa Jehova bwabusilutwe. Pele balumi bangu alimwi abakwesu mumbungano bapa kuti cinduubile nkaambo balandilemeka alimwi akundilumba kumulimo ngondicita.”
16 Bakwesu balatondezya kuti balabulemeka bubambe bwabusilutwe kwiinda mukubalemeka bacizyi. Mukwesu Benjamin uukkala ku England wakaamba kuti: “Ndaiya zinji kuzwa kubwiinguzi bwabacizyi lyamiswaangano amizeezo kujatikizya mbokukambaukwa alimwi akuba bamayi bacibwene mumulimo wamumuunda. Mulimo ngobacita ulayandika kapati.”
17. Nkaambo nzi ncotweelede kulemeka bubambe bwabusilutwe?
17 Kuti boonse mumbungano, bamaalumi, bamakaintu, basilutwe bamikwasyi abaalu bamvwisya alimwi akulemeka njiisyo zyabusilutwe, mumbungano munooli luumuno. Alimwi kwiinda zyoonse, tupa bulemu kuli Taateesu siluyando, Jehova.—Int. 150:6.
LWIIMBO 123 Kulibombya Cakusyomeka Kubweendelezi bwa Leza
^ munc. 5 Ino bacizyi bajisi mulimo nzi mumbungano? Sena mukwesu uuli woonse ngusilutwe wamucizyi uuli woonse? Sena baalu alimwi abasilutwe bamikwasyi bajisi nguzu zyakweendelezya zikozyenye? Mucibalo eeci, tulabona Bbaibbele mbolitugwasya kwiingula mibuzyo eeyi.
^ munc. 5 Amubone muncali 6 wacibalo cakuti, “Amubagwasye Bamakaintu Banakristo,” icili mu Ngazi Yamulindizi yamu September 2020.
^ munc. 9 Amubone kabbokesi kakuti, “ Ndilili Mucizyi Nayelede Kusama Citambala?”
^ munc. 13 Kujatikizya makani aakuti nguni weelede kusalila mukwasyi mbungano, amubone muncali 17-19 wacibalo cakuti, “Amubulemeke Busena Mbobajisi Bamwi Mumbungano ya Jehova,” mu Ngazi Yamulindizi yamu August 2020.
^ munc. 59 Kutegwa muzyibe zinji kujatikizya makani aaya, amubone bbuku lyakuti “Amuzumanane Kukkala Muluyando lwa Leza,” muncali 209-212.
^ munc. 64 Kutegwa muzyibe zinji kujatikizya mukuli ngobajisi bamu Kabunga Keendelezya, amubone Ngazi Yamulindizi yamu July 15, 2013, peeji 20-25.
